1-2. Ano ang makabulig sa aton nga mahangpan ang nabatyagan ni Jehova sang ginpakalain ang iya ngalan?

 IMADYINA ini: Indi maayo ang ginsiling sang isa nga palangga mo parte sa imo. Kabalo ka nga indi matuod ang iya ginsiling, pero may pila nga nagpati sa iya. Ang malain pa kay ginsugid man nila ini sa iban, gani nagdamo pa gid ang nagpati sa kabutigan parte sa imo. Ano ang mabatyagan mo? Kon nagaulikid ka sa mga tawo kag kon importante sa imo ang imo maayo nga reputasyon, sigurado gid nga masakitan ka kay ginapakalain sang iban ang imo ngalan.​—Hulu. 22:1.

² Ini nga halimbawa nagabulig sa aton nga mahangpan ang nabatyagan ni Jehova sang ginguba ang iya reputasyon. May isa sia ka anghel nga nagsugid sing kabutigan sa una nga babayi nga si Eva, kag ginpatihan ini ni Eva. Bangod sa sini nga kabutigan, nagrebelde ang aton una nga mga ginikanan kay Jehova. Gani nangin makasasala ang tanan nga tawo kag nagakapatay. (Gen. 3:​1-6; Roma 5:12) Ang tanan nga problema sa kalibutan subong, pareho sang kamatayon, inaway, kag pag-antos, resulta sang mga kabutigan ni Satanas nga nag-umpisa sa hardin sang Eden. Nasakitan bala si Jehova sa mga kabutigan parte sa iya kag sa nangin resulta sini? Sigurado gid nga nasakitan sia. Pero wala sia nagdumot ukon naghinakit. Sa baylo, ‘malipayon gihapon sia nga Dios.’—1 Tim. 1:11.

3. Ano ang aton pribilehiyo?

³ May pribilehiyo kita nga pamatud-an nga indi matuod ang ginsugid ni Satanas parte kay Jehova. Mahimo naton ini paagi sa pagtuman sa sining simple nga sugo: “Dayawa ninyo ang ngalan ni Jehova.” (Sal. 113:1) Madayaw naton ang ngalan ni Jehova kon isugid naton sa iban ang mga kamatuoran parte sa iya. Dayawon mo bala ang ngalan ni Jehova? Binagbinagon naton ang tatlo ka rason nga magapalig-on sa aton nga dayawon sing bug-os tagipusuon ang ngalan sang aton Dios.

 NALIPAY SA ATON SI JEHOVA KON GINADAYAW NATON ANG IYA NGALAN

4. Ngaa nalipay si Jehova kon ginadayaw naton sia? Maghatag sing ilustrasyon. (Tan-awa man ang piktyur.)

⁴ Nalipay sa aton ang aton Amay sa langit kon ginadayaw naton ang iya ngalan. (Sal. 119:108) Sa bahin sang indi perpekto nga mga tawo, gusto gid nila nga dayawon sila para magnami ang ila pamatyag. Ti, amo man bala sini ang rason kon ngaa gusto sang labing gamhanan nga Dios nga dayawon naton sia? Indi. Binagbinaga ini nga ilustrasyon. Imadyina ang isa ka bata nga babayi nga nagdalagan pakadto sa iya amay. Dayon ginhakos niya ang iya amay kag ginsilingan niya sia, “Pa, ikaw gid ’ya ang pinaka-best nga Papa.” Nagyuhum ang amay kag nalipay gid sia sa iya bata. Ngaa? Bangod bala gusto gid niya nga ginadayaw sia sang iya bata kay naganami dayon ang iya pamatyag? Indi. Sa baylo, nalipay sia bangod ginapakita sang iya bata nga palangga niya sia kag ginapasalamatan sia sang iya bata. Kabalo sia nga makabulig ini nga mga kinaiya para mangin malipayon ang iya bata samtang nagadaku sia. Amo man ini ang mga rason kon ngaa nalipay gid ang aton pinakamaayo nga Amay nga si Jehova kon ginadayaw naton sia.

5. Kon ginadayaw naton ang ngalan sang Dios, ano nga kabutigan ang ginapamatud-an naton nga indi matuod?

⁵ Kon ginadayaw naton ang aton Amay sa langit, ginapamatud-an naton nga indi matuod ang ginsiling ni Satanas parte sa kada isa sa aton. Suno kay Satanas, wala sing tawo nga magaunong sa Dios kag magapangapin sa Iya ngalan. Nagsiling sia nga wala sing bisan isa sa aton nga magapabilin nga matutom sa Dios kon tilawan kita. Nagsiling sia nga magauntat kita tanan sa pag-alagad sa Dios para unahon ang aton kaugalingon nga kaayuhan. (Job 1:​9-11; 2:4) Pero ginpamatud-an sang matutom nga si Job nga butigon si Satanas. Magapabilin ka man bala nga matutom sa Dios? May pribilehiyo ang kada isa sa aton nga pangapinan ang aton Amay kag mapahalipay sia paagi sa pag-alagad sa iya sing matutom. (Hulu. 27:11) Isa gid ka kadungganan ang paghimo sini.

6. Paano naton mailog si Hari David kag ang mga Levinhon? (Nehemias 9:5)

⁶ Gusto gid sang mga nagapalangga kay Jehova nga dayawon ang iya ngalan sing bug-os tagipusuon. Nagsulat si Hari David: “Dayawon ko si Jehova; dayawon sang akon bug-os nga pagkatawo ang iya balaan nga ngalan.” (Sal. 103:1) Nahangpan ni David nga kon ginadayaw naton ang ngalan ni Jehova, si Jehova mismo ang aton ginadayaw. Kay man, kon mabatian naton ang ngalan ni Jehova, ginahunahuna naton ang iya reputasyon, ang tanan niya nga dalayawon nga mga kinaiya, kag ang tumalagsahon niya nga mga binuhatan. Para kay David, balaan ang ngalan sang iya Amay kag gusto niya ini dayawon. Nagsiling sia nga himuon niya ini sa ‘bug-os niya nga pagkatawo’ ukon sing bug-os tagipusuon. Ginpangunahan man sang mga Levinhon ang pagdayaw kay  Jehova. Mapainubuson sila nga nagsiling nga indi madayaw sing bug-os sang ila mga tinaga ang balaan nga ngalan ni Jehova. (Basaha ang Nehemias 9:5.) Sigurado gid nga nalipay si Jehova sa sining mapainubuson kag tinagipusuon nga pagdayaw sa iya.

7. Paano naton madayaw si Jehova sa aton pagbantala kag sa aton adlaw-adlaw nga pagkabuhi?

⁷ Subong, malipay sa aton si Jehova kon ginasugid naton sa iban ang parte sa iya. Dapat mabatyagan sang mga tawo nga nagapasalamat gid kita kay Jehova kag palangga gid naton sia. Kon nagabantala kita, dapat naton tandaan nga ang panguna naton nga katuyuan amo ang pagbulig sa mga tawo nga mangin suod kay Jehova. Gusto naton nga makilala man nila ang aton pinalangga nga Amay pareho sa aton pagkakilala sa iya. (Sant. 4:8) Nalipay kita nga itudlo sa mga tawo ang ginasiling sang Biblia parte kay Jehova nga nagapakita sang iya gugma, katarungan, kaalam, gahom, kag iban pa niya nga dalayawon nga mga kinaiya. Madayaw man naton si Jehova kag malipay sia sa aton kon ginapanikasugan naton nga ilugon sia. (Efe. 5:1) Kon himuon naton ini, makita sang mga tawo nga lain gid kita sa sining malain nga kalibutan, kag posible matingala sila. (Mat. 5:​14-16) Sa aton adlaw-adlaw nga pagkabuhi, may kahigayunan kita nga mapaathag sa ila kon ngaa lain kita sa iban. Kon himuon naton ini, mapalig-on ang sinsero nga mga tawo nga kilalahon ang aton Dios. Kon ginadayaw naton si Jehova sa aton pagbantala kag sa aton adlaw-adlaw nga pagkabuhi, nalipay gid sia.​—1 Tim. 2:​3, 4.

NALIPAY SA ATON SI JESUS KON GINADAYAW NATON ANG NGALAN NI JEHOVA

8. Kon parte sa pagdayaw sa ngalan ni Jehova, ano ang pinakaimportante nga ginhimo ni Jesus?

⁸ Sa tanan nga tinuga sa langit kag sa duta, si Jesus ang mas nakakilala kay Jehova. (Mat. 11:27) Palangga gid ni Jesus ang iya Amay, kag ginpakita niya nga importante gid sa iya ang pagdayaw sa ngalan ni Jehova. (Juan 14:31) Sang nangamuyo sia sa iya Amay sang gab-i antes sia napatay, ginsambit niya ang pinakaimportante nga ginhimo niya sa iya pagbantala diri sa duta. Nagsiling sia: “Ginpakilala ko ang imo ngalan.” (Juan 17:26) Paano ini ginhimo ni Jesus?

9. Ano nga ilustrasyon ang gingamit ni Jesus para mas makilala pa gid naton ang iya Amay?

⁹ Magluwas nga ginsugid ni Jesus sa mga tawo nga Jehova ang ngalan sang Dios, may ginhimo pa gid sia. Sa bahin sang mga Judiyo nga gintudluan ni Jesus, kabalo na sila kon ano ang ngalan sang Dios. Pero si Jesus amo ang nanguna sa ‘pagpaathag’ parte sa iya Amay. (Juan 1:​17, 18) Halimbawa, ginapakita sang Hebreong Kasulatan nga maluluy-on kag mainawaon si Jehova. (Ex. 34:​5-7) Pero nangin mas maathag pa gid ini nga mga kinaiya sang ginsugid ni Jesus ang ilustrasyon parte sa isa ka amay kag sa iya nagrebelde nga anak. Sa sini nga ilustrasyon, nakita sang amay ang iya naghinulsol nga anak “samtang malayo pa sia.” Gani nagdalagan sia para sugataon ang iya anak, dayon ginhakos niya sia, kag ginpatawad niya sia sing bug-os tagipusuon. Paagi sa sini nga ilustrasyon, nangin mas maathag pa gid sa aton kon daw ano ka maluluy-on kag mainawaon si Jehova. (Luc. 15:​11-32) Gani ginbuligan kita ni Jesus nga mas makilala pa gid ang iya Amay.

10. (a) Ngaa masiling naton nga gingamit ni Jesus ang personal nga ngalan sang iya Amay kag gusto niya nga amo man sini ang himuon sang iban? (Tan-awa man ang piktyur.) (Marcos 5:19) (b) Ano ang gusto ni Jesus nga himuon naton subong?

¹⁰ Gusto man bala ni Jesus nga gamiton sang iban ang personal nga ngalan sang iya Amay? Huo. Sang panahon ni Jesus, posible nagapati ang pila ka lider sang relihion nga indi dapat pagsambiton ang ngalan sang Dios kay balaan ini katama. Pero isa ini ka tradisyon nga wala nabase sa Kasulatan, gani wala ini nakapugong kay Jesus sa pagdayaw sa ngalan sang iya Amay. Binagbinaga ang tion nga gin-ayo ni Jesus ang isa ka lalaki nga ginsudlan sang mga demonyo sa rehiyon sang mga taga-Gerasa. Hinadlukan ang mga tawo didto kag ginpangabay nila si Jesus nga maghalin sa ila lugar, gani naglakat si Jesus. (Mar. 5:​16, 17)  Pero, gusto ni Jesus nga makilala sang mga tawo didto si Jehova. Gani ginsilingan niya ang lalaki nga gin-ayo niya nga isugid ini sa mga tawo. Puede kuntani nga silingan sia ni Jesus nga isugid sa mga tawo ang ginhimo niya sa iya, pero ginsilingan sia ni Jesus nga isugid niya sa mga tawo ang ginhimo sa iya ni Jehova. (Basaha ang Marcos 5:19.) a Subong, gusto man ni Jesus nga ipakilala naton ang ngalan sang iya Amay sa bilog nga kalibutan. (Mat. 24:14; 28:​19, 20) Kon himuon naton ini, malipay sa aton ang aton Hari nga si Jesus.

11. Ano ang gintudlo ni Jesus sa iya mga sumulunod nga dapat nila ipangamuyo, kag ngaa importante ini? (Ezequiel 36:23)

¹¹ Kabalo si Jesus nga katuyuan ni Jehova nga pakabalaanon ang Iya ngalan, ukon pamatud-an Niya nga indi matuod ang mga kabutigan nga ginsugid parte sa Iya. Gani gintudluan sang aton Agalon ang iya mga sumulunod nga ipangamuyo ini: “Amay namon nga yara sa langit, pakabalaanon ang imo ngalan.” (Mat. 6:9) Nahangpan ni Jesus nga amo ini ang pinakaimportante nga isyu nga nagadalahig sa tanan nga tinuga. (Basaha ang Ezequiel 36:23.) Sa tanan nga tinuga sa bilog nga uniberso, si Jesus ang may pinakamadamo nga ginhimo para pakabalaanon ang ngalan ni Jehova. Pero sang gindakop si Jesus sang iya mga kaaway, gin-akusahan nila sia nga ginpasipalahan kuno niya ang ngalan sang iya Amay. Sigurado gid nga para kay Jesus, ang pagpasipala sa balaan nga ngalan sang iya Amay amo ang pinakadaku nga sala. Gani naglalain gid sia kay posible sentensiahan sia sa sala nga gin-akusar sa iya. Posible nga amo ini ang panguna nga rason kon ngaa nakabatyag si Jesus sang “daku nga kasakit” antes sia gindakop.​—Luc. 22:​41-44.

12. Paano ginpakabalaan ni Jesus ang ngalan sang iya Amay sa pinakadalayawon nga paagi?

¹² Para mapakabalaan ni Jesus ang ngalan sang iya Amay, ginbatas niya ang pagsakit sa iya, ang mga pag-insulto sa iya, kag ang pagpakalain sa iya. Kabalo sia nga gintuman niya ang tanan nga ginsugo sang iya Amay, gani wala sia sing dapat ikahuya. (Heb. 12:2) Kabalo man sia nga samtang ara sia sa mabudlay nga sitwasyon, direkta sia nga ginasalakay ni Satanas. (Luc. 22:​2-4; 23:​33, 34) Gusto gid ni Satanas nga magkompromiso si Jesus, pero napaslawan gid sia. Ginpamatud-an ni Jesus nga butigon si Satanas. Ginpamatud-an man niya nga may mainunungon nga mga alagad si Jehova nga nagapabilin nga matutom bisan sa pinakamabudlay nga mga pagtilaw.

13. Ano ang himuon mo para malipay sa imo ang aton Hari?

 ¹³ Gusto mo bala nga malipay sa imo ang aton Hari nga si Jesus? Padayon nga dayawa ang ngalan ni Jehova paagi sa pagbulig sa iban nga matun-an ang tanan nga dalayawon nga mga kinaiya sang aton Dios. Kon himuon mo ini, ginailog mo si Jesus. (1 Ped. 2:21) Ginapamatud-an mo man nga butigon kag wala sing huya ang kaaway ni Jehova nga si Satanas. Kag pareho kay Jesus, malipay sa imo si Jehova.

MAKALUWAS SING KABUHI ANG PAGDAYAW SA NGALAN NI JEHOVA

14-15. Ano ang tumalagsahon nga mga resulta sang aton pagtudlo sa mga tawo parte kay Jehova?

¹⁴ Kon ginadayaw naton ang ngalan ni Jehova, nagabulig kita para maluwas ang mga tawo. Paano? ‘Ginbulag ni Satanas ang mga hunahuna sang mga indi tumuluo.’ (2 Cor. 4:4) Bangod sini, nagpati sila sa mga kabutigan ni Satanas. Nalakip sa sini ang panudlo nga wala sing Dios, malayo sa aton ang Dios kag wala sia labot sa nagakatabo sa mga tawo, kag mapintas ang Dios kag ginapaantos niya sing wala sing katapusan ang mga makasasala. Ginasugid ni Satanas ini nga mga kabutigan bangod gusto niya nga gub-on ang ngalan kag reputasyon ni Jehova para magpalayo ang mga tawo sa Iya. Pero sa kada tion nga nagabantala kita, ginapunggan naton ang gusto ni Satanas nga matabo. Bangod ginatudluan naton ang mga tawo sang kamatuoran parte sa aton Amay, ginadayaw naton ang balaan nga ngalan sang aton Dios. Ano ang resulta sang aton pagtudlo sa ila?

¹⁵ Gamhanan gid ang mga kamatuoran sa Pulong sang Dios. Tumalagsahon ang mga resulta sang aton pagtudlo sa mga tawo sang kamatuoran parte kay Jehova. Nangin maathag sa ila nga kabutigan gali ang mga ginasugid ni Satanas, kag amat-amat nila nga nakita ang dalayawon nga mga kinaiya sang aton Amay. Gindayaw nila sia bangod indi matupungan ang iya gahom. (Isa. 40:26) Natun-an nila nga magsalig sa iya bangod perpekto niya nga ginapakita ang katarungan. (Deut. 32:4) Nakabulig sa ila ang iya indi matungkad nga kaalam. (Isa. 55:9; Roma 11:33) Kag naumpawan sila sang natun-an nila nga ang Dios gugma. (1 Juan 4:8) Samtang nagasuod sila kay Jehova, mas nagabakod ang ila pagsalig nga may paglaum sila nga mabuhi sing wala sing katapusan bilang iya mga anak. Isa gid ka daku nga kadungganan para sa aton nga buligan ang mga tawo nga mangin suod sa aton Amay. Kon ginahimo naton ini, ginakabig kita ni  Jehova bilang iya “mga masigkamanugpangabudlay.”​—1 Cor. 3:​5, 9.

16. Ano ang nangin epekto sa iban sang natun-an nila nga may ngalan gali ang Dios? Maghatag sing halimbawa.

¹⁶ Kon ginatudluan naton ang mga tawo, posible nga ginaumpisahan naton ini paagi sa pagsugid sa ila nga Jehova ang ngalan sang Dios. Makapabag-o gid ini sa kabuhi sang sinsero nga mga tawo. Binagbinaga ang halimbawa sang isa ka pamatan-on nga babayi nga si Aaliyah. b Indi Cristiano ang ila pamilya. Wala sia nanamian sa ila relihion kag pamatyag niya indi sia suod sa Dios. Pero nagbag-o ang iya pagtamod sa Dios sang nag-Bible study sia upod sa mga Saksi. Ginkabig na niya ang Dios bilang iya Abyan. Daw indi sia makapati nga ginkuha ang ngalan sang Dios sa madamo nga Biblia kag ginbuslan ini sing mga titulo pareho sang Ginuo. Nagbag-o gid ang iya kabuhi sang natun-an niya ang parte sa ngalan ni Jehova. Nagsiling sia: “May ngalan ang akon pinakamaayo nga Abyan.” Ano ang nangin epekto sini sa iya? Nagsiling sia: “Kanami gid sang akon pamatyag subong. Grabe gid ang akon kalipay.” Binagbinaga man si Steve nga isa ka Judiyo nga musikero. Estrikto nga ginasunod sang ila pamilya ang panudlo sang mga Judiyo. Indi niya gusto nga mag-entra sa mga relihion bangod nakita niya nga wala man ginaaplikar sang mga miembro sini ang ila mga ginatudlo. Pero sang tion nga grabe ang iya kasubo bangod napatay ang iya iloy, nagpasugot sia nga mamati samtang gina-Bible study sang isa ka Saksi ni Jehova ang iya abyan. Nalipay gid sia sang natun-an niya nga may ngalan gali ang Dios. Nagsiling sia: “Wala gid ako kabalo nga may ngalan gali ang Dios.” Nagsiling pa sia: “Narealisar ko nga may ara gid Dios kag matuod gid sia. Sugod sadto, ginkabig ko ang Dios bilang akon Abyan.”

17. Ngaa gusto mo nga padayon nga dayawon ang ngalan ni Jehova? (Tan-awa man ang piktyur.)

¹⁷ Kon ginabantalaan kag ginatudluan mo ang mga tawo, ginasugid mo bala sa ila ang balaan nga ngalan ni Jehova? Ginatudluan mo bala sila sang kamatuoran parte sa aton Dios? Kon ginahimo mo ini, ginadayaw mo ang ngalan sang Dios. Kabay pa nga padayon mo nga dayawon ang balaan nga ngalan ni Jehova paagi sa pagbulig sa mga tawo nga makilala sia sing maayo. Kon himuon mo ini, ginabuligan mo sila nga maluwas. Ginailog mo man ang imo Hari nga si Cristo Jesus. Kag labaw sa tanan, malipay sa imo ang imo mahigugmaon nga Amay nga si Jehova. Kabay pa nga ‘dayawon mo ang iya ngalan asta sa wala sing katubtuban.’—Sal. 145:2.