1-2. Iehova ena ladana idia hadikaia dainai ia abia hemami ita lalopararalaia totona, dahaka ese ita do ia durua?

 MANI inai oi laloa: Oi lalokau henia tauna ta be oi totona hereva koikoidia ia gwauraia. Oi diba unai hereva be koikoi; to haida ese idia abia dae. Danu, unai hereva koikoi be ma haida dekenai idia herevalaia bona momo ese idia abia dae. Emu hemami be do edena bamona? Bema taunimanima bona emu ladana namona oi laloa bada, reana idia gwauraia hereva koikoi dekenai do oi lalohisihisi, ani?—Aon. 22:1.

² Unai haheitalai ese ita ia durua Iehova ena ladana idia hadikaia neganai, ia abia hemami ita lalopararalaia totona. Iena aneru ta ese hahine ginigunana Heva dekenai ia totona hereva koikoi ia gwauraia. Bona Heva ese unai ia abia dae. Unai koikoi herevana dainai Adamu bona Heva ese Iehova idia gwau-edeede henia. Unai dainai, taunimanima ibounai idia kara dika bona idia mase. (Gen. 3:​1-6; Roma 5:12) Satani ese Eden umana ai ia gwauraia koikoi herevana dainai, hari tanobada ai hekwakwanai momo idia vara noho, hegeregere tuari, mase bona hisihisi idauidau. Unai koikoi herevadia bona idia vara dika dainai, Iehova ena hemami be edena bamona? Ia lalohisihisi bada. To ia badu lasi, badina ia be “moale Diravana.”—1 Tim. 1:11.

3. Dahaka hahenamo ita abia?

³ Ita hamomokania diba Satani ese Iehova totona hereva koikoi ia gwauraia, bona unai ita karaia dalana be inai oda herevana  ita badinaia: ‘Iehova ena ladana ita hanamoa.’ (Sal. 113:1) Ma haida dekenai Iehova ena hereva momokani ita gwauraia neganai, iena ladana ita hanamoa. Oi be unai bamona do oi karaia, a? Mai kudouna ibounai ida Dirava ena ladana ita hanamoa totona, ita do ia durua badina toi mani ita herevalaia.

IEHOVA ENA LADANA ITA HANAMOA NEGANAI IA MOALE

4. Dahaka dainai Iehova ena ladana ita hanamoa neganai ia moale? (Laulau itaia danu.)

⁴ Iseda guba Tamana ena ladana ita hanamoa neganai, ia moale. (Sal. 119:108) Goevadae lasi taudia be idia ura ma haida ese do idia hanamoa, unai amo goada do idia abia. To siahu ibounai Diravana be unai bamona lasi. Mani inai haheitalai ita laloa: Kekeni maragina ta be ena tamana dekenai ia heau lao bona ia rosia bona ia hamaoroa, “Oi be tama namona!” Tamana be ia kiri bona moale bada. Dahaka dainai? Do ita gwau tamana ia ura ena natuna ese do ia hanamoa unai amo goada do ia abia, a? Lasi. Tamana ese iena natuna ia lalokau henia bona ia moale, badina ena natuna ese lalokau bona tanikiu karana ia hahedinaraia. Ia diba ena natuna ia bada lalonai, mai moale ida do ia noho badina unai kara namodia ia hahedinaraia. Unai hegeregerena, Iehova, Tamana hereadaena, ita hanamoa neganai ia moale bada.

5. Iehova ena ladana ita hanamoa neganai, edena hereva ita hakoikoia?

⁵ Iseda guba Tamana ita hanamoa neganai, Satani ese ita totona ia gwauraia herevana ita hakoikoia. Satani ia gwau ta be mai abidadama ida Dirava ena ladana do ia gimaia lasi. Bona hahetoho ia davaria neganai Dirava do ia badinaia lasi. Danu ia gwau ita ibounai be iseda namo totona Dirava hesiai henia karana ita hadokoa diba. (Iobu 1:​9-11; 2:4) To abidadama tauna Iobu ese Satani ena hereva ia hakoikoia. Oi danu be unai bamona do oi karaia, a? Ita ta ta be abia hidi ita karaia diba, iseda Tamana ena ladana ita gimaia bona mai abidadama ida ia ita hesiai henia totona. (Aon. 27:11) Unai ita karaia be hahenamo badana.

6. Edena dala ai King Davida bona Levi taudia ita tohotohoa diba? (Nehemia 9:5)

⁶ Dirava idia lalokau henia taudia be mai kudouna ibounai ida iena ladana idia hanamoa. King Davida ia gwau: “Iehova lau hanamoa be namo. Mai egu lalona ibounai ida iena ladana helagana lau hanamoa be namo.” (Sal. 103:1) Davida ia laloparara Iehova ena ladana ita hanamoa neganai, ita be Iehova ita hanamoa. Iehova ena ladana ita kamonai  neganai, ia bona ena kara namodia ita laloa. Davida ia ura ena Tamana ena ladana ia hahelagaia bona hanamoa. Danu ia ura mai “lalona ibounai” ida unai ia karaia. Unai hegeregerena, Levi taudia be Iehova hanamoa karana idia laloa bada. Mai manau ida idia gwau edia hereva sibona amo Iehova ena ladana idia hanamoa be hegeregere lasi. (Nehemia 9:5 duahia.) Momokani, mai manau bona lalona ibounai ida Iehova idia hanamoa dainai Ia moale.

7. Edena dala ai iseda haroro gaukara bona dina ta ta maurina ai Iehova ita hanamoa?

⁷ Hari, mai lalokau bona tanikiu ida Iehova ita herevalaia karana amo ia ita hanamoa. Mai haida ita haroro henia neganai, iseda tahua gauna be idia ita durua Iehova kahirakahira idia lao bona iseda lalokau Tamana ita laloa hegeregerena do idia laloa. (Iam. 4:8) Ita moale bada badina Baibel ese Iehova ia herevalaia dalana be taunimanima dekenai ita hahedinaraia, hegeregere iena lalokau, hahemaoro goeva, aonega, siahu, bona ena kara namodia ma haida. Danu ita gaukara goada Iehova ena kara namodia ita tohotohoa neganai ia ita hanamoa. (Efe. 5:1) Unai amo, ma haida do idia itaia ita be inai tanobada taudia amo ita idau. (Mat. 5:​14-16) Bena idia ida ita herevahereva neganai, unai bamona ita karaia ena badina ita herevalaia diba. Bona unai ese dala ia kehoa, kudou maoro taudia be Iehova kahirakahira idia lao. Unai bamona dala idauidau ai Iehova ita hanamoa neganai, iena kudouna ita hamoalea.—1 Tim. 2:​3, 4.

IEHOVA ENA LADANA ITA HANAMOA NEGANAI IESU IA MOALE

8. Edena dala ai Iehova ena ladana hanamoa karana dekenai Iesu be haheitalai namona?

⁸ Iesu be ena tamana ia diba namonamo, guba bona tanobada ai ta be unai bamona lasi. (Mat. 11:27) Iesu be ena Tamana ia lalokau henia, bona Iehova ena ladana hanamoa karana ia laloa bada. (Ioa. 14:31) Danu, do ia mase hanuaboina ai, ena Tamana dekenai ia guriguri bona tanobada ai ia karaia haroro gaukarana ia gwauraia, ia gwau: “Lau ese emu ladana be idia dekenai lau gwauraia hedinarai vadaen.” (Ioa. 17:26) Edena dala ai unai ia karaia?

9. Iesu ese edena parabole ia gaukaralaia ena Tamana ia herevalaia namonamo totona?

⁹ Iesu ese taunimanima dekenai Dirava ena ladana, Iehova ia hadibaia bona gau ma haida ia karaia danu. Bona ia hadibaia Iuda taudia be Dirava ena ladana idia diba vadaeni. To Iesu “sibona ese Dirava ia gwauraia hedinarai.” (Ioa. 1:​17, 18) Hegeregere, Heberu Toretoredia ese idia hahedinaraia Iehova be hebogahisi Diravana. (Eso. 34:​5-7) Iesu ese unai ia hahedinaraia namonamo totona, boio natuna bona ena tamana edia parabole ia gaukaralaia. Siri ese ia hahedinaraia ia helalo-kerehai natuna be “daudau amo ia mai noho lalonai,” ena tamana ese ia itaia, bena ia heau lao, ia rosia bona mai kudouna ibounai ida ena dika ia gwauatao. Unai ese Iehova ena hebogahisi karana ia hahedinaraia goevagoeva. (Luka 15:​11-32) Oibe, Iesu ese ena Tamana ia herevalaia namonamo.

10. (a) Edena bamona ita diba Iesu ese ena Tamana ena ladana ia gaukaralaia bona ia ura ma haida danu be unai bamona idia karaia? (Mareko 5:19) (Laulau itaia danu.) (b) Hari Iesu ia ura dahaka ita karaia?

¹⁰ Iesu ia ura ma haida ese ena Tamana ena ladana idia gaukaralaia, a? Oibe. Dubu gunalaia taudia haida idia abia dae Dirava ena ladana gwauraia karana be hemataurai karana lasi, to Iesu be taunimanima edia lalohadai ese ia koua lasi ena Tamana ena ladana ia hahelagaia totona. Mani Gerasa tanona ai demoni ese idia biagua tauna ia hanamoa negana  oi laloa. Taunimanima idia gari bona Iesu idia noia unai gabu do ia rakatania, unai dainai unuseni ia noho lasi. (Mar. 5:​16, 17) To, Iesu ia ura unai gabu ai idia noho taudia ese Iehova ena ladana do idia dibaia. Unai dainai, ena gorere ia hanamoa tauna ia hamaoroa, taunimanima dekenai Iehova ese ia karaia gaudia do ia herevalaia. (Mareko 5:19 duahia.) a Hari danu, Iesu ia ura tanobada hegegemadai ai ena Tamana ena ladana ita gwauraia hedinarai! (Mat. 24:14; 28:​19, 20) Unai ita karaia neganai, iseda King, Iesu, ita hamoalea.

11. Iesu murinai idia raka taudia ia hadibaia dahaka totona do idia guriguri, bona dahaka dainai unai be mai anina bada? (Esekiela 36:23)

¹¹ Iesu ia diba Iehova ena ura be Ena ladana do ia hahelagaia, unai amo ia totona idia gwauraia herevadia do ia hakoikoia. Unai dainai iseda biaguna ese inai guriguri dalana ia hadibaia: “Aiemai Tamana guba dekenai oi noho, namona be ibounai ese emu ladana idia hahelagaia.” (Mat. 6:9) Iesu ia laloparara taunimanima ibounai ese Iehova ena ladana idia hahelagaia be mai anina bada. (Esekiela 36:23 duahia.) Guba bona tanobada ai, ta be Iesu hegeregerena lasi, badina ia be Iehova ena ladana ia hahelagaia momokani. To Iesu idia dogoatao neganai, ena inai taudia idia gwau ia be ena Tamana ia matauraia lasi! Iesu ia diba ena Tamana ena ladana helagana hadikaia karana be kara dika badana. Bona ia diba, ena inai taudia be unai hereva amo ia do idia samania koikoi. Reana unai badina dainai, Iesu do idia dogoatao negana ia kahirakahira lalonai, ia “lalohisihisi bada.”—Luka 22:​41-44.

12. Edena dala hereadaena amo Iesu be ena Tamana ena ladana ia hahelagaia?

¹² Ena be Iesu idia hahisia, gwauraia dika, bona idia samania koikoi, to ia haheauka bona unai ese ena Tamana ena ladana ia hahelagaia. Ia diba gau ibounai lalonai ena Tamana ia kamonai henia, unai dainai do ia abia hemaraina ia laloa lasi. (Heb. 12:2) Danu ia diba unai nega aukadia lalonai, Satani ese ia dagedage henia noho. (Luka 22:​2-4; 23:​33, 34) Satani ia laloa Iesu ena badinaia karana do ia hadikaia, to ia kwalimu lasi! Iesu ese ia hamomokania Satani be koikoi tauna bona Iehova  idia abidadama henia taudia be hekwakwanai idia davaria neganai, ia do idia badinaia noho!

13. Edena dala ai emu King oi hamoalea diba?

¹³ Oi ura emu King oi hamoalea, a? Iehova ena ladana oi hanamoa noho, bona ma haida oi durua iseda Dirava ena kara namodia idia dibaia totona. Unai bamona oi karaia neganai, oi be Iesu oi tohotohoa. (1 Pet. 2:21) Unai amo, Iehova do oi hamoalea bona do oi hamomokania, Iena inai tauna, Satani be koikoi tauna!

IEHOVA ENA LADANA ITA HANAMOA NEGANAI MA HAIDA ITA HAMAURIA

14-15. Ma haida dekenai Iehova ita herevalaia neganai, dahaka namo idia vara?

¹⁴ Iehova ena ladana ita hanamoa neganai, ma haida ita hamauria. Edena dala ai? Satani ese taunimanima edia “lalona ia hadiburaia.” (2 Kor. 4:4) Unai dainai, Satani ena koikoi herevadia idia abia dae, hegeregere: Dirava ia noho lasi, Dirava be ita amo ia noho daudau bona ita ia laloa lasi, Dirava be kara auka tauna bona hanaihanai kara dika taudia ia hahisia. Satani ese unai koikoi herevadia ia gwauraia, badina ia ura Iehova ena ladana namona ia hadikaia bona taunimanima ia koua Iehova kahirakahira idia lao totona. To ita haroro neganai unai ese Satani ia koua ena ura ia hagugurua totona. Taunimanima dekenai iseda guba Tamana ena hereva momokani ita hadibaia, bona Dirava ena ladana helagana ita hanamoa. Unai dainai dahaka namo ia vara?

¹⁵ Dirava ena Hereva momokanidia be mai edia siahu. Taunimanima dekenai Iehova bona ena kara namodia ita hadibaia neganai, anina namona ia havaraia. Taunimanima be Satani ena koikoi herevadia idia badinaia lasi bona iseda Tamana ena kara namodia idia itaia matamaia. Bona Iehova ena siahu dekenai idia hoa. (Isa. 40:26) Idia itaia iena kara ibounai be maoromaoro dainai ia idia abidadama henia. (Deu. 32:4) Danu iena aonega amo gau momo idia dibaia. (Isa. 55:9; Roma 11:33) Idia dibaia gauna ta be, ia be lalokau Diravana, bona unai ese idia ia hagoadaia. (1 Ioa. 4:8) Iehova kahirakahira idia lao neganai, idia abia dae mauri hanaihanai helarona be do ia vara momokani. Taunimanima ita durua edia Tamana kahirakahira idia lao  be hahenamo badana! Unai ita karaia neganai, Iehova ia abia dae ita be ia ida ita “gaukara hebou taudia.”—1 Kor. 3:​5, 9.

16. Haida be Dirava ena ladana idia dibaia neganai, dahaka idia karaia? Haheitalai gwauraia.

¹⁶ Taunimanima ita hadibaia neganai, reana Dirava ena ladana, Iehova, ita hadibaia guna. Unai ese kudou maoro tauna ena mauri ia haidaua diba. Hegeregere, hahine matamata Aaliyah b be Keristani lasi ruma besena lalonai ia tubu. Unai dainai, ena tomadiho ena hadibaia dalana ia moalelaia lasi, bona ia mamia Dirava kahirakahira ia noho lasi. To Witnes taudia ida ia stadi matamaia neganai, ena lalohadai ia idau. Dirava be ena turana ai ia halaoa matamaia. Bona ia hoa badina Baibel momo lalonai Dirava ena ladana idia kokia bona ena gabu ai dagi ladadia idia torea, hegeregere Lohiabada. Iehova ena ladana ia dibaia karana ese ena mauri ia haidaua momokani. Ia gwau: “Egu Turana be mai ena ladana!” Unai dainai, ia gwau: “Hari egu kudouna ai maino ia noho bona Iehova ena ladana lau diba be hahenamo badana.” Tau ta ladana Steve be Iuda amo bona ia be ane ia abia tauna. Ia ura lasi tomadiho oreana ta ia bamoa, badina koikoi karadia momo ia itaia. To ena sinana ia mase murinai, Iehova ena Witnes taudia ese idia karaia Baibel stadi ta dekenai ia helai. Bena Dirava ena ladana ia dibaia neganai ia moale bada. Ia gwau: “Guna Dirava ena ladana lau diba lasi.” Ma ia gwau: “Unai be egu nega ginigunana, lau laloparara Dirava be ia noho momokani! Lau mamia ia be Tau korikorina bamona. Bona lau diba Turana ta lau davaria.”

17. Dahaka dainai oi ura Iehova ena ladana oi hanamoa noho? (Laulau itaia danu.)

¹⁷ Emu haroro bona hadibaia gaukarana lalonai, taunimanima dekenai Iehova ena ladana helagana oi herevalaia, a? Idia oi durua Dirava idia dibaia namonamo totona, a? Unai oi karaia neganai, oi ese Dirava ena ladana oi hanamoa. Namona be taunimanima oi durua Iehova ena kara namodia idia dibaia, unai amo Iena ladana helagana do oi hanamoa noho. Unai dala amo, taunimanima do oi hamauria. Danu do oi hahedinaraia, iseda King, Keriso Iesu, oi tohotohoa. Bona mai anina bada gauna be, emu lalokau Tamana, Iehova, do oi hamoalea. Namona be ena “ladana do [oi] hanamoa ela bona hanaihanai”!—Sal. 145:2.