1-2. Wat help us see how Jehovah had feel wen his good rep wen get mess up?

 TRY picha dis, somebody you kea about say someting real bad about you. You know az not da trut, but some guys believe um. Moa worse, dey tell odda peopo dat lie, an dey believe um too. How you would feel? If you kea about peopo an wat dey tink about yoa good rep, dose lies would make you feel junk aah?​—Smart Guys 22:1.

² Dis help us fo see how Jehovah wen feel wen his rep wen get damage. One of his angels wen bulai about Him to da firs wahine, Eve, an she wen believe um. An cuz of dat bulai, Adam an Eve wen go agains Jehovah. An dass how come erybody sin an mahke. (Start 3:1-6; Rome 5:12) So all da problems we get in da world today, death, war, suffaring, we get um cuz da bulais dat Satan wen start fo tell in da Eden garden. You tink Jehovah feel hurt from dose lies an all da problems dat it wen cause? Garans he wen feel hurt. Still yet, Jehovah not salty an he no hold one grudge. Radda, he still stay da happy God.”​—1 Tim 1:11.

3. Wat we get chance fo do?

³ We get chance fo help prove dat Satan wen bulai about Jehovah wen we, “Tell how awesome Jehovah’s name.” (Songs 113:1, NWT.) We do dat by telling oddas da trut about Jehovah. You going do dat? We go look at three tings dat going really make us like go all out fo tell how awesome Jehovah’s name.

 WE MAKE JEHOVAH HAPPY WEN WE TELL HOW AWESOME HIS NAME

4. Try tell how we know it make Jehovah happy wen we tell awesome tings about his name. (Go look da picha.)

⁴ Wen we tell awesome tings about Jehovah’s name, we make him happy. (Songs 119:108) You tink dat mean dat Jehovah is like peopo who dying fo have oddas tell how awesome dem jus fo feel good about demself? No. Try tink about dis. One litto girl run to her faddah, an hug him an say, “You da bestes daddy eva!” Da faddah is so happy wen his bebe girl do dis. How come? Az not cuz he need his daughtah fo tell him he awesome so dat he can feel good about himself. But is cuz he love his girl an he happy she show she love him an is tankful fo him. He know dat having dat kine qualities going help her fo be moa happy wen she grow up. Same lidat, oua faddah Jehovah is happy wen we tell awesome tings about him.

5. Wat lie we prove no stay true wen we tell Jehovah awesome?

⁵ Wen we tell awesome tings about Jehovah, we help fo prove anodda lie dat Satan wen tell is not true, one lie about us. Satan wen say dat nobody going stick to Jehovah, defend his name, o stay faithful to him wen get presha. He say dat we would stop serving Jehovah if we thought would be moa betta fo us do dat. (Job 1:9-11, NWT; 2:4) But Job wen prove Satan one bulaia an wen stay faithful to Jehovah. You going do dat too? Ery one of us get da chance fo make Jehovah happy by standing up fo his name an staying faithful to him. (Smart Guys 27:11) Dass unreal we can do dat.

6. How we can copy King David an da Levi ohana? (Nehemiah 9:5, NWT.)

⁶ Jehovah’s peopo love fo tell how awesome his name. King David wen go write down, “I like tell how awesome Jehovah. Eryting inside me like tell awesome tings about his spesho name.” (Songs 103:1, NWT.) David knew dat wen we tell awesome tings about Jehovah’s name, dass da same az telling awesome tings about Jehovah. Jehovah’s name stay conneckted to his rep, so dat make us tink about his beautiful qualities an da unreal stuff he do. David wanted fo respeck his Faddah’s name an treat um az real spesho. He wanted fo do dat wit his whole heart, wit “eryting inside” him. Da Levi ohana wen  feel da same an wen tell awesome tings about Jehovah too. Dey was humbo an wen say dat dey could neva tell enuff how awesome Jehovah’s spesho name stay. (Read um Nehemiah 9:5, NWT.) Garuntee, dea humbo words wen make Jehovah real happy.

7. Eryday an wen we preach, how we can tell awesome tings about Jehovah?

⁷ Today we can make Jehovah happy by talking about him in one way dat show we tankful an dat we love him. Wen we go preach, da main ting we like do is help peopo fo come close to Jehovah an fo love him like we do. (Jam 4:8) We happy fo show peopo how da Bible talk about Jehovah’s qualities like how he get plenny love, he fair, how akamai him, an how much powa he get. We show Jehovah awesome wen we try hard fo copy him, an dat make him happy. (Efe 5:1) Wen we do dat, we stan out in dis world. Peopo going see dat we diffren, an dey going wonda how come we lidat. (Mat 5:14-16, NWT.) Maybe wen we stay aroun dem we going get chance fo explain to dem how come we ack da way we ack. Wen dat happen, peopo wit one good heart going like come close to God. Wen we show Jehovah he awesome lidis, we make his heart so happy.​—1 Tim 2:3, 4.

WEN WE TELL JEHOVAH’S NAME AWESOME, WE MAKE JESUS HAPPY

8. How Jesus wen set da bes exampo in telling awesome tings about Jehovah’s name?

⁸ Nobody in heaven o on da earth know Jehovah moa betta den Jesus. (Mat 11:27) Jesus love his Faddah an he wen set da bes exampo of how fo tell awesome tings about His name. (John 14:31) Da night befoa Jesus wen mahke, he wen pray an talk about da mos importan ting he wen do in his ministry on earth. He wen say, “I wen tell dem about yoa name.” (John 17:26, NWT.) How Jesus wen do dat?

9. Wat story Jesus wen tell fo show da kine person his Faddah is?

⁹ Jesus neva ony tell peopo dat God’s name is Jehovah. Da Jew guys Jesus wen teach wen awready know dat. Jesus was da bes “one dat wen show how God stay,” fo real. (John 1:17, 18) Like how da Hebrew scripchas wen show dat Jehovah get pity an feel fo peopo. (Egypt 34:5-7) Jesus wen paint one picha of dat wen he wen tell da story of da los boy an his faddah. Wen dis boy who was sorry was “still far from da house” his faddah wen run up to him, give um one hug an kiss, an wen fogive him from da heart. Dis wen show one clear picha of how Jehovah get pity fo peopo an he feel fo dem. (Luk 15:11-32) Jesus wen help peopo see wat kine person his Faddah is.

10. (a) How we know dat Jesus wen use his Faddah’s name an he like oddas use um too? (Mark 5:19, NWT.) (Go look da picha.) (b) Wat Jesus like us do today?

¹⁰ You tink Jesus wanted peopo use his Faddah’s name? Garuntee. Some of da religious leadas dat time wen tink was kapu fo use Jehovah’s name. But Jesus neva let dat wrong kine tinking stop him from using his Faddah’s name. Rememba da time Jesus wen heal da guy from da Gerasenes who had da bad kine spirits. Da peopo ova dea wen come sked an wen tell Jesus fo go away, so he wen leave.  (Mar 5:16, 17) But still yet, Jesus wanted erybody dea fo know Jehovah’s name. So Jesus wen tell da guy he wen heal fo tell peopo, was Jehovah da one who wen heal um, not him. (Read um Mark 5:19, NWT.) a He like us do da same ting today, he like us tell erybody all ova da world about his Faddah’s name! (Mat 24:14; 28:19, 20) Wen we do dat, we make oua King, Jesus, happy.

11. Wat Jesus wen teach his followas fo pray fo, an why dass importan? (Ezekiel 36:23, NWT.)

¹¹ Jesus had know dat Jehovah’s goal is fo peopo respeck his name an prove dat all da bad tings sed about Him is all lies. Dass how come Jesus wen teach his followas fo pray, “Oua Faddah in da heaven, we pray dat peopo get plenny respeck fo yoa name.” (Mat 6:9, NWT.) Jesus knew dat dis is da bigges issue dat affeck erybody in heaven an on earth. (Read um Ezekiel 36:23, NWT.) No human o angel eva wen do moa den Jesus fo show respeck fo Jehovah’s name. Wen Jesus wen get arrested, wat bad ting dey had tell he wen do? Disrespeck his Faddah! To Jesus, fo make his Faddah’s name look bad an fo disrespeck um was da mos worstes ting. Fo get charged an convicted of dis crime wen bodda him plenny. Maybe dass how come Jesus wen suffa so plenny befoa he wen get arrested.​—Luk 22:41-44.

12. How Jesus wen show respeck fo his Faddah’s name in da bestes way?

¹² Jesus had go thru all kine torture, insults, an lies fo show respeck fo his Faddah’s name. He wen lissen to his Faddah in eryting, an he knew he neva have one reason fo be shame. (Heb 12:2, NWT.) Anodda ting he had know, Satan was da one dat was straight up attacking him during dose hard times. (Luk 22:2-4; 23:33, 34) Satan wanted fo make Jesus break an no stick to Jehovah, but was one mayjah fail! Jesus wen full on show dat Satan is one bulaia an get guys who going stick tight to Jehovah no matta wat kine tes dey gotta go thru!

13. How you can make yoa King happy?

 ¹³ You like make yoa King happy? Keep telling how awesome Jehovah’s name stay, an help oddas fo know Him fo real. Wen you do dat, you stay copy Jesus. (1 Pet 2:21) An like Jesus, you stay making Jehovah happy an prove dat Satan is one straight up liar!

WEN WE TELL AWESOME TINGS ABOUT JEHOVAH’S NAME WE HELP SAVE PEOPO

14-15. Wat unreal tings happen wen we teach peopo about Jehovah?

¹⁴ Wen we tell awesome tings about Jehovah’s name, we help save peopo. How we do dat? Satan, he “make some peopo fo dem no undastan.” (2 Cor 4:4) Cuz of dat, dey believe Satan’s lies like, no moa one God, God is far away an he no kea about peopo, God is mean an he make bad peopo suffa foeva. Satan tell dose lies cuz he like give Jehovah one bad name an damage his rep so dat peopo not going like get close to him. But wen we preach we jam up Satan’s plan, cuz we teaching peopo da trut about oua Faddah an we telling how awesome his spesho name stay. Wat happen cuz of dat?

¹⁵ Da truts inside da Bible get mean kine powa. Wen we teach peopo about Jehovah an wat he stay like, we get fo see someting unreal. Slowly peopo start fo undastan who oua Faddah is an da kine qualities he get. Blow dea mind fo find out how much powa he get. (Isa 40:26) Dey learn fo trus him cuz eryting he do stay right. (Rules 32:4) Dey learn so much from how akamai he stay. (Isa 55:9; Rome 11:33) Make dem feel good an happy fo learn how much love an aloha he get fo erybody. (1 John 4:8) Da moa closa dey get to Jehovah da moa stronga dea hope come fo live foeva az his kids. Dass mean dat we get da chance fo help peopo fo come close to dea Faddah! Wen we do dat, Jehovah tink of um like “we work togedda” wit him.​—1 Cor 3:5, 9.

16. How it affeck some peopo fo learn God’s name? Try give exampos.

 ¹⁶ Maybe at firs, we ony teach peopo dat Jehovah is God’s name. Jus dat can change da life of somebody who get one good heart. Jalike Aaliyah b, one young wahine who was raised in one ohana dat wasn’t Christian. She neva feel close to God o feel good about da religion she was in. Dat wen change wen she wen start fo learn da Bible wit da Witnesses. She wen start fo see God az her fren. She wen trip out fo learn dat dey wen take God’s name outa plenny Bibles an switch um wit titles, like Da One In Charge. Finding out Jehovah’s name was one game changer. She was stoked an wen tell, “My bes Fren get one name!” Cuz she know he get one name she tell, “I feel so much peace an I feel spesho fo know dis.” One musician name Steve, who wen grow up wit one strick Jewish backgroun, neva like be part of one organize religion cuz he wen see so much fake stuff going on inside um. But wen his maddah wen die, he wen agree fo sit in on one study wit da Witnesses. Wen touch his heart fo learn God’s name. He wen tell, “I neva know God’s name befoa . . . firs time I wen know God is real! I wen see him az one Person. Right dea, I wen know I had find one Fren.”

17. How come you like go all out fo tell awesome tings about Jehovah’s name? (Go look da picha.)

¹⁷ Wen you go preach an teach, you share Jehovah’s spesho name wit peopo? You help um fo see wat oua God really stay like? Wen you do dat, you tell awesome tings about God’s name. No stop telling awesome tings about Jehovah’s name by helping peopo know da Person he really is. Dat way, you going save peopos lifes. You going copy yoa King, Jesus. An mos importan, you going make yoa Faddah Jehovah happy. Go all out fo “tell how awesome [His] name foeva an eva”!​—Songs 145:2, NWT.