1-2. Otjikeṋa tji matji yenene okutuvatera okuzuva nawa omuano Jehova ma ṱunwa i yotjizeze tji tja hungirwa ohunga nena re?

 NGATU tje omundu ngu wa suvera wa hungire otjiṋa otjivi ohunga na ove. Ove mo tjiwa kutja kauatjiri, posi ya ovandu tjiva ave kambura motjizeze ho. Owo nandarire ave utu okuserekarera otjizeze ho, nu ovandu ovengi varwe ave utu okukambura mu tjo wina. Hapo otjiṋa ho matji ku ṱunu vi? Indu tji wa suvera ovandu nokuvanga okukara nena ewa, otjizeze ho tjiri matji ku hihamisa.—Omiano 22:1.

² Otjihorera hi matji tu vatere okuzuva nawa omuano Jehova mai hihamwa indu ena re ewa tji ra zunḓwa. Omuengeli we umwe wa kora ovizeze ohunga na ye, indu tja hungira komukazendu omutenga Eva. Eye wa kambura motjizeze ho. Mena rotjizeze ho, Adam na Eva va pirukira Jehova. Ku nao, ovandu avehe va rira ovanauvi nu ve ṱa. (Gen. 3:​1-6; Rom. 5:12) Omauzeu ayehe mouye ndino tjimuna onḓiro, ovita, nomauzeu warwe, ye ya mena rotjizeze Satan tja hungira motjikunino tja Eden. Hapo Jehova u hihamwa mena rotjizeze ho nomauzeu nga etwa i yotjizeze ho? Ii, u hihamwa. Posi yokutja, Jehova kaa ri nomazenge poo ongore. Nungwari, eye ngamba ‘oMukuru wondjoroka.’—1 Tim. 1:​11, NWT.

3. Hapo eṱe tu nondjingonekero yaye?

³ Eṱe tu nondjingonekero yapeke okuyapura ena ra Jehova mokukara nonḓuviro keronga ndi: “Tangeye ena raMuhona!” (Eps. 113:1) Eṱe tu tanga ena ra Jehova indu tji matu raere varwe ouatjiri ohunga na ye. Hapo ove mo tanga ena ra Jehova?  Ngatu katare koviṋa vitatu mbi mavi tu vatere okutanga ena ra Mukuru wetu nomutima auhe.

TU YOROKISA JEHOVA INDU TJI MATU TANGA ENA RE

4. Omena raye Jehova tje kara nonyuṋe indu matu mu tanga? Sasaneka. (Wina tara kotjiperendero.)

⁴ Eṱe tu yorokisa Tate wetu womeyuru indu tji matu tanga ena re. (Eps. 119:108) Hapo ihi matji hee kutja Mukuru omunamasaayehe u ri tjimuna ovandu mbe he ri ohomonena, mbe vanga okutangwa mena rokutja owo ve hepa omayanḓiparisiro? Kako, katjiperi. Tara komasasanekero nga. Ripura nokanatje okakazona ku ka tupuka ku ihe ake mu pukata nake tja, “Ove oove papa omusembasemba mouye auhe.” Ihe ma meṱameṱa nu u nonyuṋe tjinene. Omena raye? Mena rokutja eye wa suvera omukazona we nu u nondjoroka kutja omukazona we me mu raisire kutja we mu suvera, nu u nondangi ku ye. Nungwari, iho katji nokuheya kutja ma paha omayanḓiparisiro nokutangwa i yomukazona we. Eye ma tjiwa kutja ovikaṋena mbyo mavi vatere omukazona we okukara nondjoroka otja tji me kuru. Momuano tjingewo, Jehova ngu ri Tate wetu omusembasemba, u kara nonyuṋe indu tji matu mu tanga.

5. Indu tji matu tanga Jehova, otjizeze tjiṋe tji tu raisa kutja kauatjiri?

⁵ Indu tji matu tanga Tate wetu womeyuru, eṱe tu vatera okuraisa kutja otjizeze tjarwe Satan tja hungira ohunga na auhe wetu kauatjiri. Satan u tja kape nomundu ngu ma kuramene ena ra Jehova nouṱakame. Eye u tja kape nomundu ngu ma kayenda komurungu okurira omuṱakame ku Mukuru, indu tje ri kehi yomauzeu. Nu wina u tja eṱe matu isa okukarera Mukuru indu tji matu ripura kutja okutjita nao maku tu etere ouwa. (Job 1:​9-11; 2:4) Posi yokutja, omurumendu omuṱakame Job wa raisa kutja Satan omunavizeze. Hapo ove wina mo rire omuṱakame ku Mukuru? Auhe wetu ma yenene okutoorora okukuramena ena ra Tate wetu nokumuyorokisa mokumukarera nouṱakame. (Omiano 27:11) Tjiri ondjingonekero yapeke okutjita nao.

6. Omomuano uṋe mu matu yenene okuhorera kOmbara David nOvalevi? (Nehemia 9:5)

⁶ Imba mba suvera Jehova ve vanga okutanga ena re nomitima vyawo avihe. Ombara David wa tja: “Tanga Muhona, muinyo wandje, atjihe tji tji ri moukoto wandje ngatji tange ena re eyapuke!” (Eps. 103:1) David aa tjiwa kutja indu matu tanga ena ra Jehova, i ri tjimuna matu tanga Jehova omuini. Indu tji twa zuu ena ra Jehova, eṱe tu ripura ohunga novitjitwa  vye novikaṋena vye avihe oviwa. David aa vanga okutjinda ena ra Ihe otjoyepuke nokuritanga. Eye aa vanga okutjita nao notjiṋa “atjihe tji tji ri mourekoto” we, poo nomutima we auhe. Momuano tjingewo, Ovalevi aave hongorere po mokutanga Jehova. Owo va yakura nomerisusuparisiro kutja omundu ka yenene okuyandja ondangero ndja pwire ena ra Jehova eyapuke. (Lesa Nehemia 9:5.) Otjingaperi kutja ondangero otja indjo ya yorokisa omutima wa Jehova.

7. Omomuano uṋe mu matu yenene okutanga Jehova motjiungura tjokuzuvarisa na mehupo retu reyuva arihe?

⁷ Ndino eṱe matu yenene okuyorokisa Jehova mokuhungira ohunga na ye momuano mu matu raisa ondangi norusuvero. Indu tji matu zuvarisa, ondando yetu oyokuvatera varwe okutumbuka popezu na Jehova, nokukara noumune tjimuna owetu ohunga Tate wetu worusuvero. (Jak. 4:8) Eṱe tu nonyuṋe okuraisira ovandu omuano Ombeibela mu i vandurura orusuvero rwa Jehova, ousemba we, ounongo we, omasa we, novikaṋena vye vyarwe oviwa. Eṱe wina tu tanga Jehova nokumuyorokisa, mokukondja okuhorera ku ye, otja pu matu yenene. (Ef. 5:1) Indu tji twa tjiti nao, varwe mape ya ave munu kutja twa panguka kovandu mouye ourunde mbwi. (Mat. 5:​14-16) Otja tji matu ungura pu na wo, eṱe mape ya atu ve kahurure kutja ongwaye tji tu ritjinda nao. Mena ranao, imba vomitima omiwa ve tumbuka popezu na Mukuru wetu. Indu tji matu tanga Jehova momiano mbi, eṱe tu yorokisa omutima we.—1 Tim. 2:​3, 4.

TU YOROKISA JESUS INDU TJI MATU TANGA ENA RA JEHOVA

8. Omena raye Jesus tje ri otjihorera otjiwa mokutanga ena ra Jehova?

⁸ Kape nomundu meyuru poo kombanda yehi ngu ma tjiwa Jehova nawa okukapita Jesus. (Mat. 11:27) Jesus wa suvera Ihe, neṱe tu horera ku ye mokutanga ena ra Jehova. (Joh. 14:31) Mongurova komurungu wonḓiro ye, Jesus wa kumba ku Ihe nu wa hungirira kotjiṋa otjinanḓengu tja tjita. Eye wa tja: “Ami mbe ve tjiukisa ena roye.” (Joh. 17:26) Hapo eye aa hee tjike?

9. Jesus wa ungurisa vi omasasanekero okukahurura Ihe momuano omukahu?

⁹ Jesus aa raere ovandu ohunga nena ra Mukuru Jehova, nu wina aa ungura ovingi kombanda yanao. Ovajuda imba Jesus mba hongo, aave tjiwa rukuru ena Mukuru. Posi yokutja, Jesus “ongwe Mu tjiukisa.” (Joh. 1:​17, 18) Otjotjihorera, Omatjangwa wOtjiheberi ya vandurura kutja Jehova omunaunyaṋutima nomunatjari. (Eks. 34:​5-7) Ouatjiri mbwo wa rira oukahu indu Jesus tja hungirira komasasanekero ohunga na Ihe nomuzandu ngwa pandjara. Tji matu lese ohunga na ihe ngo ngwa muna omuzandu we “ngunda e ri kokure,” ngwa tupuka ku ye, ngwe mu pukata, nu ngwe mu isira okuza komutima, eṱe tu muna oukahu omuano Jehova me raisa ounyaṋutima notjari. (Luk. 15:​11-32) Jesus wa vatera varwe okutjiwa nawa kutja Jehova tjiri omungendu.

10. (a) Matu tjiwa vi kutja Jesus wa ungurisa ena ra Ihe nu u vanga varwe okutjita nao? (Markus 5:19) (Wina tara kotjiperendero.) (b) Jesus u vanga kutja tu tjite tjike ndino?

¹⁰ Hapo Jesus aa vanga kutja varwe wina ve ungurisa ena ra Ihe? Ii, otjiperi. Ovanane vozongamburiro tjiva mape ya va ri nongamburiro yokutja ena ra Mukuru eyapuke tjinene nu kari sokuisanewa. Posi yokutja Jesus ka yandjerere omahongero nge ha zikamenene kOmbeibela ngo okumutjaera okuyozika ena ra Ihe. Tara koruveze indu eye tja verukisa omurumendu ngwa ri nozombepo ozohakohoke mehi ra Gerasa. Ovandu va ri nemuma tjinene nu va ningira Jesus okuyenda. Ku nao,  eye wa pita mehi ndo. (Mar. 5:​16, 17) Nungwari, Jesus aa vanga kutja ovandu mehi ndo ve tjiwe ena ra Jehova. Ku nao, eye wa raera omurumendu eye ngwa verukisa okukaraera ovandu imbi Jehova mbye mu tjitire, nungwari kavyo mbi Jesus mbya tjiti. (Lesa Markus 5:19.) a Jesus wina u vanga kutja tu tjiukise ena ra Ihe mouye auhe. (Mat. 24:14; 28:​19, 20) Indu tji matu tjiti nao, eṱe tu yorokisa Ombara yetu, Jesus.

11. Otjikeṋa Jesus tja honga ovemukongorere okukumba, nu omena raye tje ri ounanḓengu okutjita nao? (Esekiel 36:23)

¹¹ Jesus aa tjiwa kutja ondando ya Jehova oyokuyapura ena Re, nokukohorora ro komayamburiro ayehe nga tjitwa ku ro. Mena ranao, Omuhona wetu opa zokuraera ovemukongorere okukumba nai: “Tate yetu ngu u ri momayuru: Ena roye ngari yapurwe.” (Mat. 6:9) Jesus aa tjiwa kutja iho otjiṋa otjinanḓengu tji tji ṱuna koviutwa avihe. (Lesa Esekiel 36:23.) Kape notjiutwa meyuru poo kombanda yehi tji tja yenena okuyapura ena ra Jehova okukapita Jesus. Nungwari, indu Jesus tja kamburwa, ovanavita ve mu kuminina tjike? Owo ve mu kuminina kutja wa yamburura Ihe. Jesus aa munu kutja okuungurisa navi poo okuyamburura ena ra Ihe eyapuke, ya ri ouvi ounene tjinene. Eye tjiri wa hihamisiwa i yomakuminino ngo nokupewa ondjo mena rouvi mbwo. Iho mape ya ootjiṋa tji tja tjita kutja Jesus ma hare “omburuma” ozoiri zokomurungu waindu ngunda e hi ya kamburwa.—Luk. 22:​41-44.

12. Omomuano uṋe Jesus ma yapura ena ra Ihe momuano omusemba?

¹² Mokuyapura ena ra Ihe, Jesus wa tuurunga omihihamo ngamwa avihe, omayambururiro, na indu tja kumininwa. Eye aa tjiwa kutja wa kara nonḓuviro ku Ihe moviṋa avihe, nu kaa hepa okuṱa ohoṋi. (Hebr. 12:2) Eye wina aa tjiwa kutja Satan ee mu wire moruveze oruzeu ndwo. (Luk. 22:​2-4; 23:​33, 34) Satan wa kondja nomasa okuteya ouṱakame wa Jesus, nungwari eye ka toṋene oparukaze. Jesus wa raisa kutja Satan omunavizeze nokutja ovakarere va Jehova ovaṱakame mave yenene okupanḓera pouṱakame, nandarire kehi yomarorero omazeu.

13. Mo yenene vi okuyorokisa Ombara yoye?

 ¹³ Hapo mo vanga okuyorokisa Ombara yoye ndji honapara nai? Kayende komurungu okutanga ena ra Jehova amo vatere varwe okurihonga ohunga novikaṋena oviwa vya Mukuru wetu. Indu tji wa tjiti nao, ove mo horere ku Jesus. (1 Petr. 2:21) Tjimuna Jesus, ove mo yorokisa Jehova nu mo raisa kutja omunavita wa Mukuru ingwi Satan omunavizeze.

TU YAMA VARWE INDU TJI MATU TANGA ENA RA JEHOVA

14-15. Ovikeṋa oviwa mbi mape ya avi tjitwa indu tji matu hongo ovandu ohunga na Jehova?

¹⁴ Indu tji matu tanga ena ra Jehova tu yama omiinyo vyovandu varwe. Omomuano uṋe? “Ozondunge zawo tjinga aze ṱizirwa monḓorera” i Satan. (2 Kor. 4:4) Mena ranao, owo ve kambura movizeze vya Satan mbi: Mukuru ke ko, Mukuru u ri kokure nu ke nakonatja novandu, Mukuru omunautwe nokutja u tatumisa ovarunde nga aruhe. Satan u kora ovizeze avihe mbi mena rokutja u vanga okuzunḓa ena ewa ra Jehova, nokutja ovandu ave ha kara nonḓero yokutumbuka popezu na Jehova. Nungwari indu tji matu zuvarisa tu tjita kutja Satan a ha yenenisa ondando ye ndjo. Eṱe tu honga ovandu ouatjiri ohunga na Tate, nokutanga ena ra Mukuru wetu eyapuke. Nu ku kongorera tjike?

¹⁵ Ouatjiri wEmbo ra Mukuru u nomasa tjinene. Mokuhonga ovandu ohunga na Jehova nokutja eye tjiri omundu ngu ri vi, eṱe tu muna ouwa. Ovandu mba kave u hara amave wovisiwa i yovizeze vya Satan rukwao. Owo ve yenena okuuta okumuna ovikaṋena oviwa vya Tate wetu. Owo ve temisiwa i yomasa omahimise wa Mukuru. (Jes. 40:26) Owo ve rihonga okuriyameka ku ye mena rousemba we. (Deut. 32:4) Owo ve rihonga ovingi okuza kounongo we. (Jes. 55:9; Rom. 11:33) Nu owo ve tjaterwa tji mave rihongo kutja eye orusuvero. (1 Joh. 4:8) Otja tji mave tumbuka popezu na Jehova, omaundjiro wawo wokukahupa nga aruhe otjovanatje ve ye harera ko omasa. Tjiri ondjingonekero onene kweṱe okuvatera varwe okutumbuka popezu na Ihe yawo. Indu tji matu tjiti nao, Jehova me tu vara kutja oweṱe “ovaungure vapamwe” na ye.—1 Kor. 3:​5, 9.

16. Ovandu tjiva va ṱunwa vi indu tji ve rihonga nena ra Mukuru? Yandja ovihorera.

 ¹⁶ Rutenga, eṱe mape ya atu hongo ovandu kutja ena ra Mukuru oJehova. Iho mape ya atji rundurura ehupo raimba womitima omiwa. Otjotjihorera, omukazendu omutanda wena Aaliyah b we kurira mongamburiro ndji hi na ai zikamisa omahongero wayo okuza kOmbeibela. Nungwari eye kaa tjaterwa ohunga nongamburiro ye nu kee rimunu popezu na Mukuru. Posi yokutja, eye wa rundurura ongaro ye ndjo indu tja uta okurihonga Ombeibela pu nOvahongonone va Jehova. Eye wa uta okuvara Mukuru otjEpanga re. Nu eye wa himinwe indu tje rihonga kutja ena ra Mukuru ra isamewa momatorokero omengi wOzombeibela, nu ra pingenisiwa nomana wondjozikiro tjimuna Muhona. Okurihonga ohunga nena ra Jehova kwa rundurura ehupo re. Eye wa tja: “Epanga randje roposengo ri nena.” Kwa kongorere ye? Eye wa tja: “Ami nai mbi nohange momuinyo. Indjo ondjingonekero yapeke.” Omurumendu wena Steve wa ri omunyande womizumbi, ngwe kurisiwa otjOmujuda. Eye kaa vanga okurira orupa rongamburiro kaaṋi mena rokutja wa muna outjavivi mozongamburiro ozengi. Nungwari indu ina tja ṱa, eye wa yakura okupuratena komakonḓononeno wOmbeibela ngaye tjitwa i yOvahongonone va Jehova. Okutjiwa ena ra Mukuru kwe mu ṱuna tjinene. Eye wa tja: “Ami hi na pu pe rihonga ohunga nena ra Mukuru.” Eye wina wa tja: “Ya ri otjikando tjandje otjitenga okumuna kutja Mukuru okeri. Ami mba uta okumuvara otjOmundu nu ee tjiwa kutja mba munu epanga.”

17. Omena raye tji we rimanene okukayenda komurungu okutanga ena ra Jehova? (Wina tara kotjiperendero.)

¹⁷ Motjiungura tjoye tjokuzuvarisa nokuhonga, hapo ove u raera ovandu ohunga nena ra Jehova eyapuke? Hapo u ve vatera okumuna kutja Mukuru wetu omundu ngu ri vi? Mokutjita nao, ove u tanga ena ra Mukuru. Kayende komurungu okutanga ena ra Jehova eyapuke mokuvatera ovandu okutjiwa kutja eye tjiri Omundu ngu ri vi. Momuano mbwi, ove mo yama omiinyo. Ove mo horere kOmbara yoye Jesus Kristus. Nu tjinenenene, ove mo yorokisa Tate woye worusuvero Jehova. ‘Tanga ena re aruhe nga aruhe.’—Eps. 145:2.