1-2. Nama ulih nulung kitai meretika asai ati Jehovah lebuh orang bukai nyebut utai ti bula pasal Iya?

 GAMBARKA tu: Orang ke dikeibuhka nuan nyebut utai ti jai pasal nuan. Taja pan nuan nemu utai ke dipadah iya bula, tang bisi mega orang pechayaka utai ti dipadah iya. Lalu ke balat agi, sida mega ngerembaika pemula nya, lalu mayuh agi orang pechayaka pemula nya. Nama asai ati nuan? Enti nuan ibuhka kaul nuan enggau orang bukai sereta reputasi nuan ti manah, utai bula ke disebut iya tentu ngemediska ati nuan, enda pia?​—J-lam. 22:1.

² Situasi tu ulih nulung kitai meretika asai ati Jehovah lebuh orang nyebut utai ti bula pasal Iya. Siku ari melikat Iya nyebut utai ti bula pasal Iya ngagai indu ti keterubah, iya nya Awa. Lalu Awa pan pechayaka pemula nya. Ketegal pemula nya, Adam enggau Awa pan angkat ngelaban Jehovah. Asil iya, dosa enggau pemati ngelekai ngagai semua mensia. (P-kal. 3:​1-6; Rom. 5:12) Semua penusah ke bisi ba dunya kemayaharitu baka pemati, perang, enggau pemerinsa, nyadi ketegal pemula ke dipadah Sitan ba taman Eden. Kati Jehovah berasai tusah ati ketegal pemula nya sereta semua penusah ke nyadi ketegal pemula nya? Au, Iya tentu berasai tusah ati. Tang, Jehovah enda pedis ati tauka bedendam. Kebendar iya, Bup Kudus madahka, Jehovah agi “Petara ti gaga ati.”​—1 Tim. 1:11.

3. Nama basa ti besai ke dikembuan kitai?

³ Semua kitai bisi basa ti besai. Kitai ulih nulung nunjukka semua utai ke dipadah Sitan pasal Jehovah nya bula. Kitai ngereja tu enggau ngasika pesan tu: “Puji meh nama [Jehovah]!” (Mas. 113:1) Kitai muji nama Jehovah lebuh kitai madah utai  ti bendar pasal Iya ngagai orang bukai. Kati nuan deka muji nama Jehovah? Aram kitai beratika tiga iti utai ti meransang kitai ngambika deka muji nama Petara enggau pengabis ati.

KITAI NGAGAKA ATI JEHOVAH LEBUH KITAI MUJI NAMA IYA

4. Nama kebuah Jehovah gaga ati lebuh kitai muji Iya? Padahka siti chunto. (Peda mega gambar.)

⁴ Kitai ngagaka ati Apai kitai ke ba serega lebuh kitai muji nama Iya. (Mas. 119:108) Kati tu reti iya, Petara ti pemadu bekuasa begunaka jaku puji baka mensia, ngambika ulih berasai diperansang? Enda. Peratika chunto tu. Gambarka siku anak mit indu belanda ngagai apai iya, merap iya, lalu madahka: “Nuan Daddy ti paling best!” Apai iya tuchum lalu amat gaga ati. Nama kebuah? Kati tu ketegal iya begunaka jaku peransang sereta jaku puji ari anak iya? Enda. Ukai baka nya. Iya berasai gaga ati laban iya sayauka anak iya, lalu iya mega gaga ati laban anak iya ngayanka pengerindu sereta asai terima kasih ngagai iya. Iya nemu, sifat nya deka nulung anak iya berasai gaga ati seraya iya mansang besai. Baka nya mega, Apai kitai Jehovah amat gaga ati lebuh kitai muji Iya.

5. Lebuh kitai muji Jehovah, nama jaku tuduh ari Sitan ke ulih ditunjukka kitai nya bula?

⁵ Lebuh kitai muji Apai kitai ke ba serega, kitai ulih nulung nunjukka utai ke dipadah Sitan pasal tiap iku kitai nya bula. Sitan madahka, nadai mensia deka enggau setia ngetanka nama Petara. Ku iya, lebuh kitai diuji, nadai siku pan ari kitai ke deka mengkang tetap ati ngagai Petara. Iya mega madah, semua kitai deka ngetu nyembah Petara enti nya mai penguntung ke kitai. (Jop 1:​9-11; 2:4) Tang Jop mengkang tetap ati ngagai Petara lalu nunjukka utai ke dipadah Sitan nya bula. Baka ni enggau nuan? Tiap iku kitai bisi peluang ngetanka nama Apai kitai lalu ngagaka ati Iya lebuh kitai nyembah Iya enggau tetap ati. (J-lam. 27:11) Tu endang basa ti besai.

6. Baka ni kitai ulih neladan Raja David enggau orang Lewi? (Nehemiah 9:5)

⁶ Sida ke rinduka Jehovah tentu deka muji nama Iya enggau pengabis ati. Raja David nulis: “Awakka aku muji Jehovah; awakka semua nyawa enggau tubuh aku muji nama Iya ti kudus.” (Mas. 103:​1, NWT) David nemu lebuh kitai muji nama Jehovah, nya sama baka kitai muji Jehovah empu. Lebuh kitai ninga nama Jehovah, kitai deka berunding pasal reputasi Iya, sifat Iya, sereta utai ti manah ke udah dikereja Iya. Ba David, nama Jehovah nya kudus, lalu iya deka muji nama nya. Iya deka ngereja nya enggau “semua nyawa  enggau tubuh” iya, iya nya enggau pengabis ati. Baka nya mega, orang Lewi ngulu ba pengawa muji Jehovah. Sida enggau baruh ati ngaku jaku puji sida enda chukup kena muji nama Jehovah ti kudus. (Bacha Nehemiah 9:5.) Endang amat, jaku puji ke datai ari ati nya ngagaka ati Jehovah.

7. Baka ni kitai ulih muji Jehovah ba pengawa nginjil sereta ba pengidup kitai besehari-sehari?

⁷ Kemayaharitu, kitai ulih ngagaka ati Jehovah lebuh kitai bejaku pasal Iya enggau asai ati ti besyukur sereta penuh pengerindu. Lebuh nginjil, tuju utama kitai nya nulung orang bukai semak ngagai Jehovah. Kitai dekaka sida ngembuan asai ati ti sama enggau asai ati ke dikembuan kitai pasal Jehovah. (Jas. 4:8) Kitai gaga ati bekunsi enggau orang bukai pasal utai ke dipadah Bup Kudus pasal Jehovah. Bup Kudus madahka mayuh utai pasal pengerindu, pengelurus, penemu-dalam, kuasa, enggau sifat Iya ke bukai. Kitai mega muji sereta ngagaka ati Jehovah lebuh kitai bebendar neladan Iya. (Eps. 5:1) Lebuh kitai ngereja nya, orang bukai engka meda kitai bebida ari orang ba dunya tu. Lalu tu engka ngasuh sida berundingka kebuah kitai bebida. (Mat. 5:​14-16) Lebuh kitai begulai enggau sida ba pengidup besehari-sehari, kitai engka bisi peluang nerang ngagai sida kebuah nya. Asil iya, sida ke bisi ati ti lurus deka datai semak ngagai Petara kitai. Lebuh kitai muji Jehovah enggau chara ke baka tu, kitai ngelantangka ati Iya.​—1 Tim. 2:​3, 4.

KITAI NGAGAKA ATI JESUS LEBUH KITAI MUJI NAMA JEHOVAH

8. Nama kebuah Jesus nya teladan ti pemadu manah bekaul enggau muji nama Jehovah?

⁸ Nadai orang ba dunya tauka ba serega ke nemu Jehovah manah agi ari Jesus. (Mat. 11:27) Jesus amat rinduka Apai iya, lalu iya teladan ti pemadu manah bekaul enggau muji nama Jehovah. (Jhn. 14:31) Dalam sampi ke disebut Jesus ngagai Apai iya ba malam sebedau iya mati, Jesus madahka utai ti pemadu penting ke udah dijapai iya lebuh nginjil ba dunya. Iya madahka: “Aku udah ngasuh nama Nuan ditemu sida.” (Jhn. 17:26) Baka ni Jesus ngereja nya?

9. Nama cherita ke dikena Jesus nulung kitai ngelala Apai iya enggau manah agi?

⁹ Jesus ukai semina madah ngagai orang, nama Petara nya Jehovah. Orang Judah ke diajar Jesus endang udah nemu nama Petara. Tang Jesus netapka teladan ti manah lebuh iya “nerangka pasal Petara.” (Jhn. 1:​17, 18) Ambika chunto, Bup Kudus Begian Jaku Hebrew madahka, Jehovah nya pengasih sereta siru. (P-sut. 34:​5-7) Lalu Jesus nerangka tu enggau terang agi lebuh iya madahka cherita pasal anak ti tesat enggau apai iya. Cherita nya madah pasal siku apai ke meda anak iya ke udah nesal ati “ari jauh.” Apai nya lalu belanda ngagai anak iya, merap, lalu nyium iya, sereta ngampunka anak iya enggau pengabis ati. Tu nulung kitai faham pemesai pengasih sereta penyiru Jehovah. (Luk. 15:​11-32) Au, Jesus nulung orang bukai ngelala Apai iya enggau manah agi.

10. (a) Baka ni kitai nemu Jesus ngena nama Apai iya, lalu iya mega dekaka orang bukai ngereja utai ti sama? (Mark 5:19) (Peda mega gambar.) (b) Nama utai ti dikedekaka Jesus kereja kitai kemayaharitu?

¹⁰ Kati Jesus dekaka orang bukai ngena nama Apai iya? Au. Sekeda tuai pengarap engka pechaya nama Petara kelalu kudus lalu enda tau disebut. Ku sida, enti kitai nyebut nama Petara, kitai enda bebasaka Iya. Tang Jesus enda nejuka adat ti enda bepelasarka Bup Kudus tu nagang iya ari ngemuliaka nama Apai iya. Peratika utai ti nyadi lebuh Jesus ngeraika siku lelaki ke dirasuk melikat  ti jai ba Gerasa. Orang ba dia nyadi takut lalu ngasuh Jesus mupuk ari endur nya. Jesus pan ninggalka endur nya. (Mrk. 5:​16, 17) Taja pia, Jesus agi dekaka nama Jehovah ditemu orang ba dia. Nyadi, iya ngasuh lelaki ke udah digeraika nya madah ngagai orang ba dia pasal utai ke udah dikereja Jehovah, ukai pasal utai ke udah dikereja Jesus. (Bacha Mark 5:19.) a Kemayaharitu, Jesus mega dekaka kitai madahka pasal nama Apai iya ba serata dunya. (Mat. 24:14; 28:​19, 20) Lebuh kitai ngereja nya, kitai ngagaka ati Jesus, Raja kitai.

11. Jesus ngajar bala murid iya besampika nama, lalu nitihka Esekiel 36:​23, nama kebuah nya penting?

¹¹ Jesus nemu Jehovah keran deka nguduska nama Iya. Jehovah deka muai semua pemula ke dipadah pasal Iya. Nya kebuah Tuan kitai Jesus ngajar bala murid iya ngambika besampi: “Apai kami ti ba serega, kudus meh nama Nuan.” (Mat. 6:9) Jesus nemu tu pekara ti pemadu penting, ke bisi kaul enggau semua mensia sereta semua melikat. (Bacha Esekiel 36:23.) Nadai utai ba dunya tauka ba serega ke udah nguduska nama Jehovah lebih agi ari Jesus. Taja pia, lebuh Jesus ditangkap, bala munsuh iya nuduh iya bejaku ngelaban Petara. Ba Jesus, pengawa ngenyaika nama Apai iya ti kudus nya dosa ti pemadu besai. Nya kebuah Jesus amat tusah ati lebuh iya dituduh sereta diukum ketegal penyalah tu. Nya mega engka kebuah ti pemadu besai “runding Jesus balat charut sereta ati iya balat tusah” sebedau iya ditangkap.​—Luk. 22:​41-44.

12. Nama chara ti pemadu besai ke dikena Jesus nguduska nama Apai iya?

¹² Ngambika ulih nguduska nama Apai iya, Jesus tan napi semua macham perinsa. Iya mega tan lebuh orang ngelese sereta nyebut utai ti bula pasal iya. Iya nemu, iya udah ngasika Apai iya dalam semua utai lalu iya enda maluka nya. (Heb. 12:2) Iya mega nemu, Sitan benung nyerang iya ba maya ti tusah nya. (Luk. 22:​2-4; 23:​33, 34) Sitan tentu ngumbai diri ulih ngasuh Jesus enda tetap ati. Tang, iya enda mujur ngereja nya! Jesus nunjukka Sitan nya pemula. Lalu, Jesus mega nunjukka Jehovah endang bisi bala nembiak ti setia, ke deka mengkang tetap ati taja pan napi penguji ti balat!

13. Baka ni nuan ulih ngagaka ati Jesus, Raja ke benung merintah ba serega?

 ¹³ Kati nuan deka ngagaka ati Jesus, Raja ke benung merintah ba serega? Enti pia, terus meh muji nama Jehovah sereta nulung orang bukai ngelala sapa Petara kitai ke bendar iya. Nuan nitihka singkang Jesus lebuh nuan ngereja nya. (1 Pet. 2:21) Baka Jesus, nuan deka ngagaka ati Jehovah, lalu nunjukka munsuh Iya, Sitan, endang siku pemula!

KITAI NYELAMATKA NYAWA ORANG LEBUH KITAI MUJI NAMA JEHOVAH

14-15. Nama utai ti ngalitka ati ke ulih nyadi lebuh kitai ngajar orang pasal Jehovah?

¹⁴ Kitai nyelamatka nyawa orang lebuh kitai muji nama Jehovah. Baka ni? Bup Kudus madahka, “runding sida ke enda arap udah dibutaka petara dunya tu,” iya nya Sitan. (2 Kor. 4:4) Ketegal nya, mayuh orang udah pechayaka pemula ari Sitan ke baka tu: Petara nya nadai, Petara nya jauh ari kitai sereta enda ibuhka mensia, Petara nya jai sereta merinsaka orang ke bedosa belama iya. Sitan madahka semua pemula tu laban iya deka ngenyaika nama Jehovah, sereta nagang orang ari datai semak ngagai Jehovah. Tang lebuh kitai nginjil, kitai ulih nagang Sitan ari nyapai tuju iya. Kitai ngajar orang utai ti bendar pasal Apai kitai sereta muji nama Petara kitai ti kudus. Nama asil iya?

¹⁵ Pemendar ke bisi dalam Jaku Petara nya bisi kuasa ti besai. Lebuh kitai ngajar orang pasal Jehovah sereta sapa Iya ti bendar, kitai deka meda utai ti ngalitka ati. Orang enda agi ditipu enggau pemula Sitan, lalu sida ulih meda pemanah sifat Apai kitai. Sida kagum enggau pemesai kuasa Iya. (Isa. 40:26) Sida ulih pechayaka Iya laban semua jalai Iya endang lurus magang. (U-dat. 32:4) Sida ulih belajar mayuh utai ari penemu-dalam Petara. (Isa. 55:9; Rom. 11:33) Lalu sida mega berasai lantang lebuh nemu Jehovah nya pengerindu. (1 Jhn. 4:8) Seraya sida majak semak ngagai Jehovah, harapan sida idup belama iya nyadi anak Petara pan majak nyata. Endang basa ti besai laban kitai ulih nulung orang majak semak ngagai Jehovah! Lebuh kitai ngereja nya, Jehovah ngumbai kitai “gawa begulai” enggau Iya.​—1 Kor. 3:​5, 9.

16. Nama asai ati sekeda orang lebuh sida belajarka nama Petara? Padahka sekeda chunto.

 ¹⁶ Terubah iya, kitai engka semina ngajar orang nama Petara nya Jehovah. Penemu nya aja ulih ngubah pengidup orang ke bisi ati ti lurus. Ambika chunto, siku indu ti biak ke benama Aaliyah b dibesaika ba ruang bilik ke ukai Kristian. Tang iya enda puas ati enggau agama iya, lalu iya mega ngasaika diri jauh ari Petara. Taja pia, utai tu berubah pengudah iya berengkah belajarka Bup Kudus enggau Saksi-Saksi Jehovah. Iya berengkah ngumbai Petara nya kaban iya. Lalu iya mega tekenyit lebuh nemu nama Petara udah dibuai ari mayuh salin Bup Kudus lalu diganti enggau gelar baka Tuan. Lebuh iya belajarka nama Jehovah, nya ngubah pengidup iya. Ku iya madahka: “Kaban aku bisi nama!” Nama asil iya? Ku iya: “Diatu aku berasai lantang agi. Aku ngumbai nya basa ti besai laban nemu nama Jehovah.” Peratika mega pengalaman siku lelaki ke benama Steve. Iya siku ahli musik ke dibesaika ba siti ruang bilik orang Yahudi ti terit. Iya enggai bisi kaul enggau nama-nama jalai pengarap laban iya udah meda mayuh pemula ba dia. Taja pia, pengudah indai iya nadai, iya setuju enggau siti pengawa belajarka Bup Kudus ke diatur siku ari Saksi Jehovah. Ati iya balat ditegu lebuh nemu Petara bisi nama. Ku iya madahka: “Aku nadai kala nemu Petara bisi nama!” Ku iya nampung agi: “Diatu aku nemu Petara nya endang bisi, lalu aku nemu aku ulih nyadi kaban Iya.”

17. Nama kebuah nuan keran deka terus muji nama Jehovah? (Peda mega gambar.)

¹⁷ Lebuh nuan nginjil sereta ngajar orang Bup Kudus, kati nuan bisi bekunsika nama Jehovah enggau orang bukai? Kati nuan nulung sida nemu sifat ke bisi ba Petara? Enti nuan ngereja nya, nuan benung muji nama Petara. Terus meh muji nama Jehovah enggau nulung orang bukai nemu sapa Iya ti bendar. Enggau chara nya, nuan ulih nyelamatka nyawa orang bukai. Nuan mega neladan Raja nuan, Jesus Kristus. Lalu ke pemadu penting, nuan ngagaka ati Jehovah, Apai nuan ti bepengerindu. Terus meh “muji nama [Iya] belama lama iya”!​—Mas. 145:2.