1-2. Anni i makoffun tapenu malippawa tam i natageno ni Jehova turi ta napara-parake i ngagan na?

 IMAJINAMMU yaw: Pinara-parake naka na tadday nga iddeddu mu. Ammum tu ari nga kurug yatun ngem egga ira i nangurug tatun. I mas marake paga, ipaka-pakoli da yatun nga kinaladdug tapus aru i nangurug. Anni tamma i matageno mu? Nu agga-nono mu i makagi na totolay ta makasta nga reputasiommu, magga mataki nikaw nga napara-parake ka.—Prov. 22:1.

² Makoffun yatun nga angngarigan tapenu malippawa tam i natageno ni Jehova turi ta napara-parake yayya. Pinara-parake yayya na tadday nga espiritu nga ana na ta ollu nga babay nga si Eva. Kinurug gapa ni Eva yatun nga kinaladdug. Megafu tatun, narrebelde kani Jehova i ollu nga magana tam. Anni i resulta natun? Nakaliwa anna matay i ngamin nga totolay. (Gen. 3:​1-6; Roma 5:12) Ngamin nga problema nga masingi-singattam taw ta mundo, nelagum i patay, gerra ira, anna pazziga-riga ay resulta na kinaladdug ira nga pinegafuanan nga iwara ni Satanas ta hardin na Eden. Natakitan kari si Jehova megafu ta kunnatun ira nga pamara-parake anna i marake ira nga resulta natun? Magga. Ngem ari nga mataki i nono ni Jehova. Adde lagu sangawe, yayya lagapa i “magayayya nga Dios.”—1 Tim. 1:​11, NW.

3. Anni i pribilehio tam?

³ Pribilehio tam nga makoffun ta pamakasanto ta ngagan ni Jehova. Makua tam yatun nu tuttulattam yaw: “Dayawan i ngagan ni Jehova.” (Sal. 113:​1, NW) Medayaw tam i ngagan ni Jehova nu ikagi tam ta tanakuan i kinakurug meyannung ta nisa. Makuam kari yatun? Ammuattam i tallu nga importante nga rason nu ngatta napafutuan nga dayawattam i ngagan na Dios tam.

 MAGAYAYYA SI JEHOVA NU DAYAWATTAM I NGAGAN NA

4. Ngatta magayayya si Jehova nu dayawattam yayya? Mangusa tu ilustrasion. (Innan gapa i letratu.)

⁴ Magayayya i Yama tam ta langi nu dayawattam i ngagan na. (Sal. 119:108) Kayà kari kagian natun nga nakadepende i Dios ta pangidayaw na tanakuan kagitta na imperfekto nga totolay? Ari. Nonopan yaw nga ilustrasion. Egga i abbing nga babay nga ginakkopan na i yama na, tapus kagian na, “Siko i best Papa ta interu mundo!” Napagayayya na i yama na anna na-touch yayya ta ari na mabba nikiddaw yatun ta ana na. Ngatta ta kunnatun? Nonopattam kari nga nakadepende yatun nga yama ta pangidayaw na ana na? Ari. Siguradu ittam nga iddeddu natun nga yama i ana na anna magayayya yayya ta masingan na tu ammu na ana na i mangipasingan tu aya anna appresasion. Ammu na gare nga makaduffun i kuddanatun nga kualidad tapenu magayayya i ana na ta paddakal na. Kunnatun gabbalaman i rason nu ngatta magayayya i kapianan nga Yama nga si Jehova nu dayawattam yayya.

5. Nu dayawattam i ngagan na Dios, anni i mapakurug tam?

⁵ Nu dayawattam i Yama tam ta langi, mapakurug tam nga kinaladdug i akusasion ni Satanas ta kada tadday ta nittam. Kakkagian na nga awan tu tolay nga matalo nga mangidefensa ta ngagan na Dios. Segun ta nisa, ari kanu mattalupaddian nga matalo i tadday nga tolay nu mapurueban yayya. Likurattam kanu ngamin i Dios nu mangurug ittam nga mas pammakapianattam nu kuattam yatun. (Job 1:​9-11; 2:4) Ngem matalo si Job yatutta napakurug na tu laddug si Satanas. Kunnasi ka gapa? Egga lagapa ta kada tadday ta nittam nu matalo tam nga itaddaggan i ngagan na Yama tam. Mapagayayya tam gapa yayya nu ari ittam magimmang nga masserbi maski nu mapurueban ittam. (Prov. 27:11) Talaga pribilehio nga kuan i kunnatun.

6. Kunnasi tam nga maparigan si Patul David anna i Levita ira? (Nehemias 9:5)

⁶ Aya ta Dios i mamaguyu ta matalo nga totolay nga napafutuan nga dayawan i ngagan na. Nitura ni Patul David: “O ikararuà, daya-rayawam-mu i YAFU! Daya-rayawam-mu yaya ta napafutu; daya-rayawam-mu i ngagan na nga masanto!” (Sal. 103:1) Ammu ni David nga i pangidayaw ta ngagan ni Jehova ay pangidayaw mismu kani Jehova. Nelagum gare ta ngagan ni Jehova i reputasion na, yatutta ipanono natun nga ngagan i ngamin nga makasta nga kualidad na anna i makapabbaw nga kinikkingngua na. Karagatan ni David nga imammatan tu masanto i ngagan na Yama na  anna dayawan yatun. Kayà na nga kuan yatun ta “napafutu.” Kunnatun gabbalaman i Levita ira. Nirolluadda i pangidayaw kani Jehova. Mapakalinno nga kinagi da nga ari vuluvuga makalanno i uvovug da ira tapenu meyawa i dayaw nga mepappangngo para ta sagradu nga ngagan ni Jehova. (Bibbigan i Nehemias 9:5.) Siguradu nga napagayayya i futu ni Jehova ta kunnatun nga mapakalinno anna napafutu nga pangidayaw.

7. Kunnasi tam nga medayaw si Jehova ta ministerio anna ta pakilallang tam ta tanakuan?

⁷ Mapagayayya tam si Jehova nu masingan ta paguvovug tam nga mappappabalo ittam ta nisa anna iddeddu tam yayya. Ta ministerio, goal tam nga meyaranni i totolay kani Jehova anna duffunattam ira nga iddukan i Yama tam kagitta na pangiddu tam ta nisa. (Sant. 4:8) Magayayya ittam nga ipasingan ta totolay i kagian na Biblia meyannung ta aya, hustisia, ka-uto, pakapangngua, anna karuan paga nga makasta nga kualidad ni Jehova. Medayaw tam gapa si Jehova anna mapagayayya tam yayya nu ikagumattam nga parigan yayya. (Efe. 5:1) Mepasingattam gare nga ari ittam nga kagitta na marake nga totolay taw nga mundo. Awayya na nga mapansin na totolay yatun anna mannono ira nu ngatta neruma ittam. (Mat. 5:​14-16) Ta pakilallang tam nira, awayya na tu meyesplika tam nu ngatta neruma ittam. Maginteres gapa danuri napafutuan nga totolay nga umaranni ta Dios tam. Nu kukukuattam danatun tapenu idayaw si Jehova, mapagayayya tam i futu na.—1 Tim. 2:​3, 4.

MAGAYAYYA SI JESUS NU DAYAWATTAM I NGAGAN NI JEHOVA

8. Anni i kingngua ni Jesus tapenu irolluan i pangidayaw ta ngagan ni Jehova?

⁸ Ta langi man onu ta davvun, si Jesus i pinakamakakkilala ta Yama na nga si Jehova. (Mat. 11:27) Iddeddu ni Jesus i Yama na anna yayya i nangirollu ta pangidayaw ta ngagan ni Jehova. (Juan 14:31) Ta gabi nige nga natay si Jesus, nakimallo yayya ta Yama na. Kinagi na ta Yama na i netuppal na ministerio na ta davvun: “Nipakannammù i ngagammu.” (Juan 17:​26, NW) Anni i kayà na kagian?

9. Anni nga angngarigan i inusa ni Jesus tapenu mepakanawag tu mapia i meyannung ta Yama na?

⁹ Ari laman tu nipakannammu ni Jesus ta totolay nga Jehova i ngagan na Dios. Dati ngana nga ammu na Judio ira i ngagan na Dios. Ngem si Jesus “i nakepakanawag nu sinni i Yama.” (Juan 1:​17, 18, NW) Angngarigan na, mabibbig ta Hebreo nga Katurakan nga minaggallallo anna minangngikabbi si Jehova. (Ex. 34:​5-7) Kingngua ni Jesus nga mas manawag yatun nga kinakurug turi ta niyistoria na i angngarigan na neyawawan nga ana anna na yama na. Mabibbig tam nga nezipa na yama i mabbabbabawi nga ana na maski “arayyu paga laman yaya ta balay da.” Nakkara-karela yayya tapenu dafungan i ana na, ginakkopan na yayya, anna napafutuan nga pinakoma na. Masingattam tatun nga istoria i pinakamanawag nga ebidensia nga minaggallallo anna minangngikabbi si Jehova. (Luc. 15:​11-32) Zinuffunan gafu ni Jesus i totolay nga malippawa nu anni nga klase nga Yama si Jehova.

10. (a) Ngatta makagi tam nga inusa ni Jesus i ngagan na Yama na anna kayà na tu kuan gapa yatun na tanakuan? (Marcos 5:19) (Innan gapa i letratu.) (b) Anni i kayà ni Jesus nga kuattam?

¹⁰ Kayà kari gapa ni Jesus nga usan na tanakuan i personal nga ngagan na Yama na? Magga kunnari. Kurugan na karuan nga lider na relihion ta kaggawan ni Jesus nga ari tu mepappangngo nga vuyatan i ngagan na Dios. Ngem ari vuluvuga nipamavulun ni Jesus nga fugaddan yayya na kuddanatun nga tradision na tolay tapenu dayawan i ngagan na Yama na.  Nonopan i tiempo turi ta pinammapia ni Jesus i lalaki nga sinallungan na demonio ta lugar na Gerasa. Fermi i anassing na totolay yatutta nikiddoda nga panawan ngana ni Jesus i lugar da. (Mar. 5:​16, 17) Ngem kayà lagapa ni Jesus nga makannammuan na totolay tari i ngagan ni Jehova. Yayya nga zinog na i lalaki nga ikagi ta kalugaran na, ari tu i kingngua na, nu ari, i kingngua ni Jehova para ta nisa. (Bibbigan i Marcos 5:19.) a Kunnatun gabbalaman i kayà ni Jesus sangawe. Kayà na nga ipakannammu tam i ngagan na Yama na ta interu mundo! (Mat. 24:14; 28:​19, 20) Nu kuattam yatun, mapagayayya tam i Patul tam nga si Jesus.

11. Anni i nituddu ni Jesus ta tagatuttul na ira nga ipakimallo da, anna ngatta importante yatun? (Ezekiel 36:23)

¹¹ Ammu ni Jesus nga gakkag ni Jehova nga pakasantowan i ngagan Na, kayà na kagian, pakurugan nga kinaladdug i ngamin nga akusasion kontra tatun. Yayya nga nituddu na Yafu tam ta tagatuttul na ira nga ipakimallo da yaw: “Ama mi nga egga ta langi, marayaw paray i ngagam-mu.” (Mat. 6:9) Ammu ni Jesus nga yatun i pinakadakal nga isyu nga arubangan na ngamin nga pinaratu. (Bibbigan i Ezekiel 36:23.) Fuera kani Jesus, awan tu tanakuan nga pinaratu ta interu uniberso i pinaka-egga i kingngua na tapenu pakasantowan i ngagan ni Jehova. Ngem turi ta inaresto na kalaban ira si Jesus, inakusadda yayya nga ininsulto na i ngagan na Dios. Fugurammu! Siguradu nga natageno na nga i pamara-parake ta masanto nga ngagan na Yama na i kadammakkan nga liwa. Yayya nga fermi i vurung na nga akusadda saw yayya tu kunnatun. Awayya na tu yatun i pinakarason nu ngatta ‘nepallo i daddam’ na ta ultimu ira nga oras nige na nika-aresto na.—Luc. 22:​41-44.

12. Kunnasi nga napakasanto ni Jesus i ngagan na Yama na?

¹² Tapenu mapakasanto ni Jesus i ngagan na Yama na, inattamman na i ngamin nga paniga-riga, panginsulto, anna pamara-parake da ta nisa. Ammu na nga sinuppal na i Yama na ta ngamin nga gannug. Awan vuluvuga tu ipasiranna. (Heb. 12:2) Ammu na gapa nga puppuntirian yayya ni Satanas tatun nga karigatan nga tiempo na pattolena. (Luc. 22:​2-4; 23:​33, 34) Gakkag ni Satanas nga mapawan ni  Jesus i kinamatalo na, ngem ari yayya vuluvuga navviktoria! Napakurug ni Jesus nga kitalladdug si Satanas megafu ta egga lagapa i aripan ira ni Jehova nga mattalupaddian nga matalo maski ta karigatan ira nga kapurueba!

13. Kunnasim nga mapagayayya i Patul mu nga si Jesus?

¹³ Kayà mu kari nga mapagayayya i Patul mu nga si Jesus? Itulu-tuloy mu nga dayawan i ngagan ni Jehova. Duffunammu i tanakuan nga mammuan i makasta ira nga kualidad na. Nu kuammu yatun, paparigammu si Jesus. (1 Ped. 2:21) Kagitta na, mapagayayya mu si Jehova anna mapakurug mu nga awan tu pasiran na kalaban na nga si Satanas anna fermi i teko na!

MEPALIAG I TANAKUAN NU DAYAWATTAM I NGAGAN NI JEHOVA

14-15. Anni ira i makapabbaw nga mesimmu nu tudduattam i totolay meyannung kani Jehova?

¹⁴ Nu dayawattam i ngagan ni Jehova, makaduffun ittam tapenu mepaliag i tanakuan. Kunnasi? Bueno, ‘sinakkabban ni Satanas i ginnonopan danuri na ari nga mangurug.’ (2 Cor. 4:4) Megafu tatun, kurugadda lallagu yaw ira nga kinaladdug: awan tu Dios, ararayyu yayya anna awan tu pangikavurung na ta totolay, awan tu allo na anna mannanayun nga ziga-rigatan na danuri marake. Gakkag danatun nga daralan i makasta nga ngagan ni Jehova tapenu panakitan na totolay i makiddukko ta nisa. Ngem megafu ta pallayyagayya tam, ari nga metuppal ni Satanas yatun nga gakkag na. Ituddu tam gare ta totolay i kinakurug meyannung ta Yama tam anna dayawattam i masanto nga ngagan na. Anni i efekto natun?

¹⁵ Mafersa i Biblia. Kada tudduattam i totolay meyannung kani Jehova anna nu anni talaga yayya nga klase na Dios, mappabbaw ittam ta efekto natun ta nira. Ari ngana gare ira nga melogo na kinaladdug ira ni Satanas megafu ta masingadda ngana i makasta ira nga kualidad na Yama tam. Mappabbaw ngana ira ta pakapangngua na. (Isa. 40:26) Mattalo ngana ira ta perfekto nga hustisia na. (Deut. 32:4) Napakaru gapa i magigiammu da ta monag nga ka-uto na. (Isa. 55:9; Roma 11:33) Mabanna-bannayan gapa ira nga makannammuan nga talaga minaggiddu yayya. (1 Juan 4:8) Habang mas maddukko ira kani Jehova,  mas mabbalin tu siguradu i iddanama da nga mattolay tu mannanayun bilang ána na. Fugurammu yatun nga pribilehio tam nga uffunan i totolay nga maddukko ta Yama da! Nu kuattam yatun, ikonsidera ittam ni Jehova nga ‘katrabahu na.’—1 Cor. 3:​5, 9, NW.

16. Anni i efekto na ta karuan turi ta nammuadda i ngagan na Dios? Mangistoria tu ekspiriensa.

¹⁶ Ta gafu, puede tu ituddu tam laman ta totolay nga i ngagan na Dios ay Jehova. Ngem awayya na tu daka-dakal i efekto natun ta tolay nga mapia i futu na. Kunnatun i kabataan nga si Aaliyah. b Napadakal yayya ta familia nga ari tu Cristiano. Ngem ari yayya nga magayayya ta relihion na anna ari na matageno nga madukko yayya ta Dios. Ngem nanguli yatun turi ta naki-Bible study yayya ta Saksi ira ni Jehova. Namegafu ngana nga ibilang na i Dios nga Kofun na. Nakaddag gapa yayya turi ta nammuan na nga nalsa i ngagan na Dios ta aru nga Biblia anna natalianan yatun tu pangagal laman, kagitta na Yafu. Nanguli i pattolena turi ta nammuan na i ngagan ni Jehova. Magayayya nga kinagi na: “Egga i ngagan na best Friend ku!” Anni i resulta na? Kagian na: “Kuruga memammo ngana sangawe i panageno ku. Dakal nga pribilehio nga mammuan i ngagan na Dios.” Kunnatun gapa si Steve. Musician yayya anna napadakal ta familia nga istrikto nga tuttuladda i Judaismo. Manaki na i makimiembro ta tadday nga organisadu nga relihion megafu ta aru ngana nga pagappappe i nasingan na. Ngem turi ta natay i yena na, pinurueban na i mevulu ta Bible study nga nikondukta na tadday nga Saksi ni Jehova. Kuruga natukkal i futu na ta nammuan na i ngagan na Dios. Kagian na: “Kakku vuluvuga ammu tu egga balo i ngagan na Dios.” Kagian na paga: “First time nga nakomprendì nga kuru-kurug siko i Dios! Ammù ngana sangawe nga egga ira i kualidad na. Tatukku nga nammuan nga nakaleg ngà tu tadday nga Kofun.”

17. Ngatta determinadu ka nga tulu-tuloy nga dayawan i ngagan nga Jehova? (Innan gapa i letratu.)

¹⁷ Ta pallayyagayyam anna panuddum, ikaga-kagim kari i sagradu nga ngagan nga Jehova? Dudduffunammu kari ira nga masingan nu anni yayya nga klase na Dios? Kanayummu nakuan nga kuan yatun tapenu metulu-tuloy mu nga medayaw i masanto nga ngagan ni Jehova. Nu kuammu yatun, mepaliag mu i tanakuan. Maparigammu gapa i Patul mu nga si Jesu-Cristo. Pinaka-importante ta ngamin, mapagayayya mu i minaggiddu nga Yamam nga si Jehova. Paray nakuan gafu tu ‘adde ta adde noka ay emmu yayya nga idayaw’!—Sal. 145:2.