1-2. Ịyẹ à tị́ ka dahị ụbwọ nyọka jẹ́ jaabwọ kọ la iJihova nyọlẹ kị chị ẹnyị nyamwụ ịrị?

 KỤ IRYA nya ẹla ọlẹ wẹẹ: Ọngọhyẹ ọlẹ ká ẹla nyamwụ háng yẹẹyẹẹ ya ẹla onyobyi ọhẹ bang. À jẹ́ nyori ọnọọkịla o ri lẹ; ma, angịhyẹ tị myị jwoo. Ọlẹ kọ dọmwụ tịpyọ gụ́ wuu ri, ị dọmwụ nyọka kpa ọnọọkịla ọọwa pyẹ gbee ká iru nya angịnyị ja myị ju ẹla ọọwa ịnyịnyị. Ányị ọ tị́ ka lang? Kori ká ẹla nya angịnyị bala ẹnyị ọnyịịla nyang á kaa ri ẹla nyang, ọnọọkịla ọlịnyị ka wụng ẹjẹ, lee ịnyị tị́ ka?—Etu 22:1.

² Iwe-ahụrụ ọwẹ ka dahị ụbwọ nyọka jẹ́ jaabwọ kọ la iJihova ụka ọlẹ kị chị ẹnyị nyamwụ ịrị. Ọngọhẹ lẹpwụ nya anyị nyamwụ ịla epwoohe me ọnọọkịla bọọ je Iivu, kọ ri ọnyang nya ọgbanyẹ ọlẹ ká Ohe họ. Iivu myị ju ọnọọkịla ọọwa. Ọnọọkịla ọọwa du ká adahị bala ịnahị nya ọgbanyẹ la egbeju ọngịrị ta iJihova. Ọọwa dudu ká ọhọbịrị bala igu jụ wẹ ẹpwụ arịrị nya angịnyị ehe wuu. (Ọmwụ. 3:1-6; Rom. 5:12) Akama ịlẹ wuu kahị wẹẹ kpa ẹhị yẹ odehe ọlẹ—igu ogbugbu, ẹwụ ọdada, bala ang ịlahị bwuu—wẹ ka ji ọọlajị nya ịnịịkịla ịlẹ ká Ohe Onyobyi dọmwụ nya omeme i-iku nya Ịdẹn. Ịnịịkịla ịịwa bala ẹla ọtịpyọ ọlẹ kọ họ tọọ da jụ iJihova? Ịwẹẹ ọdada á juwa ka. Kpọkpọọkpọ, iJihova á ju agbama lee ọ-wụ ẹjẹ ka. Ọkọkọ nya ọọwa lẹ, ọ dọmwụ “ri ọngịnyị nya ahị ọwawa” lee ọngọ kaa chị ọkẹkẹnị.—1 Tim. 1:11.

3. Iwe nya ẹlịyẹ ahị tị́ la?

³ Ahị la iwe nyọka họ ká ẹnyị nya iJihova ka la cheri-cheri bwula o-ju ihi nya ehile ọ-chịkpẹẹ ọlẹ: ‘Gwogbo ha ẹnyị nya iJihova.’ (Eje. 113:1) Ahị ka jẹ́-ẹ họ ịnyị bwula o-ya ẹla ọnyịịla nya Ọngọlẹ kọ ri ẹnyị ọla ịgọgọ ọwẹ. À ka myị-ị họ ịnyị? Ahị kụ ẹhị yẹ ang ịkpọnchị ịta ịlẹ kị ka guhị gbịla nyọka gwogbo ha ha ẹnyị nya Ohe bwu ọkịlẹtụ nyahị wuu wẹẹ.

 IJIHOVA KAA CHỊ ỌKẸKẸNỊ ỤKA KAHỊ GWOGBO HA ẸNYỊ NYAMWỤ

4. Ịyẹ tị́ du ká ogbo ogwogwo nyahị kaa kpụ iJihova ịpyọ? Ọ-chụ pwokwita oyina à tị́ ji? (Yẹ ifoto ịnyịnyị.)

⁴ Adahị olepwoohe kaa chị ọkẹkẹnị ụka kahị gwogbo ha ẹnyị nyamwụ. (Eje. 119:108) Ọọwa mẹjẹ nyori Ohe agụgụ lala angịnyị ehe ị-la kpẹẹkpẹẹ ka ịlẹ kị kaa tịtọ nya ogbo bwu ẹga nya angịkịla nyọka la ịlaa? Ehe. Kụ ẹhị yẹ ọ-chụ pwokwita ọlẹ wẹẹ. Ọnyị ochiche ọhẹ rụnyẹ ka ẹga nya adamwụ kaka woo bajẹ lẹ ọ yẹkẹẹ, “Ahụ à ri adịda ọlẹ kọ há gụ́ odehe wuu ẹẹ!” Ẹla ọọwa kpụ adamwụ ịpyọ, ọ dọmwụ chị ọkẹkẹnị ịnyịnyị. Ịyẹ tị́ du? Ahị ka ya nyori kori ká ọnyị ọwẹ á byi adamwụ ịnyị kaka lẹ, ọ́ ka jẹ́-ẹ chị ọkẹkẹnị kaka ịnyị? Ehe. Ọnyị nyamwụ họ́ọ ọ tị chị ọkẹkẹnị nyọlẹ ká ọnyị nyamwụ ya ọháha ọlẹ kọ la dodehe bala abwọlẹ ká ẹla nya adamwụ myọọ lẹhị. Ọ jẹ́ nyori abwẹla ọlịịwẹ ka du ká ọnyị ka chị ọkẹkẹnị jaabwọ kọ wẹẹ nwa ka ịlahị. Chajị nya ẹla ụma ọlịnyị à du ká iJihova, ọngọ ri Adịda ọlẹ kọ gụ wuu, kaa chị ọkẹkẹnị ụka kahị gwobgo họọ lẹ.

5. Ọnọọkịla oyina ahị tị́ kaa yẹ ọmwụ dodehe kori kahị gwogbo ha ẹnyị nya iJihova?

⁵ Ụka kahị gwogbo ha Adahị olepwoohe, ahị kaa mẹjẹ nyori ẹla ọkịla ọlẹ ká Olegu Onyobyi ya ba ọngọngọọng nyahị ri ọnọọkịla ịnyịnyị. Olegu Onyobyi ya nyori ọngịnyị ehe ọhẹ-lọhẹ nyị́ ka godayị giri-giri chẹkpẹ ju ẹnyị nya Ohe myị́ ka. O ya nyori ọngịnyị ehe ọhẹ-lọhẹ nyị́ ka myị-ị họ kpẹẹkpẹẹ ẹ-ẹpwụ nya ịmayẹ ka. O ya nyori ahị wuu nyị ka nyẹẹkpẹ da Ohe kori kahị nyị́ jẹ́ nyori ọ-họ ịnyị nyị ka kpa apyobwuna ọhẹ wahị. (Job. 1:9-11; 2:4) Ma iJobu họ kpẹẹkpẹẹ ẹ-ẹga nya Ohe du kọ mẹjẹ nyori Olegu Onyobyi ri ọla ọnọọkịla. Ahụ tị bẹ? Ahị wuu la iwe nyọka godayị giri-giri chajị nya ẹnyị nya Adahị bala ọ-ka họ ẹla kpọọ ịpyọ bwula ọ-gbịgba họọ kpẹẹkpẹẹ. (Etu 27:11) Ihi ọtụka ọ dọmwụ ri nyọka họ ịnyị lẹ.

6. Ányị ahị tị́ ka bwu gbịla Adịrahụ iDevidi bala ala iLivayị? (INehemaya 9:5)

⁶ Angịlẹ kị la ọháha ẹ-ẹga nya Ohe kaa tịtọ nyọka gwogbo ha ẹnyị nyamwụ bwu ọkịlẹtụ nyaa wuu. Adịrahụ iDevidi da ụpwụ yẹkẹẹ: “M̀ ya ẹla ta ịlọm yẹkẹẹ, ‘Gwogbo ha [iJihova]! Am lịlọm wuu ā gwogbo ha ẹnyị ọlịgọgọ nyamwụ!’” (Eje. 103:1) IDevidi jẹ́ nyori ọ-ka gwogbo ha ẹnyị nya iJihova à ri ọ-ka gwogbo ha iJihova ayịdang ẹẹ. Ụka kahị wo ẹnyị nya iJihova, ahị kaa kpịtịya nya ụma nya ọngịnyị ọlẹ kọ ri bala abwẹla ịnyịịla-ịnyịịla tụ akụrwọ ẹbyẹbyị nyamwụ wuu. IDevidi tịtọ nyọka chị ịgọgọ ju ẹnyị nya Adamwụ bala ọ-ka gwogbo họọ. Ọ tịtọ nyọka họ ịnyị ‘la ịlọmwụ wuu,’ ọọwa ri ọkịlẹtụ nyamwụ lẹpwụ-lẹpwụ. Ụ-ụgbẹyị ọlịnyị-ịnyị, ala iLivayị kaa kpa ịlahị ẹ-ẹpwụ nya ogbo ogwo  ha iJihova. Ị kpa ịlaa keji ya nyori ọnụ nya ịwa nyị la pyee nyọka jẹ́-ẹ ya ogbo nya ẹnyị ọla ịgọgọ nya iJihova dodehe jaabwọ kọ chịla. (Wa iNehemaya 9:5.) Ịwẹẹ ọdada á juwa ka, ịlaa ọ-kpa keji ẹ-ẹpwụ nya ogbo o-bwu ẹpwụ ọkịlẹtụ ọlịịwẹ kaa kpa ọkẹkẹnị kịla iJihova.

7. Ányị ahị tị́ ka bwu gwogbo ha iJihova ụka nya ẹrụ ọnyịịla ọ-kpa pyẹ bala ẹ-ẹpwụ nya ọhịhị nyahị ọla ẹnụ myị́ ẹnụ?

⁷ Alẹ, ahị ka jẹ́-ẹ họ ẹla kpụ iJihova ịpyọ bwula o-ya ẹla nyamwụ je angịkịla ụ-ụgbẹyị ọlẹ kọ ka mẹjẹ nyori ẹla nyamwụ myịhị lẹhị bala o-ri ọ háahị yẹẹyẹẹ. Ụka kahị ja kpa ẹrụ ọnyịịla pyẹ, ahị kpịtịya nyori ẹla ọkpọnchị ọlẹ kahị tịtọ ri ọ-ka họ ká angịnyị ka wẹ ka jẹ́ iJihova, ọ-ka họ kị ka yẹ Adahị ọ-la ọháha jaabwọ kahị kaa yọọ. (Jem. 4:8) Ọ kaa kpụhị ịpyọ nyọka mẹjẹ angịnyị jaabwọ ká ịBayịbụụ chabwọ nya iJihova, du kọ chị ọháha, ẹla ọkpẹẹkpẹẹ, ẹla ọjẹ́jẹ, bala ọngịrị nyamwụ, bala abwẹla ịnyịịla ịkịla ehe. Ahị kaa gwogbo ha iJihova bala ọ-họ ẹla kpọọ ịpyọ ịnyịnyị bwula ọ-maga nyọka họ ẹla gbịlọọ. (Efe. 5:1) Ụka kahị họ ịnyị, ahị kaa datị ẹ-ẹpwụ nya odehe onyobyi ọlẹ. Angịnyị tị ka yẹ jẹ́ nyori ahị datị kpụ ị ka tịtọ nyọka jẹ́ ang odudu myị́. (Mat. 5:14-16) Jaabwọ kahị wẹẹ họ ẹla lawụlẹ bwu ahyẹẹnụ ọhẹ ka ọkịla, ahị ka jẹ́-ẹ la iwe nyọka wụlẹ ang odudu kahị kaa họ ẹla ụgbẹyị ọlẹ kahị kaa họ wẹ ya jaa myị́. Ọọwa ka du ká angịlẹ kị la ọkịlẹtụ ọnyịịla ka tụ ju Ohe chwẹẹ myị́. Ụka kahị gwogbo ha iJihova a-agbẹyị ịlịịwẹ, ọ kaa kpa ọkẹkẹnị wẹ ọkịlẹtụ nyamwụ.—1 Tim. 2:3, 4.

IJISỌSỊ KAA CHỊ ỌKẸKẸNỊ ỤKA KAHỊ GWOGBO HA ẸNYỊ NYA IJIHOVA

8. Ịyẹ tị́ du ká iJisọsị à ri ọngọlẹ ko jẹ́ gwogbo ha ẹnyị nya iJihova gụ́ wuu?

⁸ Ọngọngọhẹ e-epwoohe lee odehe á jẹ́ iJihova wu Ọnyị nyamwụ ọyị ka. (Mat. 11:27) IJisọsị la ọháha ẹ-ẹga nya Adamwụ, ọ tị kaa kpa ịlahị ẹ-ẹpwụ nya ogbo o-gwo ha ẹnyị nya iJihova ịnyịnyị. (Jọn. 14:31) Ẹ-ẹpwụ nya abwọ ọlẹ ká iJisọsị rị ha Adamwụ la odu nya ahyẹẹnụ ohyẹẹkpẹ ọlẹ kọ gbu, ọ chabwọ nya ụkụrwọ ọkpọnchị ọlẹ kọ wẹ odehe kaka họ bwula o-yẹkẹẹ: “M warị kaka chị ọngịrị nya ẹnyị nyang ehe mẹjaa lẹ.” (Jọn. 17:26) Ányị iJisọsị à tị́ bwu họ ịnyị?

9. Oja oyina iJisọsị à tị́ kpa ya ẹla kọ da Adamwụ wụlẹ gede-gede gụ́ wuu?

⁹ Ẹla ọlẹ ká iJisọsị họ kpoye nyọka ya je angịnyị nyori ẹnyị nya Ohe à ri iJihova lẹ ị-ịwẹ kem. Ala iJuu ịlẹ ká iJisọsị mẹ ang jẹ jẹ́ ẹnyị nya Ohe ene lẹ. Ma iJisọsị kpa ịlahị ẹ-ẹpwụ nya ọọwa, nyọlẹ ká ọwa à ri ọngọ “chọọ ehe hahị ahị angịnyị” lee ọ-wụlọọ dodehe. (Jọn. 1:17, 18) Ọ-chụ pwokwita, ụpa nya Ụpwụ Ịgọgọ ọlẹ kị da la òja nya iHiburu họ kahị jẹ́ nyori iJihova la ahyẹẹrẹrwa bala ọ-kaa họ ọnahị. (Ehe. 34:5-7) IJisọsị họ ẹlịlẹhị ọwẹ la gede-gede gụ́ olene ụka kọ ja oja ọ-kpịta nya ọnyị oluhwo bala adamwụ. Ụka kahị wa oja nya abwọlẹ ká adịda ọwẹ rụnyẹ kaka ta ọnyị nyamwụ bala o-woo bajẹ, nyọlẹ kọ chẹhị kaka yọọ “ẹ-ẹga ọlụrụ kọ juwa nya,” kọ tị hịnyọhi họọ bwu ọkịlẹtụ ịnyịnyị, ọ kaa lahị gede-gede jaabwọ ká ahyẹẹrwẹrwa nya iJihova bala ọnahị nyamwụ lụmẹ kaka ba. (Luk. 15:11-32) IJisọsị da angịkịla ụbwọ nyọka jẹ́ ụma nya ọngịnyị ọlẹ ká Adamwụ ri ịnyịlẹhị.

10. (a) Ịyẹ tị́ du kahị jẹ́ nyori iJisọsị kaa wụrụ ẹnyị nya Adamwụ bala o-ri ọ tịtọ ká angịkịla ka wụrụ ẹnyị ọọwa ịnyịnyị? (ỊMakị 5:19) (Yẹ ifoto ịnyịnyị.) (b) Ịyẹ iJisọsị à tị́ tịtọ kahị ka họ alẹ?

¹⁰ IJisọsị ọwa ịnyịnyị tịtọ ká angịnyị ka wụrụ ẹnyị nya Adamwụ? Ịnọọ. Alegbeju nya ịgba ọgbaba ịhyẹ ka kụ irya myị́ nyori nyị ri ẹpẹpẹ o-hu ju Ohe nyọka gwọọ ẹnyị, ma iJisọsị á ya iwe da ọhọhọ ịlịnyị hwọọ abwọ la ọ-ka chị ihi ju ẹnyị nya Adamwụ ka. Kpịtịya nya ụka ọlẹ kọ họ ọlẹng ọhẹ ọlẹ ká alegu inyibyi wu uda e-epweji nya ịGẹrasa. Angịnyị juhi gbee kịị bilẹ iJisọsị  nyọka rụ bwu epweji ọọwa, lẹ ọ́ hụ epweji ọwẹ gbuu kaka. (Mak. 5:16, 17) Kpọkọọkpọ, iJisọsị tị tịtọ ká angịnyị ka jẹ́ ẹnyị nya iJihova ụ-ụwa. Lẹ o byi ọlẹng ọlẹ kọ họ uda nyị ya ang ọlẹ ká iJihova họ họọ ọkọkọ nyọka ya ang ọlẹ ká iJisọsị họ. (Wa ịMakị 5:19.) a IJisọsị tịtọ ká ahị ịnyịnyị ka ya ẹnyị nya Adamwụ je angịnyị chị odehe ọnụ! (Mat. 24:14; 28:19, 20) Ụka kahị họ ịnyị, ẹla nyahị kaa kpụ iJisọsị, Adịrahụ nyahị ịpyọ.

11. Ịyẹ iJisọsị à tị́ mẹjẹ angịjụgbẹyị nyamwụ kị ka raabwọ chajị nyamwụ? Ịyẹ tị́ du ká ang ọọwa baba? (Isikẹlụ 36:23)

¹¹ IJisọsị jẹ́ nyori irya nya iJihova ri ọ-ka chị ịgọgọ ju ẹnyị nyamwụ bala ọ-ka yẹ ịnịịkịla ịlẹ wuu kị me ba ẹnyị nyamwụ ọmwụ dodehe. Ịnyị à du ká Ayịbaba nyahị mẹjẹẹhị nyị raabwọ yẹkẹẹ: “Adahị ọlẹ ká juwa e-epwoohe, kahị chị ịgọgọ ju ẹnyị nyang” lẹ. (Mat. 6:9) IJisọsị jẹ́ nyori ẹla ọlẹ kọ la kpọnchị gụ wuu kọ jahị da angịnyị ehe bala alegu-ẹrụ à wẹ ẹẹ. (Wa Isikẹlụ 36:23.) Ọngịnyị ehe lee olegu-ẹrụ ọhẹ-lọhẹ á ji kọ jẹ́ chị ịgọgọ ju ẹnyị nya iJihova gụ abwọlẹ ká iJisọsị họ lẹka. Ma ụka kị wu iJisọsị, ọhọbịrị oyina aluji nyamwụ à tị́ kpa chị ẹla bọọ? Ị ya nyị hu ẹpẹpẹ ju Ohe kaka kpoye! IJisọsị jẹ́ nyori ọ-ka hu ẹpẹpẹ ju ẹnyị nya Adamwụ à rị ọhọbịrị ọtịpyọ gụ wuu kọ ka jẹ́-ẹ họ ẹẹ. O ri olo nyamwụ yẹẹyẹẹ nyori ị ka chị ẹlẹwẹ bọọ gbee kị ka ya eje woo chajị nya ọọwa. Ọ chịkpẹẹ myị́ ká ọọwa à ka du ká iJisọsị juwa ẹ-ẹpwụ nya “olujwo ọtọtọ” pwụ ọlịnyị lụka nya awa ịmanyị-ịmanyị ene kịị wẹ ka woo lẹ.—Luk. 22:41-44.

12. Ányị iJisọsị à tị́ bwu chị ịgọgọ ju ẹnyị nya Adamwụ ụ-ụgbẹyị ọlẹ kọ gụ́ wuu?

¹² IJisọsị bọhụ ẹ-ẹpwụ nya enyiri, ido ododo, bala ọnọọkịla ọnyị myị́ ọnyị ọlẹ kị me bọọ, chajị kọ ka jẹ́-ẹ chị ịgọgọ ju ẹnyị nya Adamwụ. Ọ jẹ́ nyori ọwa nyị ju ihi nya Adamwụ ẹ-ẹpwụ nya ang myị́ ang, lẹ ịngịngịhyẹ-ẹ́ ji ọ ka lọọ oyoyi kaka. (Hib. 12:2) Ọ jẹ́ ịnyịnyị nyori Olegu Onyobyi nyaa wẹẹ kpa ẹla mwahị nyamwụ kpangga lụka olujwo ọwẹ lẹ. (Luk. 22:2-4; 23:33, 34) Olegu Onyobyi dahịhile nyori ọ ka họ ká iJisọsị ka nyẹẹkpẹ da iJihova, ma ọ́ tị họọ myị́ kpong-kpong ka! IJisọsị mẹjẹ nyori Olegu Onyobyi ri ọlọnọọkịla ịnyịlẹhị bala o-ri iJihova la angịnyị ịlẹ kị kaa godayị giri-giri họọ, tụ ụka kị dọmwụ ji ẹpwụ nya ịmayẹ ilujwo!

13. Ẹlịyẹ a tị́ ka họ kọ ka kpụ Adịrahụ nyang ịpyọ?

 ¹³ À tịtọ nyọka họ ẹla kpụ Adịrahụ nyahị ịpyọ? Kịnyaa la o-gwogbo ha ẹnyị nya iJihova, ká da angịkịla ụbwọ nyọka jẹ́ ụma nya ọngọlẹ ká Ohe nyahị ri ịnyịlẹhị mẹ. Kori ká họ ịnyị lẹ aalẹ, à wẹẹ dịrẹ ọgụ-ẹta nya iJisọsị lẹ. (1 Pit. 2:21) Lala iJisọsị, à wẹẹ họ ká iJihova ka chị ọkẹkẹnị, ọọwa tị mẹjẹ ịnyịnyị nyori Olegu Onyobyi, kọ ri oluji nya Ohe, ri ọlọnọọkịla ọ-jẹ́ oyoyi ka!

AHỊ KAA DỤBWỌ CHỊ ỌHỊHỊ NYA ANGỊNYỊ DA ỤKA KAHỊ GWOGBO HA ẸNYỊ NYA IJIHOVA

14-15. Ẹla ọkpịpyọ oyina à tị́ ka họ myị́ kori kahị mẹ ang jẹ angịnyị u-uhye nya iJihova?

¹⁴ Ụka kahị gwogbo ha ẹnyị nya iJihova, ahị kaa dụbwọ chị ọhịhị nya angịnyị da. Ányị ọ tị́ị̀ bwu lịnyị? Olegu Onyobyi ‘kpụ angịlẹ kị myị la nya Ohe ka idu chwiichwii’ juwa. (2 Kọr. 4:4) Ọọwa du kị kaa myị ju ịnịịkịla ịlẹ ká Olegu Onyobyi kaa me lala: Ohe-é ji ka, Ohe ji lụrụ hiihi bala o-ri ọ́ kaa kpahị ju angịnyị ehe ka, Ohe la ọkwọ bala ọ-kaa yẹ angịtịpyọ akama gboyi myị́ oyi. Ịnịịkịla ịwẹ kaa bịrị ẹnyị nya iJihova, chajị ká angịnyị ka myị-ị́ tụ jwoo chwẹẹ ka. Ma ụkụrwọ nya ẹrụ ọnyịịla ọ-kpa pyẹ nyahị du ká irya nya Olegu Onyobyi ọọwa kaa họ jịra myị́ ka. Ahị kaa mẹ ẹlịlẹhị u-uhye nya Adahị jẹ angịnyị, bala o-gwogbo ha ẹnyị ọla ịgọgọ nyamwụ. Ịyẹ à tị́ kaa ri ocheju nya ọọwa?

¹⁵ Ẹlịlẹhị ọlẹpwụ nya Omyi Ẹla nya Ohe la ọngịrị ọtụka-ọtụka. Bwula ọ-mẹ ẹlịlẹhị jẹ angịnyị u-uhye nya iJihova, ahị kaa yẹ ẹla ọkpịpyọ ọlẹ kọ kaa họ. Ịnịịkịla ịlẹ ká Olegu Onyobyi ya chị angịnyị a-ahị kaa yi hyaa, ị kaa dọmwụ nyọka yẹ abwẹla ịnyịịla nya Ohe nyahị ịnyịnyị lẹlẹ. Ọ kaa laa ẹbyẹbyị nya ụma nya ọngịrị ọtụka ọlẹ ká Ohe la. (Ayị. 40:26) Ị jẹ́-ẹ dahịhilọọ chajị nyọlẹ kọ kaa họ ẹla ọkpakpa. (Ehile. 32:4) Ị kaa jẹ́ ang nya ịlehị-ịlẹhị bwu ẹla ọjẹ́jẹ ọtụka nyamwụ. (Ayị. 55:9; Rom. 11:33) Ị tị kaa yé ẹjẹ ọkpụ́kpụ ịnyịnyị nyọka jẹ́ nyori Ohe ri ọháha. (1 Jọn. 4:8) Jaabwọ kị wẹe tụ ju iJihova chwẹẹ gụ́ olene, ẹhị ọrịrịị-rịrị nya ọhịhị o-gboyi myị́ oyi ọlẹ kị la kaa laa kpakpa gụ́ ọọwa. Ihi ọtụka ọ ri hahị nyọka da angịnyị ụbwọ nyọka tụ ju Adaa chwẹẹ lẹ! Ụka kahị họ ịnyị, iJihova kaa yẹhị lala “alụkụrwọ ị-da Ohe Oluhye ụbwọ.”—1 Kọr. 3:5, 9.

16. Ányị ọ tị́ kaa la angịhyẹ lụka nya ọgbanyẹ ọlẹ kị jẹ́ ẹnyị nya Ohe? Ọ-chụ pwokwita oyina à tị́ ji?

 ¹⁶ Ụka nya ọgbanyẹ, ahị ka mẹjẹ ọngịnyị chwee nyori ẹnyị nya Ohe à ri iJihova lẹ kem myị́. Ọọwa kem ka yẹ ọhịhị nya ọngọ la ọkịlẹtụ ọnyịịla da myị́. Ọ-chụ pwokwita, ị kpa ọyẹẹnọ ọhẹ ká ẹnyị nyamwụ ri Aaliyah b nwa ẹ-ẹpwụ nya ịgba ọgbagba ọhẹ ọlẹ kị kaa mẹ ịBayịbụụ jẹ ka. Ma ẹla nya ịgba ọgbagba ọwaa á kaa wọọ ẹpwụ ka, lẹ ọ́ jẹ́ tụ ju Ohe chwẹẹ ka. Ẹlẹwẹ yẹda ụka kọ dọmwụ nyọka jẹ́ ịBayịbụụ bala Alibeenu nya iJihova. Ọ dọmwụ nyọka yẹ Ohe lala Oligu nyamwụ. Ọ tị lọọ ẹbyẹbyị ịnyịnyị nyọlẹ kọ wẹ ka jẹ́ nyori nyị gba ẹnyị nya Ohe hi ẹpwụ nya ịBayịbụụ lụmẹ-lụmẹ kpụ ị ya anyị ọchịchị lala Ayịbaba kụ ọmwakpa nyamwụ. Ẹnyị nya iJihova ọjẹ́jẹ yẹ ọhịhị nyamwụ da. O yẹkẹẹ: “Oligu ọlẹ kọ hám gụ́ wuu la ẹnyị!” Ịyẹ à tị́ ri ocheju nya ọọwa mẹ? O yẹkẹẹ: “M̀ la okpunyi yẹẹyẹẹ ọ-ọkịlẹtụ nyam lẹẹlẹẹ lẹ. O ri ihi ọtụka-ọtụka ham.” Ọlẹng ọhẹ ká ẹnyị nyamwụ ri Steve ri ọngọ mwu eje. O ri ọngọhẹ ẹ-ẹpwụ nya ala iJuu ịlẹ ká ẹla nya ịlaa kem à kaa háa. Ọ kaa chị ịlọmwụ ebwo hi ịgba ọgbagba nya angịkịla chajị ịnịịkịla ịlụwa chọọ aga lẹ. Ma ụka ọlẹ ká ịnamwụ gbu, ọ myọnụ nyọka hụhụ i-ijata nyọlẹ ká ọngọhẹ nya Alibeenu nya iJihova wẹẹ jẹ́ ịBayịbụụ bala ọngịnyị. Ọ gwọọ ọ-ọkịlẹtụ yẹẹyẹẹ nyọlẹ kọ wẹ ka jẹ́ ẹnyị nya Ohe. Ọ yẹkẹẹ: “Ḿ jẹ́ ẹnyị nya Ohe ẹnẹnẹhẹ lẹka.” Ọ myịmyị yẹkẹẹ: “Ọlẹ ri ụka ọhọhẹ kam wẹẹ jẹ́ nyori Ohe ji ịnyịlẹhị! M̀ yọọ lala Ọngọlẹ kọ ji ọlam-ọlam lẹ. Ụka ọwẹ m jẹ́ nyori m̀ ye oligu lẹlẹ.”

17. Ịyẹ tị́ du ká cheje nyọka kịnyaa la o-gwogbo ha ẹnyị nya iJihova? (Yẹ ifoto ịnyịnyị.)

¹⁷ Ụka ká ja kpa ẹrụ ọnyịịla pyẹ, à kaa ya ẹnyị nya iJihova, kọ ri ẹnyị ọla ịgọgọ je angịnyị? À kaa daa ụbwọ nyọka yẹ ụma nya ọngọlẹ ká Ohe nyahị ri? Bwula ọ-họ ịnyị, à wẹẹ gwogbo ha ẹnyị nya Ohe. Lẹ kịnyaa la o-gwogbo ha ẹnyị ọ-la ịgọgọ nya iJihova bwula ọ-da angịnyị ụbwọ wẹ ka jẹ́ ọngọlẹ kọ la ẹnyị ọwẹ mẹ. Bwula ọ-họ ịnyị, à ka chị ọhịhị nya angịnyị da. À ka jẹ́-ẹ dịrẹ ụgbẹyị ọkpakpa nya Adịrahụ nyang, kọ ri ịKịrayịsị iJisọsị. Ọlẹ kọ tị gụ́ wuu ri, ẹla nyang ka kpụ iJihova Adang ịpyọ. Lẹ aa “gwogbo [ha ẹnyị nyamwụ] gbe oyi myị́ oyi” mẹ!—Eje. 145:2.