1-2. Ania ti makatulong tapno maawatantayo ti marikrikna ni Jehova kadagiti pammadakes iti naganna?

 PANUNOTEM daytoy: Adda ipatpategmo a tao a mangpadpadakes kenka. Ammom a saan nga agpayso ti pammadakesna; ngem mamati latta ti dadduma. Nakarkaro pay, iwarwarasda payen dayta iti sabsabali isu nga adun ti mamati. Ania ngay ti mariknam? No ay-ayatem dagiti tattao ken ipatpategmo ti nasayaat a reputasionmo, sigurado a maladingitanka iti dayta a pammadakes, saan kadi?—Prov. 22:1.

² Dayta a pagarigan ti makatulong kadatayo tapno maawatantayo ti narikna ni Jehova idi adda nangdadael iti reputasionna. Adda anghel a nagulbod maipapan kenkuana iti kaunaan a babai a ni Eva. Namati met ni Eva. Gapu iti dayta a kinaulbod, nagrebelde ken Jehova da Adan ken Eva isu nga agbasol ken matay ti amin a tattao. (Gen. 3:​1-6; Roma 5:12) Amin a problema ditoy lubong—kas iti ipapatay, gubat, panagrigrigat—ket gapu kadagiti kinaulbod nga imbaga ni Satanas iti hardin ti Eden. Nasaktan kadi ni Jehova iti pammadakes kenkuana ken kadagiti epekto dayta? Siempre. Ngem saan a nagipempen ni Jehova iti sakit ti nakem. Kinaagpaysuanna, nagtalinaed latta isuna kas “ti naragsak a Dios.”—1 Tim. 1:11.

3. Ania ti pribilehiotayo nga aramiden?

³ Pribilehiotayo a tumulong iti pannakaalangon ti nagan ni Jehova. Kasano? No surotentayo daytoy a simple a bilin: “Idaydayawyo ti nagan ni Jehova.” (Sal. 113:1) Maaramidtayo dayta no ipakaammotayo dagiti kinapudno maipapan Kenkuana. Aramidem kadi dayta? Usigentayo ti tallo a nabileg a rason a makatulong kadatayo tapno naimpusuan a maidaydayawtayo ti nagan ti Diostayo.

 MAPARAGSAKTAYO NI JEHOVA NO IDAYDAYAWTAYO TI NAGANNA

4. Apay a maparagsaktayo ni Jehova no idaydayawtayo isuna? Iyilustrar. (Kitaen met ti ladawan.)

⁴ Maparagsaktayo ti nailangitan nga Amatayo no idaydayawtayo ti naganna. (Sal. 119:108) Kayat kadi a sawen dayta a ti mannakabalin-amin a Dios ket kas kadagiti imperpekto a tattao a pagaayatda ti maidaydayaw tapno mayat ti panagriknada iti bagida? Saan. Panunotem daytoy nga ilustrasion. Adda ubing a babai a nangarakup ken amana sa imbagana, “Sika ti the best a daddy!” Napaisem ti ama ken permi ti ragsakna. Apay? Gapu kadi ta kaykayatna ti mapadayawan ken masapul a mangngegna dayta manipud iti anakna tapno sumayaat ti riknana? Saan. Imbes ketdi, naragsak isuna a makakita ken makangngeg nga ay-ayaten ken ap-apresiaren ti anakna. Ammo ti ama a dumakkel ti anakna a nakaragragsak ta nadungngo ken manangapresiar. Kasta met ni Jehova, ti kasayaatan nga Amatayo. Maparagsaktayo no idaydayawtayo isuna.

5. No idaydayawtayo ti nagan ti Dios, ania a kinaulbod ti mapaneknekantayo a saan nga agpayso?

⁵ No idaydayawtayo ti nailangitan nga Amatayo, makatulongtayo a mangpaneknek a saan nga agpayso ti sabali pay a kinaulbod ni Satanas maipapan iti tunggal maysa kadatayo. Imbaga ni Satanas nga awan ti tao nga agtalinaed a matalek iti Dios no makapasar iti rigat. Imbagana pay a sumardengtayo nga agserbi iti Dios no iti panagkunatayo ket pagsayaatantayo dayta. (Job 1:​9-11; 2:4) Ngem pinaneknekan ti matalek a ni Job nga ulbod ni Satanas. Sika ngay? Pribilehio ti tunggal maysa kadatayo nga idepensa ti nagan ti Amatayo ken simamatalek nga agserbi kenkuana tapno maparagsaktayo isuna. (Prov. 27:11) Talaga a nagsayaat a pribilehio dayta.

6. Kasanotayo a matulad ni Ari David ken dagiti Levita? (Nehemias 9:5)

⁶ Dagiti matalek a tattao a mangay-ayat ken Jehova kayatda a naimpusuan nga idaydayaw ti naganna. Insurat ni Ari David: “Idaydayawko ni Jehova; ti intero a kinataok idaydayawna ti nasantuan a naganna.” (Sal. 103:1) Naawatan ni David a ti panangidaydayaw iti nagan ni Jehova ket ti panangidaydayaw ken Jehova a mismo. Karaman iti nagan ni Jehova ti reputasionna, ti amin a nagsasayaat a kualidadna, ken dagiti nakaskasdaaw nga aramidna. Kayat ni David a masantipikar ken maidaydayaw ti nagan ti Amana. Kayatna nga aramiden dayta ‘iti intero a kinataona’—kayatna a sawen, iti amin a pusona. Umasping iti dayta, indauluan dagiti Levita ti panangidaydayaw ken Jehova. Sipapakumbaba nga inaminda a kurang ti sasao tapno naan-anay a mayebkasda ti pammadayaw a pakaikarian ti sagrado a  nagan ni Jehova. (Basaen ti Nehemias 9:5.) Sigurado a naragsakan ni Jehova iti kasta a napakumbaba ken naimpusuan a panangidaydayaw kenkuana.

7. Kasanotayo a maidaydayaw ni Jehova iti ministeriotayo ken kadagiti inaldaw nga ar-aramidentayo?

⁷ Ita, maparagsaktayo ni Jehova no ibagatayo iti dadduma nga ay-ayatentayo unay isuna ken agyamyamantayo kenkuana. No addatayo iti ministerio, laglagipentayo a ti kangrunaan a kalattayo ket iyasidegtayo dagiti tattao ken Jehova tapno mariknada met ti marikriknatayo iti ay-ayatentayo nga Ama. (Sant. 4:8) Maragsakantayo a mangipakita kadagiti tattao iti ibagbaga ti Biblia maipapan ken Jehova, kas iti ayatna, hustisia, sirib, pannakabalinna, ken ti dadduma pay a makaay-ayo a kualidadna. Maidaydayawtayo ken maparagsaktayo met ni Jehova no ikagumaantayo a tuladen isuna. (Efe. 5:1) No aramidentayo dayta, agbalintayo a naiduma iti daytoy dakes a lubong. Mabalin a madlaw dayta dagiti tattao ken aginteresda no apay. (Mat. 5:​14-16) Bayat ti pannakilangentayo kadakuada iti kada aldaw, baka mabalintayo nga ilawlawag no apay a naidumatayo. Kas resultana, mayasideg iti Diostayo dagiti napasnek a tattao. No idaydayawtayo ni Jehova kadagita a pamay-an, maparagsaktayo ti pusona.—1 Tim. 2:​3, 4.

MAPARAGSAKTAYO NI JESUS NO IDAYDAYAWTAYO TI NAGAN NI JEHOVA

8. Kasano nga indauluan ni Jesus ti panangidaydayaw iti nagan ni Jehova?

⁸ Adayo a mas am-ammo ni Jesus ni Jehova ngem iti amin a dadduma pay a masirib a parsua idiay langit ken ditoy daga. (Mat. 11:27) Ay-ayaten ni Jesus ti Amana, ken indauluanna ti panangidaydayaw iti nagan ni Jehova. (Juan 14:31) Iti kararagna ken Amana iti rabii sakbay a natay, imbagana ti kapatgan a naaramidanna bayat ti ministeriona ditoy daga: “Impakaammok . . . ti naganmo.” (Juan 17:26) Ania ti kayatna a sawen?

9. Ania nga ilustrasion ti inusar ni Jesus a mangilawlawag iti kasayaatan a pamay-an maipapan iti Amana?

⁹ Saan la nga impakaammo ni Jesus kadagiti tattao a Jehova ti nagan ti Dios. Ammon dagiti Judio a sinuruan ni Jesus ti nagan ti Dios. Ngem indauluan ni Jesus ti ‘panangilawlawag iti maipapan ken Amana.’ (Juan 1:​17, 18) Kas pagarigan, ipakaammo ti Hebreo a Kasuratan a ni Jehova ket naasi ken mannakipagrikna. (Ex. 34:​5-7) Lallalo nga inlawlawag ni Jesus dayta a kinapudno idi insalaysayna ti ilustrasion maipapan iti barayuboy nga anak ken ti amana. Mabasatayo nga idi nakita ti ama ti agbabbabawi nga anakna “uray adayo pay laeng,” napanen nagtaray tapno sabtenna ken arakupenna. Naimpusuan a pinakawanna ti anakna. Nakalawlawag nga ipakita dayta ti kasta la unay nga asi ken pannakipagrikna ni Jehova. (Luc. 15:​11-32) Tinulongan ni Jesus dagiti tattao a mangammo iti talaga a kinasiasino ti Amana.

10. (a) Kasanotayo nga ammo nga inusar ni Jesus ti personal a nagan ti Amana ken kayatna a kasta met ti aramiden ti dadduma? (Marcos 5:19) (Kitaen met ti ladawan.) (b) Ania ti kayat ni Jesus nga aramidentayo ita?

¹⁰ Kayat kadi met ni Jesus nga usaren ti dadduma ti personal a nagan ti Amana? Wen. Para iti dadduma a lider ti relihion idi panawen ni Jesus, sagrado unay ti nagan ti Dios isu a saan a mabalin nga usaren dayta. Ngem saan nga impalubos ni Jesus a dagita a saan a nainkasuratan a tradision ti manglapped kenkuana a mangidaydayaw iti nagan ti Amana. Kitaem ti napasamak idi inagasanna ti maysa a lalaki a linuganan ti demonio iti rehion dagiti Geraseno. Nagbuteng dagiti tattao ken impakaasida ken Jesus a pumanaw, isu a saan a nagbayag iti dayta a rehion. (Mar. 5:​16, 17) Ngem kayat latta ni Jesus nga ipakaammo sadiay ti nagan ni Jehova. Isu a binilinna ti inagasanna a lalaki a mangipakaammo kadagiti tattao ti inaramid ni  Jehova kenkuana, saan a ti inaramidna. (Basaen ti Marcos 5:19.) a Kasta met laeng ti kayat ni Jesus nga aramidentayo ita—ipakaammotayo ti nagan ti Amana iti intero a lubong! (Mat. 24:14; 28:​19, 20) No aramidentayo dayta, maparagsaktayo ti Aritayo a ni Jesus.

11. Ania ti insuro ni Jesus nga ikararag dagiti pasurotna, ken apay a napateg dayta? (Ezekiel 36:23)

¹¹ Ammo ni Jesus a panggep ni Jehova a masantipikar ti naganna, a mapaneknekan a kinaulbod ti amin a pammadakes kenkuana. Dayta ti rason nga insuro ti Apotayo kadagiti pasurotna nga ikararagda: “Amami nga adda iti langit, masantipikar koma ti naganmo.” (Mat. 6:9) Ammo ni Jesus a dayta ti kadakkelan nga isyu a nakairamanan ti amin a parsua. (Basaen ti Ezekiel 36:23.) Kadagiti amin a masirib a parsua iti uniberso, ni Jesus ti kadakkelan ti naaramidan iti panangsantipikar iti nagan ni Jehova. Ngem idi naaresto ni Jesus, ania a basol ti inyakusar kenkuana dagiti bumusbusor? Pinadakesna kano ti Dios! Ammo la ketdi ni Jesus a ti panangpardaya wenno panangpadakes iti nasantuan a nagan ti Amana ti kadadagsenan a basol. Nadanagan unay ta amangan no maidarum ken masentensiaan isuna iti kasta a krimen. Baka dayta ti kangrunaan a rason a ‘nariribukan unay’ ni Jesus, sumagmamano nga oras sakbay a naaresto.—Luc. 22:​41-44.

12. Kasano a nasantipikar ni Jesus ti nagan ti Amana iti kasayaatan a pamay-an?

¹² Tapno masantipikar ni Jesus ti nagan ti Amana, inibturanna ti amin a pannakaparigat, insulto, ken panangpadakes kenkuana. Ammona a no agtulnog ken Amana iti amin a gundaway, awan ti rumbeng nga ibainna. (Heb. 12:2) Ammona met a direkta nga at-atakaren isuna ni Satanas kadagita a narigat a tiempo. (Luc. 22:​2-4; 23:​33, 34) Nangnamnama unay ni Satanas a saan nga agmatalek ni Jesus. Ngem kasta la unay ti pannakapaay ni Satanas! Talaga a pinaneknekan ni Jesus a nakaul-ulbod ni Satanas ken addaan ni Jehova kadagiti napudno nga adipen nga agtultuloy a matalek kenkuana uray kadagiti karirigatan a pannubok!

13. Kasanom a maparagsak ti agturturayen nga Aritayo?

¹³ Kayatmo kadi a maparagsak ti agturturayen nga Aritayo? Itultuloymo a dayawen ti nagan ni Jehova, ken tulongam ti dadduma a mangammo kadagiti nagsasayaat a kualidadna.  No aramidem dayta, tultuladem ni Jesus. (1 Ped. 2:21) Kas ken Jesus, maparagsakmo ni Jehova ken mapaneknekam a nakaul-ulbod ken awan babain ti bumusbusor Kenkuana a ni Satanas!

MATULONGANTAYO DAGITI TATTAO A MAISALAKAN NO IDAYDAYAWTAYO TI NAGAN NI JEHOVA

14-15. Ania dagiti nagsasayaat a mapasamak no isurotayo dagiti tattao maipapan ken Jehova?

¹⁴ No idaydayawtayo ti nagan ni Jehova, matulongantayo dagiti tattao a maisalakan. Kasano? Ammotayo a “binulsek [ni Satanas] ti pampanunot dagiti di manamati.” (2 Cor. 4:4) Kas resultana, pinati ti adu a tattao dagiti kinaulbod ni Satanas a kas kadagitoy: Awan kano ti Dios, adayo kano ti Dios ken saan a maseknan kadagiti tattao, naulpit kano ti Dios ken tutuokenna iti agnanayon dagiti managdakdakes. Ibagbaga ni Satanas dagita a kinaulbod ta kayatna a dadaelen ken ibabain ti nagan ken reputasion ni Jehova tapno saan a kayat dagiti tattao ti makigayyem kenkuana. Ngem gapu iti panangasabatayo, maabak ni Satanas ket saanna a maibanag ti panggepna. Maisurotayo met kadagiti tattao ti kinapudno maipapan iti Dios ken Amatayo ket maidaydayawtayo ti nasantuan a naganna. Ania ti resultana?

¹⁵ Nakabilbileg dagiti kinapudno iti Sao ti Dios. Nagsasayaat ti mapasamak no isurotayo kadagiti tattao ti maipapan ken Jehova ken iti kinasiasinona. In-inut a maikkat dagiti kinaulbod nga ibagbaga ni Satanas a nangbulsek kadakuada isu a mangrugi metten a makitada dagiti makitkitatayo a nagsayaat a kualidad ti naayat nga Amatayo. Masdaawda iti awan limitasionna a pannakabalinna. (Isa. 40:26) Masursuroda ti agtalek kenkuana ta perpekto ti hustisiana. (Deut. 32:4) Adu met ti masursuroda iti awan kapadana a siribna. (Isa. 55:9; Roma 11:33) Maliwliwada pay no maammuanda nga isu ti personipikasion ti ayat. (1 Juan 4:8) Bayat a sumingsingedda ken Jehova, agbalin a napaypayso kadakuada ti namnamada a biag nga agnanayon kas annakna. Anian a nagsayaat a pribilehio ti tumulong kadagiti tattao a suminged iti Amatayo! No aramidentayo dayta, ibilangnatayo ni Jehova kas ‘katrabahuanna.’—1 Cor. 3:​5, 9.

16. Ania ti nagsayaat nga epektona kadagiti tattao no maammuanda ti nagan ti Dios? Mangted kadagiti pagarigan.

 ¹⁶ Iti damo, mabalin a ti maisurotayo laeng kadagiti tattao ket ti nagan ti Dios a Jehova. Ngem mabalin nga agpaut ti epekto dayta iti puso ti maysa a nasingpet a tao. Kasta ti napasamak iti agtutubo a ni Aaliyah b a napadakkel iti saan a Kristiano a pamilia. Nupay kasta, saan a kontento iti relihionna ken saanna a narikna a nasinged isuna iti Dios. Ngem nagbalbaliw dayta idi nakipagadal kadagiti Saksi. Imbilangna ti Dios kas Gayyemna. Ken nasdaaw idi naammuanna a naikkat ti nagan ti Dios iti adu a Biblia ken nasuktan laengen dayta kadagiti titulo kas iti Apo. Idi naammuanna a Jehova ti nagan ti Dios, nagbalbaliw ti biagna. Imbagana: “Adda gayam nagan ti best Friend-ko!” Ti resultana? Kinunana: “Nakataltalnan ti panunotko ken nakaragragsakakon.” Adda met maysa a lalaki nga agnagan Steve a maysa a musikero ken dimmakkel iti istrikto a pamilia dagiti Judio. Saanna a kayat ti sumrek iti relihion gapu kadagiti panaginsisingpet a makitkitana. Ngem idi natay ni inangna, immanamong nga agobserbar iti panangikondukta ti maysa a Saksi ni Jehova iti panagadal iti Biblia. Natukay unay ti pusona idi naammuanna nga adda nagan ti Dios. Imbagana: “Ita la a naammuak nga adda gayam nagan ti Dios.” Innayonna: “Daydi ti umuna a gundaway a nariknak nga agpaypayso ti Dios! Pudno gayam isuna a Persona. Sipud idin, ammok a nakasarakak iti Gayyem.”

17. Apay a determinadoka nga agtultuloy a mangidaydayaw iti nagan ni Jehova? (Kitaen met ti ladawan.)

¹⁷ No mangaskasaba ken mangisursuroka, ipakpakaammom kadi ti sagrado a nagan ni Jehova? Tultulongam kadi dagiti tattao a mangammo iti kinasiasino ti Diostayo? No aramidem dayta, maidaydayawmo ti nagan ti Dios. Sapay koma ta itultuloymo nga idaydayaw ti nagan ni Jehova babaen ti panangtulongmo kadagiti tattao a mangammo kadagiti nagsasayaat a kualidad ti makinnagan iti dayta. Iti kasta, matulongam ida a maisalakan. Matuladmo met ti inyulidan ti Aritayo a ni Jesu-Kristo. Ken kapatgan iti amin, maparagsakmo ti naayat nga Amatayo a ni Jehova. Sapay koma ta ‘idaydayawmo ti naganna iti agnanayon nga awan inggana’!—Sal. 145:2.