1-2. Eme o lẹliẹ omai riẹ nọ o be da Jihova gaga nọ Ẹdhọ ọ be raha odẹ riẹ na?

 DAE rehọ iẹe nọ ohwo jọ nọ ọ kẹle owhẹ oma ọ ta ekpehre ẹme jọ kpahe owhẹ. Whọ riẹ nọ ẹme na ọrue, rekọ ahwo jọ nọ ọ ta riẹ kẹ a rọwo nọ uzẹme. Ahwo yena omarai a tẹ be jẹ vuẹ amọfa ẹme na re, yọ ahwo buobu a be ginẹ rọwo. Ẹvẹ who ti rri oware utioye na? O te kẹ owhẹ uye keme whọ gwọlọ nọ a raha odẹ ra ha, yọ whọ gwọlọ nọ a lẹliẹ ahwo họ họ.—Itẹ 22:1.

² Oriruo yena o lẹliẹ omai riẹ nọ o da Jihova gaga okenọ ukọ-odhiwu riẹ jọ ọ raha odẹ riẹ. Ukọ-odhiwu yena o gu ọrue fihọ Jihova uzou kẹ aye ọsosuọ na Ivi. Ọ tẹ ginẹ rọwo. Ọrue yena o tẹ lẹliẹ Adamu avọ Ivi nọ a yẹ omai kpobi na keke aro fihọ raha uzi Jihova. Ere uzioraha gbe uwhu e rọ ruọ akpọ na. (Emu. 3:1-6; Rom 5:12) Uye nọ o rrọ akpọ na nẹnẹ kẹhẹ na, fiki ọrue yena nọ Setan o gu evaọ ọgbọ Idẹn na gbe enọ o gbe bi gu nẹnẹ. Ẹmo ọ rrọ ofẹ jọ, yọ uwhu omariẹ o be kẹ ahwo uvẹ hẹ. Kinọ Jihova ọ be ruẹ epanọ Ẹdhọ ọ be raha odẹ riẹ na gbe uye nọ o bi noi ze na, o be were iẹe? Ijo, o be dae. Rekọ oyena o wha riẹ ze nọ eva e gbẹ be rọ were Jihova vievie he he. Ebaibol ọ ta nọ Jihova yọ “Ọghẹnẹ evawere.”—1 Tim. 1:11.

3. Obọdẹ uvẹ vẹ u rovie fihọ kẹ omai?

³ Ebaibol ọ ta nọ: “Wha jiri odẹ Jihova.” (Ol. 113:1) Ma te bi ru ere, kiyọ ma bi dhesẹ nọ Setan ọ be raha odẹ Jihova gheghe, inọ ere Jihova ọ rrọ họ. Yọ emamọ uvẹ jọ u rovie fihọ kẹ omai na! Edhere jọ nọ ma re ro jiri odẹ Jihova họ, ma rẹ ta ẹme nọ o rẹ lẹliẹ ahwo riẹ nọ odẹ Ọghẹnẹ o rrọ ọrẹri. Yọ emamọ Ọghẹnẹ ọ rrọ. Kọ whọ te ta ẹme ezi Ọghẹnẹ? Ma ti dhunu te obọdẹ eware esa jọ nọ o rẹ lẹliẹe jọ omai oja inọ ma re jiri odẹ Jihova Ọghẹnẹ mai.

 EVA E RẸ WERE JIHOVA NỌ MA TE BI JIRI ODẸ RIẸ

4. Fikieme eva e rẹ rọ were Jihova nọ ma te bi jiri ei? Kẹ oriruo. (Rri uwoho na re.)

⁴ Nọ ma te bi ru oware nọ a re ro jiri odẹ Jihova Ọsẹ obọ odhiwu mai na, eva e rẹ were iẹe. (Ol. 119:108) Ma riẹ nọ ahwo-akpọ a rẹ gwọlọ nọ a jiri ae je ku edẹ họ ae. A re roro nọ a gbe ru ae ere he, koyehọ a se rai gbe oware ovo ho. Kọ ere Jihova ọ rrọ? Ijo. Ma rehọ iẹe nọ ọmọ ọ tẹ ta kẹ ọsẹ riẹ nọ, ‘Sẹmẹ whọ be ginẹ daoma, whẹ emamọ ọsẹ gaga.’ Eva e rẹ were ọsẹ na gaga inọ ọmọ na ọ rọ eva obọriẹ ta ẹme otiọye na kẹe ro jiri ei. Kọ oyena u dhesẹ nọ ọsẹ na ọ be gwọlọ ujiro nọ ọmọ na o re jiri ei? Kọ ọsẹ na o ti roro nọ ọmọ na o gbe jiri ei hi, u dhesẹ nọ o te ọsẹ hẹ? Ijo. Ma riẹ nọ ọsẹ na o te ọsẹ. Rekọ oware nọ eva e be rọ were iẹe na họ, eware nọ o bi ru e da ọmọ riẹ ẹro fia, yọ ọmọ na o you rie. Ọsẹ na ọ riẹ nọ ọmọ na o te kru uruemu yena te ọkpako, u ti fiobọhọ kẹe. Ere ọvona eva e rẹ were Jihova Ọsẹ nọ o wuzou mai kpobi na, nọ ma te bi jiri odẹ riẹ.

5. Ma te bi ru oware nọ a re ro jiri odẹ Ọghẹnẹ, eme o ti noi ze?

⁵ Setan o gu ọrue jọ fihọ omai kpobi na omomọvo uzou. Ma te bi ru oware nọ a re ro jiri odẹ Jihova, yọ ma bi dhesẹ nọ ọrue Ẹdhọ o gine gu fihọ omai uzou na. Setan ọ rọ ẹme nọ ọ ta dhesẹ nọ ohwo-akpọ ọvo nọ ọ be gọ Ọghẹnẹ fikinọ o gine you rie ọ rrọ họ. Anọ uye u te te omai, ma rẹ dhẹ no, maero nọ ma tẹ ruẹ nọ ma tẹ siọ Ọghẹnẹ ba ẹgọ ẹsiẹe oma u ti dhẹ omai. (Job 1:9-11; 2:4) Rekọ Job o thihakọ nọ uye u tei, o te dhesẹ Ẹdhọ fihọ ọtọrue. Kọ who ti ru ere re? Jihova ọ kẹ omai kpobi omomọvo obọdẹ uvẹ jọ. Ọ kẹ omai uvẹ inọ ma ru oware nọ a re ro jiri odẹ riẹ, ma ve je kru ẹrọwọ mai. Ma ve dhesẹ Ẹdhọ fihọ ọtọrue. Anọ ma te ru ere, eva e te were iẹe gaga. (Itẹ 27:11) Riẹ nọ obọdẹ uvẹ u rovie kẹ owhẹ na.

6. Ẹvẹ ma sae rọ rehọ aro kele Devidi ovie na gbe ahwo Livai? (Nehemaya 9:5)

⁶ Ahwo nọ a you Jihova a rẹ rọ eva rai kpobi ru oware nọ a re ro jiri odẹ riẹ. Devidi ovie na o kere nọ: “Jọ me jiri Jihova; jọ oware kpobi nọ o rrọ ugboma mẹ u jiri odẹ ọrẹri riẹ.” (Ol. 103:1) Devidi ọ riẹ nọ re ohwo o jiri odẹ Jihova, ohwo na o re jiri Jihova nọ o wo odẹ na. A tẹ fodẹ odẹ Jihova, yọ a be ta ẹme kpahe uruemu riẹ, oghẹrẹ ohwo nọ ọ rrọ, gbe ikpeware nọ o ru no. Devidi ọ gwọlọ nọ o re ru oware nọ a rẹ rọ ta ẹme ezi kpahe odẹ Ọsẹ obọ odhiwu riẹ na, yọ ọ gwọlọ jiri ei. Ọ ta nọ ọ gwọlọ rọ “oware kpobi nọ o rrọ ugboma” riẹ jiri odẹ Jihova. Koyehọ ọ gwọlọ rọ eva riẹ kpobi  jiri ei. Ere ọvona ahwo Livai nọ a jẹ hae so ile jiri Jihova a ru re. A ta nọ a be ruẹ unu jiri odẹ ọrẹri Jihova ha. (Se Nehemaya 9:5.) Ẹme nọ a ta na o dhesẹ nọ a wo omaurokpotọ, yọ ujiro na u no rai eva ze. Yọ o te lẹliẹ eva were Jihova.

7. Eme ma re ru nọ ma tẹ rrọ usi uwoma gbe okenọ ma te bi ru eware kugbe amọfa?

⁷ Ma tẹ be hae ta ẹme nọ o re dhesẹ nọ eware nọ Jihova o ru kẹ omai e da omai ẹro, ma te je you rie, jẹ be rọ evawere ta ẹme ezi riẹ, eva e rẹ were Jihova. Ma te kpohọ usi uwoma, ma rẹ kareghẹhọ nọ oware nọ o be mae wọ omai nya họ, re ma wuhrẹ ahwo inọ Jihova Ọsẹ mai na yọ emamọ Ọsẹ, a vẹ kẹle iẹe. (Jem. 4:8) Ma re wuhrẹ ahwo re a riẹ nọ Jihova ọ rrọ yoyou, o re bru uvioziẹ, o wo areghẹ gaga, o te je wo ogaga ulogbo. Ma ve je wuhrẹ ai eware efa nọ i dhesẹ nọ Jihova o woma gaga. Edhere ọfa nọ ma re ro jiri Jihova họ, ma rẹ daoma rọ aro kele iei, yọ o rẹ lẹliẹ eva were iẹe. (Ẹf. 5:1) Ma tẹ be rọ aro kele Jihova, mai avọ ahwo nọ a be gọ Ọghẹnẹ hẹ ma rẹ jọ epọvo ho. A tẹ ruẹ omai, a rẹ nwane riẹ, yọ u re gbe ejọ unu inọ ma wọhọ e rai hi. (Mat. 5:14-16) Nọ ma te bi lele ai ru eware jọ, joma rọ uvẹ yena vuẹ ae oware nọ o lẹliẹ omai rrọ epanọ ma rrọ na. O vẹ te lẹliẹ Ọghẹnẹ mai na were ahwo nọ a ginẹ gwọlọ gọe. Ma te bi ru eware yena, yọ ma bi jiri odẹ Jihova Ọsẹ mai na, yọ eva e te were iẹe gaga.—1 Tim. 2:3, 4.

EVA E RẸ WERE JESU NỌ MA TE BI JIRI ODẸ JIHOVA

8. Eme o dhesẹ nọ Jesu họ ohwo nọ ọ rẹ mai ru oware nọ a re ro jiri odẹ Jihova?

⁸ Evaọ usu ikọ-odhiwu gbe ahwo-akpọ kpobi, Jesu họ ohwo nọ ọ mae riẹ Jihova kpobi. (Mat. 11:27) Jesu o you Ọsẹ riẹ gaga, yọ ọye ọ rẹ mai ru oware nọ a re ro jiri odẹ Jihova. (Jọn 14:31) Evaọ aso urere nọ Jesu ọ jẹ lẹ re o te ti whu, ọ ta oware nọ ọ mae rọ fiki riẹ ziọ otọakpọ. Ọ ta nọ: “Me dhesẹ odẹ ra via kẹ ae no.” (Jọn 17:26) Kọ eme họ otọ ẹme riẹ na?

9. Oriruo vẹ Jesu ọ kẹ ro dhesẹ oghẹrẹ nọ Ọsẹ riẹ ọ ginẹ rrọ?

⁹ Orọnikọ Jesu ọ jẹ vuẹ ahwo ọvo inọ odẹ Ọghẹnẹ họ Jihova ha. Ahwo Ju nọ Jesu ọ jẹ hai wuhrẹ na, yọ ahwo nọ a riẹ odẹ Ọghẹnẹ no vẹre. Rekọ Jesu ọ jẹ romatotọ “dhesẹ oghẹrẹ nọ [Ọsẹ na] ọ rrọ” kẹ ae. (Jọn 1:17, 18) Joma ta ẹme kpahe edhere jọ nọ Jesu o ro gine dhesẹ oghẹrẹ nọ Ọsẹ na ọ rrọ kẹ ahwo. Ikereakere Hibru na e ta nọ Jihova yọ Ọghẹnẹ nọ o wo ohrọ gbe ọdawẹ. (Ọny. 34:5-7) Rekọ okenọ Jesu o je wuhrẹ ahwo, ọ tẹ kẹ oriruo jọ ro fiobọhọ kẹ ahwo riẹ nọ Ọghẹnẹ o gine wo ohrọ. Ọ kẹ oriruo ọmọ nọ ọ kwa no uwou. Nọ ọsẹ riẹ ọ ruẹ nọ o bi zihe bru ei ze, “nọ ọ gbẹ jọ ugbothabọ,” ọsẹ na ọ tẹ dhẹ bru ei. Ọ tẹ gbalọ iẹe jẹ rọvrẹ riẹ no eva ze. (Luk 15:11-32) Oriruo yena o lẹliẹ omai riẹ epanọ Jihova o gine wo ohrọ-oriọ te. O lẹliẹ omai riẹe vi epaọ anwẹdẹ. Nwanọ epanọ Ọsẹ na ọ rrọ, ọye Jesu o dhesẹ kẹ omai na.

10. (a) Eme o dhesẹ nọ Jesu ọ jẹ hai se odẹ Ọsẹ riẹ je wuhrẹ ahwo re a riẹ odẹ na? (Mak 5:19) (Rri uwoho na re.) (b) Eme Jesu ọ gwọlọ nọ ma ru nẹnẹ?

¹⁰ Kọ Jesu ọ gwọlọ nọ ahwo a riẹ odẹ Ọsẹ riẹ je sei? Ee. O wọhọ nọ isu egagọ jọ nọ e jariẹ evaọ oke Jesu a jẹ gwọlọ nọ ahwo a re se odẹ Ọghẹnẹ hẹ, anọ odẹ na o rro vi oware nọ ohwo o re se. Rekọ Jesu o je roro ere he. O je wuhrẹ ahwo re a riẹ odẹ Ọsẹ riẹ. Oke jọ o jariẹ nọ Jesu o ro le idhivẹri no ọzae jọ oma evaọ ubrotọ jọ nọ a re se Gẹrasa. Ozọ u mu ahwo ubrotọ na gaga nọ a ruẹ oware nọ Jesu o ru. A tẹ lẹ Jesu inọ o no ubrotọ rai no. Jesu ọ tẹ ginẹ rọwo nọ o re no etẹe. (Mak 5:16, 17) Rekọ taure ọ tẹ te nyavrẹ, o ru oware jọ nọ u dhesẹ nọ ọ  gwọlọ nọ ahwo nọ a rrọ oyena a rẹ riẹ odẹ Ọsẹ riẹ. Ọ ta kẹ ọzae nọ o siwi na nọ, jọ ọ nyae vuẹ ahwo oware nọ Jihova o ru kẹe na. Orọnikọ Jesu ọ vuẹ ọzae na nọ jọ ọ vuẹ ahwo inọ ọyomariẹ o ru oware na ha, rekọ anọ Jihova. (Se Mak 5:19.) a Nẹnẹ na, Jesu ọ gwọlọ nọ ma wuhrẹ ahwo evaọ akpọ na soso re a riẹ odẹ Ọsẹ riẹ re. (Mat. 24:14; 28:19, 20) Ma te bi ru ere, eva e rẹ were Jesu Kristi Ovie mai na.

11. Eme Jesu o wuhrẹ ilele riẹ inọ jọ a lẹ kẹ, kọ fikieme oware yena u ro wuzou? (Izikiẹl 36:23)

¹¹ Jesu ọ riẹ nọ oware nọ Jihova ọ gwọlọ ru họ, o re ru odẹ riẹ fo, re ohwo ọvo ọ gbẹ ta ẹme oyoma kpahe odẹ riẹ hẹ. Oyejabọ Jesu Olori mai na o ro wuhrẹ omai nọ joma lẹ nọ: “Ọsẹ mai nọ ọ rrọ obọ idhiwu na, jọ odẹ ra o jọ fuafo.” (Mat. 6:9) Jesu ọ riẹ nọ odẹ Jihova nọ a re ru fo họ oware nọ o mai wuzou kpobi evaọ odhiwu gbe akpọ. (Se Izikiẹl 36:23.) Evaọ usu ikọ-odhiwu gbe ahwo-akpọ kpobi, Jesu họ ohwo nọ ọ rẹ mai ru oware nọ a re ro jiri odẹ Jihova. Rekọ okenọ ewegrẹ Jesu a mu ei, whọ kareghẹhọ uzi nọ a ta nọ ọ raha? Anọ ọ raha odẹ Ọghẹnẹ! Jesu ọ riẹ nọ re ohwo ọ raha odẹ Ọghẹnẹ, uzioraha nọ o gbẹdẹ tei o riẹ hẹ. Whaọ uzi yena a be ta nọ ọyomariẹ ọ raha na! Ma riẹ nọ o te da Jesu gaga. O wọhọ nọ oye o mae whae ze nọ Jesu ọ jẹ rọ “rova gaga” na nọ oke nọ a ti ro mu ei o kẹle no.—Luk 22:41-44.

12. Re Jesu ọ sai ru odẹ Jihova fo, eware edada vẹ o thihakọ rai?

¹² Okenọ a gu erue fihọ Jesu uzou, nọ a jẹ lae eka, je gboja kẹe, o thihakọ. Ọ tẹ rọ ere ru odẹ Ọsẹ riẹ fo. Ọ riẹ nọ o ru oware ovo nọ o rẹ lẹliẹ oma vuọ ẹe he, rekọ oware nọ Ọsẹ riẹ ọ gwọlọ oye o ru. (Hib. 12:2) Jesu ọ tẹ jẹ riẹ nọ Ẹdhọ họ ohwo nọ ọ jẹ dawo iẹe evaọ oke yena. (Luk 22:2-4; 23:33, 34) Setan ọ jẹ rọ oghẹrẹ kpobi dawo Jesu sọ o re kie. Rekọ ọ dawo bẹ, Jesu o kie kẹe he. Jesu ọ rọ ere dhesẹ nọ Ẹdhọ yọ ọtọrue jọ gheghe, Jihova o wo ahwo nọ i you rie nọ e be rọ eva rai kpobi gọe. Eware e tẹ make ga kẹhẹ, a rẹ gbẹ gọ Ọghẹnẹ ghele.

13. Eme ma re ru nọ o rẹ lẹliẹ eva were Jesu Ovie mai na?

¹³ Kọ whọ gwọlọ ru oware nọ o rẹ lẹliẹ eva were Jesu nọ ọ rrọ Ovie ra na? O tẹ rrọ ere, hai wuhrẹ ahwo re a riẹ epanọ Jihova  Ọghẹnẹ mai na ọ ginẹ rrọ. Who te bi ru ere, kiyọ who bi jiri odẹ Jihova, yọ whọ be rọ aro kele Jesu. (1 Pita 2:21) Who bi ru oware nọ o rẹ lẹliẹ eva were Jihova. Whọ tẹ be rọ ere dhesẹ nọ Setan nọ ọ rrọ ọwegrẹ Jihova na, ọrue ọvo o bi gu.

MA TE BI JIRI ODẸ JIHOVA, O RẸ LẸLIẸ AHWO WO UZUAZỌ

14-15. Obọdẹ eware jọ vẹ e rẹ sae via nọ ma te bi wuhrẹ ohwo kpahe Jihova?

¹⁴ Ma te bi jiri odẹ Jihova, o rẹ lẹliẹ ahwo wo uzuazọ. Fikieme ma rọ ta ere? Setan ‘o wuhu iroro ahwo nọ a rọwo Ọghẹnẹ hẹ di no.’ (2 Kọr. 4:4) O tẹ whae ze nọ ahwo buobu a rọ rọwo erue nọ Setan o bi gu. Erue jọ nọ o bi gu họ, anọ Ọghẹnẹ ọ rrọ họ. Anọ Ọghẹnẹ ọ tẹ make rrọ dede, o thabọ no ohwo-akpọ, yọ ọ be daezọ mai hi. Anọ Ọghẹnẹ ọ rrọ eva gaga, yọ ọ rẹ lahiẹ irumuomu evaọ oria jọ bẹdẹ bẹdẹ. O bi gu erue yena re ọ sae raha odẹ Jihova, hayo re ahwo a gbẹ riẹ odẹ Jihova ha. O vẹ whae ze nọ ahwo a gbẹ gwọlọ nọ a rẹ kẹle Ọghẹnẹ hẹ. Rekọ usi uwoma nọ ma be ta na o be raha eware ku Ẹdhọ. Ma bi wuhrẹ ahwo re a riẹ oghẹrẹ nọ Jihova Ọsẹ ezi mai na ọ ginẹ rrọ, re a jiri odẹ ọrẹri riẹ. Kọ erere vẹ o bi noi ze?

¹⁵ Ẹme Ọghẹnẹ o wo ẹgba wo umuo ho. Nọ ma te wuhrẹ ohwo kpahe Jihova, ọ jẹ riẹ oghẹrẹ nọ Jihova ọ ginẹ rrọ, oware igbunu jọ o rẹ via. Ohwo na ọ vẹ te ruẹ nọ eware nọ a je wuhrẹ iẹe vẹre na kpakọ erue. O vẹ wọhọ ẹsenọ o tuaro vẹre, rekọ aro riẹ i te bi rovie ze ẹmẹrera. Ọ vẹ te ruẹ nọ Jihova yọ Ọsẹ oyoyou wọhọ epanọ ma riẹ riẹ na. Akpọ o ve ti gbei unu nọ o te wuhrẹ nọ Jihova o wo ogaga thesiwa. (Aiz. 40:26) Yọ eva e te were iẹe nọ o te wuhrẹ nọ Jihova o re bru uvioziẹ ẹsikpobi. (Izie. 32:4) Nọ ọ jẹ te ruẹ nọ Ọghẹnẹ o wo areghẹ gaga, o ve ti wuhrẹ ereghẹ jọ mi ei nọ o re ro yeri akpọ. (Aiz. 55:9; Rom 11:33) Yọ eva e te were iẹe re nọ o te wuhrẹ nọ Ọghẹnẹ o you omai gaga. (1 Jọn 4:8) Ẹmẹrera na, o ve ti mu usu kugbe Jihova. O ve ti wo ẹruore inọ ọ te rria bẹdẹ bẹdẹ, yọ ọ te jọ ọmọ Ọghẹnẹ. Jihova ọ be rọ omai wuhrẹ ahwo re a riẹ nọ ọyomariẹ yọ Ọsẹ rai nọ o you rai gaga, a vẹ kẹle iẹe. Whọ ruẹ okpoware nọ Jihova ọ be rọ omai ru? Nọ ma te bi wuhrẹ  ahwo, Jihova o re rri omai nọ mai yọ “ibe iruiruo” riẹ.—1 Kọr. 3:5, 9.

16. Nọ ahwo jọ a tẹ riẹ odẹ Ọghẹnẹ no, eme a re ru? Kẹ iriruo jọ.

¹⁶ Ẹsejọhọ oware nọ ma te kaki wuhrẹ ohwo họ, odẹ Ọghẹnẹ họ Jihova. Rekọ omoware yena ọvo nọ ma wuhrẹ i rie na, ọ sai rri rie ruaro, ọ tẹ ginẹ rrọ ohwo nọ ọ gwọlọ gọ Ọghẹnẹ. U wo ọmọtẹ jọ nọ a re se Aaliyah b nọ ọsẹgboni riẹ a je kpohọ ichọche he, rekọ egagọ efa aikpobi a jọ. Egagọ na i fiobọhọ kẹ Aaliyah riẹ Ọghẹnẹ hẹ, yọ e were riẹ gbe he. Rekọ Isẹri Jihova a te ti mu ei Ebaibol họ ewuhrẹ. Ẹmẹrera na, o te ti mu Jihova họ erri inọ yọ Ogbẹnyusu riẹ. Nọ o ti wuhrẹ nọ a si odẹ Ọghẹnẹ no Ebaibol buobu no, a te fi Olori gbe edẹ-ova efa fihọ iẹe, u te gbe Aaliyah unu inọ kpakọ Ọghẹnẹ o wo odẹ, rekọ a si rie no. Odẹ Ọghẹnẹ nọ ọ riẹ u nwene uzuazọ riẹ. Ọ ta nọ: “Kpakọ Ogbẹnyusu ezi mẹ na o wo odẹ.” Kọ erere vẹ o te rie? Ọ ta nọ: “Enẹna eva e be were omẹ gaga. Odẹ Ọghẹnẹ nọ mẹ riẹ na ginọ okpoware.” U wo ọzae jọ nọ a re se Steve nọ ọsẹgboni riẹ a jọ egagọ ahwo Ju. Egagọ ọvuọvo e jẹ were iẹe he keme ọ ruẹ nọ a be viẹ ahwo họ gaga evaọ egagọ buobu. Oni riẹ o te whu, yọ o da riẹ gaga. Ẹdẹ jọ nọ Isẹri Jihova a je wuhrẹ ohwo jọ Ebaibol, o te kuomagbe ae. Ọ tẹ jọ etẹe riẹ odẹ Ọghẹnẹ, yọ u gbe rie unu gaga. Ọ ta nọ: “Mẹ riẹ odẹ Ọghẹnẹ vẹre he.” Ọ tẹ jẹ ta nọ: “Anwẹdẹ me je roro nọ Ọghẹnẹ ọ rrọ họ. Rekọ ẹdẹ yena mẹ rọ riẹ nọ kpakọ Ọghẹnẹ ọ ginẹ rrọ. Mẹ tẹ ruẹ nọ mẹ sai mu usu kugbe Ọghẹnẹ.”

17. Fikieme whọ rọ gwọlọ nọ whọ rẹ hai ru oware nọ a re ro jiri odẹ Jihova ẹsikpobi? (Rri uwoho na re.)

¹⁷ Kọ who te kpohọ usi uwoma hayo nọ who te bi wuhrẹ ohwo, whọ be hai se odẹ Ọghẹnẹ Oride na kẹe? Kọ whọ be hai wuhrẹ iẹe re ọ riẹ oghẹrẹ nọ Ọghẹnẹ ọ ginẹ rrọ? Who te bi ru ere, kiyọ who bi jiri odẹ Ọghẹnẹ. Who te se odẹ Ọghẹnẹ kẹ ahwo no, hai wuhrẹ ae re a riẹ epanọ Ọghẹnẹ nọ o wo odẹ na o woma te. Yọ edhere jọ nọ who re ro jiri odẹ ọrẹri Jihova. Yọ o te lẹliẹ ahwo jọ kurẹriẹ ze, a ve ti wo uzuazọ. Ere ọvo ho, u re dhesẹ nọ whọ be rọ aro kele Ovie ra, Jesu Kristi. Yọ onọ o mae rro kọ, eva ra e te were Jihova Ọsẹ oyoyou ra na. Ajọ who “jiri odẹ [riẹ] bẹdẹ bẹdẹ.”—Ol. 145:2.