1-2. Wa mait-a apm tu wi we mek wi si ou Jeuova fiil wen Sietan did tel lai pan im?

 A OU yu wuda fiil ef sumadi we yu lov tel wan wikid lai pan yu an som piipl biliiv it? Bot a no onggl dat, dem staat fi pred di lai tu, an ada piipl biliiv dem tu. Ef yu kier bout wa ada piipl tingk bout yu, kaa dem a tel lai pan yu it a-go mek yu fiil bad.​—Pr. 22:1.

² Dis mek wi si ou Jeuova did fiil wen wan a im son dem we did de iina evn wid im tel di fos uman we did niem Iiv lai pan im, an shi biliiv di lai. An kaaz a dat, it mek shi an Adam ton dem bak pan Jeuova, an it mek aal a wi en op a sin an a ded. (Jen. 3:1-6; Ruo. 5:12) So aal a di waar dem we a gwaan an aal a di prablem dem iina di worl a kaaz a da lai de. Yu tingk Jeuova a fiil it kaaz a da lai ya an evriting we a apm? Ye man! Im fiil it. Bot it stil no mek im bi sumadi we aalwiez beks bad an we no laik piipl. Matarafak, di Baibl tel wi se im a di “Gad we api.”​—1 Tim. 1:11, NWT.

3. Wa aal a wi kyan du?

³ Wi kyan elp piipl fi si se a lai Sietan did tel pan Jeuova wen wi “priez Jeuova niem.” (Sa. 113:1) Wi du dat wen wi tel ada piipl di chuut bout Jeuova. Yu waahn fi du dat? Mek wi luk pan chrii riizn we a-go push wi fi priez Jeuova niem wid aal a wi aat.

WI MEK JEUOVA API WEN WI PRIEZ IM NIEM

4. Wa mek wi mek Jeuova api wen wi priez im? Tel wi wa mek yu se so. (Luk pan di picha tu.)

⁴ Wi mek Jeuova api wen wi priez im niem. (Sa.  119:108) Bot a no laik se Jeuova niid wi fi a big im op fi mek im fiil gud bout imself. Tingk bout dis: Ou yu tingk wan faada wuda fiil ef im likl gyal pikni og im op roun im nek an se, “Dadi, ya’a di bes faada iina di uol worl.” Im wuda api, no chuu? Bot wa mek? Yu tingk im wuda api kaa im niid im daata fi big im op fi mek im fiil gud bout imself? Nuo sa! Im api kaa im si se im daata lov im an tangk im fi aal a wa im du fi ar. Im nuo se fi shi gruo kom ton wan gud sumadi shi afi shuo lov tu piipl an nuo tu se shi fi gi tangks fi wa shi av. A siem so, fi wi Faada Jeuova api fi si se kaa wi lov im an tangk im, a dat push wi fi big im op.

5. Wen wi priez Gad niem, wa a som a di lai dem we wi kyan elp fi klier op?

⁵ Wen wi priez wi Faada Jeuova, wi a elp fi klier op di lai we Sietan tel pan wi tu, kaa im did kliem se wi naa go stik tu Jeuova an taak op fi Im niem. An im se ef sitn riili apm fi tes wi, wi naa go du wa Gad se wi fi du an wi wuda tap sorv im ef wi no si wa wi a get outa it. (Juob 1:9-11; 2:4) Bot Juob did shuo se notn no go so. So wa yu a-go du? Aal a wi kyan stik tu Jeuova an du wa im se wi fi du. (Pr. 27:11) A wan nais ting dis Jeuova mek wi kyan du fi im.

6. Ou wi kyan du laik Dievid an di Liivait dem? (Niimaiya 9:5)

⁶ Kaa wi lov Gad, wi a-go priez im niem wid aal a wi aat. Dievid we weehn a wan King did rait an se: “Mi a-go priez Jeuova, mi a-go priez im niem we uoli wid aal a mi aat.” (Sa. 103:1) Kaa Dievid did nuo se wen wi priez Jeuova niem a Jeuova wi a priez, an wen wi du it, it wuda mek piipl tingk bout aal a di gud wiez dem we Jeuova av an di gud sitn dem we im a du fi wi. Dievid did waahn fi priez im Faada niem we uoli wid aal a im aat, an a siem so di Liivait dem did priez Jeuova an mek ada piipl si ou fi priez im tu. Dem aal se no mata wa dem se, Jeuova niem naa go get di big op we it fi get. (Riid Niimaiya 9:5.) Wen Jeuova si ou dem ombl an ou dem waahn fi priez im wid aal a dem aat, it mek im api.

7. Ou wi kyan priez Jeuova wen wi de a sorvis an wen wi a du ada tingz iina wi laif?

⁷ Wen wi taak bout Jeuova iina wan wie we mek piipl si se wi lov im an wi  tangk im fi wa im du fi wi, it mek im api. Wen wi de a sorvis, wi fi memba se di mien ting we wi waahn fi du a fi mek piipl get kluos tu Jeuova so dat dem kyan get fi nuo Jeuova laik ou wi nuo im. (Jmz. 4:8) Wi glad fi shuo piipl wa di Baibl se bout Jeuova bout ou im lov wi, ou im fier, ou im waiz, an ou im chrang an av nof powa, an fi tel dem bout di ada gud wiez dem we im av tu. An wen wi chrai fi du tingz laik Jeuova, wi a priez im an wi a mek im api. (Ifii. 5:1) Wen wi du dem sitn ya, it mek wi difrant fram di piipl dem we naa sorv Jeuova. Plos piipl mait-a si se wi difrant fram dem an a wanda a wa mek wi difrant fram dem. (Mat. 5:14-16) An wen wi diil wid dem, wi kyan tel dem wa mek wi du tingz di wie ou wi du it. Wen wi du dat, it a-go mek di wan dem we av wan gud aat staat fi sorv Jeuova tu. Ye man, wen wi priez Jeuova iina dem wie ya it mek im api bad.​—1 Tim. 2:3, 4.

WEN WI PRIEZ JEUOVA NIEM IT MEK JIIZAS API

8. Wa Jiizas du fi mek ada piipl si ou fi priez Jeuova niem?

⁸ Outa aal a di ienjel dem an evribadi we de pan ort, nobadi no nuo Jeuova beta dan im Bwai Pikni. (Mat. 11:27) Jiizas lov im Faada Jeuova, an im big op Jeuova niem an mek wi si ou wi kyan big op Im niem tu. (Jan 14:31) Pan di nait bifuo im ded, Jiizas prie tu Jeuova. Wen im a taak bout aal a wa im did du, im se: “Mi mek dem nuo yu.” (Jan 17:26) Wa Jiizas did miin wen im se dis?

9. Ou Jiizas did yuuz wan tuori fi mek wi si ou im Faada stie?

⁹ Jiizas neehn onggl tel piipl Jeuova niem. Di Juu piipl we im did a taak tu did nuo Jeuova niem aredi, bot “im mek [dem] nuo wa di Faada komiin laik.” (Jan 1:17, 18) Laik iina di paat a di Baibl we did rait iina Iibruu, it mek wi nuo se Jeuova a wan Gad we gud an kain an we fiil it fi wi. (Ek. 34:5-7) Bot Jiizas mek wi si dis muor wen im tel wi di tuori bout wan faada we lov im bwai pikni an di bwai pikni en op sari fi wa im du. Wen im did stil faar fram im yaad an im faada si im, im faada ron go miit im, an og im op, an paadn im fram im aat. It mek wi si se a so Jeuova gud an kain an fiil it fi wi. (Luuk 15:11-32) So Jiizas mek wi si uu im Faada riili bi.

10. (a) A ou wi nuo se Jiizas did yuuz im Faada niem an waahn ada piipl fi yuuz it tu? (Maak 5:19) (Luk pan di picha tu.) (b) Wa Jiizas waahn wi fi a du ya nou?

¹⁰ Jiizas did waahn ada piipl fi yuuz im Faada niem. Som a di choch liida dem we did de bout iina Jiizas taim, did biliiv se yu a dis Gad ef yu yuuz im niem. Bot Jiizas neva mek we dem a se, we no bies aafa di Baibl, tap im fram big op im Faada niem. Luk pan di taim wen im did iil wan man, we did liv iina di Girasiinz, we did av diiman iina im. Di piipl dem did get fried an beg Jiizas fi kom outa dem ieriya. So Jiizas kom out. (Maak 5:16, 17) Bot Jiizas did waahn piipl fi nuo bout Jeuova niem de-so tu, so im tel di man we im did iil se fi tel piipl bout wa Jeuova du fi im, no wa im, Jiizas, did du fi im. (Riid Maak 5:19.) An a di siem ting  Jiizas waahn wi fi du nou, im waahn wi fi mek evribadi iina di worl nuo im Faada niem. (Mat. 24:14; 28:19, 20) An wen wi du dis, wi mek Jiizas, wi King, api.

11. A wa Jiizas did tiich im falara dem fi prie fa, an wa mek? (Iziikel 36:23)

¹¹ Jiizas nuo se Jeuova waahn piipl fi av nof rispek fi im niem an nuo di chuut bout im. An a das wai im tel wi fi prie se: “Wi Faada we de iina evn, wi prie se piipl av nof rispek fi yu niem.” (Mat. 6:9, NWT ) Jiizas did nuo se dis a di bigis ting we evribadi fi du. (Riid Iziikel 36:23.) Nobadi we de iina evn ar we de pan di ort no du muor dan Jiizas fi shuo se dem rispek Gad niem. Bot wen dem did lak op Jiizas, im enimi dem kliem se im did a dis Gad di muos wie tu. An wi nuo se Jiizas did fiil se fi tel lai pan im Faada niem we uoli a di wos sin we nobadi kuda eva du. So dis did ort im bad wen dem did se a dat im did a du. An a mait-a das wai im “did a sofa” so likl bifuo dem lak im op.​—Luuk 22:41-44.

12. Wa Jiizas did du fi mek piipl rispek im Faada niem?

¹² Fi mek piipl rispek im Faada niem Jiizas go chuu an no gi op no mata wa dem du tu im. Laik dem du som wikid sitn tu im, an tel lai pan im, an dem du tingz fi shiem im tu. Bot im did nuo se im did du evriting we im Faada waahn im fi du, so im neehn afi shiem bout notn. (Iib. 12:2, NWT ) An im did nuo se a Sietan a mek dem wikid sitn de apm tu im dem taim de. (Luuk 22:2-4; 23:33, 34) Sietan did waahn fi mek Jiizas tap du di sitn dem we im Faada waahn im fi du, bot dat neehn apm. Jiizas mek evribadi si se Sietan a wan wikid laiyad an se Jeuova av piipl we a stik tu im an a du wa im waahn dem fi du no mata wa.

13. Wa wi kyan du fi mek wi King, Jiizas, api?

¹³ Ef wi waahn fi mek wi King, Jiizas, we a ruul api, wi afi gwaan priez Jeuova niem an elp ada piipl fi nuo di chuut bout Jeuova. Wen wi du dat, wi a fala iina Jiizas futstep. (1 Pii. 2:21) Jos laik Jiizas, yu a mek Jeuova api an yu a  shuo se im enimi Sietan a wan uol wikid laiyad.

WEN WI PRIEZ JEUOVA NIEM, WI A ELP ADA PIIPL FI SIEV DEM LAIF

14-15. Wa a som a di nais sitn dem we apm wen wi tiich piipl bout Jeuova?

¹⁴ A ou wi elp fi siev piipl laif wen wi priez Jeuova niem? Di Baibl tel wi se di devl “blain dem so dat dem kyaahn si di lait. Im blain dem so dat dem kyaahn andastan di gud nyuuz.” (2 Kor. 4:4) An so kaaz a dis, piipl biliiv di uol iip a lai dem we Sietan tel laik, se no Gad no de, an se Gad de tuu faar fram yu, an im no kier bout nobadi, an se Gad wikid an im a-go bon op piipl fi eva. Bot dem lai ya no mek piipl nuo uu Jeuova riili bi an mash op im gud niem. An dis mek piipl no waahn get kluos tu Jeuova. So wen wi tiich dem di chuut bout Jeuova an priez im niem, it mek Sietan no get fi du wa im waahn fi du. Bot ou dis elp piipl?

¹⁵ Wen wi tiich piipl di chuut bout Jeuova, it du sitn nais fi dem. Likl bai likl dem get fi si se Jeuova a wan Faada we lov dem an kier bout dem. An wen dem si im chrang chrang powa, it mek dem mout jrap a grong. (Aiz. 40:26) An dem nuo fi shuor se Jeuova fier. (Dyuu. 32:4) An dem lorn wol iip kaaz a ou waiz Jeuova bi. (Aiz. 55:9; Ruo. 11:33) An it mek dem api kaa dem si umoch Jeuova lov dem. (1 Jan 4:8) An di muo dem get fi nuo Jeuova, a di muo dem si se dem kyan go liv fi eva fi chuu. It riili nais fi elp piipl fi jraa nier tu dem Faada Jeuova. An wen wi du dat, Jeuova si wi az im “sorvant” dem we a wok wid im.​—1 Kor. 3:5, 9.

16. Wa it du fi som piipl wen dem lorn se Gad niem Jeuova? Tel wi bout Steve an Aaliyah.

¹⁶ Di fos ting wi mait-a tiich sumadi a se Gad niem Jeuova. An dat kyan du sitn gud fi sumadi we riili waahn fi lorn bout Gad. Laik wan yong uman we did  niem Aaliyah a we neehn gruo az wan Kristiyan. Ar rilijan neehn a du notn fi ar an shi neehn fiil kluos tu Gad niida. Bot afta shi staat stodi di Baibl wid di Jeuova Witnis dem, shi staat fi si se Jeuova a ar fren. An shi did fraitn fi si se iina nof a di Baibl dem, dem tek Jeuova niem outa it an put “Laad” an “Gad” iina kyapital leta we Jeuova niem did fi de. So it did du nof fi ar wen shi get fi nuo se Gad niem Jeuova. Shi se: “Mi bes fren av wan niem!” An shi se: “Nou mi av piis iina mi aat an main. An mi fiil gud fi nuo se mi nuo im niem.” Wan man we niem Steve, we lov fi plie tingz laik gitaar an dem ting de we did siiros bout im Juu rilijan, neehn av notn fi du wid di choch dem kaa im fiil se di wol a dem a ipokrit. Bot afta sumadi did ded fi im, im sidong iina sumadi stodi we did a stodi wid di Jeuova Witnis dem. It du sitn gud fi im wen im lorn se Gad niem Jeuova. Im se: “Mi neehn nuo bifuo se Gad did av wan niem. Fi di fos taim iina mi laif mi si se Gad a wan riil sumadi. A so mi nuo se mi fain wan gud Fren.”

17. Wa mek no mata wa apm yu a-go priez Jeuova niem? (Luk pan di picha tu.)

¹⁷ Wen yu a priich an tiich, yu api fi mek piipl nuo se Gad niem Jeuova? An yu mek dem si di kain-a sumadi we Jeuova riili bi? Wen yu du dat, yu a priez Jeuova niem. So gwaan priez Jeuova niem an elp ada piipl fi nuo di kain-a sumadi we Jeuova riili bi. Wen yu du dat, a elp yu a elp dem fi siev dem laif an yu a fala wi King Krais Jiizas. Bot di bigis ting a dat yu a mek yu Faada Jeuova api. So gwaan “priez [im] niem fi eva an eva”!​—Sa. 145:2.