1-2. Mying jahten hkrum ai hte seng nna Yehowa gara hku hkamsha ai kun? Ga shadawn jaw u.

 TINANG grai tsawra ai langai ngai gaw, tinang a lam n jaw ai hku tsun ai ngu saga. N jaw ai hpe nang chye tim, dai ga hpe nkau mi kam mat ai. Grau sawng ai gaw, dai masha ni gaw kaga ni hpe tsun shabra ai. Masha law law mung bai kam mat ai. Nang gara hku hkamsha na kun? Masha ni hpe tsawra ai, na a kaja ai mying hten na hpe tsang ai nga yang, myit n pyaw byin na re.—Gsh 22:1.

² Mying jahten hkrum ai aten, Yehowa gara hku hkamsha na hpe ndai ga shadawn gaw chye na shangun ai. Lamu kasa langai gaw, Karai Kasang a lam Ewa hpe masu tsun ai. Dai masu ga hpe shi kam mat ai. Dai masu ga a majaw, Adam hte Ewa Yehowa hpe gumlau mat ai. Dai majaw, shinggyim masha yawng yubak kap nna si ra mat ai. (Nin 3:1-6; Rom 5:12) Si hkrung si htan, majan, myit ru hpa lam ni hte hpawn, mungkan na manghkang ni yawng gaw, Edin sun hta Satan tsun wa ai masu ga a majaw byin wa ai re. Dai majaw, Yehowa grai yawn ai. Raitim, myit n machyi ai. “A rawng ai Karai Kasang” matut nna byin nga ai.—1 Tm 1:11.

3. Anhte hpa hpe sakse madun lu ai kun?

³ Yehowa hte seng nna Satan masu tsun ai hpe anhte sakse madun mai ai. “Yehowa a mying nsang hpe kungdawn mu” ngu ai ga hpe madat ai hku nna re. (Shk 113:1) Kaga ni hpe Yehowa a lam jaw ai hku tsun dan ai hku nna shi a mying hpe shakawn mai ai. Nang dai hku shakawn mayu ai kun? Myit masin mahkra  hte shakawn mayu wa hkra karum ya ai lam 3 hpe yu yu ga.

MYING NINGSANG HPE SHAKAWN AI SHALOI YEHOWA KABU

4. Anhte shakawn ai shaloi Yehowa hpa majaw kabu ai kun? Ga shadawn jaw u. (Sumla hpe mung yu u.)

⁴ Mying ningsang hpe shakawn ai shaloi sumsing lamu na Wa kabu ai. (Shk 119:108) N-gun jaw lam ra ai majaw shakawn ya ra ai shinggyim masha ni hte bung mat ai kun? N bung ai. Ga shadawn langai hpe myit yu u. Numsha ma langai gaw, gat wa nna, kawa hpe ahpum ai. “Wa gaw mungkan ntsa hta kaja dik htum re” ngu tsun ai. Kawa gaw grai pyaw mat ai. Shakawn hkrum ai majaw kun? N re. Shi hpe tsawra ai, chyeju dum ai hpe kasha gaw shi hkrai shi sa madun ai majaw kabu mat ai re. Tsawra chye ai, chyeju dum chye ai ma re ai majaw, ngwi pyaw ai prat lu na hpe kawa chye mat ai. Anhte shakawn ai shaloi, grau htum ai Kawa Yehowa kabu ai mung, dai lam ni a majaw re.

5. Yehowa hpe shakawn ai shaloi, gara masu ga shut ai hpe sakse madun lu ai kun?

⁵ Sumsing Kawa hpe shakawn ai gaw, anhte langai hpra hte seng nna Satan a masu ga shut ai hpe sakse madun nga ai re. Shinggyim masha ni gaw, Karai Kasang a mying hpe sadi dung let makawp maga na n re ngu Satan tsun ai. Karai Kasang hpe mung sadi dung na n re. Karai Kasang hpe kau da ai majaw akyu lu na nga yang, kau da na ni hkrai re ngu Satan tsun ai. (Yob 1:9-11; 2:4) Satan a ga shut ai hpe sadi dung ai Yoba sakse madun wa ai. Nang gaw gara hku kun? Anhte langai hpra mung, Karai Kasang hpe sadi dung let shi a mying hpe makawp maga na ahkang, myit pyaw hkra galaw na ahkang lu da ai. (Gsh 27:11) Dai gaw laksan ahkaw ahkang re.

6. Hkawhkam Dawi hte Lewi shadang sha ni hpe gara hku kasi la mai ai kun? (Nehemia 9:5)

⁶ Karai Kasang hpe tsawra ai myit gaw, Karai a mying hpe myit masin mahkra hte shakawn na matu shadut ya ai. “Nye a myit masin e, Yehowa hpe sha-a nga u, Nye kraw lawang mahkra e, shi a chyoi pra ai amying nsang hpe sha-a nga mu” ngu Hkawhkam Dawi tsun ai. (Shk 103:1) Mying ningsang hpe shakawn ai gaw, Yehowa hpe shakawn ai lam Dawi chye na ai. Yehowa a mying na dat ai hte, gara zawn Karai re ai, gara atsam ningja ni nga ai, gara zawn mauhpa lam ni galaw ai hpe anhte kalang ta myit hkrup ai. Kawa a mying gaw chyoi pra ai ngu Dawi sawn la ai. “Kraw lawang mahkra” hte shakawn mayu ai. Chyoi pra ai mying ningsang hpe shakawn kungdawn n ma ai lam shagrit shanem let yin la ai. (Nehemia 9:5 hpe hti u.) Shagrit shanem let myit masin  mahkra hte shakawn ai majaw Yehowa grai kabu na re.

7. Hkaw tsun bungli hta, kaga ni hte kanawn mazum ai hta, Yehowa hpe gara hku shakawn mai ai kun?

⁷ Yehowa hpe tsawra ai, chyeju dum ai lam tsun shaga ai hku nna, Yehowa myit pyaw hkra anhte galaw lu ai. Hkaw tsun ai shaloi, anhte a madung bandung gaw, kaga masha ni Yehowa hte hku hkau mayu wa hkra, Yehowa hpe anhte mu ai zawn mu wa hkra karum ya na matu re. (Yak 4:8) Dai majaw, Yehowa a tsawra myit, tara rap ra ai lam, nyan hpaji, hpung atsam, kaga atsam ningja ni a lam Chyum Laika hta gara hku tsun da ai hpe kabu gara ai myit hte masha ni hpe tsun dan ai. Yehowa hpe dang lu ai made kasi la ai hku nna shakawn ai, shi myit pyaw hkra galaw ai. (Ehp 5:1) Anhte dai hku galaw yang, nhkru ai mungkan na masha ni hte n bung ai hpe masha ni sadi hkrup wa na re. Hpa majaw re ai hpe chye mayu wa na re. (Mat 5:14-16) Shanhte hte kanawn mazum ai shaloi, anhte hpa majaw dai zawn nga ai lam sanglang dan mai ai. Akyu gaw, myit dingman ai ni Karai Kasang hte hku hkau mayu wa ai. Dai lam ni hte Yehowa hpe shakawn ai shaloi, Shi myit pyaw na re.—1 Tm 2:3, 4.

YEHOWA A MYING NINGSANG HPE SHAKAWN AI SHALOI YESU KABU

8. Yesu gaw Yehowa a mying ningsang shagrau ai hta gara hku kasi kaja madun wa ai kun?

⁸ Sumsing lamu hte ginding aga hta, Yehowa a lam hpe Yesu daram kadai n chye ai. (Mat 11:27) Kawa hpe Yesu tsawra ai. Mying ningsang shagrau ai hta kasi kaja madun ai. (Yhn 14:31) N si shi ai shana hta akyu hpyi ai shaloi, “na a mying ningsang hpe ngai shanhte e shachye shachyang ma se ai” ngu shi tsun ai. Dai gaw, mungkan ga prat laman Yesu galaw wa ai yawng hta, ahkyak dik htum re. (Yhn 17:26) Dai hpe Yesu gara hku galaw wa ai kun?

9. Kawa a lam asan sha chye na hkra gara ga shadawn hpe Yesu akyu jashawn wa ai kun?

⁹ Yesu gaw, Karai Kasang a mying Yehowa re ai ngu masha ni hpe tsun dan ai daram sha n re. Yuda masha ni gaw Karai a mying hpe chye da ai. Dai majaw, “Kawa Karai Kasang a lam sanglang dan ai.” (Yhn 1:17, 18, NWT) Ga shadawn, Hebre Chyum Laika ni hta Yehowa gaw matsan dum chye ai, myit tau ya chye ai ngu tsun ai. (Pru 34:5-7) Myit n su ai ma ga shadawn hpe tsun dan nna, Kawa Karai Kasang a lam Yesu asan sha tsun dan ai. Kasha myit malai lu nna bai wa ai hpe “tsan tsan naw rai nga yang, . . . hkap mu ai” ai shaloi, gat sa nna ahpum ai lam, mara raw ya ai lam hti lu ai shaloi, Yehowa gaw matsan dum chye ai, myit tau ya chye ai hpe anhte asan sha chye na wa ai. (Luk 15:11-32) Yehowa gaw gara zawn Karai re ai hpe kaga masha ni chye na hkra Yesu karum ya wa ai.

10. (a) Kawa Karai Kasang a mying hpe Yesu lang ai, kaga ni hpe mung lang shangun mayu ai lam gara hku chye lu ai kun? (Marku 5:19) (Sumla hpe mung yu u.) (b) Anhte hpe Yesu hpa galaw shangun mayu ai kun?

¹⁰ Kawa a mying hpe Yesu lang shangun mayu ai kun? Lang shangun mayu ai. Dai prat na nawku htung ningbaw nkau gaw, Karai a mying lang ai hpe zai ai ngu shadu nga tim, Kawa a mying hpe Yesu lang wa ai. Gerase mung na nat kap ai wa hpe shamai ya ai lam hpe myit yu u. Masha ni hkrit mat nna, dai mung kaw na pru mat na matu, Yesu hpe hpyi nem ai. (Mrk 5:16, 17) Raitim, dai mung na masha ni hpe Kawa a mying chye shangun mayu ai. Dai majaw shi mai tsai wa sai lam kaga ni hpe tsun dan na matu nat kap ai wa hpe Yesu htet ai. Dai shaloi, shi galaw ya wa ai lam ni ngu n tsun ai sha, Yehowa Karai Kasang galaw ya wa ai lam ni ngu tsun shangun ai.  (Marku 5:19 hpe hti u.) a Dai ni aten hta mung, Kawa a mying hpe mungkan ting chye hkra tsun dan shangun mayu ai. (Mat 24:14; 28:19, 20) Anhte dai hku tsun dan ai shaloi, Hkawhkam Yesu grai kabu ai.

11. Gara hku akyu hpyi na matu shi a hpang hkan ai ni hpe Yesu sharin ya ai kun? Dai gaw hpa majaw grai ahkyak ai kun? (Ezekela 36:23)

¹¹ Yehowa a yaw shada lam gaw, shi a mying san seng chyoi pra na matu, shi hte seng ai masu ga ni shut ai hpe sakse madun na matu re ai hpe Yesu chye ai. Dai majaw, “sumsing lamu na anhte a Wa e, Na a amying nsang chyoi pra nga lit ga” ngu hpyi na matu shi a hpang hkan ai ni hpe sharin ya ai. (Mat 6:9) Mying ningsang san seng chyoi pra ai lam gaw, hpan da hkrum ai ni yawng hte seng ai ahkyak htum lam re. (Ezekela 36:23 hpe hti u.) Mying ningsang san seng chyoi pra na matu, ning gawn tawa hta Yesu zawn shakut wa ai kadai mung n nga ai. San seng chyoi pra ai mying hpe shut ai hku lang ai, jahten ai gaw sawng dik htum mara re ngu hkam la ai. Dai pyi, rim hkrum ai aten hta gara hku mara shagun hkrum ai kun? Karai Kasang hpe jahpoi asawng ai wa ngu mara shagun hkrum ai. Dai zawn mara shagun hkrum na, dai mara hte ari jaw hkrum na re ai majaw, grai myit shanut na re. Dai gaw n rim hkrum shi ai ahkying aten ni hta, “nachying nni nkri hkrum” shangun ai madung lam rai na re.—Luk 22:41-44.

12. Kawa a mying jahten hkrum ai hpe Yesu kaja htum lam hte gara hku hparan wa ai kun?

¹² Kawa a mying san seng chyoi pra na matu galaw ai shaloi, zingri zingrat ai lam, jahpoi asawng ai lam hte mara shagun ai lam amyu myu hpe Yesu hkam jan wa ai. Lam shagu hta Kawa hpe madat mara ai majaw kaya na lam n nga ai hpe shi chye ai. (Heb 12:2) Dai zawn yakhkak ai aten ni hta, shi hpe Satan ding tawk gasat na hpe mung chye da ai. (Luk 22:2-4; 23:33, 34) Sadi n dung mat hkra Yesu hpe gunglau lu na ngu Satan shadu ai. Raitim, shi sum mat ai. Satan gaw masu ai wa re ai, grai sawng ai chyam dinglik lam ni hkrum tim pyi, sadi dung ai mayam ni Yehowa hta nga ai lam, Yesu sakse madun dat ai majaw re.

13. Hkaw dung nga ai Hkawhkam myit pyaw hkra gara hku galaw mai ai kun?

 ¹³ Hkaw dung nga ai Hkawhkam hpe kabu shangun mayu ai kun? Rai yang, Yehowa a mying hpe matut shakawn nga u. Yehowa gaw gara zawn Karai re ai hpe kaga masha ni chye wa hkra karum ya u. Dai gaw Yesu hpe kasi la nga ai re. (1 Pe 2:21) Yehowa myit pyaw hkra Yesu zawn galaw nga ai re. Hpyen re ai Satan gaw, masu ai wa re ai hpe sakse madun nga ai re.

MYING NINGSANG HPE SHAKAWN AI SHALOI KAGA NI HKYE LA HKRUM

14-15. Yehowa a lam kaga ni hpe sharin ya ai shaloi gara mauhpa lam ni mu lu na kun?

¹⁴ Yehowa a mying hpe shakawn ai gaw, kaga ni hkye hkrang la hkrum hkra karum ya nga ai re. Hpa majaw kun? Satan gaw, “n kam n sham ai ni . . . a myit mang ai hku shakyaw shamak kau ya” ai majaw re. (2 Ko 4:4) Satan a masu ga ni a majaw, Karai n nga ai, Karai hte n lu hku hkau ai, shinggyim masha ni hpe Karai Kasang lanu lahku ai lam n nga ai, Karai Kasang gaw nhkru ai, mara galaw ai ni hpe htani htana zingri ai ngu masha ni kam nga ai. Dai zawn masu ga ni gaw, Yehowa hpe mying hten hkra galaw na matu, Yehowa hte masha ni n hkau mat hkra galaw na matu sha re. Raitim, Wa Karai Kasang a lam masha ni hpe anhte jaw ai hku sharin ya ai. Chyoi pra ai mying ningsang hpe shakawn ai. Dai gaw Satan a yaw shada lam hpe hten shangun ai. Masha ni hpe akyu lu shangun ai. Hpa akyu kun?

¹⁵ Chyum Laika a tengman lam gaw grai atsam kaba ai. Yehowa gaw gara zawn Karai re ai lam, masha ni hpe sharin ya ai shaloi, mauhpa lam anhte mu wa ai. Satan a masu ga ni a majaw, myi shamak da hkrum ai ni myi bai hpaw wa ai. Tsawra myit hpring ai Kawa hpe anhte mu ai zawn mu wa ai, Karai a chyahtum chyalai n-gun a lam chye nna mau mat ai. (Esa 40:26) Tara rap ra ai Karai hpe kamhpa wa ai. (Trj 32:4) Grau htum ai nyan hpaji nga ai Karai Kasang kaw na law law sharin la lu ai. (Esa 55:9; Rom 11:33) Karai Kasang gaw tsawra myit re ai hpe chye wa ai shaloi, shalan shabran lam lu ai. (1 Yh 4:8) Karai hte hku hkau wa ai shaloi, Karai a kashu kasha ni hku nna,  htani htana asak hkrung lu na myit mada lam grau ngangkang wa ai. Sumsing Kawa hte kaga ni hku hkau wa hkra karum ya lu ai gaw, ahkaw ahkang kaba langai re. Dai zawn karum ya ai shaloi, Yehowa gaw shi a “shingdep shingtau ni” hku nna anhte hpe sawn la ai.—1 Ko 3:5, 9.

16. Karai a mying chye dat ai majaw nkau gara hku galai shai mat ai kun? Ga shadawn jaw u.

¹⁶ Shawng nnan gaw, Karai a mying Yehowa ngu ai daram sha masha ni hpe sharin ya lu na. Karai a mying chye ai daram hte sha pyi, myit dingman ai ni galai shai wa chye ai. Ga shadawn, Aliya b ngu ai numsha gaw Hkristan n re ai dinghku hta nga kaba wa ai. Shi a nawku htung hpe n-gun n lu ai. Karai hte hku hkau ai ngu n hkamsha ai. Yehowa Sakse ni hte Chyum Laika hkaja ai hpang hta, Karai hpe shi a jinghku hku nna mu wa ai. Chyum Laika kaw na Karai a mying hpe shaw kau ai, Madu ngu ai arawng ningsang hte malai bang kau ai hpe chye dat ai shaloi mau mat ai. Yehowa a mying chye dat ai majaw, shi a prat galai shai mat ai. Shi ndai hku tsun dan ai: “Ngai grai hkau ai manang hta mying nga ai. Myit hta alum nga hkamsha ai. Laksan ahkaw ahkang nan re.” Tara ja ai Ju nawku htung kaw na madum sumpyi ninghkrin, Satip a lam hpe mung myit yu u. Hpyi hpun ai lam ni hpe mu ai majaw, gara nawku hpung de mung n shang mayu mat sai. Raitim, kanu si ai hpang, Yehowa Sakse ni a Chyum Laika sharin ai lamang langai hta shang dung ai. Karai Kasang a mying chye dat ai majaw, myit hkra mat ai. Shi ndai hku tsun ai: “Karai Kasang a mying kalang mung n na ga ai. Karai Kasang gaja nga ai ngu shawng nnan hkamsha lu ai re. Gaja wa nga ai Karai zawn mu wa ai. Manang langai lu mat ai zawn re.”

17. Yehowa a mying hpe matut shakawn na matu hpa majaw dawdan da ai kun? (Sumla hpe mung yu u.)

¹⁷ Hkaw tsun ai hte sharin achyin ai bungli hta, Yehowa a chyoi pra ai mying ningsang hpe nang tsun dan ai kun? Yehowa gaw gara zawn Karai re ai hpe chye hkra karum ya ai kun? Dai gaw Karai a mying hpe shakawn nga ai re. Yehowa gaw gara zawn Karai re ai hpe chye hkra karum ya ai hku nna, chyoi pra ai mying ningsang hpe matut shakawn lu u ga! Rai yang, kaga ni hkye hkrang la hkrum hkra karum ya nga ai re. Hkawhkam Yesu Hkristu a hpang hkan nga ai re. Tsawra myit hpring ai Kawa Yehowa hpe shakawn ai mung re. ‘[Shi] a amying nsang hpe, htani htana Prat dingsa, shakawn nga’ lu u ga!—Shk 145:2.