6-زەرتتەۋ ماقالاسى
10-ٵن قۇدايىمىز ەحوبانى ماداقتايىق!
«ەحوبانىڭ ەسىمىن داڭقتاڭدار!»
«ەحوبانىڭ قىزمەتشىلەرى، وعان ماداق ايتىڭدار، ەحوبانىڭ ەسىمىن داڭقتاڭدار!» (ٴزاب. 113:1).
نەگىزگى وي
ٵربىر مۇمكىندىكتى پايدالانىپ، ەحوبانىڭ كيەلى ەسىمىن ماداقتاي بەرۋگە تالپىندىراتىن ويلار.
1، 2. اتىنا جالا جابىلعاندا ەحوبا نە سەزىندى دەپ ويلايسىز؟
مىناداي جاعدايدى ەلەستەتىپ كورىڭىزشى: ٴبىر جاقىن ادامىڭىز ٴسىز جايلى سۇمدىق نارسەلەر ايتىپ ٴجۇر ەكەن. وسى وتىرىككە كەيبىرەۋلەر سەنىپ قالادى. ال ەڭ جامانى، بۇل قالىڭ جۇرتقا تارالىپ، بۇعان كوپ ادام سەنە باستايدى. وسىندايدا ٴسىز نە سەزىنەر ەدىڭىز؟ بۇل جانىڭىزعا باتادى، ارينە. ويتكەنى ٴسىز ادامداردى جاقسى كورەسىز ٵرى ولاردىڭ الدىندا جاقساتتى بولعىڭىز كەلەدى (ناق. س. 22:1).
2 بۇل مىسالدان اتى قارالانعاندا ەحوبانىڭ نە سەزىنگەنىن تۇسىنەمىز. قۇدايدىڭ ٶز قولىنان شىققان رۋحاني ۇلى العاشقى ايەل حاۋاعا ول جايلى وتىرىك ايتتى. حاۋا بولسا وعان سەنىپ قالدى. وسى وتىرىكتىڭ كەسىرىنەن ادام اتا مەن حاۋا انا ەحوباعا قارسى بۇلىك شىعاردى. اقىرىندا، بۇكىل ادامزات كۇناكار بولىپ، تۇبىندە ولەتىن بولدى (مۇس. 1-ج. 3:1—6؛ ريم. 5:12). بۇگىندە ٴبىز كورىپ جاتقان قيىنشىلىقتاردىڭ ٴبارى — ٶلىم، سوعىس، ازاپ — شايتاننىڭ سول ەدەم باعىندا ايتقان وتىرىگىنەن باستالعان. وزىنە جابىلعان جالا مەن ونىڭ قايعىلى سالدارى ەحوباعا قالاي اسەر ەتەدى دەپ ويلايسىز؟ ارينە، بۇل ونىڭ جۇرەگىن اۋىرتادى. ٴبىراق ول بۇعان اشىنىپ، قاتۋلانىپ كەتكەن جوق. ول ٵلى دە «باقىتتى قۇداي» (ٴتىم. 1-ح. 1:11).
3. بىزدە قانداي كەرەمەت مارتەبە بار؟
3 ەحوبانىڭ اتىن اقتاۋعا ٴبىز دە ۇلەس قوسا الامىز. ول ٷشىن «ەحوبانىڭ ەسىمىن داڭقتاڭدار!» دەگەن بۇيرىقتى ورىنداۋىمىز كەرەك (ٴزاب. 113:1). بۇل وزگەلەرگە سول قاسيەتتى ەسىمنىڭ يەسى جايلى جاقسى سوزدەر ايتۋدى بىلدىرەدى. ال ٴسىز ەحوبانىڭ ەسىمىن بار جان-تانىڭىزبەن داڭقتاعىڭىز كەلە مە؟ ەندەشە، وسىعان قوزعاۋ سالاتىن ٷش جايتتى تالقىلايىق.
ەحوبانىڭ اتىن ماداقتاساق، ونى قۋانتامىز
4. ەحوبانى ماداقتاساق، ول نەگە قۋانادى؟ مىسال كەلتىرىڭىز. (سۋرەتتى دە قاراڭىز.)
4 ەحوبانىڭ ەسىمىن ماداقتاساق، ول بىزگە ريزا بولادى (ٴزاب. 119:108). سوندا قۇدىرەتتى قۇداي تاعالا كەمەلسىز ادامدار سياقتى بىرەۋدىڭ ماقتاپ-ماراپاتتاۋىنا مۇقتاج با؟ ارينە، ولاي ەمەس. بۇنى مىناداي مىسالمەن تۇسىنۋگە بولادى. كىشكەنتاي قىز اكەسىنە جۇگىرىپ كەلىپ، قۇشاقتاي الادى دا، وعان: «ٴسىز الەمدەگى ەڭ كەرەمەت اكەسىز!»— دەيدى. اكەسى قىزىنىڭ بۇل قىلىعىنا ٴسۇيسىنىپ، ٴماز بولادى. نەگە؟ وزىنە سەنىمسىز، قىزىنىڭ ماقتاۋىنا ٴزارۋ بولعاندىقتان با؟ جوق، ول قىزىنىڭ سۇيىسپەنشىلىگى مەن ريزاشىلىعىن ٴبىلدىرىپ جاتقانىنا قۋانادى. سونداي-اق قىزى وسىنداي قاسيەتتەر تانىتسا، باقىتتى بولىپ وسەتىنىن دە بىلەدى. تاپ سولاي، ۇلى اكەمىز ەحوبانى ماداقتاعاندا، ول دا بىزگە قاراپ ريزا بولادى.
اكەسى بالاسىنىڭ سۇيىسپەنشىلىگى مەن ريزاشىلىعىن كورىپ قۋاناتىنىنداي، ەحوبا دا ونىڭ ەسىمىن ماداقتاعانىمىزعا قۋانادى (4-ابزاستى قاراڭىز)
5. ەحوبانى ماداقتاعاندا ٴبىز قانداي وتىرىكتى جوققا شىعارامىز؟
5 اكەمىز ەحوبانى ماداقتاعاندا شايتاننىڭ ٴبىز تۋرالى ايتقان وتىرىگىن دە جوققا شىعارامىز. ونىڭ ايتۋىنشا، ەشقايسىسىمىز ەحوبانىڭ جاعىندا سوڭىنا دەيىن تۇرا المايمىز. سىنالعاندا، مىنسىزدىگىمىزدەن تايىپ كەتە سالامىز. وزىمىزگە ٴتيىمدى بولىپ تۇرسا، قۇداي جولىنان اينىپ كەتەمىز (ٵيۇپ 1:9—11؛ 2:4). ٴبىراق بۇنىڭ جالعان ەكەنىن ٵيۇپ پايعامبار دالەلدەپ كەتتى. ال ٴسىز سولاي ەتەسىز بە؟ ٵربىرىمىز كوكتەگى اكەمىزدىڭ اتىن اقىرىنا دەيىن قورعاپ، مىنسىزدىكپەن قىزمەت ەتۋىمىزبەن ونى قۋانتا الامىز (ناق. س. 27:11). بۇل — ٴبىز ٷشىن زور مارتەبە.
6. ٴداۋىت پاتشا مەن لەۋىلىكتەردەن نە ۇيرەنەمىز؟ (نەحەميا 9:5)
6 ەحوبانى سۇيگەندىكتەن، ادال قىزمەتشىلەرى ونى جان-تانىمەن ماداقتايدى. ٴداۋىت پاتشانى الساق، ول: «جانىم ەحوبانى ماداقتاسىن، تۇلا بويىم كيەلى ەسىمىن داڭقتاسىن!»— دەگەن (ٴزاب. 103:1). ەحوبانىڭ ەسىمىن داڭقتاۋ دەگەن ونىڭ ٶزىن داڭقتاۋ ەكەنىن ٴداۋىت تۇسىنگەن. ەسىمىنىڭ استارىندا ونىڭ قانداي قۇداي ەكەنى، ياعني تاماشا قاسيەتتەرى مەن تاڭعاجايىپ ىستەرى جاتىر. ٴداۋىت اكەسىنىڭ ەسىمىن كيەلى تۇتۋعا جانە ونى «تۇلا بويىمەن»، ياعني بار جان-تانىمەن ماداقتاۋعا اسىق بولعان. لەۋىلىكتەرگە كەلسەك، ولار دا ەحوبانى ماداقتاۋدا جەتەكشى ٴرول اتقارعان. ولار ەحوبانىڭ كيەلى ەسىمىن لايىقتى تۇردە ماداقتاۋعا ەشقانداي ٴسوز جەتپەيتىنىن كىشىپەيىلدىلىكپەن مويىنداعان (نەحەميا 9:5 وقىڭىز). وسىنداي كىشىپەيىلدىلىكپەن، شىن جۇرەكتەن ايتىلعان ماداقتى ەستىگەندە ەحوبانىڭ مەيىرلەنىپ، ريزا بولعانى ٴسوزسىز.
7. قىزمەتتە جانە كۇندەلىكتى ومىرىمىزدە ەحوبانى قالاي ماداقتاي الامىز؟
7 وزگەلەرگە ەحوبا تۋرالى ايتقاندا، وعان دەگەن ريزاشىلىعىمىز بەن سۇيىسپەنشىلىگىمىز سەزىلىپ تۇرسا، ول قۋانادى. قىزمەتتە ٴبىزدىڭ باستى ماقساتىمىز — ادامدارعا ەحوباعا جاقىنداۋعا كومەكتەسۋ. ٴبىز سياقتى ولار دا ەحوبانى سۇيىكتى اكە دەپ تانىعانىن قالايمىز (جاق. 4:8). ٴبىز كيەلى كىتاپتان ادامدارعا ەحوبانىڭ ادامزاتتى سۇيەتىن، ٵدىل، دانا، قۇدىرەتتى جانە باسقا دا تاماشا قاسيەتتەرى بار قۇداي ەكەنىن كورسەتەمىز. ەحوبانى قۋانتىپ، ماداقتاۋدىڭ تاعى ٴبىر جولى — بارىنشا وعان ۇقساۋعا تىرىسۋ (ەفەس. 5:1). وسىلايشا ٴبىز مىنا زۇلىم دۇنيەدەن ەرەكشەلەنەمىز. ال ادامدار بۇنى بايقاپ، سەبەبىن بىلگىسى كەلەتىن شىعار (مات. 5:14—16). سوندىقتان وزگەلەرمەن كۇندەلىكتى شارۋالارمەن ۇشىراسقاندا مۇمكىندىك تۋسا، ولارعا ٸس-ارەكەتىمىزدىڭ نەگە باسقاشا ەكەنىن ٴتۇسىندىرىپ كەتسەك بولادى. ناتيجەسىندە اقجۇرەكتى ادامداردىڭ بويىندا قۇدايىمىزعا دەگەن قىزىعۋشىلىق پايدا بولادى. وسىنداي جولدارمەن ەحوبانى ماداقتاعانىمىز وعان قاتتى ۇنايدى (ٴتىم. 1-ح. 2:3، 4).
ەحوبانىڭ اتىن ماداقتاساق، يسانى قۋانتامىز
8. يسا نەگە ەحوبانىڭ ەسىمىن داڭقتاۋدىڭ ەڭ وزىق ۇلگىسى؟
8 كوك پەن جەردەگى سانالى جاراتىلىستاردىڭ ىشىندە ەحوبانى ۇلىنان ارتىق ەشكىم بىلمەيدى (مات. 11:27). اكەسىن سۇيگەندىكتەن يسا ەحوبانىڭ ەسىمىن ماداقتاۋدىڭ وزىق ۇلگىسىن كورسەتەدى (جوح. 14:31). ولەر الدىنداعى ٴتۇنى ول دۇعادا جەردەگى قىزمەتىن ٴبىراۋىز سوزبەن تۇيىندەپ: «ولارعا ەسىمىڭدى اشتىم»،— دەگەن (جوح. 17:26). بۇل نەنى بىلدىرەدى؟
9. يسا ادامدارعا ەحوبا جايلى تەرەڭىرەك ٴتۇسىندىرۋ ٷشىن قانداي استارلى اڭگىمە ايتتى؟
9 يسا جاي عانا «قۇدايدىڭ ەسىمى — ەحوبا» دەپ ايتقان جوق. ونىڭ ٴتالىمىن ەستىپ جۇرگەن ياھۋديلەر بۇنى ونسىز دا بىلەتىن. يسا ولارعا اكەسىنىڭ قانداي تۇلعا ەكەنىن تانىتتى (جوح. 1:17، 18). مىسالى، ەۆرەي جازبالارىندا ەحوبانىڭ مەيىرىمدى ٵرى جاناشىر ەكەنى ايتىلىپ كەتكەن ەدى (مۇس. 2-ج. 34:5—7). ال يسا وسى شىندىقتى تەرەڭىرەك ٴتۇسىندىرۋ ٷشىن اداسقان ۇل مەن اكەسى جايلى استارلى اڭگىمە ايتتى. اكەسى كۇناسىنا وكىنگەن ۇلىن «الىستا كەلە جاتقاندا-اق» كورىپ، الدىنان جۇگىرىپ شىعىپ، باۋىرىنا باسادى دا، كەڭپەيىلمەن كەشىرەدى. وسى سوزدەر ەحوبانىڭ مەيىرىمدى ٵرى جاناشىر ەكەنىن كەرەمەت بەينەلەيدى (لۇقا 15:11—32). ٴيا، يسا اكەسىنىڭ شىن مانىندە قانداي قۇداي ەكەنىن اشىپ ٴتۇسىندىردى.
10. ا) يسا اكەسىنىڭ ەسىمىن اتاعانىن جانە باسقالاردان دا وسىنى كۇتكەنىن قايدان بىلەمىز؟ (مارقا 5:19) (سۋرەتتى دە قاراڭىز.) ٵ) يسا ٴبىزدىڭ نە ىستەگەنىمىزدى قالايدى؟
10 سونداي-اق يسا باسقالاردىڭ اكەسىنىڭ اتىن اتاعانىن قالاعان. سول ۋاقىتتا كەيبىر ٴدىني جەتەكشىلەر قۇدايدىڭ ەسىمى تىم قاسيەتتى، ونى داۋىستاپ ايتۋعا بولمايدى دەپ سەنگەن بولۋى مۇمكىن. ٴبىراق جازبالارعا نەگىزدەلمەگەن بۇنداي ٴداستۇر يساعا ىقپال ەتكەن جوق، ول اكەسىنىڭ ەسىمىن دارىپتەي بەرگەن. مىسالى، ول گەراسالىقتاردىڭ جەرىندە جىن بۋعان كىسىنى ساۋىقتىرعان سوڭ نە بولدى؟ سول جاقتىڭ تۇرعىندارى قورقىپ كەتىپ، يسادان جەرلەرىنەن كەتۋدى ٶتىندى (مار. 5:16، 17). ٴبىراق يسا ولار دا ەحوبانىڭ ەسىمىن ٴبىلسىن دەدى. سوندىقتان الگى ساۋىققان كىسىگە تاپسىرما بەرىپ، جۇرتقا يسا ەمەس، ەحوبا وعان نە ىستەگەنىن ايتۋدى بۇيىردى (مارقا 5:19 وقىڭىز) a. بۇگىندە ول ٴبىزدىڭ دە اكەسىنىڭ ەسىمىن بۇكىل الەمگە جاريالاعانىمىزدى قالايدى (مات. 24:14؛ 28:19، 20). وسىلاي ىستەسەك، پاتشامىز يسانى قۋانتامىز.
يسا جىننان ارىلعان كىسىگە جۇرتقا بارىپ، ەحوبا وعان قالاي كومەكتەسكەنىن ايتۋدى تاپسىردى (10-ابزاستى قاراڭىز)
11. يسا ٸزباسارلارىنا نە دەپ دۇعا ەتۋدى ۇيرەتتى جانە ەزەكيەل 36:23 كە ساي، بۇل نەگە ماڭىزدى؟
11 ەحوبانىڭ نيەتى ٶزىنىڭ ەسىمىن بۇكىل جالادان تازارتىپ، كيەلى ەتۋ ەكەنىن يسا جاقسى بىلگەن. سوندىقتان دا ول ٸزباسارلارىنا «كوكتەگى اكەمىز، سەنىڭ ەسىمىڭ كيەلى بولسىن!» دەپ دۇعا ەتۋدى ۇيرەتكەن (مات. 6:9). يسا بۇنىڭ بۇكىل جاراتىلىس ٷشىن ەڭ ماڭىزدى ماسەلە ەكەنىن تۇسىنگەن (ەزەكيەل 36:23 وقىڭىز). بۇكىل عالامدا ەشكىم، ەشقاشان ول سياقتى ەحوبانىڭ ەسىمىن كيەلى تۇتقان ەمەس. ٴبىراق ونى تۇتقىنداعان كەزدە، دۇشپاندارى ونى نە دەپ ايىپتاعانى ەستەرىڭىزدە مە؟ «سەن قۇدايدى قورلادىڭ»،— دەدى. ال يسا ٷشىن قۇدايدىڭ قاسيەتتى ەسىمىن قورلاۋ ەڭ سوراقى كۇنا بولعان. ٶزىنىڭ ٴدال وسى قىلمىسپەن ايىپتالىپ، كىنالى دەپ تابىلعانى جانىنا قاتتى باتتى. تۇتقىندالار الدىندا ونىڭ «جان ازابىنا تۇسكەنى» دە، ەڭ الدىمەن، وسى سەبەپتەن بولار (لۇقا 22:41—44).
12. يسا اكەسىنىڭ ەسىمىن قالاي ەڭ كەرەمەت تۇردە كيەلى تۇتتى؟
12 اكەسىنىڭ ەسىمىن كيەلى تۇتۋ ٷشىن يسا ازاپقا، قورلىققا، جالاعا دا توزگەن. ول ەش جەردەن ٴمۇلت كەتپەي، بارلىق جاعدايدا اكەسىنە مويىنسۇنعاندىقتان ەش ۇيالمادى (ەۆر. 12:2). سونداي-اق ول سىناقتاردىڭ ٴبارى شايتاننىڭ تىكەلەي شابۋىلى ەكەنىن دە ٴبىلىپ تۇردى (لۇقا 22:2—4؛ 23:33، 34). شايتان يسانى ادالدىعىنان تايدىرامىن دەپ قانشا ۇمىتتەنسە دە، تۇك شىقپادى. كەرىسىنشە، يسا شايتاننىڭ زىميان وتىرىكشى ەكەنىن، سونداي-اق ەڭ قيىن دەگەن سىناقتىڭ وزىندە ەحوبانىڭ مىنسىزدىك ساقتايتىن قىزمەتشىلەرى بار ەكەنىن دالەلدەدى.
13. ٴسىز پاتشاڭىزدى قالاي قۋانتا الاسىز؟
13 ٴسىز تاقتا وتىرعان پاتشاڭىز يساعا ۇنامدى بولعىڭىز كەلە مە؟ ەندەشە، ەحوبانىڭ ەسىمىن ماداقتاپ، باسقالارعا ونىڭ قانداي كەرەمەت قۇداي ەكەنىن ايتا بەرىڭىز. وسىلاي يسانىڭ ىزىمەن جۇرەسىز (پەت. 1-ح. 2:21). سونداي-اق ول سياقتى ەحوبانى قۋانتاسىز، ال ونىڭ جاۋى شايتاننىڭ ارسىز وتىرىكشى ەكەنىن دالەلدەيسىز!
ەحوبانىڭ اتىن ماداقتاساق، ادامداردىڭ ٶمىرىن ساقتايمىز
14، 15. ادامدارعا ەحوبا جايلى ٴتالىم بەرگەندە، قانداي تاڭعاجايىپ نارسەگە كۋا بولامىز؟
14 ەحوبانىڭ ەسىمىن ماداقتاۋ ارقىلى ٴبىز ادامداردىڭ ٶمىرىن ساقتاي الامىز. نەگە بۇلاي دەۋگە بولادى؟ كيەلى كىتاپتا ايتىلعانداي، شايتان سەنبەيتىندەردىڭ «سانالارىن سوقىر قىلىپ قويعان» (قور. 2-ح. 4:4). سوندىقتان دا ولار شايتانعا الدانىپ، ونىڭ قۇداي جوق، قۇداي بىزدەن الىس، ول ٴبىزدىڭ قامىمىزدى ويلامايدى، قۇداي قاتىگەز، كۇناكارلاردى ماڭگىلىك بويى ازاپتايدى دەگەن وتىرىكتەرىنە سەنىپ ٴجۇر. شايتان ادامداردا قۇدايعا جاقىنداۋعا دەگەن ىقىلاس تا بولماسىن دەپ، ەحوبانىڭ اتىن جاسىرادى نە جاماناتتى قىلعىسى كەلەدى. ٴبىراق ۋاعىزداعان كەزدە ٴبىز ونىڭ بۇل جوسپارىن بۇزامىز. ويتكەنى ٴبىز ادامدارعا ەحوبا اكەمىز جايلى شىندىقتى ايتامىز جانە ونىڭ كيەلى ەسىمىن داڭققا بولەيمىز. ونىڭ ناتيجەسى قانداي؟
15 قۇداي سوزىندەگى شىندىقتاردىڭ اسەرى وتە كۇشتى. ادامدارعا ەحوبا جايلى، ونىڭ شىن مانىندە قانداي قۇداي ەكەنى جايلى ايتقاندا، ٴبىز ٴبىر تاڭعاجايىپ نارسەگە كۋا بولامىز. ادامداردىڭ بىرتە-بىرتە كوزدەرى اشىلىپ، ەحوبانىڭ كوركەم قاسيەتتەرىن كورە باستايدى. ماسەلەن، قۇدىرەتىنىڭ شەكسىز ەكەنىن تۇسىنگەندە، بويلارىن قاستەرلى سەزىم كەرنەيدى (يشايا 40:26). كەمەلدى ادىلەتتىلىگىن ٴبىلىپ، وعان تولىق سەنىم ارتا باستايدى (مۇس. 5-ج. 32:4). اسقان دانالىعىنا قايران قالىپ، تۇسىنىكتەرى مولايادى (يشايا 55:9؛ ريم. 11:33). تۇلا بويى سۇيىسپەنشىلىككە تۇنىپ تۇرعانىن بىلگەندە، جاندارى جۇبانىش تابادى (جوح. 1-ح. 4:8). ەحوباعا جاقىنداعان سايىن، ولاردىڭ جۇماقتا قۇدايدىڭ بالالارى بولىپ، ماڭگى ٶمىر سۇرەمىز دەگەن ۇمىتتەرى نىعايا بەرەدى. راسىندا دا، ادامدارعا كوكتەگى اكەلەرىنە جاقىنداۋعا كومەكتەسىپ جۇرگەن ٴبىز — نەتكەن مارتەبەلى جاندارمىز! وسى ىستە ەحوبا ٴبىزدى ٶزىنىڭ قىزمەتتەسى رەتىندە كورەدى (قور. 1-ح. 3:5، 9).
16. قۇدايدىڭ ەسىمىن بىلگەندە، بۇل كەيبىر ادامدارعا قالاي اسەر ەتكەن؟ مىسالدار كەلتىرىڭىز.
16 مۇمكىن، باسىندا ٴبىز ادامعا قۇدايدىڭ ەسىمى ەحوبا ەكەنىن عانا ايتاتىن شىعارمىز. وسىنىڭ ٶزى اقجۇرەكتى ادامعا ٶمىرىن وزگەرتەتىندەي اسەر ەتۋى مۇمكىن. مىسالى، كيەلى كىتاپتى ۇستانبايتىن ٴدىننىڭ تاربيەسىمەن وسكەن ٵليا b ەسىمدى قىزدى الايىقشى. جۇرەگىنىڭ تۇبىندە ول ٶزىن دىنىنە دە، قۇدايعا دا جاقىن سەزىنبەگەن. ٴبىراق ەحوبا كۋاگەرلەرىمەن زەرتتەۋ ساباعىن باستاعاندا ٴبارى وزگەردى. ول ەندى قۇدايعا دوسى رەتىندە قاراي باستادى. ول كوپتەگەن كيەلى كىتاپتاردان قۇدايدىڭ ەسىمى الىنىپ تاستالعانىن ٵرى «يە» دەگەن اتاۋمەن الماستىرىلعانىن بىلگەندە اڭ-تاڭ بولادى. ەحوبانىڭ ەسىمىن بىلگەنى ونىڭ ومىرىندەگى ەلەۋلى ٴسات بولدى. ول ٶزىنىڭ العان اسەرىن بىلاي دەپ جەتكىزدى: «مەنىڭ ەڭ جاقىن دوسىمنىڭ ەسىمى بار ەكەن! قازىر مەن ەرەكشە جانتىنىشتىعىن سەزىنەمىن. ونىڭ اتىن بىلگەنىم ماعان زور قۇرمەت!» ال ستيۆ ەسىمدى مۋزىكانت ٴيۋدايزمدى قاتاڭ ۇستاناتىن ورتادان شىققان. ەكىجۇزدىلىكتى كوپ كورگەندىكتەن، ول ەشقانداي ٴدىننىڭ مۇشەسى بولعىسى كەلمەگەن ەكەن. ٴبىراق باسىنا ٴبىر قايعىلى جاعداي تۇسكەندە، ول ەحوبا كۋاگەرلەرىمەن زەرتتەپ جۇرگەن دوسىنىڭ ساباعىنا قاتىسىپ كورەيىن دەيدى. ەحوبانىڭ ەسىمىن بىلگەندە، بۇل ونىڭ جۇرەگىن قوزعاپ جىبەردى. «قۇدايدىڭ اتى بار ەكەنىن مەن ەشقاشان بىلمەپپىن. سول كەزدە العاش رەت قۇدايدىڭ ٴتىرى تۇلعا ەكەنىن سەزىندىم! ونىڭ سەزىمدەرى، كەرەمەت قاسيەتتەرى بار ەكەنىن، ونى تانىپ ٴبىلىپ، دوستاسا الاتىنىمدى ٴتۇسىندىم»،— دەيدى ستيۆ.
17. ٴسىز نەلىكتەن ەحوبانىڭ ەسىمىن ماداقتاي بەرۋگە بەكىندىڭىز؟ (سۋرەتتى دە قاراڭىز.)
17 ۋاعىزداپ يا ٴتالىم بەرىپ جاتقاندا، ەحوبانىڭ قاسيەتتى ەسىمىن ادامدارعا ايتاسىز با؟ ولارعا ەحوبا اكەمىزدىڭ قانداي كەرەمەت قۇداي ەكەنىن تۇسىنۋگە كومەكتەسەسىز بە؟ وسىلاي ٴسىز ەحوبانى ماداقتاپ، دارىپتەيسىز. ٵرى قاراي دا ادامدارعا ەحوبانىڭ اتىن، ياعني ونىڭ قانداي تۇلعا ەكەنىن تالماي تانىستىرا بەرىڭىز. وسىنىڭ ارقاسىندا ٴسىز ادامداردىڭ ٶمىرىن ساقتايسىز. پاتشامىز يسا ٴماسىحتىڭ سوڭىنان ەرەسىز. ال ەڭ باستىسى، ەحوبا اكەڭىزدى قۋانتاسىز. ونىڭ «ەسىمىن ماڭگى باقي ماداقتاي» بەرگەيسىز! (ٴزاب. 145:2).
ادامدارعا ەحوبانىڭ ەسىمىن كورسەتىپ، ونىڭ قانداي قۇداي ەكەنىن ايتقاندا، ٴبىز ونى داڭقتايمىز (17-ابزاستى قاراڭىز)
ەحوبانىڭ اتىن ماداقتاساق، نەگە...
-
ونى قۋانتامىز؟
-
يسا ٴماسىحتى قۋانتامىز؟
-
ادامداردىڭ ٶمىرىن ساقتاي الامىز؟
2-ٵن سەنىڭ ەسىمىڭ — ەحوبا
