1-2. Suna iluaqutigalugu paasisin­naavarput Jehova salluliuutigineqarami qanoq misiginersoq?

 TAKORLOORIARUK inuup nuannarisavit ilaata ajorluin­nartumik oqaluuserigaatit. Nalunngilat salluliortoq, inuilli ilaasa salluliuutaa upperivaat. Ajornerulersitsisumillu salluliuut ingerlateq­qinneqarpoq amerlasuunillu upperineqarluni. Qanoq misigis­sagaluarpit? Illit tusaamanerlugaalerusun­nginnavit inoqatitillu soqutigigakkit salluliuutigineqarnerit nuanniil­liuutigissavat, ilaa? – Uss 22:1.

² Tamanna takorloorsin­naagukku Jehova tusaamanerlugaalersin­neqarami qanoq misigisimanersoq paasisin­naassavat, tassami ernermi anersaajusut qilammiittut ilaata arnamut siullermut, Evamut, salluliuutigaani. Evallu salluliuut upperaa. Salluliuut tamanna pissutigalugu inuit siulliit Jehovamut pikitsitsilerput. Tamatuma kingunerisaanik ajorti toqulu inunnut atuutilerput. (Mos 1. 3:1-6; Rom 5:12) Saatanip Edenimi salluliuutai pissutigalugit nunarsuarmi ajornar­torsiutaasut – toqu, sorsunnerit atugarlior­nerillu – atuutilerput. Ilimanarluinnarpoq salluliuutit tamakkualu kingunerisai Jehovap anniaatigigai. Taamaak­kaluartoq narrutsas­simaalernani tassaajuarpoq ‘Guuti pilluartoq’. – Tim 1. 1:11.

3. Sumik uppernarsaaqataasin­naavugut?

³ Saatanip Jehova pillugu salluliorsimanera uppernarsarsin­naavarput peqqussutip uuma malinneratigut: “[Jehovap]  aqqa unnersiutigisiuk!” (Tuss 113:1) Jehova unnersiutigisarparput taanna pillugu ilumoortoq allanut oqaatigigaangatsigu. Illit taamaaliorusuppit? Uummatikkut iluunngarluta Jehovap aqqata unnersiutiginissaanut kajumis­sissutaangaarsinnaasut pingasut sammeriartigit.

GUUTIP ATIA UNNERSIUTIGIGAANGATSIGU JEHOVA NUANNAAR­TITTARPARPUT

4. Sooq Jehova unnersiutigigaangatsigu nuannaartarpa? Assersuuteqarit. (Aamma asseq takuuk).

⁴ Ataatarput qilammiusoq nuannaar­tittarparput atia unnersiutigigaangatsigu. (Tuss 119:108) Inuit naammal­luinnan­ngitsut ilaat imminut tatigin­nginnamik nersorneqar­nissartik pisariaqar­tittarpaat. Guutili Killeqan­ngitsumik Pissaanilik taamaanngilaq. Assersuuteqariarta. Niviarsiarannguaq asannip­palungaarluni ataatani qungasiatigut eqillugu ima oqarpoq: “Nunarsuarmi ataataal­luarnerpaavutit!” Ataataa nuannaangaarluni qungujuppoq. Sooq? Imaappa ataataasoq imminut tatigin­nginnami panimminiit nersualaar­neqarnissani pisariaqartikkaa? Naamik. Tassami panini asavaa, nuannaarporlu asanninnermik qujamasun­nermillu ersersitsivigimmani. Ataataasup nalunngilaa panimmi taamatut pissuseqarnini peroriar­tornermini tamanna pillualis­sutigissagaa. Taamatuttaaq Jehova, Ataataal­luarnerpaaq, unnersiutigigaangatsigu nuannaartarpoq.

5. Jehovap atia unnersiutigigaangatsigu sallu suna eqqunngitsuusoq uppernarsar­tarparput?

⁵ Ataatarput qilammiusoq unnersiutigisarparput Saatanip salluliuutaata allap tamatsinnut tunngasup eqqunngitsuunera uppernarsaraangatsigu. Saatanip eqqarsar­tinniarsarivaatigut inuup kialuunniit ilumoorfigin­nilluni Guutip atia illersor­navianngikkaa. Oqarpoq inuup kialuunniit nammineq iluaqutigis­sasoriguniuk misilin­neqarnermini aalajaak­kunnaarluni Guuti tunussagaa. (Job 1:9-11; 2:4) Juubilli aalajaan­nermigut Saatani sallutuujusoq uppernarsarpaa. Illimmi Guutimut aalajaat­tuassavit? Tamatta immikkut aalajangersin­naavugut Ataatatta atia illersor­niarlugu aalajaallutalu kiffartorfigineratigut nuannaar­tissinnaallugu. (Uss 27:11) Taamaaliorneq uagutsinnut ataqqinaataangaarpoq.

6. Kunngi Daavi Levikkullu qanoq ilaarsin­naavagut? (Nehemia 9:5)

⁶ Inuit Jehovamik asannittut taassuma atia uummatikkut iluunngarlutik unnersiutigerusut­tarpaat. Kunngi Daavi allappoq: “Tarniga, nersoruk Naalagaq, aqqa illernartoq iluma tamarmi nersorliuk.” (Tuss 103:1) Daavip nalunngilaa Jehovap atianik unnersiutiginninneq  aamma Jehovamik unnersiutigin­ninnerusoq. Jehovap atia taaneqaraangat pissusii nuanningaartut iliuusiilu nalissaqan­ngitsut eqqaasarpagut. Daavip iliuutsimigut ersersik­kusuppaa Ataatami atia illernartutut isigalugu unnersiutigerusullugulu. Uummatikkut iluunngarluni taamaaliorusuppoq. Taamatut assingusumik Levikkut Jehovamik unnersiutigin­ninnermi siuttuupput. Maniguullutik nassuerutigivaat oqaatsimik­kuinnaq Jehovap atia illernartoq tamakkiisumik unnersiutigisin­naanagu. (Nehemia 9:5 atuaruk). Qularnan­ngitsumik taamatut maniguulluni qamannga pisumik unnersiutiginninneq Jehovamut nuannaarutaasarpoq.

7. Oqaluus­sinitsinni ulluinnarnilu inuunitsinni Jehova qanoq unnersiutigisin­naavarput?

⁷ Nalitsinni Jehova nuannaar­tissinnaavarput qujamasulluta asannillutalu taanna eqqartor­tarutsigu. Oqaluus­sigaangatta inuit Jehovamut qanillinissaat Ataatatsinnillu asannittumik uagutsitulli asanniler­nissaat pingaarnertut anguniagarisarparput. (Jaak 4:8) Nuannaarutigisarparput Jehova Biibilimi qanoq allaatigineqarnersoq inunnut takutis­sinnaagaangatsigu. Allassimavormi asannittuusoq, naapertuil­luartuusoq, ilisimas­suseqartoq, pissaaneqartoq nuannersunillu allanik pissuseqartoq. Sapinngisatsinnik Jehova ilaaraangatsigu taanna unnersiutigalugulu nuannaar­tittarparput. (Ef 5:1) Taamaalioraangatta malugineqas­sagunarpoq inunnit allanit allaanerusugut. (Mat 5:14-16) Sooq allaanerunerput ulluinnarni attavigisar­takkatsinnut nassuiaanissamut immaqa periarfis­saqalissaagut. Tamatuma kingunerisaanik inuit eqqortuliorusuttut Guutimut qanillerusulissapput. Taamatut assigiin­ngitsutigut Jehova unnersiutigigaangatsigu nuannaar­tingaar­tarparput. – Tim 1. 2:3, 4.

JEHOVAP ATIA UNNERSIUTIGIGAANGATSIGU JIISUSI NUANNAAR­TITTARPARPUT

8. Jiisusi Jehovap atianik unnersiutigin­ninnermi qanoq maligas­saalluar­nerpaava?

⁸ Qilammiittunit nunamiit­tunillu Jiisusip Jehova ilisarisimanerpaavaa. (Mat 11:27) Jiisusip Ataatani asavaa taassumalu atianik unnersiutigin­ninnermi maligas­saalluar­nerpaavoq. (Joh 14:31) Aqagumut toqusus­saalluni Ataataminut qinunermini nunarsuarmi kiffartor­nermini pingaarnertut iliuuserisimasani ima oqaatigaa: “Atit taakkununnga ilisimaneqalersippara.” (Joh 17:26) Suna pivaa?

9. Jiisusi assersuusiorluni Ataatami pissusiinik qanoq erseqqarin­nerpaamik nassuiaava?

⁹ Jiisusi paasititsiin­nanngilaq Guutip atia tassaasoq Jehova, juutimmi Guutip atia nalunngereerpaat. Jiisusi ‘Guutip kinaanera nassuiar­niarlugu’ iliuuseqangaarpoq. (Joh 1:17, 18) Assersuutigalugu Hebræerisut Allakkani Jehova ‘nallittuisutut saammaas­sisutullu’ allaatigineqarpoq. (Mos 2. 34:5-7) Jiisusip ernermik tammaraluartumik ataataanillu assersuusior­nermigut tamanna ersaris­sarluarpaa. Ataataasup ernini peqqissimisoq “suli ungasiartoq” takullugu arpalluni naapigiaramiuk eqippaa uummatikkullu iluunngarluni isumakkeerfigalugu. Assersuusiamit tassannga Jehovap nallittuisuunera misigin­neqatigin­nissinnaaneralu takorlooruminarsar­neqarput. (Luk 15:11-32) Jiisusi inunnut paasititsivoq Jehova qanorpiaq ittuunersoq.

10. (a) Qanoq nalunngilarput Jehovap atia Jiisusip atortaraa kissaatigigaalu allat aamma taamaaliussasut? (Makkorsi 5:19) (Aamma assiliaq takuuk). (b) Jiisusip nalitsinni sunissarput kissaatigivaa?

¹⁰ Qularnanngilaq Jiisusip kissaatigigaa Ataatami atia aamma allat atortassagaat. Taamanikkut upperisarsiornikkut siuttut ilaasa Guutip atia taarusun­ngilaat illernarpal­laarsorigamikku. Jiisusilli ileqqutoqqat taamaattut,  Biibilimut naapertuutin­ngitsut, Ataatami atianik ataqqin­ninnissamut ajoqutaatin­ngisaannarpai. Geraasamiut nunaanni Jiisusip angut anersaapilulik ajorunnaarsimmagu pisut sammeriartigit. Jiisusi inunnit siooragineqarluni aallaqquneqarami nuna tamanna qimappaa. (Mak 5:16, 17) Sulili Jehovap atia tassani ilisimaneqalersik­kusuppaa. Taamaattumik angut ajorunnaarsis­simasani peqquaa nammineq iliuutsini pinnagu Jehovap iliuusia pillugu inuit oqaluttuutissagai. (Makkorsi 5:19 atuaruk). a Aamma nalitsinni Jiisusip tamanna kissaatigaa – tassa nunarsuaq tamakkerlugu Ataatami atia uagut ilisimalersis­sagipput! (Mat 24:14; 28:19, 20) Taamaalioraangatta kunngerput Jiisusi nuannaar­tittarparput.

11. Jiisusip malinnitsini suna qinnutigisaq­qullugu ilinniartippai, aamma sooq tamanna pingaaruteqarpa? (Ezekieli 36:23)

¹¹ Jehovap siunertarivaa atini illernarsisin­neqassasoq salluliuutaasut tamaasa ilumuun­nginnerisa uppernarsar­nerisigut. Jiisusip tamanna nalunnginnamiuk malinnitsini ima qinusassasut ilinniartippai: “Ataatarput qilammiittutit, atit illernar­tinneqarli.” (Mat 6:9) Jiisusip paasisimavaa taamaaliorneq inngilinut inunnullu pingaar­nerpaasoq. (Ezekieli 36:23 atuaruk). Jiisusi Jehovap atia illernarsisin­niarlugu kikkunnit tamanit iliuuseqar­nerpaavoq. Jiisusili tigusarineqarami akeqqaminit qanoq unnerluun­neqarpa? Guutimik mitaatigin­nittutut! Qularnan­ngitsumik Jiisusi misigivoq Ataatami atiata illernartup atornerlunnissaa salluliuutiginis­saaluunniit ajortulianit tamanit ajornerpaasoq. Taamatut pinerluttutut unnerluun­neqarluni eqqartuun­neqarnissani nikallungas­sutigingaarpaa. Ilimanarpoq tigusaangajaler­nermini ‘isumatsaq­qangaar­neranut’ tamanna pissutaasoq. – Luk 22:41-44.

12. Jiisusip qanoq Ataatami atia pitsaanerpaamik illernarsisippaa?

¹² Jiisusip naalliutsitaanermini, mitaatigineqar­nermini salluliuutigineqar­nerminilu pinertusaar­nermigut Ataatami atia illernarsisippaa. Nalunngilaa Ataatani sutigut tamatigut naalattuarlugu kanngusuutis­saqarnanilu. (Hebr 12:2) Aamma nalunngilaa artornar­torsior­nermini Saatanimit toqqaan­nartumik  saassun­neqarluni. (Luk 22:2-4; 23:33, 34) Saatani neriukkaluarpoq Jiisusi assuarnaak­kunnaarsis­sinnaas­sallugu. Iluatsin­ngilarli! Jiisusip uppernarsarluinnarpaa Saatani sallutoorsuusoq aamma misilin­neqangaarnermi assuarnaat­tuartunik Jehova kiffaqartoq!

13. Kunngerput Jiisusi qanoq nuannaar­tissinnaaviuk?

¹³ Kunngerput Jiisusi maanna aqutsisoq nuannaar­tikkusuppiuk? Guutitta qanorpiaq ittuuneranik allat paasinnin­nissamut ikiornerisigut Jehovap atia unnersiutigiuaruk. Taamaalioruit Jiisusi ilaassavat. (Pet 1. 2:21) Jiisusitut Jehova nuannaar­tissavat uppernarsarlugulu akerlilersortia Saatani sallutuujusoq soqutigit­taatsoq!

JEHOVAP ATIA UNNERSIUTIGIGAANGATSIGU ANNAASSEQATAASARPUGUT

14-15. Inuit Jehova pillugu ilinniar­tikkaangatsigit nuannersumik qanoq pisoqarsinnaava?

¹⁴ Guutip atia unnersiutigigaangatsigu inuit annaanneqar­nissaannut ikiortarpagut. Qanoq? Saatanip ‘uppersuseqan­ngitsut tappiil­lisissimavai’. (Kor 2. 4:4) Tamatuma kingunerisaanik Saatanip salluliuutai uku inuit upperilersimavaat: Guuteqanngilaq, Guutip inuit soqutiginngilai, Guuti naakkit­taatsuuvoq ajortuliortullu naassaan­ngitsumik naalliutsit­tarlugit. Taamatut salluliuutigin­ninnermigut Saatanip siunertarivaa Jehovap atiata isertuun­neqarnissaa imaluunniit tusaamanerlugaalersin­neqarnissaa. Tamannami iluatsippat inuit Jehovamut qanillerusun­navianngillat. Ataatarput pillugu ilumoortoq ilinniar­titsissutigigaangatsigu Guutitta atia illernartoq unnersiutigisarparput, taamaalilluta Saatani sallutuujusoq uppernarsar­tarparput. Qanoq kinguneqartumik?

¹⁵ Guutip oqaasiani ilumoortut sunniuteqangaartarput. Jehova taassumalu qanorpiaq ittuunera pillugit inunnut ilinniar­titsissutigigaangatsigit nuanningaartumik misigisaqar­tarpugut. Saatanip salluliuutai sunniutaaruk­kiartortarput Ataatattalu pissusii nuannersut takusin­naalertarpaat. Killeqan­ngitsumik pissaaneqarmat mianeringaaler­tarpaat. (Es 40:26) Naapertuil­luaqqis­saartuunera pissutigalugu tatigiler­tarpaat. (Mos 5. 32:4) Ilisimas­suseqangaarnera ilinniarfigisarpaat. (Es 55:9; Rom 11:33) Aamma Guuti asanningaartuusoq  paasigaangamikku tuppallis­sutigisarpaat. (Joh 1. 4:8) Jehovamut qanilliar­tortillutik taassuma qitornaatut naassaan­ngitsumik inuunissamik neriuutertik qularutigiun­naariar­tortarpaat. Inuit Jehovamut qanillinissamut ikiorsin­naagatsigit immikkut pisinnaatitaaf­fiungaarpoq! Taamaalioraangatta Jehovap ‘suleqatimisut’ isigisarpaatigut. – Kor 1. 3:5, 9.

16. Inuit ilaasa Guutip atia paasigaangamikku qanoq sunnertittarpat? Assersuuteqarit.

¹⁶ Imaassinnaavoq Guutip Jehovamik ateqarnera kisiat aallaqqaammut ilinniar­titsissutigeq­qaaripput. Tamanna inuup eqqortuliorusuttup killitsis­sutigingaarsinnaavaa. Assersuutigeriartigu arnaq inuusuttoq Aaliyahmik atilik b kristumiuun­ngitsuni peroriartortoq. Guutili upperisarsioqatigiillu attavigisani misigis­suseqarfiginngilai. Tamannali allanngorpoq Nalunaajaasut Biibilimik misissueqatigisaleramigit. Guuti ikinngutimisut isigilerpaa. Tupigusupporlu Guutip atia Biibilinit amerlasuunit peerneqarluni taaguummik, soorlu Naalakkamik, taarser­neqarsimasoq paasigamiuk. Jehovap ateqarneranik paasinninnini inuunermini allannguutigaa. Nuannaarluni oqarpoq: “Ikinngutiginerpaasara ateqarpoq!” Imami nangippoq: “Maanna qamuuna eqqissisimangaarpunga. Qujamasungaarpunga.” Angut Stevemik atilik nipilersor­tartuusimasoq juutiuvoq upperluar­tuusuni peroriartortoq. Ilumoor­tuusaar­torpassuit takusareeramigit upperisarsioqatigiinnut arlaannul­luunniit ilaasor­taarusunngilaq. Kisianni aliasunnermi nalaani Jehovap Nalunaajaasuisa ilaannit Biibilimik misissueqatigineqartoq najuuffigaa. Guuti ateqartoq paasigamiuk killitsingaarpoq. Oqarpoq: “Guutip atia tusarnikuun­ngisaan­narpara.” Nangippoq: “Guutip piviusuunera aatsaavissuaq paasivara! Kinaassusilittut isigilerpara. Paasivara ikinngutitaarlunga.”

17. Sooq Jehovap atianik unnersiutigin­nittuarnissat aalajangiusimaviuk? (Aamma asseq takuuk).

¹⁷ Oqaluus­sininni ilinniar­titsininnilu ateq illernartoq – Jehova – oqaluttuarisarpiuk? Guutitta qanorpiaq ittuunera pillugu inuit ilinniar­tittarpigit? Taamaaliortaruit taassuma atia illernartoq unnersiutigalugulu inuit inuunerannik annaassissaatit. Illit kunngippit, Jiisusip Kristusip, siulersuinera malissavat. Pingaar­nertullu Ataatat asannittoq, Jehova, nuannaar­tissavat. Qanortoq ‘aqqa unnersiutigiuaruk naassaan­ngitsumik’! – Tuss 145:2.