អត្ថបទសិក្សា ៦
ចម្រៀងលេខ១០ ចូរសរសើរព្រះយេហូវ៉ាជាព្រះរបស់យើង!
«ចូរសរសើរដល់នាមព្រះយេហូវ៉ា»
«អស់អ្នកដែលបម្រើព្រះយេហូវ៉ាអើយ ចូរសរសើរលោក ចូរសរសើរដល់នាមព្រះយេហូវ៉ា»។—ចសព. ១១៣:១
ចំណុចផ្ដោត
ដើម្បីលើកបញ្ជាក់អំពីអ្វីដែលជំរុញចិត្តយើងឲ្យសរសើរនាមដ៏បរិសុទ្ធរបស់ព្រះយេហូវ៉ានៅគ្រប់ឱកាស។
១-២. តើអ្វីអាចជួយយើងឲ្យយល់អំពីអារម្មណ៍របស់ព្រះយេហូវ៉ាចំពោះការបង្កាច់បង្ខូចនាមរបស់លោក?
សូមស្រមៃគិតអំពីស្ថានភាពនេះ៖ បុគ្គលដែលអ្នកជិតស្និទ្ធនិយាយអ្វីអាក្រក់អំពីអ្នក។ អ្នកដឹងថានោះជាការកុហក ប៉ុន្តែអ្នកខ្លះជឿពាក្យនោះ។ អាក្រក់ជាងនេះទៅទៀត ពួកគេចាប់ផ្ដើមនិយាយពាក្យកុហកនោះតៗគ្នា ហើយមនុស្សជាច្រើននាក់ទៀតជឿពាក្យកុហកនោះដែរ។ តើអ្នកមានអារម្មណ៍យ៉ាងណា? បើអ្នកស្រឡាញ់មនុស្សនិងយកចិត្តទុកដាក់អំពីទស្សនៈរបស់ពួកគេចំពោះអ្នក ពាក្យបង្កាច់បង្ខូចនោះធ្វើឲ្យអ្នកឈឺចិត្ត មែនទេ?—សុភ. ២២:១
២ ស្ថានភាពនេះអាចជួយយើងឲ្យយល់អំពីអារម្មណ៍របស់ព្រះយេហូវ៉ាពេលកេរ្តិ៍ឈ្មោះរបស់លោកបានត្រូវបង្ខូច។ កូនម្នាក់របស់លោកនៅស្ថានសួគ៌បានកុហកអំពីលោកចំពោះស្ត្រីដំបូងគឺអេវ៉ា ហើយនាងបានជឿ។ ដោយសារពាក្យកុហកនោះ ឪពុកម្ដាយដំបូងរបស់យើងបានបះបោរប្រឆាំងនឹងព្រះយេហូវ៉ា។ ជាលទ្ធផល ភាពខុសឆ្គងនិងសេចក្ដីស្លាប់បានចូលក្នុងក្រុមគ្រួសារមនុស្សជាតិ។ (ដក. ៣:១-៦; រ៉ូម ៥:១២) បញ្ហាទាំងអស់ដែលយើងឃើញក្នុងពិភពលោក ពោលគឺសេចក្ដីស្លាប់ សង្គ្រាម និងទុក្ខវេទនាកើតឡើងដោយសារតែការកុហករបស់សាថានដែលវាបានចាប់ផ្ដើមនិយាយនៅក្នុងសួនអេដែន។ តើព្រះយេហូវ៉ាឈឺចិត្តដោយសារការបង្កាច់បង្ខូចបែបនេះនិងលទ្ធផលពីនោះឬទេ? លោកឈឺចិត្តមែន។ ប៉ុន្តែព្រះយេហូវ៉ាមិនគុំកួនឬខឹងងំឡើយ។ ផ្ទុយទៅវិញ លោកនៅតែជា«ព្រះដែលមានសេចក្ដីសប្បាយ»។—១ធី. ១:១១
៣. តើយើងមានឯកសិទ្ធិអ្វី?
៣ យើងមានឯកសិទ្ធិជួយជម្រះការតិះដៀលចំពោះនាមរបស់ព្រះយេហូវ៉ា ដោយធ្វើតាមបញ្ញត្តិនេះដែលថា៖ «ចូរសរសើរដល់នាមព្រះយេហូវ៉ា»។ (ចសព. ១១៣:១) យើងសរសើរនាមរបស់ព្រះយេហូវ៉ាពេលយើងនិយាយល្អៗអំពីលោក។ តើអ្នកនឹងសរសើរនាមរបស់ព្រះយេហូវ៉ាឬទេ? សូមយើងពិចារណាបំណងចិត្តដ៏ខ្លាំងបីដែលនឹងជួយយើងឲ្យសរសើរនាមរបស់ព្រះយើងយ៉ាងអស់ពីចិត្ត។
យើងធ្វើឲ្យព្រះយេហូវ៉ាពេញចិត្តពេលយើងសរសើរដល់នាមលោក
៤. ហេតុអ្វីការសរសើរពីយើងធ្វើឲ្យព្រះយេហូវ៉ាពេញចិត្ត? សូមលើកឧទាហរណ៍។ (សូមមើលរូបភាពផងដែរ)
៤ យើងធ្វើឲ្យបិតារបស់យើងនៅស្ថានសួគ៌ពេញចិត្តពេលយើងសរសើរដល់នាមរបស់លោក។ (ចសព. ១១៩:១០៨) ប៉ុន្តែ តើនេះមានន័យថាព្រះដែលមានឫទ្ធានុភាពខ្លាំងក្លាបំផុត គឺដូចមនុស្សមិនល្អឥតខ្ចោះដែលចង់បានការសរសើរ ដោយសារត្រូវការការលើកទឹកចិត្តឬ? មិនមែនទេ។ សូមគិតអំពីឧទាហរណ៍មួយ។ ក្មេងស្រីតូចម្នាក់រត់ទៅឱបឪពុកគាត់ ហើយនិយាយថា៖ «ប៉ាល្អជាងគេក្នុងលោក!»។ ឪពុកនោះញញឹមដោយក្ដីរីករាយជាខ្លាំង។ ហេតុអ្វី? គឺមិនមែនដោយសារគាត់ត្រូវការការលើកទឹកចិត្តនិងការសរសើរពីកូនស្រីរបស់គាត់ទេ។ ផ្ទុយទៅវិញ យើងយល់ថាគាត់ជាឪពុកដែលមានទំនុកចិត្ត ហើយសប្បាយរីករាយពេលឃើញកូនស្រីរបស់គាត់បង្ហាញសេចក្ដីស្រឡាញ់និងមានចិត្តកតញ្ញូ។ គាត់ដឹងថាគុណសម្បត្តិបែបនេះនឹងជួយកូនឲ្យមានសុភមង្គលកាលដែលនាងធំឡើង។ ស្រដៀងគ្នាដែរ ព្រះយេហូវ៉ាដែលជាបិតាដ៏ល្អប្រសើរបំផុត ពេញចិត្តពេលយើងសរសើរលោក។
ដូចឪពុកពេញចិត្តពេលកូនបង្ហាញសេចក្ដីស្រឡាញ់និងចិត្តកតញ្ញូ ព្រះយេហូវ៉ាពេញចិត្តពេលយើងសរសើរនាមរបស់លោក (សូមមើលវគ្គ៤)
៥. ដោយសរសើរនាមរបស់ព្រះ តើយើងអាចជួយបង្ហាញថាអ្វីគឺមិនពិត?
៥ ពេលយើងសរសើរបិតារបស់យើងនៅស្ថានសួគ៌ យើងជួយបង្ហាញថាការកុហកដែលជាប់ទាក់ទងនឹងយើងផ្ទាល់គឺមិនពិត។ សាថានអះអាងថាគ្មានមនុស្សជាតិណានឹងការពារនាមរបស់ព្រះយ៉ាងស្មោះភក្ដីទេ។ តាមទស្សនៈរបស់វា គ្មានយើងណាម្នាក់រក្សាចិត្តស្មោះឥតងាករេឡើយ។ វានិយាយថាយើងទាំងអស់គ្នានឹងបោះបង់ចោលព្រះ បើយើងគិតថាយើងនឹងទទួលប្រយោជន៍។ (យ៉ូប ១:៩-១១; ២:៤) ប៉ុន្តែ យ៉ូបបានរក្សាភាពស្មោះត្រង់ ហើយបានបង្ហាញថាសាថានជាអ្នកភូតភរ។ ចុះយ៉ាងណាអ្នកវិញ? យើងម្នាក់ៗមានឯកសិទ្ធិការពារនាមរបស់បិតាយើងយ៉ាងស្មោះភក្ដី ហើយធ្វើឲ្យលោកពេញចិត្តដោយបម្រើលោកយ៉ាងស្មោះត្រង់។ (សុភ. ២៧:១១) គឺពិតជាកិត្តិយសឲ្យធ្វើដូច្នេះមែន។
៦. តើយើងអាចយកតម្រាប់ស្ដេចដាវីឌនិងពួកលេវីយ៉ាងដូចម្ដេច? (នេហេមា ៩:៥)
៦ សេចក្ដីស្រឡាញ់ចំពោះព្រះជំរុញចិត្តមនុស្សស្មោះត្រង់ឲ្យសរសើរនាមលោកយ៉ាងអស់ពីចិត្ត។ ស្ដេចដាវីឌបានសរសេរថា៖ «ខ្ញុំសូមសរសើរព្រះយេហូវ៉ា ខ្ញុំសូមលើកតម្កើងនាមដ៏បរិសុទ្ធរបស់លោកយ៉ាងអស់ពីដួងចិត្ត»។ (ចសព. ១០៣:១) ដាវីឌដឹងថាពេលយើងសរសើរនាមរបស់ព្រះយេហូវ៉ា គឺយើងកំពុងសរសើរព្រះយេហូវ៉ាផ្ទាល់។ នាមរបស់ព្រះយេហូវ៉ារួមបញ្ចូលកេរ្តិ៍ឈ្មោះរបស់លោក ដូច្នេះនោះនាំឲ្យយើងគិតអំពីគុណសម្បត្តិដ៏ថ្លៃថ្លារបស់លោកនិងការប្រព្រឹត្តដ៏ល្អដែលលោកបានធ្វើ។ ដាវីឌចង់ធ្វើអ្វីដែលបង្ហាញថានាមរបស់បិតាគឺបរិសុទ្ធ ហើយសរសើរនាមនោះ។ គាត់ចង់ធ្វើដូច្នេះ«យ៉ាងអស់ពីដួងចិត្ត»។ ស្រដៀងគ្នាដែរ ពួកលេវីបាននាំមុខក្នុងការសរសើរព្រះយេហូវ៉ា។ ពួកគេបានសារភាពដោយចិត្តរាបទាបថា ពាក្យសរសើររបស់ពួកគេមិនល្អគ្រប់គ្រាន់ស្មើនឹងអ្វីដែលនាមដ៏ពិសិដ្ឋរបស់ព្រះយេហូវ៉ាសមនឹងទទួលទេ។ (សូមអាន នេហេមា ៩:៥) ច្បាស់ណាស់ ការសរសើរដែលបង្ហាញអំពីចិត្តរាបទាបនិងអស់ពីចិត្តបែបនេះបាននាំឲ្យចិត្តរបស់ព្រះយេហូវ៉ាអរសប្បាយ។
៧. តើយើងអាចសរសើរព្រះយេហូវ៉ាក្នុងកិច្ចបម្រើផ្សាយនិងក្នុងជីវិតប្រចាំថ្ងៃរបស់យើងតាមរបៀបណា?
៧ សព្វថ្ងៃនេះ យើងអាចធ្វើឲ្យព្រះយេហូវ៉ាពេញចិត្តដោយនិយាយអំពីលោកតាមរបៀបដែលបង្ហាញអារម្មណ៍កក់ក្ដៅ ចិត្តកតញ្ញូ និងក្ដីស្រឡាញ់។ ពេលយើងផ្សព្វផ្សាយ យើងចាំថាគោលបំណងសំខាន់ចម្បងរបស់យើង គឺទាញនាំមនុស្សឲ្យចូលទៅជិតព្រះយេហូវ៉ា និងជួយពួកគេឲ្យមានអារម្មណ៍ដូចយើងចំពោះបិតាជាទីស្រឡាញ់របស់យើង។ (យ៉ា. ៤:៨) យើងសប្បាយរីករាយបង្ហាញមនុស្សអំពីរបៀបដែលគម្ពីររៀបរាប់អំពីព្រះយេហូវ៉ា។ គម្ពីរបង្ហាញអំពីសេចក្ដីស្រឡាញ់ យុត្តិធម៌ ប្រាជ្ញា ឫទ្ធានុភាព និងគុណសម្បត្តិដ៏ថ្លៃថ្លាឯទៀតរបស់លោក។ យើងក៏សរសើរព្រះយេហូវ៉ានិងធ្វើឲ្យលោកពេញចិត្តដោយព្យាយាមយកតម្រាប់លោក។ (អេភ. ៥:១) ពេលយើងធ្វើដូច្នេះ អ្នកឯទៀតប្រហែលជាកត់សម្គាល់ថាយើងខុសពីមនុស្សក្នុងពិភពលោកដ៏អាក្រក់នេះ ហើយពួកគេប្រហែលជាឆ្ងល់អំពីមូលហេតុ។ (ម៉ាថ. ៥:១៤-១៦) កាលដែលយើងនិយាយជាមួយពួកគេក្នុងជីវិតប្រចាំថ្ងៃរបស់យើង យើងប្រហែលជាអាចពន្យល់ពួកគេថាហេតុអ្វីយើងប្រព្រឹត្តដូចនេះ។ ជាលទ្ធផល មនុស្សដែលមានចិត្តស្មោះចង់ចូលទៅជិតព្រះរបស់យើង។ ពេលយើងសរសើរព្រះយេហូវ៉ាតាមរបៀបទាំងនេះ យើងធ្វើឲ្យចិត្តលោកអរសប្បាយ។—១ធី. ២:៣, ៤
យើងនាំឲ្យលោកយេស៊ូពេញចិត្តពេលយើងសរសើរនាមព្រះយេហូវ៉ា
៨. តើលោកយេស៊ូបាននាំមុខយ៉ាងណាក្នុងការសរសើរនាមរបស់ព្រះយេហូវ៉ា?
៨ គ្មានបុគ្គលណានៅស្ថានសួគ៌ឬនៅផែនដីស្គាល់ព្រះយេហូវ៉ាច្បាស់ជាងលោកយេស៊ូទេ។ (ម៉ាថ. ១១:២៧) លោកយេស៊ូស្រឡាញ់បិតាលោក ហើយលោកបាននាំមុខក្នុងការសរសើរនាមរបស់ព្រះយេហូវ៉ា។ (យ៉ូន. ១៤:៣១) ក្នុងសេចក្ដីអធិដ្ឋានមួយទៅបិតារបស់លោកនៅយប់មុនលោកស្លាប់ លោកបានសង្ខេបអំពីកិច្ចបម្រើរបស់លោកនៅផែនដី ដោយមានប្រសាសន៍ថា៖ «ខ្ញុំបានបង្ហាញឲ្យពួកគាត់ស្គាល់នាមរបស់លោក»។ (យ៉ូន. ១៧:២៦) តើលោកចង់មានន័យយ៉ាងណា?
៩. តើលោកយេស៊ូបានប្រើឧទាហរណ៍អ្វីដើម្បីពន្យល់អំពីបិតារបស់លោកយ៉ាងច្បាស់?
៩ លោកយេស៊ូមិនគ្រាន់តែប្រាប់មនុស្សថានាមរបស់ព្រះគឺយេហូវ៉ាប៉ុណ្ណោះទេ។ ជនជាតិយូដាដែលលោកយេស៊ូបានបង្រៀន ស្គាល់នាមរបស់ព្រះរួចហើយ។ ប៉ុន្តែ លោកយេស៊ូបាននាំមុខក្នុងការធ្វើជា«អ្នកដែលបានពន្យល់អំពីលោក»។ (យ៉ូន. ១:១៧, ១៨) ជាឧទាហរណ៍ បទគម្ពីរភាសាហេប្រឺបង្ហាញថាព្រះយេហូវ៉ាជាព្រះនៃសេចក្ដីមេត្តាករុណានិងសេចក្ដីអាណិតអាសូរ។ (ដច. ៣៤:៥-៧) លោកយេស៊ូបានធ្វើឲ្យសេចក្ដីពិតនោះលេចធ្លោយ៉ាងច្បាស់ជាង ពេលដែលលោករៀបរាប់ឧទាហរណ៍អំពីកូនដែលវង្វេងបាត់និងឪពុករបស់គាត់។ កាលដែលយើងអានថាឪពុកនោះក្រឡេកទៅឃើញកូនដែលប្រែចិត្ត«ពេលដែលគាត់នៅឆ្ងាយនៅឡើយ» ឪពុកបានរត់ទៅជួបកូន ឱបកូន និងអភ័យទោសឲ្យកូនយ៉ាងអស់ពីដួងចិត្ត យើងឃើញច្បាស់ថាសេចក្ដីមេត្តាករុណានិងសេចក្ដីអាណិតអាសូររបស់ព្រះយេហូវ៉ាគឺខ្លាំងយ៉ាងណា។ (លូក. ១៥:១១-៣២) លោកយេស៊ូបានបើកបង្ហាញថាព្រះយេហូវ៉ាពិតជាបុគ្គលបែបណា។
១០. (ក) តើយើងដឹងយ៉ាងដូចម្ដេចថាលោកយេស៊ូបានប្រើនាមផ្ទាល់របស់បិតាលោក ហើយចង់ឲ្យអ្នកឯទៀតធ្វើដូច្នេះដែរ? (ម៉ាកុស ៥:១៩) (សូមមើលរូបភាពផងដែរ) (ខ) តើលោកយេស៊ូចង់ឲ្យយើងធ្វើអ្វីនៅសព្វថ្ងៃនេះ?
១០ តើលោកយេស៊ូក៏ចង់ឲ្យអ្នកឯទៀតប្រើនាមផ្ទាល់របស់បិតាលោកឬទេ? ច្បាស់ជាចង់។ អ្នកដឹកនាំសាសនាខ្លះប្រហែលជាបានជឿថាការហៅនាមរបស់ព្រះ គឺមិនបង្ហាញការគោរពទេ។ ប៉ុន្តែ លោកយេស៊ូមិនដែលឲ្យទំនៀមទម្លាប់បែបនេះដែលមិនមានមូលដ្ឋានលើគម្ពីររារាំងលោកពីការលើកកិត្តិយសនាមរបស់បិតាលោកទេ។ សូមគិតអំពីពេលដែលលោកធ្វើឲ្យបុរសម្នាក់ដែលមានវិញ្ញាណកំណាចចូលជាសះស្បើយនៅតំបន់កេរ៉ាសា។ បណ្ដាជនបានភ័យខ្លាច ហើយអង្វរលោកឲ្យចាកចេញពីតំបន់របស់ពួកគេ។ ដូច្នេះ លោកមិនបន្តនៅទីនោះទេ។ (ម៉ាក. ៥:១៦, ១៧) ប៉ុន្តែ លោកយេស៊ូចង់ឲ្យគេស្គាល់នាមរបស់ព្រះយេហូវ៉ានៅទីនោះ។ ហេតុនេះ លោកយេស៊ូបានប្រាប់បុរសដែលបានជាសះស្បើយនោះឲ្យប្រាប់បណ្ដាជនមិនមែនអំពីអ្វីដែលលោកបានធ្វើទេ តែអំពីអ្វីដែលព្រះយេហូវ៉ាបានធ្វើ។ (សូមអាន ម៉ាកុស ៥:១៩) a សព្វថ្ងៃនេះ លោកក៏ចង់ឲ្យយើងធ្វើដូច្នេះដែរ ពោលគឺធ្វើឲ្យគេស្គាល់នាមរបស់បិតាលោកនៅទូទាំងពិភពលោក! (ម៉ាថ. ២៤:១៤; ២៨:១៩, ២០) ពេលយើងធ្វើដូច្នេះ យើងធ្វើឲ្យលោកយេស៊ូដែលជាស្ដេចរបស់យើងពេញចិត្ត។
លោកយេស៊ូបានបង្គាប់បុរសដែលធ្លាប់មានវិញ្ញាណកំណាចចូលឲ្យប្រាប់បណ្ដាជនអំពីរបៀបដែលព្រះយេហូវ៉ាបានជួយគាត់ (សូមមើលវគ្គ១០)
១១. តើលោកយេស៊ូបានបង្រៀនអ្នកកាន់តាមលោកឲ្យអធិដ្ឋានអំពីអ្វី ហើយហេតុអ្វីនេះសំខាន់? (អេសេគាល ៣៦:២៣)
១១ លោកយេស៊ូដឹងថាគោលបំណងរបស់ព្រះយេហូវ៉ាគឺធ្វើឲ្យនាមរបស់លោកបានបរិសុទ្ធ ពោលគឺជម្រះអស់ទាំងការតិះដៀលចេញពីនាមនោះ។ ហេតុនេះហើយបានជាលោកម្ចាស់យេស៊ូបានបង្រៀនពួកអ្នកកាន់តាមលោកឲ្យអធិដ្ឋានថា៖ «ឱបិតារបស់យើងដែលនៅស្ថានសួគ៌អើយ សូមឲ្យនាមរបស់លោកបានបរិសុទ្ធ»។ (ម៉ាថ. ៦:៩) លោកយេស៊ូយល់ថានេះគឺជារឿងសំខាន់បំផុតដែលជាប់ទាក់ទងនឹងបុគ្គលគ្រប់រូប។ (សូមអាន អេសេគាល ៣៦:២៣) គ្មានបុគ្គលណាក្នុងសកលលោកនេះដែលបានធ្វើច្រើនជាងលោកយេស៊ូដើម្បីឲ្យនាមរបស់ព្រះយេហូវ៉ាបានបរិសុទ្ធទេ។ ប៉ុន្តែពេលលោកយេស៊ូបានត្រូវគេចាប់ខ្លួន តើពួកសត្រូវរបស់លោកបានចោទប្រកាន់លោកពីបទអ្វី? គឺពីបទជេរប្រមាថព្រះ! លោកយេស៊ូច្បាស់ជាដឹងថាការប្រមាថឬការបង្កាច់បង្ខូចនាមដ៏បរិសុទ្ធរបស់បិតាលោក គឺជាអំពើខុសឆ្គងដ៏អាក្រក់បំផុត។ លោកឈឺចិត្តខ្លាំងណាស់ដែលគេនឹងចោទប្រកាន់និងកាត់ក្ដីលោកចំពោះបទឧក្រិដ្ឋនេះ។ នេះប្រហែលជាមូលហេតុចម្បងមួយដែលលោកយេស៊ូ«កើតទុក្ខក្រៃលែង»នៅប៉ុន្មានម៉ោងមុនដែលលោកបានត្រូវគេចាប់ខ្លួន។—លូក. ២២:៤១-៤៤
១២. តើលោកយេស៊ូបានធ្វើឲ្យនាមរបស់បិតាលោកបានបរិសុទ្ធតាមរបៀបដ៏ធំជាងគេអ្វី?
១២ ដើម្បីធ្វើឲ្យនាមរបស់បិតាលោកបានបរិសុទ្ធ លោកយេស៊ូបានស៊ូទ្រាំនឹងការឈឺចាប់ ការប្រមាថ និងការបង្កាច់បង្ខូចសព្វបែបយ៉ាងដែលកើតមានមកលើលោក។ លោកដឹងថាលោកបានស្ដាប់បង្គាប់បិតាលោកក្នុងគ្រប់ការទាំងអស់ ហើយថាលោកគ្មានហេតុអាម៉ាស់ខ្មាសទាល់តែសោះ។ (ហេ. ១២:២) លោកក៏បានដឹងថាសាថានវាយប្រហារយ៉ាងចំៗមកលើលោកក្នុងគ្រាដ៏ពិបាកនោះ។ (លូក. ២២:២-៤; ២៣:៣៣, ៣៤) សាថានប្រាកដជាសង្ឃឹមថាវាអាចធ្វើឲ្យលោកយេស៊ូលែងមានចិត្តស្មោះឥតងាករេ ប៉ុន្តែសាថានបរាជ័យទាំងស្រុង! លោកយេស៊ូបានបង្ហាញយ៉ាងច្បាស់ថាសាថានគឺជាអ្នកភូតភរដ៏សាហាវ ហើយថាព្រះយេហូវ៉ាមានអ្នកបម្រើដ៏ស្មោះភក្ដីដែលរក្សាចិត្តស្មោះឥតងាករេ ទោះជាឆ្លងកាត់ការល្បងលដ៏ខ្លាំងបំផុតក្ដី!
១៣. តើអ្នកអាចធ្វើឲ្យស្ដេចដែលកំពុងគ្រងរាជ្យពេញចិត្តយ៉ាងដូចម្ដេច?
១៣ តើអ្នកចង់ធ្វើឲ្យស្ដេចរបស់អ្នកដែលកំពុងគ្រងរាជ្យពេញចិត្តឬទេ? បើដូច្នេះ សូមបន្តសរសើរដល់នាមរបស់ព្រះយេហូវ៉ា ដោយជួយអ្នកឯទៀតឲ្យដឹងថាព្រះរបស់យើងពិតជាព្រះបែបណា។ ពេលអ្នកធ្វើដូច្នេះ អ្នកកំពុងធ្វើតាមគំរូរបស់លោកយេស៊ូ។ (១ពេ. ២:២១) ដូចលោកយេស៊ូ អ្នកធ្វើឲ្យព្រះយេហូវ៉ាអរសប្បាយ ហើយអ្នកបង្ហាញថាសាថានដែលជាសត្រូវរបស់ព្រះយេហូវ៉ាគឺជាអ្នកភូតភរដ៏អាក្រក់!
យើងជួយសង្គ្រោះជីវិតមនុស្សពេលយើងសរសើរនាមរបស់ព្រះយេហូវ៉ា
១៤-១៥. តើមានអ្វីដ៏អស្ចារ្យអាចកើតឡើងពេលយើងបង្រៀនមនុស្សអំពីព្រះយេហូវ៉ា?
១៤ ពេលយើងសរសើរដល់នាមរបស់ព្រះយេហូវ៉ា យើងជួយសង្គ្រោះជីវិតអ្នកឯទៀត។ តើតាមរបៀបណា? សាថាន«បានធ្វើឲ្យគំនិតរបស់ពួកអ្នកមិនជឿទៅជាងងឹត»។ (២កូ. ៤:៤) ជាលទ្ធផល ពួកគេបានជឿពាក្យភូតភររបស់សាថានដូចជា គ្មានព្រះទេ ព្រះនៅឆ្ងាយពីយើង ហើយមិនយកចិត្តទុកដាក់ចំពោះមនុស្សជាតិ ព្រះគ្មានមេត្តា និងដាក់ទារុណកម្មអ្នកធ្វើខុសជារៀងរហូត។ ពាក្យភូតភរបែបនេះមានគោលបំណងតែមួយគត់ គឺគ្របបាំងឬបង្ខូចនាមនិងកេរ្តិ៍ឈ្មោះរបស់ព្រះយេហូវ៉ាដើម្បីឲ្យមនុស្សមិនចង់ចូលទៅជិតលោក។ ប៉ុន្តែ កិច្ចការរបស់យើងមិនឲ្យសាថានសម្រេចគោលបំណងរបស់វាបានទេ។ យើងបង្រៀនមនុស្សសេចក្ដីពិតអំពីបិតារបស់យើងដោយសរសើរនាមដ៏បរិសុទ្ធរបស់ព្រះយើង។ តើនេះមានលទ្ធផលអ្វី?
១៥ សេចក្ដីពិតពីបណ្ដាំព្រះមានឥទ្ធិពលដ៏ខ្លាំងក្លា។ ពេលយើងបង្រៀនមនុស្សអំពីព្រះយេហូវ៉ានិងគុណសម្បត្តិរបស់លោក យើងឃើញអ្វីដ៏អស្ចារ្យ។ មនុស្សលែងចាញ់បោកការភូតភររបស់សាថាន ហើយពួកគេអាចចាប់ផ្ដើមឃើញគុណសម្បត្តិដ៏ថ្លៃថ្លារបស់បិតាយើង។ ពួកគេមានការស្ញប់ស្ញែងចំពោះឫទ្ធានុភាពដែលគ្មានកម្រិតរបស់លោក។ (អេ. ៤០:២៦) ពួកគេរៀនទុកចិត្តលោកដោយសារយុត្តិធម៌ដ៏ល្អឥតខ្ចោះរបស់លោក។ (បច. ៣២:៤) ពួកគេរៀនច្រើនពីប្រាជ្ញាដ៏ធំធេងរបស់លោក។ (អេ. ៥៥:៩; រ៉ូម ១១:៣៣) ម្យ៉ាងទៀត ពួកគេទទួលការសម្រាលទុក្ខដោយរៀនថាលោកគឺជាសេចក្ដីស្រឡាញ់។ (១យ៉ូន. ៤:៨) កាលដែលពួកគេចូលទៅជិតព្រះយេហូវ៉ា សេចក្ដីសង្ឃឹមរបស់ពួកគេអំពីការរស់នៅជារៀងរហូតជាកូនរបស់លោក ទៅជាពិតប្រាកដចំពោះពួកគេ។ យើងមានឯកសិទ្ធិដ៏អស្ចារ្យដើម្បីជួយមនុស្សឲ្យចូលទៅជិតបិតានៅស្ថានសួគ៌! ពេលយើងធ្វើដូច្នេះ ព្រះយេហូវ៉ាចាត់ទុកយើងជា«អ្នករួមការងារ»ជាមួយនឹងលោក។—១កូ. ៣:៥, ៩
១៦. តើការស្គាល់នាមរបស់ព្រះមានឥទ្ធិពលយ៉ាងណាលើអ្នកខ្លះ? សូមលើកឧទាហរណ៍។
១៦ ដំបូង យើងប្រហែលជាបង្រៀនមនុស្សថានាមរបស់ព្រះគឺយេហូវ៉ា។ នេះអាចមានឥទ្ធិពលយ៉ាងខ្លាំងលើមនុស្សដែលមានចិត្តស្មោះ។ ជាឧទាហរណ៍ បងស្រីវ័យក្មេងម្នាក់ឈ្មោះអេលីអា bបានធំឡើងក្នុងក្រុមគ្រួសារដែលមិនធ្វើតាមគម្ពីរ។ ប៉ុន្តែ គាត់មិនសូវពេញចិត្តនឹងសាសនារបស់គាត់ ហើយក៏មិនមានអារម្មណ៍ជិតស្និទ្ធនឹងព្រះទេ។ នេះបានផ្លាស់ប្ដូរក្រោយពីគាត់បានចាប់ផ្ដើមរៀនគម្ពីរជាមួយសាក្សី។ គាត់បានចាប់ផ្ដើមចាត់ទុកព្រះជាមិត្តរបស់គាត់ ហើយបានភ្ញាក់ផ្អើលដោយរៀនថានាមរបស់ព្រះបានត្រូវគេដកចេញពីគម្ពីរជាច្រើន និងបានត្រូវជំនួសដោយឋានៈផ្សេងៗដូចជាព្រះជាម្ចាស់។ ការរៀនឲ្យស្គាល់នាមរបស់ព្រះយេហូវ៉ាបានផ្លាស់ប្ដូរជីវិតរបស់គាត់។ គាត់លាន់មាត់ថា៖ «មិត្តដ៏ល្អបំផុតរបស់ខ្ញុំមានឈ្មោះ!»។ តើនោះមានលទ្ធផលយ៉ាងណា? គាត់និយាយថា៖ «ខ្ញុំមានសេចក្ដីសុខសាន្តក្នុងចិត្តជាខ្លាំងឥឡូវនេះ ហើយមានអារម្មណ៍ថាជាពរដ៏ធំមួយដែលខ្ញុំស្គាល់នាមព្រះយេហូវ៉ា»។ បុរសម្នាក់ឈ្មោះស្ទេវជាតន្ត្រីករម្នាក់ ហើយធ្លាប់កាន់សាសនាយូដាដែលមានវិន័យតឹងរ៉ឹង។ គាត់មិនចង់ធ្វើជាសមាជិកសាសនាណាមួយ ដោយសារគាត់បានឃើញការពុតត្បុតជាច្រើន។ ប៉ុន្តែនៅគ្រាមួយដែលគាត់មានទុក្ខដោយសារម្ដាយស្លាប់ គាត់បានយល់ព្រមអង្គុយស្ដាប់ការបង្រៀនគម្ពីររបស់សាក្សីព្រះយេហូវ៉ា។ ការរៀនអំពីនាមរបស់ព្រះបានប៉ះពាល់ដល់ចិត្តគាត់យ៉ាងខ្លាំង។ គាត់និយាយថា៖ «ខ្ញុំមិនដែលរៀនអំពីនាមរបស់ព្រះទេ»។ គាត់បន្ថែមថា៖ «នេះជាលើកដំបូងដែលខ្ញុំយល់ថាមានព្រះមែន! ខ្ញុំយល់ថាលោកជាបុគ្គលម្នាក់ ហើយគឺពេលនោះដែលខ្ញុំដឹងថាខ្ញុំបានរកឃើញមិត្តម្នាក់»។
១៧. ហេតុអ្វីអ្នកតាំងចិត្តបន្ដសរសើរនាមព្រះយេហូវ៉ា? (សូមមើលរូបភាពផងដែរ)
១៧ ពេលអ្នកផ្សព្វផ្សាយនិងបង្រៀនគេ តើអ្នកប្រាប់ពួកគេអំពីនាមដ៏ពិសិដ្ឋរបស់ព្រះយេហូវ៉ាឬទេ? តើអ្នកជួយពួកគេឲ្យឃើញថាព្រះរបស់យើងគឺពិតជាព្រះបែបណាឬទេ? ដោយធ្វើដូច្នេះ អ្នកសរសើរនាមរបស់ព្រះ។ សូមអ្នកបន្ដសរសើរដល់នាមដ៏បរិសុទ្ធរបស់ព្រះយេហូវ៉ាដោយជួយមនុស្សឲ្យស្គាល់ថាលោកពិតជាបុគ្គលបែបណា។ យ៉ាងនេះ អ្នកនឹងសង្គ្រោះជីវិតមនុស្ស។ អ្នកនឹងធ្វើតាមការដឹកនាំរបស់លោកយេស៊ូគ្រិស្តដែលជាស្ដេចរបស់អ្នក ហើយសំខាន់បំផុត អ្នកនឹងធ្វើឲ្យព្រះយេហូវ៉ាដែលជាបិតាអ្នកដែលប្រកបដោយសេចក្ដីស្រឡាញ់ពេញចិត្ត។ សូមអ្នក«សរសើរនាមរបស់លោករហូតតទៅ»!—ចសព. ១៤៥:២
យើងសរសើរនាមរបស់ព្រះយេហូវ៉ាដោយបង្រៀនមនុស្សអំពីនាមនោះហើយបង្ហាញពួកគេថាព្រះយេហូវ៉ាជាព្រះបែបណា (សូមមើលវគ្គ១៧)
តើតាមរបៀបណាការសរសើរនាមរបស់ព្រះ . . .
-
នាំឲ្យព្រះយេហូវ៉ាពេញចិត្ត?
-
នាំឲ្យលោកយេស៊ូគ្រិស្តពេញចិត្ត?
-
សង្គ្រោះជីវិតមនុស្ស?
ចម្រៀងលេខ២ នាមលោកគឺយេហូវ៉ា
