1-2. Ihi itukwatekesa kutendela kyebhi kyadivu Jihova mukonda dya makutu azwela yalungu ni mwene?

 XINGANEKA kwila muthu uwamuzolo kyavulu uzwela kima kyayibha kinene kyalungu n’eye. Eye wejiya kwila o yazwela mwene ki kidi; maji ne kiki, amoxi axikina mu makutu enya. Phala kubhonzesa dingi o ima, o athu enya a mateka kumwanga o makutu, anga athu amukwa a axikina we. Kyebhi ki weji divwa? Se eye uthandanganya kyavulu ni ima izwela o athu, anga uthandanganya we ni dijina dye dyambote dyoxidise, o makutu enya anda kubhangesa kudivwa kyayibha, kikyene?—Jisa. 22:1.

² O kifika kiki kitukwatekesa kutendela kyebhi kyadivu Jihova kyoso kyaxidisa o dijina dye. Umoxi ku an’e ku dyulu wazwela makutu alungu ni mwene kwa muhatu wa dyanga, Eva. Mwene waxikina mu makutu a mutangela. O makutu enyo, abhangesa o jitata jetu ja dyanga, Adá ni Eva, kubhukumukina Jihova. Mukonda dya kiki, o kituxi ni kalunga a bokona mu ngongo. (Dim. 3:​1-6; Lom. 5:12) O maka oso ene mu ngongo lelu, kala o kufwa, ita, ni hadi, yeza mukonda dya makutu a tange Satanaji mu njaludim ya Edene. O kwila Jihova wadivu kyayibha mukonda dya makutu a Satanaji ni ibhidi yoso ya bheka o makutu enya? Se phata, wadivu kyayibha. Ne kiki, Jihova kakituka muthu wayibha, mba mukwa njinda. Mu veji dya kiki, mwene wa suluka mu kukala o “Nzambi ya sanguluka.”—1 Ti. 1:11.

3. Kyebhi ki tutena kulondekesa kwila Satanaji wazwela makutu alungu ni Nzambi?

³ Tutena kukwatekesa kulondekesa kwila Satanaji wazwela makutu alungu ni Nzambi. Tutena kubhanga kiki mu kubelesela o kitumu: “Ximanenu dijina dya Jihova.” (Jisá. 113:1) Etu tu ximana Jihova kyoso ki tuzwela o kidi kyalungu ni mwene ku akwetu. O kwila eye wanda ximana o dijina dya Jihova? Twanda dilonga ima itatu yanda tukwatekesa kuximana o dijina dya Nzambi yetu ni muxima woso.

 TUSANGULUKISA JIHOVA KYOSO KI TUXIMANA O DIJINA DYE

4. Mukonda dyahi o kiximanu kyetu kisangulukisa Jihova? Ta kifika. (Tala we ofoto.)

⁴ Etu tu sangulukisa Tata yetu ya dyulu kyoso ki tuximana o dijina dye. (Jisá. 119:108) O kwila kiki kilombolola kwila, o Nzambi Muteni a Yoso, wedi kala o athu akwa ituxi, amesena kwila akwa a aximana mukonda abhindamena ku a swinisa? Kana. Tute kifika. Xinganeka kakilumba uya ni kulenga kwa tat’e, umubhubhala anga uzwela, “Éye u tata ya beta kota mu ngongo!” O tata wolela anga usanguluka kyavulu. Mukonda dyahi? O kwila tweji xinganeka kwila o diyala didi wabhingi kumuximana kwa mon’e phala kudivwa kyambote ni kusanguluka? Kana, ki kyene. Muveji dya kiki, o tata wazolo mon’e, yu wasanguluka mukonda o mona wa mulondekesa henda ni kisakidilu kwa mwene. Mwene wejiya kwila o mon’e kyoso kyandaya ni kukula wanda sanguluka mukonda wene mulondekesa henda ni kisakidilu. Kyene kimoxi we, Jihova, o Tata ya betakota, usanguluka kyoso ki tumuximana.

5. Makutu ebhi ututungununa kyoso ki tuximana o dijina dya Nzambi?

⁵ Kyoso ki tuximana o tata yetu ya dyulu, tukwatekesa kulondekesa kwila, o ima yazwela Satanaji yalungu n’etu, makutu. Satanaji wambe kwila, seku muthu wanda tena kuzokela o dijina dya Nzambi ni ufiyele woso. Seku muthu wanda suluka mu kukala fiyele kwa Nzambi se udibhana ni ibhidi. Mwene wambe we kwila tweji bhukumukina Nzambi se tumona kwila, mu kubhanga kiki, tweji katula-ku mbote. (Jobe 1:​9-11; 2:4) Maji Jobe walondekesa ni ufiyele woso kwila, Satanaji mukwa makutu. O kwila eye we wanda kala fiyele kwa Nzambi? Kala muthu mudyetu wala ni ujitu wakuzokela o dijina dya Tat’etu ni ku musangulukisa mu kumusidivila ni ufiyele woso. (Jisa. 27:11) Ujitu wadikota kubhanga kiki!

6. Kyebhi ki tutena kukayela o phangu ya sobha Davidi ni ya Jilevita? (Nehemiya 9:5)

⁶ O athu azolo Jihova aximana o dijina dye ni muxima woso. Sobha Davidi wasoneka: “Tanesa Jihova, muxima wami; yoso ya ngi kala moxi itanesa dijina dye dikola.” (Jisá. 103:1) Davidi wejidile kwila, o kuximana o dijina dya Jihova kyene kimoxi ni kuximana Jihova wavu o dijina didi. Kyoso ki twivwa o dijina dya Jihova tuxinganeka ku ukexilu we, o idifwa ye yambote ni ikalakalu ye ya madiwanu. Davidi wamesenene kutalatala o dijina dya Tat’e kala dikola ni kudiximana. Mwene wamesenene kubhanga kiki ni muxima we woso. Kyene kimoxi we, o Jilevita exile mubhana phangu ku akwa yalungu ni kuximana Jihova. Ni kulenduka kwoso, ene axikinine kwila, seku izwelu yeji jimbulula kyambote o kiximanu kyatokala kubhana ku dijina  dya Jihova. (Tanga Nehemiya 9:5.) Se phata, o kulenduka kuku kwabhekela kisangusangu ku muxima wa Jihova.

7. Kyebhi ki tuximana Jihova mu kuboka ni mu kudibhana ni athu mu kizuwa ni kizuwa?

⁷ Lelu, tutena kusangulukisa Jihova mu kuzwela yalungu ni mwene mu ukexilu ulondekesa kwila tumusakidila kyavulu ni kwila, twamuzolo we kyavulu. Kyoso ki twamuboka, o mbambe yetu o kukwatekesa o athu kuzukama kwa Jihova mu ku akwatekesa kumona o Tata yetu ya kazola, kala kitwene mu mumona etu. (Tiy. 4:8) Tusanguluka kyavulu mu kulondekesa ku athu o ima izwela o Bibidya yalungu ni Jihova, o henda ye, o kuyuka kwe, o unjimu we, o kutena kwe ni idifwa yamukwa. Etu we tuximana Jihova ni kumusangulukisa mu kubhanga yoso itutena phala kukayela o phangu yê. (Efe. 5:1) Kyoso ki tubhanga kiki, akwetu atena kumona kwila, o ukexilu wetu kiwadifu ni wa athu amukwa ku mundu yu wayibha. (Mat. 5:​14-16) Kyoso kituya ni kudibhana nawu mu kizuwa ni kizuwa, nange tutena kukala ni kithangana kya ku ajimbulwila se mukonda dyahi etu twala ni ukexilu yu. Kiki kibhangesa o athu ala ni mixima yambote kuzukama kwa Nzambi yetu. Kyoso ki tuximana Jihova mu maukexilu ya, tusangulukisa o muxima wê.—1 Ti. 2:​3, 4.

TUSANGULUKISA JEZÚ KYOSO KI TUXIMANA O DIJINA DYA JIHOVA

8. Kyebhi Jezú kyabhana phangu mu kuximana o dijina dya Jihova?

⁸ Seku muthu kikale ku dyulu mba mu ixi wabetakota mu kwijiya Jihova, Jezú ndenge. (Mat. 11:27) Jezú wazolo Tat’e. Mwene ubhana phangu mu kuximana o dijina dya Jihova. (Nzw. 14:31) Mu musambu wabhange kwa Tat’e mu usuku ande dya kufwa, Jezú wajimbulula o kikalakalu kya bhange mu ixi mu kuzwela: “Eme nga ejidisa o dijina dyé.” (Nzw. 17:26) Ihi ya mesenene kuzwela Jezú?

9. Musoso webhi watange Jezú phala kujimbulula o ukexilu wa Tat’e?

⁹ Jezú katangela ngo o athu kwila o dijina dya Nzambi, Jihova. Mukonda o Jijudé exile mu a longa kwa Jezú ejidile kya o dijina dya Nzambi. Maji Jezú “mwéne wa a londekesa-Nê,” kifwa wa akwatekesa kutendela se Nzambi nanyi. (Nzw. 1:​17, 18) Mu kifika, o Mikanda ya Hebalayiku ilondekesa kwila Jihova, Nzambi ya jihenda ni kwila mukwa kuloloka. (Mak. 34:​5-7) Jezú walondekesa kyambote o kidi kiki kyoso kyatange o musoso wa tata ni mon’e wa jimbidile. Mu kutanga yalungu ni tata wamono mon’e “kyoso mwene kyakexile hanji dikanga,” yu wayi ni kulenga phala kudisanga ne, wamundwakuna yu wamuloloka ni muxima woso, kiki kitukwatekesa kutendela kyambote o henda ni ukexilu wa kuloloka wa Jihova. (Luk. 15:​11-32) Jezú wakwatekesa akwa kutendela se Jihova nanyi.

10. (a) Kyebhi kitwejiya kwila Jezú wexile mutumbula o dijina dya Tat’e, yu wamesenene we kwila akwa atumbula o dijina didi? (Máluku 5:19) (Tala we ofoto) (b) Jezú wamesena kwila etu tubhanga ihi lelu?

¹⁰ O kwila Jezú wamesenene kuma o athu amukwa atumbula we o dijina dya Tat’e? Kyene mwene. Sayi atwameni a jingeleja, nange axikinine kwila o kutumbula o dijina dya Nzambi, kulombolola kukamba kumuxila. Maji Jezú kehela kwila o ixinganeku yiyi ki yatundu mu Bibidya, imufidisa kujingisa o dijina dya Tat’e. Xinganeka mu kithangana kyoso Jezú kyasakele o diyala dyexile ni dimonyo mu mbanza ya Jelaze. Mu kumona o madiwanu enyo, o athu exile ni woma wavulu. Kyenyiki adyondo kwa Jezú phala kutunda. Mukonda dya kiki Jezú katokalele dingi kukala mu kididi kyokyo. (Mál. 5:​16, 17) Ne kiki, Jezú wamesenene kwila o athu mu kididi kyenyokyo ejiya o dijina dya Nzambi. Kyenyiki, watendelesa o diyala dya sakele phala kutangela o athu, kana o kima kyabhangele  mwene Jezú, maji o ima yamubhangele Jihova. (Tanga Máluku 5:19.) a Kyene kimoxi we lelu—mwene wamesena kwila etu twijidisa we o dijina dya Tat’e mu ngongo yoso! (Mat. 24:14; 28:​19, 20) Kyoso ki tubhanga kiki, tusangulukisa o muxima wa Sobha yetu, Jezú.

11. Jezú walongo o akayedi’e kusamba yalungu ni ihi, ni mukonda dyahi kima kyambote kubhanga kiki? (Izekiyele 36:23)

¹¹ Jezú wejidile kwila o vondadi ya Tat’e, o kuzelesa o dijina dye ku makutu oso ene muzwela yalungu ni mwene. Kiki kyene kyabhangesa Mesene yetu, kulonga o akayedi’e kusamba: “Tat’etu wene mu dyulu dijina dyé adizelese.” (Mat. 6:9) Jezú wejidile kwila, ya ene o maka abeta dingi kota amudibhana nawu o athu oso, kikale ku dyulu mba mu ixi. (Tanga Izekiyele 36:23.) Seku muthu mu ngongo wazelesa o dijina dya Jihova kala kyabhange Jezú. Maji ne kiki, kyoso Jezú kyamwambata phala kumukuta, kituxi kyahi kyamutatela o jinguma je? Amutatela kwila waxongwena Nzambi! Se phata, phala Jezú o kuxongwena o dijina dya Tat’e kyexile kituxi kyonene. Mwene waluwalele kyavulu mu kumutatela ni kumubalakala mukonda dya kikuma kiki. Kiki kyene kyabhangesa Jezú kukala ni “kikote kyadikota” mu ji ola ande dya kumukuta.—Luk. 22:​41-44.

12. Kyebhi Jezú kyazelesa o dijina dya Tat’e mu ukexilu wa katunda?

¹² Phala kuzokela o dijina dya Tat’e, Jezú wabhitile mu ima yavulu yayibha kala o kumubeta, kumuxongwena ni kumutatela. Mwene wejidile kwila wabelesele Tat’e mu ima yoso; mwene we kabhingile kukala ni jisonyi ja kima kyoso-kyoso. (Jih. 12:2) Mwene wejidile we kwila Satanaji wexile mumuzukutisa mu kithangana kyenyokyo kya ibhidi. (Luk. 22:​2-4; 23:​33, 34) Se phata Satanaji wamesenene kwila Jezú uzoza mu kulondekesa o ufiyele we kwa Jihova; maji Satanaji walweza! Jezú walondekesa ni kidi kyoso kwila Satanaji mukwa makutu ni kwila, Jihova wala ni jiselevende ja fiyele, atena kusuluka mu kumubheza ne mwene mu kudibhana ni ibhidi yonene!

13. Kyebhi ki utena kusangulukisa o Sobha ye Jezú?

¹³ O kwila eye wamesena kusangulukisa o Sobha ye, Jezú? Suluka mu kuximana o dijina dya Jihova, mu kukwatekesa akwenu kudilonga  yalungu ni idifwa ya katunda ya Nzambi yetu. Mu kubhanga kiki, eye wamukayela o phangu ya Jezú. (1 Ph. 2:21) Kala Jezú, eye wamusangulukisa o muxima wa Jihova, ni kulondekesa kwila o nguma Ye, Satanaji, mukwa makutu, wakambe o sonyi!

KYOSO KITUXIMANA O DIJINA DYA JIHOVA TUKWATEKESA KUBHULULA MYENYU

14-15. Ima yahi ya katunda yene mubhita kyoso ki tulonga o athu yalungu ni Jihova?

¹⁴ Kyoso kituximana o dijina dya Jihova tukwatekesa kubhulula myenyu. Kyebhi? Satanaji wene musweka ‘o ilunji ya yo akambe kixikanu mwavundu.’ (2 Ko. 4:4) Kiki kyene mu abhangesa kuxikina mu makutu a Satanaji kala ya: Ki kwene Nzambi, Nzambi wala dikanga, mwene kene musuwa o athu, Nzambi muthu wayibha, ni kwila uzukutisa o athu abhanga imbamba yayibha kate ku hadya ni hadya. Satanaji wene mutanga o amakutu enya, mukonda wamesena kuxidisa o dijina dyambote dya Jihova ni kubhangesa kwila o athu kakale ni vondadi ya kumuzukama. Maji kyoso ki tuboka, etu tufidisa o ndunge yiyi ya Dyabhu. Etu tulonga ku athu o kidi kyalungu ni Tat’etu. Mu kubhanga kiki, tuximana o dijina dikola dya Nzambi yetu. Kiki kyene mubhekela ihi?

¹⁵ O kidi kya Mak’a Nzambi kyala ni kutena kwavulu. Mu kulonga o athu yalungu ni Jihova ni idifwa ye yoso, twene mumona ima yakatunda kubhita ku myenyu ya. O athu kene mu akwata dingi ku makutu a Satanaji, ene mutena kumona o idifwa ya Tat’etu. Ene adiwana mu kumona o kutena kwa Nzambi kikwene dizubhilu. (Iza. 40:26) Ene adilonga kumudyelela mukonda dya kuyuka kwe. (Mate. 32:4) Ene akatula mbote yavulu mu unjimu wa Nzambi. (Iza. 55:9; Lom. 11:33) Ene asanga kuswina mu kudilonga kwila Nzambi henda. (1 Nz. 4:8) Adivwa kwila ana a kazola a Nzambi, ni kwila anda tambula mwenyu wa kalelaku. Ujitu wadikota phala etu kukwatekesa o athu kuzukama kwa Tata ya! Mu kubhanga kiki, Nzambi utumona kwila twa “mu kalakala kumoxi” ni mwene.—1 Ko. 3:​5, 9.

16. Kyebhi kidivwa amoxi kyoso kyadilonga o dijina dya Nzambi? Bhana phangu.

¹⁶ Ku dimatekenu, tutena ngo kulonga ku athu kwila o dijina dya Nzambi Jihova. Kiki  kitena kulungulula o mwenyu wa muthu wala ni muxima wambote. Mu kifika, sayi muhatu amwixana Lina b o mwiji wê katokalele mu ngeleja ya Jikidistá. Mwene kasangulukile ni ngeleja ye, kexile we mudivwa kwila wexile ni ukamba wambote ni Nzambi. Maji kiki kyalunguluka kyoso kyamateka kudilonga o Bibidya ni Jimbangi ja Jihova. Mwene wamateka kumona Nzambi kala Kamba dye. Mwene wadiwana mu kwijiya kwila o dijina dya Nzambi adikatula mu jibibiya javulu, ya adibhinganesa ni majina a ujitu kala Ngana. O kudilonga kwila o dijina dya Nzambi Jihova, kwalungulula o mwenyu we. Ni kisangusangu kyoso, mwene wambe: “Kamba dyami dya betakota wala ni dijina!” Ihi yabhiti? Mwene wambe: “Kindala eme ngala ni kutululuka kwavulu ku muxima. Ngidiwa kwila ngala ni valolo yavulu.” Sayi diyala amwixana Seba, wakulu mu kukayela o ijila ya Jijudé. Mwene kamesenene dingi kubhanga mbandu ya ngeleja yoso-yoso mukonda dya mangonya avulu exile mumona-mu. Maji kyoso mani’a kyafu, mwene waxikina kudilonga o Bibidya ni Mbangi ya Jihova. O kudilonga o dijina dya Nzambi kyamutula ku muxima. Mwene wambe: “Eme nuka ngadilongele kwila Nzambi wala ni dijina.” Mu kusuluka wambe dingi: “Yiyi yexile o veji yami yadyanga, ingatendela kwila Nzambi muthu wa kidi! Bhenyobho ngamono kwila ngasange Dikamba.”

17. Mukonda dyahi wamesena kukolokota mu kuximana o dijina dya Jihova? (Tala we ofoto.)

¹⁷ Mu kikalakalu kye kya kuboka ni kulonga, o kwila wene muzwela ni athu yalungu ni dijina dikola dya Jihova? O kwila wene mu akwatekesa kumona o idifwa ya Nzambi yetu? Mu kubhanga kiki, eye wa muximana o dijina dya Nzambi. Kyenyiki, suluka mu kuximana o dijina dikola dya Nzambi mu kukwatekesa o athu kwijiya o Muthu wavu o dijina didi. Mu kubhanga kiki, eye wanda bhulula myenyu ya athu, wanda kayela o phangu ya Sobha yetu Jezú Kidistu. O kya beta dingi kota, wanda sangulukisa o Tata yetu ya henda, Jihova. Mu kiki-phe, ‘ximana jinga o dijina [dya Jihova], kate ku hadya ni hadya.’—Jisá. 145:2.