1-2. Чь дькарә али мә бькә кӧ фәʹм бькьн, ԝәки Йаһоԝа чь сәр хԝә тʹәхмин кьр гава наве ԝи һатә хьрабкьрьне?

 БЬДӘ бәр чʹәʹве хԝә кӧ һәваләки тә дәрһәԛа тә тьштәки хьраб готийә. Тӧ зани кӧ әв йәк дәрәԝ ә, ле һьнә кәс ве йәке баԝәр дькьн. Һе хьраб әԝ ә, кӧ әԝ кәс жи ве дәрәԝийе һе зедә бәла дькьн, у гәләкед дьн жи ве йәке баԝәр дькьн. Гәло тӧйе әʹщьз нәби жь бо ԝе йәке, кӧ наве тә һатийә хьрабкьрьне у мәрьв дәрһәԛа тә хьраб дьфькьрьн? (Мәтʹәлок 22:1)

² Әв мәсәлә али мә дькә әм фәʹм бькьн, кӧ гава наве Йаһоԝа һатә хьрабкьрьне, әԝи чь сәр хԝә тʹәхмин кьр. Мәләкәки Һеԝайерʹа, жьна пешьнрʹа, дәрһәԛа Хԝәде тьште дәрәԝ гот, у әԝе жи ԝи баԝәр кьр. Жь бо ве дәрәԝе, Адәм у Һеԝа мьԛабьли Хԝәде дәркʹәтьн. Ӧса гӧнә у мьрьн дәрбази сәр һʹәму мәрьва бун (Дәстпебун 3:1-6; Рʹомайи 5:12). Бәле, жь бо дәрәԝийа Мире-щьна, шәрʹ, мьрьн у һʹәму кӧл-дәрд дьнйайеда бәла бунә. Бе шьк, сәва ве йәке дьле Йаһоԝа гәләк дешә. Ле диса жи, дьле ԝи бь һерс у кʹине тʹьжә нәбуйә, чьмки әԝ тʹьме «Хԝәдайе хԝәзьли» йә (1 Тимотʹейо 1:11).

3. Әм чаԝа дькарьн избат кьн, ԝәки гьлийе Мире-щьна дәрәԝ ьн?

³ Сәва кӧ әм жи избат кьн, ԝәки Мире-щьна бӧхдан авитийә Йаһоԝа, гәрәке әм гӧһ бьдьнә ве тʹәмийе: «Пәсьне наве Хӧдан бьдьн» (Зәбур 113:1). Гава әм дәрһәԛа Хԝәде рʹастийе дьбежьн, әм пәсьне наве ԝи  дьдьн. Тӧ жи дьхԝази пәсьне наве Йаһоԝа бьди? Ԝәрә әм дина хԝә бьдьнә се тьштед фәрз, йед кӧ дькарьн али мә бькьн кӧ әм бь дьл у щан пәсьне наве Йаһоԝа бьдьн.

ГАВА ӘМ ПӘСЬНЕ НАВЕ ЙАҺОԜА ДЬДЬН, ӘМ ДЬЛЕ ԜИ ША ДЬКЬН

4. Гава әм пәсьне наве Йаһоԝа дьдьн, чьма дьле ԝи ша дьбә? Мәсәле бинә. (Бьньһерʹә ӧса жи шькьл.)

⁴ Гава әм пәсьне наве Йаһоԝа дьдьн, әм дьле ԝи ша дькьн (Зәбур 119:108). Мәрьвед гӧнәкʹар дьхԝазьн, ԝәки кәсед дьн пәсьне ԝан бьдьн, чьмки әԝана жь ве йәке мерхасийе дьстиньн. Гәло Хԝәде жи мина ԝан һʹәԝще пәсьна йә? Һьлбәт на. Һәла дәрһәԛа ве мәсәле бьфькьрә: Кәчʹькәкә бьчʹук дьчә бал баве хԝә, ԝи һʹәмез дькә у дьбежә: «Тʹәмамийа дьнйайеда, тӧ бавәки лапи баш и!» Бав гәләк ша дьбә. Чьрʹа? Гәло әԝ бав һʹәԝще пәсьне ԛиза хԝә йә? На. Диса жи, дьле ԝи ша дьбә, чьмки әԝ дьвинә кӧ ԛиза ԝи же һʹәз дькә, ԛәдьре ԝи дьгьрә, у жь ԝи рʹази йә. Ӧса жи бав занә кӧ һʹӧнӧред ӧса, ча һʹәзкьрьн у шекьрдари ԝе али ԛиза ԝи бькьн, кӧ әԝ чахе мәзьн бә жи бәхтәԝар бә. Мина ве йәке, Йаһоԝа Баве мәйи һәри баш, гәләк ша дьбә гава әм пәсьне ԝи дьдьн.

5. Гава әм пәсьне Йаһоԝа дьдьн, әм кʹижан дәрәԝа Мире-щьна әшкәрә дькьн?

⁵ Гава әм пәсьне Баве хԝәйи әʹзмана дьдьн, әм избат дькьн кӧ Мире-щьна дәрәԝин ә. Мире-щьна дьбежә кӧ һәрге әм бькʹәвьнә тәнгасийе, әме Хԝәдерʹа амьн нәминьн. Хенщи ве йәке, әԝ дьбежә кӧ әм тʹәне бона кʹара хԝә Йаһоԝарʹа хьзмәт дькьн (Ибо 1:9-11; 2:4). Ле Ибо амьн ма Йаһоԝарʹа у избат кьр, кӧ Мире-щьна дәрәԝин ә. Тӧ жи дьхԝази Йаһоԝарʹа амьн бьмини? Әм гьшк жи дькарьн бь кьред хԝә наве Хԝәде пироз кьн, бь амьни ԝирʹа хьзмәт кьн у ӧса дьле ԝи ша кьн (Мәтʹәлок 27:11). Ԛәдьрәки чьԛас мәзьн ә!

6. Әм чаԝа дькарьн чʹәʹв бьдьнә Даԝьд Пʹадша у Леԝийа? (Нәһәмийа 9:5)

⁶ Әԝед кӧ Йаһоԝа һʹәз дькьн, бь дьл у щан дьхԝазьн пәсьне наве ԝи бьдьн. Даԝьд Пʹадша ӧса готийә: «Әй щане мьн, Хӧдан пироз кә! Пәсьне наве ԝи йе пироз бьдә, әй һʹәму һәбуна мьн!» (Зәбур 103:1, ИМ) Даԝьд заньбу кӧ гава мәрьв пәсьне наве Йаһоԝа дьдә, әԝ бь рʹасти пәсьне Йаһоԝа дьдә. Чахе әм наве Йаһоԝа дьбьһен, һьнге хәйсәт, һʹӧнӧр у кьред ԝи тенә бәр чʹәʹве мә. Даԝьд дьхԝәст бь «һʹәму һәбуна» хԝә, демәк бь тʹәмамийа дьле хԝә пәсьне наве  Хԝәде бьдә у ԝи пироз кә. Бона Леԝийа жи пирозкьрьна наве Йаһоԝа тьштәки зәʹф фәрз бу. Ԝана бь мьлукти фәʹм дькьр, кӧ ԝе нькарьбьн тʹәне пе гьлийа бь тʹәмами пәсьне наве Йаһоԝа бьдьн (Бьхунә Нәһәмийа 9:5). Бе шьк, дьле Йаһоԝа гәләк ша дьбу, гава ԝана бь дьл-щан у мьлукти пәсьн дьданә ԝи.

7. Әм чаԝа дькарьн жийин у хьзмәтийа хԝәда пәсьне Йаһоԝа бьдьн?

⁷ Чахе әм хәбәрданеда мәрьварʹа дьдьнә кʹьфше, кӧ әм чьԛас Йаһоԝа һʹәз дькьн у ԝирʹа шекьрдар ьн, ӧса әм дьле ԝи ша дькьн. Гава әм хьзмәт дькьн, нета мәйә сәрәкә әԝ ә, кӧ әм али мәрьва бькьн, ԝәки әԝана жи незики Йаһоԝа бьн (Аԛуб 4:8). Әм гәләк һʹәз дькьн пе Кʹьтеба Пироз мәрьварʹа әʹйан кьн, кӧ Йаһоԝа йәки чаԝа йә, у әм ԝанрʹа дәрһәԛа һʹәзкьрьн, һәԛи, билани у ԛәԝата ԝи гьли дькьн. Ӧса жи, әм һьнге пәсьне Йаһоԝа дьдьн у дьле ԝи ша дькьн, гава чʹәʹв дьдьнә ԝи (Әфәси 5:1). Чахе әм ӧса дькьн, мәрьв дьвиньн, ԝәки әм жь мәрьвед ве дьнйа хьраб, щӧдә дьбьн (Мәтта 5:14-16). Чахе әм жийина һәррʹожида тʹәви мәрьва хәбәр дьдьн, әм дькарьн ԝанрʹа зәлал кьн, кӧ әм чьма ль гора Кʹьтеба Пироз дьжин. Әв йәк дькарә али мәрьвед дьлсах бькә, кӧ незики Йаһоԝа бьн. Гава әм ви щурʹәйи пәсьне Йаһоԝа дьдьн, дьле ԝи ша дьбә (1 Тимотʹейо 2:3, 4).

ГАВА ӘМ ПӘСЬНЕ НАВЕ ЙАҺОԜА ДЬДЬН, ӘМ ДЬЛЕ ИСА ША ДЬКЬН

8. Иса чаԝа пәсьне наве Йаһоԝа дайә?

⁸ Сәр әʹрде у әʹзмана, кәсе кӧ гәләк баш Йаһоԝа нас дькә, әв Кӧрʹе ԝи йә (Мәтта 11:27). Әԝ Баве хԝә Йаһоԝа һʹәз дькә, у жь һʹәмушка зедәтьр әԝи пәсьне наве ԝи дайә (Йуһʹәнна 14:31). Шәва пешийа мьрьна хԝә, әԝи дӧада Баве хԝәрʹа гот, кӧ «наве» ԝи мәрьварʹа да наскьрьне (Йуһʹәнна 17:26, ИМ). Әв чь те һʹәсабе?

9. Иса бь сайа мәтʹәлокәке чаԝа дина мәрьва кʹьшандә сәр һʹӧнӧред Хԝәде?

⁹ Иса нә тʹәне мәрьварʹа дьгот, кӧ наве Хԝәде чь йә, ле һе зедә. Щьһуйед кӧ Иса ԝана һин дькьр, заньбун кӧ наве Хԝәде Йаһоԝа йә. Ле Иса Әԝ ԝанрʹа «да әʹйанкьрьне» (Йуһʹәнна 1:17, 18). Мәсәлә, Ньвисаред Пирозә Ибрани нишан дькьн, кӧ Йаһоԝа йәки дьлрʹәʹм у дьлшәԝат ә (Дәркʹәтьн 34:5-7). Чахе Иса мәтʹәлока дәрһәԛа кӧрʹе ӧндабуйи у баве ԝи гьли кьр, әԝи дина мәрьва кʹьшандә сәр ван һʹӧнӧред Хԝәде. Мәтʹәлокеда, гава бав кӧрʹе хԝәйи кӧ тʹобә кьр «һе дурва» дит, бәрбь ԝи бәзи, әԝ һʹәмез кьр у жь дьл бахшандә ԝи. Әв мәтʹәлок нишани мә дькә, кӧ дьлрʹәʹми у дьлшәԝатийа Йаһоԝа чьԛас мәзьн ә (Луԛа 15:11-32). Бәле, Иса зәлал нишан кьрийә кӧ Баве ԝи бь рʹасти йәки чаԝа йә.

10. (а) Әм жь кʹӧ заньн кӧ Иса наве Баве хԝә дьда хәбате у дьхԝәст мәрьв жи ӧса бькьн? (Маркос 5:19) (Бьньһерʹә ӧса жи шькьл.) (б) Иса дьхԝазә кӧ әм чь бькьн?

¹⁰ Гәло Иса дьхԝәст кӧ мәрьв наве Баве ԝи бьдьнә хәбате? Бәле. Чахе Иса сәр әʹрде бу, һьнә сәрԝеред религи дьԛәԝьмә дьфькьрин кӧ наве Хԝәде гәләк пироз ә, ләма жи мәрьв гәрәке нәдьнә хәбате. Ле Иса тʹӧ щар изьн нәдьда кӧ әʹрф-әʹдәтед ӧса, йед кӧ мьԛабьли Ньвисаред Пироз ьн, бьбьнә сәбәб кӧ әԝ наве Баве хԝә пироз нәкә. Бинә бира хԝә, гава Иса ль һәрема щьмәʹта Гьрасини мерәки щьнакʹәти ԛәнщ кьр, чь ԛәԝьми. Мәрьвед һәреме тьрсийан, у дьхԝәстьн ԝәки Иса жь ԝедәре һәрʹә, у әԝ жи чу (Маркос 5:16, 17). Ле йәкә Иса дьхԝәст кӧ ԝедәре дәрһәԛа наве Йаһоԝа пебьһʹәсьн. Ләма  жи әԝи ви мере ԛәнщбуйирʹа гот, ԝәки әԝ хәлԛерʹа бежә кӧ Йаһоԝа жь бо ԝи чь кьр, нә кӧ гот Иса чь кьр (Бьхунә Маркос 5:19) a. Иса дьхԝазә кӧ әм жи ӧса бькьн, демәк ԝәки әм сәр тʹәмамийа дьнйайе наве Баве ԝи бьдьнә наскьрьне! (Мәтта 24:14; 28:19, 20) Гава әм ӧса дькьн, әм дьле Пʹадше хԝә, Иса, ша дькьн.

11. Иса шагьртед хԝәрʹа гот кӧ бона чь дӧа бькьн, у әв йәк чьма фәрз ә? (Һәзәԛел 36:23)

¹¹ Иса заньбу кӧ ԛьрара Йаһоԝа әв ә, ԝәки наве хԝә пироз кә у жь һʹәму ләкʹә у дәрәԝа паԛьж кә. Ләма жи Ахайе мә, демәк Иса, шагьртед хԝә һин кьр кӧ ӧса дӧа бькьн: «Баве мәйи әʹзмана, бьра наве тә пироз бә» (Мәтта 6:9). Иса рʹьнд фәʹм дькьр кӧ пирозкьрьна наве Хԝәде, пьрса һәрә мәзьн ә, кӧ һʹәму әʹфрина дькʹәвә (Бьхунә Һәзәԛел 36:23). Иса жь һәр кәси зедәтьр хирәт кьрийә кӧ наве Йаһоԝа пироз кә. Диса жи, гава дьжмьна әԝ гьртьн, ԝана бӧхдан авитьнә ԝи кӧ әԝ кʹьфьрийа Хԝәде дькә. Бе шьк, Иса беһӧрмәткьрьна наве Хԝәдейи пироз һʹәсаб дькьр гӧне һәри мәзьн. Ләма әԝ гәләк әʹщьз у дьлтәнг дьбу, чьмки әԝ ԝе бона ве йәке бьһата сущдаркьрьне. Дьԛәԝьмә һәма әв бу сәбәба сәрәкә, кӧ чьрʹа Иса пешийа гьртьна хԝә ӧса дьлтәнг бу (Луԛа 22:41-44).

12. Иса ча нава тәнгасийада жи наве Баве хԝә пироз кьр?

¹² Иса сәва кӧ наве Баве хԝә пироз кә, бәр щәфа, беһӧрмәткьрьне у бӧхдана тәйах кьр. Әԝи һәр тьштида гӧһ да Баве хԝә у ԛә гӧнә нәкьр, ләма жи әԝи «шәрм бәр тьштәки һʹәсаб нәкьр» (Ибрани 12:2). Ӧса жи, әԝи фәʹм дькьр кӧ ԝан сьһʹәтед рʹәш у тәʹрида, Шәйтʹан рʹастә-рʹаст һʹьщуми сәр ԝи дькә (Луԛа 22:2-4; 23:33, 34). Бе шьк, Шәйтʹан дьхԝәст амьнийа Иса бьшкенанда, ле әԝи да дәр. Иса избат кьр кӧ Мире-щьна дәрәԝин ә, у кӧ хьзмәткʹаред Йаһоԝайә амьн һәнә, йед кӧ нава тәнгасийед гьранда жи амьнийа хԝә хԝәй дькьн.

13. Тӧ чаԝа дькари дьле Иса ша ки?

¹³ Һәрге тӧ дьхԝази дьле Пʹадше хԝә Иса ша ки, пәсьне наве Йаһоԝа бьдә у али мәрьва бькә, ԝәки әԝана жи Хԝәдайе  мә рʹьнд нас кьн. Гава тӧ ӧса дьки, тӧ пʹегәһа Исада дьчи (1 Пәтрус 2:21). У тӧ мина Иса, дьле Йаһоԝа ша дьки у избат дьки, кӧ дьжмьне Ԝи Мире-щьна, дәрәԝинәки беисаф ә!

ГАВА ӘМ ПӘСЬНЕ НАВЕ ЙАҺОԜА ДЬДЬН, ӘМ АЛИ МӘРЬВА ДЬКЬН КӦ ХЬЛАЗ БЬН

14-15. Чьма гәләк фәрз ә, кӧ әм дәрһәԛа Йаһоԝа мәрьва һин кьн?

¹⁴ Гава әм пәсьне наве Йаһоԝа дьдьн, әм али мәрьва дькьн кӧ әԝана хьлаз бьн. Ле чаԝа? Мире-щьна «шәвәрʹәша кора анийә сәр фәʹме нәбаԝәра» (2 Корьнтʹи 4:4). Ләма жи гәләк мәрьв бь дәрәԝед ԝи һатьнә хапандьне у баԝәр дькьн, кӧ Хԝәде тʹӧнә йә, әԝ жь мә дур ә, ԛә бона мә хәм накә, йан жи әԝ берʹәʹм ә у гӧнәкʹара щәʹньмеда һʹәта-һʹәтайе дьчәрчьринә. Нета ван дәрәԝа әв ә, ԝәки наве Йаһоԝа хьраб кьн, сәва мәрьв нәхԝазбьн бьбьнә достед ԝи. Ле гава әм мьзгинийе бәла дькьн, әм рʹийа Мире-щьна дьгьрьн, ԝәки нета ԝи нәйе сери. Әм рʹастийа дәрһәԛа Баве мә Йаһоԝа мәрьва һин дькьн, у пәсьне наве ԝийи пироз дьдьн. Гәло кʹара кʹәда мә чь йә?

¹⁵ Ԛәԝата рʹастийед Кʹьтеба Пироз гәләк мәзьн ә. Гава әм мәрьварʹа дәрһәԛа Йаһоԝа у һʹӧнӧред ԝи гьли дькьн, әм дьвиньн кӧ һʹӧкӧме дәрәԝед Мире-щьна чьԛас дьчә сьст дьбә, у чʹәʹвед мәрьва вәдьбьн. Әԝана һеди-һеди фәʹм дькьн кӧ Баве мәйи дьлован йәки чаԝа йә, у әԝана жь ԛәԝата ԝийә бесинор һʹәйран-һʹӧжмәкʹар дьминьн (Ишайа 40:26). У әԝана итʹбарийа хԝә һәԛийа ԝийә беԛьсур тиньн (Ԛануна Дӧщари 32:4). Әԝана жь биланийа ԝийә мәзьн гәләк тьшт һин дьбьн (Ишайа 55:9; Рʹомайи 11:33). У гава әԝана педьһʹәсьн кӧ Хԝәде һʹәзкьрьн ә, дьле ԝан рʹьһʹәт дьбә (1 Йуһʹәнна 4:8). Әԝана чьԛас һе незики Йаһоԝа дьбьн, һаԛас һевийа жийина һʹәта-һʹәтайе дьле ԝан дьгьрә. Ԛәдьрәки чьԛас мәзьн ә, кӧ әм дькарьн али мәрьва бькьн, ԝәки әԝана незики Баве хԝәйи әʹзмана бьн! Гава әм ви шьхӧли дькьн, Йаһоԝа мә ча һәвалкʹаред хԝә һʹәсаб дькә (1 Корьнтʹи 3:5, 9).

16. Чахе һьнә кәс дәрһәԛа наве Хԝәде пеһʹәсийанә, әв йәк ча сәр ԝан һʹӧкӧм буйә? Мәсәле бинә.

 ¹⁶ Пешийе, әм мәрьварʹа дьбежьн кӧ наве Хԝәде Йаһоԝа йә. Әв йәк дькарә сәр кәсед дьлсах гәләк һʹӧкӧм бькә. Мәсәлә, ԝәрә дина хԝә бьдә сәрһатийа жьнькәкә щаһьл, наве кʹижане йә Алийаһ b. Әԝ малбәтәкә ӧсада мәзьн бьбу, кӧ һинкьрьна религийа ԝан нә сәр һʹиме Кʹьтеба Пироз бу. Әԝе хԝә незики Хԝәде тʹәхмин нәдькьр у религийа хԝәрʹа рʹази нибу. Ле паши ве йәке кӧ әԝе тʹәви Шәʹдед Йаһоԝа һинбуна Кʹьтеба Пироз дәстпекьр, һәр тьшт һатә гӧһастьне, у әԝе ида Хԝәде ча Досте хԝә һʹәсаб дькьр. Гава әԝе дит кӧ наве Хԝәде жь гәләк ԝәлгәрʹандьнед Кʹьтеба Пироз һатийә дәрхьстьне у хәбәред ча «Хӧдан» йан «Рʹәб» дәԝса ви нави һатьнә хәбьтандьне, әԝ әʹщебмайи ма. Чахе әԝ пеһʹәсийа кӧ наве Хԝәде Йаһоԝа йә, әԝ гәләк ша бу у әʹмьре ԝе һатә гӧһастьне. Әԝе гот: «Наве Досте мьни һәри баш һәйә!» Әв йәк сәр ԝе чаԝа һʹӧкӧм бу? Әԝ дьбежә: «Әʹдьлайи кʹәтийә дьле мьн. Бона мьн ԛәдьрәки мәзьн ә кӧ әз наве Хԝәде заньм». Сазбәндәки бь наве Стив, малбәтәкә ӧсада мәзьн бу, кʹижани ԛайим ԛәдьре религийа хԝәйә Щьһуди дьгьртьн. Ле жь бо ве йәке кӧ әԝи религийайеда дӧрʹути дит, нәдьхԝәст бькʹәта нав тʹӧ религийәке. Ле паши мьрьна дийа ԝи, щарәке гава һәваләки ԝи тʹәви Шәʹдед Йаһоԝа һинбуна Кʹьтеба Пироз дәрбаз дьбу, әԝ жи тʹәви ԝан рʹуньшт. Чахе Стив наве Хԝәде бьһист, әԝе йәке гәләк дьле ԝи гьрт. Әԝ дьбежә: «Мьн наве Хԝәде ԛә нәбьһистьбу. Һьнге щара пешьн бу кӧ мьн тедәрхьст, ԝәки Хԝәде кәсе реали йә! Мьн фәʹм кьр кӧ мьн хԝәрʹа Достәк ԛазанщ кьр».

17. Тӧ чьма дьхԝази һәр гав пәсьне наве Йаһоԝа бьди? (Бьньһерʹә ӧса жи шькьл.)

¹⁷ Гава тӧ мьзгинийе бәла дьки у мәрьва һин дьки, гәло тӧ ԝанрʹа дьбежи, кӧ наве Хԝәде Йаһоԝа йә? Гәло тӧ ԝанрʹа дьбежи кӧ Хԝәдайе мә бь рʹасти йәки чаԝа йә? Һәрге тӧ ӧса дьки, тӧ пәсьне наве Хԝәде дьди. Али мәрьва бькә кӧ әԝана һе баш Йаһоԝа нас бькьн у рʹийа жийине бьвиньн. Бь ви щурʹәйи, тӧ дькари чʹәʹв бьди Пʹадше хԝә Иса Мәсиһ у дьле Баве хԝәйи һʹәзкьри Йаһоԝа ша ки. Бәле, ԝәрә әм һʹәта-һʹәтайе шькьрийе бьдьнә наве ԝи! (Зәбур 145:2)