1-2. I biny biitwambambulwiish bwiitut kumanyik mudy Yehow umvw habitaatal mudyobw baleeb bibiih bwa diijin dindiy?

 LANG ket neey: Muut uwutaatacil uleeleeb myand yibiih bwiibuh. Uw udy mumanyik neey i ya makos; ki, baat bakwaabw biitaatab neey i ya cyaabiin. Cikwaabw bwaal bubiih menmen budy neey: bataatang kwambil baat bakwaabw myand ya makos eey, ni baat bavul biiyiitaatab byaabw. I mushind kaay uwudy mwa kwiiyumvw? Uw utacil baat bakwaabw ni mukat kwiikal ni lumw lulengel, myand yidyobw bakudingil yidy mwa kulong bwa wiiyumvw bibiih, kabiin naak eeny?—Tus. 22:1.

² Bwaal oobw budy mwa kwiitwambulwiish bwiitut kumvw mumvwiil Yehow hanyangilobw lumw lwindiy. Umw a ku baan bindiy ba mu spirit umudingidil myand kudy Eev, mwaan-mukaj wa kuuhal. Eev wiitabil makos aam. Makos aam masakil balel ba kuuhal aab bwa kutombokelobw Yehow. Bu cihet, mpekaat ni lufw bitweedyeel mu cisak dya baan ba baat. (Kbwa. 3:1-6; Rom 5:12) Myand yoos yitutaatal mu bulongolody oobw—Kufw kwa baat, maavit, makeng—i bikamish kudy makos matwaadijil Sataan kumwangalaj mu budimy bwa Eden. Yehow umvumvwok kaakunying bwa myand ya makos eey ni bidyem makaamish eeny? Cya biin, ki mudyeby. Cikwaabw, Yehow kiin ulam kaakunying mund, eecy kiishoh bend ulam lukun ku micim. Ki hamut a kwiikaley nook, udy teng “Mawej udy ni musangal.”—1 Tim. 1:11, NWT.

3. I dyaakatook kaay ditudy naady?

³ Tudy ni dyaakatook dya kubingish diijin dya Yehow hakukooyeel ku diiy diheehel dya neey: ‘Tumbishaay diijin dya Yehow.’ (Mis. 113:1, NWT) Tuloolong nook, hatwambambil baat bakwaabw myand ya biin-biin ha bimutaatal. Udy mukat kulong byeeb nook eeny? Tukontononaay tubingil tutam twiiyiiy kwiitwambulwiish bwa kutumbish diijin dya Mawej iitut ni mucim aakaabumw.

TUSAASANGEJ YEHOW HATUTUUTUMBISH DIIJIN DINDIY

4. Bwabiny Yehow usaasangal hatumutuutumbish? Umvwiij. (Tal cikwaabw cifwaatul.)

⁴ Tusaasangej Taat iitut a mu diiwul hatutuutumbish diijin dindiy. (Mis. 119:108) Biineeby byumvumvwiijok neey Mawej mwiin bukash boos udy teng bu baan ba baat bakiish bawaakan bady bakat bikasakan bwa bakwaabw biibatumbish bwa biiyumvw neey bady ni buseeb eeny? Waakweeh. Tukontononaay cileejel eecy. Mwaan mwaan-mukaj ubuubukacil taat indiy ni lukat loos ni umwambil neey: “Uw i yiy taat mulengel menmen udy muhitok baataat boos ha bulab!” Taat umweemweemweet ni umvw musangal iimwiin. Bwabiny? Tulaalangok neey muut oow kiish wiital ni buseeb ni umvumvw bilengel teng hady mwaan indiy umutumbish eeny? Waakweeh, kabiish naak. Twiitaatab neey, taat mulengel oow udy ni musangal ha kutal mudy mwaan indiy umuleej lukat ni umwanyish. I mumanyik neey biikadil eeby biiyiiy kumwambulwiish bwa kwiikaley ni musangal hadyey ukuluuh. Bwa tubingil twaakaabumw ootw, Yehow, i Taat mulengel udy muhitok baataat boos, udy ni musangal hatumutuutumbish.

5. I myand kaay yitujaajadik neey i ya makos hatutuutumbish diijin dya Mawej?

⁵ Hatutuutumbish Taat iitut a mu diiwul, twambambulwiish bwa kujaadik neey makos mady Sataan uleeb bwiitut kamiish ma biin-biin. Sataan uleeleeb neey kakwiish muut ni waakaabumw udy mwa kubingish diijin dya Mawej. Bwindiy, kakwiishoh bend muut ni waakaabumw udy ni mucim mutook. Uleeleeb neey tut boos twiiyiiy kulek Mawej tut balang neey twiiyiiy kuhet musangal tut balong nook. (Yoobw 1:9-11; 2:4) Ki Yoobw waakady ni lulamat uleejel neey Sataan i mwiin makos. Ki uw, udy mwa kulong bicy? Woos wa kutudy udy ni dyaakatook dya kubingish diijin dya Taat iitut a mu diiwul ni kumusangej hakumukadil mudimw ni lulamat. (Tus. 27:11) Kulong nook i bwaal bwa buseeb.

6. Bilondeshel Nehemih 9:5, i mushind kaay utudy mwa kwiidikij Davih ni Biin leevy?

⁶ Baat bady bakat Mawej i bakat kutumbish diijin dindiy ni mucim aakaabumw. Mukaleng Davih ufundil neey: “Mim nady mukat kutumbish Yehow; biit byoos bidy mund mwaam bitumbish diijin diibuh dijilang.” (Mis. 103:1, NWT) Davih waakady mumanyik neey, hatutuutumbish diijin dya Yehow, i bya mushind aakaabumw ni hatutuutumbish Yehow kaayend kend. Hatumvumvw diijin dya Yehow, tulaalang bwa buumuut bwindiy ni bwa biikadil bindiy byoos bilengel ni myand yilengel yidyey mulong. Bwa Davih diijin dya Taat indiy dyaakady dijilang ni waakady mukat kwiiditumbish. Waakady mukat kulong nook ni “biit byoos bidy mund” mwindiy—i bwiin kuleeb neey, ni mucim aakaabumw. Bya mushind aakaabumw, biin Leevy ki baakady ku mut kwa myand yaakady yital  kutumbish Yehow. Biitabil ni kwiihweekesh neey, may maabab kamaakadyoh bend makumban bwa kwaakish diijin dijilang dya Yehow lutumb ludyedy diwaakanyin. (Bal Nehemih 9:5.) Biin-biin, Yehow umvumvw musangal adyobw bamutumbish ni kwiihweekesh ni mucim aakaabumw.

7. I mushind kaay utudy mwa kutumbish Yehow mu mudimw iitut a bukajaady ni mu shikacil iitut?

⁷ Leeloow, tudy mwa kutumbish Yehow hatuleeleeb myand yimutaatal mu mushind uleeleej neey, tumwanyanyish ni tudy bamukat bikasakan. Hatudy mu mudimw a bukajaady, tuvuluk neey, kihacil kiitut katam i ka kwambulwiish baat bwa kufweejobw habwiih ni Yehow, ni kwiibambulwiish bwa biyumvw byaabw mutwiiyumvumvw bwa Taat iitut a lukat. (Jak 4:8) Tudy ni musangal wa kuleej baat mudy Bibl uleeb bwa Yehow, bwa lukat lwindiy, buwaakan bwindiy, meej mindiy, bukash bwindiy ni bwa biikadil bindiy bikwaabw bitusaasangej. Tutuutumbish cikwaabw Yehow hatuloolong mwiitut moos bwa kumwiidikij. (Ef. 5:1) Hatuloolong naak, baat bakwaabw bady mwa kutal neey, tudy bashilangan ni baat ba mu bulongolody bubiih oobw ni bady mwa kwiitwiihanguj bwa kumanyik bwabiny tudy bashilangan naabw. (Mat. 5:14-16) Hatuheehetangan naabw, tudy mwa kwiibumvwiij bwabiny tuloolong nook. Nook baat bady bakat myand ya biin-biin, biiyiiy kumvw bwa kufweej habwiih ni Mawej iitut. Hatutuutumbish Yehow mu mushind oow, tusaasangej mucim indiy.—1 Tim. 2:3, 4.

YEEZ USAASANGAL HATUTUUTUMBISH DIIJIN DYA YEHOW

8. I mushind kaay udy Yeez mwiikal Tund a mulong habitaatal kuhambidil diijin dya Yehow?

⁸ Kakwiin mwanjel eecy muut ning waakaabumw udy mumanyik Taat bilengel kuhitok Mwaan. (Mat. 11:27) Yeez i mukat Taat indiy ni i Tund a mulong habitaatal kutumbish diijin dya Yehow. (Jah 14:31) Mu diisambil dilongeley kudy Taat indiy bufuk kuuhal kwa kufwey, uleejel bwaal bwa buseeb bulongeley mu mudimw indiy a bukajaady wa ha bulab, uleebel neey: “Nady mwiibamanyikish diijin diibuh.” (Jah 17:26, NWT) I mushind kaay ulongel Yeez nook?

9. I kasumw kaay kumbil Yeez bwa kumvwiij bilengel menmen cidy Taat indiy?

⁹ Hakufulok kwambil baat neey, diijin dya Mawej i Yehow, Yeez ulongel myand yikwaabw yivul. Biin Yuud baakady Yeez ulongweesh, baakady baman kal kumanyik diijin dya Yehow. Ki Yeez, wangacil cyaab cya kuuhal hakwiikal muut “udy . . . Mumumanyikish kudy baat.” (Jah 1:17, 18) Cileejel, mu mikand ya mu Bibl yifundilobw mu ciin Ebreh baleeleebomw neey Yehow ufwiifwiilangan lus ni udy ni micim yimwiit mund bwa mal mamoomon baat. (Cim. 34:5-7) Yeez uleejel bwaal bwa biin-biiin oobw hatook umbiley kasumw ka mwaan ujimbeen ni taat indiy. Hatubaabal bwa mushind waakady taat mumvwiil mwaan indiy waakady mwiikunying bwa bibiih bindiy lus “ucyaakady bituh haleeh,” waay lubil kudyey bwa kumwiimun, waamubukacil ni waamufwiil lus ni mucim aakaabumw, tumvumw biin-biin mudy Yehow ufwiilangan lus ni mudy micim yimwiit mund bwa mal mamoomon baat. (Luuk 15:11-32) Yeez wambulwiishil baat bakwaabw bwa kumanyikobw biin-biin buumuut bwa Yehow.

10. a) Bilondeshel Mark 5:19, i mushind kaay utudy bamanyik neey Yeez ukadil mudimw ni diijin dya Taat indiy ni mukat bwa baat bakwaabw balong byaabw nook? (Tal cikwaabw cifwaatul.) b) I biny bidy Yeez mukat bwa tulong leeloow?

¹⁰ Cikwaabw, Yeez waakady mukat bwa baat bakal mudimw ni diijin dya Taat indiy eeny? Cya biin. Bamw baafumw ba bitendeleel bady mwa kuleeb neey kabiish bikaam kuteel diijin dya Mawej bwaal i dijilang, ki Yeez kiitabiloh bend bwa malongweesh ma baat makiish ni biijaadik mu Diiy dya Mawej mamukaakeesh bwa kuh diijin dya Taat indiy lutumb. Tukontononaay myand yaakady yilongek ha ciisang cyondahiley muut waakady ni bademoh mu cibunj cya Jerazeniyeh. Baat bumvwiil mooy ni kwiisanjilobw Yeez bwa kwaalukey mu cibunj cyaabab, ni kashaadiloh  bend mu cibunj aacy. (Mark 5:16, 17, NWT) Yeez waakady mukat cikwaabw bwa baat ba mu cibunj eecy bamanyik diijin dya Yehow. Nook Yeez wambiil muut wondahiley aaw bwa kwambil baat neey, kiish Yeez udy mulong bwaal oobw ki i Yehow udy mulong bwaal oobw. (Bal Mark 5:19.) a Ki cidyey mukat bwa tulong leeloow—bwiitut kumanyikish diijin dya Taat indiy ha bulab butuutul! (Mat. 24:14; 28:19, 20) Hatuloolong byeet mudimw oow, tusaasangej Yeez Mukaleng iitut.

11. Yeez ulongweeshel biiyij bindiy bwa kusambil bicy, ni bwabiny kulong nook kudy ni buseeb bilondeshel Ezekiyeel 36:23?

¹¹ Yeez waakady mumanyik neey kiihacil ka Yehow i ka kulong bwa diijin Dindiy diikal dijilang, ha kwiidibingish ku makos moos madyobw baleeb bwindiy. Ki bwabiny Mukaleng iitut ulongweeshel biiyij bindiy bwa kusambil nook: “Taat iitut udy mu diiwul, diijin diibuh dijilang biidimanyik kudy boos.” (Mat. 6:9) Yeez waakady mumanyik neey, bwiin oobw i bwaal butam butaatal biit byoos bihangil Mawej. (Bal Ezekiyeel 36:23.) Kakwiishoh bend muut ni waakaabumw mu diiwul ni ha bulab waakady mumanyikish diijin dijilang dya Yehow kuhitok Yeez. Cikwaabw, hakwaacilobw Yeez, i bubiih kaay bwaakadyobw bamuband naabw kudy balwiish bindiy? Baakady baleeb neey, utootobolol Mawej! Yeez waakady mumanyik biin-biin neey, kutobolol eecy kuleeb myand ya makos bwa diijin dya Yehow i bubiih butam menmen. Umvwiil bibiih menmen bwa mwaakadyobw bamuband ni bamumb cilumbw aacy hanyeet. Bwaal oobw budy mwa kwiikal kabingil katam kalongel bwa Yeez ’umvw mooy’ mu meeb maakadyobw bakaam kumukwaat.—Luuk 22:41-44.

12. I mushind kaay waakady Yeez mumanyikish bikasakan diijin dijilang dya Taat indiy kudy baat boos?

¹² Bwa kumanyikish diijin dya Taat indiy bwa diikal dijilang kudy baat boos, Yeez utaatameen makab ni mal, matuk, ni myand ya makos yaakadyobw bamuband naay. Waakady mumanyik neey waakady ukooyel kudy Taat indiy mu myand yoos; ni kaakadyoh bend ni bumvw bwa kulong nook. (Ebr. 12:2) Waakady mumanyik cikwaabw neey Sataan waakady umulwiish buludy-ludy mu ciisang cikasakan aacy. (Luuk 22:2-4; 23:33, 34) Sataan waakady mutakamin biin-biin neey Yeez kakushaaloh bend ni lulamat kudy Mawej. Nook, Sataan ukaakeel! Yeez uleejel biin-biin neey Sataan i mwiin makos ni Yehow udy ni biin mudimw bindiy ba lulamat, batuutungunuk ni kulam  mucim aabab mutook ning hadyobw bahet makab makasakan menmen!

13. I mushind kaay utudy mwa kusangej Mukaleng iitut ukookookesh?

¹³ Udy mukatok kusangej Mukaleng iibuh ukookookesh eeny? Tungunuk ni kutumbish diijin dya Yehow, hakwambulwiish baat bakwaabw bwa bamanyik biikadil bilengel byoos bya Mawej iitut. Hawuloolong nook, uloolond mu diikas dya Yeez. (1 Py. 2:21) Teng bu Yeez, usaasangej Yehow, ni uleej neey Sataan mulwiish Indiy i mwiin makos ukiish ni bumvw!

TUKUUKUULOH BUUMY BWA BAAT HATUTUUTUMBISH DIIJIN DYA YEHOW

14-15. I myand kaay yikwaabw yilengel yidy mwa kulongek hatuloolongweesh baat bakwaabw bwa kumanyikobw Yehow?

¹⁴ Hatutuutumbish diijin dya Yehow, twambambulwiish mu mudimw a kukuuloh buumy bwa baat. Mu mushind kaay? Bwaal Sataan “i mwiibabwiikil hiiwul ha mees bwa kabalong bumvw myand ya musah mulengel.” (2 Kor. 4:4) Ki bwabingany biitaatab makos ma Sataan ma neey: Mawej kiishok, Mawej udy kuleeh neet ni kiin bend wiitacish bwa baat, i Mawej udy ni cikis ni ukaakabish baamulong a bibiih buyiil. Ukaakal mudimw ni makos aam teng bwa baat baleeb bibiih bwa Yehow ni bwa diijin dindiy ni balek kwiikal ni micim ya kufweej habwiih nend. Ki hatudy mu mudimw a bukajaady, tukaakaakeesh Sataan bwa kukumbajey kiihacil kindiy. Tuloolongweesh baat myand ya biin-biin yiitaatal Taat iitut, hatutuutumbish diijin dijilang dya Mawej iitut. I biny biitwiiyiiy kuhet?

¹⁵ Myand ya biiin-biin yidy mu Diiy dya Mawej yidy ni bukash buvul menmen. Hatuloolongweesh baat habitaatal Yehow ni biikadil bindiy bilengel, twiiyiiy kutal bwaal kaahand bulengel. Baat bady babwiikil ha mees ni myand ya makos ya Sataan batwaatwaadij kubulul ku bikeeh ku bikeeh mees maabab ku dyambulwiish dya myand ya biin-biin bwa kutalobw Taat iitut udy ni lukat mu mushind utumutaatal. Baanaan bikasakan bukash bwindiy kabuy kuleebangan naabw. (Ye. 40:26) I batwiishibw neey, i muwaakan. (Mmu. 32:4) I balong bwa kumanyik meej mindiy mahit kuvul. (Ye. 55:9; Rom 11:33) I bakasakan ku micim hadyobw bamanyik neey, Mawej i lukat. (1 Jah 4:8) Bumudyobw bafweej habwiih ni Yehow, kutakamin kwaabab kwa kwiikal ni buumy buyiil bu baan bindiy i kwa biin-biin. Tudy ni dyaakatook diidiin dyeeh dya kwambulwiish  baat bwa kufweejobw habwiih ni Taat aabab! Hatuloolong nook, ku mees kwa Yehow, twiiyiiy kwiikal ’bakal nend ba mudimw.’—1 Kor. 3:5, 9.

16. I mushind kaay udyeby biiteng bakwaabw ku micim hadyobw bamanyik diijin dya Mawej? Twaal bileejel.

¹⁶ Cya kuuhal, tudy mwa kulongweesh bituh baat neey, diijin dya Mawej i Yehow. Bwaal bwaakaabumw oobw budy mwa kushiitulul shikacil a muut udy mulongolol mucim indiy bilengel. Cileejel, maam mukwaabw ucidy sand dindiy Aliyah b waakady mukasakeen mu cisak cya balel bindiy bakiish biin-Krist. Ki kaakadyoh bend ni musangal bwa myand ya mu citendelel cyaakadyey eecy kaakadyoh bend wiiyumvw neey waakady habwiih ni Mawej. Myand yishiitulukil hatwaadijiley kulong Bibl ni Baatemw ba Yehow. Utangil kutal Mawej bu mulund nend. Ni ukemen hamanyikiley neey baakady baful diijin dya Mawej mu Bibl yikwaabw ni bahingijoh ha cyaab cya diijin aady myaanz ya bituh, bu mudy Mukaleng. Kumanyik diijin dya Yehow kushiitulwiil shikacil indiy. Ukemen neey: “Mulund naany wa ha micim udy ni diijin!” I biny biheteley? Uleeleeb neey: “Kaabaak nady ni diitalal divul mu mucim. Niiyuumvumvw neey nady ni buseeb buvul.” Muut mukwaabw dindiy Steve waakady mumb a misambw waakady mukasakeen ha cyaab cyaakady baat balamat bikasakan mikenj ya biin Yuud. Kakaciloh bend kutweel mu citendelel mwaakadyobw balongolol myand bilengel bwaal utadil neey baat baakadyomw baakady menmen biin myand ya muush-muush. Ki, kuunyim kwa lufw lwa maam indiy, wiitabil bwa kulong Bibl ni Temw a Yehow. Bimutengel bikasakan ku micim hamanyikiley diijin dya Mawej. Uleeleeb neey: “Cyaakadyoh bend mwanj kumanyik koosook diijin dya Mawej.” Uleeleeb cikwaabw neey: “Bwa musang a mim a kuuhal, namanyikil neey Mawej udyok biin-biinl! Namutadil bu muut a biin-biin. Namanyikil neey nahetel Mulund.”

17. Bwabiny udy mwiiswiik bwa kutungunuk ni kutumbish diijin dya Yehow? (Tal cikwaabw cifwaatul.)

¹⁷ Mu mudimw iibuh wa kudiil baat musah ni wa kulongweesh, udyaakal wambilok baat bakwaabw bwa kumanyikobw neey, diijin dijilang dya Mawej i Yehow eeny? Wiibaabambulwiishok bwa kumanyikobw biikadil bindiy bilengel eeny? Uw ulong nook, utuutumbish diijin dya Mawej. Udy mwa kutungunuk ni kutumbish diijin dijilang dya Yehow hakwambulwiish baat bakwaabw bwa kumanyikobw biikadil bidyey naaby. Uw mulong nook, wiiyiiy kukuuloh buumy bwa baat. Wiiyiiy kulond buludik bwa Mukaleng iibuh, Yeez Krist. Ni kuunyim kwa myand yoos, wiiyiiy kusangej Yehow, Taat iibuh udy lukat. Udy mwa “kutumbish diijin [dindiy] buyiil”!—Mis. 145:2.