1-2. Ni kyahi ekyanga thuwathikya eriminya Yehova ng’akayowa athi erina liwe likabuwa kw’amabehi?

 THALENGEKANIA oku kino: Omundu oyo wutsomene kutsibu iniakubughako ekindu ekikalire. Wunasi ku ni mabehi; aliwe abandi babirilighagho. Eky’akabi kutsibu, ibatsuka erisubirira mugho n’abandi bangyi nabu ibikiriryagho. Iwukendi yowa wuthi? Wamabya iwutsomene abandu n’erina lyawu libuya, omuhangiriri oyo iniakendi leka iwayowa nabi, kwabithe?—Emi. 22:1.

² Eky’erileberyako eki kyangana leka ithwaminya Yehova nga mwayowa athi akatsandibwa kw’erina. Omughuma w’okwa baghalha biwe b’ekirimu mwamuhangirira akabwira omukali w’erimbere ya Eva y’amabehi. Mwaligha amabehi ayo. Amabehi ayo mwaleka ababuthi bethu b’erimbere ibayisamambulha oku Yehova. Busana n’ekyo, ekibi n’olhuholho mubyahika okwa bandu. (Enz. 3:1-6; Abar. 5:12) Ebitsibu byosi ebya thukalhangira omwa kihugho—olhuholho, esyonyuhi, eriaghalhwa—byasa busana n’amabehi agho Sitani atsuka erithulha omw’irima lye Edeni. Mbwino Yehova akayowa nabi busana n’erihangirira ng’eryo n’ebikalhwiririramo? Ahathe erithika-thika. Nomwabine, Yehova syahithene kutse eribika ekinigha. Okwenene kuli kuthi, abiribya inina “Nyamuhanga oyutsemire.”—1 Tim. 1:11, NWT.

3. Thuwithe olhusunzoki?

³ Thuwithe olhusunzo lhw’erisangira omw’iyira erina lya Yehova mwa libuyirire omw’ighendera okwa kihano eky’olhobire kino: “Mupipe erina ly’Omwami Mukulhu.” (Esy. 113:1) Thukakolha ekyo omw’ikania ndeke oko mwinye w’erina eribuyirire eryo. Wunemwendi kolha ekyo? Leka thukanaye okwa bindu bisathu ebikathuhira mw’omuhwa w’eripipa erina lya Nyamuhanga wethu n’omuthima wethu wosi.

 THUKATSEMESAYA YEHOVA THUKAPIPA ERINA LIWE

4. Busana naki eripipa lyethu likatsemesaya Yehova? Iha eky’erileberyako. (Lebaya n’ekisasani.)

⁴ Thukatsemesaya Thatha wethu w’elhubulha thukapipa erina liwe. (Esy. 119:108) Mbwino eki kikamanyisaya kithi Nyamuhanga omuthoki w’ebyosi ali ng’abandu abathahikene abakalirira eripipwa kundi bakaliyithagha kutse kundi bakayilhalikirira bamathendi pipwa? Eyihi. Thuthalengekania okwa ky’erileberyako kino. Akasika kalere ikanatsemire ikawa oku thatha wako n’eribugha kathi, “Wuli thatha mubuya omwa kihugho kyosi!” Thatha iniatsema kutsibu, nibya iniahambwako busana n’ekya omwana wiwe amabugha ahathe erikakwa. Busana naki? Mbwino thunatholere ithwabugha thuthi ni mulhume oyukayilhalikirira n’eririra eripipwa erikalhua okwa mwana wiwe, nibya n’eribyaho busana nalyo? Eyihi. Omwakanya k’ekyo, thukayikethera ngoku ni thatha oyusikire oyukatsema akalhangira mwali wiwe akakangania kw’amwanzire kandi kw’akamusima. Anasi ngoku emibere ng’eyo yikendi syahamba okwa tseme ya mwali wiwe anemughenda akakulha. Busana n’esyonzumwa ng’esyo, Yehova, Thatha oyulengireyo akatsema thukamupipa.

5. Ni mabehi wahi agho thwanga ghunzaho thukapipa erina lya Nyamuhanga?

⁵ Thukabya thukapipa Thatha wethu w’elhubulha, thukawathikaya okw’ighunzaho amabehi awathuhambireko. Sitani akabugha athi sihali omundu oyuwanga thoka erilhwira okwa lina lya Nyamuhanga buthaleghulha. Sitani akabugha athi sihali oyuwanga sighalha muthaleghulha. Akabugha athi ithwe bosi ithwangana sighania Nyamuhanga thwamalengekania thuthi erikolha ekyo kikendi thughasira. (Yobu 1:9-11; 2:4) Aliwe omuthaleghulha Yobu mwakangania ngoku Sitani ni mubehi. Kandi ibbwa iwe? Obuli mughuma w’okw’ithwe awithe olhusunzo lhw’erilhwira erina lya Thatha wethu buthaleghulha n’erimutsemesya omw’imukolera buthaleghulha. (Emi. 27:11) Omo kwenene, ni kitsumbi erikolha ekyo.

6. Thwanga gherererya thuthi Omwami Dawudi n’Abalawi? (Nehemia 9:5)

⁶ Olhwanzo olho abathaleghulha bawithire Nyamuhanga lhukaleka ibapipa erina liwe erilhua oko muthima. Omwami Dawudi mwahandika athi: “Iwe muthima waghe, wupipe Omwami Mukulhu! Ebyosi ebiri omwisi waghe bipipe erina liwe libuyirire!” (Esy. 103:1) Dawudi abya inianasi ngoku eripipa erina lya Yehova ni pipa Yehova iyuwene-wene. Erina lya Yehova mwamuli ebimuhambireko, neryo eki kikaleka ithwibuka emibere yiwe yosi emibuyanga n’ebyosi eby’abirikolha. Dawudi mwanza erilhangira erina lya Thatha wiwe mwa libuyirire n’eriripipa. Mwanza erikolha ekyo ‘n’ebyosi ebiri omwisi’ wiwe—ni bugha ambu, erilhua oko  muthima. Kuthya, Abalawi mubabya eky’erileberyako omw’ipipa Yehova. Omw’iyikehya mubaligha ngoku ebinywe byabu sibyangakangania ndeke eripipa eritholere erihebwa erina lya Yehova eribuyirire. (Soma Nehemia 9:5.) Ahathe erithika-thika, eripipa eriri mw’eriyikehya kandi erikalhua oko muthima ng’eryo mulyatsemesya Yehova.

7. Thwanga pipa thuthi Yehova omw’ithulira lyethu n’omwa ngebe yethu ya buli kiro?

⁷ Munabwire, thwangana tsemesya Yehova omw’imukaniako ithunatsemire, omw’imusima, n’omwa lhwanzo. Omughulhu thuli omw’ithulira, thukabya ithun’ibukire ngoku ekilhubirirwa kyethu kikulhu ly’eriletha abandu oku Yehova, n’eribawathikya erilhangira Thatha wethu mwanzwa ngoku thukamulhangira. (Yak. 4:8) Thukatsema thukakangania abandu ebya Biblia yikabugha oku Yehova, eribisulha olhwanzo lhwiwe, obulingirirania, amenge, amaaka, n’eyindi mibere yiwe eyikatsemesaya. Kandi thukapipa Yehova n’erimutsemesya thukalengaho erimugherererya. (Efe. 5:1) Thukabya thukakolha ekyo, thukabya mbaghane omwa kihugho kibi kino. Abandu bangana lhangira ngoku thuli mbaghane kandi ibabulha nga ni busana naki. (Mt. 5:14-16) Thukabya thukakanirania nabu okwa myatsi ya buli kiro, thwangana thoka eribasoborera ekikaleka ithwabya thuthya. Busana n’ekyo, abandu ab’emithima myolho bakayithunda oku Nyamuhanga wethu. Thukabya thukapipa Yehova omwa syonzira esi, thukatsemesaya omuthima wiwe.—1 Tim. 2:3, 4.

THUKATSEMESAYA YESU THUKAPIPA ERINA LYA YEHOVA

8. Yesu abiribya athi ky’erileberyako ky’eripipa erina lya Yehova?

⁸ Okwa bihangikwa byosi eby’amenge ebiri omwa lhubulha n’ebiri okwa kihugho, sihali oyuwasi Thatha ya ndeke kwilhaba Mughalha. (Mt. 11:27) Yesu anzire Thatha wiwe, kandi abiribya ky’erileberyako kibuya omw’ipipa erina lya Yehova. (Yn. 14:31) Akasaba Thatha wiwe omw’ithumbi athali aholha, omwa bikuhi mwakania okw’ithulira liwe okwa kihugho omwa nzira eno: “Nabiriminyikalya erina lyawu.” (Yn. 17:26, NWT) Amanyisayaki?

9. Yesu mwakolesya athi omusyo erisoborera ndeke-ndeke Thatha wiwe ng’alyathi?

⁹ Yesu mwathasubulira okw’ibwira abandu b’erina lya Nyamuhanga erya Yehova. Abayuda abo Yesu akangiriraya babya ibanasi erina lya Nyamuhanga. Aliwe Yesu mwabya eky’erileberyako ‘omw’imuminyisya.’ (Yn. 1:17, 18) Ng’eky’erileberyako, Amasako w’Ekihebrania akabisulha ngoku Yehova ni w’obughanyiri kandi akakwira abandi b’obulighe. (Eri. 34:5-7) Yesu mwakangania ndeke-ndeke ekwenene eyi akaha omusyo w’omwana oyuwatsaha na thatha wiwe. Thukabya thukasoma okwa bya thatha akolha akalhangira mughalha wiwe oyuwabiriyisubamo ‘iniakine ekyaswa,’ erithibitha eyo ali, erimuwako, n’erimughanyira erilhua okwa muthima, thukalhangira ndeke-ndeke ngoku Yehova ni w’obughanyiri kandi oyukakwira abandi b’obulighe. (Lk. 15:11-32) Yesu mwabisulha ekyonyine-nyine ekyo Thatha wiwe ali.

10. (a) Thukaminya thuthi ngoku Yesu mwakolesya erina lya Thatha wiwe kandi kw’aby’anzire n’abandi ibalikolesya? (Mariko 5:19) (Lebaya n’ekisasani) (b) Munabwire, Yesu anzire ithwakolhaki?

¹⁰ Mbwino Yesu mwananza n’abandi ibakolesya erina lya Thatha wiwe? Ahathe erithika-thika. Abandi bakangirirya b’amadini abathebya ab’omwa buthuku obo bangabya ibabya bakalhangira erina lya Nyamuhanga ng’eribuyirire kutsibu indi siryanga hulhwa, aliwe Yesu mwathalighira emirwa ng’eyo eyithaseghemere okwa Masako yikamukakirya okw’isikya erina lya Thatha wiwe. Thalengekania okwa kyabya omughulhu Yesu alhamaya omulhume oyuwabya kw’esyombinga omwa kitsweka ky’Abagerase.  Abandu mubasagha kandi mubalemba-lemba Yesu bathi aghende, neryo mwalhua omwa kitsweka ekyo. (Mk. 5:16, 17) Nomwabine, Yesu mwanza erina lya Yehova liminyikale omwa kitsweka ekyo. Neryo mwabwira omulhume oyo alhamaya athi abwire abandu okwa bya Yehova abirikolha butsira ebyo Yesu akolha. (Soma Mariko 5:19.) a Ekyo ky’ananzire namunabwire—athi thuminyikalhaye erina lya Thatha wiwe omwa kihugho kyosi! (Mt. 24:14; 28:19, 20) Thukabya thukakolha owethu, thukatsemesaya Omwami wethu, Yesu.

11. Yesu mwakangirirya abigha biwe erisaba bathiki, kandi busana naki ekyo ni kikulhu? (Ezekieli 36:23)

¹¹ Yesu abya inianasi ngoku ekighendererwa kya Yehova ly’eriyira erina Liwe mwa libuyirire, eririghunzako amabehi wosi. Ekyo ky’ekyaleka Omukama wethu iniakangirirya abigha biwe athi basabe bathi: “Thatha wethu oyuli elhubulha, Erina lyawu libye libuyirire.” (Mt. 6:9) Yesu abya inianasi ngoku oyo w’omwatsi mukulhu owakahamba okwa bihangikwa byosi. (Soma Ezekieli 36:23.) Okwa bihangikwa by’amenge omwa buhangwa bwosi sihali ekyamathakolha bingyi eriyira erina lya Yehova mwa libuyirire nga Yesu. Nomwabine, Yesu abere akahambwa, ni kibi kyahi ekyaleka esyonzighu siwe isyamuhamba? Eritsuma! Omo kwenene, Yesu mwayowa athi eritsuma n’eribugha okwa lina lya Thatha wiwe eribuyirire kw’amabehi ky’ekibi ekikalire kutsibu. Mwayowa nabi kutsibu akahirwa kw’omusango oyo. Eyo yangabya iy’eyabya nzumwa ngulhu eyaleka Yesu ‘iniaghalhwa’ omwa syosaha esyakolhaya okw’ihambwa liwe.—Lk. 22:41-44.

12. Yesu mwayira athi erina lya Thatha wiwe mwa libuyirire omwa nzira eyuwene kutsibu?

¹² Eriyira erina lya Thatha wiwe mwa libuyirire, Yesu mwaghumira obuli eriaghalibwa, eritsumwa, n’erihangirirwa ebyamuhirawako. Abya inianasi ngoku abiribya inina mwowa oku Thatha wiwe omo myatsi yosi; syabya awithe eky’erikwira esisoni. (Ebr. 12:2) Kandi abya inianasi ngoku Sitani abya inialikumubambira kinyamwisi omwa syosaha esikalire esyo. (Lk. 22:2-4; 23:33, 34) Ahathe erithika-thika, Sitani aby’anzire erithwa obuthaleghulha bwa Yesu; nomwabine, Sitani mwalemerwa ighuma! Yesu mwakangania ndeke ngoku Sitani ni mubehi tsutsutsu kandi ngoku Yehova anawithe abaghombe abathaleghulha, abakamakirira  erithunganene lyabu nibya n’omw’ilengwako erikalire kutsibu!

13. Wanga tsemesya wuthi Omwami wawu oyunemuthabalha?

¹³ Wunanzire eritsemesya Omwami wawu oyunemuthabalha? Lholha embere eripipa erina lya Yehova, eriwathikya abandi eriminya kwenene Nyamuhanga nga nindi. Wamakolha ekyo, wukabya iwamakwama olhughobe lhwa Yesu. (1 Pet. 2:21) Nga Yesu, wukatsemesaya Yehova n’erikangania ngoku enzighu Yiwe, Sitani, ni mubehi tsutsutsu!

THUKALHAMAYA ESYONGEBE THUKAPIPA ERINA LYA YEHOVA

14-15. Ni bindu byahi bibuyanga ebyangabya thukakangirirya abandu oku Yehova?

¹⁴ Thukabya thukapipa erina lya Yehova, thukalhamaya esyongebe. Thuthi? Sitani “abiririba ameso w’obulengekania” w’abathikirirye. (2 Kor. 4:4) Busana n’ekyo, babirikirirya amabehi wa Sitani ng’ano: Nyamuhanga syaliho, Nyamuhanga ali haali kutsibu kandi syatsomene abandu, Nyamuhanga ni mutsindi kandi akaghalhaya ababi kera na kera. Eky’amabehi ng’aya akakolha lyan’eritsandya oku Yehova kw’erina, nuku abandu sibanze eriyithunda okw’iyo. Aliwe omubiiri wethu akaleka Sitani inialemwa eriberererya ekighendererwa kiwe. Thukakangiriraya abandu ekwenene eyihambire oku Thatha wethu, eripipa erina eribuyirire lya Nyamuhanga wethu. Mukalhwiririraki?

¹⁵ Ekwenene eyiri omwa Kinywe kya Nyamuhanga yiwithe amaaka manene. Omw’ikangirirya abandu oku Yehova kandi kwenene nga ni mundu oyuli athi, thukalhangira ekindu kibuyanga. Amabehi wa Sitani awakabalibanaya kw’ameso lyolho-lyolho akaghenda akahwa, kandi ibatsuka erilhangira Thatha wethu omwanzwa ow’elhubulha ngoku thukamulhangira. Bakasweka bakaminya amaaka wiwe awathehwayo. (Isa. 40:26) Bakayilhangirira obulingirirania bwiwe obuhikene. (Ebi. 32:4) Bakatsema bakaminya amenge wiwe manene. (Isa. 55:9; Abar. 11:33) Kandi bakahumulikana bakaminya ngoku iyo ni lhwanzo. (1 Yn. 4:8) Bakabya bakayithunda hakuhi na Yehova, bakaghumaya amaha wabu aw’erisyabyaho kera na kera ng’abaana biwe. Ka thuwithe olhusunzo lhubuyanga lhw’eriwathikya abandu eriyithunda hakuhi na Thatha wabu! Thukabya  thukakolha ekyo, Yehova akathulhangira ‘ng’abakakolha haghuma nayu.’—1 Kor. 3:5, 9.

16. Abandi bakahambawako bathi bakaminya erina lya Nyamuhanga? Iha eby’erileberyako.

¹⁶ Okw’itsuka, ithwangana kwama kyakangirirya abandu thuthi erina lya Nyamuhanga ni Yehova. Ekyo kyangana hamba kutsibu okwa b’emithima myolho. Ng’eky’erileberyako, omukali ya Aaliyah b akulibawa omw’eka eyithe y’Abakristayo. Aliwe isyali tsemera edini yiwe kutse Nyamuhanga. Eki mukyahinduka akatsuka erigha e Biblia n’Abema. Mwatsuka erilhangira Nyamuhanga ng’Omunywani wiwe. Kandi mwasweka akaminya ngoku erina lya Yehova lyabirilhusibwa omwa syo Biblia nyingyi n’erisubya omwa mwanya walyo mw’ebitsumbi, nga Mukama. Eriminya erina lya Yehova mukyahindulha engebe yiwe. Akabugha athi: “Munywani waghe omubuya anawithe erina!” Mwabirilhwiririraki? Akabugha athi: “Lino ngathekene. Ngayowa ingali w’ekitsumbi.” Omulhume ya Steve abya mwimbi oyuwakulira omwa kalikya y’Ekiyuda. Mwalhua omwa dini kundi abya iniabirilhangiramo obuthebya bunene. Aliwe iniane omwa bulighe bw’eriholerwa, mwaligha eriyiyunga okwa omundu mulebe Abema ba Yehova bak’igha nayu. Mwatsema kutsibu akaminya erina lya Nyamuhanga. Akabugha athi: “Nabya isindi nathaminya erina lya Nyamuhanga.” Ak’ongerako athi: “Omurundi w’erimbere, munayitheghererya ngoku Nyamuhanga aneho! Munamulhangira ng’omundu. Neryo munaminya ku namabiribana Omunywani.”

17. Busana naki iwathwamu erilholha embere eripipa erina lya Yehova? (Lebaya n’ekisasani.)

¹⁷ Omwa mubiiri wawu w’erithulira n’erikangirirya, wukanabwira abandu okwa rina lya Yehova eribuyirire? Wukana bawathikaya erilhangira kwenene Nyamuhanga wethu nga ni mundu oyuli athi? Omw’ikolha ekyo, wukapipa erina lya Nyamuhanga. Kwesi lholha embere eripipa erina lya Yehova eribuyirire omw’iwathikya abandu eriminya omwinye erina eryo. Omwa nzira eyo, iwukendi lhamya esyongebe. Iwukendibya iwamakwama eky’erileberyako ky’Omwami wawu, Kristo Yesu. Ekikulhu kutsibu, iwukendi tsemesya Thatha wawu w’olhwanzo, Yehova. Kwesi wupipe erina liwe “ebiro byosi kera na kera”!—Esy. 145:2.