၁-၂. ဖဲပှၤတဲလံၣ်တဲလီ ယဟိဝၤယွၤအဂ့ၢ်အခါ ယဟိဝၤယွၤ တူၢ်ဘၣ်ဝဲဒ်လဲၣ်, တဲဖျါထီၣ် တၢ်အဒိ.

 ဆိကမိၣ်ကွၢ် တၢ်အဒိတခါအံၤ. ပှၤလၢနသးအိၣ်အီၤတဂၤ တဲနဂ့ၢ်လၢ အတဂ့ၤဘၣ်. နသ့ၣ်ညါလၢ တၢ်လၢအတဲဝဲန့ၣ် တမ့ၢ်တတီဘၣ် သနာ်က့ ပှၤတနီၤ နာ်အီၣ်ဝဲ. ထဲန့ၣ်တကးဒံးဘၣ် ပှၤလၢအနာ်အီၣ်အီၤတဖၣ်န့ၣ် ဟးတဲဘၣ်ပှၤဂၤ ဒီးပှၤဂၤစ့ၢ်ကီးနာ်အီၣ်အီၤ. ဖဲန့ၣ်အခါ နကတူၢ်ဘၣ်ဒ်လဲၣ်. နမ့ၢ်ကဲပှၤလၢ အသးအိၣ်ပှၤဂၤ ဒီးအဲၣ်ဒိး အိၣ်ဒီးမံၤဂ့ၤသၣ်ဂ့ၤန့ၣ် နဂ့ၢ်နကျိၤလၢ ပှၤတဲလံၣ်တဲလီဝဲန့ၣ် ကမၤဘၣ်ဒိနသး တမ့ၢ်ဧီၤ.—ကတိၤ ၂၂:၁.

^၂ ပမ့ၢ်ကွၢ် တၢ်အဒိတခါအံၤန့ၣ် ပနၢ်ပၢၢ် ယဟိဝၤယွၤ အတၢ်တူၢ်ဘၣ်သ့. ယဟိဝၤယွၤန့ၣ် အမူခိၣ်ကလူးတဂၤ တဲလံၣ်တဲလီဝဲအဂ့ၢ်လၢ နီၢ်အံၣ်အုအအိၣ်. ဒီးနီၢ်အံၣ်အု နာ်အီၣ်ဝဲ အတၢ်လံၣ်တၢ်လီ. ခီဖျိလၢ တၢ်လံၣ်တၢ်လီ တခါန့ၣ်အဃိ နီၢ်အံၣ်အု ဒီးစီၤအၤဒၣ် ထီဒါက့ၤယဟိဝၤယွၤ. အဃိ ပှၤဟီၣ်ခိၣ်ဖိခဲလၢာ် မၤတၢ်ဒဲးဘး ဒီးလၢခံန့ၣ် ဘၣ်သံဝဲ. (၁ မိၤ ၃:၁-၆; ရိ ၅:၁၂) တၢ်ကီတၢ်ခဲ, တၢ်သံ, တၢ်ဒုးတၢ်ယၤ ဒီးတၢ်နးတၢ်ဖှီၣ်န့ၣ် ဟဲကဲထီၣ်သး ခီဖျိလၢ မုၣ်ကီၤလံၢ် တဲလံၣ်တဲလီတၢ် ဖဲဧ့ၤဒ့ၣ်တၤသၣ်လီၢ်ပူၤအဃိ. ဘၣ်ဃးဒီး တၢ်လံၣ်တၢ်လီ ဒီးတၢ်ကီတၢ်ခဲလၢ အဟဲကဲထီၣ်သး ခီဖျိလၢ မုၣ်ကီၤလံၢ် လံၣ်တၢ်အဃိန့ၣ် ယဟိဝၤယွၤ တူၢ်ဘၣ်ဝဲ ဒ်လဲၣ်. ယဟိဝၤယွၤ တဘၣ်သးဝဲ နီတစဲးဘၣ်. သနာ်က့ ယဟိဝၤယွၤန့ၣ် တသးဒိၣ်ထီၣ်တၢ် ဒီးတသးအုးဘၣ်. အဆဲးကဲဝဲ “ကစၢ်ယွၤလၢ အသးခုတဂၤ.”—၁ တံၤ ၁:၁၁.

၃. ပအိၣ်ဒီး တၢ်ခွဲးတၢ်ယာ်လီၤဆီ မနုၤလဲၣ်.

^၃ ပအိၣ်ဒီး တၢ်ခွဲးတၢ်ယာ်လီၤဆီ လၢပကပာ်ဖျါထီၣ်လၢ မုၣ်ကီၤလံၢ်န့ၣ် အကဲပှၤလၢ အတဲလံၣ်တဲလီတၢ် ဘၣ်ဃးဒီး ယဟိဝၤယွၤအဂ့ၢ်. ပပာ်ဖျါထီၣ်သ့ ခီဖျိပမၤထွဲ တၢ်မၤလိာ် ယိယိဖိ လၢအမ့ၢ် “စံးထီၣ်ပတြၢၤ ယဟိဝၤယွၤ အမံၤ.” (စံး ၁၁၃:၁) ဒီးပစံးထီၣ်ပတြၢၤ  ယဟိဝၤယွၤအမံၤသ့ခီဖျိ ပတဲဘၣ်ပှၤဂၤ တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ်. နၤမီၤ, နကစံးထီၣ်ပတြၢၤ ယဟိဝၤယွၤ အမံၤဧါ. ပကကွၢ်သကိး တၢ်ဂ့ၢ်အရ့ဒိၣ်သၢထံၣ်လၢ အထိၣ်ဟူးထိၣ်ဂဲၤထီၣ်ပှၤ လၢပက စံးထီၣ်ပတြၢၤ ယဟိဝၤယွၤအမံၤ လၢပသးဒီဖျၢၣ်.

ပမ့ၢ်စံးထီၣ်ပတြၢၤ ယဟိဝၤယွၤအမံၤန့ၣ် ပမၤသးခုအသး

၄. ဘၣ်မနုၤအဃိ ပတၢ်စံးထီၣ်ပတြၢၤန့ၣ် အမၤသးခု ယဟိဝၤယွၤ အသးလဲၣ်. တဲဖျါထီၣ် တၢ်အဒိ. (ကွၢ်စ့ၢ်ကီးတၢ်ဂီၤ.)

^၄ ဖဲပစံးထီၣ်ပတြၢၤ ပပါအိၣ်လၢမူခိၣ် အမံၤအခါ ပမၤသးခုအသး. (စံး ၁၁၉:၁၀၈) သနာ်က့ ပမၤဒ်န့ၣ်န့ၣ် မ့ၢ်ဝဲခီဖျိလၢ သ့တၢ်လၢာ်ကစၢ်ယွၤန့ၣ် အလီၤဂာ်ဒ်သိးဒီး ပှၤဟီၣ်ခိၣ်ဖိလၢ အတကဲ ပှၤလၢပှၤပှဲၤဘၣ်, အတၢ်နာ်န့ၢ်လီၤသး တအိၣ်ဘၣ် ဒီးအသးလီ ပှၤဂၤအတၢ်စံးပတြၢၤ အဃိဧါ. တမ့ၢ်ဒ်န့ၣ်ဘၣ်. ဆိကမိၣ်ကွၢ် တၢ်အဒိတခါအံၤ. ဖိသၣ်ပိာ်မုၣ်ဖိတဂၤ လဲၤဃ့ၢ်ဖိးဟုအပါ ဒီးတဲအပါလၢ “လၢဟီၣ်ခိၣ်ချၢန့ၣ် နကဲပါပါလၢ အဂ့ၤကတၢၢ်လီၤ.” ဖိသၣ်ပိာ်မုၣ်ဖိအံၤ အတၢ်ကတိၤန့ၣ် ထိးဘၣ်အပါအသး ဒီးမၤသးခုအပါအသးဒိၣ်မး. မ့ၢ်ပါတဂၤအံၤ အကဲပှၤလၢ အတၢ်နာ်န့ၢ်လီၤသး တအိၣ်ဘၣ် ဒီးအလိၣ်ဘၣ် တၢ်စံးပတြၢၤလၢ အဖိမုၣ်ဖိအအိၣ်ဧါ. တမ့ၢ်ဒ်န့ၣ်ဘၣ်. ပါတဂၤအံၤ အသးခုန့ၣ် မ့ၢ်ဝဲခီဖျိလၢ အအဲၣ်အဖိမုၣ် ဒီးအသးခုလၢ အဖိမုၣ် ပာ်ဖျါထီၣ် အတၢ်အဲၣ် ဒီးတၢ်စံးဘျုးစံးဖှိၣ် လၢအဖီခိၣ်အဃိ. ဒီးအသ့ၣ်ညါဝဲလၢ ခီဖျိလၢ အဖိမုၣ်ကဲပှၤလၢ အသ့ၣ်ညါ ပာ်ဖျါထီၣ်တၢ်အဲၣ် ဒီးတၢ်စံးဘျုးစံးဖှိၣ်အဃိ ခါဆူညါ ဖဲအဒိၣ်ထီၣ်အခါ အကအိၣ်ဒီးတၢ်သးခု. ဒ်န့ၣ်အသိး ဖဲပစံးထီၣ်ပတြၢၤ ယဟိဝၤယွၤ လၢအမ့ၢ် ပပါလၢအဂ့ၤကတၢၢ်တဂၤအခါ ပမၤသးခုအသး စ့ၢ်ကီး.

၅. ဖဲပစံးထီၣ်ပတြၢၤ ယဟိဝၤယွၤ အမံၤအခါ ပပာ်ဖျါထီၣ် မုၣ်ကီၤလံၢ် တဲလံၣ်တၢ်ဒ်လဲၣ်.

^၅ ဖဲပစံးထီၣ်ပတြၢၤ ပပါအိၣ်လၢမူခိၣ်အခါ ပပာ်ဖျါထီၣ်လၢ တၢ်လံၣ်တၢ်လီလၢ မုၣ်ကီၤလံၢ် တဲဝဲဘၣ်ဃးဒီးပှၤန့ၣ် အတမ့ၢ်တတီဘၣ်. မုၣ်ကီၤလံၢ် တဲဝဲလၢ ပတတီဒီး ယဟိဝၤယွၤ ဒီးပတဒီသဒၢ အမံၤဘၣ်. ဒီးအတဲဝဲလၢ ပမ့ၢ်ထံၣ်ဘၣ် တၢ်မၤကွၢ်န့ၣ် ပတတီဒီး ယဟိဝၤယွၤလၢၤဘၣ်. မုၣ်ကီၤလံၢ် တဲဝဲလၢ ပမ့ၢ်တန့ၢ်ဘၣ် အဘျုးနီတမံၤဘၣ်န့ၣ် ပတကနၣ်ဃုာ် ကစၢ်ယွၤလၢၤဘၣ်. (ဘး ၁:၉-၁၁; ၂:၄) ဘၣ်ဆၣ် ပထံၣ်ဘၣ်လၢ စီၤယိၤဘးတီဒီး ယဟိဝၤယွၤ ဒီးအပာ်ဖျါထီၣ်လၢ မုၣ်ကီၤလံၢ်ကဲ ပှၤလံၣ်တၢ်. နၤမီၤ, နကတီဒီး ယဟိဝၤယွၤ စ့ၢ်ကီးဧါ. ပဝဲတဂၤဘၣ်တဂၤန့ၣ် ပအိၣ်ဒီး တၢ်ခွဲးတၢ်ယာ်လၢ ပကဒီသဒၢ ယဟိဝၤယွၤအမံၤ ဒီးမၤသးခုအသးခီဖျိ ပတီဒီးအီၤ ဒီးဘူၣ်ထီၣ်ဘါထီၣ်အီၤ. (ကတိၤ ၂၇:၁၁) ပမၤဘၣ်ဒ်န့ၣ်အဃိ အကဲဝဲ တၢ်ခွဲးတၢ်ယာ်လီၤဆီ ဖးဒိၣ်တခါညါ.

၆. ပကွၢ်လိ စီၤပၤဒၤဝံး ဒီးပှၤလ့ၤဝံဖိ အဒိအတဲာ် ကသ့ဒ်လဲၣ်. (နဃ့မယၤ ၉:၅)

^၆ ပှၤလၢအအဲၣ် ကစၢ်ယွၤန့ၣ် အဝဲသ့ၣ်သးအိၣ် စံးထီၣ်ပတြၢၤ ကစၢ်ယွၤအမံၤ လၢအသးဒီဖျၢၣ်ညါ. အဒိ စီၤပၤဒၤဝံး တဲဝဲလၢ “ယသးဧၢ, စံးထီၣ်ပတြၢၤ ယဟိဝၤယွၤတက့ၢ်. မ်ယစံးထီၣ်ပတြၢၤ အမံၤစီဆှံလၢ ယသးဒီဖျၢၣ်ညါတက့ၢ်.” (စံး ၁၀၃:၁) စီၤဒၤဝံး သ့ၣ်ညါဝဲလၢ ဖဲပစံးထီၣ်ပတြၢၤ ယဟိဝၤယွၤ အမံၤအခါ အလီၤဂာ်ဒ်သိးဒီး ပစံးထီၣ်ပတြၢၤ ယဟိဝၤယွၤ အနီၢ်ကစၢ်. ဖဲပနၢ်ဟူ ယဟိဝၤယွၤအမံၤအခါ ပဆိကမိၣ်ထီၣ်ဃုာ်ဒီး အတၢ်ပာ်သူၣ်ပာ်သး, အတၢ်ဂ့ၤတၢ်ဝါ ဒီးအတၢ်မၤလၢ အလီၤလိၢ်လီၤလးတဖၣ်. စီၤဒၤဝံးအဲၣ်ဒိး ပာ်စီဆှံ  ကစၢ်ယွၤအမံၤ ဒီးစံးထီၣ်ပတြၢၤအမံၤ. တကးဒံးဘၣ် အဘၣ်သး စံးထီၣ်ပတြၢၤ ကစၢ်ယွၤအမံၤ လၢအ “သးဒီဖျၢၣ်ညါ.” ပှၤလ့ၤဝံဖိစ့ၢ်ကီး ပာ်လီၤ တၢ်အဒိအတဲာ်လၢ ကစံးထီၣ်ပတြၢၤ ကစၢ်ယွၤအမံၤ. အဝဲသ့ၣ် အိၣ်ဒီးတၢ်ဆီၣ်လီၤသး ဒီးအၢၣ်လီၤတူၢ်လိာ်ဝဲလၢ တၢ်စံးထီၣ်ပတြၢၤလၢ ယဟိဝၤယွၤ ကြၢးဒိးန့ၢ်ဝဲန့ၣ် အဝဲသ့ၣ် တဲဖျါထီၣ်ဝဲလၢ တၢ်ကတိၤမၣ်တလၢာ်ဘၣ်. (ဖး နဃ့မယၤ ၉:၅.) ဒီးပနာ်သပှၢ်တၢၢ်လၢ အဝဲသ့ၣ်အတၢ်ဆီၣ်လီၤသး ဒီးအတၢ်စံးထီၣ်ပတြၢၤ လၢအဟဲထီၣ်လၢ အသးဒီဖျၢၣ်ညါန့ၣ် မၤသးခု ယဟိဝၤယွၤအသးဒိၣ်မး.

၇. ဖဲပလဲၤစံၣ်တဲၤတဲလီၤတၢ်အခါ ဒီးလၢပတၢ်အိၣ်မူ တနံၤဘၣ်နံၤန့ၣ် ပစံးထီၣ်ပတြၢၤ ယဟိဝၤယွၤ သ့ဒ်လဲၣ်.

^၇ ဆၢကတီၢ်ခဲအံၤ ပမၤသးခု ယဟိဝၤယွၤအသး သ့ခီဖျိ ပတဲဘၣ်ဃးဒီးအဂ့ၢ် ဒီးတဲဖျါထီၣ်လၢ ပစံးဘျုးစံးဖှိၣ်အီၤ ဒီးပအဲၣ်အီၤဒိၣ်မး. ဖဲပလဲၤစံၣ်တဲၤတဲလီၤတၢ်အခါ ပကဘၣ်နီၣ်ဘၣ်လၢ ပတၢ်တိာ်ပာ် အခိၣ်သ့ၣ်န့ၣ်မ့ၢ်ဝဲဒ်သိး ပကမၤစၢၤပှၤဂၤလၢ အဝဲသ့ၣ် ကဘၣ်သး ရ့လိာ်သးဒီး ယဟိဝၤယွၤ ဒီးသုးဘူးအသးလၢအအိၣ် ဒီးထံၣ်အီၤဒ် ပါတဂၤလၢအအဲၣ်ပှၤ. (ယၤ ၄:၈) ပဘၣ်သးတဲဘၣ်ပှၤဂၤလၢ ယဟိဝၤယွၤအဂ့ၢ်, အတၢ်အဲၣ်, အတၢ်တီတၢ်လိၤ, အတၢ်ကူၣ်သ့, အတၢ်စိတၢ်ကမီၤ ဒီးအတၢ်ဂ့ၤတၢ်ဝါ လၢအဂၤတဖၣ် လၢလံာ်စီဆှံအပူၤ. ဒီးဖဲပဂုာ်ကျဲးစၢး ကွၢ်လိ ယဟိဝၤယွၤအခါ ပပာ်ဖျါထီၣ်လၢ ပစံးထီၣ်ပတြၢၤအီၤ ဒီးမၤသးခုအသး. (အ့း ၅:၁) ခီဖျိလၢ ပမၤဒ်န့ၣ်အဃိ ပှၤထံၣ်ဝဲလၢ ပလီၤဆီဒီး ပှၤအဂၤတဖၣ် ဒီးအဝဲသ့ၣ် ဘၣ်သးသ့ၣ်ညါဝဲလၢ ဘၣ်မနုၤအဃိ ပလီၤဆီဒီးပှၤဂၤလဲၣ်. (မး ၅:၁၄-၁၆) အဃိ ဖဲပရ့လိာ်သး ဒီးမၤသကိးတၢ်ဒီး အဝဲသ့ၣ်အခါ ပတဲပၠးအဝဲသ့ၣ်လၢ ဘၣ်မနုၤအဃိ ပလီၤဆီဒီးပှၤအဂၤလဲၣ်သ့. လၢခံန့ၣ် ပှၤလၢအသးဘျၢတဖၣ် ကဘၣ်သး ရ့လိာ်သးဒီးယဟိဝၤယွၤ ဒီးသုးဘူးအသးလၢအအိၣ်. ပမ့ၢ်စံးထီၣ်ပတြၢၤ ယဟိဝၤယွၤ ဒ်အံၤန့ၣ် ပမၤတၢ်ဘၣ်အသး ဒီးမၤသးခုအသး.—၁ တံၤ ၂:၃, ၄.

ပမ့ၢ်စံးထီၣ်ပတြၢၤ ယဟိဝၤယွၤအမံၤန့ၣ် ပမၤသးခု ယ့ၣ်ၡူးအသး

၈. ယ့ၣ်ၡူး စံးထီၣ်ပတြၢၤ ယဟိဝၤယွၤအမံၤန့ၣ် အပာ်ဖျါထီၣ်ဝဲလၢ အဒိအတဲာ်ဒ်လဲၣ်.

^၈ လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ပှၤလၢအသ့ၣ်ညါ ယဟိဝၤယွၤအဂ့ၢ် အါထဲသိးဒီးယ့ၣ်ၡူးန့ၣ် တအိၣ်နီတဂၤဘၣ်. (မး ၁၁:၂၇) ယ့ၣ်ၡူးအဲၣ်အပါ ဒီးအပာ်လီၤ တၢ်အဒိလၢ အစံးထီၣ်ပတြၢၤ အပါယဟိဝၤယွၤအမံၤ. (ယိၤ ၁၄:၃၁) အဒိ တချုးဖဲ ယ့ၣ်ၡူးကသံအနၤန့ၣ် အဃ့ထုကဖၣ်လၢ အပါအအိၣ် ဒီးအတဲဘၣ်ဃးဒီး တၢ်အရ့ဒိၣ်ကတၢၢ်တခါလၢ အမၤဝဲဖဲ အမၤ တၢ်စံၣ်တဲၤတဲလီၤတၢ်မၤ လၢဟီၣ်ခိၣ်ချၢအခါ. အတဲဘၣ်အပါလၢ “ယဒုးသ့ၣ်ညါ အဝဲသ့ၣ်လၢနမံၤလံ.” (ယိၤ ၁၇:၂၆) ယ့ၣ်ၡူး ဒုးသ့ၣ်ညါပှၤဂၤလၢ ကစၢ်ယွၤအမံၤ ဒ်လဲၣ်.

၉. ဒ်သိးပှၤကသ့ၣ်ညါထီၣ် ယဟိဝၤယွၤအဂ့ၢ် ဒီးအတၢ်ပာ်သူၣ်ပာ်သး အိၣ်ဒ်လဲၣ်အဂီၢ် ယ့ၣ်ၡူး သူဝဲတၢ်အဒိ မနုၤလဲၣ်.

^၉ ပှၤယူဒၤဖိလၢ ယ့ၣ်ၡူး သိၣ်လိဝဲတဖၣ်န့ၣ် အဝဲသ့ၣ် သ့ၣ်ညါပာ်စၢၤ ကစၢ်ယွၤအမံၤလံ. ယ့ၣ်ၡူးတဲဘၣ်ပှၤဂၤလၢ အကစၢ်အမံၤမ့ၢ် ယဟိဝၤ တကးဒံးဘၣ် အဝဲ “တဲဖျါထီၣ် ကစၢ်ယွၤအဂ့ၢ်.” (ယိၤ ၁:၁၇, ၁၈) အဒိ လံာ်စီဆှံလၢ ဧ့ၤဘြံၤကျိာ်တကတြူၢ် ပာ်ဖျါထီၣ်ဝဲလၢ ယဟိဝၤယွၤန့ၣ် အသးကညီၤတၢ် ဒီးအသးဂ့ၤမး. (၂ မိၤ ၃၄:၅-၇) ဘၣ်ဃးဒီး တၢ်မ့ၢ်တၢ်တီတခါအံၤ ယ့ၣ်ၡူး ၡဲပၠးအါထီၣ်ဝဲ ဖဲအတဲ တၢ်ကတိၤဒိ ဘၣ်ဃးဒီး ဖိခွါလၢအဟးဖျိးတဂၤ ဒီးအပါအဂ့ၢ်. လၢတၢ်ကတိၤဒိတခါန့ၣ် ပဖးဘၣ်လၢ ပါတဂၤန့ၣ် ထံၣ်စိအဖိခွါ လၢအပီၢ်ယၢ်လီၤက့ၤအသး. ဒီး “ဖဲအဝဲအိၣ်စီၤစုၤ ဖးယံၤဒံးအခါ” ပါတဂၤန့ၣ် လဲၤဃ့ၢ်လၢအအိၣ်, ဖိးဟုအီၤ ဒီးပျၢ်ကွံာ်အတၢ်ကမၣ် လၢာ်လၢာ်ဆ့ဆ့. တၢ်အဒိတခါအံၤ ဒုးသ့ၣ်ညါပှၤလၢ ယဟိဝၤယွၤန့ၣ် အအိၣ်ဒီး တၢ်သးကညီၤ ဒီးအသးဂ့ၤဒိၣ်မး. (လူၤ ၁၅:၁၁-၃၂) ယ့ၣ်ၡူး သိၣ်လိတၢ်ဒ်အံၤအဃိ အမၤစၢၤပှၤဂၤဒ်သိး ပှၤကသ့ၣ်ညါထီၣ် ယဟိဝၤယွၤအဂ့ၢ် ဒီးယဟိဝၤယွၤ အတၢ်ပာ်သူၣ်ပာ်သး အိၣ်ဒ်လဲၣ်စ့ၢ်ကီး.

၁၀. (က) ယ့ၣ်ၡူး သူဝဲအပါအမံၤ ဒီးအဘၣ်သးလၢ ပှၤဂၤကသူအပါအမံၤန့ၣ် ပသ့ၣ်ညါဘၣ်ဒ်လဲၣ်. (မၢ်ကူး ၅:၁၉) (ကွၢ်စ့ၢ်ကီးတၢ်ဂီၤ.) (ခ) ဆၢကတီၢ်ခဲအံၤစ့ၢ်ကီး ယ့ၣ်ၡူး ဘၣ်သးလၢ ပကမၤမနုၤလဲၣ်.

^၁၀ မ့ၢ်ယ့ၣ်ၡူး ဘၣ်သးလၢ ပှၤကသူအပါအမံၤ စ့ၢ်ကီးဧါ. အဘၣ်သးဝဲလၢ ပှၤကသူဝဲ. တၢ်ဘူၣ်တၢ်ဘါခိၣ်နၢ်တနီၤ နာ်ဝဲလၢ ပှၤမ့ၢ်သူ ကစၢ်ယွၤအမံၤန့ၣ် အတလီၤပာ်ကဲဘၣ်. သနာ်က့ ယ့ၣ်ၡူး ဆဲးသူဝဲ ဒီးမၤလၤကပီၤ အပါအမံၤ ဒီးအတပျဲဝဲလၢ လုၢ်လၢ်လၢ အတသန့ၤထီၣ်သးလၢ လံာ်စီဆှံအံၤ ကမၤပတုာ်အီၤဘၣ်. ဆိကမိၣ်ကွၢ်က့ၤ ဖဲယ့ၣ်ၡူး မၤဘျါဝဲ ပိာ်ခွါလၢ တၢ်ဝံတၢ်နါ အိၣ်လၢအလိၤတဂၤ ဖဲကရၤစံၤ ဟီၣ်ကဝီၤ အဆၢကတီၢ်. ပှၤလၢအထံၣ်တ့ၢ် တၢ်မၤအသးတဖၣ်န့ၣ် အဝဲသ့ၣ်ပျံၤတၢ် ဒီးဃ့ကညးယ့ၣ်ၡူးလၢ အကဟးထီၣ်ကွံာ် အဃိ  ယ့ၣ်ၡူး ဟးထီၣ်ကွံာ်လၢ ဟီၣ်ကဝီၤအဝဲန့ၣ်. (မၢ် ၅:၁၆, ၁၇) သနာ်က့ ယ့ၣ်ၡူး ဘၣ်သးလၢ ပှၤအိၣ်ဖဲန့ၣ်တဖၣ် ကသ့ၣ်ညါထီၣ် ယဟိဝၤယွၤအမံၤ. အဃိ ယ့ၣ်ၡူးမၢဝဲ ပိာ်ခွါလၢအမၤဘျါဝဲတဂၤန့ၣ် က့ၤတဲဘၣ်ပှၤဂၤ ဘၣ်ဃးဒီး တၢ်ခဲလၢာ်လၢ ယဟိဝၤယွၤ မၤန့ၢ်အီၤ, ယ့ၣ်ၡူးတမၢအတဲလၢ အမၤန့ၢ်အီၤဘၣ်. (ဖး မၢ်ကူး ၅:၁၉.) ဆၢကတီၢ်ခဲအံၤစ့ၢ်ကီး ယ့ၣ်ၡူး ဘၣ်သးဝဲလၢ ပကဒုးသ့ၣ်ညါ ပှၤအိၣ်လၢ ဟီၣ်ခိၣ်ဒီဘ့ၣ်ညါ လၢယဟိဝၤယွၤအမံၤ. (မး ၂၄:၁၄; ၂၈:၁၉, ၂၀) ဒီးပမ့ၢ်မၤဒ် ပစီၤပၤယ့ၣ်ၡူး မၤလိာ်ပှၤအသိးန့ၣ် ပကမၤသးခုအသး.

၁၁. ယ့ၣ်ၡူး သိၣ်လိ အပျဲၢ်အဘီၣ်လၢ ကဃ့ထုကဖၣ်လၢ မနုၤအဂီၢ်လဲၣ် ဒီးဘၣ်မနုၤအဃိ အရ့ဒိၣ်လဲၣ်. (ယဃ့းစက့လး ၃၆:၂၃)

^၁၁ ယ့ၣ်ၡူး သ့ၣ်ညါဝဲလၢ ယဟိဝၤယွၤ အတၢ်တိာ်ပာ်န့ၣ် မ့ၢ်ဝဲဒ်သိး အကပာ်စီဆှံအမံၤ ဒီးအကပာ်ဖျါထီၣ်လၢ တၢ်လံၣ်တၢ်လီ ဘၣ်ဃးဒီးအဂ့ၢ်န့ၣ် တမ့ၢ်တတီ နီတခါဘၣ်. အဃိ ယ့ၣ်ၡူး လၢအမ့ၢ် ပသရၣ်န့ၣ် အသိၣ်လိ အပျဲၢ်အဘီၣ်လၢ ကဃ့ထုကဖၣ် လၢကစၢ်ယွၤ အမံၤအဂီၢ်ဒ်အံၤ. “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.” (မး ၆:၉) ယ့ၣ်ၡူး သ့ၣ်ညါဝဲလၢ တၢ်ဂ့ၢ်အရ့ဒိၣ်တခါအံၤ အဘၣ်ဃးဒီး ကစၢ်ယွၤ အတၢ်ဘၣ်တ့ခဲလၢာ်. (ဖး ယဃ့းစက့လး ၃၆:၂၃.) လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ပှၤလၢအပာ်စီဆှံ ယဟိဝၤယွၤအမံၤ ထဲသိးဒီး ယ့ၣ်ၡူးန့ၣ် တအိၣ်နီတဂၤဘၣ်. သနာ်က့ ဖဲယ့ၣ်ၡူး အဒုၣ်အဒါတဖၣ် ဖီၣ်အီၤအခါ အဝဲသ့ၣ် ပာ်တၢ်ကမၣ်လၢ ယ့ၣ်ၡူးအလိၤ ဒီးတဲဝဲလၢ ယ့ၣ်ၡူး တပာ်ကဲ ယဟိဝၤယွၤ အမံၤဘၣ်. ယ့ၣ်ၡူး သ့ၣ်ညါစ့ၢ်ကီးလၢ ပှၤတဂၤလၢ အတဲဟးဂီၤ ကစၢ်ယွၤအမံၤစီဆှံန့ၣ် မ့ၢ်ပှၤလၢ အမၤတၢ်ဒဲးဘး အဒိၣ်ကတၢၢ်. ဒီးပှၤပာ်ဒ့ၣ်ပာ်ကမၣ်အီၤ ဒ်န့ၣ်အဃိ ယ့ၣ်ၡူး အသးကဘၣ်ဒိဒိၣ်မး. ဒီးတချုးဖဲ ပှၤဟဲဖီၣ်ယ့ၣ်ၡူးဒံးဘၣ်အခါ ယ့ၣ်ၡူး “တူၢ်ဘၣ်တၢ် နးမး” န့ၣ်ဘၣ်သ့ၣ်သ့ၣ် ကမ့ၢ်လၢ တၢ်ပာ်ဒ့ၣ်ပာ်ကမၣ် တခါအံၤအဃိ.—လူၤ ၂၂:၄၁-၄၄.

၁၂. ဒ်သိး ယ့ၣ်ၡူး ကပာ်စီဆှံ အပါအမံၤအဂီၢ် အလဲၤခီဖျိဘၣ် တၢ်အိၣ်သးမနုၤလဲၣ်.

^၁၂ ဒ်သိး ယ့ၣ်ၡူး ကပာ်စီဆှံ အပါအမံၤအဂီၢ် အဘၣ်တူၢ်ဝဲ တၢ်မၤအၢမၤနး, တၢ်ကတိၤထီဒါ ဒီးတၢ်ပာ်ဒ့ၣ်ပာ်ကမၣ်အါမး. အသ့ၣ်ညါလၢ အဒိကနၣ် အပါအကလုၢ်ထီဘိ ဒီးအတပာ် တၢ်မဲာ်ဆှးလၢ တၢ်နီတမံၤဘၣ်. (ဧ့ၤ ၁၂:၂) အသ့ၣ်ညါဝဲလၢ ဖဲအလဲၤခီဖျိ တၢ်အိၣ်သး ကီခဲနးမးအံၤအခါ မုၣ်ကီၤလံၢ် မၤကီမၤခဲအီၤစ့ၢ်ကီး. (လူၤ ၂၂:၂-၄; ၂၃:၃၃, ၃၄) မုၣ်ကီၤလံၢ် ဘၣ်သးမၤဟးဂီၤ ယ့ၣ်ၡူးအတၢ်သးတီ သနာ်က့ အမၤဝဲတန့ၢ် နီတစဲးဘၣ်. ယ့ၣ်ၡူး ပာ်ဖျါထီၣ်ဝဲ လီၤတံၢ်လီၤဆဲးလၢ မုၣ်ကီၤလံၢ်န့ၣ် အကဲပှၤလံၣ်တၢ် လၢအအၢအသီတဂၤ. တကးဒံးဘၣ် ယ့ၣ်ၡူး ပာ်ဖျါထီၣ်ဝဲလၢ ယဟိဝၤယွၤ အိၣ်ဒီးအခ့အပှၤလၢ အတီဒီးအီၤ ဒီးအဝဲသ့ၣ် မ့ၢ်ထံၣ်ဘၣ် တၢ်မၤကွၢ် ကီကီခဲခဲဘၣ်ဆၣ် အဝဲသ့ၣ် ဆဲးအိၣ်ဒီး တၢ်သးတီသ့.

၁၃. နမၤသးခု နစီၤပၤအသး ကသ့ဒ်လဲၣ်.

^၁၃ နဘၣ်သး မၤသးခု နစီၤပၤအသးဧါ. နမ့ၢ်ဘၣ်သးမၤဒ်န့ၣ်န့ၣ် ဆဲးစံးထီၣ်ပတြၢၤ ယဟိဝၤယွၤအမံၤ, မၤစၢၤပှၤဂၤဒ်သိး ကသ့ၣ်ညါထီၣ် ယဟိဝၤယွၤ ဒီးအတၢ်ဂ့ၢ်တၢ်ဝါတဖၣ်အဂ့ၢ်. နမ့ၢ်မၤဒ်န့ၣ်န့ၣ် န ပာ်ဖျါထီၣ်လၢ နကွၢ်လိ ယ့ၣ်ၡူး အဒိအတဲာ် ဒီးယီၢ်အခီၣ်လီၢ်. (၁ ပ့း ၂:၂၁) ဒီးဒ်ယ့ၣ်ၡူးအသိး နကမၤသးခု ယဟိဝၤယွၤအသး ဒီးနကပာ်ဖျါထီၣ်လၢ ကစၢ်ယွၤအဒုၣ်အဒါ မုၣ်ကီၤလံၢ်န့ၣ် အကဲပှၤလံၣ်တၢ် လၢအတၢ်မဲာ်ဆှးတအိၣ်ဘၣ်.

ပမ့ၢ်စံးထီၣ်ပတြၢၤ ယဟိဝၤယွၤအမံၤန့ၣ် လီၤဂာ်ဒ်သိး ပမၤပူၤဖျဲးပှၤသးသမူ

၁၄-၁၅. ပမ့ၢ်သိၣ်လိပှၤဂၤ ယဟိဝၤယွၤအဂ့ၢ်န့ၣ် တၢ်ကကဲထီၣ်သးဒ်လဲၣ်.

^၁၄ ပမ့ၢ်စံးထီၣ်ပတြၢၤ ယဟိဝၤယွၤအမံၤန့ၣ် လီၤဂာ်ဒ်သိး ပမၤပူၤဖျဲးပှၤသးသမူ. ပမ့ၢ်ဘၣ်ကွၢ်န့ၣ် “ပှၤလၢ အတစူၢ်တနာ်တၢ်ဘၣ်တဖၣ်အံၤ ဟီၣ်ခိၣ်အကစၢ် မၤခံးအဝဲသ့ၣ်အသး.” (၂ ကရံၣ် ၄:၄) အဃိ အဝဲသ့ၣ်နာ်ဝဲ ဟီၣ်ခိၣ်အကစၢ် မုၣ်ကီၤလံၢ် အတၢ်လံၣ်တၢ်လီ. တၢ်လံၣ်တၢ်လီ တနီၤန့ၣ်မ့ၢ်ဝဲ– ကစၢ်ယွၤ တအိၣ်ဘၣ်, ကစၢ်ယွၤ အိၣ်ယံၤဒီးပှၤ ဒီးအတသးအိၣ် ပှၤဟီၣ်ခိၣ်ဖိဘၣ်, ကစၢ်ယွၤန့ၣ် အသးအၢ ဒီးအမၤအၢမၤနး ပှၤမၤကမၣ်တၢ်တဖၣ် လီၤထူလီၤယိာ်. မုၣ်ကီၤလံၢ်တဲဝဲ တၢ်လံၣ်တၢ်လီတဖၣ်အံၤ ခီဖျိလၢ အဘၣ်သးမၤဟးဂီၤ ယဟိဝၤယွၤ အမံၤဂ့ၤသၣ်ဂ့ၤ ဒီးအတဘၣ်သးလၢ ပှၤဟီၣ်ခိၣ်ဖိ ကရ့လိာ်သးဒီး ယဟိဝၤယွၤ ဒီးသုးဘူးသးလၢ အအိၣ်ဘၣ်. အဃိ ဖဲပလဲၤစံၣ်တဲၤတဲလီၤတၢ်အခါ အလီၤဂာ်ဒ်သိးဒီး ပမၤဟးဂီၤ မုၣ်ကီၤလံၢ် အတၢ်တိာ်ပာ်. ဒီးဖဲပသိၣ်လိပှၤဂၤ တၢ်မ့ၢ်တၢ်တီ ဘၣ်ဃးဒီး ပပါအိၣ်လၢ မူခိၣ်အဂ့ၢ်အခါ ပစံးထီၣ်ပတြၢၤ ပကစၢ်ယွၤ အမံၤစီဆှံ. ပမၤဒ်န့ၣ်အဃိ တၢ်ကဲထီၣ်သးဒ်လဲၣ်.

^၁၅ လံာ်စီဆှံ တၢ်မ့ၢ်တၢ်တီန့ၣ် အိၣ်ဒီး အစိကမီၤဒိၣ်မး. ပမ့ၢ်သိၣ်လိပှၤဂၤ ဘၣ်ဃးဒီး ယဟိဝၤယွၤအဂ့ၢ် ဒီးအတၢ်ပာ်သူၣ်ပာ်သးန့ၣ် ပကထံၣ်ဘၣ် တၢ်လီၤကမၢကမၣ်တဖၣ်. ပကထံၣ်ဘၣ်လၢ မုၣ်ကီၤလံၢ် အတၢ်လံၣ်တၢ်လီ လၢအမၤခံးပှၤဂၤအသးန့ၣ် ကလီၤမၢ်ကွံာ် ကယီကယီ ဒီးပှၤကထံၣ်ထီၣ် ယဟိဝၤယွၤ အတၢ်ဂ့ၤတၢ်ဝါ ဒ်ပထံၣ်ထီၣ်အသိး. ပှၤဂၤ ကသ့ၣ်ညါဘၣ်လၢ ယဟိဝၤယွၤ အိၣ်ဒီးတၢ်စိတၢ်ကမီၤ ဒိၣ်ဒိၣ်မုၢ်မုၢ်အဃိ အဝဲသ့ၣ် ကကမၢကမၣ်ဒိၣ်မး. (ၡါ ၄၀:၂၆) အဝဲသ့ၣ် သ့ၣ်ညါဘၣ်ဝဲလၢ ယဟိဝၤယွၤ မ့ၢ်ပှၤလၢအစံၣ်ညီၣ်တၢ် တီတီလိၤလိၤအဃိ အဝဲသ့ၣ် နာ်န့ၢ်ယဟိဝၤယွၤ. (၅ မိၤ ၃၂:၄) အဝဲသ့ၣ် ကဒိးန့ၢ်ဘၣ် တၢ်ကူၣ်သ့အါမး လၢယဟိဝၤယွၤအအိၣ်. (ၡါ ၅၅:၉; ရိ ၁၁:၃၃) ဒီးအဝဲသ့ၣ် သ့ၣ်ညါဘၣ်ဝဲလၢ ကစၢ်ယွၤ မ့ၢ်တၢ်အဲၣ်တၢ်ကွံအဃိ အဝဲသ့ၣ် သးမုာ်ထီၣ်ဒိၣ်မး. (၁ ယိၤ ၄:၈) အဃိ အဝဲသ့ၣ် မ့ၢ်ဆဲးမၤဂ့ၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အဝဲသ့ၣ် အတၢ်မုၢ်လၢ်လၢ ကအိၣ်မူဘၣ် လီၤထူလီၤယိာ် ဒ်ကစၢ်ယွၤအဖိအသိးန့ၣ် ကဟဲလၢပှဲၤထီၣ်နီၢ်ကီၢ်. ပန့ၢ်ဘၣ် တၢ်ခွဲးတၢ်ယာ်လီၤဆီ လၢပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ဒီးသုးဘူးသးလၢ ကစၢ်ယွၤအအိၣ်အဃိ ပသးခုဖးဒိၣ်ညါ. ပမ့ၢ်ဆဲးမၤစၢၤပှၤဂၤ ဒ်န့ၣ်န့ၣ် ယဟိဝၤယွၤ ကထံၣ်ပှၤဒ် “ပှၤလၢ အမၤသကိးတၢ်” ဒီးအီၤ.—၁ ကရံၣ် ၃:၅, ၉.

၁၆. ပှၤတနီၤသ့ၣ်ညါဘၣ် ကစၢ်ယွၤအမံၤအဃိ ကဲဘျုးလၢ အဝဲသ့ၣ်အဂီၢ်ဒ်လဲၣ်. တဲဖျါထီၣ် တၢ်အဒိ.

 ^၁၆ လၢအခီၣ်ထံးခါန့ၣ် ပကသိၣ်လိပှၤဂၤ ယိယိဖိလၢ ကစၢ်ယွၤအမံၤမ့ၢ် ယဟိဝၤ. တၢ်သိၣ်လိ ယိယိဖိတခါန့ၣ် အဆီတလဲဝဲ ပှၤလၢအသးဘျၢတဖၣ် အတၢ်အိၣ်မူသ့. အဒိ ပိာ်မုၣ်သးစၢ်တဂၤ လၢအမံၤမ့ၢ် အလံယၤန့ၣ် a အတဒိၣ်ထီၣ်ဘၣ်လၢ ခရံာ်ဖိ တၢ်ဘူၣ်တၢ်ဘါ အပူၤဘၣ်. ဘၣ်ဆၣ် အတသးမံဒီး အတၢ်ဘူၣ်တၢ်ဘါဘၣ် ဒီးအတူၢ်ဘၣ်လၢ အတသ့ၣ်ညါ ကစၢ်ယွၤအဂ့ၢ် ဂ့ၤဂ့ၤဘၣ်. သနာ်က့ ဖဲအစးထီၣ် မၤလိလံာ်စီဆှံဒီး ယဟိဝၤပှၤအုၣ်အသးအခါ အတတူၢ်ဘၣ်ဝဲ ဒ်န့ၣ်လၢၤဘၣ်. အထံၣ်ဝဲ ကစၢ်ယွၤ ဒ်အသကိးတဂၤ. ဒီးအသ့ၣ်ညါဘၣ်ဝဲလၢ ကစၢ်ယွၤအမံၤန့ၣ် ပှၤထုးထီၣ်ကွံာ်ဝဲလၢ လံာ်စီဆှံအါဘ့ၣ်အပူၤ ဒီးပှၤကွဲးထၢနုာ်က့ၤလၢ အမံၤလၤသၣ်ကပီၤ ယိယိဖိ ဒ်သိးဒီးကစၢ်အဃိ အကမၢကမၣ် ဖးဒိၣ်ညါ. အသ့ၣ်ညါဘၣ် ယဟိဝၤယွၤ အမံၤအဃိ အတၢ်အိၣ်မူ ဆီတလဲထီၣ် ဖးဒိၣ်ညါ. အတဲဝဲလၢ “ယသကိးလၢအဂ့ၤကတၢၢ်တဂၤအံၤန့ၣ် အအိၣ်ဒီးအမံၤ နီၢ်ကီၢ်လီၤမၢၤ. ယတူၢ်ဘၣ်လၢ ကစၢ်ယွၤ ပာ်လုၢ်ပာ်ပှ့ၤယၤ ဒိၣ်မး. ခဲအံၤ ယဒိးန့ၢ်ဘၣ် တၢ်သူၣ်မံသးမုာ် ဖးအါညါ.” ပိာ်ခွါတဂၤလၢ အမံၤမ့ၢ် စတံၤန့ၣ် အကဲပှၤဒ့တၢ်ဖိ ဒီးအဒိၣ်ထီၣ်ဘၣ်လၢ ပှၤယူဒၤဖိ အတၢ်ဘူၣ်တၢ်ဘါ လၢအအိၣ်ဒီး တၢ်သိၣ်တၢ်သီလၢ အဃံးဒိၣ်မး. အထံၣ်ဘၣ်ဝဲလၢ တၢ်ဘူၣ်တၢ်ဘါန့ၣ် တဲတမံၤမၤတမၠိအဃိ အတဘၣ်သး ကနၣ်ဃုာ် တၢ်ဘူၣ်တၢ်ဘါလၢၤဘၣ်. ဘၣ်ဆၣ် ဖဲအမိသံဝံၤအလီၢ်ခံ အဆ့ၣ်နီၤ ဒိကနၣ်ဝဲ တၢ်မၤလိလံာ်စီဆှံတခါလၢ ယဟိဝၤပှၤအုၣ်အသးတဂၤ သိၣ်လိဝဲ. အနၢ်ဟူဘၣ် ကစၢ်ယွၤအမံၤအဃိ ထိးဘၣ်အသးဒိၣ်မး. အတဲဝဲလၢ “လၢညါန့ၣ် ယတနၢ်ဟူဘၣ် ကစၢ်ယွၤအမံၤ နီတဘျီဘၣ်. မ့မ့ၢ်ခဲအံၤဒု ယသ့ၣ်ညါဘၣ်လၢ ကစၢ်ယွၤ အိၣ်ဝဲသပှၢ်တၢၢ်. အကဲပှၤတဂၤလၢ အအိၣ်ဝဲအနီၢ်ကီၢ်. ဒီးယသ့ၣ်ညါဘၣ်လၢ ယအိၣ်ဒီး ယသကိးနီၢ်ကီၢ်တဂၤလံ.”

၁၇. ဘၣ်မနုၤအဃိ ပဘၣ်ပာ်လီၤသးလၢ ပကဆဲးစံးထီၣ်ပတြၢၤ ယဟိဝၤယွၤ အမံၤလဲၣ်. (ကွၢ်စ့ၢ်ကီးတၢ်ဂီၤ.)

^၁၇ ဖဲပလဲၤစံၣ်တဲၤတဲလီၤတၢ် ဒီးသိၣ်လိပှၤဂၤ လံာ်စီဆှံအခါ မ့ၢ်ပတဲဘၣ်ပှၤဂၤလၢ ယဟိဝၤယွၤ အမံၤစီဆှံ အဂ့ၢ်ဧါ. ပမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ယဟိဝၤယွၤ အတၢ်ပာ်သူၣ်ပာ်သးဧါ. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပစံးထီၣ်ပတြၢၤ ကစၢ်ယွၤအမံၤ. ပကဘၣ် ဆဲးစံးထီၣ်ပတြၢၤ ယဟိဝၤယွၤ အမံၤစီဆှံ ဒီးမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ယဟိဝၤယွၤအဂ့ၢ်ထီဘိ. ပမ့ၢ်ဆဲးမၤဒ်န့ၣ်န့ၣ် လီၤဂာ်ဒ်သိး ပမၤပူၤဖျဲးပှၤသးသမူ ဒီးပကွၢ်လိ ပစီၤပၤ ယ့ၣ်ၡူးခရံာ် အဒိအတဲာ်. တကးဒံးဘၣ် ပကမၤသးခု ပပါအိၣ်လၢမူခိၣ် ယဟိဝၤယွၤအသး. မ်ပဝဲကိးဂၤဒဲး ဆဲး ‘စံးထီၣ်ပတြၢၤအမံၤ လီၤထူလီၤယိာ်.’—စံး ၁၄၅:၂.