1-2. Yinki lenda sadisa beto na kuzaba yinki ya ke salaka na Yehova ntangu ba ke bebisaka nkumbu ya yandi?

 KANISA na mambu yayi: Muntu yina nge ke zolaka me zonza mambu ya yimbi na nkumbu ya nge. Nge me zaba ti ya ke luvunu, kasi mingi ke na ndimaka yawu. Ya kulutila yimbi, bantu ke na vutukilaka mambu yango, mpe mingi ke na kwikilaka na yawu. Yinki ya ke sala nge na ntima? Kana nge kipe bantu mpe bamambu yina ba ke na zonzaka na nkumbu ya nge, ya ke sala nge mpasi.​—Bin. 22:1.

² Na kifwani yayi, beto lenda zaba yinki ya salaka na Yehova ntangu ba bebisaka nkumbu ya yandi. Mosi ya bambazi ya yandi vuninaka yandi bamambu na kento ya ntete, Eve. Yandi kwikilaka na luvunu yango. Luvunu yayi nataka bibuti ya beto ya ntete na kupesa mukongo na Yehova. Ni yawu salaka ti disumu mpe lufwa kota na yinza. (Kub. 3:1-6; Rom. 5:12) Samu Satana zonzaka luvunu na bilanga ya Eden, bubu yayi, beto ke na talaka bamambu mutindu lufwa, bamvita, mpe bampasi ya mutindu na mutindu. Luvunu nyonso yayi, mpe bamambu nyonso yina ya nataka, salaka kwandi Yehova mpasi na ntima? Ee. Kasi Yehova bumbaka ve nkele. Biblia ke bokilaka yandi “Nzambi yina kele ya kufuluka na . . . kyese.”​—1 Tim. 1:11.

3. Wa’ faso beto lenda lakisa ti Satana vuninaka Yehova bamambu?

³ Biblia ke zonzaka: ‘Kumisa nkumbu ya Yehova.’ (Nku. 113:1) Ntangu beto ke salaka yawu, beto ke lakisaka ti Satana vuninaka Yehova bamambu. Beto ke kembilaka Yehova, ntangu beto ke samunaka nkumbu ya yandi ya santu. Nge ke salaka kwandi yawu? Beto tala bamambu tatu, yina lenda sadisa beto na kukembila Nzambi ya beto Yehova, na ntima nyonso.

 BETO KE SEPELISAKA YEHOVA NTANGU BETO KE KEMBILAKA YANDI

4. Samu na yinki kukembila Yehova ke sepelisaka yandi? Pesa kifwani. (Tala mpe kizizi.)

⁴ Ntangu beto ke kembilaka Yehova, beto ke sepelisaka yandi. (Nku. 119:108) Bantu mingi ke talaka ti ba ke kaka bantu ya mpamba. Na yawu, ba ke vandaka na nsatu ba kembila bawu to ba zonzila bawu bamambu ya mbote samu ba kuzwa ngolo. Nzambi ke kwandi faso bantu? Ve. Beto baka kifwani. Kanisa na mwana ya fioti yina me zonza na tata ya yandi: “Nge ke tata ya kulutila ba tata nyonso ya yinza!” Mambu yayi me sepelisa tata ya yandi. Samu na yinki? Yandi ke talaka kwandi ti, yandi ke kaka muntu mpamba mpe ke na nsatu mwana ya yandi kembila yandi? Ve. Yandi ke sepelaka na kutala mwana ya yandi lakisa luzolo. Yandi me zaba ti, kana mwana ya yandi kula na kifu ya kulakisaka luzolo mpe kuvutulaka matondo, yandi ke vanda na kilengi na luzingu. Kaka faso mosi, Yehova ke sepelaka ntangu beto ke kembilaka yandi.

5. Wapi bamambu ya luvunu Satana ke zonzaka, mpe wa’ faso beto lenda lakisa ti ya ke luvunu?

⁵ Ntangu beto ke kembilaka Tata ya beto ya mazulu, beto ke sadisaka na kusukula nkumbu ya yandi na mambu yina ba vuninaka yandi. Satana ke zonzaka ti, ata muntu lenda nwanina nkumbu ya Yehova na kukwikama nyonso. Yandi ke zonzaka mpe ti, ata muntu lenda kangama na Yehova na ntangu ya mpasi. Yandi zonzaka mpe ti, kana beto tala ti kupesa Yehova mukongo ke natina beto bambote, beto ke bika kusadila yandi. (Yobi 1:9-11; 2:4) Samu Yobi bikanaka ya kukwikama, yandi lakisaka ti Satana ke na luvunu. Nge ke landa kwandi kifwani ya yandi? Mosi na mosi ya beto ke na bweso ya kuvanda ya kukwikama na nkumbu ya Nzambi, ntangu beto ke sadilaka yandi. Ni yina, ke pesaka yandi kilengi. (Bin. 27:11) Kusala yawu ke lakisa ti beto ke zitisaka yandi.

6. Wa’ faso beto lenda landa kifwani ya Mfumu Davidi mpe ya Balevi? (Nehemi 9:5)

⁶ Luzolo samu na Nzambi ke nataka bantu ya kukwikama na kukembila nkumbu ya yandi na ntima nyonso. Mfumu Davidi sonikaka: ‘Bika mu kumisa Yehova. Bika ti bima nyonso yina ke na kati ya munu kukumisa nkumbu ya yandi ya santu.’ (Nku. 103:1) Davidi bakulaka ti, kukembila nkumbu ya Yehova ke ni kukembila yandi. Nkumbu ya Nzambi ke lakisaka nani yandi kele, bifu ya mbote yina ke na yandi, mpe bamambu ya kitoko yina yandi ke salaka. Samu na Davidi, nkumbu ya Yehova ke santu mpe yandi vanda sosa kukembila yawu. Yandi zolaka kusala yawu na “bima nyonso yina ke na kati ya” yandi. Ya zola zonza, na ntima nyonso. Balevi mpe kembilaka Yehova. Na kukuluka nyonso, ba zonzaka ti ata mambu yina ba lenda zonza lenda kembila nkumbu ya  Yehova ya santu na mutindu ya kulunga. Nehemi 9:5 (NWT) ke zonzaka: “Balevi yayi Yeshua, Kadmiele, Bani, Ashabneya, Sherebia, Odia, Shebania, na Petaya tubaka ti: ‘Beno telama mpe beno kumisa Yehova Nzambi ya beno mvula na mvula. Bika ti ba kumisa nkumbu ya nge ya nkembo, yina ke na zulu kuluta balusakumunu mpe minkembo nyonso.’” Ntembe ve, kukembila Yehova na kukuluka nyonso mutindu yayi, pesaka yandi kilengi.

7. Wa’ faso beto lenda kembila Yehova konso kilumbu mpe na kisalu ya kusamuna?

⁷ Bubu yayi, beto lenda sepelisa Yehova ntangu beto ke samunaka na tiya mpe luzolo nyonso. Ntangu beto ke samunaka, beto ke sosaka kusadisa bantu na kuzaba Yehova mpe na kutala nani kele Tata ya beto ya luzolo. (Zaki 4:8) Beto ke sepelaka na kulakisa na bantu, faso Biblia ke zonzilaka mbote-mbote nani Yehova kele, mpe bifu yina ke na yandi mutindu luzolo, lunungu, ndwenga, ngolo, mpe bifu ya nkaka. Beto ke kembilaka mpe Yehova, ntangu beto ke salaka bangolo samu na kulanda kifwani ya yandi. Ya ke sepelisaka yandi. (Ef. 5:1) Ntangu beto ke salaka yawu, bantu ya nkaka lenda tala ti, beto ke ve faso mosi na bantu ya yimbi ya yinza yayi. Ya lenda nata bawu na kusosa kuzaba samu na yinki. (Mat. 5:14-16) Ntangu beto ke vandaka na bawu bilumbu nyonso, beto lenda kuzwa ntangu ya kusadisa bawu na kuzaba samu na yinki. Ya lenda benda bantu ya ntima ya mbote na Yehova. Ntangu beto ke kembilaka Yehova na bafaso yayi, beto ke pesaka yandi kilengi na ntima.​—1 Tim. 2:3, 4.

BETO KE SEPELISAKA YESU NTANGU BETO KE KEMBILAKA NKUMBU YA YEHOVA

8. Samu na yinki Yesu ke kifwani ya mbote na yina me tadila kukembila nkumbu ya Yehova?

⁸ Ya ke ve na muntu na zulu to na ntoto yina me zaba Yehova kulutila Yesu. (Mat. 11:27) Yesu ke zolaka Tata ya yandi, mpe lakisaka ti yandi vanda kembilaka nkumbu ya yandi. (Yoa. 14:31) Samu na kulakisa kisalu yina yandi salaka na ntoto, Yesu sambilaka Tata ya yandi na mutindu yayi: “Mu me zabisa bawu nkumbu ya nge.” (Yoa. 17:26) Yinki yandi vanda sosa kuzonza?

9. Wapi kifwani Yesu bakaka samu na kulakisa pwelele mutindu Tata ya yandi kele?

⁹ Yesu sukaka ve kaka na kuzonza na bantu ti nkumbu ya Nzambi ke Yehova. Bazwife yina yandi vanda longa, zabaka nkumbu ya Nzambi, kasi Yesu yandi mosi “lakisaka beto mutindu Nzambi kele.” (Yoa. 1:17, 18) Na kifwani, masonoko ya Biblia na ndinga ya Ebre ke zonzaka ti Yehova ke talaka bantu mawa mpe kyadi. (Bas. 34:5-7) Yesu lakisaka pwelele yinki matsyeleka yayi zola kuzonza, ntangu yandi zonzilaka disolo ya mwana yina zimbanaka. Na disolo yayi, tata talaka mwana ya yandi yina balulaka ntima “ntangu yandi vwandaka ntete mwa ntama.” Yandi kwendaka bwabana yandi, yambaka yandi, mpe lemvokilaka yandi na ntima nyonso. Na kifwani yayi, beto ke talaka mutindu Yehova ke lakisaka ntima ya kyadi mpe mawa. (Luke 15:11-32) Yesu lakisaka pwelele nani Tata ya yandi kele.

10. a) Wa’ faso beto me zaba ti Yesu sadilaka nkumbu ya Tata ya yandi, mpe zolaka ti bantu ya nkaka sala mutindu yandi? (Marke 5:19) (Tala mpe kizizi.) b) Yinki Yesu zola ti beto sala bubu yayi?

¹⁰ Yesu vanda zola kwandi ti bantu ya nkaka sadila nkumbu ya Tata ya yandi? Ntembe ve, ya vandaka luzolo ya yandi. Bamfumu mingi ya mabuundu ya ntangu ya yandi vanda kwikilaka ti, kusadila nkumbu ya Nzambi ke ve kuzitisa yawu. Kasi, Yesu bikaka ve makanisi ya bantu yayi, kanga yandi nzila ya kukembila nkumbu ya Tata ya yandi. Tala disolo, yina Yesu belusaka muntu mosi yina vandaka na mpeve ya yimbi na bwala ya Geraza. Bantu kumaka na boma mpe lombaka na Yesu na  kukatuka kuna. Ni na yawu, Yesu kwendaka. (Mrk. 5:16, 17) Kasi, tekila yandi kwenda, yandi vanda zola ti nkumbu ya Yehova vanda ya kuzabana kuna. Na yawu, yandi zonzaka na muntu yina, na kuzonza na bantu ti, ni yandi ve belusaka yandi, kasi ni Yehova. Marke 5:19 (NWT) ke zonzaka: “Kasi Yesu ndimaka ve kunata yandi mpe zonzaka na yandi: ‘Vutuka na dikanda ya nge, mpe zonzila bawu mambu nyonso yina Yehova me sala samu na nge mpe faso yandi me tala nge kyadi.’” a Ni yina, yandi me zola ti beto sala bubu yayi. Yesu me zola ti na yinza nyonso, bantu zaba nkumbu ya Tata ya yandi. (Mat. 24:14; 28:19, 20) Ntangu beto ke salaka yawu, beto ke sepelisaka Mfumu ya beto, Yesu.

11. Samu wapi mambu Yesu longaka na bisadi ya yandi na kusambila, mpe samu na yinki ya ke mfunu? (Ezekiele 36:23)

¹¹ Yesu zabaka ti Yehova ke na nsatu ya kukumisa nkumbu ya yandi santu, mpe kusukula yawu na bamambu nyonso yina ba vuninaka yandi. Ni na yawu, Yesu lombaka na bisadi ya yandi na kusambila mutindu yayi: “Tata ya beto yina ke na mazulu, bika ti Nkumbu ya nge vanda ya santu.” (Mat. 6:9, nwt) Yesu zabaka ti mambu ya kukumisa santu nkumbu ya Yehova vandaka mambu ya kulutila mfunu na zulu mpe na ntoto. Ezekiele 36:23 (NWT) ke zonzaka: “‘Mu ke kumisa santu nkumbu ya munu ya nene, yina bantu vwezaka na kati ya makanda, yina beno vwezaka na kati ya bawu. Mpe makanda ke zaba ti mu ke Yehova,’ Yehova Mfumu ya Kuluta Nene muntu me tuba, ‘ntangu ba ke kumisa munu santu na kati ya beno na meso ya bawu.’” Ya ke ve na muntu na zulu mpe na ntoto yina kumisaka santu nkumbu ya Yehova kulutila Yesu. Kasi, samu na wapi disumu ba kangaka yandi? Ba zonzaka ti yandi vwezaka nkumbu ya Nzambi. Samu na Yesu, ya ke ve na disumu ya kulutila yimbi yina muntu lenda sala. Kasi, ni yawu ba vuninaka yandi. Ya lenda vanda ti, ni mambu yina salaka yandi “mpasi na ntima” tekila ba kwiza kanga yandi.​—Luke 22:41-44.

12. Wa’ faso Yesu kumisaka santu nkumbu ya Tata yandi na faso ya kulutila?

¹² Samu na kukumisa santu nkumbu ya Tata ya yandi, Yesu kangaka ntima ntangu ba vuninaka yandi bamambu, ba fingaka yandi, mpe ba talisaka yandi mpasi. Ya vandaka ve mambu ya nsoni samu na Yesu na kutumama na Tata  ya yandi. (Ebr. 12:2) Yandi zabaka mpe ti, ni Satana vandaka na manima ya bampasi ya yandi. (Luke 22:2-4; 23:33, 34) Satana vanda kanisa ti, Yesu zola lenda ve kukanga ntima. Kasi dikanisi ya yandi lunganaka ve. Yesu lakisaka ti Satana ke na luvunu, mpe ti bisadi ya Yehova ya kukwikama lenda kukangama na yandi ata na kati ya bampasi ya kulutila.

13. Wa’ faso nge lenda sepelisa Mfumu ya nge, Yesu?

¹³ Nge ke na nsatu ya kupesa kilengi na Mfumu ya nge, Yesu? Kubika ve kukembila nkumbu ya Yehova, mpe kusadisa ba ya nkaka na kuzaba yandi mbote-mbote. Ntangu nge ke salaka yawu, nge ke landaka kifwani ya Yesu. (1 Pi. 2:21) Kaka mutindu yandi, nge ke sepelisaka ntima ya Yehova mpe ke lakisaka na mbeni ya yandi Satana, ti yandi ke muntu ya luvunu.

BETO KE SADISAKA BANTU NA KUVUUKA NTANGU BETO KE KEMBILAKA NKUMBU YA YEHOVA

14-15. Ntangu beto ke longaka bantu mambu ya Yehova, wapi bamambu ya kitoko ke salamaka?

¹⁴ Ntangu nge ke kembilaka nkumbu ya Yehova, nge ke sadisaka na kuvuukisa bantu. Wa’ faso? Satana ke na “[kumisaka] makanisi ya bawu mpimpa.” (2 Ko. 4:4) Na yawu, ba ke kwikilaka na bamambu ya yandi ya luvunu mutindu: Nzambi kele ve, yandi ke ntama na beto, ke kipeke ve bantu ya mbote, ke na ntima ngolo mpe yandi ke yokaka bantu ya yimbi na tiya samu na ntangu nyonso. Satana ke zonzaka nyonso yayi, samu na kubebisa nkumbu ya Yehova na meso ya bantu, mpe samu ba sosa ve kuvanda pene-pene na yandi. Kasi, ntangu beto ke kusamunaka, ya ke salaka ti dikanisi ya Satana lungana ve. Ntangu beto ke longaka bantu matsyeleka na yina me tadila Tata ya beto, beto ke kembilaka nkumbu ya yandi ya santu. Yinki ya ke nataka?

¹⁵ Matsyeleka ya Biblia ke na ngolo mingi. Bamambu ya kitoko ke salamaka ntangu beto ke sadisaka bantu na kuzaba Yehova. Malembe-malembe, ba ke bandaka kutala ti Satana ke vunaka bawu, mpe kutala ti Tata ya beto ke na bifu ya mbote. Kuzaba ti Yehova ke Nzambi ya Ngolo-Nyonso ke fulusaka bawu na buzitu. (Iza. 40:26) Ba ke bandaka kutula ntima na yandi samu ti lunungu ya yandi ke ya kulunga. (Kul. 32:4) Ba ke bandaka kubika ndwenga ya yandi twadisa luzingu ya bawu. (Iza. 55:9; Rom. 11:33) Ya ke pesaka bawu ngolo na  kuzaba ti Nzambi ke luzolo. (1 Yoa. 4:8) Samu ba ke kumaka pene-pene na Yehova, kivuvu ya bawu ya kuzinga ntangu nyonso ke kumaka ngolo. Kusadisa bantu na kukuma pene-pene na Yehova ke bweso ya nene samu na beto. Ntangu beto ke salaka yawu, Yehova ke talaka beto mutindu “bampangi ya yandi ya kisalu.”​—1 Ko. 3:5, 9.

16. Wa’ faso kuzaba nkumbu ya Nzambi lenda simba bantima ya bantu? Pesa bifwani.

¹⁶ Kima ya ntete ya kusala, ni kulonga bantu ti nkumbu ya Nzambi ke Yehova. Ya lenda simba bantima ya bantu ya mbote. Na kifwani, ntwenya mosi ya kento na nkumbu ya Aaliyah b kulaka na dibuundu yina ke sadilaka ve Biblia. Kasi, yandi vanda sepelaka ve na dibuundu ya yandi. Yandi vanda talaka ti muntu lenda vanda ve ndiku ya Nzambi. Bamambu sobaka ntangu yandi bandaka kulongoka na Bambangi ya Yehova. Yandi bandaka kutala Nzambi mutindu ndiku ya yandi. Ya kamwisaka yandi na kulongoka ti, ba katulaka nkumbu ya Nzambi na Babiblia mingi, mpe ba sobaka yawu na ba titres mutindu Mfumu. Kulongoka nkumbu ya Yehova sobaka luzingu ya yandi. Yandi zonzaka: “Ndiku ya munu ya ntima ke na nkumbu!” Yinki ya nataka? Yandi me bwela: “Ntangu yayi, mu ke na kizunu mingi na ntima. Ya ke bweso ya nene samu na munu.” Bakala mosi na nkumbu ya Steve yina vanda salaka miziki kulaka na dibuundu ya bazwife. Samu ti luvunu vandaka ya kulutila, yandi mangaka mabuundu. Kasi, na manima ya lufwa ya mama ya yandi, yandi ndimaka kulongoka Biblia na mbangi mosi ya Yehova. Ya simbaka mingi ntima ya yandi na kuzaba ti, Nzambi ke na nkumbu. Yandi me zonza: “Mu zabaka ve ti Nzambi ke na nkumbu.” Yandi me bwela: “Na mbala mosi mu talaka ti Nzambi ke pene-pene ya munu, kaka mutindu muntu. Mu zabaka ti mu kuzwaka ndiku.”

17. Samu na yinki nge ke na nsatu ya ngolo ya kukembila nkumbu ya Yehova? (Tala mpe kizizi.)

¹⁷ Nge ke zonzaka kwandi nkumbu ya santu ya Nzambi ntangu nge ke longaka mpe ke samunaka? Nge ke sadisaka kwandi bantu na kuzaba mutindu Nzambi kele? Ntangu nge ke salaka yawu, nge ke kembilaka nkumbu ya Nzambi. Kubika ve kukembila nkumbu ya santu ya Yehova, na kulakisaka na bantu wapi mutindu ya Nzambi yandi kele. Ni mutindu yina, nge ke vuukisa bantu. Na yawu, nge ke landa kifwani ya Mfumu ya beto, Yesu Kristo. Ya kulutila mfunu, nge ke sepelisa ntima ya Tata ya nge ya luzolo, Yehova. Bika ti nge “kumisa nkumu ya [yandi] mvula na mvula”!​—Nku. 145:2.