1-2. Yisinke nayi tu vatera tu kwate egano kuhamena omu Jehova a lizuvhu kweyi va nyateka edina lyendi?

 GAZADARA ko kuhamena eyi: Muntu ogu wa hara, ta uyunga yininke yoyidona kukuhamena. Ono yi diva asi ayo kuna kara yipempa, nye vamwe tava yi pura. Nye awo simpe tava ka tantera ko wopeke yipempa oyo. Ano vantu wovanzi tava vareke kupura yipempa oyo. Ngapi omu no lizuvha? Nsene o kara nosinka kuhamena elikwatakano lyoge kumwe nawo ntani kapi ono hara kunyatekesa edina lyoge, yipempa oyo ngayi kuninkisa o lizuvhe udona.—Yis. 22:1.

² Sihonena esi kuvhura kutuvatera tu kwate egano omu Jehova ga lizuvhire apa va nyatekere edina lyendi. Gumwe govaengeli vendi kwa uyungire yipempa kumuhamena kwaEva, mukadi gokuhova pevhu. Eva ga pulire yipempa oyo. Yipempa oyo, kwa ninkisire vakondi vetu wokuhova va rwanese Jehova. Ngoyitundwamo, ayo kwa reta nzo ntani nomfa movantu. (Gen. 3:​1-6; Rom. 5:12) Maudigu aga tuna kumona mouzuni ngwendi nomfa, yita ntani ruhepo, kwa wiza po morwa yipempa eyi ga varekere Satana mosikunino saEdeni. Ngoso Jehova kumukoresa morwa yipempa oyo ntani nomaudigu aga ya retesa po ndi? Yimo. Nye ayo kapi ya handukisa Jehova ndi a kare nonyengo. Nye age simpe kwa twikira kukara “Karunga goruhafo.”—1 Tim. 1:11.

3. Situmbukira musinke twa kara naso?

³ Ose twa kara nositumbukira mokuyilikida asi Satana kwa uyunga yipempa kuhamena Jehova, pokulimburukwa mpangera ezi asi: ‘Hamberereni edina lyaJehova.’ (Epis. 113:1) Ose kuvhura  kuhamberera edina Jehova apa atu tantere ko wopeke yininke nayinye yoyiwa yokumuhamena. Nove ngo hamberera edina Jehova ndi? Tu zeni tu ka zogere ko nokonda ntatu edi nadi tu tumangeda tu hamberere edina lyaKarunga gwetu nomutjima nagunye.

OSE KUHAFESA JEHOVA APA ATU HAMBERERE EDINA LYENDI

4. Morwasinke Jehova a karere noruhafo apa atu mu hamberere? Yifanekesa. (Tara hena efano.)

⁴ Ose kuhafesa Guhyetu gemeguru apa atu hamberere edina lyendi. (Epis. 119:108) Ngoso eyi kutanta asi Karunga gwetu gononkondo kwa fana ngwendi vantu wokudira kusikilira mo, ava va hara asi wopeke ngano vava pandadeke morwa vana hara ekorangedo ndi? Hawe. Koneka sifanekeso esi: Gazadara ko tupu mukadona gomunona ogu ana kudukira koguhwe noku kava lidingira, makura ta va tantere asi “One otate vange wovawa po mouzuni naunye!” Oguhwe makura tava menyuna tayi va hafesa sili unene. Morwasinke? Kapisi asi morwa vana hepa ekorangedo ndi epandadeko lyokutunda kwamunawo gomukadona, nye morwa awo va hara munawo gomukadona ntani vana hafa sili kweyi ana va likida eharo norupandu. Oguhwe vana yi diva asi munawo gomukadona apa nga kura nga kara muntu goruhafo morwa ga kara neharo ntani norupandu. Nokonda dangoso dokulifana yido adi hafesa Guhyetu gomunene po Jehova apa atu mu hamberere.

5. Yipempa musinke atu tura poruzera apa atu hamberere Jehova?

⁵ Apa atu hamberere Guhyetu gemeguru, ose kutura poruzera yipempa hena yimwe eyi ga uyungire Satana kutuhamena natuvenye. Satana kwa uyungire asi kwato muntu ogu nga popera edina lyaKarunga. Age kwa uyungire asi kwato muntu ogu nga twikira kulimburukwa Karunga apa nga ligwanekera neheteko. Age kwa uyungire asi natuvenye ngatu hageka kukarera Karunga nsene nga zi moneka mpito zokugwanena mo mauwa nyamwetu. (Joba 1:​9-11; 2:4) Nye Joba kwa twikilire kulimburukwa Karunga ntani kwa yi likidire asi Satana munayipempa. Nove ngo twikira kulimburukwa Karunga ndi? Natuvenye twa kara nositumbukira sokukwatesa ko Guhyetu gemeguru ntani nokumuhafesa nsene tu twikira kumulimburukwa. (Yis. 27:11) Azo mfumwa sili mokuyirugana oyo.

6. Ngapi omu natu honena hompa Ndafita ntani Varevhi? (Nehemiya 9:5)

⁶ Vantu ava va hara Jehova, kwa kara neharo lyokumuhamberera nomutjima nagunye. Hompa Ndafita kwa tjenge asi: “Mwenyo gwange, tanga HOMPA! Rutu rwange mudima, tanga edina lyendi lyokupongoka.” (Epis. 103:1)  Ndafita ga yi kwete egano asi apa atu hamberere edina lyaKarunga Jehova, ayo ya lifana tupu ngwendi Jehova mwene tuna kuhamberera. Edina lyaJehova kwa hamena mo nkareso zendi, yikara yendi yoyiwa ntani yirugana yendi yoyinene. Ndafita kwa here kupongora edina lyoguhwe ntani nokulihamberera. Age kwa here kuyirugana oyo nomutjima nagunye. Mokulifana, Varevhi nawo kwa hamberere Jehova. Awo va yi tambwire asi kapi ngava vhura kuhamberera edina Jehova moomu ya fira. (Resa Nehemiya 9:5.) Pwa hana esinganyeko, Jehova kwa hefe apa va mu hamberere nomutjima nagunye.

7. Ngapi omu natu hamberera Jehova mokuzuvhisa ntani meparu lyetu lyankenye ezuva?

⁷ Ose kuvhura tu hafese Jehova neina mokumuuyunga monkedi ezi azi likida asi twa kara norupandu kwendi ntani twa mu hara. Nsene kuna kuzuvhisa, twa hepa kudiworoka asi sitambo setu sosinene po kuna kara sokuvatera vantu va hedere pepi naJehova ntani kuvavatera va tare Guhyetu gemeguru ngwendi moomu atu mu tara. (Jak. 4:8) Ayo kutuhafesa kweyi atu tantere vantu kuhamena omu Bibeli za faturura Jehova, pasihonena eharo eli ga kara nalyo, uhungami, unongo, nonkondo ntani noyikara yimwe hena yoyiwa. Ose kuhamberera hena Jehova ntani kumuhafesa apa atu kondjo paapa twa hulira yipo tu mu honene. (Efe. 5:1) Apa atu yi rugana oyo, wopeke kuvhura va yi dimburure asi ose twa lisiga novantu womouzuni ou woudona. (Mat. 5:​14-16) Ngomu tuna kurugana kumwe nawo meparu lyetu lyankenye ezuva, ose kuvhura tu va fatwilire nokonda deyi atu ruganene yininke monkedi zongandi. Ngoyitundwamo, vantu wonomutjima donongwa kuvhura kuvahedesera pepi naJehova. Apa atu hamberere Jehova mononkedi odo, ose kumuhafesa.—1 Tim. 2:​3, 4.

OSE KUHAFESA JESUS APA ATU HAMBERERE EDINA LYAKARUNGA JEHOVA

8. Ngapi omu Jesus ga rugene paapa ga hulira yipo a hamberere edina lyaKarunga Jehova?

⁸ Koyisitwa nayinye yemeguru neyi yepevhu, Jesus yige gelike ga diva unene Karunga. (Mat. 11:27) Jesus kwa hara oGuhwe ntani age kwa litulire mo unene a hamberere edina lyaJehova. (Joh. 14:31) Mekanderero eli ga kanderere koGuhwe masiku gendi gokuhulilira komeho a ka fe, age kwa fatwilire sininke somulyo unene esi ga sikisire mo mosirugana sendi sokuzuvhisa apa gaya kere pevhu. Age kwa tente asi: “Ame na va divisa edina lyoge.” (Joh. 17:26) Yisinke ga tembe?

9. Sifanekeso musinke ga ruganesere Jesus yipo a faturure kuhamena oGuhwe monkedi zongwa zoureru?

⁹ Jesus kwa rugene yininke yoyinzi kupitakana tupu kutantera vantu edina lyaKarunga Jehova. Vajuda ava ga rongere Jesus, va divire nare edina lyaKarunga. Nye Jesus ogu ga kere pepi noGuhwe ‘yige ga va divisire’ kuhamena oGuhwe. (Joh. 1:​17, 18) Pasihonena, Matjangwa goRuhebeli kulikida asi Jehova kwa kara nonkenda. (Ex. 34:​5-7) Jesus kwa zeresere sitwa esi apa ga fatwilire kuhamena sifanekeso somumati gokuzumbana noguhwe. Bibeli kuuyunga asi apa guhya ga mwene munendi gomumati gokulitezurura apa ga kere ‘simpe koure,’ makura tava duka tava ka mu gwana nokukamu lidingira ntani tava mu gusire po nomutjima nagunye. Sihorokwa esi kutuvatera tu kwate egano asi Jehova kwa kara nonkenda. (Ruk. 15:​11-32) Jesus kwa vaterere vantu va dimburure asi oGuhwe vantu musinke.

10. (a) Ngapi twayi diva asi Jesus kwa ruganesere edina lyoGuhwe ntani kwa here wopeke va rugane yokulifana? (Marukusa 5:19) (Tara hena efano.) (b) Yisinke ana tu harere Jesus tu rugane neina?

¹⁰ Ngoso Jesus kuna harere hena wopeke va ruganese edina lyoGuhwe ndi? Yimo. Vampitisili vamwe womaukarelikarunga nampo kwa  gazarere asi ayo kapi ayi likida efumadeko pokuruganesa edina lyaKarunga. Nye Jesus kapi ga pulisilire magano ogo gokudira kutundilira moMatjangwa ga mu kondere a dire kuhamberera edina lyoGuhwe. Gazadara ko siruwo apa ga verere mugara ogu ga kere nompepo zondona, momukunda govaGerasa. Vantu kwa kere noutjirwe makura yipo va likwamberere Jesus a tunde mo momukunda gwawo. Age yiyo ga tundire mo. (Mar. 5:​16, 17) Nye nampili ngoso, Jesus kwa here asi vantu va dive edina lyaKarunga Jehova. Makura yipo ga tanterere mugara ogu ga verwire, yipo a ze a ka tantere vantu, kapisi asi eyi ga rugene Jesus nye eyi ga rugene Jehova. (Resa Marukusa 5:19.) a Jesus ana tu harere hena nose neina tu divise edina lyoGuhwe mouzuni naunye. (Mat. 24:14; 28:​19, 20) Apa atu yi rugana oyo, ose kuhafesa Hompa gwetu Jesus.

11. Yisinke ga rongere Jesus varongwa vendi va kanderere ntani morwasinke ya karere nomulyo? (Hesekiyeli 36:23)

¹¹ Jesus gayi divire asi sitambo saJehova kuna kara sokupongora edina lyendi ntani nokulizeresa koyipempa nayinye. Eyi yiyo Jesus ga rongere varongwa vendi va kanderere asi: “Guhyetu gemeguru, edina lyoge ava li pongore.” (Mat. 6:9) Jesus ga yi divire asi natuvenye twa hamena mo moyipempa eyi ga uyungire Satana kuhamena Jehova. (Resa Hesekiyeli 36:23.) Jesus yige gelike tupu ga pongora unene edina lyaKarunga. Nye apa Jesus va mu kwete, nonkore dendi kwa mu rundilire asi kapi ana fumadeke edina lyoGuhwe. Nye Jesus ga yi divire nawa-nawa asi kuswaura ndi kudira kufumadeka edina lyoGuhwe, kwa kere nzo zonene. Age kwa guvire sili unene pokudiva asi tava ka mu gwana unzoni morwa konda zangoso. Azo nampo kuna kara konda zonene zeyi Jesus ga guvilire unene posiruwo esi sa twaredesere dogoro va ka mu kwate.—Ruk. 22:​41-44.

12. Ngapi omu Jesus ga pongwere edina lyoGuhwe momunene?

¹² Mokuninka asi Jesus a pongore edina lyoGuhwe, age kwa lididimikilire maswauro ntani noyininke eyi va mu rundilire. Age ga yi divire asi age kwa limburukwire oGuhwe moyininke nayinye, yipo nye, kwato eyi ga hepere kutjira. (Heb. 12:2) Ntani ga yi divire hena asi Satana kwa mu homokerere posiruwo soudigu.  (Ruk. 22:​2-4; 23:​33, 34) Satana kwa here kuninkisa Jesus a dire kulimburukwa. Nye kapi ya mu tompokere. Jesus ga yi likidire asi Satana munayipempa gomunene ntani ga yi likidire asi Jehova ga kara novakareli vendi wovalimburukwi ava ava twikire kumulimburukwa, nampili momaheteko gomanene.

13. Ngapi omu no hafesa Hompa gwetu Jesus?

¹³ Ono hara kuhafesa Hompa gwetu Jesus ndi? Twikira kuhamberera Jehova pokuvatera wopeke va dive Karunga gwetu. Nsene o yi rugana, ove kuna kuhonena Jesus. (1 Pet. 2:21) Nsene o honena Jesus, ove ngo hafesa Jehova ntani ngo likida nkore zendi Satana asi age munayipempa.

OSE KUPOPERA MAPARU GOVANTU APA ATU HAMBERERE EDINA LYAKARUNGA

14-15. Yininke musinke yoyiwa ayi horoka apa atu rongo vantu kuhamena Jehova?

¹⁴ Apa atu hamberere edina lyaKarunga Jehova, ose kupopera maparu govantu. Monkedi musinke? Satana “kwa twiza nondunge dava va dira kupura.” (2 Kol. 4:4) Ngoyitundwamo, awo kwa ya pura yipempa yaSatana eyi asi, Karunga kapi ga kara po, Karunga kwa likara ure nose ntani kapi ga kara nosinka kovantu, Karunga nyanya ntani kuhepeka vantu wononzo narunye. Satana kutanta yipempa oyo yipo a nyateke edina lyaKarunga ntani yipo a ninkise vantu va dire kuhedera pepi Jehova. Nye apa atu zuvhisa, ose kukondera Satana yipo a dire kusikisa mo sitambo sendi. Ose kuronga vantu usili wokuhamena Guhyetu ntani kuhamberera edina lyendi lyokupongoka. Yitundwamo musinke ayi reta?

¹⁵ Usili womoNonkango daKarunga, kwa kara nononkondo dononene. Nsene tu ronga vantu kuhamena Jehova ntani noyikara yendi, ose ngatu limonena yininke yoyiwa. Yipempa yaSatana kapi hena ayi pukisa vantu ntani awo kuyatameka kudimburura yikara yaJehova yoyiwa. Awo ku ya dimburura nonkondo dononene edi ga kara nado Jehova. (Jes. 40:26) Awo kulironga ku ya huguvara mwendi morwa age kurugana eyi ya hungama. (Deut. 32:4) Awo kulirongera ko yoyinzi kounongo wendi. (Jes. 55:9; Rom. 11:33) Ayo kuvahengagwida hena pokudiva asi Karunga ga kara neharo. (1 Joh. 4:8) Apa tulisa po elikwatakano naJehova, awo ku ya yipura nawa-nawa asi ngava  ka paruka narunye ngovana vaKarunga. Azo kuna kara sili mfumwa zonene mokuvatera vantu va kare nelikwatakano naGuhyetu gemeguru. Apa atu yi rugana oyo, Jehova kututara asi ‘ose varugani kumwe nendi.’—1 Kol. 3:​5, 9.

16. Ngapi omu vamwe ava lizuvhu apa ava lirongo kuhamena edina lyaKarunga? Gava yihonena.

¹⁶ Pomuhowo kuvhura tu ronge vantu asi edina lyaKarunga yilyo Jehova. Ano eyi kuvhura kutjindja eparu lyomuntu. Pasihonena, mudinkantu gomukadi Aaliyah b kwa kulilire moukarelikarunga ou nga u dili kuronga marongo gokutundilira moBibeli. Nye kapi ga haferere ukarelikarunga wawo ntani kwa lizuvhire asi age kwa likere ure naKarunga. Yininke oyo kwa ya litjindjire apa ga tamekere kulironga Bibeli kumwe noNombangi daJehova. Age kwa ya tamekere kutara Karunga ngakaume gwendi. Ntani age kwa tetukire apa ga ya lirongere asi edina lyaKarunga kwa ligusa mo monoBibeli dononzi nokulipinganesera po yitumbwisiso ngwendi Hompa. Apa ga lirongere edina lyaKarunga Jehova, ayo kwa tjindjire eparu lyendi. Age kwa tente asi: “Kaume gwange gomunene ga kara nedina.” Yitundwamo musinke ya kere? Age kwa tente asi: “Ame ngesi nina kara nombili zomomutjima. Ame ngesi kulizuva mfumwa.” Mugara gedina Steve musiki gonongaro, kwa tundilire mompo zoVajuda ava va kere nonoveta dononzi. Age kapi ga here kuhamena kwa nkenye ukarelikarunga morwa ga mwene yirugana yoyidona yoyinzi eyi ngava rugana. Nye nampili ngoso, konyima zapa ozina va dogorokere, age kwa kere pelirongo limwe lyoBibeli eli ga rugene munazinyetu gumwe goNombangi daJehova. Ayo kwa mu twire unene komutjima apa ga lirongere edina lyaKarunga. Age kwa uyungire asi: “Ame kapi na diva rumwe edina lyaKarunga.” Age kwa gwederera ko asi: “Esi kuna kara sikando sange sokuhova kukwata egano asi Karunga yipo ga kara. Ame kwa mu tere ngwendi muntu. Na yi divire asi nina gwana kaume.”

17. Morwasinke ono tokomenene kuhamberera edina lyaKarunga? (Tara hena efano.)

¹⁷ Apa o zuvhisa nokuronga vantu, ove kutantera ko vantu kuhamena edina lyaKarunga lyokupongoka ndi? Ove ku va vatera yipo va dive asi age Karunga musinke ndi? Nsene oyi rugana oyo, ove kuna kuhamberera edina lyaKarunga. Yipo nye, twikira kuhamberera edina lyaKarunga lyokupongoka Jehova, pokuvatera vantu va dive asi age Karunga musinke. Nsene o yi rugana, ove kuna kupopera maparu govantu. Ove ngo honena Hompa gwetu Jesus Kristusa. Nye unene po, ove ngo hafesa Guhyetu Jehova. Twikira kuhamberera edina lyaKarunga “narunye nanarunye.”—Epis. 145:2.