1-2. Kodi chin’ni inanitandize vwechecha mwemo Yehova avwele liye chifukwa ya vyonama vyevyo kamuongeleathu?

 KAEREKEZELANI ira fwinyu uuongelani vyotakala. Munoiziwa ira pivyonama, koma athu amo-iwa kanororomela vyongovyo. Enjedela vevo, athu kanopitilizave onga vyonamavyo ndipo athu amo-iwa teto anjinji kanoviroromela. Kodi munavwe avi m’murimani? Ngati munaganizela athu koma teto limbili linyu, kai vyokaiki-a ira vyonama vyevi vinokoza uvoreyani vinjinji m’murimani. — Miya. 22:1.

² Isazo inela inokoza nitandiza vwechecha mwemo Yehova avwele liye limbili lae lingatakali-iwe. M’mo-i mwa a-imae auzimu oowonga vyonama vyokuza liye wa Hava, ndipo Hava oororomela vyonamavyo. Vyonama vyevi vyoopangi-a ira makolwi-u owambeela kativwele Yehova. Vyo-arelavo viwa pivyoi athu etene koochimwa ndipo kanokhwa. (Gen. 3:1-6; Arom. 5:12) Mavuto etene anayo ninaona iyo muilambwela monga imfa, kondo na vyongo vimo-iviwa vyovwi-a chisoni, vyaambeele chifukwa ya vyonama vyevyo Satana afalisile liye m’munda wa Edeni. Kodi Yehova vyoomuvoreya m’murimani chifukwa ya vyonama vyevi na vyo-arelavo viwa? Mookaikela vyoomuvoreya m’murimani. Komave Yehova kaavyile murima kapena sunga yam’murimani. Ndipo liye thawi detene ngu “Mulungu wachimwemwe.”— 1 Tim. 1:11.

3. Kodi nin’na mwai opanga n’ni?

³ Nikaana mwai otandizana weli-a zina la Yehova vovwela lamulo lo-orucha li loi: “Tamandani zina la Yehova.” (Sal. 113:1) Ninokoza panga vyevi vowandela athu amo-iwa vyongo vyapama vyokuza Mwinyailo wa zinali. Kodi muli okozeya panga vyevi?  Tiyemoni nikambilane vyongo taaru vyevyo vinanilimbikise ira nitamandenga zina la Mulungu na murima wetene.

NINOMUSANGALASA YEHOVA NATAMANDANGA ZINA LAE

4. Chifukwa n’ni Yehova unasangalala namutamandanga? Pelekani isazo. (Onani teto ithuzithuzi.)

⁴ Ninomusangalasa Babi-u waudimu natamandanga zina lae. (Sal. 119:108) Komave, kodi vyevi vinatantauza ira Mulungu wakopolo detene uli ngati athu anayo kai angwilo, anayo kanafunecha tamandiwa chifukwa yofuna ira kavionenga ira mbofuneya? Naari. Kaganizelani isazo ila. Mwachikondi, musikana n’ng’onong’ono ungowi-a ndanda lae muliko-ini mwa babae noawandela ira, ‘Muli baba wapama vinjinji vailambo yetene’. Vyevyo mwanoyo upangile liye viakuza vinjinji ababae ndipo kanosangalala vinjinji. Chifukwa n’ni? Kodi ninokoza onga ira baboyo unafuneya limbikisiwa kapena tamandiwa na mwanae nayolinga yoi avionenga ira ngofuneya? Naari. Mʼmalomwiwa, chifukwa yoi unomukonda mwanaeyo, baboyo unosangalala ira mwanoyo umutonyi-eda chikondi ndipo umuyamikela. Liye unoiziwa ira makalelo anala kanoza kamutandize mwanoyo kala osangalala aulukulanga. Mofwanafwana na vyevi, Yehova unoyo uli Babi-u mulukulu unosangalala namutamandanga.

5. Kodi ninatandiza runi-a vyonama viivi natamandanga zina la Mulungu?

⁵ Namutamandanga Babi-u waudimu ninotandiza runi-a vyonama vyevyo Satana aongile liye vyevyo vinakuza teto muthu uliwetene. Satana unaongecha ira kalivo muthu unoyo unakaleve ororomeleya angagumanile na mayeselo votandiza ira zina la Mulungu kalitakali-iwe. Liye unaongecha ira ninokoza iya tumikela Mulungu ngati ninaona ira panga vyevyo unokoza pangi-a ira nigumane na mavuto. (Yob. 1:9-11; 2:4) Koma Yobu ookalave ororomeleya ndipo ootonyi-eda ira Satana ngonama. Nanga bwanji nyo? Uliwetene wa iyo ukaana mwai wotandiza ira zina la Babi-u kalitakali-iwe koma teto musangalasa vopitilizave mutumikela mororomeleya. (Miya. 27:11) Unola ngu mwai ulukulu vinjinji.

6. Kodi ninamusazi-ede avi Mwene Davide na Alevi? (Nehemiya 9:5)

⁶ Konda Mulungu unopangi-a ira athu ororomeleya katamandenga zina lae na murima wetene. Mwene Davide alembile ira: “Moywanga utamande Yehova. Iliyetene ya muwari mwanga itamande zina lae.” (Sal. 103:1) Davide ooiziwa ira tamanda zina la Yehova unatantauza mutamanda Yehovoyo. Eno navwa zinali ninoganizela makalelwae apama koma teto chito dae dodabwi-a. Davide oofuna ira aonenga ira zina la Babae ti lowela koma teto  alitamandenga. Liye oofuna ira apangenga vyevyo na “iliyetene ya muwari [mwae]” kapena ira na murima wetene. Mofwanafwana na Davide, naaliwene Alevi koosogolela votamanda Yehova. Moviyevi-a, aliwa koosomedela ira katinawande fotokoza mokwakwanela ulemelelo unoyo zina lowela la Yehova linafuneyaathu wachela. (Welengani Nehemiya 9:5.) Mookaikela, Yehova oosangalala noviyevi-a koma teto mutamanda kumela vati vamurima wewu.

7. Kodi ninamutamande avi Yehova nalaleelanga koma teto napanganga vyongo vya dambo na dambo?

⁷ Malambwano ninokoza musangalasa Yehova, voonga vya liye motonyi-eda ira ninomuyamikela koma teto mukonda. Nalaleelanga, ninoumbuwela ira yolingi-u ilukulu kutandiza athu kala va usamwali na Yehova koma teto atandiza ira naaliwene kaonenga ira ngu Babiwa wachikondi. (Yak. 4:8) Ninosangalala tonyi-eda athu vyevyo Baibulo linafotokozaathu vyokuza Yehova ira ngwachikondi, chilungamo, zelu, kopolo koma teto ukaana makalelo amo-iwa apama. Ninomutamanda teto Yehova koma teto musangalasa naesaesanga musazi-eda. (Aife. 5:1) Napanganga vyevi ninakalecha o-iyana vinjinji na athu amuilambo yotakalela. Athu amo-iwa kanokoza ona ira nili o-iyana ndipo kanokoza dabwa ira chifukwa n’ni vili eno. (Mat. 5:14-16) Ndiye napanganga vyongo vya dambo na dambo na athu anala, ninokoza afotokozela chifukwa iwa ninapangecha vyongo mo-iyana na aliwa. Vyo-arelavo viwa pivyoi athu amurima wapama kanowambeela kopeya na Mulungwi-u. Namutamandanga Yehova mundila dedi, ninakala nisangalasanga murimae.— 1 Tim. 2:3, 4.

NINOMUSANGALASA YESU NATAMANDANGA ZINA LA YEHOVA

8. Chifukwa n’ni Yesu uli isazo yapama va khani yotamanda zina la Yehova?

⁸ Va vyolengiwa vyetene vyazelu udimu na vailambwela, kavali unoyo unamuiziwa pama Baba kwaranya Mwana. (Mat. 11:27) Yesu unoakonda Ababae ndipo chiisazo yapama vakhani yotamanda zina la Yehova. (Yoh. 14:31) Vopempela wa Babae va ma-iyu omari-a amoywae, liye oofotokoza yongo yofuneya vinjinji ineyo apangile liye va utumikae wavailambwela, voonga ira: “Miyo ndipangi-a ira aliwa kaiziwe zina linyu.” (Yoh. 17:26) Kodi atantauza n’ni veva?

9. Kodi Yesu a-indi-ede chito fanizo liivi vofotokoza movweya pama mwemo Ababae kaliliathu?

⁹ Yesu oopanga vyongo vinjinji kwaranya keda aiziwi-a athu ira zina la Mulungu ngu Yehova. Ayuda anayo aafunji-a liye, kooiziwa wale zina la Mulungu. Koma Yesu oopeleka isazo yapama “chifukwa ngunoyo afotokozile vya Mulungu.” (Yoh. 1:17, 18) Mwaisazo, Malemba a Chiheberi kanotonyi-eda ira Yehova ngu Mulungu wachifundo koma teto ooma murima. (Ekis. 34:5-7) Yesu oofotokoza movweya pama likundo la choonadi leli vevo afotokozile liye fanizo la mwana olowelela na Ababae. Nawelenganga vyevyo Babola apangile liye angamuonile mwanae unoyo alapile na murima wetene “azanga vandendai,” nomutamangela, mukumbarela koma teto mukululukela na murima wetene, ninovwechecha pama chifundo koma teto oma murima wa Yehova. (Luka 15:11-32) Veva Yesu ootandiza athu vwechecha vyoona viwa vyokuza mwemo Ababae kaliliathu.

10. (a) Kodi ninaiziwa avi ira Yesu oo-indi-eda chito zina lenileni la Babae ndipo afuna teto ira amo-i kali-indi-edenga chito? (Maliko 5:19) (Onani teto ithuzithuzi.) (b) Kodi Yesu unafuna ira iyo nipangenga n’ni malambwano?

¹⁰ Kodi Yesu unofunecha ira athu amo-iwa ka-indi-edenga teto chito zina lenileni la Ababae? Inde. Asogoleli amo-iwa achipembezo va thawi ineyo, karoromela ira zina la Mulungu ti lopatuleya ndipo kai ulemu liromolanga. Koma Yesu kaalolile ira miyambo dosempana na Malemba dedi dimulepheli-e lemekeza zina la Ababae.  Kaganizelani vyevyo vyaireile angamuchili-ile muthu m’mo-iwa o-indiwa na viwanda, mudela la Agerasa. Athu awewo kookaana mantha ndipo koomuvepa Yesu ira avenyewo udela lelo, ndipo Yesu oovenyawo. (Maliko 5:16, 17) Komave Yesu afuna ira athu awewo kaiziwe zina la Yehova. Eno oomulamula muthu unoyo amuchili-ile liyeyo ira aawandelenga athu, o-okala vyevyo Yesu amuirele liye, koma vyevyo Yehova amuirele liye. (Welengani Maliko 5:19.) a Malambwano teto liye unofuna ira niawandelenga athu vailambo yetene zina la Ababae. (Mat. 24:14; 28:19, 20) Napanganga vyevi, ninomusangalasa Yesu, unoyo uli Mweni-u.

11. Kodi Yesu aafunji-ile o-arelae ira kapempelelenga n’ni, nanga chifukwa n’ni vili vyofuneya? (Ezekieli 36:23)

¹¹ Yesu ooiziwa ira yolinga ya Yehova kuweli-a zina lae koma teto runi-a vyonama vyetene vyevyo vyaongiwe vyokuza liye. Chichifukwa iwa Mbwii-u aafunji-ile o-arelae ira kapempelenga ira: “Babi-u waudimu, zina linyu liweli-iwe.” (Mat. 6:9) Yesu oovwechecha ira weli-iwa wa zina la Mulungu chi khani ilukulu yokuza vyolengiwa vyetene. (Welengani Ezekieli 36:23.) Kavali uliwetene, udimu kapena vailambo yavati, unoyo aweli-ile vinjinji zina la Yehova kwaranya Yesu. Koma kodi vevo Yesu amangiwa liye, adanae kamuimba mulandu oyi avi? Aliwa kaonga ira oonyoza zina la Mulungu. Mookaikela, Yesu ooiziwa ira nyoza zina lowela la Ababae ti chimo lilukulu vinjinji. Eno ookumudwa vinjinji voona ira unaimbiwa mulandu unola. Mwina vyevi pivyevyo vyapangi-ile ira Yesu “avuteye vinjinji m’murimani mwae,” unga-alile maola oyeva ira a-indiwe. — Luka 22:41-44.

12. Kodi Yesu aweli-ile zina la Babae mundila ilukulu iivi?

¹² Ira aweli-e zina la Babae, Yesu oovilela zuzumi-iwa, nyoziwa koma teto vyonama vyevyo vyaongiwa vyokuza liye. Liye ooiziwa ira ali angamuvwele Babae mu vyongo vyetene ndipo kavali chifukwa yoi anyaswelenga. (Aheb. 12:2) Ooiziwa teto ira Satana ngunoyo apangi-a vyongo vyetene vyevyo agumanana liye vathawi yorucha inela. (Luka 22:2-4; 23:33, 34) Satana oofunechecha ira amulepeli-e Yesu kala ororomeleya, koma oolepela ndipo oonyaswa. Veva Yesu ootonyi-eda ira Satana ngonama koma teto ira Yehova ukaana atumikae ororomeleya anayo kanapitilizave  mutumikela mororomeleya ngakale kangagumanile na mayeselo alukulu.

13. Kodi ninapange avi ira nimusangalasenga Yesu unoyo uli Mweni-u?

¹³ Kodi nyo munofunechecha musangalasa Yesu Kiristu unoyo uli Mweninyu? Ngati chi eno, pitilizani tamanda zina la Yehova koma teto tandiza athu amo-iwa ira kaiziwe makalelo anayo un’na liye. Mwapanganga vyevi ndiye kuti munomusazi-eda Yesu. (1 Pe. 2:21) Mofwanafwana na Yesu, munoza mumusangalase Yehova koma teto tonyi-eda ira Satana unoyo ngu mudanae, ngonama.

NINOVULUMUCHA ATHU NATAMANDANGA ZINA LA YEHOVA

14-15. Kodi pi vyongo vyosangalasa viivi vyevyo vinaireya namufunji-anga muthu vyokuza Yehova?

¹⁴ Natamandanga zina la Yehova, ninotandiza athu ira kaze kavulumuwe. Kodi ninapangecha avi vyevi? Satana “usokoneza maganizo” a athu anayo katinalambela Yehova.” (2 Akor. 4:4) Vyo-arelavo viwa pivyoi athwayo kanororomela vyonama vyae, monga vyoi: Mulungu kaliwo, Mulungu uli undendai vinjinji ndipo kanatamaala vya athu, Mulungu ngwankhanza ndipo unozuzumi-a athu mpakana walewale. Vyonama vyevi yolinga yae chiyoi atakali-e zina la Yehova koma teto limbili lae ira athu katifunenga kala nae va usamwali. Koma chitwi-u inolepeli-a yolinga ya Satana inela. Ninofunji-a athu choonadi yokuza Babi-u ndipo ninotamanda zina lae lowela. Ndiye kodi vyo-arelavo viwa vinakalecha vyoi avi?

¹⁵ Choonadi ya Mawu a Mulungu chi yakopolo vinjinji. Nafunji-anga athu vyoona vyokuza Yehova koma teto mwemo uli liye, vanoireecha yongo imo-iwa yodabwi-a. Sokoneziwa maganizo na Satana unowambeela mala ndipo kanowambeela ona makalelo apama a Babi-u Yehova, ngati mwemo ninapangela iyo. Aliwa kanomaliwa zelu na kopolo dae dookaana malile. (Yes. 40:26) Kanowambeela muroromela chifukwa kanoona ira ngwachilungamo. (Doto. 32:4) Kanofunjeda vinjinji vyokuza zelu dae davadimu. (Yes. 55:9; Arom. 11:33) Kanolimbikisiwa teto iziwa ira liye ngwachikondi. (1 Yoh. 4:8) Kaambeela kala vausamwali na Yehova, chiyembekezo iwa yozakala na moyo mpakana walewale monga a-imae, inokala yakopolo. Nikaana mwai ulukulu vinjinji otandiza athu  ira kakale vausamwali na Babi-u. Napanga vyevi, Yehova unoniona ira nili “achito afwae.”— 1 Akor. 3:5, 9.

16. Kodi athu amo-iwa kavwile avi kangaiziwile zina la Mulungu? Pelekani isazo.

¹⁶ Vowambeela ninokoza mufunji-a muthu ira zina la Mulungu ngu Yehova. Vyevi vinokoza mufiya vamurima vinjinji muthu wamaganizo apama. Mwaisazo, sikana m’mo-iwa zina lae Aaliyah b aulukulele muchipembezo ineyo kayali ya Ikiristu. Koma liye kaasangalala na ipembezo yae ndipo kaali vausamwali na Mulungu. Vyevi vyoochenja angakede ambeela funjeda Baibulo na a Mboni. Oowambeela muona Mulungu ngati fwae. Oodabwa angafunjedile ira m’Mabaibulo anjinji koochosamo zina la Mulungu no-elamo mazina audindo monga, Ambuye. Iziwa zina la Mulungu oochenja vinjinji moywae. Mosangalala liye aongile ira: “Fwanga wavamurima ukaana zina.” Kodi vyo-arelavo viwa vyali vyoi avi? Aaliyah aongile ira: “Vano ndikaana murendele wam’murima. Ndinoona ira ndookaana mwai.” Mulombwana m’mo-iwa zina lae Steve unoyo ali oimba, aleliwele muchipembezo ya Chiyuda. Liye oo-iya dowa wu Chipembezo iliyetene chifukwa yoona vyachinyengo vinjinji vyevyo vyaireya. Koma vathawi imo-iwa am’mae kangatatiile, liye oosomedela kala nawo va phuzilo la Baibulo lelo wa Mboni m’mo-iwa apangi-a liye. Liye oosangalala vinjinji angaiziwile zina la Mulungu. Steve aongile ira: “Kandaliiziwa zina la Mulungu.” Ooenjedela onga ira: “Wathawi yowambeela ndoovwechecha ira Mulungu ukalawo ndipo ngu weniweni. Thawi ineyo ndooiziwa ira ndifwanya fwanga.”

17. Chifukwa n’ni munafunechecha pitiliza tamanda zina la Yehova? (Onani teto ithuzithuzi.)

¹⁷ Mwa-indanga chito yolaleela koma teto funji-a athu, kodi munowaiziwi-a zina lopatuleya la Yehova? Kodi munowatandiza iziwa vyoona vyokuza Mulungwi-u? Mwapanganga vyevi munakala mutamandanga zina lae. Pitilizani tamanda zina lowela la Yehova, votandiza athu ira kaiziwe vyoona viwa vyokuza Mwinyailo wa zinali. Mwera eno munowatandiza ira kaze kavulumuwe. Munakala teto mumusazi-edanga Mweni-u, Kiristu Yesu. Ndipo kwaranya vyetene, munoza mumusangalase Babinyu wachikondi, Yehova. Pitilizani ‘tamanda zina lae mpakana muyaya.’ — Sal. 145:2.