1-2. Ino nciinshi ceenga catucafwa kunyumfwishisha Yehova mbwaalinyumfwa ceebo ca bubeshi bwaambwa pali nguwe?

 AMUYEEYE ayi muntu ngomubikilako maano wamwaambila maswi abiibi abuumbi. Mulicishi ayi maswi ngaamba ngakubeca sombi bamwi baashoma. Alimwi ciinditeewo kubica, batalika kunooya cilwiitako bamwi makani ayo akubeca, lyalo abamwi baanji baashoma. Ino inga mwalinyumfwa buyani? Na kamusuni bantu alimwi mulabikila maano kushintu nshobayeeya pali ndimwe, bubeshi mbweenga baamba inga bwamupa kulinyumfwa cibiibi abuumbi.—Tus. 22:1.

² Cakubonenaako ici cilatucafwa kunyumfwishisha Yehova mbwaakalinyumfwa Satana ndyaakabisha mpuwo yakwe. Satana wakaamba makani akubeca kuli Efa. Efa alakwe wakashoma bubeshi ubo. Bubeshi ubo bwakapa kwaamba ayi bashali besu bakutaanguna bapondokele Yehova. Aboobo bantu boonse balabisha alimwi mukuya kwaciindi balafwa. (Mata. 3:​1-6; Loma. 5:12) Mapensho oonse ali mucishi cino mbuli lufu, inkondo akupenga, nceebo ca bubeshi Satana mbwaakaamba mumuunda wa Edeni. Sa Yehova alalinyumfwa cibiibi pabubeshi ubo amapensho akaswaamo? Ncakutatoonsha. Nacibi boobo, Yehova taakalalite alimwi taakwe kubikila mfundilishi. Sombi watolelela kuba “Lesa usangalete.”—1 Timo. 1:11.

3. Ino ncoolwe nshi ncotucite?

³ Tulicite coolwe cakutondesha ayi makani Satana ngakaamba pali Yehova ngakubeca. Inga twacita boobo kwiinda mukukonkela mulawo waamba ayi: ‘Amulumbaishe liina lyakwe Yehova.’ (Kulu. 113:1) Tulalumbaisha liina lyakwe Yehova na katwaamba shibotu pali nguwe. Sa amwebo mulaakulumbaisha liina lyakwe? Amuleke tubandike sheebo shiyandika sheenga shatucafwa kunoolumbaisha liina lyakwe Lesa wesu camoyo woonse.

 TULASANGALASHA YEHOVA NA KATULUMBAISHA LIINA LYAKWE

4. Ino nceebonshi Yehova alasangalala na twamulumbaisha? Amwaambe cakubonenaako. (Amubone acikope.)

⁴ Tulasangalasha Ishiwesu wakwiculu na katulumbaisha liina lyakwe. (Kulu. 69:​30, 31) Ano sa ici cilaamba ayi Lesa shinkusu shoonse ali anga mbantu batamaninite abo basunibo kulumbaishikwa ceebo cakusuna kuyuminishikwa? Sobwe. Amuyeeye pacakubonenaako ici. Amuyeeye ayi mwaana mwanakashi muniini wacicilila baishi akubalwiita ayi, “Taakuwo mushali uli anga ndimwe mucishi coonse!” Baishi bamweeta mweeta alimwi basangalala abuumbi. Ino nceebonshi? Teshi kwaamba ayi balisuni kuyuminishikwa akulumbaishikwa kuswa kumwanaabo mwanakashi. Sombi nceebo cakwaamba ayi balimusuni mwanaabo alimwi basangalala kwaamba ayi watondesha ayi alibasuni baishi alimwi alalumba. Baishi balicishi kwaamba ayi kuba amibo iyi kulaakumucafwa kuba alusangalalo mubuumi ndyeshi anooya cikula. Ishi nshosheebo shimwi shipa kwaamba ayi Yehova mushali musankwa winditeewo anoosangalala na twamulumbaisha.

5. Ino tulatondesha buyani ayi Satana ngumubeshi na katulumbaisha liina lyakwe Lesa?

⁵ Na katulumbaisha Ishiwesu wakwiculu, tulacafwilisha kutondesha ayi maswi Satana ngaakaamba pali ndiswe ngakubeca. Satana alaamba ayi taakuwo muntu weshi akatolelele kushitilisha liina lyakwe Lesa. Alimwi alaamba ayi taakuwo muntu weshi akatolelele kushomeka kuli Lesa na weeleshekwa. Kwiilikaawo, alayeeya ayi soonse inga twacileka kusebensela Lesa na katuyeeya ayi shintu inga shatubotela na twacita boobo. (Jobo 1:​9-11; 2:4) Sombi Jobo wakatolelela kushomeka kuli Lesa akutondesha ayi Satana ngumubeshi. Sa amwebo mulaakutolelela kushomeka kuli Lesa? Soonse tulicite coolwe cakusalawo kushitilisha liina lyakwe Ishiwesu wakwiculu akumusangalasha kwiinda mukutolelela kumusebensela cakushomeka. (Tus. 27:11) Ncoolwe cinene abuumbi kucita boobo.

6. Ino cakubonenaako ca Mwaami Defedi aca bene Lefi inga twacikonkela buyani? (Neyemiya 9:5)

⁶ Abo basuni Yehova balisuni kunolumbaisha liina lyakwe amoyo wabo woonse. Mwaami Defedi wakalemba ayi: ‘Omoyo wangu lumbaisha Yehova! Obuumi bwangu boonse lumbaisha liina lyakwe lisalalite!’ (Kulu. 103:1) Defedi wakalinga kucishi ayi kulumbaisha liina lyakwe Yehova nkulumbaisha Yehova. Na twanyumfwa liina lyakwe Yehova, tulayeeya pa mpuwo njaacite, mibo yoonse ibotu njaacite alimwi apashintu shibotu nshaacita. Defedi wakalinga kusuni kwaamba ayi liina lya Baishi lisalashikwe akunolilumbaisha. Wakalinga kusuni kucita  boobo ‘abuumi bwakwe boonse’ alimwi amoyo wakwe woonse. Bene Lefi abalo bakalinga kuba panembo mukulumbaisha Yehova. Bakaliceesha akusumina ayi maswi ngeenga baamba kulumbaisha Yehova, inga taalumbaishi liina lyakwe lisalalite cakulishishaawo. (Amubelenge Neyemiya 9:5.) Ncakutatoonsha kwaamba ayi maswi akuliceesha akuswa paanshi lyamoyo ngobakaamba kulumbaisha Yehova, akapa kwaamba ayi asangalale.

7. Ino inga twacita buyani kwaamba ayi tulumbaishe Yehova ndyetutoshimikila andyetutocita shintu shimwi pomwi abamwi?

⁷ Munshiku shino, inga twasangalasha Yehova kwiinda mukwaamba pali nguwe munshila itondesha mbotumulumba ambotumusuni abuumbi. Ndyetutoshimikila, luyaando lunene nkucafwa bamwi kuba abushicibusa a Yehova akunoolinyumfwa bweenka mbotulinyumfwa pali Ishiwesu wakwiculu. (Jemu. 4:8) Tulasangalala kucafwa bantu kushiba Baibo nshoyaamba pali Yehova mbuli lusuno ndwaacite, bululami, busongo, nkusu alimwi amibo imwi ibotu njaacite. Alimwi tulalumbaisha Yehova akumusangalasha na katweelesha kukonkela cakubonenaako cakwe. (Efe. 5:1) Na katucita boobo, bamwi inga babona ayi tulipusene abantu bamucishi cino cibiibi. (Mate. 5:​14-16) Ndyetutoocita shintu shimwi pomwi ambabo, mpashi inga twacikonsha kubasansulwita ncotucitila shintu shipusene abantu bamucishi. Aboobo bantu basuni kwiiya balasuna kuba bushicibusa a Lesa wesu. Na katulumbaisha Yehova munshila ishi, tulamusangalasha.—1 Timo. 2:​3, 4.

TULASANGALASHA YESU NA KATULUMBAISHA LIINA LYAKWE YEHOVA

8. Ino nceebonshi Yesu ncakubonenaako cibotu ca muntu wakalinga kulumbaisha liina lyakwe Yehova?

⁸ Taakuwo munjelo nabi muntu umushi kabotu Yehova mbuli Yesu. (Mate. 11:27) Yesu alibasuni Baishi, alimwi wakatondesha cakubonenaako cibotu cakulumbaisha liina lyakwe Yehova. (Joni 14:31) Yesu ndyaakalinga kupaila kuli Baishi mashiku kakucaalitebo bushiku bomwi kwaamba ayi afwe, wakaamba ncito iyandika njaakakumanisha ndyaakalinga kushimikila. Wakaamba ayi: ‘Ndabeeisha kwaamba ayi bashibe liina lyanu.’ (Joni 17:26) Ino wakalinga kusansulula nshi?

9. Ino ncikoshanyo nshi Yesu ncaakaamba kwaamba ayi acafwe bamwi kushiba kabotu Baishi mbobabete?

⁹ Yesu taakwe kweelabo pakulwiita bantu ayi liina lyakwe Lesa ngu Yehova. BaJuda Yesu mbaakalinga kwiisha bakalinga kulishi kale liina lyakwe Lesa. Sombi Yesu wakaba panembo mukulengesha ayi Baishi bashibikwe. (Joni 1:​17, 18) Kucakubonenaako, Malembo a ciEbulu alatondesha ayi Yehova alicite luse ankuumbu. (Kulo. 34:​5-7) Yesu wakasansulula kabotu cancine ici ndyaakaamba cikoshanyo ca mwaana wakaashuka a baishi mbobakamutambula. Tulabelenga ayi baishi ndyebakabona mwanaabo wakaana “kaacilibo palaale,” bakamucicilila, bamukumbata akumulekelela kuswa paanshi lyamoyo. Makani aya alatucafwa kunyumfwishisha ayi Yehova alicite luse ankuumbu abuumbi. (Luka 15:​11-32) Yesu wakacafwa bamwi kushiba kabotu Baishi mbobabete.

10. (a) Ino tulishi buyani ayi Yesu wakalinga kusebensesha liina lya Baishi alimwi ayi wakalinga kusuni ayi bamwi banoocita boobo? (Maako 5:19) (Amubone acikope.) (b) Ino Yesu alisuni ayi tunoocita nshi?

¹⁰ Sa Yesu wakalinga kusuni kwaamba ayi abamwi banoosebensesha liina lya Baishi? Ncakutatoonsha. Bamatanjilili babupailishi bamwi bakalinga kushoma ayi kwaamba liina lyakwe Lesa nkutatondesha bulemu. Sombi Yesu taakwe kusuminisha milawo iyo iteshi yamu malembo kumupa kwaalilwa kulemeka liina lya Baishi. Amuyeeye shakacitika ndyaakashilika musankwa wakalinga kucite shibanda uyo wakalinga kukala ku Gelasa. Bantu bakaloonda  abuumbi akulwiita Yesu ayi asweeko kumusena uyu, aboobo wakaswaako. (Maako 5:​16, 17) Nacibi boobo, Yesu wakalinga kusuni kwaamba ayi bantu bakumusena uyu bashibe liina lyakwe Lesa. Aboobo wakalwiita musankwa ngwaakashilika kuya mukulwiita bantu Yehova nshaakamucitila, kuteshi Yesu nshaakamucitila. (Amubelenge Maako 5:19.) a Yesu alisuni kwaamba ayi aswebo tucafwe bantu nsengwe yoonse kushiba liina lya Baishi! (Mate. 24:14; 28:​19, 20) Na twacita boobo, tulasangalasha Yesu Mwaami wesu.

11. Ino nciinshi Yesu ncaakalwiita bashikwiiya bakwe kunoopaililaawo, alimwi kweelana a Esekelo 36:​23, ino nceebonshi kucita boobo kulayandika?

¹¹ Yesu wakalinga kucishi ayi luyaando lwakwe Yehova nkusalasha liina Lyakwe, akumana bubeshi boonse bwaambwa pali nguwe. Nceceeco Mwaami wesu wakalwiita bashikwiiya bakwe kunoopaila ayi: ‘NoBeeshiwesu nomuli kwiculu, liina lyanu alisalashikwe.’ (Mate. 6:9) Yesu wakalinga kucishi kwaamba ayi aya ngomakani ayandika abuumbi atookuma bantu abaanjelo boonse. (Amubelenge Esekelo 36:23.) Taakuwo munjelo nabi muntu wakacita shiinji kwaamba ayi asalashe liina lyakwe Yehova mbuli Yesu mbwaakacita. Nacibi boobo, Yesu ndyebakamwaanga, balwani bakwe bakamubekesha ayi taakalinga kutondesha bulemu abuumbi kuli Baishi! Ncakutatoonsha kwaamba ayi Yesu wakalinga kulinyumfwa ayi kubisha liina lisalalite lya Baishi ncilubo cinene abuumbi. Wakalinyumfwa cibiibi abuumbi ceebo cakumwaanga akumupa mulandu wamushobo uyu. Mpashi ici ncocakapa kwaamba ayi Yesu ‘apenshekwe bunene mumoyo’ ndyekwakacaalabo paniini kwaamba ayi bamwaange.—Luka 22:​41-44.

12. Ino ninshila nshi iinditeewo Yesu mbwaakasalasha liina lya Baishi?

¹² Kwaamba ayi Yesu asalashe liina lya Baishi, wakaliyumya ndyaakalinga kupenshekwa munshila shipusenepusene, kucobolwa alimwi akubekeshekwa. Taakuwo cintu cakalinga kweelete kumupa kunyumfwa nsoni mukwiinga wakalinga kucishi ayi wakanyumfwila Baishi mushintu shoonse. (Ebu. 12:2) Alimwi wakalinga kucishi ayi Satana wakalinga kumulwana paciindi ici ciyumu. (Luka 22:​2-4; 23:​33, 34) Ncakutatoonsha kwaamba  ayi Satana wakalinga kusuni ayi Yesu acileeke kushomeka, sombi wakaalilwa cakumaninina! Mukweelaako, Yesu wakatondesha ayi Satana ngumubeshi mubiibi alimwi ayi Yehova alicite basebenshi bashomeka abo batolelela kushomeka kuli nguwe nabi ndyebatokwiinda mumeelesho ayumu!

13. Ino inga mwacita buyani kwaamba ayi musangalashe Mwaami wanu utokweendelesha?

¹³ Sa mulisuni kusangalasha Mwaami wanu utokweendelesha? Amutolelele kulumbaisha liina lyakwe Yehova, akucafwa bamwi kwiiya pamibo ibotu njaacite. Na mwacita boobo, nkokwaamba ayi mutokonkela cakubonenaako cakwe Yesu. (1 Pit. 2:21) Alimwi bweenka mbuli Yesu, mulasangalasha Yehova akutondesha ayi Satana mulwani Wakwe, ngumubeshi utacitewo ansooni!

NA KATULUMBAISHA YEHOVA TULAPA KWAAMBA AYI BAMWI BAKAPULUKE

14-15. Ino nshibotu nshi shiswaamo na katwiisha bantu pali Yehova?

¹⁴ Na katulumbaisha liina lyakwe Yehova, tulapa kwaamba ayi bamwi bakapuluke. Munshila nshi? Satana ‘wakabika mumunshinshe maano abantu batashomi.’ (2 Koli. 4:4) Aboobo bantu balashoma bubeshi bwakwe mbuli bwakwaamba ayi: Lesa taako, Lesa ali kulaale andiswe alimwi taatubikiliko maano, Lesa ngushilunkutwe alimwi ayi alaanisha bamucita shibiibi kwamuyayaya. Satana alaamba bubeshi boonse ubu kwaamba ayi anyonyoole mpuwo ibotu Yehova njaacite akupa kwaamba ayi bantu batasuni kuba abushicibusa anguwe. Sombi na katushimikilako bamwi, tulapa kwaamba ayi Satana aalilwe kukumanisha luyaando lwakwe. Tulaiisha bantu cancine pali Ishiwesu akulumbaisha liina lisalalite lyakwe Lesa wesu. Ino nshiinshi shiswaamo?

¹⁵ Cancine camu Maswi akwe Lesa cilicite nkusu abuumbi. Kuli shibotu shiswaamo na katwiisha bantu pali Yehova apamibo yakwe. Bantu balacileka kushoma bubeshi bwakwe Satana alimwi balatalika kubona mibo ibotu Ishiwesu njaacite. Balamulemeka abuumbi ceebo cakushiba nkusu shiinditeewo nshaacite. (Isa. 40:26) Baleeya kucinka manungo muli nguwe ceebo cakwaamba ayi alacita shintu mubululami. (Duto. 32:4) Baleeya shiinji pabusongo mbwaacite. (Isa. 55:9; Loma. 11:33)  Alimwi balayuminishikwa kushiba ayi mubo unene ngwaacite ndusuno. (1 Joni 4:8) Ndyebatooya ciba abushicibusa buyumu a Yehova, balashoma cakutatonsha ayi kulangila nkobacite kwakukala kwamuyayaya kulaakukumanishikwa. Tulicite coolwe cibotu abuumbi cakucafwa bantu kwaamba ayi babe bushicibusa a Ishiwabo! Na twacita boobo Yehova alatubona ayi tuli ‘basebenshinyina.’—1 Koli. 3:​5, 9.

16. Ino nshiinshi shicitika kubamwi na bashiba liina lyakwe Lesa? Amwaambe shakubonenaako.

¹⁶ Pakutaanguna, mpashi inga twalwiitabo bantu ayi liina lyakwe Lesa ngu Yehova. Kushibabo liina lyakwe Lesa inga kwaalula buumi bwa muntu usuni kwiiya. Kucakubonenaako, mwanakashi wacanike waliina lya Aaliyah b wakakomenena mubupailishi mobatakalinga kwiiya makani amu Baibo. Sombi bupailishi mbwakalingaamo tabwakalinga kumusangalashaawo alimwi taakalinga kulinyumfwa kuba pafwiifwi a Lesa. Ano ndyaakatalika kwiiya Baibo a Bakamboni Bakwe Yehova, wakacileka kulinyumfwa boobo. Wakatalika kubona Lesa ayi ngu Shicibusa wakwe. Alimwi wakakankamana ndyaakeeya ayi liina lyakwe Lesa bakalikushaamo muma Baibo aanji akubikamo maswi abulemu mbuli Mwaami. Kushiba liina lyakwe Yehova kwakaalula buumi bwakwe. Wakaamba ayi: “Shicibusa ngonsunishishi alicite liina!” Ino nshiinshi shakaswaamo? Wakaamba ayi: “Ndicite luumuno lwamumoyo abuumbi pacecino ciindi. Ndalinyumfwa ayi ndi muntu uyandika abuumbi.” Musankwa waliina lya Steve wakalinga shikwiimba uyo wakalinga kukonkela milawo ya baJuda abuumbi. Taakalinga kusuniiwo kuba mubupailishi buli boonse ceebo ca shibiibi bamubupailishi nshobakalinga kucita. Sombi banyina ndyebakafwa, wakasumina kucanikaawo paciiyo, umwi ndyaakalinga kwiiya Baibo a womwi wa Bakamboni Bakwe Yehova. Wakayuminishikwa abuumbi ndyaakashiba liina lyakwe Lesa. Wakaamba ayi: “Nshina kwiiyaawo kale paliina lyakwe Lesa.” Wakatolelela akwaamba ayi: “Kwaciindi cakutaanguna ndakanyumfwishisha ayi ncakwiila Lesa nkwaali! Ndakashiba ayi ndacana Shicibusa.”

17. Ino nceebonshi mulishinishite kutolelela kulumbaisha liina lyakwe Yehova? (Amubone acikope.)

¹⁷ Sa mulalwiitako bamwi liina lyakwe Yehova lisalalite ndyemutoshimikila akwiisha bantu? Sa mulabacafwa kumushiba kabotu Lesa wesu? Mulalumbaisha liina lyakwe Lesa na kamucita boobo. Amutolelele kulumbaisha liina lyakwe Yehova lisalalite kwiinda mukucafwa bamwi kumushiba kabotu ucite liina ili. Kucita boobo kulaakupulusha bantu mbomushimikila. Mulaakukonkela cakubonenaako ca Mwaami wanu, Klistu Yesu. Alimwi cinditeewo, mulaakusangalasha Ishiwanu shilusuno, Yehova. Amutolelele kulumbaisha “liina [lyakwe] lyoonse alyoonse”!—Kulu. 145:2.