AWˬ LAWN 6
KʼA MUIˬ HKAWˇ 10 Yaˬhoˉvaˬ Gʼuiˬ sha htaꞈ chiˇ mvuh loˬ!
‘Yaˬhoˉvaˬ ve awˬ meh htaꞈ chiˇ mvuh˗o’
‘Yaˬhoˉvaˬ htaꞈ chiˇ mvuh˗o. Yawˇ ve awˬ ceˬ teˇ hpaˍ˗oˬ, yawˇ ve awˬ meh htaꞈ chiˇ mvuh˗o.’—CHIˇ MVUH VE 113:1.
HENˇ TUˬ VE TEˇ HPAˍ
Ngaˬ hui te gʼa ve hkʼe Yaˬhoˉvaˬ ve daꞈ kehˬ ve awˬ meh htaꞈ chiˇ mvuh sheˍ.
1-2. Yaˬhoˉvaˬ yawˇ ve awˬ meh htaꞈ she pfuhˍ piˇ htaˇ, hkʼaˬ hkʼe dawˇ ve le? Tawˇ pa haˉ kʼoˆ maˍ laˇ sheˍ.
Tawˇ pa haˉ te kʼo, nawˬ haꞈ ve chaw nawˬ htaꞈ she pfuhˍ laˇ ve yoˬ. Yawˇ she pfuhˍ laˇ ve awˬ lawn lehˬ heˍ ve tawˇ hkawˇ hpehꞈ ve yoˬ. Yaꞈ hkʼaˇ, yawˇ kʼoˆ ve tawˇ hkawˇ htaꞈ awˬ nu ve chaw yonˍ leh awˬ lawn chi ve yawˇ hui teˇ caˉ awˬ nu ve chaw htaꞈ kʼoˆ piˇ leh awˬ nu ve chaw kaꞈ yonˍ sheˍ ve yoˬ. Chi hkʼe hpehꞈ ve kʼo, nawˬ hkʼaˬ hkʼe te tuˬ le? Awˬ lawn oˇ ve gʼa kaˇ ve chaw htaꞈ nawˬ dawˇ haˍ leh yawˇ ve awˬ meh luˬ la ve htaꞈ kaꞈ dawˇ haˍ ve yoˬ. Chi hkʼe she pfuhˍ laˇ ve lehˬ, nawˬ nyi ma luˬ jaˇ tuˬ te laˇ ve yoˬ hehˉ.—Tawˇ naˉ ve 22:1.
2 Yaˬhoˉvaˬ ve awˬ meh luˬ tuˬ she pfuhˍ piˇ htaˇ, yawˇ hkʼaˬ hkʼe dawˇ ve ngaˬ hui na gʼa tuˬ te laˇ ve yoˬ. Mvuhˇ naw ma tcuh yaˇ teˇ gʼaˇ Eˇvaꞈ htaꞈ heˍ piˇ leh Eˇvaꞈ kaꞈ na ve yoˬ. Heˍ ve tawˇ hkawˇ chi chaw yaˇ awˉ lawˉ teˇ ca Yaˬhoˉvaˬ htaꞈ hpfuhˆ tuˬ te piˇ ve yoˬ. Hkʼe te leh, chaw yaˇ venˇ baˆ cawˬ leh gʼa suh˗e ve yoˬ. (Awˬ hkuiˉ puiˍ 3:1-6; Roˉmaꞈ 5:12) Saˍtanˍ oˇ ve teˇ pawˆ heˍ ve lehˬ, chi teˇ hkui chaw yaˇ shoꞈ shaꞈ ve hkʼa peu˗eˬ gʼa hpuˇ chehˇ ve, oˇ htaˇ tanˬ ve yoˬ. Tawˇ pa haˉ te kʼo, suh˗e ve, maꞈ te daꞈ ve, leh tuꞈ ve hkanˍ ve, chi teˇ hpaˍ hpehꞈ ve yoˬ. Chi Yaˬhoˉvaˬ nyi ma luˬ tuˬ te piˇ˗aw laˇ? Te piˇ ve yoˬ. Yaꞈ hkʼaˇ, Yaˬhoˉvaˬ nyi ma luˬ leh hkʼaˬ htaˆ kaꞈ beuꞈ chehˇ ve maˇ heˆ. Yaˬhoˉvaˬ lehˬ “awˬ bon uiˍ ve Gʼuiˬ sha” hpehꞈ ve yoˬ.—1 Tiˆmoˉseˍ 1:11.
3. Ngaˬ hui daꞈ jaˇ ve awˬ vuiˬ aˬ htoꞈ ma cawˬ ve le?
3 Yaˬhoˉvaˬ ve awˬ meh htaꞈ hkʼaˬ htaˆ kaꞈ yawˆ yan tuˬ, ngaˬ hui gʼa te piˇ ve daꞈ jaˇ ve awˬ vuiˬ hpehꞈ ve yoˬ. Ngaˬ hui chi hkʼe te gʼa tuˬ, ‘Yaˬhoˉvaˬ ve awˬ meh htaꞈ chiˇ mvuh˗o’ tehꞈ kʼoˆ ve tawˇ hkawˇ htaꞈ gʼa na yuˬ ve yoˬ. (Chiˇ mvuh ve 113:1) Ngaˬ hui Yaˬhoˉvaˬ ve awˬ meh htaꞈ chiˇ mvuh gʼa ve lehˬ, yawˇ htaꞈ caˉ daꞈ ve awˬ tehˬ ve awˬ lawn shu htaꞈ kʼoˆ piˇ ve yoˬ. Nawˬ Yaˬhoˉvaˬ ve awˬ meh htaꞈ chiˇ mvuh˗aw laˇ? Yaˬhoˉvaˬ ve awˬ meh htaꞈ ngaˬ hui nyi ma awˬ tawˬ hkʼa gaˬ chiˇ mvuh gaˇ tuˬ 3 hkʼaˇ htaꞈ teˇ geh nyi sheˍ.
NGAˬ HUI YAˬHOˉVAˬ VE AWˬ MEH HTAꞈ CHIˇ MVUH HTAˇ YAWˇ HA LEHˬ TUˬ TE PIˇ VE
4. Ngaˬ hui Yaˬhoˉvaˬ htaꞈ chiˇ mvuhˇ piˇ htaˇ, aˬ htoꞈ ma te yawˇ ha lehˬ jaˇ ve le? Tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ.)
4 Ngaˬ hui Yaˬhoˉvaˬ ve awˬ meh htaꞈ chiˇ mvuh htaˇ, yawˇ nyi hkʼaˇ suh tuˬ te piˇ ve yoˬ. (Chiˇ mvuh ve 119:108) Chi kʼoˆ gaˇ ve, kanˇ paˆ uiˍ jaˇ ve Gʼuiˬ sha lehˬ, yawˇ awˬ to yawˇ maˇ yonˍ gʼa leh, chaw yaˇ awˬ nu ve chaw chiˇ mvuh laˇ ve htaꞈ heuˆ gaˇ ve hkʼe yawˇ shuˍ˗aw laˇ? Maˇ shuˍ. Tawˇ pa haˉ chi htaꞈ dawˇ nyi sheˍ. Yaˇ miˇ ehˉ awˬ pa geh gʼuiˇ kʼai leh awˬ pa htaꞈ kʼuˉ taˍ leh kʼoˆ piˇ ve, “ngaˬ pa˗oˬ nawˬ cheuˬ jaˇ.” Chi awˬ pa ha lehˬ jaˇ ve yoˬ. Yaꞈ hkʼaˇ, ngaˬ hui htawˇ dawˇ nawˬ dawˇ cawˬ ve, awˬ pa yawˇ awˬ to yawˇ yonˍ gʼa tuˬ, awˬ yaˇ chiˇ mvuh laˇ ve htaꞈ yonˍ gʼa˗aw laˇ? Maˇ yonˍ gʼa. Ngaˬ hui chi hkʼe maˇ dawˇ. Yaˇ awˬ pa htaꞈ haꞈ leh awˬ pa htaꞈ awˬ bon uiˍ jaˇ tehꞈ kʼoˆ piˇ ve, awˬ pa ha lehˬ ve htaꞈ ngaˬ hui gʼa mawˬ ve yoˬ. Yaˇ chi hkʼe te ve lehˬ yaˇ uiˍ la htaˇ, yawˇ awˬ pon awˬ bon cawˬ ve tehꞈ awˬ pa shiˍ ve yoˬ. Chi ve hkʼa shuˍ shuˍ, Yaˬhoˉvaˬ Gʼuiˬ sha uiˍ jaˇ mvuh jaˇ ve ngaˬ hui yawˇ htaꞈ chiˇ mvuh piˇ ve yawˇ ha lehˬ jaˇ ve yoˬ.
Yaˇ awˬ pa htaꞈ haꞈ leh awˬ bon uiˍ ve tehꞈ hpeuꞈ maw piˇ htaˇ, awˬ pa ha lehˬ jaˇ ve. Chi ve hkʼa shuˍ shuˍ, ngaˬ hui Yaˬhoˉvaˬ ve awˬ meh htaꞈ chiˇ mvuh htaˇ yawˇ ha lehˬ jaˇ ve (Awˬ tawn 4 nyi sheˍ)
5. Ngaˬ hui Yaˬhoˉvaˬ htaꞈ chiˇ mvuh htaˇ, heˍ ve tawˇ hkawˇ aˬ htoꞈ ma htaꞈ hpeuꞈ maw piˇ chehˇ ve le?
5 Awˬ pa Yaˬhoˉvaˬ htaꞈ ngaˬ hui chiˇ mvuh htaˇ, Saˍtanˍ kʼoˆ ve awˬ ceuˬ awˬ tehˬ maˇ heˆ ve tehꞈ ngaˬ hui hpeuꞈ maw piˇ ve yoˬ. Chaw yaˇ beˬ ve lawˇ ve gʼa hpuˇ htaˇ, Gʼuiˬ sha htaꞈ ka tiꞈ maˇ yeˬ taˍ tehꞈ Saˍtanˍ kʼoˆ ve yoˬ. Gʼuiˬ sha ve awˬ meh htaꞈ teˇ gʼaˇ˗ehˬ kaꞈ ka tiꞈ maˇ yeˬ leh maˇ haꞈ shaˉ taˍ tehꞈ yawˇ kʼoˆ sheˍ ve yoˬ. Chaw yaˇ Gʼuiˬ sha ve kanˉ te ve awˬ bon maˇ gʼa ve kʼo, yawˇ hui Gʼuiˬ sha htaꞈ baˬ taˉ tuˬ yoˬ tehꞈ Saˍtanˍ kʼoˆ ve yoˬ. (Yawˇbaˆ 1:9-11; 2:4) Yaꞈ hkʼaˇ, Gʼuiˬ sha ve kanˉ te ve ka tiꞈ yeˬ ve Yawˇbaˆ Saˍtanˍ heˍ ve tehꞈ hpeuꞈ maw laˇ ve yoˬ. Nawˬ awˬ pon kʼo, nawˬ hkʼaˬ htaˆ kaꞈ Gʼuiˬ sha htaꞈ ka tiꞈ yeˬ˗aw laˇ? Ngaˬ hui teˇ gʼaˇ le le Gʼuiˬ sha ve awˬ meh htaꞈ haꞈ shaˉ tuˬ daꞈ jaˇ ve awˬ vuiˬ cawˬ leh Gʼuiˬ sha nyi hkʼaˇ suh ve te piˇ tuˬ yawˇ ve kanˉ ka tiꞈ yeˬ ve hkʼaw te ve yoˬ. (Tawˇ naˉ ve 27:11) Ngaˬ hui chi hkʼe gʼa te ve daꞈ jaˇ.
6. Jawˇ mawˇ Daˍviˆ leh Leˍviˆ chaw htaꞈ ngaˬ hui hkʼaˬ hkʼe te henˇ yuˬ gʼa tuˬ le? (Neˍhaˍmiˆ 9:5)
6 Yaˬhoˉvaˬ htaꞈ haꞈ ve chaw lehˬ, nyi ma awˬ tawˬ hkʼa gaˬ yawˇ ve awˬ meh htaꞈ chiˇ mvuh gaˇ ve yoˬ. Jawˇ mawˇ Daˍviˆ kʼoˆ ve, “ngaˬ ve nyi ma˗oˬ, Gʼuiˬ sha htaꞈ chiˇ mvuh˗o. Ngaˬ ve awˬ to hkʼa peu˗eˬ, yawˇ daꞈ kehˬ ve awˬ meh htaꞈ chiˇ mvuh˗o.” (Chiˇ mvuh ve 103:1) Yaˬhoˉvaˬ ve awˬ meh htaꞈ chiˇ mvuh ve lehˬ, yawˇ ve awˬ to htaꞈ chiˇ mvuh ve tehꞈ kʼoˆ gaˇ ve Daˍviˆ shiˍ ve yoˬ. Ngaˬ hui Yaˬhoˉvaˬ ve awˬ meh gʼa kaˇ htaˇ, yawˇ hkʼaˬ hkʼe ve Gʼuiˬ sha hpehꞈ ve, yawˇ ve te hkʼaˇ dawˇ hkʼaˇ daꞈ ve, yawˇ te ve daꞈ jaˇ ve awˬ ceuˬ, chi ve teˇ hpaˍ htaꞈ ngaˬ hui dawˇ nyi ve yoˬ. Daˍviˆ Gʼuiˬ sha ve awˬ meh daꞈ kehˬ jaˇ ve htaꞈ yawˆ yan leh chiˇ mvuh gaˇ ve tehꞈ hpeuꞈ maw laˇ ve yoˬ. “Ngaˬ ve awˬ to hkʼa peu˗eˬ” Gʼuiˬ sha htaꞈ chiˇ mvuh gaˇ ve yoˬ. Chi ve lehˬ, Gʼuiˬ sha htaꞈ nyi ma awˬ tawˬ hkʼa gaˬ chiˇ mvuh ve htaꞈ kʼoˆ gaˇ ve yoˬ. Chi ve hkʼa shuˍ shuˍ, Leˍviˆ chaw sheh kʼai paˍ lehˬ Yaˬhoˉvaˬ ve awˬ meh htaꞈ chiˇ mvuh ve, yawˇ ve awˬ meh daꞈ kehˬ jaˇ leh uiˍ jaˇ mvuh jaˇ ve pa taw, yawˇ ceh tiˉ chi gʼa keunˍ ve tehꞈ Leˍviˆ chaw kʼoˆ ve yoˬ. (Neˍhaˍmiˆ 9:5 gʼaw sheˍ.) Yaˬhoˉvaˬ htaꞈ nyi ma awˬ tawˬ hkʼa gaˬ chiˇ mvuh ve tehꞈ hpeuꞈ maw piˇ ve lehˬ, yawˇ ha lehˬ jaˇ tuˬ te piˇ ve yoˬ.
7. Ngaˬ hui Yaˬhoˉvaˬ ve kanˉ te ve hkʼaw leh a shaꞈ teꞈ kuiˬ lo kaꞈ hkʼaˬ hkʼe te yawˇ htaꞈ chiˇ mvuh gʼa tuˬ le?
7 Chi teˇ hkui kaꞈ ngaˬ hui Yaˬhoˉvaˬ ha lehˬ tuˬ te piˇ gʼa ve yoˬ. Chi lehˬ ngaˬ hui Yaˬhoˉvaˬ ve kanˉ te htaˇ, yawˇ htaꞈ awˬ bon uiˍ hkawˇ kʼoˆ piˇ leh nawˬ yawˇ htaꞈ hkʼaˬ hkʼe taw haꞈ ve awˬ nu ve chaw htaꞈ kʼoˆ maˍ piˇ gʼa ve yoˬ. Awˬ nu ve chaw yawˇ htaꞈ shiˍ gʼa tuˬ ngaˬ hui ga piˇ leh Gʼuiˬ sha htaꞈ ngaˬ hui nyi ve hkʼe awˬ nu ve chaw kaꞈ nyi tuˬ ngaˬ hui gʼa ga piˇ cawˇ ve tehꞈ tawnˇ taˍ sheˍ. (Yaˍkoˆ 4:8) Liꞈ hpu hkʼaw Yaˬhoˉvaˬ htaꞈ caˉ daꞈ ve hkʼaˬ hkʼe kʼoˆ taˍ ve, leh yawˇ ve te hkʼaˇ dawˇ hkʼaˇ kaꞈ awˬ nu ve chaw shiˍ tuˬ ngaˬ hui ga piˇ gaˇ ve yoˬ. Tawˇ pa haˉ te kʼo, Gʼuiˬ sha lehˬ haꞈ pehnˇ ve, hteˇ ve cawˇ ve, cuˇ yiˍ, kanˇ paˆ, leh Yaˬhoˉvaˬ ve te hkʼaˇ dawˇ hkʼaˇ awˬ nu ve awˬ ceuˬ kaꞈ yawˇ hui htaꞈ kʼoˆ maˍ piˇ gaˇ ve yoˬ. Chi hkʼoˆ kaꞈ, ngaˬ hui Yaˬhoˉvaˬ htaꞈ chiˇ mvuh leh yawˇ ha lehˬ tuˬ te piˇ gʼa ve lehˬ, yawˇ htaꞈ henˇ yuˬ ve yoˬ. (Eˇfeˇsuꞈ 5:1) Ngaˬ hui chi hkʼe te ve kʼo, haiˬ ve miˬ guiˬ chi hkʼoˆ lo awˬ nu ve chaw htaꞈ peun daꞈ leh aˬ htoꞈ ma te ngaˬ hui yawˇ hui htaꞈ peun daꞈ ve shiˍ gaˇ tuˬ te piˇ ve yoˬ hehˉ. (Maꞈhtehˍ 5:14-16) Ngaˬ hui awˬ nu ve chaw geh teˇ geh chehˇ htaˇ, aˬ htoꞈ ma te ngaˬ hui teˇ ceuˬ ceuˬ te ve awˬ nu ve chaw htaꞈ maˇ shuˍ ve, teˇ nyi le le ngaˬ hui yawˇ hui htaꞈ kʼoˆ maˍ piˇ tuˬ awˬ yanˇ cawˬ ve yoˬ. Ngaˬ hui chi hkʼe te htaˇ, nyi ma nuˇ nehˬ ve chaw Gʼuiˬ sha htaꞈ shiˍ gaˇ tuˬ kaꞈ te piˇ ve yoˬ. Chi hkʼe te ve lehˬ Yaˬhoˉvaˬ ha lehˬ tuˬ te piˇ ve yoˬ.—1 Tiˆmoˉseˍ 2:3, 4.
NGAˬ HUI YAˬHOˉVAˬ VE AWˬ MEH HTAꞈ CHIˇ MVUH HTAˇ YEˍSUˆ HA LEHˬ TUˬ TE PIˇ VE
8. Yeˍsuˆ lehˬ Yaˬhoˉvaˬ ve awˬ meh htaꞈ chiˇ mvuh ve daꞈ jaˇ ve henˇ yuˬ tuˬ hpehꞈ ve tehꞈ aˬ htoꞈ ma te ngaˬ hui kʼoˆ gʼa ve le?
8 Mvuhˇ naw ma miˬ naˆ ma hkʼa peu˗eˬ hkʼoˆ Yaˬhoˉvaˬ htaꞈ shiˍ daꞈ ve Yeˍsuˆ hkʼe taw maˇ cawˬ. (Maꞈhtehˍ 11:27) Yeˍsuˆ yawˇ ve Awˬ pa Yaˬhoˉvaˬ htaꞈ haꞈ jaˇ leh Yaˬhoˉvaˬ ve awˬ meh htaꞈ chiˇ mvuh ve, Yeˍsuˆ lehˬ daꞈ jaˇ ve henˇ yuˬ tuˬ hpehꞈ ve yoˬ. (Yoˇhanˬ 14:31) Yeˍsuˆ maˇ suh˗e sheˍ teˇ haˉ htaˇ, yawˇ Yaˬhoˉvaˬ geh bon lawˬ ve yoˬ. Yawˇ miˬ guiˬ hkʼoˆ lo chehˇ htaˇ, a yeˇ uiˍ jaˇ ve awˬ vuiˬ gʼa te ve htaꞈ kʼoˆ ve, “nawˬ ve awˬ meh ngaˬ yawˇ hui htaꞈ shiˍ piˇ lawˬ peuˬ.” (Yoˇhanˬ 17:26) Chi Yeˍsuˆ hkʼaˬ hkʼe kʼoˆ gaˇ ve le?
9. Chaw yaˇ Yaˬhoˉvaˬ htaꞈ hkʼa dehꞈ shiˍ tuˬ Yeˍsuˆ aˬ htoꞈ ma ve tawˇ pa haˉ tehˆ maˍ laˇ ve le?
9 Gʼuiˬ sha ve awˬ meh Yaˬhoˉvaˬ meh ve tehꞈ Yeˍsuˆ awˬ nu ve chaw htaꞈ ceh tiˉ kʼoˆ piˇ ve maˇ heˆ. Awˬ tehˬ kʼo, Yeˍsuˆ ve awˬ co˗e htaˇ, Yuˇdaꞈ chaw lehˬ Gʼuiˬ sha aˬ htoꞈ ma meh ve htaꞈ shiˍ˗oˬ ve yoˬ. Yaꞈ hkʼaˇ, “Yaˇ hpu tiˍ lehˬ, Awˬ pa awˬ lawn hkʼa tawˍ lehˆ hpeuꞈ maˍ laˇ peuˬ.” (Yoˇhanˬ 1:17, 18) Tawˇ pa haˉ te kʼo, Heˍbrehˇ ve Liꞈ hpu hkʼaw kʼoˆ ve, Yaˬhoˉvaˬ lehˬ ha kʼaˉ puiˉ jaˇ ve Gʼuiˬ sha hpehꞈ ve yoˬ. (Tawˆ kʼai ve 34:5-7) Yaꞈ hkʼaˇ, Yeˍsuˆ lehˬ chi ve hkʼa tawˍ lehˆ hpeuꞈ maw laˇ tuˬ, mehˉ kʼai taˍ ve yaˇ paˍ ve awˬ lawn tawˇ pa haˉ tehˆ maˍ laˇ sheˍ ve yoˬ. Awˬ lawn chi ve htaꞈ Yeˍsuˆ kʼoˆ ve, ‘yaˇ paˍ vuiˇ kuiˬ lo kʼawꞈ la chehˇ ve htaꞈ’ awˬ pa gʼa mawˬ htaˇ, awˬ pa yawˇ htaꞈ kʼaˉ taˍ leh venˇ baˆ hpehˇ piˇ ve yoˬ. Yaˬhoˉvaˬ Gʼuiˬ sha lehˬ ha kʼaˉ puiˉ jaˇ ve tehꞈ awˬ lawn chi ngaˬ hui mawˬ tuˬ te laˇ ve yoˬ. (Luˉkaꞈ 15:11-32) Yaˬhoˉvaˬ hkʼaˬ hkʼe hpehꞈ ve Yeˍsuˆ lehˬ chaw yaˇ mawˬ tuˬ hkʼa tawˍ lehˆ hpeuꞈ maw laˇ ve yoˬ.
10. (a) Yeˍsuˆ Yaˬhoˉvaˬ ve awˬ meh htaꞈ yehˇ leh awˬ nu ve chaw kaꞈ yawˇ hkʼa shuˍ te tcuh gaˇ ve tehꞈ ngaˬ hui hkʼaˬ hkʼe te shiˍ gʼa ve le? (Maˍkuˆ 5:19) (Awˬ han htaꞈ nyi sheˍ.) (b) Chi beuꞈ teˇ co˗e Yeˍsuˆ ngaˬ hui htaꞈ aˬ htoꞈ ma te tcuh gaˇ ve le?
10 Yeˍsuˆ lehˬ awˬ nu ve chaw htaꞈ yawˇ ve Awˬ pa Yaˬhoˉvaˬ ve awˬ meh yehˇ tcuh gaˇ˗aw laˇ? Yehˇ tcuh gaˇ ve yoˬ. Yaꞈ hkʼaˇ, Yeˍsuˆ ve awˬ co˗e htaˇ bon awˬ hoˉ teˇ hpaˍ Gʼuiˬ sha ve awˬ meh daꞈ kehˬ jaˇ leh kʼoˆ maˇ keunˍ tehꞈ yonˍ ve yoˬ. Liꞈ hpu hkʼaw maˇ hawˍ daꞈ ve awˬ liˇ awˬ hkʼaˇ, Yeˍsuˆ Yaˬhoˉvaˬ ve awˬ meh htaꞈ maˇ chiˇ mvuh tuˬ maˇ te laˇ tcuh. Awˬ lawn teˇ lawn htaꞈ teˇ geh nyi sheˍ. Gaˍdaˍraˆ chaw hawˉ hkʼaˆ teˇ gʼaˇ neˇ geh ve htaꞈ Yeˍsuˆ gu˗e piˇ ve yoˬ. Yeˍsuˆ yawˇ htaꞈ gu˗e piˇ peuˬ hkʼawꞈ nawˉ, venˇ hkʼaw chehˇ ve chaw Yeˍsuˆ htaꞈ kawˆ jaˇ leh Yeˍsuˆ oˇ kaˬ lo tawˆ kʼai tuˬ lawˬ hkawˉ piˇ ve yoˬ. Hkʼe te leh, Yeˍsuˆ tawˆ kʼai ve yoˬ. (Maˍkuˆ 5:16, 17) Yaꞈ hkʼaˇ, Yeˍsuˆ lehˬ oˇ kaˬ lo chehˇ ve chaw Yaˬhoˉvaˬ ve awˬ meh htaꞈ shiˍ tcuh gaˇ ve yoˬ. Hkʼe te leh, Yeˍsuˆ lehˬ yawˇ aˬ htoꞈ ma te ve aꞈ kehˉ Yaˬhoˉvaˬ aˬ htoꞈ ma te ve hawˉ hkʼaˆ oˇ ve awˬ nu ve chaw htaꞈ kʼoˆ piˇ tuˬ awˬ vuiˬ piˇ ve yoˬ. (Maˍkuˆ 5:19 gʼaw sheˍ.) a Chi beuꞈ teˇ co˗e Yeˍsuˆ ngaˬ hui htaꞈ oˇ ve hkʼa shuˍ te tcuh gaˇ ve yoˬ. Ngaˬ hui lehˬ miˬ guiˬ hkʼoˆ lo chehˇ ve chaw hkʼa peu˗eˬ Yaˬhoˉvaˬ ve awˬ meh htaꞈ shiˍ tcuh gaˇ ve yoˬ. Ngaˬ hui chi hkʼe te ve kʼo, ngaˬ hui ve Jawˇ mawˇ Yeˍsuˆ nyi hkʼaˇ suh tuˬ te piˇ chehˇ ve yoˬ.—Maꞈhtehˍ 24:14; 28:19, 20.
Yeˍsuˆ neˇ geh jaw ve hawˉ hkʼaˆ teˇ gʼaˇ htaꞈ Yaˬhoˉvaˬ yawˇ htaꞈ hkʼaˬ hkʼe gu na˗e laˇ ve awˬ nu ve chaw htaꞈ kʼoˆ maˍ piˇ tcuh ve (Awˬ tawn 10 nyi sheˍ)
11. Yeˍsuˆ awˬ laꞈ gʼawˇ hui htaꞈ aˬ htoꞈ ma awˬ lawn bon lawˬ tuˬ maˍ piˇ ve le? Leh aˬ htoꞈ ma te chi a yeˇ uiˍ jaˇ ve le? (Yeˍsaˍkeˍlaˆ 36:23)
11 Yeˍsuˆ shiˍ ve Yaˬhoˉvaˬ ve a loˍ lehˬ, yawˇ ve awˬ meh htaꞈ yawˆ yan te piˇ leh she pfuhˍ laˇ ve hkʼa peu˗eˬ htaꞈ ponˬ tcuh gaˇ ve yoˬ. “Mvuhˇ naw ma hkʼoˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ” tehꞈ Yeˍsuˆ awˬ laꞈ gʼawˇ hui htaꞈ bon chi hkʼe lawˬ tuˬ maˍ piˇ ve yoˬ. (Maꞈhtehˍ 6:9) Chi hkʼe te ve lehˬ a yeˇ uiˍ jaˇ ve tehꞈ Yeˍsuˆ shiˍ leh Yaˬhoˉvaˬ hpanˍ taˍ ve teˇ ceuˬ le le awˬ pon awˬ bon cawˬ ve yoˬ. (Yeˍsaˍkeˍlaˆ 36:23 gʼaw sheˍ.) Awˬ tehˬ kʼo, mvuhˇ naw ma miˬ naˆ ma hkʼa peu˗eˬ hkʼoˆ Yaˬhoˉvaˬ ve awˬ meh htaꞈ yawˆ yan ve Yeˍsuˆ hkʼe taw te maˇ gʼa. Yaꞈ hkʼaˇ, Yeˍsuˆ htaꞈ shu hpeh yuˬ htaˇ, canˇ paˍ yawˇ htaꞈ aˬ htoꞈ ma she pfuhˍ piˇ ve le? Yawˇ hui kʼoˆ ve, Yeˍsuˆ Gʼuiˬ sha htaꞈ maˇ yawˆ maˇ yan te ve yoˬ. Yaˬhoˉvaˬ ve awˬ meh daꞈ kehˬ jaˇ ve htaꞈ chaꞈ chiˆ tuˬ te piˇ ve lehˬ, venˇ baˆ uiˍ jaˇ ve awˬ ceuˬ hpehꞈ ve tehꞈ Yeˍsuˆ shiˍ ve yoˬ. Hkʼe te leh, Yeˍsuˆ htaꞈ chi hkʼe she pfuhˍ piˇ ve yawˇ nyi ma luˬ jaˇ. Chi htaꞈ pa taw, Yeˍsuˆ htaꞈ shu hpeh yuˬ la yoˬ te htaˇ, “yawˇ nyi ma hkʼaw tuꞈ jaˇ hkanˍ jaˇ” tuˬ te piˇ ve yoˬ.—Luˉkaꞈ 22:41-44.
12. Yeˍsuˆ yawˇ ve Awˬ pa ve awˬ meh htaꞈ hkʼaˬ htaˆ kaꞈ yawˆ yan te piˇ tuˬ hkʼaˬ hkʼe te ve le?
12 Yeˍsuˆ lehˬ Yaˬhoˉvaˬ ve awˬ meh htaꞈ hkʼaˬ htaˆ kaꞈ yawˆ yan ve te piˇ tuˬ, shu ciˍ yanˍ piˇ ve, deˇ piˇ ve, she pfuhˍ piˇ ve, leh Yeˍsuˆ beˬ ve lawˇ ve teˇ ceuˬ le le htaꞈ kaꞈ gʼa yeunˇ hkanˍ ve yoˬ. Chi ve teˇ hpaˍ htaꞈ Yeˍsuˆ yeunˇ hkanˍ gʼaˇ leh yawˇ hkʼa dehꞈ na yuˬ gʼa ve lehˬ, yaꞈ taw tuˬ maˇ cawˬ tehꞈ Yeˍsuˆ shiˍ ve yoˬ. (Heˍbrehˇ 12:2) Yeˍsuˆ tuꞈ jaˇ hkanˍ jaˇ ve awˬ yanˇ htaˇ, Saˍtanˍ Yeˍsuˆ htaꞈ te luˬ gaˇ ve tehꞈ yawˇ shiˍ ve yoˬ. (Luˉkaꞈ 22:2-4; 23:33, 34) Saˍtanˍ lehˬ Yeˍsuˆ Yaˬhoˉvaˬ htaꞈ ka tiꞈ maˇ yeˬ tcuh gaˇ ve yoˬ. Yaꞈ hkʼaˇ, Saˍtanˍ dawˇ taˍ ve hkʼe te maˇ gʼa. Awˬ lawn kʼo, Saˍtanˍ heˍ ve tehꞈ Yeˍsuˆ hpeuꞈ maw laˇ˗oˬ ve hkʼe, Yaˬhoˉvaˬ ve kanˉ te ve chaw a shaꞈ teꞈ kuiˬ hkʼaw tuꞈ ve hkanˍ ve gʼa hpuˇ tuˬ lawˇ nyi piˇ ve htawˇ, yawˇ hui Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw laˇ ve yoˬ.
13. Nawˬ ve Jawˇ mawˇ Yeˍsuˆ ha lehˬ tuˬ hkʼaˬ hkʼe te piˇ gʼa tuˬ le?
13 Nawˬ ve Jawˇ mawˇ Yeˍsuˆ ha lehˬ tuˬ te piˇ gaˇ˗aw laˇ? Nawˬ te gʼa ve lehˬ, Yaˬhoˉvaˬ ve awˬ meh htaꞈ chiˇ mvuh ve leh Yaˬhoˉvaˬ hkʼaˬ hkʼe ve Gʼuiˬ sha hpehꞈ ve awˬ nu ve chaw shiˍ tuˬ ga piˇ ve yoˬ. Nawˬ chi hkʼe te ve kʼo, Yeˍsuˆ htaꞈ henˇ yuˬ chehˇ ve yoˬ. (1 Peˍtruˆ 2:21) Nawˬ Yaˬhoˉvaˬ ha lehˬ tuˬ te piˇ leh Yaˬhoˉvaˬ ve canˇ paˍ Saˍtanˍ heˍ ve tehꞈ hpeuꞈ maw piˇ ve yoˬ.
NGAˬ HUI YAˬHOˉVAˬ VE AWˬ MEH HTAꞈ CHIˇ MVUH HTAˇ SHU GʼA PONˬ TUˬ GA PIˇ VE
14-15. Yaˬhoˉvaˬ htaꞈ caˉ daꞈ ve ngaˬ hui awˬ nu ve chaw htaꞈ maˍ piˇ htaˇ, nyi ma pfuhˇ lawꞈ lawꞈ ve awˬ ceuˬ aˬ htoꞈ ma htaꞈ ngaˬ hui gʼa mawˬ ve le?
14 Ngaˬ hui Yaˬhoˉvaˬ ve awˬ meh htaꞈ chiˇ mvuh htaˇ, shu ve a shaꞈ gʼa ponˬ tuˬ ga piˇ ve yoˬ. Chi hkʼaˬ hkʼe te hpehꞈ kʼai gʼa ve le? Saˍtanˍ lehˬ, ‘chaw yaˇ ve nyi ma htaꞈ naˆ hoꞈ piˇ lawˬ ve yoˬ.’ (2 Kawˇrenˍhtuˆ 4:4) Heuˆ la kuiˬ lehˬ, chaw yaˇ laiˉ gʼaˇ Saˍtanˍ heˍ ve hkawˇ na ve, Gʼuiˬ sha awˬ tehˬ maˇ cawˬ ve, Gʼuiˬ sha chehˇ vuiˇ jaˇ ve, chaw yaˇ hkʼaˬ hkʼe hpehꞈ ve htaꞈ Gʼuiˬ sha a yeˇ maˇ yuˬ ve, haiˬ jaˇ leh te yaꞈ ve chaw htaꞈ ciˍ yanˍ piˇ ve yoˬ tehꞈ yawˇ hui chi hkʼe yonˍ ve yoˬ. Heˍ ve tawˇ hkawˇ chi teˇ hpaˍ Yaˬhoˉvaˬ ve awˬ meh chaꞈ chiˆ tuˬ te piˇ ve yoˬ. Gʼuiˬ sha ve awˬ meh htaꞈ te luˬ piˇ leh chaw yaˇ Gʼuiˬ sha geh maˇ meuˆ daꞈ gaˇ tuˬ kaꞈ te piˇ ve yoˬ. Yaꞈ hkʼaˇ, ngaˬ hui te ve kanˉ lehˬ Saˍtanˍ htaꞈ tawˍ piˇ chehˇ ve yoˬ. Chaw yaˇ Yaˬhoˉvaˬ htaꞈ caˉ daꞈ ve awˬ tehˬ ve htaꞈ shiˍ tuˬ ngaˬ hui maˍ piˇ leh yawˇ ve awˬ meh daꞈ kehˬ ve htaꞈ chiˇ mvuh tuˬ kaꞈ maˍ piˇ ve yoˬ. Leh Ngaˬ hui te ve awˬ ceuˬ awˬ bon hkʼaˬ hkʼe cawˬ ve le?
15 Liꞈ hpu hkʼaw awˬ tehˬ ve kanˇ paˆ cawˬ jaˇ. Awˬ nu ve chaw Yaˬhoˉvaˬ htaꞈ shiˍ la tuˬ ngaˬ hui maˍ piˇ leh yawˇ hkʼaˬ hkʼe ve Gʼuiˬ sha hpehꞈ ve htaꞈ shiˍ tuˬ kaꞈ maˍ piˇ ve yoˬ. Ngaˬ hui nyi ma pfuhˇ lawꞈ lawꞈ te laˇ ve laiˉ ceuˬ htaꞈ gʼa mawˬ ve yoˬ. Saˍtanˍ heˍ piˇ ve htaꞈ pa taw, Yaˬhoˉvaˬ ve te hkʼaˇ dawˇ hkʼaˇ daꞈ jaˇ ve htaꞈ maˇ gʼa kaˇ jaw ve chaw lehˬ, Yaˬhoˉvaˬ ve kanˇ paˆ uiˍ jaˇ mvuh jaˇ ve htaꞈ yawˇ hui gʼa shiˍ htaˇ dawˇ cawˇ jaˇ ve tehꞈ ngaˬ hui gʼa mawˬ ve yoˬ. (Iˉsaˍyaˆ 40:26) Yaˬhoˉvaˬ hteˇ jaˇ cawˇ jaˇ ve tehꞈ hpeuꞈ maw piˇ ve pa taw, yawˇ hui yawˇ htaꞈ gʼaˇ va gʼa ve yoˬ. (Bon maˍ ve 32:4) Gʼuiˬ sha ve cuˇ yiˍ naˉ jaˇ ve htaꞈ yawˇ hui gʼa shiˍ htaˇ, anˇ jaˇ ve yoˬ. (Iˉsaˍyaˆ 55:9; Roˉmaꞈ 11:33) Chi hkʼoˆ kaꞈ, Gʼuiˬ sha haꞈ pehnˇ ve cawˬ ve tehꞈ yawˇ hui shiˍ htaˇ, awˬ gʼaˇ gʼa jaˇ ve yoˬ. (1 Yoˇhanˬ 4:8) Yawˇ hui Yaˬhoˉvaˬ geh meuˆ daꞈ tuˬ coˇ caˇ htaˇ, yawˇ hui Yaˬhoˉvaˬ ve yaˇ hpehꞈ leh co co taiˍ taiˍ ve a shaꞈ gʼa tuˬ dawˇ law kuiˬ htaꞈ hkʼa tawˍ lehˆ mawˬ gʼa ve yoˬ. Awˬ pa Yaˬhoˉvaˬ geh awˬ nu ve chaw laiˉ gʼaˇ meuˆ daꞈ la tuˬ ngaˬ hui ga piˇ ve daꞈ jaˇ ve awˬ vuiˬ gʼa ve yoˬ. Ngaˬ hui chi hkʼe te htaˇ, ngaˬ hui “Gʼuiˬ sha ve kanˉ te shehˍ hpaˇ hpehꞈ ve yoˬ.”—1 Kawˇrenˍhtuˆ 3:5, 9.
16. Chaw teˇ hpaˍ Yaˬhoˉvaˬ ve awˬ meh htaꞈ shiˍ htaˇ a shaꞈ teꞈ hkʼaˇ hkʼaˬ hkʼe pa ve le? Tawˇ pa haˉ kʼoˆ maˍ laˇ sheˍ.
16 Awˉ lawˉ htaˇ ngaˬ hui lehˬ awˬ nu ve chaw htaꞈ Gʼuiˬ sha ve awˬ meh Yaˬhoˉvaˬ ceh tiˉ meh ve tehꞈ maˍ piˇ ve yoˬ. Chi ve lehˬ, nyi ma nuˇ nehˬ ve chaw awˬ pon awˬ bon cawˬ tuˬ te piˇ ve yoˬ. Tawˇ pa haˉ te kʼo, yaˇ miˇ haˉ teˇ gʼaˇ A˗li˗yan b meh ve, bon liˇ htaꞈ maˇ yonˍ ve yehˬ kʼa hkʼaw yawˇ uiˍ la ve yoˬ. Yaꞈ hkʼaˇ, yawˇ lawˉ kiˍ yaˇ hpehꞈ ve htaꞈ maˇ dawˇ cawˇ leh yawˆ yan tuˬ kaꞈ maˇ dawˇ. Chi hkʼe hpehꞈ ve htawˇ, Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ la htaˇ, yawˇ ve dawˇ hkʼaˇ pa ve yoˬ. Yaˬhoˉvaˬ lehˬ yawˇ ve awˬ chawˇ awˬ tehˬ hpehꞈ ve tehꞈ tanˬ shawˍ ve yoˬ. Gʼuiˬ sha ve awˬ meh Liꞈ hpu laiˉ kʼoˆ hkʼaw shiˆ baˬ leh yawˇ ve aˉ yaˇ Jawˇ mawˇ Gʼuiˬ sha tehꞈ ceh tiˉ kʼoˆ ve htaꞈ gʼa shiˍ htaˇ anˇ jaˇ ve yoˬ. Yaˬhoˉvaˬ ve awˬ meh htaꞈ caˉ daꞈ ve yawˇ gʼa henˇ htaˇ, yawˇ ve a shaꞈ teꞈ hkʼaˇ kaꞈ pa ve yoˬ. Yawˇ kʼoˆ ve, “ngaˬ meuˆ daꞈ jaˇ ve Gʼuiˬ sha lehˬ awˬ meh cawˬ ve yoˬ.” Chi awˬ bon hkʼaˬ hkʼe gʼa ve le? Yawˇ kʼoˆ ve, “chi teˇ hkui Gʼuiˬ sha ve awˬ meh cawˬ ve htaꞈ ngaˬ gʼa shiˍ htaˇ ngaˬ nyi ma gawˬ lehˍ cawˬ leh ha lehˬ jaˇ ve yoˬ.” Hawˉ hkʼaˆ teˇ gʼaˇ Saˍteˍhpaˍ meh ve tinˍ htiˆ paˍ hpehꞈ ve yoˬ. Yawˇ ve yehˬ kʼa Yuˇdaꞈ chaw ve bon htaꞈ yonˍ hehnˇ jaˇ. Yaꞈ hkʼaˇ, teˇ gʼaˇ le le shu mawˬ kuiˬ lo daꞈ ve htaꞈ ceh te ve pa taw, bon liˇ teˇ maˬ hkʼaw kaꞈ yawˇ maˇ chehˇ gaˇ. Chi hkʼe hpehꞈ ve htawˇ, yawˇ ve awˬ e suh peuˬ hkʼawꞈ nawˉ, Shaˉhkiˆhkanˍ ve chaw geh Liꞈ hpu henˇ tuˬ dawˇ cheˆ ve yoˬ. Gʼuiˬ sha ve awˬ meh htaꞈ yawˇ gʼa shiˍ ve ha lehˬ jaˇ ve yoˬ. Yawˇ kʼoˆ ve, “ngaˬ Gʼuiˬ sha ve awˬ meh htaꞈ maˇ gʼa kaˇ jaw. Gʼuiˬ sha lehˬ awˬ tehˬ cawˬ ve htaꞈ chi teˇ pawˆ ngaˬ na gʼa la ve awˉ lawˉ teˇ pawˆ hpehꞈ ve yoˬ. Ngaˬ awˬ tehˬ ve awˬ chawˇ htaꞈ gʼa mawˬ˗oˬ ve tehꞈ chi ve teˇ pawˆ shiˍ la ve yoˬ.”
17. Aˬ htoꞈ ma te nawˬ caˉ leh Yaˬhoˉvaˬ ve awˬ meh htaꞈ chiˇ mvuh tuˬ dawˇ teh taˍ cawˇ ve le? (Awˬ han htaꞈ nyi sheˍ.)
17 Nawˬ hto toˇ˗e leh awˬ nu ve chaw htaꞈ Liꞈ hpu maˍ piˇ htaˇ, yawˇ hui Yaˬhoˉvaˬ ve awˬ meh htaꞈ shiˍ la tuˬ nawˬ kʼoˆ maˍ piˇ˗aw laˇ? Yaˬhoˉvaˬ hkʼaˬ hkʼe ve Gʼuiˬ sha hpehꞈ ve htaꞈ yawˇ hui shiˍ tuˬ nawˬ maˍ piˇ˗aw laˇ? Nawˬ chi hkʼe te ve kʼo, nawˬ Yaˬhoˉvaˬ ve awˬ meh htaꞈ chiˇ mvuh chehˇ ve yoˬ. Yaˬhoˉvaˬ ve daꞈ kehˬ ve awˬ meh htaꞈ nawˬ caˉ leh chiˇ mvuh sheˍ. Chi ve lehˬ, chaw yaˇ Yaˬhoˉvaˬ hkʼaˬ hkʼe ve Gʼuiˬ sha hpehꞈ ve htaꞈ shiˍ tuˬ maˍ piˇ ve yoˬ. Nawˬ chi hkʼe te ve kʼo, nawˬ shu ve a shaꞈ htaꞈ ga ponˬ piˇ ve yoˬ. Daꞈ jaˇ ve Yeˍsuˆ htaꞈ nawˬ henˇ yuˬ leh a yeˇ uiˍ jaˇ ve lehˬ, Awˬ pa Yaˬhoˉvaˬ nyi hkʼaˇ suh tuˬ te piˇ ve yoˬ. ‘Nawˬ co co taiˍ taiˍ Yaˬhoˉvaˬ ve awˬ meh htaꞈ chiˇ mvuh sheˍ!’—Chiˇ mvuh ve 145:2.
Ngaˬ hui Yaˬhoˉvaˬ ve awˬ meh htaꞈ chiˇ mvuh gʼa ve lehˬ, yawˇ ve awˬ meh shu htaꞈ maˍ piˇ ve leh yawˇ hkʼaˬ hkʼe ve Gʼuiˬ sha hpehꞈ ve kaꞈ maˍ piˇ ve (Awˬ tawn 17 nyi sheˍ)
YAˬHOˉVAˬ VE AWˬ MEH HTAꞈ CHIˇ MVUH VE . . .
-
Yaˬhoˉvaˬ ha lehˬ tuˬ hkʼaˬ hkʼe te piˇ ve le?
-
Yeˍsuˆ ha lehˬ tuˬ hkʼaˬ hkʼe te piˇ ve le?
-
Shu gʼa ponˬ tuˬ hkʼaˬ hkʼe ga piˇ ve le?
KʼA MUIˬ HKAWˇ 2 Yaˬhoˉvaˬ lehˬ nawˬ ve awˬ meh yoˬ
a Maˍkuˆ chi ve teˇ tawn hkʼaw Yeˍsuˆ kʼoˆ ve tawˇ hkawˇ yawˇ bvuhꞈ htaˇ, Maˍkuˆ Gʼuiˬ sha ve awˬ meh yehˇ ve tehꞈ yonˍ gʼa tuˬ shaˉ hkiˆ laiˉ maˬ cawˬ ve. Chi htaꞈ pa taw, miˬ guiˬ awˬ suhˉ yuˬ tawˆ ve Liꞈ hpu chi ve teˇ tawn hkʼaw Yaˬhoˉvaˬ ve awˬ meh yehˇ ve. Liꞈ hpu awˬ tawn chi Liꞈ hpu henˇ tuˬ ve liꞈ hkʼaw nyi gʼa ve.
b Awˬ lawn chi ve hkʼaw awˬ meh teˇ hpaˍ hpaˍ pa ve.
