1-2. Ki nto mañi yekona kulutusa kuutwisisa mwanaaikutwezi Jehova libizo lahae hane lisinyizwe?

 MUNAHANE taba ye: Mutu yemulata ubulela taba yemaswe ka za mina. Mwaziba kuli taba yeo ki ya buhata, kono batu babañwi balumela taba yeo. Ka bumai, batu bao bakala kuhasanya taba ya buhata yeo, mi batu babañata bafita fa kulumela taba yeo. Mukaikutwa cwañi? Haiba mwalata batu mi mubata kuzwelapili kuba ni libubo lelinde, mukaikutwa hahulu bumaswe.—Liprov. 22:1.

² Mutala wo ulutusa kuutwisisa mwanaaikutwezi Jehova libizo lahae hane lisinyizwe. Yomuñwi wa bana bahae ba kwa lihalimu naabulezi taba ya buhata ka za hae ku Eva, yena musali wapili. Eva naalumezi taba ya buhata yeo. Taba ya buhata yeo neitahisize kuli bashemi baluna bapili bakwenuhele Jehova. Kabakaleo, sibi ni lifu zayamba kwa batu kaufela. (Gen. 3:​1-6; Maro. 5:12) Miinelo yetaata kaufela yelubona mwa lifasi, yecwale ka mafu, lindwa, ni manyando, itahisizwe ki buhata bwanaakalile kuhasanya Satani mwa simu ya Edeni. Kana Jehova uikutwanga butuku kwa pilu kabakala buhata bo ni zebutahisize? Eni. Niteñi, Jehova haasika halifa kamba kuba ni ndimbelela. Mi mane uzwezipili kuba “Mulimu yatabile.”—1 Tim. 1:11.

3. Ki tohonolo mañi yelunani yona?

³ Lunani tohonolo ya kubonisa kuli zanaabulezi Satani ka za Jehova ki za buhata, ka kumamela taelo yebunolo ye, yeli: “Mulumbeke libizo la Jehova.” (Samu 113:1) Lulumbeka libizo la Jehova ka kutaluseza babañwi litaba kaufela zende ka za hae. Kana muka lumbeka libizo la Jehova? Halunyakisiseñi lika zetaalu zekona kulususueza kulumbeka libizo la Mulimu waluna ka pilu yaluna kaufela.

 LUTABISA JEHOVA HALULUMBEKA LIBIZO LAHAE

4. Ki kabakalañi Jehova habanga ni tabo halu mulumbeka? Mufe mutala. (Mubone ni siswaniso.)

⁴ Lutabisa Ndataa luna wa kwa lihalimu halulumbeka libizo lahae. (Samu 119:108) Kana taba yeo italusa kuli Mulimu yamaata kaufela uswana sina batu babasika petahala bababata hahulu kulumbiwa ilikuli baikutwe kususuezwa? Batili. Halunyakisiseñi mutala wo. Mueze inge bababona kasizana kakamatela bo ndataa kona, kabakumbata ka lilato ni kubataluseza kuli: “Hakuna ndate yomunde kumifita mwa lifasi kaufela!” Bo ndatahe kasizana kao bamenya mi batabisizwe ki zekaezize. Libaka? Kana lwaswanela kunahana kuli ndate yo ukona feela kuikutwa kususuezwa haiba alumbiwa ki mwanaa hae? Batili. Kono ndate yo walata mwanaa hae mi utabile bakeñisa kuli mwanaa hae wamulata mi ubonisa buitumelo. Waziba kuli tulemeno to tukatusa mwanaa hae kuba ni tabo hanzaa hula. Ka nzila yeswana; Jehova, yena Ndate yomutuna ka kufitisisa, watabanga halu mulumbeka.

5. Halulumbeka libizo la Mulimu, ki taba mañi yelubonisa kuli ki ya buhata?

⁵ Halulumbeka Ndataa luna wa kwa lihalimu, lubonisa kuli taba yeo Satani atameleza mañi ni mañi waluna ki ya buhata. Satani upiha kuli hakuna mutu yakona kuyemela libizo la Mulimu ka busepahali. Unahana kuli haluna kuzwelapili kusepahala ku Mulimu halukopana ni miliko. Utalusa kuli kaufelaa luna lukatuhela kusebeleza Mulimu haiba lunahana kuli kueza cwalo kwakona kulutusa. (Jobo 1:​9-11; 2:4) Kono muuna yasepahala Jobo naabonisize kuli Satani ki lihata. Mina bo? Mañi ni mañi waluna unani tohonolo ya kuyemela libizo la Ndataa luna ka busepahali, ni kumutabisa ka kumusebeleza ka busepahali. (Liprov. 27:11) Yeo ki tohonolo yetuna luli!

6. Lukona kulikanyisa cwañi Mulena Davida ni Malivi? (Nehemia 9:5)

⁶ Kulata Mulimu kususuezanga batu babasepahala kulumbeka libizo lahae ka pilu yabona kaufela. Mulena Davida naañozi kuli: “Kashe nilumbeke Jehova; zeinzi ku na kaufela lilumbeke libizo lahae lelikenile.” (Samu 103:1) Davida naautwisisa kuli kulumbeka libizo la Jehova ki kulumbeka Jehova yena kasibili. Libizo la Jehova liama butu bwahae; kacwalo, libizo leo liluhupulisa tulemeno twahae kaufela totunde ni misebezi yahae yekomokisa. Davida naabata kuunga libizo la Ndatahe kuba lelikenile ni kulilumbeka. Naabata kueza cwalo ka ‘zeinzi ku yena kaufela,’ fo kikuli, ka pilu yahae kaufela. Malivi ni bona nebaetelezi babañwi  mwa kulumbeka Jehova. Nebaitumelezi ka buikokobezo kuli manzwi abona naasakoni kulumbeka ka kutala libizo la Jehova lelikenile. (Mubale Nehemia 9:5.) Kusina kukakanya, nebatabisize pilu ya Jehova bakeñisa kuli nebabonisize buikokobezo ni kumulumbeka kuzwelela kwatasaa pilu.

7. Lukona kulumbeka cwañi Jehova haluli mwa bukombwa ni mwa bupilo bwaluna bwa ka zazi?

⁷ Kacenu, lwakona kutabisa Jehova ka kubulela ka za hae ka nzila yebonisa kuli lwaitumela ku yena ni kuli lumulata hahulu. Haluli mwa bukombwa, luswanela kuhupula kuli mulelo waluna omutuna ki kutusa batu kusutelela ku Jehova, ni kubatusa kuunga Ndataa luna yalilato sina molu muungela. (Jak. 4:8) Lubanga ni tabo halubonisa batu zeibulela Bibele ka za Jehova, moiboniseza lilato lahae, katulo yelukile, butali, maata, ni tulemeno twahae totuñwi totunde. Hape lulumbekanga Jehova ni kumutabisa ka kueza molukonela kaufela kuli lumulikanyise. (Maef. 5:1) Haiba lueza cwalo, lubonisa kuli lwashutana ni batu ba mwa lifasi lelimaswe le. Batu bakona kulemuha kuli lwashutana ni bona, mi mwendi baka bata kuziba libaka hakuli cwalo. (Mat. 5:​14-16) Halunze lusebelisana ni bona zazi ni zazi, mwendi lwakona kubataluseza libaka haluezanga lika ka kushutana ni babañwi. Kueza cwalo, kutahisa kuli batu ba lipilu zende baikutwe kusutelela ku Mulimu waluna. Haiba lulumbeka Jehova ka linzila zeo, lukatabisa pilu yahae.—1 Tim. 2:​3, 4.

LUTABISA JESU HALULUMBE KA LIBIZO LA JEHOVA

8. Jesu uetelezi cwañi babañwi mwa kulumbeka libizo la Jehova?

⁸ Kwa libupiwa kaufela zebutali ze mwa mahalimu ni fa lifasi, hakuna yaziba hande Ndate sina mwamuzibela Mwana. (Mat. 11:27) Jesu walata Ndatahe, mi uetelela babañwi mwa kulumbeka libizo la Jehova. (Joa. 14:31) Mwa tapelo yanaalapezi ku Ndatahe fa busihu bone butatamiwa ki lizazi lanaashwile, naatalusize ka bukuswani zanaapetile mwa bukombwa bwahae fa lifasi ka kubulela kuli: “Nizibahalize libizo lahao.” (Joa. 17:26) Naatalusañi?

9. Ki nguli mañi yanaaitusisize Jesu kuli atuse batu kuziba hande mwainezi Ndatahe?

⁹ Jesu naaezize zeñata kwandaa kubulelela feela batu kuli libizo la Mulimu ki Jehova. Majuda banaakutalize ku bona Jesu nebaziba libizo la Mulimu. Kono Jesu naabatusize kuziba hande Mulimu kakuli ‘ki yena yanaa mutalusize.’ (Joa. 1:​17, 18) Ka mutala, Mañolo A Siheberu abonisa kuli Jehova unani sishemo ni mukekecima. (Exo. 34:​5-7) Jesu naabatusize kuutwisisa hande taba ya niti yeo ka kuitusisa mutala wa ndate ni mwana yalatehile. Bibele ibonisa kuli ndate yo hanaaboni mwanaa hae yabakile ‘inzaa tahelela kwahule,’ amumatela, kumukumbata, ni kumuswalela ka pilu yahae kaufela, mi taba yeo ilutusa kulemuha kuli Jehova unani hahulu sishemo ni mukekecima. (Luka 15:​11-32) Jesu naatusize batu kuutwisisa mwainezi luli Ndatahe.

10. (a) Luziba cwañi kuli Jesu naaitusisanga libizo la Ndatahe ni kuli naabata kuli batu babañwi ni bona baeze cwalo? (Mareka 5:19) (Mubone ni siswaniso.) (b) Jesu ubata kuli luezeñi kacenu?

¹⁰ Kana Jesu naabata kuli batu babañwi ni bona baitusise libizo la Ndatahe? Eni. Baeteleli ba bulapeli babañwi ka nako yeo mwendi nebalumela kuli kubulela libizo la Mulimu neli kashwau, kono Jesu naasika lumeleza lizo zesi za ka mañolo zeo kumupaleliswa kukuteka libizo la Ndatahe. Halunyakisiseñi zeneezahezi nako yeñwi hanaafolisize muuna yanaakenwi ki madimona mwa sibaka sa Mageraseni.  Batu bakenelwa ki sabo mi bakupa Jesu kuli azwe mwa sibaka seo; kacwalo, azwa mwa sibaka seo. (Mare. 5:​16, 17) Kono Jesu naabata kuli libizo la Jehova lizibahale mwa sibaka seo. Kacwalo, abulelela muuna yo kutaluseza batu zanaa muezelize Jehova, isiñi zanaa muezelize Jesu. (Mubale Mareka 5:19.) a Ubata kuli ni luna kacenu lueze nto yeswana, ili kuzibahaza libizo la Ndatahe mwa lifasi kaufela! (Mat. 24:14; 28:​19, 20) Haiba lueza cwalo, lukatabisa Jesu, yena Mulenaa luna.

11. Jesu naalutile balateleli bahae kulapelelañi, mi ki kabakalañi taba yeo haili ya butokwa? (Ezekiele 36:23)

¹¹ Jesu naaziba kuli mulelo wa Jehova kikuli libizo lahae likeniswe ni kubonisa kuli litaba kaufela zatamelelizwe ki za buhata. Ki lona libaka Mulenaa luna hanaalutile balateleli bahae kulapela kuli: “Ndataa luna ya kwa mahalimu, libizo lahao likeniswe.” (Mat. 6:9) Jesu naautwisisa kuli yeo ki yona taba ya butokwa hahulu kwa libupiwa kaufela. (Mubale Ezekiele 36:23.) Kwa libupiwa kaufela ze butali kwa lihalimu ni fa lifasi, Jesu ki yena feela yanaaezize lika zeñata kuli akenise libizo la Jehova. Niteñi, Jesu hanaatamilwe, ki sibi sifi sanaatamelelizwe ki lila zahae? Neli sa kunyefula Mulimu! Kusina kukakanya, Jesu naaikutwa kuli kuitusisa maswe kamba kubulela litaba za buhata ka za libizo la Ndatahe lelikenile neli sibi sesituna hahulu. Naaikutwile hahulu bumaswe kakuli naakatamelezwa kuli uezize sibi seo. Mwendi leo ki lona libaka lelituna lene litahisize kuli Jesu ‘aziyelehe’ hahulu nakonyana pili asika tamiwa kale.—Luka 22:​41-44.

12. Jesu naakenisize cwañi libizo la Ndatahe ka nzila yeipitezi?

¹² Kuli akenise libizo la Ndatahe, Jesu naaitiisize hanaanyandiswa, kulwahakiwa, ni kutamelezwa litaba za buhata. Naaziba kuli naautwile Ndatahe mwa lika kaufela, mi naasina libaka la kuswabiswa ki nto ifi kamba ifi. (Maheb. 12:2) Hape naaziba kuli Satani naamulwanisa ka kunonga ka nako yetaata yeo. (Luka 22:​2-4; 23:​33, 34) Satani naanahana kuli naakatahisa kuli Jesu atuhele kusepahala, kono naapalezwi kueza cwalo. Jesu naabonisize hande kuli Satani  ki lihata lelituna ni kuli Jehova unani batanga babasepahala, ili babazwelapili kusepahala ku yena ni habakopana ni miinelo yetaata hahulu!

13. Mukona kutabisa cwañi Mulenaa mina?

¹³ Kana mubata kutabisa Mulenaa mina? Muzwelepili kulumbeka libizo la Jehova, ni kutusa babañwi kuziba hande mwainezi Mulimu waluna. Hamueza cwalo, mulikanyisa Jesu. (1 Pit. 2:21) Ka kuswana ni Jesu, mutabisa Jehova ni kubonisa kuli sila sahae, yena Satani, ki lihata lelituna!

HALULUMBEKA LIBIZO LA JEHOVA, LUTUSA BATU KUFUMANA BUPILO

14-15. Ki lika mañi zende zekona kuezahala haluluta batu ka za Jehova?

¹⁴ Halulumbeka libizo la Jehova, lutusa batu kufumana bupilo. Ka mukwa ufi? Satani “[ufoufalize] minahano ya babasa lumeli.” (2 Makor. 4:4) Kabakaleo, bafitile fa kulumela litaba za buhata zahasanya Satani, zecwale ka ze: Mulimu haayo, Mulimu u kwahule hahulu mi haana taba ni batu, Mulimu unani situhu mi utukufazanga baezalibi kuya kuile. Mulelo wa litaba za buhata zeo kaufela ki kusinya libizo la Jehova, ilikuli batu basike baba ni takazo ya kusutelela ku yena. Kono halukutaza, lutahisa kuli Satani apalelwe kupeta mulelo wahae. Lulutanga batu niti ka za Ndataa luna, ni kulumbeka libizo la Mulimu waluna lelikenile. Ki lika mañi zezwanga mwateñi?

¹⁵ Litaba za niti ze mwa Linzwi la Mulimu linani maata amatuna. Haiba luluta batu ka za Jehova ni kubataluseza mwainezi luli, luka batusa hahulu. Batu bakatuhela hanyinyani-hanyinyani kulumela litaba za buhata zahasanya Satani, mi bakakala kuunga Ndataa luna yalilato sina molu muungela. Baka mukuteka hahulu kabakala maata ahae amatuna. (Isa. 40:26) Bakaituta kumusepa kabakala katulo yahae yelukile. (Deut. 32:4) Bakaituta zeñata kwa butali bwahae bobutuna. (Isa. 55:9; Maro. 11:33) Bakaomba-ombiwa habaka ziba kuli Mulimu ki lilato. (1 Joa. 4:8) Habanze basutelela ku Jehova, sepo yabona ya kupila kuya kuile sina bana bahae ikaba ya luli. Lunani tohonolo yetuna ya kutusa batu kusutelela ku Ndataa bona!  Halueza cwalo, Jehova uka luunga kuli “lusebeza hamoho” ni yena.—1 Makor. 3:​5, 9.

16. Kuziba libizo la Mulimu kuamanga cwañi bupilo bwa batu babañwi? Mufe mitala.

¹⁶ Kwa makalelo, lukana lwaluta feela batu kuli libizo la Mulimu ki Jehova. Taba yeo yakona kucinca bupilo bwa mutu yanani pilu yende. Ka mutala, musali yabizwa Aaliyah b naahuliselizwe mwa bulapeli bone busaluti litaba za mwa Bibele. Kono naasalumelelani ka kutala ni bulapeli bwahae, mi naasaikutwi kusutelela ku Mulimu. Naatuhezi kuikutwa cwalo hakala kuituta Bibele ni Lipaki za Jehova. Akala kuunga Mulimu sina mulikanaa hae. Mi naakomokile hanaaitutile kuli libizo la Mulimu lizwisizwe mwa Libibele zeñata ni kuyoliswa ka malumbatina acwale ka Mulena. Kuziba libizo la Jehova nekucincize bupilo bwahae. Naabulezi ka kumakala kuli: “Mulikanaaka yomutuna unani libizo!” Ki lika mañi zenezwile mwateñi? Ubulela kuli: “Ninani kozo yetuna ka nako ya cwale. Niikutwa kuba ni tohonolo yetuna.” Muuna yabizwa Steve, naali muopeli mi naahuliselizwe mwa bulapeli bwa Sijuda. Naasalati kuswalisana ni bulapeli bufi kamba bufi bakeñisa kuli nekunani baipumisi babañata mwa bulapeli. Nihakulicwalo, hamulaho wa lifu la bo mahe, aikatulela kufumaneha kwa tuto ya Bibele yene izamaiswa ki yomuñwi wa Lipaki za Jehova. Naatabile hahulu hanaazibile libizo la Mulimu. Ubulela kuli: “Nenisa zibi kuli Mulimu unani libizo.” Uekeza kuli: “Neli lwapili kuutwisisa kuli Mulimu ki wa luli! Neni muungile kuba wa luli. Mi hape nenizibile kuli nifumani mulikani.”

17. Ki kabakalañi hamuikatulezi kuzwelapili kulumbeka libizo la Jehova? (Mubone ni siswaniso.)

¹⁷ Hamueza musebezi wa kukutaza ni kuluta, kana mwatalusezanga batu libizo la Jehova lelikenile? Kana mwabatusanga kuziba mwainezi Mulimu waluna? Hamueza cwalo, mulumbeka libizo la Mulimu. Haike muzwelepili kulumbeka libizo la Jehova lelikenile ka kutusa batu kuziba hande mwainezi muñaa libizo leo. Ka kueza cwalo, mukatusa batu kufumana bupilo. Mukalatelela ketelelo ya Mulenaa mina, yena Kreste Jesu. Mi sa butokwa nikufita kikuli, mukatabisa Ndataa mina ya lilato, yena Jehova. Haike mulumbeke “libizo [lahae] kamita ni kuya kuile”!—Samu 145:2.