1-2. Le i bika bibwanya kwitukwasha twivwanije mwiivwaninanga Yehova pabepelwa dijina dyandi bubela?

 FWATAKANYA’PO bidi uno mwanda: Muntu osenswe wakunenena bintu bibi. Abe uyukile amba byanena’bya i bya bubela; inoko bantu bamo abebikulupila. Kibi kutabuka, nabo abashilula kupituluka mu bubela’bwa, kadi bantu bakwabo bavule nabo abebukulupila. Le ukeivwana namani? Shi usenswe bantu kadi utele mutyima ku bulēme bobe, bubela’bwa bukakusansa bininge. Mwene i amo?—Nki. 22:1.

² Kino kimfwa kibwanya kwitukwasha twivwanije mwēivwanine Yehova kitatyi kyobāmubepedile bubela. Wandi mwana umo wa ku mushipiditu wāmubepedile bubela kudi Eva, mwana-mukaji mubajinji. Nandi wēbukulupila. Buno bubela bwālengeje bambutwile betu babajinji batombokele Yehova. Kino kyo kyālengeje bubi ne lufu bitwele mu muzo wa muntu. (Ngo. 3:​1-6; Loma 5:12) Makambakano onso otumona mu ino ntanda—kimfwa lufu, mavita, ne masusu—bidi’ko mwanda wa bubela bwāshilwile kusambakanya Satana mu budimi bwa Edena. Le buno bubela ne makambakano onso alupukile’ko bisansanga Yehova? Bine bimusansanga. Inoko Yehova kadipo na bululu nansha na kīji ku mutyima. Aye wikele nyeke bu “Leza wa nsangaji.”—1 Tm. 1:11.

3. Le i dyese’ka dyotudi nadyo?

³ Tudi na dyese dya kulunga kuboko ku kubingija dijina dya Yehova na kukōkela uno musoñanya upēla wa amba: “Tendelai dijina dya Yehova.” (Ñim. 113:1) Twiditendelanga na kunenena biyampe mwinē dino dijina dijila. Le nobe ukeditendela? Tubandaulei’ko bubinga busatu bukatampe buketukwasha tutendele  dijina dya Leza wetu na mutyima wetu onso.

TUSANGAJANGA YEHOVA POTUTENDELA DIJINA DYANDI

4. Mwanda waka mitendelo yetu isangajanga Yehova? Leta kimfwa. (Tala ne kifwatulo.)

⁴ Tusangajanga Tata wetu wa mūlu potutendela dijina dyandi. (Ñim. 119:108) Le kino kishintulula amba Leza mwinē bukomo bonso, udi pamo bwa bantu ba kubulwa kubwaninina basakanga bantu bakwabo bebatendele, mwanda basakilwa kukankamikwa? Aa. Tubandaulei’ko kino kimfwa. Nkasampe mwana-mukaji wakwata shandi mwishingo na buswe ne kumunena’mba, “Wi tata muyampe pano pa ntanda ponso!” Shandi wasangala enka ne kutengwa na binenwa bya wandi mwana. Mwanda waka? Le tufwaninwe kulanga’mba i tata kekulupilepo, mwine usakilwa kutendelwa na wandi mwana? Aa. Tukulupile amba i tata mukomo wasangala pa kumona wandi mwana umufwija’ko ne kumulombola’mba umusenswe. Tata uyukile amba ino ngikadila ikakwasha wandi mwana ekale na nsangaji paenda utama. Mo monka ne Yehova, Tata mukatampe, usangalanga potumutendela.

5. Le potutendela dijina dya Leza tukwashanga ku kubepulula bubela’ka?

⁵ Potutendela Tata wetu wa mūlu, tukwashanga ku kubepulula bubela bukwabo bwābepele Satana pangala pa umo ne umo motudi. Satana wānenene amba kekudipo muntu nansha umo ukabingija dijina dya Yehova na lulamato. Mungya aye, i kutupu muntu nansha umo motudi udi na bululame. Unenanga’mba batwe bonso tukaleka’byo kwingidila Leza shi tubamone amba kulonga namino kuketukwasha tumwene’mo. (Yoba 1:​9-11; 2:4) Inoko Yoba muntu wa kikōkeji wāmwekeje amba Satana i mbepai. Le abe nobe? Batwe bonso tudi na dyese dya kubingija dijina dya Tata wetu na lulamato, ne kumusangaja na kumwingidila na bululame. (Nki. 27:11) Bine dino i dyese dikatampe dyotudi nadyo.

6. Le i muswelo’ka otubwanya kwiula Mulopwe Davida ne bene Levi? (Nehemia 9:5)

⁶ Kusanswa Leza kulengejanga bantu ba kikōkeji batendele dijina dyandi na mutyima wabo onso. Mulopwe Davida wālembele amba: “Ntendele Yehova; byonso bidi munda mwami bitendele dijina dyandi dijila.” (Ñim. 103:1) Davida wādi wivwanije amba kutendela dijina dya Yehova i kutendela Yehova mwine. Mu dijina dya Yehova mubadilwa bumuntu bwandi. Nanshi potwidivwana, dituvulujanga ngikadila yandi yonso milumbuluke ne bilongwa byandi bya kutendelwa. Davida wādi usaka kumona dijina dya Leza wandi bu dijila  ne kwiditendela. Wādi usaka kwiditendela na ‘byonso bidi munda mwandi’—ko kunena’mba na mutyima wandi onso. Ne bene Levi nabo bātangidile kumeso mu mwanda utala kutendela Yehova. Bāitabije na kwityepeja’mba binenwa byabo kebikalombolapo senene mitendelo yonso ifwaninwe dijina dikola dya Yehova. (Tanga Nehemia 9:5.) Na bubine, ino mitendelo ya kwityepeja kadi itamba ku mutyima, yāsangeje mutyima wa Yehova.

7. Le i muswelo’ka otubwanya kutendela Yehova mu busapudi ne mu būmi bwetu bwa difuku ne difuku?

⁷ Dyalelo tubwanya kusangaja Yehova na kwisambila pādi na kyanga, na mutyima wa kufwija’ko, ne na buswe. Kitatyi kyotudi mu busapudi, tulamanga mu ñeni amba kitungo kyetu kikatampe i kufwenya bantu kudi Yehova, ne kwibakwasha bamone Tata wetu wa buswe motumumwena. (Yak. 4:8) Tusangelanga kulombola bantu muswelo wisambilanga Bible padi Yehova na kumwekeja buswe bwandi, boloke, tunangu, bukomo, ne ngikadila yandi mikwabo isangaja. Kadi tutendelanga Yehova ne kumusangaja na kulonga bukomo bwa kumwiula. (Ef. 5:1) Potulonga namino, twimanijanga mu ino ntanda mibi. Bantu babwanya kujingulula’mba twi beshile ne kwiipangula mwanda waka twi beshile na bantu bakwabo. (Mat. 5:​14-16) Kitatyi kyotwitana nabo mu būmi bwetu bwa difuku ne difuku, tubwanya kwibashintulwila kine kyotwikadile uno muswelo. Kino kifwenyanga bantu ba mutyima muyampe kudi Leza wetu. Potutendela Yehova namino, tusangajanga mutyima wandi.—1 Tm. 2:​3, 4.

TUSANGAJANGA YESU POTUTENDELA DIJINA DYA YEHOVA

8. Le Yesu i mubajinji namani mu kutendela dijina dya Yehova?

⁸ Mu bipangwa byonso bya ñeni bya mūlu ne pano pa ntanda, kekudipo uyukile senene Tata kupita Mwana. (Mat. 11:27) Yesu usenswe Shandi, kadi ye mubajinji mu kutendela dijina dya Yehova. (Yoa. 14:31) Mu milombelo yaālombēle kudi Shandi bufuku bukya kafu, wālombwele mu kīpi mwingilo wandi wa pano pa ntanda amba: “Nayukanya dijina dyobe.” (Yoa. 17:26) Le wādi usaka kunena bika?

9. Le i kimfwa’ka kyāletele Yesu mwanda wa kushintulula patōkelela mwine mwikadile Shandi?

⁹ Yesu kāimaninepo’tu enka pa kusapwila bantu amba dijina dya Leza i Yehova. Bayuda bobādi bafundija kudi Yesu, bādi bayukile kala dijina dya Leza. Inoko Yesu ye wāikele mubajinji ‘mu kumushintulula.’ (Yoa. 1:​17, 18) Kimfwa, Bisonekwa bya Kihebelu bilombola’mba Yehova i Leza wa lusa ne kanye. (Div. 34:​5-7) Yesu wālombwele patōkelela buno bubine paāletele kimfwa kya mwana mujimine ne shandi. Potutanga ino myanda amba tata wāmwene wandi mwana wēsāshile “ukidi dya kulampe mwishinda,” wānyema lubilo kumutundaila, wāmupamba bīpa ne kumufwila lusa na mutyima umo, tumonanga mu ñeni mwikadile Yehova bu Leza wa lusa ne kanye. (Luka 15:​11-32) Yesu wāmwekeje mwine mwikadile Shandi.

10. (a) Le i bika bilombola’mba Yesu wāingidije dijina dya bunka dya Shandi ne amba wādi usaka bantu bakwabo bedingidije? (Mako 5:19) (Tala ne kifwatulo.) (b) Le Yesu witusakilanga tulonge bika dyalelo?

¹⁰ Le Yesu wādi usaka ne bantu bakwabo bengidije dijina dya bunka dya Shandi? I amo. Bendeji ba bipwilo bamo ye bano bādi balanga’mba kutela dijina dya Leza i kwidibulwa bulēme. Inoko Yesu kālekelepo nansha dimo bino bisela bya kubulwa kukwatañana na bisonekwa bimulengeje aleke kulēmeka dijina dya Shandi. Twisambilei’ko pa kitatyi kyākomeje Yesu muntu umo wādi na bandemona mu ntanda ya bene Ngelaze. Bantu bākwetwe moyo ne kuzenza Yesu atambe mu yabo ntanda, o mwanda Yesu wātalukile’mo. (Mako 5: 16, 17) Nansha nankyo, Yesu wāsakile dijina dya Yehova diyukane’mo. Wāsoñenye muntu waākomeje asapwile bantu byobya byāmulongela Yehova, pa kyaba kya amba i Yesu wamulongela’byo. (Tanga Mako 5:19.) a Bino byo byasakanga ne dyalelo—amba tuyukanye dijina dya Shandi pano pa ntanda ponso! (Mat. 24:14; 28:​19, 20) Kitatyi kyotwidiyukanya, tusangajanga Mulopwe wetu, Yesu.

11. Le Yesu wāfundije balondi bandi balombe bika, ne mwanda waka kino i kya mvubu? (Ezekyele 36:23)

¹¹ Yesu wādi uyukile amba mpango ya Yehova i ya kupandula dijina dyandi, ne kwiditōkeja ku matope onso. O mwanda wāfundije balondi bandi balombe amba: “Tata wetu udi mūlu, dijina dyobe dipandulwe.” (Mat. 6:9) Yesu wādi wivwanije amba uno i mwanda mukatampe utala bipangwa byonso. (Tanga Ezekyele 36:23.) I kutupu kipangwa nansha kimo kya ñeni mūlu ne pano pa ntanda, ke kilonge bivule mwanda wa kupandula dijina dya Yehova kutabuka Yesu. Ino le kitatyi kyākwetwe Yesu, i bubi’ka bwāmusambīle balwana nandi? Bāmusambīle amba i muntu utuka Leza! Na bubine Yesu wādi umona’mba kwingidija mu muswelo mubi dijina dijila dya Shandi nansha kwidibepela bubela, i bubi bukatampe kutabuka. Yesu wāvutakanibwe ñeni bininge pa mulangwe wa amba ukasambilwa bu muntu utuka Leza ne kuponejibwa pa buno bubi. Padi buno bo bubinga bukatampe bwālengeje ‘mutyima umusanse bya mwiko,’ mu mansá abadikila kukwatwa kwandi.—Luka 22:​41-44.

12. Le Yesu wāpandwile namani dijina dya Shandi mu muswelo wa pa bula?

¹² Pa kupandula dijina dya Shandi, Yesu wāūminine masusu a miswelo yonso, mutonko, ne bubela. Wāyukile amba ukōkele Shandi mu bintu byonso; o mwanda kādipo na bubinga bwa kwivwanina bumvu. (Bah. 12:2) Kadi wāyukile amba Satana wādi umutamba bulwi bwa patōkelela mu kino kitatyi kya makambakano. (Luka 22:​2-4; 23:​33, 34) Na bubine, Satana wākulupile amba ukatyumuna bululame bwa Yesu; inoko wākomenwe komenwē! Yesu wālombwele amba Satana i mbepai wa mu meso fututu ne amba Yehova udi na bengidi ba lulamato, bene balombolanga bululame bwabo nansha ke mu matompo makomo!

13. I muswelo’ka obwanya kusangaja Mulopwe obe ubikele?

 ¹³ Lelo usakanga kusangaja Mulopwe obe ubikele? Nabya endelela kutendela dijina dya Yehova na kukwasha bantu bakwabo bayuke mwine mwikadile Leza wetu. Shi ulonge namino, ukalonda mu mayo a Yesu. (1 Pe. 2:21) Pamo bwa Yesu, usangajanga Yehova ne kulombola’mba Satana walwana nandi i mbepai wa mu meso fututu!

TUKWASHANGA KU KUPANDIJA MYUYA POTUTENDELA DIJINA DYA YEHOVA

14-15. Le i bintu’ka bya kutendelwa bibwanya kulongeka potufundija bantu myanda ya Yehova?

¹⁴ Potutendela dijina dya Yehova, tukwashanga ku kupandija myuya. Muswelo’ka? Satana “i musabe meso a ñeni ya bantu bampikwa kwitabija.” (2 Ko. 4:4) Kino i kibalengeje bakulupile bubela bwa Satana pamo bwa buno: Leza kadi’kopo, Leza udi kulampe bininge kadi katelepo bantu mutyima, Leza i ntapañani kadi ususulanga banonga-bibi nyeke ne nyeke. Buno bubela budi’tu na kitungo kya kufya nansha kona bulēme bwa dijina dya Yehova amba bantu baleke kumufwena. Inoko mwingilo wetu wa busapudi ulengejanga kino kitungo kya Satana kileke kufikidila. Tufundijanga bantu bubine bwa padi Tata wetu, ne kutendela dijina dyandi dijila. Le i bika bilupukile’ko?

¹⁵ Bubine bwa mu Kinenwa kya Leza budi na bukomo bukatampe. Potufundija bantu myanda ya Yehova ne mwine mwaikadile, twimwenanga kintu kya kutendelwa. Kilenda kya bubela bwa Satana kitalukanga bityebitye mu meso abo, bashilula kumona Tata wetu wa buswe motumumwenanga. Bakwatwanga nzuba pa bukomo bwandi bwampikwa mfulo. (Isa. 40:26) Batūkijibwanga mutyima na boloke bwandi. (Kup. 32:4) Bamunikilwanga na tunangu twandi. (Isa. 55:9; Loma 11:33) Kadi basengibwanga pa kuyuka’mba Tata wetu wa mūlu i buswe. (1 Yo. 4:8) Pobafwena kudi Yehova, lukulupilo lwabo lwa kwikala’ko nyeke bu bandi bana, lwaikala lwa bine kobadi. Bine tudi na dyese dya kutendelwa dya kukwasha bantu bafwene kudi Tata wabo! Potulonga namino, Yehova witumonanga bu ‘bengidi bengila pamo nandi.’—1 Ko. 3:​5, 9.

16. Le bantu bamo batengelwe namani kitatyi kyobayukile dijina dya Leza? Leta bimfwa.

 ¹⁶ Ku ngalwilo, tubwanya’tu kufundija bantu amba dijina dya Leza i Yehova. Dino dijina’tu adyo dine, dibwanya kushinta bininge būmi bwa muntu wa mutyima muyampe. Kimfwa, nsongwakaji umo witwa bu Aaliyah b watamīne mu kisaka ke kya bene Kidishitupo. Inoko mutōtelo wandi kewadipo’tu umusangaja nansha kumufwenya kudi Leza. Kino kyashintyile paashilwile kwifunda na Batumoni. Washilwile kumona Leza bu Mulunda nandi. Kadi watulumukile pa kuyuka’mba dijina dya Leza i ditalulwe mu Mabible mavule ne kupingakanibwa na bitenta pamo bwa Mfumwetu. Kwifunda dijina dya Yehova kwashintyile bininge būmi bwandi. Wanenene amba: “Mulunda nami wa pa mutyima udi na dijina!” Le byafudile kwepi? Unena’mba: “Pano ngidi na ndoe mivule mu mutyima wami. Bine ne mwiivwane biyampe.” Mwana-mulume umo witwa bu Steve, i kaimba wa mu kisaka kya bantu balamine bininge bibidiji bya Bayuda. Kadipo usaka kwikala mu kipwilo nansha kimo pa mwanda wa buzazangi bukatampe bwaadi umona’mo. Inoko pafwile inandi, waitabije kwifunda Bible na Kamoni wa Yehova. Watengelwe bininge pa kuyuka dijina dya Leza. Unena’mba: “Kashā nadi nkyayukile amba Leza udi na dijina.” Ubweja’ko amba: “Uno o musunsa mubajinji onaivwanije amba Leza udi’ko bine! Namumwene bu muntu udi’ko bine. Kupwa nayuka’mba nasokola Mulunda.”

17. Mwanda waka ubasumininwa kutendela nyeke dijina dya Yehova? (Tala ne kifwatulo.)

¹⁷ Le mu mwingilo obe wa kusapula ne kufundija, usapwilanga’mo bantu dijina dikola dya Yehova? Le wibakwashanga bayuke mwine mwikadile Leza wetu? Polonga namino, utendelanga dijina dya Leza. Nanshi endelela kutendela dijina dijila dya Yehova na kukwasha bantu bayuke mwinē dino dijina. Namino, ukapandija myuya. Ukeula Mulopwe obe, Yesu Kidishitu. Kadi kutabukidila, ukasangaja Tata obe wa buswe, Yehova. Nanshi ‘tendela dijina dyandi nyeke ne nyekeke.’!—Ñim. 145:2.