1-2. Ntshinyi tshidi mua kutuambuluisha bua kumanya mudi Yehowa umvua bua mudibu bamba malu a dishima bua dîna diende?

 FUANYIKIJABI ne: muntu uudi munange mmuambe bualu budi bukutape ku muoyo. Udi mumanye ne: tshidiye muambe atshi ndishima; kadi bantu bakuabu badi batshitaba. Kadi bualu bubi menemene budi ne: bantu badi batuadija kuambulula bualu bua dishima abu, bakuabu babuitaba. Neumvue munyi? Wewe munange bantu ne musue bua lumu luebe kalunyanguki, neumvue bibi bua malu adibu bakushiminyina au. Ki mmuomu?—Nsu. 22:1.

² Bualu ebu budi butuambuluisha bua kumanya muvua Yehowa mumvue pavuabu banyange lumu luende. Umue wa ku banjelu bende wakamushiminyina malu kudi Eva. Eva kuitaba. Bualu bua dishima abu buakasaka baledi betu ba kumpala ku ditombokela Yehowa. Ke bualu kayi mpekatu ne lufu biakabuela mu ba pa buloba. (Gen. 3:1-6; Lomo 5:12) Malu mabi onso atudi tumona lelu bu mudi lufu, mvita, ne makenga, mmafumine anu ku dishima divua Satana muambe mu budimi bua Edene. Yehowa mmumvuaku bibi bua malu adibu bamushiminyine au ne bua ntatu idiwu makebeshe anyi? Eyowa. Nansha nanku, ki mmushale ne tshiji, mubungame to. Kadi udi anu “Nzambi wa disanka.”—1 Tim. 1:11.

3. Ndiakalenga kayi ditudi nadi?

³ Tudi ne diakalenga dia kuenza mudimu udi ubingishisha dîna dia Yehowa patudi tutumikila dîyi dituma dia ne: “Tumbishayi dîna dia Yehowa.” (Mis. 113:1) Tudi tubingisha dîna adi  patudi tuambila bakuabu malu ende mimpe. Newenze pebe nanku anyi? Tumonayi malu manene asatu adi atusaka bua kutumbisha dîna dia Nzambi wetu ne muoyo mujima.

TUDI TUSANKISHA YEHOWA PATUDI TUTUMBISHA DÎNA DIENDE

4. Bua tshinyi Yehowa udi usanka patudi tumutumbisha? Fila tshilejilu. (Tangila kabidi tshimfuanyi.)

⁴ Tudi tusankisha tatuetu wa mu diulu patudi tutumbisha dîna diende. (Mis. 119:108) Bualu ebu budiku bumvuija ne: Nzambi wa Bukole buonso udi bu bantu bapange bupuangane badi benzeja bakuabu bua babatumbishe anyi? Tòo. Tuangate tshilejilu etshi: kana ka bakaji katekete kadi kanyema kaya kudi tatuaku, kamupukila, kamba mudiku kanyisha tatuaku bikole. Tatu udi umvua disanka bua tshidi muanende muambe. Bua tshinyi? Bualu ki nyeye udi muenzeje muanende bua kumutumbisha to, kadi tudi tuitaba ne: ntatu muimpe udi usanka padi muanende uleja mudiye mumunange ne umuanyisha. Mmumanye ne: ngikadilu idi nayi muanende ayi neimuambuluishe bua kuikala ne disanka pakolaye. Ke mudibi kabidi bua Yehowa tatuetu mutambe bunene; udi usanka patudi tumutumbisha.

5. Ndishima kayi ditudi tuela patoke patudi tutumbisha dîna dia Nzambi?

⁵ Tuetu tutumbisha tatuetu wa mu diulu, tudi tuleja ne: bidi Satana utuamba mbia dishima. Satana udi wamba ne: kakuena muntu nansha umue wakuila dîna dia Nzambi ne lulamatu to. Buende yeye, kakuena muntu nansha umue wa kutudi udi ne muoyo mutoke to. Udi wamba ne: tuetu bonso netuele Nzambi nyima tuetu bamone ne: kuenza nanku kudi mua kutuambuluisha. (Yobo 1:9-11; 2:4) Kadi Yobo muena lulamatu wakaleja muvua Satana muena dishima. Ke tshiwenza pebe anyi? Yonso wa kutudi udi ne diakalenga dia kubingisha dîna dia Tatu wetu ne kumusankisha padiye umuenzela mudimu ne lulamatu luonso. (Nsu. 27:11) Mu bulelela, ndiakalenga ditudi nadi dia kuenza nanku!

6. Mmunyi mutudi mua kuidikija mukalenge Davidi ne bena Lewi? (Nehemiya 9:5)

⁶ Bena lulamatu badi batumbisha dîna dia Nzambi ne muoyo mujima bualu mbamunange. Mukalenge Davidi wakamba ne: “Meme ntumbishe Yehowa; bintu bionso bidi munda muanyi bitumbishe dîna diende dia tshijila.” (Mis. 103:1) Davidi wakafika kudimanya ne: kutumbisha dîna dia Yehowa, nkutumbisha Yehowa muine. Patudi tuakula bua dîna dia Yehowa, tudi tuakula bua lumu luende. Nanku tudi tumona ngikadilu yende yonso milenga ne bienzedi biende bimpe. Davidi uvua umona ne: dîna dia Yehowa ndia tshijila,  uvua uditumbisha. Uvua musue kuditumbisha ne “bintu biende bionso bia munda,” mmumue ne: ne muoyo wende mujima. Bena Lewi bavua bantunga mulongo mu ditumbisha Yehowa. Bavua bitaba ne budipuekeshi buonso ne: mêyi abu kaavua makumbane bua kuleja butumbi budi bukumbena dîna dia Yehowa to. (Bala Nehemiya 9:5.) Kakuyi mpata, bu muvuabu baleje budipuekeshi bua nanku, batumbisha Yehowa ne muoyo mujima, biakamusankisha bikole.

7. Mmunyi mutudi mua kutumbisha Yehowa patudi mu buambi ne mu nsombelu wetu wa dikutu dionso?

⁷ Lelu, tudi tuleja petu mutudi tusankisha Yehowa patudi tuambila bakuabu malu ende ne disanka mu mushindu udi uleja ne: tudi bamunange. Patudi mu buambi, mbimpe tumanye ne: tshipatshila tshietu tshinene ntshia kusemeja bantu kudi Yehowa, kubambuluisha bua kumona tatuetu wa dinanga mututu tumumona. (Yak. 4:8) Tudi ne disanka dia kuambila bakuabu mudi Bible uleja tshidi Yehowa, mudiye ne dinanga, buakane, meji, bukole, ne ngikadilu mikuabu idi isankisha. Tuetu tudienzeja bua kumuidikija, tudi tuleja kabidi mutudi tumutumbisha ne tumusankisha. (Ef. 5:1) Dîba adi, bantu ba mu bulongolodi bubi ebu nebatuadije kumona ne: tudi bashilangane nabu. Badi mua kudiebeja ne: bua tshinyi tudi bashilangane nabu? (Mat. 5:14-16) Patudi tuyukila nabu matuku onso, mbimpe tuikale badiakaje bua kubumvuija bua tshinyi tudi bashilangane nabu. Dîba adi, bantu badi bakaje muoyo wabu nebasemene kudi Nzambi wetu. Patudi tuenza malu onso aa bua kutumbisha Yehowa, bidi bimusankisha be!—1 Tim. 2:3, 4.

TUDI TUSANKISHA YEZU PATUDI TUTUMBISHA DÎNA DIA YEHOWA

8. Mmushindu kayi udi Yezu ntunga mulongo mu ditumbisha dîna dia Yehowa?

⁸ Ku bifukibua bionso bia meji bidi mu diulu ne pa buloba, kakuena tshidi tshimanye Yehowa bimpe kupita Yezu to. (Mat. 11:27) Mmunange tatuende ne udi ntunga mulongo mu ditumbisha dîna dia Yehowa. (Yone 14:31) Pakasambilaye muladilu wa lufu luende, wakamba mu tshikoso bua mudimu uvuaye muenze pa buloba ne: “Ndi mubamanyishe dîna diebe.” (Yone 17:26) Ntshinyi tshivuaye usua kuamba?

9. Ntshilejilu kayi tshivua Yezu mufile bua kumvuija mudi tatuende?

⁹ Yezu uvua muambile bantu malu a bungi pa kumbusha dîna dia Yehowa divuaye mubamanyishe. Bena Yuda bavua Yezu ulongesha bakavua bamanye dîna dia Nzambi. Kadi Yezu ‘ke uvua mubumvuije tshivua tatuende.’ (Yone 1:17, 18) Tshilejilu, mifundu ya tshiena Ebelu idi ileja ne: Yehowa nNzambi wa luse udi uditeka pa muaba wa bakuabu. (Ekes. 34:5-7) Yezu wakumvuija bualu ebu bimpe menemene pakafilaye tshilejilu tshia tatu ne muana mujimine. Patudi tubala bua muvua tatu au mumone muanende uvua munyingalale “patshivuaye kule,” muvuaye muye lubilu mumupukile, mumufuile luse ne muoyo mujima, tudi tumona patoke mudi Yehowa muena luse udi uditeka pa muaba wa bakuabu. (Luka 15:11-32) Yezu wakumvuija bantu tshivua tatuende menemene.

10. a) Mmunyi mutudi bafike ku dimanya ne: Yezu uvua mumanyishe dîna dia tatuende ne musue bua bakuabu badimanyishe? (Mâko 5:19) (Tangila kabidi tshimfuanyi.) b) Ntshinyi tshidi Yezu musue bua tuenze lelu?

¹⁰ Yezu uvua musue kabidi bua bantu bikale batela dîna dia tatuende anyi? Eyowa. Bamue bamfumu ba bitendelelu bavua mua kuikala bela meji ne: dîna dia Nzambi ndia tshijila, ki mbimpe kuikala kuditela to; kadi Yezu kakalekela ngelelu wa meji mubi uvua kayi wa mu Bible au umupangisha bua kutumbisha dîna dia tatuende to. Tuakulayi bua tshikondo tshivuaye mumbushe demon munda mua muntu mu buloba bua bena Gelasa. Bantu bakumvua  buôwa, kutuadijabu kulomba Yezu bua umbuke mu buloba buabu. (Mâko 5:16, 17) Yeye kumbukamu. Nansha nanku, Yezu uvua musue bua dîna dia Yehowa dimanyike mu buloba abu. Ke bualu kayi wakambila muntu uvuaye mumbushe demon au bua kuambila bantu ne: Yehowa ke uvua mumumbushaye, ki nyeye to. (Bala Mâko 5:19.) a Ke tshidiye musue bua tuenze petu lelu, tumanyishe dîna dia tatuende pa buloba bujima. (Mat. 24:14; 28:19, 20) Tuetu bamanyishe dîna diende, tudi tusankisha Yezu Mukalenge wetu.

11. Yezu uvua mulongeshe bayidi bende bua kusambila bua bualu kayi? Bua tshinyi bualu abu budi ne mushinga? (Yehezekele 36:23)

¹¹ Yezu uvua mumanye ne: tshipatshila tshinene tshia Yehowa ntshia kujidila dîna diende, kudikezula ku malu onso a dishima adibu bamba buadi. Ke bualu kayi, mfumuetu wakalongesha bayidi bende bua kusambila ne: “Tatu wetu udi mu diulu, dîna diebe dijidibue.” (Mat. 6:9) Yezu wakafika ku dimanya ne: ke bualu bunene buvua bifukibua bionso ne bua kuenza. (Bala Yehezekele 36:23.) Kakuena tshifukibua tshia meji nansha tshimue mu diulu anyi pa buloba tshikadi tshijidile dîna dia Yehowa kupita Yezu to. Kadi pakakuatabu Yezu, mbualu kayi bubi buvua bena lukuna bende bamubande nabu? Mupendi wa Nzambi! Yezu uvua mumanye bimpe ne: kuakula bibi bua dîna dia tshijila dia tatuende anyi kudipenda kuvua mpekatu mubi menemene. Wakumvua bibi bualu bavua bamubande ne bamupishe bua bualu abu. Ke tshivua mua kuikala bualu bunene buvua bupeteshe Yezu “kanyinganyinga kakole” mêba ndambu kumpala kua kumukuatabu.—Luka 22:41-44.

12. Mmunyi muvua Yezu mujidile dîna dia Yehowa mu mushindu mutambe bunene?

¹² Bua Yezu kujidila dîna dia tatuende, wakananukila mu makenga a mishindu yonso, mu bipendu ne mu malu a dishima avuabu bamuamba. Uvua mumanye ne: uvua mutumikile tatuende mu malu onso, ne kavua ne bualu bua kumvuila bundu to. (Eb. 12:2) Uvua mumanye kabidi ne: Satana uvua umubunda buludiludi mu bikondo bikole abi. (Luka 22:2-4; 23:33, 34) Satana uvua mutekemene ne: neanyange lulamatu lua Yezu; kadi wakapangila bibi bia dikema! Yezu wakaleja mudi Satana muena dishima wa kalanda musenga, kulejaye ne:  Yehowa udi ne batendeledi bende ba lulamatu badi bashala ne muoyo mutoke nansha mu ntatu mikole.

13. Mmunyi muudi mua kusankisha Mukalenge webe?

¹³ Udi musue kusankisha Mukalenge webe udi ukokesha anyi? Tungunuka ne kutumbisha dîna dia Yehowa, ambuluisha bakuabu bua bamanye tshidi Nzambi bimpe. Wewe wenza nanku, udi ulonda mu makasa a Yezu. (1 Pet. 2:21) Anu bu Yezu, udi usankisha Yehowa, uleja mudi Satana muluishi wende muena dishima!

PATUDI TUTUMBISHA DÎNA DIA YEHOWA TUDI TUSUNGILA MIOYO YA BANTU

14-15. Mmalu kayi mimpe adi mua kufikila bantu tuetu tubalongesha malu a Yehowa?

¹⁴ Patudi tutumbisha dîna dia Yehowa tudi tusungila mioyo ya bantu. Mushindu kayi? Satana ‘mmufofomije meji a badi kabayi bena kuitabuja.’ (2 Kol. 4:4) Nunku, mbafike ku ditaba mashimi ende a ne: Nzambi kenaku to, udi kule ne bantu, kena ubatabalela to, mmuena tshikisu, ne udi ukengesha benji ba malu mabi bua kashidi. Udi wamba mashimi onso aa bua kunyanga lumu lua Nzambi ne dîna diende bua bantu kabapetshi dijinga dia kusemena pabuipi nende to. Kadi patudi tuyisha, tudi tupangisha Satana bua kukumbaja tshipatshila tshiende etshi. Tudi tulongesha bantu bulelela bua tatuetu, tutumbisha dîna diende dia tshijila. Bidi bipatula bipeta kayi?

¹⁵ Bulelela bua mu Dîyi dia Nzambi budi ne bukole bua dikema. Patudi tulongesha bantu malu a Yehowa ne tshidiye menemene, tudi tupeta bipeta bimpe. Bantu badi batabuluka ku mashimi a Satana, batuadija kumona tatuetu wa dinanga anu bu tuetu. Badi batuadija kumunemeka bua mudiye ne bukole budi kabuyi ne mikalu. (Yesh. 40:26) Badi batuadija kumueyemena bua buakane buende. (Dut. 32:4) Meji ende adi abalongesha malu a bungi. (Yesh. 55:9; Lomo 11:33) Bidi bibakankamija padibu bamanya ne: yeye muine udi dinanga. (1 Yone 4:8) Padibu basemena pabuipi ne Yehowa, ditekemena diabu dia kushala ne muoyo kashidi bu bana bende didi dikola. Tudi ne diakalenga dia dikema dia kuambuluisha bantu bua kusemena pabuipi ne Yehowa! Patudi tubambuluisha nanku, Yehowa udi utuangata bu ‘benzejanganyi nende ba mudimu.’—1 Kol. 3:5, 9.

16. Mmunyi mudi bamue bantu bumvua padibu bamanya dîna dia Nzambi? Fila bilejilu.

 ¹⁶ Kumpala tuvua tulongesha bantu patupu ne: Yehowa ke dîna dia Nzambi. Kubalongesha nanku kuvua kuambuluisha bantu bavua bakaje muoyo wabu. Tuakulabi bua mamu mukuabu diende Aaliyah. b Yeye nkayende ke uvua Ntemu bua kuabu kujima. Malu avuabu balongesha mu tshitendelelu tshiabu kaavua amusankisha to, ne kavua udimona pabuipi ne Nzambi to. Kadi pakatuadijaye kulonga Bible ne Bantemu, katshivua wela meji nanku to. Wakatuadija kumona Nzambi bu mulunda wende. Biakamukemesha bikole pakamanyaye ne: bantu bavua bumbushe dîna dia Nzambi mu Bible ya bungi, bapingaje mianzu bu mudi: Mukalenge. Pakamanyaye dîna dia Yehowa, nsombelu wende wakashintuluka. Wakamba ne: “Kaah, mulunda wanyi udi pende ne dîna!” Bua bualu abu udi wamba ne: “Mpindieu ndi ne ditalala dia dikema.” Muimbi wa misambu mukuabu diende Steve uvua mufumine muaba uvua bantu balamate bilele bia buena Yuda bikole. Wakumbuka mu tshitendelelu kampanda bualu uvua umona ne: benamu bavua ne lubombo. Pakafua maman wende, wakitaba bua kulonga Bible ne Ntemu wa Yehowa. Pakamanyaye dîna dia Nzambi, biakamulenga ku muoyo bikole. Udi wamba ne: “Katshia tshivua muanji kumanya dîna dia Nzambi to. Bua musangu wanyi wa kumpala ngakamanya ne: Nzambi mmuntu mulelela! Dîba adi meme kumona ne: mvua mupete mulunda.”

17. Bua tshinyi udi mudisuike bua kutungunuka ne kutumbisha dîna dia Yehowa? (Tangila kabidi tshimfuanyi.)

¹⁷ Pautu mu buambi utuku wambila bantu dîna dia Nzambi dia tshijila dia Yehowa anyi? Utuku ubambuluisha bua kumanya tshidi Nzambi menemene anyi? Wewe wenza nanku, udi utumbisha dîna dia Nzambi. Tungunukayiku ne kutumbisha dîna dia Yehowa dia tshijila, nuambuluisha bantu bua kumanya tshidiye menemene. Nuenu benze nanku, nenusungile mioyo ya bantu ba bungi. Nenulonde tshilejilu tshia Yezu Kristo Mukalenge wenu. Kupita bionso, nenusankishe Yehowa tatuenu wa dinanga. ‘Tumbishiyaku dîna diende bua kashidi ne tshiendelele!’—Mis. 145:2.