1-2. Chakutalilahwinyi chinateli kutukwasha kwiluka chatiyiliyi Yehova chamutamishililiwu ijina dindi?

 TOÑOJOKENU hachumichi: Muntu imwakeña avuba nsañu yatama nankashi hadi enu. Muneluki nenu oyu nsañu yakutwamba, ilaña amakwawu anayikuhweleli. Chinasweji kutama, anatwalekihu kutaandisha oyu nsañu yakutwamba, nawa antu amavulu niwena anayikuhweleli. Mukutiya ñahi? Neyi mwakamenaña antu niijina denu dadiwahi, chakadi nikujina, iyi nsañu yakutwamba yinateli kuyineñesha.—Yish. 22:1.

² Ichi chakutalilahu chinateli kutukwasha kwiluka chatiyiliyi Yehova chelili ijina dindi aditamishi. Wumu hakachi kawañelu jindi wamutwambilili kudi mumbanda watachi, Eva. Wakuhweleleli ana makudi. Ana makudi aletesheli anvwali jetu atachi kudikaña naYehova. Chafuminimu, antu ejima aswanini nshidi nikufwa. (Kutach. 3:​1-6; Rom. 5:12) Kukala kwejima kutunakumona mukaayi—jiñufwa, majita, yihuñu—jekaliliku muloña wamakudi atachikili kutaandishayi Satana mwitempa daEdeni. Komana chamukataña Yehova chamutwambililiwu niyuma yafuminimu? Eña. Hela chochu, Yehova hahila hela kuhemba nkunyiku. Kafwampi, watwalekahu kwikala “[Nzambi] wamuzañalu.”—1 Tim. 1:11.

3. Kukoolekanyi kutukweti?

³ Tudi nakukooleka kwakujilika ijina daYehova kuhitila mukwovwahila ilu lushimbi lwapela lwakwila nawu: “Shimekenu ijina daYehova.” (Mas. 113:1) Twelaña mwenimu neyi tuhoshaña chiwahi hadi Muntu wemenañaku idi ijina dajila. Kwila mushimeka ijina daYehova nehi? Tuhanjekenu yuma yisatu yalema yikutukwasha kushimeka ijina daNzambi yetu chakufuma hamuchima.

 TWAMUTIYISHAÑA YEHOVA KUWAHA NEYI TUSHIMEKAÑA IJINA DINDI

4. Muloñadi Yehova chatiyilañayi kuwaha neyi tumushimeka? Shimunenu chakutalilahu. (Talenu cheñi mwevulu.)

⁴ Twamutiyishaña Tata yetu wamwiwulu kuwaha neyi tushimekaña ijina dindi. (Mas. 119:108) Komana ichi chinatalishi mukwila nawu Nzambi wañovu jejima wudi neyi antu abula kuwanina akeñaña nawu antu ayihamekeña muloña akeñaña kuyikundeja nikuyikolesha? Inehi. Talenu ichi chakutalilahu. Kansi wamumbanda namukwati tata yindi hachifwiji namuzañalu nakumuleja nindi, “Tata nayikeña nankashi!” Tata yindi natiyi kuwaha nankashi nawa nazañalali namazu anahoshiyi mwanindi. Muloñadi? Komana munakutoñojoka nenu hiyala wakeñaña hohu nindi amukundejeña nikumuhameka kudi mwanindi? Inehi. Ilaña, muloña wamukeña mwanindi nawa nazañalali hakwiluka nindi mwanindi wamukeña nawa wukweti muchima wakusakilila. Neluki nindi yilwilu yamuchidiwu yakamukwasha mwanindi kwikala namuzañalu muchihandilu chindi. Munjila yoyimu, Yehova, Tata yetu wabadika, watiyaña kuwaha neyi tumushimekaña.

5. Nsañwinyi yitukumwekesha netu yakutwamba neyi tushimekaña ijina daNzambi?

⁵ Neyi tumushimekaña Tata yetu wamwiwulu, tukumwekesha netu nsañu yahosheliyi Satana hadi etu hamuntu-hamuntu niyena yakutwamba. Satana wahoshaña nindi kwosi muntu wunateli kutwalekahu kuhakwilaku ijina daNzambi. Watoñojokaña nindi hikudi muntu wunateli kutwalekahu kwikala washinshikaku. Wahoshaña nindi wejima wetu tukudikaña naNzambi neyi tutoñojokaña netu mukufuma yuma yayiwahi. (Yoba 1:​9-11; 2:4) Ilaña muntu washinshika Yoba wamwekesheli hatooka nindi Satana hisakutwamba. Indochi enu? Wejima wetu hamuntu-hamuntu tukweti kukooleka kwakuhakwilaku ijina daTata yetu nikumutiyisha kuwaha kuhitila mukumukalakela nakashinshi. (Yish. 27:11) Tukweti kukooleka chikupu kwakwila mwenimu.

6. Tunateli kumwimbujola ñahi Mwanta Davidi niaLevi? (Nehemiya 9:5)

⁶ Kumukeña Nzambi kwayileteshaña antu ashinshika kushimeka ijina dindi namuchima wejima. Mwanta Davidi wasonekeli nindi: “Tali nimushimeki Yehova; yejima yidi mudi ami yishimeki ijina dindi dajila.” (Mas. 103:1) Davidi welukili nindi neyi tushimekaña ijina daYehova, chochimu nakumushimeka Yehova. Neyi tutiya ijina daYehova twatoñojokaña hachekalayi, chumichi munabombeli yilwilu yindi yejima yayiwahi ninyidimu yakuhayamisha yelañayi. Davidi wakeñeleña kumwekesha nindi ijina daTata yindi dajila nawa wakeñeleña kudishimeka. Wakeñeleña kwila mwenimu ‘nayuma  yejima yadiña mudi yena,’ dikwila nawu, namuchima wejima. Munjila yoyimu, aLevi adiña akutalilahu amawahi mukumushimeka Yehova. Ahosheli nakudizoza nawu mazu awu hiyashikililimu chikupu kushimeka ijina daYehova dajilaku. (Tañenu Nehemiya 9:5.) Chakadi nikujina, iku kushimeka kwakudizoza kwakufuma hamuchima kwazañalesheli muchima waYehova.

7. Tunateli kumushimeka ñahi Yehova mumudimu wakushimwina nimuchihandilu chetu ifuku niifuku?

⁷ Makonu tunateli kumutiyisha Yehova kuwaha kuhitila mukuhosha hadi yena neyena, nakuhameka nikukeña. Neyi tunakushimwina, twanukaña netu chuma chitunakufwila hikuyikwasha antu kuswina kwakwihi naYehova nikumumona Tata yetu wukweti kukeña neyi chitwamumonaña. (Yak. 4:8) Twatiyaña kuwaha kulejaku antu chamulumbululawu Yehova muBayibolu, kumwekesha kukeña kwindi, wuñanji, maana, ñovu niyilwilu yindi yikwawu yayiwahi. Twamushimekaña cheñi Yehova nikumuzañalesha neyi tuzataña nañovu kulonda tumwimbujoleña. (Efwe. 5:1) Chitwela mwenimu, twambukañaku nawantu amukanu kaayi katama. Antu anateli kumona nawu twambukaku nawa anateli kutwihula chaletesha twiikali ambukaku. (Mat. 5:​14-16) Chitukwikalaña hamu nawu nakuhanjeka ifuku niifuku, tunateli kuyilumbulwila chaletesha twiikali ambukaku. Chikufumamu, antu akweti nyichima yashinshika akuswina kwakwihi naNzambi yetu. Neyi tumushimekaña Yehova muniji njila, tukuzañaleshaña muchima windi.—1 Tim. 2:​3, 4.

TWAMUTIYISHAÑA YESU KUWAHA NEYI TUSHIMEKAÑA IJINA DAYEHOVA

8. Yesu wekala ñahi chakutalilahu chachiwahi mukushimeka ijina daYehova?

⁸ Hayileñaleña yejima yidi mwiwulu nihanu hamaseki, kwosi wamwiluka Tata chiwahi kubadika Mwanaku. (Mat. 11:27) Yesu wamukeña Tata yindi, nawa wekala chakutalilahu chachiwahi mukushimeka ijina daYehova. (Yow. 14:31) Chalombeleñayi kudi Tata yindi hawufuku wakutwala kukufwa kwindi, wahosheli muwihi hamudimu windi wahanu hamaseki nindi: “Ami nakojeji ijina deyi adiluki.” (Yow. 17:26) Watalishili mudihi?

9. Yesu wazatishili ñahi chakutalilahu hakulumbulula chiwahi chekalayi Tata yindi?

⁹ Yesu wakuminini hohu wanyi hakuleja antu nindi ijina daNzambi diyi Yehova. AYudeya adizishiliyi Yesu adiña eluka dehi ijina daNzambi. Ilaña Yesu ‘diyi wadiña watachi kumulumbulula chiwahi.’ (Yow. 1:​17, 18) Chakutalilahu, Nsona jachiHeberu jamwekesha nawu Yehova wukweti luwi niwushona. (Kwid. 34:​5-7) Yesu wakwashili antu kutiyishisha ichi chalala hampinji yahosheliyi hachakutalilahu chamwana wajimbeli nitata yawantu. Neyi tutaña nsañu yahosha hadi ona tata yawantu wamweni mwanindi weyala wabalumukili mumuchima “henohu wuchidi hahalehi,” chayiliyi nakumukinkilila, chamukumbatiliyi nichamwanakeneniyi chakufuma hamuchima, twelukaña chikupu netu Yehova wukweti luwi niwushona. (Luka 15:​11-32) Yesu wamumwekesheli Tata yindi neyi chochekalayi.

10. (a) Tuneluki ñahi netu Yesu wazatishileña ijina daTata yindi nawa wakeñeleña nindi antu amakwawu niwena adizatisheña? (Maku 5:19) (Talenu cheñi mwevulu.) (b) Yesu nakukeña nindi twileñadi makonu?

¹⁰ Komana Yesu wakeñeleña cheñi nindi antu amakwawu azatisheña ijina daTata yindi? Eña. Akulumpi jakudifukula amakwawu adiñaku mumafuku aYesu, atela amweneña nawu ijina daNzambi dadiña dajila nankashi chakwila hiyateleli kuditenaku, ilaña Yesu hetejeli iyi nsañu yabula munsona yashindameneni hatushidikilu twawantu yimukañeshi kulemesha ijina daTata yindiku. Talenu ichi chuma chamwekeni hampinji yokiliyi iyala wumu wadiña nawandemoni mwituña dawaGerasa. Antu atiyili woma nawa amulembeleli Yesu nawu afumi munidi ituña,  dichi Yesu wafuminimu. (Maku 5:​16, 17) Hela chochu, Yesu wakeñeleña nindi ijina daYehova adiluki munidi ituña. Dichi wamulejeli ona iyala okiliyi nindi aleji antu, bayi yuma yamwililiyi Yesuku, ilaña yamwilililiwu kudi Yehova. (Tañenu Maku 5:19.) a Wakeñaña nindi ninetu twileña chuma chochimu makonu, dikwila nawu, kutiyakesha ijina daTata yindi mwahita kaayi kejima! (Mat. 24:14; 28:​19, 20) Neyi twila chumichi, twamutiyishaña kuwaha Mwanta wetu, Yesu.

11. Yesu wayidizishili akakumulondela kulomba chumanyi, nawa chumichi chalemenadi? (Ezekeli 36:23)

¹¹ Yesu welukili nindi nkeñelu yaYehova yekala yakujilika ijina Dindi, dikwila nawu kufumishahu makudi ejima amutwambilañawu. Dimuloña waweni Mwanta wetu chadizishililiyi akakumulondela nindi alombeña nawu: “Tata yetu wekala mumawulu, ijina deyi diikali dajila.” (Mat. 6:9) Yesu welukili nindi ichi dichuma chalema chatela kwila yileñaleña yejima. (Tañenu Ezekeli 36:23.) Kwosi muntu hela kañelu wajilikahu dehi ijina daYehova chikupu kubadika Yesuku. Hela chochu, Yesu chamukwatiliwu, muloñanyi wamutwikileñawu kudi ayilumbu jindi? Nawu himukakuhosha kasawuntu! Chakadi nikujina, Yesu watoñojokeli nindi kuzatisha chatama ijina Tata yindi dajila hela kuditwambila hinshidi yeneni chikupu. Wakameneni nankashi nindi akumutwambila nikumwinka muloña nawu himukakuhosha kasawuntu. Hadaha dichuma chacheni chaletesheli Yesu “[akabakani] nankashi nachikela” hikwashalili maora antesha nakumukasa.—Luka 22:​41-44.

12. Yesu wajilikili ñahi ijina daTata yindi munjila yasweja kubadika?

¹² Hakwila ajiliki ijina daTata yindi, Yesu womikili makabisha ejima, kasawuntu ninsañu yamutwambilileñawu. Welukili nindi wamwovwahilili Tata yindi muyuma yejima, kwosi chuma chamutiyishili nsonyiku. (Heb. 12:2) Welukili cheñi nindi Satana wadiña nakumulukuka hatooka haniyi mpinji yakala. (Luka 22:​2-4; 23:​33, 34) Chakadi nikujina, Satana wakeñeleña kufumpa kashinshi kaYesu, ilaña wakañenyi chikupu! Yesu wamwekesheli hatooka nindi Satana hisakutwamba muneni nawa nindi Yehova wukweti ambuñindi ashinshika, atwalekañahu kwikala ashinshika hela chakwila anakumona kukala kwamuchidinyi!

13. Munateli kumutiyisha ñahi kuwaha Mwanta wenu wunakuyuula?

 ¹³ Munakukeña kumutiyisha kuwaha Mwanta wenu wunakuyuula? Twalekenuhu kushimeka ijina daYehova nakukwasha antu kumwiluka Nzambi yetu neyi chochekalayi. Neyi mwila mwenimu, dikwila nawu munakulondela mumahaji aYesu. (1 Pet. 2:21) Kufwana Yesu, munakumuzañalesha Yehova nawa munakumwekesha nenu mukankunyi Nindi, Satana, hisakutwamba wabadika!

TWAKWASHANAÑA MUMUDIMU WAKUPULWISHA MAWUMI AWANTU NEYI TUSHIMEKAÑA IJINA DAYEHOVA

14-15. Yumanyi yayiwahi yafumañamu neyi tulejaña antu chekalayi Yehova?

¹⁴ Neyi tushimekaña ijina daYehova, twakwashanaña mumudimu wakupulwisha mawumi awantu. Munjilanyi? Neyi chituneluki, Satana ‘naputishi yitoñojoka yawantu abula kwitiya.’ (2 Kor. 4:4) Chinafumimu, antu anakuhweleli mumakudi aSatana adi neyi awa: Nzambi wekalaku wanyi, Nzambi wekala kwakulehi nawa hakamenaña antuku, Nzambi watama nawa wakabishaña antu atama haya nyaaka. Satana washimuna awa makudi muloña wakeñaña kutamisha ijina daYehova dadiwahi kulonda akañeshi antu kuswina kwakwihi nayena. Ilaña mudimu wetu wakushimwina wakañeshaña chuma chafwilañayi Satana. Twalejaña antu chalala hadi Tata yetu, nakushimeka ijina dajila daNzambi yetu. Yumanyi yafumañamu?

¹⁵ Chalala chekala Mwizu daNzambi chikweti ñovu chikupu. Kuhitila mukuleja antu kulonda amwiluki Yehova nichekalayi, twamonaña yuma yayiwahi yafumañamu. Makudi aSatana aputishañayi nachu yitoñojoka yawantu, ayaña nakumana chovu-chovu nawa awa antu atachikaña kumumona Tata yetu wukweti kukeña neyi chitwamumonaña. Ahayamaña muloña wañovu yindi yabadika. (Isa. 40:26) Amukuhwelelaña muloña wanjila jindi joloka. (Kuhit. 32:4) Adizilañaku yuma yayivulu kumaana indi abadika. (Isa. 55:9; Rom. 11:33) Nawa akundejewaña hakwiluka nawu yena diyi kukeña. (1 Yow. 4:8) Hampinji yinakuswinawu kwakwihi naYehova, aswejelañaku kukuhwelela mukuchiñeja kwakushakama haya nyaaka neyi anyanindi. Kwenoku kukooleka kutukweti kwakukwasha antu kuswina kwakwihi naTata yawu! Neyi twila mwenimu, Yehova wukutumonaña nindi “tudi akakukalakala hamu [nindi].”—1 Kor. 3:​5, 9.

16. Yumanyi yelañawu antu amakwawu neyi eluka ijina daNzambi? Shimunenu yakutalilahu.

 ¹⁶ Hakusambila, tunateli kuyileja antu hohu netu ijina daNzambi diyi Yehova. Chumichi chinateli kuhimpa chikupu chihandilu chamuntu wukweti muchima washinshika. Chakutalilahu, kansi wamumbanda wejina daAaliyah b wakulilili muchisaka chawantu abulili kwikala akaKristu. Ilaña kudifukula mwayileñayi wakukeñeli wanyi nawa watiyileña neyi hadi kwakwihi naNzambiku. Wahimpili yitoñojoka yindi hatachikiliyi kudiza nawaYinsahu. Watachikili kumumona Nzambi nindi Hibwambu dindi. Nawa wahayamini hakwiluka nindi ijina daNzambi adifumishamu mumaBayibolu amavulu nakusinsishahu nkumbu, chidi neyi Mwanta. Kwiluka ijina daYehova dichuma chahimpili chihandilu chindi. Wahosheli nindi: “Ibwambu dami inakeña nankashi wukweti ijina!” Chumanyi chafuminimu? Wahosheli nindi: “Ichi nidi nakuwunda nankashi mumuchima wami. Natiyaña nami nalemeshewa.” Iyala wumu wejina daSteve wadiña mukakwimba nayisanji nawa wafumini muchisaka chalemesheli nankashi nshimbi jawaYudeya. Hakeñeleña kwikala mukudifukula kwanuñañanaku, muloña wamweni wunfwikiji wawuvulu nankashi. Hela chochu, hampinji yafwishiliyi amama yindi, washakamini nakutiyilila kudi Chinsahu chaYehova walombweleña kadizi waBayibolu. Watiyili kuwaha nankashi chelukiliyi ijina daNzambi. Wahosheli nindi: “Kanda nitiyeñahu dehi ijina daNzambi.” Wabombelelihu nindi: “Aka dikadiña katachi kwiluka nami Nzambi wekala kwoku! Namumweni neyi hiMuntu. Dihinelukili nami nawani Ibwambu.”

17. Muloñadi chimukufwilaña kutwalekahu kushimeka ijina daYehova? (Talenu cheñi mwevulu.)

¹⁷ Hampinji yimunakuzata mudimu wakushimwina nikudizisha, komana mwayilejaña antu ijina dajila, daYehova? Mwayikwashaña kwiluka chekalayi Nzambi yetu? Neyi mwilaña mwenimu, mukushimekaña ijina daNzambi. Dichi twalekenuhu kushimeka ijina dajila daYehova kuhitila mukukwasha antu eluki Muntu yomweni wukweti idi ijina. Neyi mwilaña mwenimu, mwakapulwisha mawumi awantu. Mukulondelaña chakutalilahu chaMwanta wenu, Kristu Yesu. Nawa chasweja kubadika, mukumutiyishaña kuwaha Tata yenu wukweti kukeña, Yehova. Twalekenuhu “[kushimeka ijina dindi] haya nyaaka nanyaaka”!—Mas. 145:2.