1-2. Engin nge a hming sawichhiat a nih chungchânga Jehova rilru awm dân hre thiam tûra min ṭanpui thei?

 HEI hi han ngaihtuah teh: I tâna mi pawimawh tak tu emaw chuan i chungchâng ṭha lo takin a lo sawi a. Chu chu dâwt a ni tih hre mah la, mi ṭhenkhat chuan an ring a ni. Chu aia pawi zâwk chu, dâwt thu chu an sawi darh a, mi tam takin an lo ring bawk. Engtin nge i awm ang? Mite leh i hming ṭhatna i ngai pawimawh a nih chuan, chu sawichhiatna chu pawi i ti hle lo vang maw?—Thuf. 22:1.

² He entîrna hian a hming sawichhiat a nih laia Jehova tawrh dân hre thiam tûrin min ṭanpui thei a. A thlarau fate zînga pakhat chuan hmeichhe hmasa ber Evi hnênah a chungchâng dâwt thu a hrilh a. Ani chuan a lo awih a. Chu dâwt thu avâng chuan kan nu leh pa hmasa berte chu Jehova lakah an hel ta a ni. Chuvângin, sual leh thihna chu mihring chhûngkuaah a lo lût ta a. (Gen. 3:1-6; Rom 5:12) Khawvêla kan hmuh buaina zawng zawng—thihna, indona leh, hrehawm tawrhnate—hi Eden huana Setana theh darh dâwt thu avânga lo awm a ni. Chu sawichhiatna leh a rah chhuahte chuan Jehova rilru a tinâ em? Tina ngei ang. Mahse, ani chu thinrim tak leh tawrhhlelhawm takin a awm lo. Dik tak chuan, Jehova chu “Pathian hlim” a ni reng zâwk a ni.—1 Tim. 1:10, 11, NWT.

3. Eng chanvo hlu nge kan neih?

³ He thupêk: “LALPA [Jehova] hming chu fak rawh u,” tih hi zâwmin Jehova hming tihthianghlimnaah tel ve theihna  chanvo hlu kan nei a. (Sâm 113:1) Mi dangte hnêna a chungchânga thu dik kan hrilh hian a hming chu kan fak a ni. A hming chu i fak ve ang em? Thinlung taka kan Pathian hming fak tûra min chêttîrtu thiltithei tak pathum i lo ngaihtuahho vang u.

A HMING KAN FAK HIAN JEHOVA KAN TILAWM

4. Engvângin nge amah kan fakna chuan Jehova a tihlâwm? Entîrna pe rawh. (Milem en bawk rawh.)

⁴ A hming kan fak hian kan Pa vâna mi chu kan tilâwm a. (Sâm 119:108) Mahse, chumi awmzia chu, kan Pathian engkimtitheia chu mihring ṭha famkim lote ang maiin mite fak phûr ngai leh inrintâwkna nei lo a ni tihna a ni em? Ni lo ve. Entîrna pakhat lo ngaihtuah ta ila. Hmeichhe naupang pakhat chuan a pa dâra kuahin, “Khawvêla pa ṭha ber i ni!” tiin a hrilh a. A pa chu a lâwm hle a ni. Engvângin nge? Ani chu inrintâwkna nei lo leh fate fakna mamawh angin kan ngai ang em? Ngai lo vang. Ani chu inrintâwkna nei tak, a fanuin amah a hmangaihzia leh a hlutzia a hrilh avânga pa hlim tak angin kan ngai zâwk ang. A fanu chu a ṭhan chhoh zêl rualin, chûng miziate chuan hlimna a neihtîr dâwn tih a hre bawk. Chutiang bawkin, Pa azawnga ropui ber, Jehova pawh amah kan fak hian a lâwm a ni.

5. Pathian hming fakna hmangin eng thu nge dâwt a nihzia kan nemngheh theih?

⁵ Kan Pa vâna mi kan fak hian kan chungchânga Setana sawi chu dâwt a nihzia kan nemnghet a. Ani chuan mihring tu mahin rinawm takin Pathian hming an humhim lo vang a, fiah an nih hunah tu mah Pathian chunga rinawm an awm lo vang tih a sawi a ni. Kan zavai hian kan hlâwkna tûr a nih phawt chuan Pathian kan hawisan ang tih a sawi bawk. (Job. 1:9-11; 2:4) Mahse, mi rinawm Joba chuan Setana chu dawthei a nihzia a finfiah a ni. Pathian chungah i rinawm ve ang em? Kan za hian rinawm taka a rawngbâwlin kan Pa hming ṭan theihna leh amah tihlâwm theihna chanvo hlu kan nei a. (Thuf. 27:11) Chu chu chawimawina a ni tak zet a ni.

6. Engtin nge Lal Davida leh Levi hote chu kan entawn theih? (Nehemia 9:5)

⁶ Pathian an hmangaihnain mi rinawmte chu thinlung zawng zawnga a hming fak tûrin a chêttîr a. Lal Davida chuan: “Ka kawchhûnga awm zawng zawngte u, a hming thianghlim chu fak rawh u,” tiin a ziak a ni. (Sâm 103:1) Ani chuan Pathian hming fakna chu amah fakna a ni tih a hre thiam a. Jehova hmingah chuan a hming ṭhatna a tel a, chu chuan a mize duhawm takte leh a thiltih ropui takte chu min hriat chhuahtîr a ni. Davida  chuan a Pa hming chu tihthianghlima chawimawi a duh a. Chu chu ‘a kawchhûnga awm zawng zawng’—a thinlung zawng zawnga tih a duh a ni. Chutiang bawkin, Levi hote chuan Jehova faknaah hma an hruai a. Chutih rualin, anni chuan Pathian hmingin a phu ang ngeiin an fak thei ngai lo vang tih inngaitlâwm takin an pawm a ni. (Nehemia 9:5 chhiar rawh.) Chutianga inngaitlâwm tak leh thinlung taka amah fakna chuan Jehova a tilâwm ang tih a chiang hle.

7. Engtin nge rawngbâwlnaah leh nî tin nunah Jehova kan fak theih?

⁷ Tûn laiah pawh a chunga kan lâwmzia leh amah kan hmangaihzia sawi chhuakin Jehova kan tilâwm thei a. Rawngbâwlnaa kan thiltum ber chu mite Jehova lama hîp a, kan Pa duh tak chunga kan rilru put hmang ang nei ve tûra ṭanpui hi a ni tih kan hre reng a. (Jak. 4:8) Bible-in Jehova hmangaihna, a rorêl dikna, a finna, a thiltihtheihna leh, a mize dang duhawm takte a târ lan chu mite hnênah phûr takin kan hrilh a ni. Theih tâwp chhuaha amah entawnin Jehova chu kan fakin kan tilâwm bawk. (Eph. 5:1) Chutianga kan tih chuan, khawvêl suaksual tak laka kan danglamzia kan lantîr thei ang a. Mite chuan kan danglamzia an hmuh hian, chutianga kan awm chhan chu an rawn ngaihven thei a ni. (Mt. 5:14-16) Nî tina anmahni nêna kan indâwrnaah kan danglam chhante kan hrilhfiah thei a. Chu chuan mi rilru ṭha pute chu kan Pathian lamah a hîp thei a ni. Chutiang kawnga Jehova kan fak chuan, a thinlung kan tilâwm ang.—1 Tim. 2:3, 4.

JEHOVA HMING KAN FAK HIAN ISUA KAN TILAWM

8. Engtin nge Isua’n Jehova hming faknaah hma a hruai?

⁸ Lei leh vâna finna nei thil siam zawng zawng zîngah Fapa aia Pa hre chiangtu an awm lo. (Mt. 11:27) Isua chuan a Pa a hmangaih a, a hming faknaah hma a hruai a ni. (Joh. 14:31) A thih hma zâna a Pa hnêna a ṭawngṭainaah, a lei lam rawngbâwlnaa a thil hlen chhuah pawimawh ber chu heti hian a sawi a ni: “I hming ka hriattîr a,” tiin. (Joh. 17:26) Engtin nge chutiang chuan a tih?

9. Isua’n a Pa chungchâng chiang taka hrilhfiah nân eng tehkhin thu nge a hman?

⁹ Isua chuan Pathian hming chu Jehova a ni tih mite hnêna hriattîr mai aia tam a ti a. A zirtîrna ngaithlatu Judate chuan Pathian hming chu an hre sa a. Mahse, Isua chuan ‘Pathian chanchin hrilhna’ kawngah hma hruai a ni. (Joh. 1:17, 18) Entîr nân, Hebrai Pathian Lehkha Thu chuan Jehova chu zahngai tak leh mite khawngaih thei tak a nihzia a târ lang a. (Ex. 34:5-7) Isua’n fapa tlân bo leh a pa chungchâng tehkhin thu a sawi khân, chu thutak chu tûn hma zawng aia chiangin a târ lang a ni. A pain a fapa inlamlêta chu “hla taka a la awm laiin” a hmu a, va tlâna va kuaha thinlung taka a ngaihdam khân, Jehova zahngaihna leh khawngaihna târ lanna chiang tak chu kan hmu a. (Lk. 15:11-32) Isua chuan a Pa nihna dik tak chu a târ lang a ni.

10. (a) Engtin nge Isua’n a Pa hming a lam bâkah, mi dangte pawh lam tûrin a duh tih kan hriat? (Marka 5:19) (Milem en bawk rawh.) (b) Tûn laiah Isua’n eng ti tûrin nge min duh?

¹⁰ Isua’n mite chu a Pa hming lam tûrin a duh em? Duh teh meuh mai. Chûng hun laia sakhaw hruaitu ṭhenkhat chuan Pathian hming chu a thianghlim êm avânga lam thian loh angin an ngai a; mahse, Isua’n chûng Pathian thu ṭanchhan ni lo hnam dânte chu a Pa hming a chawimawina a indâltîr lo. Gerasin khuaa ramhuai man pakhat a tihdam lai kha han ngaituah teh. Mite chuan an hlauh êm avângin Isua chu kal bo tûrin an ngên a; chuvângin, an bial chu a chhuahsan ta  a ni. (Mk. 5:16, 17) Chutichung chuan, chuta mite’n Pathian hming an hriat chu Isua’n a la duh tho va. Chuvângin, a tihdama chu ama thiltihte ni lovin, Jehova thiltihte mite hnêna hrilh tûrin a tîr ta a ni. (Marka 5:19 chhiar rawh.) a Tûn laiah pawh khawvêl zawng zawnga a Pa hming hriattîr tûrin min duh a. (Mt. 24:14; 28:19, 20) Chutianga kan tih chuan, kan Lal Isua chu kan tilâwm ang.

11. Isua’n a hnungzuitute chu eng atâna ṭawngṭai tûrin nge a zirtîr a, chu chu engvângin nge a pawimawh? (Ezekiela 36:23)

¹¹ Isua chuan Jehova thiltum chu sawichhiatna zawng zawng laka a hming tihthianghlim a ni tih a hria a. Chuvângin, kan Pu ber chuan a hnungzuitute hnênah: “Kan Pa, vâna mi, i hming tihthianghlim ni rawh se,” tia ṭawngṭai tûrin a zirtîr a ni. (Mt. 6:9) Ani chuan chu chu thil siam zawng zawngte hmachhawn thu buai lian ber a ni tih a hria a. (Ezekiela 36:23 chhiar rawh.) Lei leh vâna finna nei thil siam zawng zawng zîngah Isua aia Jehova hming tihthianghlimnaa thawk nasa zâwk an awm lo. Mahse, man a nih khân ani chu a hmêlmate’n engtin nge an puh? Pathian sawichhetu angin! Isua chuan a Pa hming sawichhiat emaw, tihbawrhbân emaw chu sual lian tak angin a thlîr tih a chiang hle a. Chuvângin, chutianga puha hrem a ni tûr chu hrehawm a ti hle a ni. Chu chu man a nih dâwn hnaiha ‘a thlaphân êm êm’ chhan pawh a ni thei a ni.—Lk. 22:41-44.

12. Eng kawng ropui takin nge Isua’n a Pa hming a tihthianghlim?

¹² A Pa hming tithianghlim tûrin Isua chuan sawisakna, hmuhsitna leh, sawichhiatna tin rêng a tuar a. Ani chuan thil zawng zawngah a Pa thu a âwih avângin zahna tûr chhan a nei lo tih a hria a ni. (Heb. 12:1, 2) Chûng hun hrehawm takahte chuan Setana’n mi mal takin a bei tih a hre bawk. (Lk. 22:2-4; 23:33, 34) Ani chuan Isua rinawmna tihchhiat a inbeisei a; mahse, a hlawhchham chiang hle! Isua’n Setana chu dâwt sawi hmang tenawm tak a ni tih leh, Jehova’n fiahna khirh ber kârah pawh rinawmna vawng tlattu chhiahhlawh rinawm takte a nei tih a târ lang a ni.

13. Engtin nge rorel mêk kan Lal chu i tihlâwm theih?

¹³ Tûna rorêl mêk kan Lal chu tihlâwm  i duh em? Kan Pathian nihna dik tak hre tûra mite ṭanpuiin Jehova hming chawimawi zawm zêl rawh. Chutianga i tih chuan, Isua hniak hnung i zui tihna a ni ang a. (1 Pet. 2:21) Isua angin Jehova chu i tilâwmin, A hmêlma Setana chu dawthei a nihzia i finfiah thei ang.

JEHOVA HMING KAN FAK HIAN NUN CHHANHIMNAAH KAN ṬANPUI

14-15. Jehova chungchâng mite kan zirtîr hian eng thil ropui tak nge thleng thei?

¹⁴ Jehova hming kan fak hian nun chhanhimnaah kan ṭanpui a ni. Engtin nge? Dik tak chuan, Setana’n “ring lote rilru a tidel” tawh a. (2 Kor. 4:4) Chuvângin, anni chuan: Pathian a awm lo, Pathian chuan mihringte chu min hlatin min ngaihsak lo, Pathian chu a nunrâwngin thil ṭha lo titute chu chatuanin a nghaisa ṭhîn, tih Setana dâwt thute hi an ring a ni. Chûng dâwt thute chu Jehova hming tihchhiat a, mite’n amah an hnaih duh loh nâna duan a ni. Mahse, thu kan hrilh hian Setana thiltum hlawhtling lo tûrin kan dang thei a. Mite chu kan Pa chungchânga thutak zirtîrin, kan Pathian hming thianghlim chu kan fak a ni. Chu chuan eng nge a rah chhuah?

¹⁵ Pathian thutak chuan thiltihtheihna nasa tak a nei a. Jehova nihna dik tak mite kan zirtîr hian thilthleng ropui tak kan hmu thei a. Setana’n an rilru a tihdelna chu zawi zawia lâk bovin a awm a, kan Pa vâna mi chunga kan rilru put hmang ang chu an rawn nei chho va ni. A thiltihtheihna nasa tak avângin mak tihnain an khat a. (Is. 40:26) A rorêlna ṭha famkim chu an ring nghet ta a ni. (Deut. 32:4) A finna nasa tak aṭangin thil tam tak an zir bawk a. (Is. 55:9; Rom 11:33) Chu bâkah, hmangaihna a ni tih an hriatna chuan thlamuanna a pe bawk a ni. (1 Joh. 4:8) Jehova an hnaih zêl rualin, a fate anga chatuana nung tûra an beiseina chu a nghet lehzual a. An Pa hnaih thei tûra mite kan ṭanpui thei chu chanvo ropui tak a va ni êm! Chutianga kan tih chuan, Jehova’n a “hnathawhpuite” angin min thlîr ang.—1 Kor. 3:5, 9.

16. Mi ṭhenkhatin Pathian hming an hriat hian engtin nge an awm? Entîrna pe rawh.

¹⁶ A tîrah chuan, Pathian hming chu Jehova a ni tiin mite kan zirtîr satliah pawh a ni  thei a. Chumi ringawt pawh chuan thinlung ṭha pute chungah nghawng nasa tak a nei thei a ni. Entîr nân, tleirâwl Unaunu Aaliyah-i b chu Kristian sakhua ni lova seilian a ni a. Pathian hnaih nia a inhriat loh avângin a sakhaw vawnah chuan a lungawi tâwk lo va. Mahse, Thuhretute nêna Bible a zir hnu chuan a inthlâk danglam ta a ni. Pathian chu a Ṭhian angin a thlîr ṭan a. Bible tam takah Pathian hming chu paih bo niin Lalpa tih ang chi, nihnatea thlâk a ni tih a hriat chuan mak a ti hle. Pathian hming a hriatna chuan a nun a thlâk danglam a ni. Ani chuan: “Ka Ṭhian ṭha berin hming a nei!” tiin a sawi. Eng nge a rah chhuah? “Tûnah chuan thlamuanna nasa tak ka nei tawh a. Pathian hming ka hre thei chu chawimawina ropui tak angin ka ngai,” tiin a sawi. Unau Steve-a chu rimawi lama tui mi, Juda sakhaw kulmûk tak aṭanga seilian a ni a. Vervêk taka thiltihna nasa tak a lo tawrh tawh avângin sakhaw pâwlte nêna inzawmna neih chu a duh lo va. Mahse, a nu a boral hnu chuan Jehova Thuhretute nêna Bible zirhonaa ṭhut ve chu a duh ta a. Pathian hming a hriat chuan a rilru a khawih hle a. Ani chuan: “Pathian hming ka lo hre ngai miah lo va. Pathian a awm tak tak tih ka hriat vawi khatna! Ani chu mi tak tak angin ka hmu a. Ṭhian ṭha tak ka chhar tih ka hria,” tiin a sawi a ni.

17. Engvângin nge Jehova hming chu fak chhunzawm zêl i tum?

¹⁷ Thu hrilh leh zirtîr siam rawngbâwlnaah, Pathian hming thianghlim Jehova chu mite i hrilh em? Anni chu Pathian nihna dik tak hre tûrin i ṭanpui em? Chutianga i tih chuan, Pathian hming i fak a ni. A nihna dik tak hre tûra mite ṭanpuiin Jehova hming thianghlim chu fak chhunzawm zêl ang che. Chutianga i tih chuan, nun i chhanhim ang a. Kan Lal, Krista Isua kaihhruaina i zui ang a. A pawimawh berah chuan, i Pa duh tak Jehova i tilâwm ang. ‘A hming chu kumkhaw tlaitluanin fak’ zêl ang che!—Sâm 145:2.