1-2. Ki kitsoz kapav ed nou pou konpran seki Zeova ti resanti kan ti gat so repitasion?

 FER koumadir enn kikenn ki to bien kontan, inn dir enn move kitsoz lor twa. To kone ki sa li fos. Me kanmem sa, sertin inn krwar seki li’nn dir. Ek seki pli pir, se ki sa bann dimounn-la pe al dir sa lezot, ek bann-la osi pe krwar sa foste-la. Ki to ti pou resanti? Si to vremem kontan sa bann dimounn-la ek ki to repitasion bien inportan pou twa, sa pou fer to leker fermal, pa vre!—Prov. 22:1.

² Sa sitiasion-la kapav ed nou pou konpran seki Zeova ti resanti kan enn kikenn ti gat so repitasion. Enn anz ti koz manti lor Li ar Ev, premie fam ki Zeova ti kree. Ek Ev ti krwar li! Sa mansonz-la ti fer Adan ek Ev rebel kont Zeova, ek akoz sa tou dimounn inn vinn inparfe. (Zen. 3:​1-6; Rom. 5:12) Tou bann problem ki existe azordi, kouma par exanp lamor, lager, ek bann soufrans, existe parski Satan ti koz manti lor Bondie dan zardin Eden. Eski sa mansonz-la ek tou so bann konsekans fer Zeova so leker fermal? Biensir! Selman, Zeova pa’nn vinn amer akoz sa sitiasion-la. Okontrer, Labib dir ki Li touzour enn “Bondie ere.”—1 Tim. 1:11.

3. Ki privilez nou ena?

³ Nou ena privilez pou prouve ki Satan enn manter, kan nou obeir sa lord bien sinp la: ‘Loue nom Zeova.’ (Ps. 113:1) Kouma nou kapav fer sa? Nou loue nom Zeova kan nou dir laverite lor Li. Anou get trwa kitsoz ki pou motiv nou pou loue nom nou Bondie avek tou nou leker.

 ZEOVA KONTAN KAN NOU LOUE SO NOM

4. Kifer Zeova kontan kan nou loue Li? Donn enn lexanp. (Get zimaz osi.)

⁴ Zeova bien kontan kan nou loue so nom. (Ps. 119:108) Bann dimounn kontan kan nou loue zot ouswa flat zot, parski sa rasir zot ek ankouraz zot. Me eski nou Bondie Tou-Pwisan, Li parey kouma sa bann dimounn-la? Non. Anou pran enn lexanp. Fer koumadir enn tifi may so papa ek li dir li: “Tomem pli bon papa ki ena lor later!” Papa-la pou bien kontan ek sa pou tous li boukou! Me eski savedir ki papa-la ti bien bizin lankourazman so tifi pou ki li santi li bien? Non. Papa-la kontan parski so tifi inn montre bann zoli kalite, kouma lamour ek rekonesans. Li kone ki, kan so tifi pou grandi, li pou ere parski li ena sa bann kalite-la. Se pou sa bann rezon-la ki nou Papa Zeova kontan ki nou loue Li.

5. Ki lot manti Satan inn koze, ek kouma nou kapav montre ki Satan li enn manter?

⁵ Kan nou loue nou Papa, nou ede pou montre ki Satan inn koz manti lor bann imin. Satan dir ki kan enn kikenn dan leprev, li pa pou res fidel ar Zeova ek li pa pou defann So nom. Li dir osi ki nou pe servi Bondie par lintere. (Zob 1:​9-11; 2:4) Me Zob ti res fidel ek li ti montre ki Satan li enn manter. Eski twa osi to pou res fidel anver Zeova? Nou tou nou kapav swazir pou defann nou Papa ek pou montre ki nou kontan Li, kan nou swazir pou servi Li avek fidelite. (Prov. 27:11) Se vremem enn gran privilez pou defann so nom!

6. Kouma nou kapav imit Lerwa David ek bann Levit? (Neemi 9:5)

⁶ Bann dimounn ki kontan Zeova, zot anvi loue so nom avek tou zot leker. Lerwa David ti dir: “Ar tou seki mo ete mo remersie LESEGNER [Zeova]! Ar tou mo leker mo remersie so sin nom!” (Ps. 103:1) David ti kone ki kan nou loue nom Zeova, se koumadir nou pe loue Zeova Limem. Kan nou tann nom Zeova, sa fer nou mazine ki kalite Bondie Li ete, sa fer nou pans so bann zoli kalite, ek tou bann bon kitsoz ki Li fer. Pou David, nom Zeova ti sin ek li ti loue nom Zeova ‘ar tou so leker.’ Bann Levit osi ti fer boukou zefor pou loue nom Zeova. Avek limilite, zot ti rekonet ki zot bann parol pa ti ase for pou loue Zeova kouma Li, Li merite.  (Lir Neemi 9:5.) Nou sir ki, kan zot ti loue Zeova avek limilite ek avek tou zot leker, sa ti fer Zeova plezir.

7. Kouma nou kapav loue Zeova dan predikasion ek dan nou lavi toulezour?

⁷ Kouma nou kapav fer Zeova plezir azordi? Nou fer sa kan nou koz lor Zeova ar lezot, ek kan nou montre ki kantite nou kontan Li ek nou rekonesan anver Li. Kan nou prese, nou lobzektif prinsipal se pou ed lezot pou vinn pros ar Li ek pou ed zot trouve ki kalite Bondie Li ete. (Zak 4:8) Kan nou koz ar bann dimounn, nou kontan montre zot dan Labib kouma Zeova Li enn Bondie ki ena lamour, lazistis, sazes, pwisans, ek lezot kalite ankor. Nou loue Zeova ek nou fer Li plezir osi, kan nou fer tou seki nou kapav pou imit Li. (Efe. 5:1) Kan nou fer tousala, lezot pou remarke ki nou diferan ar bann dimounn ki form parti sa move lemond-la. (Mat. 5:​14-16) Lerla, nou gagn lokazion pou explik zot kifer nou diferan, ek nou ede pou ki bann dimounn ki sinser vinn pros ar Zeova. Kan nou loue Zeova dan tou sa bann fason-la, nou fer so leker kontan.—1 Tim. 2:​3, 4.

ZEZI KONTAN KAN NOU LOUE NOM ZEOVA

8. Kouma Zezi inn donn meyer lexanp konsernan loue nom so Papa?

⁸ Pena personn dan lesiel ek lor later ki konn Zeova pli bien ki Zezi. (Mat. 11:27) Zezi bien kontan so Papa, ek li’nn donn meyer lexanp konsernan loue nom so Papa. (Zan 14:31) Kan li ti priye so Papa lanwit avan so lamor, Zezi ti explike ki kitsoz pli inportan li’nn fer kan li ti prese. Li ti dir: “Mo finn fer zot konn to nom.” (Zan 17:26) Kouma Zezi inn fer sa?

9. Ki lexanp Zezi ti servi pou montre kouma so Papa ete? Explike.

⁹ Zezi pa ti zis dir bann dimounn ki nom Bondie se Zeova. Bann dimounn ki Zezi ti ansegne, ti bann Zwif ek zot ti deza konn nom Bondie. Selman, Zezi ti fer boukou zefor pou fer zot “konn” Zeova pli bien. (Zan 1:​17, 18) Par exanp, bann Lekritir Ebre montre ki Zeova Li pre pou pardone ek Li ranpli ar konpasion. (Ex. 34:​5-7) Me pou ed bann dimounn konpran sa pli bien, Zezi ti servi lexanp sa garson ki ti perdi la. Dan sa lexanp-la, nou trouve kouma sa papa-la ti galoupe pou al zwenn so garson “letan li ti ankor bien lwin.” Kan li ti zwenn li, li ti may li ek li ti pardonn li ar tou so leker. Sa lexanp-la montre nou kouma Zeova ete; Li enn Bondie ki pre pou pardone ek ki ena boukou konpasion. (Lik 15:​11-32) Zezi ti ed lezot pou konpran ki kalite Bondie so Papa ete.

10. (a) Kouma nou kone ki Zezi ti servi nom so Papa ek ki li ti anvi ki lezot osi fer parey? (Mark 5:19) (Get zimaz osi.) (b) Ki kitsoz Zezi anvi nou fer azordi?

¹⁰ Zezi ti anvi ki lezot osi servi nom so Papa. Selman, kitfwa bann sef relizie ti panse ki zot ti pou mank respe anver Bondie si zot ti servi so nom. Me Zezi pa ti les sa bann tradision-la anpes li loue nom so Papa. Par exanp, kan Zezi ti al dan rezion bann Zerazenien, li ti geri enn zom ki ti posede par enn move lespri. Selman, bann dimounn ti gagn per ek zot ti sipliy Zezi pou kit sa landrwa-la. (Mark 5:​16, 17) Me avan li ale, Zezi ti anvi ki bann dimounn ki res laba konn nom Zeova. Alor, li ti donn lord sa zom ki li ti geri la pou rakont  tou seki Zeova inn fer pou li. (Lir Mark 5:19.) a Azordi osi, Zezi anvi ki tou dimounn konn nom so Papa, ek kan nou fer sa, nou fer nou Lerwa Zezi kontan!—Mat. 24:14; 28:​19, 20.

11. Pou ki kitsoz Zezi ti ansegn so bann disip pou priye, ek kifer sa bien inportan? (Ezekiel 36:23)

¹¹ Proze Zeova se pou sanktifie so nom, setadir pou tir tou bann foste ki’nn dir lor so nom. Zezi ti konn sa, ek se akoz sa ki li ti ansegn so bann disip pou priye koumsa: “Nou Papa ki dan lesiel, ki to nom sanktifie.” (Mat. 6:9) Zezi ti konpran ki, sanktifie nom Zeova se kitsoz pli inportan dan liniver. (Lir Ezekiel 36:23.) Apart Zezi, pena personn dan liniver ki’nn fer plis zefor pou sanktifie nom Zeova. Selman, kan Zezi so bann lennmi ti aret li, zot ti akiz li ki li ti mank respe anver nom so Papa. Pou Zezi, mank respe anver nom so Papa ti enn pese bien grav. Alor, sirman sa ti bien afekte li kan so bann lennmi ti akiz li ek ti kondann li pou enn kitsoz koumsa. Se kitfwa pou sa rezon-la mem ki Zezi ti bien “angwase” avan ki bann-la ti aret li.—Lik 22:​41-44.

12. Kouma Zezi inn sanktifie nom so Papa?

¹² Pou sanktifie nom so Papa, Zezi ti andir tou kalite tortir, insilt, ek foste ki bann dimounn ti dir lor li. Li ti kone ki li ti touletan obeir so Papa, alor li pa ti ena nanye pou onte. (Ebre 12:2) Li ti kone osi ki Satan ti pou atak li dan sa moman bien difisil la. (Lik 22:​2-4; 23:​33, 34) Satan ti fer tou seki li kapav pou ki Zezi pa res fidel ar Zeova. Selman, Satan pa’nn reisi! Gras-a so fidelite, Zezi inn montre ki Satan enn manter, ek ki bann serviter Zeova kapav res fidel anver Li, mem si zot pe pas par bann leprev.

13. Kouma to kapav fer Zezi kontan?

¹³ Kouma to kapav fer Zezi kontan? To fer sa kan to kontign loue nom Zeova, ek kan to ed lezot pou kone ki kalite Bondie Li ete. Kan to fer sa, to pe swiv lexanp Zezi. (1 Pier 2:21) Lerla, parey kouma Zezi, to pe fer Zeova plezir ek to pe montre ki Satan li enn manter.

 NOU EDE POU SOV BANN DIMOUNN KAN NOU LOUE NOM ZEOVA

14-15. Ki kitsoz extraordiner arive kan nou ansegn bann dimounn lor Zeova?

¹⁴ Kan nou loue nom Zeova, nou ede pou sov bann dimounn. Kifer nou dir sa? Parski Satan “finn avegle” lespri bann dimounn. (2 Kor. 4:4) Akoz sa, bann dimounn krwar bann foste ki Satan dir lor Bondie, kouma par exanp, Bondie pa existe, Li lwin ar nou, ek Li pa gagn nou traka. Satan fer bann dimounn krwar ki Bondie Li kriel ek ki Li pini bann dimounn pou touletan kan zot fer bann move kitsoz. Satan dir tou sa bann foste-la parski li anvi sali nom Zeova, ek li anvi anpes bann dimounn pou vinn pros ar Bondie. Me nou kapav anpes Satan fer sa. Kouma? Kan nou prese ek nou ansegn bann dimounn laverite lor nou Papa, ek kan nou loue so nom ki sin. Me kan bann dimounn aprann laverite lor Zeova, ki lefe sa ena lor zot?

¹⁵ Laverite ki ena dan Labib li bien pwisan. Kan nou ansegn bann dimounn lor Zeova ek lor ki kalite Bondie Li ete vremem, enn kitsoz extraordiner arive. Kan bann dimounn aprann laverite lor Bondie, zot lizie ouver ek zot nepli les Satan anbet zot. Lerla, zot koumans trouv bann zoli kalite ki Bondie ena. Par exanp, zot inpresione par pwisans extraordiner ki Zeova ena. (Iza. 40:26) Zot aprann fer Li plis konfians parski Li enn Bondie lazistis. (Det. 32:4) Zot aprann boukou kitsoz gras-a so gran sazes. (Iza. 55:9; Rom. 11:33) Ek sa rekonfort zot kan zot aprann ki Bondie “li lamour.” (1 Zan 4:8) Lerla, amezir ki zot vinn pli pros ar Zeova, zot lesperans pou viv pou touletan vinn pli vre. Se vremem enn gran privilez pou ed bann dimounn pou vinn pros ar Zeova! Kan nou fer sa, nou vinn “bann kamarad travay” Zeova.—1 Kor. 3:​5, 9.

16. Kan sertin finn aprann ki Bondie ena enn nom, ki lefe sa finn ena lor zot? Donn bann lexanp.

 ¹⁶ Kan nou ansegn enn kikenn, kitfwa enn parmi bann premie kitsoz ki nou fer, se nou fer li kone ki nom Bondie se Zeova. Zis sa tousel kapav sanz lavi enn dimounn ki sinser! Anou pran enn lexanp. Enn madam ki apel Aaliyah b ti grandi dan enn fami ki pa krwar dan Labib. Me li pa ti santi li bien dan so relizion ek li pa ti santi li pros ar Bondie. Selman, kan li’nn koumans etidie Labib avek bann Temwin Zeova, li’nn koumans trouv Bondie kouma so kamarad. Li ti bien etone kan li ti aprann ki, dan boukou Labib ti tir nom Bondie ek ti ranplas li par bann tit kouma Segner. Me kan li ti aprann ki nom Bondie se Zeova, sa ti sanz so lavi net. Li dir: “Mo pli bon kamarad ena enn nom! Se enn extra gran privilez pou konn nom Bondie. Aster, mo santi mwa anpe.” Anou get lexanp enn misie ki apel Steve. Li enn mizisien ek li’nn grandi dan larelizion zwif. Selman, li ti aret swiv sa relizion-la parski li ti trouv boukou linzistis. Me apre lamor so mama, li ti aksepte pou asiste letid enn kikenn ki ti pe etidie avek enn Temwin Zeova. Kan li ti aprann ki Bondie ena enn nom, sa ti bien rekonfort li. Li dir: “Mo pa ti kone ki Bondie ena enn nom. Me kan mo’nn kone kouma Bondie apele, mo’nn konpran ki Li existe ek ki mo kapav vinn so kamarad.”

17. Kifer to bien deside pou kontign loue nom Zeova? (Get zimaz osi.)

¹⁷ Kan to prese ek ansegn bann dimounn, eski to dir zot kouma Bondie apele? Eski to ed zot pou trouve ki kalite Bondie, Zeova ete? Kan to fer sa, to loue nom Bondie. Alor, kontign loue nom Zeova, ek kontign ed bann dimounn pou kone ki kalite Bondie Zeova ete. Kan to fer sa, to pe ede pou sov bann dimounn ek to pe swiv lexanp to Lerwa Zezi Kris. Me pli inportan, to pe fer leker Zeova kontan. Alor, kontign ‘loue nom Zeova pou touletan, wi pou touzour’!—Ps. 145:​2, NW.