1, 2. Могай пример мыланна умылаш полша, мом Иегова шижеш, кунам тудын лӱмжым амыртат?

 ШОНАЛТЫЗА тыгай ситуаций нерген: йӧратыме айдеме тендан нерген ала-мом удам ойла. Те паледа: тиде шоя. Но южышт тидлан ӱшанаш да тиде шоям шаркалаш тӱҥалыт, да весе-влак тидым чынлан шотлат. Могай шижмашда лиеш? Весе-влак дене кыл кучымыдам да шкендан репутацийдам акледа гын, тыгай шоя, мутат уке, тендам шӱлыкаҥда (Прит. 22:1).

² Тиде мыланна умылаш полша, мом Иегова шижын, кунам поро лӱмжым амыртеныт. Ик духовный эргыже икымше ӱдырамашлан, Евалан, Иегова нерген шоям каласен. Ева тиде шоялан ӱшанен налын. Тидлан кӧра икымше еҥ-влак Иегова ваштареш каеныт да еҥ-влак чыланат языкан лияш да колаш тӱҥалыныт (Тӱҥ. 3:1—6; Рим. 5:12). Тӱняште лиедыше чыла проблеме — колымаш, сар-влак, орланымаш — шояклан кӧра лектын, кудыжым Сатана Эдем садыште шаркалаш тӱҥалын. Тиде шоя да тудын лектышыже Иеговалан чон корштымашым огеш кондо мо? Мутат уке, тиде Иеговам чот шӱлыкаҥда. Туге гынат Иегова ӧпкем кучен але сырен огыл. Мӧҥгешла, тудо пиалан Юмо кодеш (1 Тим. 1:11).

3. Мыланна могай чапым пуымо?

³ Мыланна кугу чапым пуымо: Сатана Иегова нерген шоям ойлен манын доказатлаш полшен кертына. Ме тыге ыштен кертына, кунам «Юмын лӱмжым моктыза» кумылаҥдымаш почеш ыштена (Пс. 112:1). Ме Иегован лӱмжым моктена, кунам весе-влаклан тудын нерген чыным ойлена. Тудын  лӱмжым моктымыда шуэш мо? Тиде статьяште кум амалым лончылен налына, молан мыланна Иегован лӱмжым уло шӱм дене чапландараш кӱлеш.

ИЕГОВАН ЛӰМЖЫМ ЧАПЛАНДАРЕН, МЕ ТУДЫМ КУАНДАРЕНА

4. Молан Иегова куана, кунам ме тудым чапландарена? Примерым кондыза. (Тыгак сӱретым ончыза.)

⁴ Ме кавасе Ачанам куандарена, кунам лӱмжым чапландарена (Пс. 68:31, 32). Но тиде ончыкта мо, пуйто Чылакертше Юмо сулыкан еҥ-влак семын моктымаш да йӧратымаш нерген мут-влак деч посна илен огеш керт? Уке. Примерым кондена. Изи ӱдыр ачаж деке куржын толеш, тудым шӱйжӧ гыч ӧндалеш да манеш: «Ачий, тый тӱняште эн сай улат!» Ачаже шыргыжеш. Ӱдыржын каласымыже тудын шӱмжым тарвата. Молан? Тудо икшывыжын моктымаш мут деч посна илен огеш керт мо? Конешне, кертеш. Но ӱдыржын йӧратымыже да тауштымыжо тудым чот куандара. Тудо пала: кушкын шумекыже, нине койыш-влак ӱдыржылан пиалан лияш полшат. Тидын семынак кавасе Ачана, Иегова, чот куана, кунам ме тудым чапландарена.

5. Юмын лӱмжым чапландарыме дене могай шомакын шоя улмыжым ончыктена?

⁵ Кавасе Ачанам чапландарыме дене ме ончыктена: Сатана мемнан нерген шоям ойлен. Тудо каласен, пуйто ик айдемат Иегован поро лӱмжым шоя деч аралаш огеш тӱҥал. Тудо манеш, пуйто ме Юмылан служымаш деч пайдам она уж гын, Юмо деч кораҥына (Иов 1:9—11; 2:4). Но Иов Юмылан ӱшанле кодмыж дене Сатанан шояче улмыжым ончыктен. А мемнан нерген мом каласаш лиеш? Ме кавасе Ачанан лӱмжым чапландарен кертына да тудлан ӱшанлын служитлыме дене тудым куандарен кертына (Прит. 27:11). Могай тиде чапле йӧн!

6. Давид кугыжа да левит-влак деч ме могай примерым налын кертына? (Неемия 9:5).

⁶ Иеговам йӧратыше-влак тудын лӱмжым уло шӱм дене чапландарынешт. Давид кугыжа мурен: «Чонем, Юмым мокто, уло кӧргемат Тудын святой лӱмжым мокто!» (Пс. 102:1). Давид умылен: Иегован лӱмжым чапландарен, тудо Иеговам чапландара. Тиде лӱм Юмын репутацийже дене кылдалтеш. Сандене, кунам ме тиде лӱмым колына, ме вигак Юмынан сылне койшыжо-влак нерген да ӧрыктарыше пашаже нерген шарналтена. Давид Ачажын святой лӱмжым чот пагален да уло шӱмжӧ дене тудым чапландарынеже ыле. Тыгак левит-влак мыланна тиде шотышто примерым ончыктеныт. Нуно ӱҥышын умыленыт: Юмын святой  лӱмжым чапландарашлан нунын мутыштат огеш сите. (Неемия 9:5 лудын лекса.) Чынжымак, тыге ӱҥышын да уло шӱм дене каласыме моктымаш мут Иегован шӱмжым куандара.

7. Кузе ме Иеговам служымашна да илышна дене чапландарен кертына?

⁷ Кунам ме ойлена, мыняр чот Иеговалан тауштышо улына да мыняр чот тудым йӧратена, тунам Иеговам куандарена. Таныклымына годым ме шарнена: тӱҥ цельна — еҥ-влакым Иегова деке лишемдаш. Мом ме Иегова деке шижына, нунат тидымак шижышт манын кумылна уло (Иак. 4:8). Мыланна еҥ-влаклан ончыкташ келша, мом Библийыште Иегова нерген возымо, кузе тиде книга тудын йӧратыше, справедливый, уш-акылан, виян улмыжым да шуко вес сылне койышыжым палдара. Тыгак ме Иеговам чапландарена да тудым куандарена, кунам кажне кечын тудын деч примерым налаш тыршена (Еф. 5:1). Тидлан кӧра весе-влак, очыни, ужыт, кузе ме тиде тӱнясе еҥ-влак деч ойыртемалтына да амалжым пален налаш кумылышт лектын кертеш. Тунам нунылан умылтарен кертына, молан ме тыгай улына (Матф. 5:14—16). Тидлан кӧра поро чонан еҥ-влакын Юмын йолташыже лияш кумылышт лектын кертеш. Кунам Иеговам служитлымына да ыштымына дене чапландарена, ме тудын шӱмжым куандарена (1 Тим. 2:3, 4).

ИЕГОВАН ЛӰМЖЫМ ЧАПЛАНДАРЕН, МЕ ИИСУСЫМ КУАНДАРЕНА

8. Иегован лӱмжым чапландарыме шотышто Иисус эн сай примерым ончыктен манын, молан каласаш лиеш?

⁸ Каваштат, мландыштат Иеговам Эргыже деч сайрак иктат огеш пале (Матф. 11:27). Иисус Ачажым йӧрата да тудын лӱмжым чапландарыме шотышто эн сай примерым ончыктен (Иоан. 14:31). Колымыжо вашеш кастене тудо кумалмыж годым служитлымашыже нерген тыгай иктешлымашым ыштен: «Тыйын лӱметым палдаренам» (Иоан. 17:26). Мом тудо каласынеже ыле?

9. Кавасе Ачаже нерген сайрак палдарашлан Иисус могай туштен каласымашым кучылтын?

⁹ Иисус еҥ-влаклан Юмын лӱмжӧ Иегова манын, ойлен гына огыл. Еврей-влак, кудыштым тудо туныктен, Юмын лӱмжым уже паленыт. Но Иисус нунылан Юмым сайрак пален налаш полшен (Иоан. 1:17, 18). Мутлан, Еврей йылме дене Возымаш Иегован поро кумылан да чаманыше улмыжым палдарен (Исх. 34:5—7). А Иисус умылтарен, мом тиде ончыкта, кунам йомын коштшо эрге да тудын ачаже нерген туштен каласымашым каласкален пуэн. Кунам ме лудына, кузе ача мӱндырчын ӧкынышӧ эргыжым ужын, ваштарешыже куржын лектын, тудым ӧндалын да уло шӱм дене проститлен, тиде мыланна умылаш полша, могай Иегова поро да чаманыше (Лук. 15:11—32). Иисус еҥ-влаклан ончыктен, могай Ачаже чынже денак улеш.

10. a) Иисус Ачажын лӱмжым ойлен да весе-влак дечынат тидым вучен манын, кушеч ме палена? (Маркын 5:19). (Тыгак сӱретым ончыза.) б) Мом Иисус таче мемнан деч вуча?

¹⁰ Еҥ-влак Ачажын лӱмжым ойлышт манын, Иисусын кумылжо лийын мо? Конешне! Ту жапысе южо религиозный вуйлатыше-влак, очыни, шоненыт, пуйто Юмын лӱмжӧ тынар чот святой, тудым ойлашат огеш лий. Но Иисус, тиде йӱлам ончыде, Ачажын лӱмжым чапландарен. Шарналтена ик случайым, кунам Гадара кундемыште Иисус ик айдеме гыч демон-влакым поктен луктын. Еҥ-влак лӱдын колтеныт да Иисусым кундемышт гыч каяш сӧрваленыт. Тудо тидымак ыштен (Мар. 5:16, 17). Туге гынат,  Иегован лӱмжӧ ту верыштат чапландарыме лийже манын, Иисусын кумылжо лийын. Сандене тудо паремдыме пӧръеҥлан лишылже-влаклан мо лийме нерген каласкалаш кӱштен. Но пӧръеҥ ойлышаш ыле, мом тудлан Иисус огыл, а Иегова ыштен. (Маркын 5:19 лудын лекса a.) Иисусын таче тыгаяк кумылжо: Ачажын лӱмжӧ нерген чыла еҥ пален налшаш! (Матф. 24:14; 28:19, 20). Кунам ме таныклена да тиде лӱмым ойлена, ме Иисус Кугыжанам куандарена.

11. Иисус тунемшыж-влакым мо нерген кумалаш туныктен, да молан тиде кӱлешан? (Иезекииль 36:23).

¹¹ Иисус пален: Иегован шонен пыштымашыже почеш Юмын лӱмжӧ святитлыме да чыла титаклымаш деч эрыктыме лийшаш. Теве молан Кугу Туныктышо тыге кумалаш туныктен: «Пылпомышто улшо мемнан Ачана! Тыйын святой лӱмет мокталтше» (Матф. 6:9). Иисус умылен: Иегован лӱмжым святитлымаш — тиде эн кугу ӱчашымаш йодыш, кудыжлан вашмутым чыла суксо ден еҥ пуышаш. (Иезекииль 36:23 лудын лекса.) Иегован лӱмжым чапландарашлан сандалыкыште Иисус деч шукырак иктат ыштен огыл. Иисус Юмын святой лӱмжым шӱктарымым эн уда языклан шотлен. Туге гынат арестоватлыме годым тудым Юмым шӱктарымаште титакленыт. Теве молан, очыни, Иисус арест деч ончыч кугу чон корштымашым шижын (Лук. 22:41—44).

12. Иисус Ачажын лӱмжым эн сайын чапландарен манын, молан каласаш лиеш?

¹² Ачажын лӱмжым святитлашлан Иисус индыралтмым, шӱктарымым да шояклымым чытен лектын. Иисус пален: тудо Ачажлан чыла шотыштат ӱшанле лийын да Юмын ончылно тудын совестьше ару кодын (Евр. 12:2, УТ). Тыгак тудо умылен: ту йӧсӧ жапыште тудын ӱмбак Сатана кержалтеш (Лук. 22:2—4; 23:33, 34). Мутат уке, тиде тушман шонен, пуйто Иисус Юмылан ӱшанле огеш код. Но шонымыжо шукталтын огыл! Иисус раш ончыктен: Сатана шояче улеш да Иегован ӱшанле служитлышыже-влак эн йӧсӧ годымат тудлан служитлымым огыт чарне!

13. Кузе те вуйлатыше Кугыжадам куандарен кертыда?

 ¹³ А тендан вуйлатыше Кугыжадам куандарымыда шуэш мо? Весе-влаклан Юмым палаш полшен, умбакыжат Иегован лӱмжым чапландарыза. Тиде Иисус почеш кайымыдам ончыкта (1 Пет. 2:21). Тудын семынак те Иеговам куандареда да ончыктеда: Юмын тушманже, Сатана, — шояче!

ИЕГОВАН ЛӰМЖЫМ ЧАПЛАНДАРЕН, МЕ ВЕСЕ-ВЛАКЫН ИЛЫШЫШТЫМ УТАРАШ ПОЛШЕНА

14, 15. Иегова нерген чыным туныктымына еҥ-влаклан могай пайдам конда?

¹⁴ Иегован лӱмжым чапландарыме дене ме весе-влакын илышыштым утараш полшена. Молан тыге каласаш лиеш? Ме палена: Сатана еҥ-влакын ушыштым «сокырым ыштен» (2 Кор. 4:4). Сандене нуно ӱшанен налыныт, пуйто Юмо уке, тудо нунын верч ок тырше, тудо торжа да языкан-влакым курымеш индыра. Тиде шоякын ик цельже — Иегован лӱмжым да репутацийжым амырташ. Тунам еҥ-влакын Юмым пален налаш кумылышт огеш лий. Но таныклымына Сатанан чыла шонымыжым пудырта. Юмынан святой лӱмжым чапландарен, ме еҥ-влаклан Ачана нерген чыным ойлена. Тиде могай пайдам конда?

¹⁵ Юмын Мутшо гыч чын — виян. Кунам ме еҥ-влаклан Иегован могай улмыжым палдарена, нунын пуйто шинчашт почылтеш да нуно Ачанан сылне койышыж-влакым ужаш тӱҥалыт. Тудын нимучашдыме вийже еҥ-влакым Юмым келгын пагалаш тарата (Ис. 40:26). А тудын справедливый улмыжо нерген пален налмеке, еҥ-влак Юмылан ӱшанаш тӱҥалыт (Втор. 32:4). Эше нуно Юмын уш-акылже гыч шукылан тунемыт (Ис. 55:9; Рим. 11:33). Тыгак Юмо йӧратымаш улеш манме шинчымаш нуным лыпландара (1 Иоан. 4:8). Иегова деке лишеммеке, нунын курымеш илаш ӱшанышт лектеш. Могай мыланна кугу чапым пуымо — ме Иегован полышкалышыже лийын кертына да еҥ-влаклан тудын йолташыже лияш полшена! (1 Кор. 3:5, 9).

16. Юмын лӱмжым пален налмаш южо еҥлан могай пайдам конден? Примерым кондыза.

¹⁶ Эн ончыч ме еҥ-влаклан Юмын Иегова  лӱмжым веле ончыктен кертына. Юмын лӱмжым палымаш поро чонан айдемын илышыжым вашталтен кертеш. Мутлан, Али́я b лӱман самырык ӱдырамаш изинек христиан огыл религийыште лийын. Но Алиялан чучын, пуйто тудо религийыштыже йот айдеме да Юмо тудын деч чот мӱндырнӧ. Но Танык-влак дене Библийым шымлаш тӱҥалмеке, чылажат вашталтын. Алия умылаш тӱҥалын: Юмо тудын йолташыже. Юмын лӱмжым шуко Библий гыч кораҥденыт да тӱрлӧ титул дене, мутлан, Господь титул дене, алмаштеныт манын пален налмеке, тудо чот ӧрын. Иегован лӱмжым пален налмаш Алиян илышыжым тӱрыснек вашталтен. Тудо куанен каласен: «Эн сай Йолташемын лӱмжӧ уло улмаш». Тиде тудлан могай пайдам конден? Алия ойла: «Чонем тыныс дене темын. Юмын лӱмжым палаш мыланем кугу чап!» А теве Стивын историйже. Тудо еврей ешыште кушкын, кудыжо шке религийын йӱлашт почеш илен. Тудо религийыштыже еҥ-влакын сайла кояш тӧчымыштым ужын, сандене нимогай религийыште лиймыже шуын огыл. Тудо музыкым чот йӧратен. Но аважын колымыж деч вара икана Стивын йолташыже тудым Библий шымлымашке ӱжын, кудыжым Иегован Таныкше эртарен. Юмын лӱмжӧ уло манын, тудо пален налын. Тиде шӱмжым чот тарватен. Стив манеш: «Ончыч мый Юмын лӱмжым пален омыл». Тудо ешарен ойла: «Мый пален налынам: Юмо — тиде чынжымак улшо личность. Тудын койыш ден шижмашыже-влак улыт. Мый тудын Йолташыже лийын кертам улмаш».

17. Молан те Иегован лӱмжым умбакыжат чапландараш кумылаҥдыме улыда? (Тыгак сӱретым ончыза.)

¹⁷ Таныклыме да еҥ-влакым туныктымо годым Иегован святой лӱмжӧ нерген каласкаледа мо? Нунылан ужаш полшеда мо, могай Юмо чынже денак улеш? Тыге ыштеда гын, те тудын лӱмжым чапландареда. Еҥ-влаклан кавасе Ачанан сылне койышыжо-влакым палдарен, Иегован святой лӱмжым умбакыжат чапландарыза. Тыге те нунын илышыштым утараш полшеда. Те Кугыжана, Христос Иисус, почеш каеда. А эн тӱҥжӧ — те йӧратыше Ачадам, Иеговам, куандареда. Айста лӱмжым «курымеш, курым-курымеш» моктена! (Пс. 144:2).