1-2. Yoladdaniha baani enanikavihera wonelamo makalelo aali Yehova nuwinkedhiwa dhithu dhowinjhiva?

 KABIHA wubuwela ayi: Muthu onamudhiveliwe vanlubale anowuwoga obure. We ohunona wi dhithu anawogiye kahi ebaribari, mbwenye athu amodhaya enorumedha dhowoota ndha. Yowukulihaya aliwa enoobajha ovuwiha dhowoota ndha, teto enowathukulela athu amodha orumedha dhowoota ndha. Waakale aavi? Akala we onowadhivela athu aatene yaala ni onovaha thima emuthu yawo, mwebaribarene were wukuuwa, kahi ebaribari? — Pro. 22:1.

² Yotajhiha ela enonikavihera wonelamo makalelo aali Yehova emuthu yaye nutakalihiwa. Mwanaye mmodha oomuzimuni ovuwiha yowoota yobajha amwaddelaga muhiyana oobajha, teto Eva orumedha yowoota ele. Mwaha wa yowoota ele makolo ehu oobajha omurugunuwela Yehova, vano yokumelelavoya, yothega ni okwa wafwanya athu aatene. (Gén. 3:1-6; Rom. 5:12) Makathamiho aatene nnawonihu peeno ninga okwa, koddo ni goyi ekumelele mwaha wa dhowoota dha Saddana aavuwihiye mmunddani mwa Ideni. Yehova anakala aavi awonaga makathamiho aatene eli mwilaboni mwaha wa dhowoota dha Saddana? Mohanganyedha eyo enoomukula vanlubale Yehova, mbwenye naarive dhigaali ndo, Yehova kasadduwile anookala Mulugu oowali ni anakoya ntxiga, ohiya eyo Oliye anodhowave akalaga ‘Mulugu oohagalala.’— 1 Tim. 1:11.

3. Oneti baani ninnihuna?

³ Iyo nihikanna oneti wowoniha wihina Saddana ahimwinkedha Yehova, wodhela wiwelela nlamulo nookweya nnihina: ‘Munvuwihe Jah!’ (Sal. 113:1) Iyo nnovuwiha ndina na Yehova wodhela omuwoga nuupama mwinnya a ndina nna noweela. We onofuna ovuwiha ndina nna? Kabeni noone dhithu tharu  dhinanikavihere ovuwiha ndina na Yehova ni murima wehu waatene.

YEHOVA ANOHAGALALA NAAVUWIHAGA NDINA NAYE

4. Mwahaya bwaddi Yehova agakala oohagalalene nanvuwihaga? Owogemo. (Osugwe fotu.)

⁴ Baabi ehu oodhulu anohagalala vanlubale aanoonaga iyo nivuwihaga ndina naye. (Sal. 119:108) Athu amodha enorabulela othetheliwa ni enubuwela wi kaavo anaapwatha, bumwahaya aliwa enofuna wi athu amodha yathethelege ni yawogege opama. Nerege Yehova ali ninga athu yaala? Naari. Kubuwela yoladdaniha ela: Mwaana mung’ono anomukubarela babe nuudhivela ni anowoga egi: “Nyu muli babi apama!” Babi ole anohagalala vanlubale aamoonaga mwanaye amuthethelaga. Mbwenye mwaha waddi? Nerege anarabulela othetheliwa obe muthu ahinivaha thima ni anajheha othetheliwa baahi ni mwanaye? Naari. Oliye ohunona wi baabi apama, mbwenye anohagalala vanlubale amoonaga mwanaye amonihaga odhivela ni amutamalelaga. Oliye ohunona wi dhikalelo ndha dhinere omukavihera mwanaye unnuwa. Sithu emodhave enamuthukulela Yehova ohagalala iyo nanvuwihaga.

5. Ethu baani nnonihihu nanvuwihaga Yehova?

⁵ Nanvuwihaga Yehova nnowoniha wihina dhithu Saddana aawogiliye wodhela iyo sowota. Ni makalelo baani? Oliye ahiwoga wihina kaavo muthu ande okala oororomeleya wa Yehova ni wakihedha ndina naye. Saddana ahiwoga wi kaavo muthu ande okalave oororomeleya wa Yehova afwanyiwa yoweha. Teto ahiwoga wi iyo nere ohiya omulabela Yehova nahere nivahiwa ethu yapama. (Jó 1:9-11; 2:4) Mbwenye Jo ahoniha wihina Saddana muliba woota. Ki we onande aavi wi Saddana muliba woota? Peeno kadda muthu wa iyo ohukanna ofuru wowoniha wihina nnokavihera nuuroromeleya ndina na Yehova ni omulabela Oliye nuuroromeleya. (Pro. 27:11) Ela gari enlubale ninnihuna.

6. Nnande aavi omutajhiha mwene Davidi ni malevita? (Neemias 9:5)

⁶ Mwaha omudhivela Yehova, athu oororomeleya enofuna ovuwiha ndina nna. Mwene Davidi ohuleba egi: ‘Ginere onvuwiha Yehova ni egumi yaga yaatene, ekalelo yaga yaatene enere ovuwiha ndina naye nowela.’ (Sal. 103:1) Davidi ahonelamo wi ovuwiha ndina na Yehova yatapulela onvuwiha mwinnyene Yehova. Ndina na Yehova nnovolowelavo emuthu yaye, bumwahaya ndina nna nnonubusedha dhikalelo dhoriya anna Yehova ni dhithu dhotikiniha aneriyena. Davidi oofuna ovuwiha ndina na Yehova mwaha wihina thowela.  Oliye afuna avuwihe ndina nna ni ‘ekalelo yaaye yaatene,’ obe neere ni murima waye wamutene. Ni makalelo mamodhave malevita yahikanna mutholo munlubale wonvuwiha Yehova. Aliwa yorumedha nuwiyeviha wihina kayande ovuwiha ndina noweela na Yehova mwamakalelo Oliye anafwaneleliye. (Omwileri Neemias 9:5.) Mohanganyedha wiyeviha wula wahimuhagalasa vanlubale Yehova.

7. Nnande aavi onvuwiha Yehova nakala mmalaleyelo ni naaparaga mabasa a labo thi labo?

⁷ Nihiyoya podi onvuwiha Yehova nawogaga wodhela Oliye nuudhivela vamodha ni omutamalela. Nakala mmalaleyelo nnohowela wubuwela wi ethu yathimaya fuwakavihera athu omwaddamela Yehova ni wakavihera aliwa omoonaga Yehova ninga Babi oodhivela. (Tiya. 4:8) Iyo nnohagalala vanlubale wawoniha athu mBibiliyani wi Yehova Mulugu oodhivela, owoogowa, athotho, akopolo ni ohukanna dhikalelo dhimodha dhotikiniha. Makalelo mamodhaya onvuwiha ni oomuhagalasa Yehova fuudhela wilibihedha wihina nimutajhihe. (Efe. 5:1) Neragana ndo athu amodha enere woona wihina nihiyana ni athu owinjhiva. (Mat. 5:14-16) Nakala naliwa kadda labo, podi wera nnere opatha mudhidhi wihina nawonelihemo mwahaya bwaddi nikala oohiyana ni athu amodhaya ni nnowathukulela athu amodha enna efunelo ofunaga ohudhera wodhela Mulugu ehu. Nanvuwihaga Yehova ni makalelo yala Oliye anohagalala vanlubale. — 1 Tim. 2:3, 4.

NNOMUHAGALASA YESU NAVUWIHAGA NDINA NA YEHOVA

8. Yesu asogolele aavi ovuwiha ndina na Yehova?

⁸ Wa dhopaddusa dhatedhene dha Yehova odhulu ni velaboni yavati, kaavo amunonne pama Yehova ompitha Yesu. (Mat. 11:27) Yesu onowadhivela Ababe ni anowerana ethu sithu wihina avuwihe ndina na Yehova, emahiyu Yesu ahinathi okwa oliye ahilobela wa Ababe awogaga wodhela mabasa oolaleya aapariliye mwilaboni yavati ni madhu vang’ono egi: “Miyo gihanoniha ndina nenyu.” (Juwa. 17:26) Eyo yatapulela ddi?

9. Yoladdaniha baani Yesu awogiliye enanikavihera onona makalelo ali Yehova?

⁹ Ohiya baahi wawaddela wi ndina na Mulugu di Yehova, Yesu aherana dhithu dhowinjhiva. Majudewu Yesu alaleyesiye yahinona ndina na Mulugu, mbwenye Yesu “dinaaddele” dhatedhene wodhela Yehova. (Juwa. 1:17, 18) Motajhiha, Dholebela dha Ebarayiku dhinawoga wihina Yehova dathagaraga ni anthebwa. (Êxo. 34:5-7) Yesu ahoniha eyo pamadhene nuwoga nladdaniho na mwaana oovenyavo vaade. Nilerigi wodhela baabi ole amoonaga mwanaye wolapelawene adhaaga, amuthamagelaga, amukubarelaga, amulevelelaga ni murima waye watene, nnowanda wonelamo pamadhene wi Yehova Mulugu athagaraga ni anthebwa. (Luk. 15:11-32) Yesu ohunooniha pamadhene dhikalelo anna Yehova.

10. (a) Nnonne aavi wihina Yesu oolabihedha ndina naaBabe ni oofuna wi amodha elabihedhege? (Marku 5:19) (Osugwe fotu.) (b) Ki peeno Yesu anafuna wi nerege ddi?

¹⁰ Yesu oofuna wihina athu amodhaya elabihedhege ndina na Ababe? Hee. Anamasogolela gereja amodha yarumedha wihina ole aromola ndina na Mulugu kaamuriha Yehova, mbwenye Yesu keenyile wi elemelelo ela yahiniwanana ni Dholebela emuhihe oriha ndina na Ababe. Nlabo dhaala Yesu onvulumusa mulobwana dhaala oonihiwa goyi ni ademoniyu akala murudda waaJerazenu. Vano athuya obajha omoova vanlubale Yesu ofiyedha omuloba wihina avenyewo murudda yole. (Mar. 5:16, 17) Naarive dhigaali ndo, Yesu afuna wi athu enone ndina na Mulugu.  Bumwahaya Yesu omwaddela mulobwana ole aavulumusiye wihina awaddele athu ohiya ethu Yesu amwereliye, mbwenye ethu Yehova aamwerenliye. (Omwileri Marku 5:19.) a Nivanove Yesu anoofuna wi ndina na Ababe nnoniwe wapela elabo yaatene yavati! (Mat. 24:14; 28:19, 20) Vano iyo navuwihaga ndina na Yehova, nnomuhagalasa Mwene ehu Yesu Kiristu.

11. Yesu aahudhihile anamahara aye olobela elobaga ddi, ki mwahaya bwaddi eyo ekala yofuneya? (Ezequiel 36:23)

¹¹ Yesu ahinona wi efunelo ya Yehova yaali otxeniha ndina naye ni ovanyiha dhowoota dhatedhene inkedhiwe Yehova. Bumwahaya Yesu adhe aahudhihege anamahara aye olobela yegi: “Baabihu muli odhulu, ndina nenyu ntxenihiwe.” (Mat. 6:9) Yesu owonelamo wi muselu ola wotxenihiwa ndina na Yehova wopatha dhopaddusa dhatedhene. (Omwileri Ezequiel 36:23.) Kawo yopaddusa emodhaya etxenihe ndina na Yehova ompitha Yesu. Mbwenye Yesu nuumagiwa, amwiddani aye yamwinkedhe ddi? Oruwana dhithu dhotaleleya! Mwebaribarene Yesu ahinona wihina olabihedha mwamakalelo abure obe oruwana ndina noweela na Yehova yaali yothega enlubale. Vano otorihiwa ni winkedhiwa wi ahiruwana ndina na Yehova yaali ethu yaamukunle vanlubale. Podi wera yaali ethu yela yamuthukulenle Yesu okala “oothuwathuwene” mudhidhi ahinathi omagiwa. — Lukaji 22:41-44.

12. Yesu ilibihedhe aavi otxeniha ndina naaBabe?

¹² Wihina atxenihe ndina na Ababe, Yesu ahoonihiwa goyi, ahiruwaniwa ni ahinkedhiwa dhithu aheriliyena. Oliye ahinona wi ahawiwelela Ababe mwadhatedhene, teto kaanna ethu yamuthukuliha manyazo. (Ebe. 12:2) Yesu ahinona wi di Saddana amutatamulela makathamiho, mudhidhi yole worusa. (Luk. 22:2-4; 23:33, 34) Saddana afuna wi Yesu ahiye okala oororomeleya wa Yehova, mbwenye oliye kandile. Yesu wooniha wi Saddana muliba woota, muthu abure ni woniha wi Yehova ohukanna adhaari oororomeleya enadidela omwiwelela naarive efwanyiwaga dhoweha dhorusa.

13. Onaamuhagalase aavi mwene awo Yesu Kiristu?

¹³ We onofuna omuhagalasa mwene awo Yesu Kiristu? Akala onofuna, odidele ovuwiha ndina na Yehova wihina wakavihere athu  amodha onona dhikalelo dhotikiniha dha Yehova. Weragana eyo, we onna ohara thalo dha Yesu. (1 Ped. 2:21) Teto ndala ninga Yesu, onna omuhagalasa Yehova ni onna woniha wi mwiddani awo Saddana, muliba woota!

OVUWIHA NDINA NA YEHOVA WINOWAKAVIHERA ATHU OVULUWA

14-15. Dhithu baani dhotikiniha dhinapadduwe naahudhihaga athu wodhela Yehova? (Osugwe fotu.)

¹⁴ Navuwihaga ndina na Yehova nnowakavihera athu ovuluwa. Ni makalelo baani? Saddana ‘ohukunela wintoni wa ale ehili anamahara.’ (2 Kor. 4:4) Aliwa enorumedha dhowoota dha Saddana ninga ndha: “Mulugu kawo, ali wolapela ni iyo teto kanapwatha athu, dabure ni anowawoniha goyi athu oothega othukuthani wa mootho ni mukalakala.” Saddana anovuwiha dhowoota ndha, mwaha anafuna atakalihe ndina na Yehova ni athukulele athu ohinfiyedha Oliye. Mbwenye naalaleyaga nnovanyiha dhowoota dha Saddana. Iyo nnowahudhiha athu ebaribari wodhela Yehova, navuwihaga ndina noweela na Mulugu. Neragana ndo, yokumelelavoya enakala eevi?

¹⁵ Ebaribari enafwanyeya mBibiliyani ehikanna kopolo. Naahudhihaga athu wodhela Yehova ni wodhela dhikalelo dhaye, ethu yootikiniha enopadduwa. Lenso Saddana anakuneliyena athu wintoni nnomorawo ni enoobajha woona dhikalelo dhapama dha Baabihu. Vano aliwa enoobajha otikina kopolo dhinlubale dha Yehova. (Isa. 40:26) Enohudhera omuroromela Oliye mwaha wogowa waye. (Deut. 32:4) Aliwa enohudhera vanlubale ni thotho dhaye. (Isa. 55:9; Rom. 11:33) Ni enotodoleya yahudhera wi Yehova Mulugu oodhivela. (1 Juwa. 4:8) Vano yathabwaga wandana ni Yehova ejhehedhelo enniwana yokalawo ni mukalakala enothabwa okala yeebaribari mwigumini mwewa. Mwebaribareene ola oneti winlubale ninnihuna wowakavihera athu wandana ni Babihu ehu Yehova. Naakaviheraga athu wandana ni Yehova, ‘nnalaba mwimodhani’ ni Oliye. — 1 Kor. 3:5, 9.

16. Athu yanona ndina na Mulugu enakala aavi? Owoge yopadduwa.

¹⁶ Podi wera ethu yoobajha nnahudhihihu athu nalaleyaga, thi ndina na Yehova. Onona  ndina na Yehova podi odahinya murima wamuthu anna efunelo. Motajhiha, namwali dhaala anithaniwa Aaliyah b aleliwe ni makolo yaali amwenye. Mbwenye oliye koonelamo dhithu dhahudhihiwa mwigereja mune, bumwahaya ubuwela wihina kinandeya wandana ni Mulugu. Mbwenye nuubajha omuhudhera Bibiliya ni Anamoona a Yehova osaddula mubuwelo waye. Oliye obajha omoona Mulugu ninga mukwaye ni ahitikina vanlubale nuunona wi ndina na Mulugu nahivenyihiwamo mmaBibiliyani owinjhiva wakakanihiwa ni mwithaneliwo ninga Nabwiya. Onona ndina na Yehova wahisaddula egumi yaye. Oliye owoga egi: “Mukwaaga a vamurimani ohukanna ndina.” Yokumelelavoya yaali eevi? Oliye anowoga egi: “Vano gihikanna murenddele mwigumini mwaaga, ni ginowithika mwaha onona ndina na Mulugu.” Mulobwana dhaala anithaniwa Steve aali namwiba ni aleliwe ni makolo yahara pamadhene dhilemelelo dha gereja ya majudewu. Oliye kaafuna okala epaddi si epaddi ya gereja mwaha ahoona dhithu dhabure dhereya mmagerejani. Mbwenye amaye nuukwa oliye orumedha omuhudhera Bibiliya ni Anamoona a Yehova. Ethu yadahinyale murima waye waali onona ndina na Mulugu. Oliye anawoga egi: “Miyo kaganonne ndina na Mulugu, vano gihonelamo wi Mulugu ohukalawo, teto ginamoona ninga mukwaaga. Mudhidhi yoole gahonelamo wi gihinfwanya mukwaaga eebaribari.”

17. Mwahaya bwaddi ogafuna odhowagave ovuwihaga ndina na Yehova?

¹⁷ Walaleyaga onowahudhiha athu wodhela ndina noweela na Yehova? Onowakavihera athu woona dhikalelo dhotikiniha dha Mulugu? Weragana ndo onoovuwiha ndina na Mulugu. Bumwahaya odhowegeve ovuwihaga ndina noweela na Yehova, wodhela wakavihera athu onona dhikalelo dhapama dha Yehova, weragana ndo onere wavulusa athu owinjhiva. Onere wanda ohara thalo dha mwene ehu Yesu Kiristu, enlubaleya onere omuhagalasa baabihu oodhivela Yehova. Bumwahaya odhowegeve ‘ovuwihaga ndina [naye] ni mukalakala!’ — Sal. 145:2.