1, 2. ¿Ndáa ejemplo kivi chindeétáʼan xíʼinyó ña̱ kunda̱a̱-iniyó ndáaña ndo̱ʼo Jehová tá ni̱ka̱ʼa̱nna ña̱ vatá xa̱ʼa̱ra?

 NÁ KACHIYÓ ña̱ iin na̱ kúʼvi̱ní-iniyó xíniyó káʼa̱nna ku̱a̱ʼání ña̱ vatá xa̱ʼa̱yó. Soo kúnda̱a̱-iniyó ña̱ su̱ví ña̱ ndixa kúúña, soo savana kándíxana ña̱ vatá ña̱ ni̱ka̱ʼa̱nna xa̱ʼa̱yó ta kíxáʼana káʼa̱nnaña xíʼin inkana, ¿ndáa ki̱ʼva kuniyó tá ná kuu ña̱yóʼo? Sana kixáʼa ndi̱ʼiní-iniyó ta kusuchíní-iniyó saáchi na̱ yiví kixáʼana ndakanixi̱nína ña̱ va̱ása va̱ʼa xa̱ʼa̱yó (Prov. 22:1).

² Ejemplo yóʼo chíndeétáʼanña xíʼinyó kunda̱a̱-iniyó ndáaña ndo̱ʼo Jehová tá ni̱ka̱ʼa̱n iin ta̱ ángel ña̱ vatá xa̱ʼa̱ra. Ñá Eva ka̱ndíxañá ña̱ vatá ña̱ ni̱ka̱ʼa̱n ta̱ ángel kán, xa̱ʼa̱ ña̱kán miíñá xíʼin ta̱ Adán kǒo níxiniso̱ʼokana ña̱ ni̱ka̱ʼa̱n Jehová. Ta xa̱ʼa̱ ña̱yóʼo ndiʼiyó kúúyó na̱ yiví ku̱a̱chi ta xíʼi̱yó (Gén. 3:​1-6; Rom. 5:12). Ku̱a̱ʼání ña̱ vatá ni̱ka̱ʼa̱n ta̱ Ndi̱va̱ʼa xíʼin ñá Eva nu̱ú jardín ña̱ Edén xa̱ʼa̱ ña̱kán kúúmiíyó ku̱a̱ʼání tu̱ndóʼo tiempo vitin. Tá kúú, xóʼvi̱níyó íyoní Guerra ta saátu xíʼi̱yó. Ku̱suchíní-ini Jehová xa̱ʼa̱ ña̱ vatá ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra ta saátu kúsuchíní-inira ña̱ xítora ña̱ xóʼvi̱ní na̱ yiví xa̱ʼa̱ ña̱yóʼo. Soo va̱ása táxira ña̱ kasi ña̱yóʼo nu̱úra ña̱ kusi̱í-inira, saáchi Biblia káʼa̱nña xa̱ʼa̱ra ña̱ kúúra iin “Ndióxi̱ ta̱ si̱í-ini” (1 Tim. 1:11).

3. ¿Ndáa chiñu ña̱ ndáyáʼviní kúúmiíyó?

 ³ Miíyó na̱ testigo kúúmiíyó iin chiñu ña̱ ndáyáʼviní ña̱ ndakiʼinyó tu̱ʼun Jehová ta ndasayi̱i̱yóña. ¿Ndáa ki̱ʼva keʼéyó ña̱yóʼo? Kivi keʼéyóña tá ná kandíxayó ña̱ káʼa̱n Salmo 113:1 ña̱ káchi: “Ndasakáʼnundó ki̱vi̱ Jehová”. Ta iin ki̱ʼva ña̱ keʼéyó ña̱yóʼo kúú ña̱ ka̱ʼa̱n va̱ʼayó xa̱ʼa̱ ki̱vi̱ Jehová. ¿Á kúni̱ún keʼún ña̱yóʼo? Ná kotoyó u̱ni̱ ña̱ chindeétáʼan xíʼinyó ña̱ ndasakáʼnuyó Jehová xíʼin ndiʼi níma̱yó.

SÁKUSI̱ÍYÓ-INI JEHOVÁ

4. Ka̱ʼa̱n xa̱ʼa̱ iin ejemplo ña̱ náʼa̱ ña̱ kúsi̱íní-ini Jehová tá ndásakáʼnuyóra (Koto na̱ʼná).

⁴ Jehová kúú yiváyó ta kúni̱ra ña̱ ná ndasakáʼnuyó ki̱vi̱ra (Sal. 119:108). ¿Á ña̱yóʼo kúni̱ kachiña ña̱ íyora nda̱a̱ táki̱ʼva íyo na̱ yiví na̱ kúni̱ ña̱ ná ka̱ʼa̱n va̱ʼana xa̱ʼa̱na tasaá va̱ʼa kunina? Va̱ásaví. Ña̱ va̱ʼa kunda̱a̱-iniyó xíʼin ña̱yóʼo, ná ndakanixi̱níyó xa̱ʼa̱ iin ñá loʼo ña̱ kúyatinñá nu̱ú yiváñá ta númiñára ta káchiñá xíʼinra: “Kúni̱níi̱ xínii̱ yóʼó, kǒo nda̱a̱ ni iin na̱ íyo nda̱a̱ táki̱ʼva íyoún”. Xa̱ʼa̱ ña̱yóʼo kúsi̱íní-ini yiváñá chi liviní káʼa̱nñá xíʼinra. ¿Nda̱chun? ¿Á xíniñúʼu ka̱ʼa̱nví ñá loʼo se̱ʼera xíʼinra ña̱ kúni̱ñá xíniñára ña̱ va̱ʼa kunira? Va̱ásaví. Chi ñáyóʼo káʼa̱nñá xíʼin yiváñá xa̱ʼa̱ ña̱ ndíkaa̱ níma̱ñá ta kǒo íxandúxara xíʼinñá ña̱ ka̱ʼa̱nñá xíʼinra sáachi kúnda̱a̱-inira ña̱ tá kúʼvi̱ní-iniñá xíniñára ña̱yóʼo chindeétáʼanña xíʼinñá ña̱ si̱íní kooñá tá ná kuaʼnuñá. Ki̱ʼva saá ndóʼo Jehová, kúsi̱íní-inira tá ndásakáʼnuyóra xa̱ʼa̱ ña̱ kúʼvi̱-iniyó xíniyóra.

5. ¿Ndáaña náʼa̱yó tá nda̱kú íyo iniyó xíʼin Jehová?

⁵ Ta̱ Ndi̱va̱ʼa káʼa̱nra ña̱ miíyó na̱ yiví va̱ása nda̱kú koo iniyó xíʼin Jehová ta kǒo ndakiʼinyó tu̱ʼunra tá ná ya̱ʼayó nu̱ú tu̱ndóʼo (Job 1:​9-11; 2:4). Soo ta̱ Job ni̱na̱ʼa̱ra ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa. Ta miíyó, ¿ndáaña kivi keʼéyó? Ña̱ ndasakáʼnuyó Jehová chi saá náʼa̱yó ña̱ vatá kúú ña̱ káʼa̱n ta̱ Ndi̱va̱ʼa. Nu̱ú miíyó ndáyáʼviní ña̱ nda̱kú koo iniyó xíʼin Jehová ta sakúsi̱íyó-inira (Prov. 27:11).

6. ¿Ndáa ki̱ʼva kundiku̱nyó yichi̱ ta̱ rey David xíʼin na̱ levita? (Nehemías 9:5).

⁶ Na̱ kúʼvi̱-ini xíni Ndióxi̱ kúni̱na ndasakáʼnunara xíʼin ndiʼi níma̱na. Ta̱ rey David ka̱ʼyíra: “Ndásakáʼnui̱ Jehová xíʼin ndiʼi níma̱i̱, xíʼin ndinuʼu-inii̱ ndasakáʼnui̱ ki̱vi̱ún ña̱ yi̱i̱ní” (Sal. 103:1). Ta̱ David xi̱kunda̱a̱-inira ña̱ tá xi̱ndasakáʼnura ki̱vi̱ Jehová, xi̱ndasakáʼnura mií Jehová. Tá xíniso̱ʼoyó ki̱vi̱ Jehová, ndákanixi̱níyó xa̱ʼa̱ ña̱ va̱ʼa ña̱ kúúmiíra xa̱ʼa̱ ndáa ki̱ʼva íyora, ta saátu xa̱ʼa̱ ndiʼi  ña̱ʼa ña̱ i̱xava̱ʼara. Ña̱kán, yi̱i̱ní ni̱xi̱yo ki̱vi̱ Jehová nu̱ú ta̱ David ta xi̱ndasakáʼnuraña. Ta̱ David ni̱ka̱ʼa̱nra ña̱ xi̱kuni̱ra ndasakáʼnura Jehová xíʼin ndiʼi níma̱ra. Ta saátu na̱ levita nda̱sakáʼnuna ki̱vi̱ Jehová ta nda̱a̱ ni̱ka̱ʼa̱nna ña̱ kǒo níʼi̱na tu̱ʼun ña̱ ka̱ʼa̱nna xa̱ʼa̱ ndiʼi ña̱ va̱ʼa ña̱ kéʼéra (kaʼvi Nehemías 9:5). a Xi̱kusi̱íní-ini Jehová xa̱ʼa̱ ña̱ va̱ʼaní xi̱ndasakáʼnunara.

7. ¿Ndáa ki̱ʼva ndásakáʼnuyó Jehová tá ku̱a̱ʼa̱nyó predicación saátu tá kéʼéyó inkaka ña̱ʼa?

⁷ Iin ki̱ʼva ña̱ ndasakáʼnuyó Jehová kúú ña̱ ka̱ʼa̱n va̱ʼayó xa̱ʼa̱ra xíʼin inkana. Ta kéʼéyó ña̱yóʼo tá nátúʼunyó xíʼin na̱ yiví xa̱ʼa̱ra, chi kúni̱yó ña̱ ná kuʼvi̱-inina kuninara nda̱a̱ táki̱ʼva kúʼvi̱-iniyó xíniyóra (Sant. 4:8). Kútóoníyó kuniñúʼuyó Biblia ña̱ natúʼunyó xíʼin na̱ yiví xa̱ʼa̱ ña̱ va̱ʼa ña̱ kúúmií Jehová, tá kúú ña̱ kúʼvi̱ní-inira xínira miíyó, ña̱ nda̱kúní ndátiinra ku̱a̱chi, ña̱ ndíchiníra xíʼin ña̱ íyoní ndee̱ra. Inka ki̱ʼva ña̱ ndasakáʼnuyó Jehová ta sakúsi̱íyó-inira kúú ña̱ keʼéyó táki̱ʼva kéʼéra (Efes. 5:1). Na̱ yiví kíʼinna kuenta ña̱ síín íyoyó tá kéʼéyó ña̱yóʼo (Mat. 5:​14-16). Ndiʼi ki̱vi̱ ná natúʼunyó xíʼin na̱ yiví xa̱ʼa̱ Ndióxi̱ chi koova na̱ kuni̱ sakúaʼa xa̱ʼa̱ra. Tá kéʼéyó ña̱yóʼo saá kúú ña̱ sákusi̱íníyó níma̱ Jehová (1 Tim. 2:​3, 4).

SÁKUSI̱ÍYÓ-INI TA̱ JESÚS

8. ¿Nda̱chun va̱ʼání nda̱sakáʼnu ta̱ Jesús ki̱vi̱ Jehová?

⁸ Iinlá ta̱ Jesús kúú ta̱ va̱ʼaní xíni̱ ndáa ki̱ʼva íyo yivára (Mat. 11:27). Kúʼvi̱ní-ini ta̱ Jesús xínira yivára ta sa̱náʼa̱ra miíyó ndáa ki̱ʼva ndasakáʼnuyó ki̱vi̱ Jehová (Juan 14:31). Ñuú tá kúma̱ní kuvira ña̱yóʼo ni̱ka̱ʼa̱nra xíʼin yivára: “Na̱túʼi̱n xa̱ʼa̱ ki̱vi̱ún xíʼinna” (Juan 17:26). ¿Ndáa ki̱ʼva ke̱ʼéraña?

9. ¿Ndáa ilustración xi̱niñúʼu ta̱ Jesús ña̱ ka̱ʼa̱nra xa̱ʼa̱ ki̱ʼva ña̱ íyo Jehová?

⁹ Ta̱ Jesús kǒo níka̱ʼa̱n kuitíra xa̱ʼa̱ ki̱vi̱ Jehová xíʼin na̱ yiví, chi xi̱xini̱va na̱ judío ndáaña xi̱kuu ki̱vi̱ra. Ña̱kán, ña̱ ni̱ka̱ʼa̱nra xíʼinna xi̱kuu ndáa ki̱ʼva íyora (Juan 1:​17, 18). Tá kúú, ña̱ Escrituras Hebreas káʼa̱nña ña̱ kúndáʼvi-ini Jehová xínira na̱ yiví ta va̱ʼaní-inira (Éx. 34:​5-7). Soo ta̱ Jesús va̱ʼaníka chi̱ndeétáʼanra xíʼin na̱ yiví ña̱ kunda̱a̱-inina xa̱ʼa̱ ña̱yóʼo tá ni̱ka̱ʼa̱nra iin ilustración ña̱ káʼa̱n xa̱ʼa̱ iin ta̱ loʼo ta̱ sa̱ndákoo yivá: “Tá xíkáka va̱xira xi̱ni yivárara ta ndeéní ku̱ndáʼvi-inira xi̱nirara. Ta xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta i̱xakáʼnu-inira xa̱ʼa̱ra”. Xíʼin ña̱ ilustración yóʼo kúnda̱a̱-iniyó ña̱ kúndáʼviníva-ini Jehová xínira miíyó ta va̱ʼaní-inira (Luc. 15:​11-32). Ta̱ Jesús chi̱ndeétáʼanra xíʼin na̱ yiví ña̱ va̱ʼa kunda̱a̱-inina ndáa ki̱ʼva íyo Jehová.

10. a) ¿Nda̱chun va̱ʼa kúnda̱a̱-iniyó ña̱ xi̱niñúʼu ta̱ Jesús ki̱vi̱ yivára ta nda̱chun xi̱kuni̱ra ña̱ ná kuniñúʼu inkanaña? (Marcos 5:19; koto na̱ʼná). b) ¿Ndáaña kúni̱ ta̱ Jesús keʼéyó?

¹⁰ ¿Á xi̱kuni̱ ta̱ Jesús kuniñúʼuna ki̱vi̱ yivára? Xi̱kuni̱vara. Sava na̱ xi̱niʼi yichi̱ nu̱ú na̱ judío xi̱ka̱ʼa̱nna ña̱ yi̱i̱ní ki̱vi̱ Ndióxi̱ ta kǒo kívi kuniñúʼunaña. Soo ta̱ Jesús kǒo nítaxira kasi ña̱yóʼo nu̱úra ña̱ ndasakáʼnura ki̱vi̱ yivára. Ná ndakanixi̱níyó ndáaña ku̱u tá sa̱ndaʼa ta̱ Jesús iin ta̱a ta̱ xi̱kuumií ta̱chí ndi̱va̱ʼa ñuu nu̱ú ni̱xi̱yo na̱ geraseno. Xa̱ʼa̱ ña̱ ni̱yi̱ʼvíní na̱ yiví kán, xa̱kundáʼvina nu̱ú ta̱ Jesús ña̱ ná ku̱ʼu̱nra (Mar. 5:​16, 17). Soo ta̱ Jesús xi̱kuni̱ra ña̱ ná kunda̱a̱-ini na̱ yiví xa̱ʼa̱ Jehová, xa̱ʼa̱ ña̱kán tá kúma̱níka ku̱ʼu̱nra ni̱ka̱ʼa̱nra xíʼin ta̱ ta̱a kán ña̱ ná natúʼunra  xíʼin na̱ yiví xa̱ʼa̱ ña̱ ke̱ʼé Jehová xa̱ʼa̱ra (kaʼvi Marcos 5:19). b Saátu kúni̱ ta̱ Jesús ña̱ ná natúʼunyó xíʼin na̱ yiví xa̱ʼa̱ Jehová (Mat. 24:14; 28:​19, 20). Tá kéʼéyó ña̱yóʼo, saá kúú ña̱ sákusi̱íyó-ini ta̱ Jesús.

11. ¿Ndáaña ni̱ka̱ʼa̱n ta̱ Jesús xíʼin na̱ discípulora ña̱ ndukúna nu̱ú Ndióxi̱? Ta̱, nda̱a̱ táki̱ʼva káchi Ezequiel 36:​23, ¿nda̱chun ndáyáʼviníña?

¹¹ Ta̱ Jesús xi̱kunda̱a̱-inira ña̱ xi̱kuni̱ Jehová kúú ña̱ nduyi̱i̱ ki̱vi̱ra, saáchi ku̱a̱ʼání ña̱ vatá káʼa̱nna xa̱ʼa̱ra. Ña̱kán, sa̱náʼa̱ra na̱ discipulora ndáa ki̱ʼva ka̱ʼa̱nna xíʼin Ndióxi̱: “Yivándi̱ ta̱ íyo chí ndiví, ná nduyi̱i̱ ki̱vi̱ún” (Mat. 6:9). Ta̱ Jesús xi̱kunda̱a̱-inira ña̱ ndáyáʼviní nduyi̱i̱ ki̱vi̱ Jehová (kaʼvi Ezequiel 36:23). c Iinlá ta̱ Jesús kúú ta̱ chi̱kaa̱ní ndee̱ ña̱ ndasayi̱i̱ra ki̱vi̱ Jehová. Ni saá tá ti̱innara, ¿ndáaña vatá ni̱ka̱ʼa̱nna xa̱ʼa̱ra? Ni̱ka̱ʼa̱nna ña̱ i̱xayaku̱a̱ra ki̱vi̱ yivára. Ta̱ Jesús xi̱ndakanixi̱níra ña̱ iin ku̱a̱chi ndeéní xi̱kuu ña̱yóʼo. Ña̱kán tá kúma̱níka tiinnara ni̱kusuchíní-inira, saáchi xi̱kunda̱a̱-inira ña̱ chikaa̱na ku̱a̱chi síkira ña̱ káʼa̱nra ña̱ va̱ása va̱ʼa xa̱ʼa̱ Ndióxi̱ ta kaʼnínara. Xa̱ʼa̱ ña̱yóʼo ki̱xáʼara ndíʼi̱ní-inira (Luc. 22:​41-44).

12. ¿Ndáaña ke̱ʼé ta̱ Jesús ña̱ va̱ʼa nda̱sayi̱i̱ra ki̱vi̱ yivára?

¹² Ta̱ Jesús ta̱xira ña̱ ná saxóʼvi̱nara, ka̱ʼa̱n ndi̱va̱ʼana xíʼinra, ka̱ʼa̱nna ña̱ vatá xa̱ʼa̱ra, xa̱ʼa̱ ña̱ nda̱sakáʼnura ki̱vi̱ yivára. Ta kǒo níxi̱kukáʼan nu̱úra saáchi va̱ʼaní xi̱xiniso̱ʼora ndiʼi ña̱ xi̱kaʼa̱n yivára xíʼinra (Heb. 12:2). Saátu xi̱kunda̱a̱-inira ña̱ ta̱ Ndi̱va̱ʼa kúú ta̱ xi̱xitondosó-ñaʼá (Luc. 22:​2-4; 23:​33, 34). Kǒo níkuchiñu ta̱ Ndi̱va̱ʼa sandáʼvira ta̱ Jesús chi nda̱kúníva ni̱xi̱yo inira xíʼin Jehová. Xíʼin ña̱ ke̱ʼé ta̱ Jesús ni̱na̱ʼa̱ra ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa ta saátu ni̱na̱ʼa̱ra ña̱ íyova na̱ nda̱kúní íyo ini xíʼin Jehová ni yáʼana nu̱ú tu̱ndóʼo ña̱ yo̱ʼvi̱ní.

13. ¿Ndáaña xíniñúʼu keʼéyó ña̱ va̱ʼa sakúsi̱íyó-ini ta̱ Jesucristo?

¹³ ¿Á kúni̱ún sakúsi̱íún-ini ta̱ rey Jesucristo? Tá saá, kǒo sandákoún ña̱ ndasakáʼnún ki̱vi̱ Jehová ta chindeétáʼún xíʼin inkana ña̱ kunda̱a̱-inina ndáa ki̱ʼva íyora. Tá ná keʼún ña̱yóʼo saá kundikún yichi̱ ta̱ Jesús  (1 Ped. 2:21). Ta nda̱a̱ táki̱ʼva ke̱ʼé ta̱ Jesús, kivi sakúsi̱íún-ini Jehová tasaá na̱ʼún ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa.

KIVI CHINDEÉTÁʼANYÓ XÍʼIN NA̱ YIVÍ ÑA̱ KA̱KUNA

14, 15. ¿Ndáaña kéʼé na̱ yiví tá kúnda̱a̱-inina ña̱ nda̱a̱ xa̱ʼa̱ Jehová?

¹⁴ Tá ndásakáʼnuyó ki̱vi̱ Jehová saá chíndeétáʼanyó xíʼin na̱ yiví ña̱ ka̱kuna, ¿nda̱chun? Saáchi ta̱ Ndi̱va̱ʼa nda̱kasira nu̱ú na̱ yiví chi kǒo kúni̱ra kunda̱a̱-inina xa̱ʼa̱ tu̱ʼun va̱ʼa (2 Cor. 4:4). Ña̱kán ku̱a̱ʼání na̱ yiví kándíxana ña̱ vatá ña̱ káʼa̱n ta̱ Ndi̱va̱ʼa xa̱ʼa̱ Ndióxi̱ ta ndákanixi̱nína ña̱ kǒo Ndióxi̱ íyo, ña̱ xíkání íyora nu̱úyó ta va̱ása ndíʼi̱-inira xa̱ʼa̱yó, ndi̱va̱ʼaní-inira ta íxandi̱va̱ʼaníra xíʼin na̱ yiví na̱ kéʼé ña̱ kini. Ña̱ vatá ña̱ káʼa̱n ta̱ Ndi̱va̱ʼa sákuyaku̱a̱ña ki̱vi̱ Jehová, ña̱kán ku̱a̱ʼání na̱ yiví kǒo xíínna kuyatinna nu̱úra. Soo tá nátúʼunyó ña̱ nda̱a̱ xa̱ʼa̱ Jehová saá kúú ña̱ ndásakáʼnuyóra, ta náʼa̱yó ña̱ vatá kúú ña̱ káʼa̱n ta̱ Ndi̱va̱ʼa.

¹⁵ Ku̱a̱ʼání ndee̱ kúúmií Biblia, saáchi tá sánáʼa̱yó na̱ yiví ndáa ki̱ʼva íyo Jehová, kivi nasamana ki̱ʼva ña̱ íyona. Tá kíxáʼana kúnda̱a̱-inina ña̱ nda̱a̱ xa̱ʼa̱ Jehová táki̱ʼva íyo na̱ nda̱kuná nu̱ú saá íyona, ta kúnda̱a̱-inina ña̱ vatá kúú ña̱ káʼa̱n ta̱ Ndi̱va̱ʼa. Tasaá kixáʼana kúyatinkana nu̱ú Jehová ta kúʼvi̱ka-inina xíninara táki̱ʼva kéʼé miíyó. Ndákanda̱ní-inina chi ku̱a̱ʼání ndee̱ kúúmiíra (Is. 40:26). Xa̱ʼa̱ ña̱ nda̱kúní ndátiin Jehová ku̱a̱chi, va̱ʼaní kúni na̱ yiví (Deut. 32:4). Kúsi̱íní-inina xa̱ʼa̱ ña̱ kúnda̱a̱-inina ña̱ ku̱a̱ʼání ña̱ ndíchi kúúmií Jehová (Is. 55:9; Rom. 11:33). Ta va̱ʼaní kúnina tá kúnda̱a̱-inina ña̱ kúʼvi̱ní-inira xínirana (1 Juan 4:8). Tá kíxáʼana sákuaʼana xa̱ʼa̱ra xáa̱na kándíxana ña̱ kivi taxira ña̱ kutakuna ndiʼi tiempo ta saátu ña̱ xa̱a̱na koona na̱ se̱ʼera. Kúsi̱íní-iniyó ña̱ chíndeétáʼanyó xíʼin na̱ yiví ña̱ kuyatinna nu̱ú Ndióxi̱. Ña̱kán, tá kéʼéyó chiñu yóʼo saá chíndeétáʼanyó xíʼin Jehová (1 Cor. 3:​5, 9).

16. ¿Ndáaña kúu tá sákuaʼa na̱ yiví ki̱vi̱ Ndióxi̱? Ka̱ʼa̱n xa̱ʼa̱ ejemplo.

¹⁶ Tá kíxáʼayó nátúʼunyó xíʼin na̱ yiví ña̱ siʼna sánáʼa̱yóna kúú ki̱vi̱ Jehová. Tá xíʼin ndinuʼu-ini na̱ yiví kúni̱na sakúaʼana xa̱ʼa̱  Ndióxi̱ ña̱yóʼo va̱ʼaní chíndeétáʼanña xíʼinna. Tá kúú, ná ka̱ʼa̱nyó xa̱ʼa̱ ñá Alía d na̱ veʼeñá xi̱kuumiína iin religión. Ta ti̱xin religión kán, kǒo níxi̱sanáʼa̱na xa̱ʼa̱ ña̱ va̱xi nu̱ú Biblia. Ña̱kán, kǒo níxi̱kutóoñá ña̱ xi̱sanáʼa̱na ta ni va̱ása níchindeétáʼanña xíʼinñá ña̱ kuyatinkañá nu̱ú Ndióxi̱. Soo tá ki̱xáʼañá káʼviñá xíʼin na̱ testigo Jehová, na̱kundaa̱-iniñá ña̱ sa̱kútaʼana ki̱vi̱ Ndióxi̱ nu̱ú ku̱a̱ʼání Biblia. Ta nu̱ú va̱xi ki̱vi̱ra ka̱ʼyína “Táta”, nda̱kanda̱ní-iniñá xíʼin ña̱yóʼo. Ta xa̱ʼa̱ ña̱ na̱kundaa̱-iniñá nda̱saa naní Ndióxi̱ va̱ʼaníka ki̱xáʼañá kítáʼanñá xíʼinra. Ñáyóʼo ni̱ka̱ʼa̱nñá: “Íyova ki̱vi̱ migoi̱, vitin va̱ʼaní kúnii̱ ta kúsi̱íní-inii̱”. Na̱ veʼe ta̱ Steve na̱ judío kúúna ta miíra xi̱sakáʼara yaa. Ta xa̱ʼa̱ ña̱ ku̱a̱ʼání ña̱ va̱ása va̱ʼa xi̱keʼéna ti̱xin religión kán, va̱ása níxi̱kuni̱ra kitáʼanra xíʼin nda̱a̱ ni iin religión. Soo tá ni̱xi̱ʼi̱ siʼíra, ka̱ndíxavara ña̱ sanáʼa̱ iin ta̱ testigo Jehová miíra. Ni̱kusi̱íní-inira tá sa̱kúaʼara ki̱vi̱ Ndióxi̱. Ta̱yóʼo káchira: “Ni kǒo níxi̱xinii̱ ndáa ki̱ʼva naní Ndióxi̱, soo ki̱vi̱ saá sa̱kúaʼi̱ ña̱ íyova ki̱vi̱ra ta saátu ku̱ndaa̱-inii̱ ña̱ kiviva koi̱ migora”.

17. ¿Nda̱chun kúni̱ún ndasakáʼnún ki̱vi̱ Ndióxi̱? (Koto na̱ʼná).

¹⁷ Tá sánáʼa̱yó na̱ yiví, ¿á káʼa̱nyó xíʼinna ndáa ki̱ʼva naní Ndióxi̱ ta ndáa ki̱ʼva íyora? Tá kéʼéyóña saá kúú ña̱ ndásakáʼnuyó ki̱vi̱ra. Ña̱kán chika̱a̱ ndee̱ ña̱ chindeétáʼún xíʼin na̱ yiví ña̱ kuxini̱nara tasaá ndasakáʼnunara. Tá ná keʼún ña̱yóʼo, saá kúú ña̱ chindeétáʼún xíʼin na̱ yiví ña̱ ka̱kuna, saátu keʼún tákiʼva ke̱ʼé tátayó Jesucristo ta sakúsi̱íníún-ini yiváyó Jehová. Ná ka̱ʼa̱nyó nda̱a̱ táki̱ʼva ni̱ka̱ʼa̱n ta̱ ka̱ʼyí Salmo 145:2 “Mií ña̱ ndixa kúú ña̱ ndasakáʼnui̱ ki̱vi̱ún ndiʼi tiempo”.