1-2. Vika vi hasa ku tu kuasa kuivuisisa vati ue ku livua Yehova omo lia makuli a ve ku handeka ku tuala hali ikeye?

 ACI SINGANIEKENU, nga muntu u mua lema a mi vangeya vimo. Kaha vantu vavengi va tsiliela makuli aco na ku a sanduola. Vati mu livua? Nga mua kala na lutsimo lua cili, ku mi vangeya ci ka mi lingisa mu livue mua ku pihia, ni vati?—Visi. 22:1.

² Eci cimueso ci tu kuasa ku tantekeya vati ua livuile Yehova mu va pihisile lutsimo lueni. Umo kangelo ua lekele mpuevo ua katete Eva makuli ku tuala hali Yehova, kaha Eva ua tavele makuli aco. Omo liaco, Andama na Eva va muesele lisino kuli Yehova. Ngeci mukemuo, vantu vose ve ku vulumuna na kutsa. (Njen. 3:1-6; Loma 5:12) Visoti vi tue ku mona ngeci mua kutsa, vindzita, na vuhutu, vieza omo lia makuli a sanduele Satana mu citungu ca Endene. Vuno Yehova ue kuivua ku vavala omo lia makuli aco na viuma vie kuizamo ni? Eyo. Vutuhu ngoco, Yehova ka puile ua mukalu ni mukua nkulundundu. Vunoni, ua pua ‘Njambi ua ndzolela.’—1 Tim. 1:11.

3. Ku vezika cika tua kala naco?

³ Tua kala na ku vezika ca ku kuasa ku hakuila lizina lia Yehova mu kuononoka eli lisiko: “Sangazialenu lizina lia Yehova.” (Visa. 113:1) Tue ku lingamo mu ku lekako vakuetu vusunga ku tuala hali ikeye. Vuno mue ku sangaziala lizina lia Yehova ni? Tu simutuilenu ha viuma vitatu vi tu kuasa ku sangaziala lizina lia Njambi Yetu na mutima uose.

 YEHOVA UE KUIVUA NDZOLELA MU TUE KU SANGAZIALA LIZINA LIENI

4. Omo lia vika Yehova ue kuivua ndzolela mu tue ku mu sangaziala? Hanenu cimueso. (Talenu naua cikupulo.)

⁴ Tue ku vuisa Tatetu ndzolela mu tue ku sangaziala lizina lieni. (Visa. 119:108) Vuno ca lomboloka ngecize Njambi ua pua ngue vantu ve ku tonda ku va sangala linga va livue vuino ni? Houe. Aci singaniekenu: Muana a tuntila ise na ku mu vumbatela, kaha a mu leka ngueni: “Tata, nja mi lema cikuma!” Mua vusunga, ise evua ndzolela ya kama. Omo lia vika? Kati muomu a tondeka ku mu sangala kuli muaneni linga a livue vuino, houe. Vunoni, muomu ua lema muaneni kaha ci mu vuisa ndzolela ku tantekeya ngueni muaneni ua mu lema. Cisemi a tantekeya naua ngueni muaneni mua ka kola, a ka yoya mu ndzolela omo lia ku muesa cilemo na ku santsela. Na vuno vene, Tatetu Yehova ue kuivua ndzolela nga tu mu sangaziala.

5. Vika tue ku muesa nguetu via pua makuli nga tu sangaziala Yehova?

⁵ Nga tu sangaziala Tatetu ua muilu, tue ku muesa nguetu via handekele Satana ku tuala hali yetu via pua makuli. Satana ngueni muntu na umo uahi a ka hakuila lizina lia Njambi. Ua muesele naua ngueni, ka tua puile vakua vuoloke. Ua handekele naua ngueni tu vose tu ka likela ku pangela Njambi. (Yombi 1:9-11; 2:4) Vunoni Yombi ua muesele ngecize Satana ua pua mukua makuli. Kaha tu vose tu hasa ku hakuila Tatetu Yehova na ku tualelelaho ku mu pangela. (Visi. 27:11) Mua vusunga, ca pua ku vezika ca kama ku lingamo.

6. Vati tu hasa ku tambuluisa Muangana Ndaviti na vaLevi? (Nehemiya 9:5)

⁶ Vaze va lema Njambi, va tonda ku sangaziala lizina lieni na mutima uavo uose. Muangana Ndaviti ua sonekele ngueni: “Sangaziala Yehova, a muono uange; na viose vi li muli ange, sangazialenu lizina lieni lia ku lela.” (Visa. 103:1) Ndaviti ua tantekeyele ngueni ku sangaziala lizina lia Yehova ca pua vene ku sangaziala Yehova mpundu. Nga tuivua lizina lia Yehova, tue ku vuluka lutsimo na vifua vieni, hamo lika na vipanga vieni via ku komouesa. Ndaviti ua muene lizina lia Yehova ku pua lia ku lela, kaha na ku lisangaziala. Ua tondele ku lingamo na “viose” via kele navio, ni nguetu, na mutima ueni uose. Na vuno vene, vaLevi navo va tuamekele ku sangaziala Yehova. Na ku likehesa cose, va litavelele nguavo, ka va kele na mezi a ku sangaziala lizina lia Yehova ngue mu ca pande. (Tandenu Nehemiya 9:5.) Mua vusunga, ku likehesa cavo ca vuisile Yehova ndzolela.

7. Vati tu hasa ku sangaziala Yehova nga tuli mu kuambulula na muono uetu ua tangua na tangua?

 ⁷ Lelo lino, tu hasa ku vuisa Yehova ndzolela nga tu handeka vieni mu cifua ci muesa ngecize, tue ku mu santsela kaha tua mu lema. Nga tuli mu kuambulula, vutumbe vuetu vua pua ku kuasa vantu va suene kuli Yehova na ku mu lema ngeci muetu. (Tia. 4:8) Mua vusunga, tue kuivua ndzolela mu tue ku leka vantu vati Mbimbiliya ya muesa cilemo ca Yehova, vuviuke, mana, ngolo, na vifua vieni vikuavo. Tu hasa naua ku sangaziala Yehova na ku mu vuisa ndzolela mu ku lihakela kapandi ka ku mu tambuluisa. (Efe. 5:1) Ku lingamo, ci ka tu kuasa ku kolesa mu mavu ano a ku pihia. Kaha vantu va hasa ku lihula omo lia vika vilinga vietu via liseza na vilinga viavo. (Mat. 5:14-16) Omo tu kala navo mu muono ua tangua na tangua, tu hasa ku va lomboluela omo lia vika tue ku lihakela kapandi ka ku kala na vilinga via cili. Omo liaco, vantu ve ku suena kuli Njambi. Nga tu sangaziela Yehova mu vifua viaco, tue ku mu vuisa ndzolela.—1 Tim. 2:3, 4.

YESU UE KUIVUA NDZOLELA MU TUE KU SANGAZIALA LIZINA LIA YEHOVA

8. Omo lia vika Yesu ua pua lungano lua cili ku tuala ha ku sangaziala lizina lia Yehova?

⁸ Na umo uahi muilu ni hano ha mavu a tantekeya vuino Yehova ku hiana Yesu. (Mat. 11:27) Yesu ua lema Ise kaha ue ku sangaziala lizina lia Yehova. (Yoa. 14:31) Yesu ntsimbu kanda a tse, ua vundilile kuli Ise. Kaha ua handekele via puisilemo mu cipanga ceni ca kuambulula ngueni: “Nji na va tantekeyesa lizina liove.” (Yoa. 17:26) Vati ua lingilemo?

9. Vati Yesu ua pangesele cisimo mu ku lombolola vati Ise ua fua?

⁹ Yesu ka longesele lika vantu lizina lia Njambi. Muomu vaYundeya va longesele, va tantekeyele laza lizina lia Njambi. Vunoni Yesu ikeye ua ku livanga mu ku “mu solola.” (Yoa. 1:17, 18) Ca ku muenako, Visoneka via ciHevelu via muesa ngecize, Yehova ua kala na cikeketima na ngozi. (Ezu. 34:5-7) Yesu ua muesele vusunga vuaco, mua tele cisimo ca muana ua zimbalele kaha na ise. Ise mua muene muaneni “te a ci li ku laako,” ua mu tuntilile, ku mu vumbatela kaha na ku mu konekela na mutima ueni uose. Eci cisimo ce ku tu kuasa kuivuisisa vuino cikeketima na ngozi ya Yehova. (Luka 15:11-32) Yesu ua kuasele vantu va tantekeye vati Yehova ua fua.

10. (a) Vati tua tantekeya nguetu Yesu ua pangesele lizina lia Ise, kaha ua tondele na vakuavo va lingemo? (Mako 5:19) (Talenu naua cikupulo.) (b) Yesu a tonda netu tu linge vika lelo lino?

¹⁰ Vuno Yesu neni ua tondele vakuavo va pangese lizina lia Ise ni? Eyo. Ku matangua a Yesu, vamo vakuluntu va malombelo halumo va tsilielele nguavo ku tumbula lizina lia Njambi ca puile ku hona kasingimiko. Vunoni, Yesu ka kavele vizila via vakua mavu, kaha ua tualeleleho ku singimika lizina lia Ise. Ca ku muenako, Yesu mua kanguisile umo yala ku Ngelasene, vantu va vuile vuoma na ku mu lambelela a fumeko, ngeci ua lingilemo. (Mako 5:16, 17) Vunoni kasi vene, Yesu ua tondele ngecize vantu ku Ngelasene va tantekeye lizina lia Yehova. Ngeci ua lekele yala ya kanguisile a ka leke vantu via lingile Yehova, vunoni kati via via lingile Yesu. (Tandenu Mako 5:19.) a Yesu a tonda netu tu tsimanese lizina lia Ise mu mavu ose! (Mat. 24:14; 28:19, 20) Nga tu lingamo, tu ka vuisa Muangana uetu Yesu ndzolela.

11. Vika Yesu ua longesele vandongesi veni va vundile, kaha vika ca puila ca seho? (Ezekiele 36:23)

 ¹¹ Yesu ua tantekeyele ngueni vutumbe vua Yehova vua puile ku lelesa lizina Lieni omo lia makuli ose a va mu vangeyele. Ngeci mukemuo, Muangana uetu ua longesele vandongesi veni va vundile nguavo: “Tatetu u li muilu, va [lelese] lizina liove.” (Mat. 6:9) Yesu ua tantekeyele ngueni, eci ca pua citanga ca kama ci ve kulua naco vantu. (Tandenu Ezekiele 36:23.) Na umo uahi mu kaye kose ua linga via vingi mu ku lelesa lizina lia Yehova ku hiana Yesu. Vunoni mu va mu kuatele, vitozi veni va mu vangeyele nguavo ua muesele kasahuntu ku lizina lia Ise. Mua vusunga, Yesu ua tantekeyele ngueni ku sahula lizina lia Ise ca puile vupi vua kama. Ngeci mukemuo, ca mu vavalele cikuma ku mutima omo lia ku mu vangeya. Halumo omo lia mulonga u va mu vangeyele, ngeci Yesu ua vuile ku vavala “ku mutima” ntsimbu kanda va mu kuate.—Luka 22:41-44.

12. Vati Yesu ua lelesele lizina lia Ise?

¹² Linga a lelese lizina lia Ise, Yesu ua kolesele mu va mu tukile, ku mu yandesa na ku mu vangeya. Vunoni ka vuile ntsoni muomu ua tantekeyele ngueni uononokele Ise mu viuma viose. (VaHe. 12:2) Ua tantekeyele naua ngueni, Satana ua kele na ku mu luisa mu ntsimbu ize ya ikalu. (Luka 22:2-4; 23:33, 34) Satana ua tondele linga Yesu a likele kuononoka Yehova, vunoni ka hasele. Yesu ua muesele ngecize, Satana ua pua mukua makuli. Kaha Yehova ua kala na vangamba ve ku muononoka ambe nga va hita mu vieseko via kama.

13. Vati mu hasa ku vuisa Muangana uenu ndzolela?

¹³ Vuno mu tonda ku vuisa Muangana uenu ndzolela ni? Mu ku tualelelaho ku sangaziala lizina lia Yehova, mu ka kuasa vakuenu va tantekeye vifua vieni. Nga mu lingamo, mu ka tambuluisa lungano lua Yesu. (1 Pet. 2:21) Ngeci mua Yesu, mu ka vuisa Yehova ndzolela na ku muesa ngecize, Satana ua pua mukua makuli.

TUE KU KUASA KUOVOLA MIONO MU TUE KU SANGAZIALA LIZINA LIA YEHOVA

14-15. Vika vie kuizamo mu tue ku longesa vantu ku tuala hali Yehova?

¹⁴ Mu tue ku sangaziala lizina lia Yehova, tue ku kuasa kuovola miono ya vantu. Mu njila ika? Satana “na puputiyisa visinganieka via  vaze ka va tsiliela.” (2 Kol. 4:4) Ngeci ve ku tsiliela mu makuli a Satana ngeci mua: Njambi ka keleko, Njambi ua kala ku laako netu, ka tu hakele seho, ua pua cikenia kaha ue ku yandesa vakua ku linga via vipi ku miaka yose. Makuli aco eku pihisa lutsimo lua Yehova na lizina lieni, linga vantu kati va likuate vusamba neni. Vunoni mu tue kuambulula, Satana ke ku hasa ku puisamo vutumbe vueni. Mua vusunga, tue ku longesa vantu vusunga ku tuala hali Tatetu, mu ku sangaziala lizina lieni. Vika vie kuizamo?

¹⁵ Vusunga vua mu Lizi lia Njambi vua kala na ngolo ya kama. Mu tue ku longesa vusunga ku tuala hali Yehova, mue kuiza viuma via cili. Viuma vika? Satana ke ku hasa naua kuonga vantu, kaha ve ku putuka ku limuena vifua via cili via Yehova. Ngeci ve ku komoka vukama vua ngolo yeni. (Isaya 40:26) Kaha ve ku mu kulahela omo lia vuviuke vueni. (Ndeu. 32:4) Cikuavo naua, ve ku lilongesa via vingi ku mana a Yehova. (Isaya 55:9; Loma 11:33) Kaha ve kuivua ndzolela ku tantekeya nguavo Njambi ua pua cilemo. (1 Yoa. 4:8) Mu ve ku likuata vusamba na Yehova, ve ku kala na lulavelelo lua ku ka yoya miaka yose. Tua kala na civezikiso ca kama ca ku kuasa vantu va likuate vusamba na Yehova. Mu tue ku lingamo, Yehova ue ku tu mona ku pua “vakua ku panga hamo neni.”—1 Kol. 3:5, 9, NWT.

16. Vati miono ya vamo ya alulukile mu va tantekeyele lizina lia Njambi? Hanenu vimueso.

¹⁶ Ha katete, tu hasa ku longesa vantu lizina lia Njambi. Vusunga vuaco vu hasa kualulula miono ya vakua mitima ya cili. Ca ku muenako, umo muana mpuevo ua lizina Aaliyah b ua kolela mu vusoko vua kala mu vulombelo kati vua Vakua Kilistu. Vulombelo vueni ka vua mu vuisile ndzolela, kaha ka livuile mu hiehi na Njambi. Vunoni muono ueni ualulukile mua putukile ku lilongesa Mbimbiliya na Vakaleho va Yehova. Ua putukile ku mona Njambi ku pua kavusamba keni. Kaha ua komokele mua tantekeyele ngueni lizina lia Njambi va lifumisa mu viMbimbiliya via vingi na ku hingisamo vinkumbu ngeci mua, Muangana.  Ku tantekeya lizina lia Yehova ca aluluile muono ueni. Ua handekele ngueni: “Kavusamba kange ua kala na lizina!” Vika viezilemo? Ua vuezeleko naua ngueni: “Njili na ciyulo mu mutima uange. Kuli yange ca pua civezikiso ca kama.” Umo yala ua lizina Steve ua puile mukua kuimba ua ku cisemua ca vaYundeya. Ka tondele kuya mu vulombelo na vumo vuahi muomu ua limuenenene civembulu ca vantu. Vunoni mua tsisile vanaye, ua tavele ku lilongesa Mbimbiliya na Vakaleho va Yehova. Kaha ca mu kuatele cikuma ku mutima mua tantekeye lizina lia Njambi. Ivene ngueni: “Ka nja tantekeyele lizina lia Njambi.” Kaha naua ngueni: “Njevuisisile honi nguange Njambi kua kala mpundu! Kaha nja mu muene ku pua Muntu mpundu. Ku fuma haze vene, nja mu puisile Kavusamba.”

17. Omo lia vika tu tonda ku tualelelaho ku sangaziala lizina lia Yehova? (Talenu naua cikupulo.)

¹⁷ Vuno nga muli mu kuambulula na ku longesa, mue ku lekako vakuenu lizina lia ku lela lia Yehova ni? Mue ku va kuasa va limuene vifua via Njambi ni? Ku lingamo, mu ka sangaziala lizina lia Njambi. Tualelenuho ku sangaziala lizina lia ku lela lia Yehova mu ku kuasa vantu va Mu tantekeye mpundu. Nga mu lingamo, mu kovola miono yavo. Mu ka tambuluisa Muangana uenu, Kilistu Yesu. Cikumakuma, mu ka vuisa ndzolela Tatetu, Yehova. Ngeci mukemuo, sangazialenu “lizina [lieni] ku miaka na miaka.”—Visa. 145:2.