1-2. Kuyini okungasinceda sizwisise indlela uJehova azizwa ngayo ngenxa yokungcoliswa kwebizo lakhe?

 UBUNGATHINI nxa ungezwa ukuthi umngane wakho ukhuluma kubi ngawe? Ufafaza amanga ngawe futhi abanye bayamkholwa. Labo bayawamemethekisa futhi abantu abanengi bayakukholwa abakutshoyo. Nxa ulendaba lokuthi lokho kuzabaphatha njani abantu futhi ungafuni bakubone kubi amanga la angakwenza udane kakhulu.—Zaga. 22:1.

² Umzekeliso lo ungasinceda sizwisise ukuthi uJehova wezwa njani ngesikhathi ibizo lakhe lingcoliswa. Enye indodana yakhe eyayisezulwini yatshela owesifazana wokuqala u-Eva amanga ngaye. U-Eva wawakholwa amanga lawo njalo enza ukuthi abazali bethu bahlamukele uJehova. Lokhu kwenza kwaba lesono lokufa ebantwini. (Gen. 3:​1-6; Rom. 5:12) Konke okubi esikubonayo emhlabeni okugoqela ukufa, izimpi kanye lokuhlupheka kukhona ngenxa yamanga aqanjwa nguSathane ensimini yase-Edeni. UJehova uzwa njani ngamanga la kanye lenhlupho eseziwalethile? Akuthandabuzwa ukuthi uzwa ubuhlungu kakhulu. Lanxa kunjalo uJehova kahlali ezondile kodwa uqhubeka ‘enguNkulunkulu othokozayo.’—1 Thim. 1:11.

3. Yisiphi isibusiso esilaso?

³ Silesibusiso sokuncedisa endabeni yokulwelwa kwebizo likaJehova. Singancedisa ngokulalela umlayo lo othi: “Dumisani ibizo likaJehova.” (Hubo. 113:1) Sidumisa ibizo likaJehova elingcwele ngokutshela abanye iqiniso ngaye. Wena uyalidumisa yini ibizo lakhe? Asixoxeni ngezinto ezintathu ezizasinceda ukuthi sidumise ibizo likaNkulunkulu wethu ngenhliziyo yonke.

UJEHOVA UYATHOKOZA NXA SIDUMISA IBIZO LAKHE

4. Kungani uJehova ethokoza nxa simdumisa? Nika umzekeliso. (Khangela lomfanekiso.)

⁴ UBaba wethu osezulwini uyathokoza nxa sidumisa ibizo lakhe. (Hubo. 69:​30, 31) Manje lokhu sekusitsho ukuthi uNkulunkulu  uSomandla ufanana labantu abalesono yini abafuna ukunconywa ngoba kubenza bathokoze? Hatshi. Nanku umzekeliso ongasinceda sikuzwisise. Inkazana encane iyagijima iye kuyise ifike imgone ibisisithi kuye: “Ngiyakuthanda kakhulu baba, uhlala ungenzela izinto ezinhle.” Lokhu kuyamthokozisa kakhulu ubaba lo. Ngenxa yani? Kayisikho ukuthi uyabe evele ekulindele ngabomvu ukunconywa yindodakazi yakhe kumbe ukuthi imkhuthaze ukuthi enze umsebenzi wakhe. Kodwa okwenza athokoze yikubona indodakazi yakhe itshengisa ukuthi iyamthanda lokuthi iyabonga ngalokho ayenzela khona. Uyakwazi lokuthi nxa indodakazi yakhe ilobuntu obunjalo izakhula ithokoza. Ngakho uJehova uBaba wethu osezulwini laye uyathokoza nxa esibona simdumisa.

5. Nxa sidumisa ibizo likaNkulunkulu yiwaphi amanye amanga kaSathane esiyabe siwaveza egcekeni?

⁵ Nxa sidumisa uBaba wethu osezulwini siyabe sincedisa ukutshengisa ukuthi okwakhulunywa nguSathane mayelana lathi kungamanga. USathane wathi akulamuntu ongahlala eqotho futhi evikela ibizo likaJehova sonke isikhathi. Uthi nxa singehlelwa yizilingo ngeke siqhubeke sithembekile kuNkulunkulu. Uphinda athi sonke singamtshiya uNkulunkulu nxa singabona kulenye into esingayithola ngokwenza njalo. (Job 1:​9-11; 2:4) Kodwa uJobe waqhubeka ethembekile watshengisa ukuthi uSathane ulamanga. Wena uzaqhubeka uthembekile yini? Sonke silesibusiso sokutshengisa ukuthi siqotho ngokulwela ibizo likaBaba wethu futhi simthokozise ngokuqhubeka sithembekile. (Zaga. 27:11) Kuyisibusiso esikhulu ukwenza lokhu.

6. Singayilingisela njani iNkosi uDavida kanye lamaLevi? (UNehemiya 9:5)

⁶ Abantu abathanda uJehova badumisa ibizo lakhe ngenhliziyo yonke. INkosi uDavida yabhala yathi: “Ngizamdumisa uJehova, ngizalidumisa ngenhliziyo yonke ibizo lakhe elingcwele.” (Hubo. 103:1) UDavida wayekwazi ukuthi ukudumisa ibizo likaJehova kufanana lokudumisa yena ngokwakhe. Nxa sisizwa ngebizo likaJehova sihle sicabange ngobuntu bakhe obuhle kanye lazo zonke izinto ezimangalisayo asezenzile. UDavida wayebona ibizo likaJehova lingcwele futhi wayefuna ukulidumisa. Wayefuna ukwenza lokhu “ngenhliziyo yonke.” AmaLevi lawo ayekhokhela ekudumiseni uJehova. Kodwa ayezithoba evuma ukuthi awakho amazwi ayengachaza kuhle udumo okufanele luphiwe ibizo likaJehova elingcwele. (Bala uNehemiya 9:5.) Akuthandabuzwa ukuthi uJehova wayethokoza kakhulu nxa wayewabona emdumisa ngenhliziyo yonke.

7. Singamdumisa njani uJehova ekutshumayeleni lasempilweni yethu yansuku zonke?

 ⁷ Lathi lamuhla singathokozisa uJehova ngokukhuluma ngaye ngendlela etshengisa ukuthi siyambonga ngakho konke asenzela khona kanye langendlela etshengisa ukuthi siyamthanda kakhulu. Nxa sisekutshumayeleni kumele sihlale sikhumbula ukuthi esikufuna kakhulu yikuncedisa abantu ukuthi basondele kuJehova lokuthi bamthande ngendlela thina esimthanda ngayo. (Jak. 4:8) Kuyasithokozisa ukutshengisa abantu ukuthi uJehova unjani. Ngokwesibonelo ukuthi ulothando, wahlulela kuhle, uhlakaniphile, ulamandla kanye lobunye ubuntu bakhe obuhle. Kanti njalo sidumisa uJehova futhi simthokozise nxa sisenza konke okusemandleni ethu ukuthi simlingisele. (Efe. 5:1) Nxa singenza njalo siyabe sitshengisa ukuthi asifanani ngitsho labantu bomhlaba lo abenza okubi. Abantu bangawubona umehluko lo besebezibuza ukuthi kuyini okwenza singafanani labanye. (Mat. 5:​14-16) Nxa sihlangana labo singathola ithuba lokuthi sibachasisele ukuthi kuyini okwenza siziphathe ngendlela esiziphatha ngayo. Lokhu kwenza abantu abaqotho bafune ukusondela kuNkulunkulu wethu. Nxa sidumisa uJehova ngezindlela lezi siyabe sisenza ukuthi athokoze.—1 Thim. 2:​3, 4.

UJESU UYATHOKOZA NXA SIDUMISA IBIZO LIKAJEHOVA

8. UJesu watshengisa njani ukuthi wayekuqakathekisa ukudumisa ibizo likaJehova?

⁸ UJesu umazi kuhle kakhulu uJehova ukwedlula loba ngubani ezulwini lasemhlabeni. (Mat. 11:27) Uyamthanda uYise njalo ubelokhu ekhokhela ekudumiseni ibizo lakhe. (Joh. 14:31) Ngobusuku abotshwa ngabo ezavuka ebulawa, wathandaza kuYise wasefinqa inkonzo ayeyenze emhlabeni wathi: “Sengenze balazi ibizo lakho.” (Joh. 17:26) Wayesitshoni?

9. Yiwuphi umzekeliso owasetshenziswa nguJesu ukuze acacisele abantu ukuthi uYise unjani?

⁹ UJesu wayengaphonguhamba etshela abantu ukuthi ibizo likaNkulunkulu nguJehova. Phela amaJuda ayewafundisa ayevele elazi ibizo likaNkulunkulu. Yikho uJesu wenza umsebenzi oqakathekileyo ‘wokuchasisela’ abantu ngoYise. (Joh. 1:​17, 18) Ngokwesibonelo, iMibhalo yesiHebheru iveza ukuthi uJehova ulesihawu lozwelo. (Eks. 34:​5-7) UJesu wakucacisa kuhle lokhu ngesikhathi elandisa umzekeliso wendodana yolahleko. Endabeni le ubaba wathi ebona indodana yakhe eyayisiphendukile ‘isesekhatshana,’ wayigijimela wafika wayigona waseyithethelela ngenhliziyo yonke. Lokhu kwenza sibone ngendlela ecacileyo ukuthi uJehova ulozwelo. (Luk. 15:​11-32) UJesu wancedisa abantu ukuthi bazwisise ukuthi uYise unjani sibili.

10. (a) Sikwazi njani ukuthi uJesu wayelisebenzisa ibizo likaYise lokuthi wayefuna labanye balisebenzise? (UMakho 5:19) (Khangela lomfanekiso.) (b) UJesu ufuna senzeni lamuhla?

¹⁰ UJesu wayefuna yini ukuthi abanye balisebenzise ibizo likaYise? Ye wayefuna sibili. Kodwa ngalesosikhathi abanye abakhokheli benkolo bangabe babekholwa ukuthi ibizo likaNkulunkulu lingcwele kakhulu okokuthi kwakungamelanga likhulunywe ngabantu. Lanxa kunjalo uJesu kazange avume ukuthi imicabango le eyayingasekelwanga eLizwini likaNkulunkulu imvimbe ukuthi adumise ibizo likaYise. Ngokwesibonelo, wathi ekhiphe enye indoda amadimoni esabelweni samaGerasini, abantu besaba basebemncenga ukuthi asuke. UJesu wasuka esabelweni sabo. (Mak. 5:​16, 17) Lanxa kunjalo wayefuna ibizo likaJehova laziwe endaweni leyo. Yikho watshela indoda ayeyikhiphe amadimoni ukuthi itshele abantu lokho uJehova ayeyenzele khona, hatshi yena ayekwenzile.  (Bala uMakho 5:19.) a Lokho yikho afuna lathi sikwenze lamuhla. Ufuna senze ibizo likaYise laziwe emhlabeni wonke. (Mat. 24:14; 28:​19, 20) Nxa singenza njalo siyabe siyithokozisa iNkosi yethu uJesu.

11. UJesu wafundisa abalandeli bakhe ukuthi bathandazeleni futhi kuqakatheke ngani lokho? (UHezekheli 36:23)

¹¹ UJesu wayekwazi ukuthi inhloso kaJehova yayingeyokuthi angcwelise ibizo lakhe, abe leqiniso lokuthi wonke amanga akhulunywa ngoJehova ayavezwa egcekeni. Yikho wafundisa abalandeli bakhe ukuthi bathandaze bathi: “Baba wethu osezulwini, kalingcweliswe ibizo lakho.” (Mat. 6:9) UJesu wayekuzwisisa ukuthi indaba yokungcweliswa kwebizo likaJehova yiyo eqakatheke ukwedlula zonke ezulwini lasemhlabeni. (Bala uHezekheli 36:23.) UJesu wenze umsebenzi omkhulu kakhulu wokungcwelisa ibizo likaJehova ukwedlula loba ngubani ezulwini lasemhlabeni. Kodwa wathi esebotshiwe izitha zakhe zammangalela ngokuthi uthuka uNkulunkulu. UJesu wayekwazi mhlophe ukuthi ukungcolisa ibizo likaYise elingcwele lokukhuluma kubi ngaye kwakuyisono esikhulu kakhulu. Yikho engakabotshwa kwakumkhathaza kakhulu ukuthi wayezamangalelwa ngokuthi uthuke ibizo likaNkulunkulu. Lokhu yikho okungabe kwenza uJesu ‘wezwa ubuhlungu obukhulu’ ngesikhathi esezabotshwa.—Luk. 22:​41-44.

12. UJesu walingcwelisa njani ibizo likaYise ngendlela enkulu?

¹² UJesu wabekezelela ukuhlukuluzwa lokuthethiswa lokuqanjelwa amanga ngoba wayefuna ukungcwelisa ibizo likaYise. Wayekwazi ukuthi wayelalele uYise kukho konke lokuthi wayengenzanga lutho olungangcolisa ibizo likaYise. (Heb. 12:2) Wayekwazi lokuthi uSathane wayesethole ithuba lokuthi amhlasele ngesikhathi leso esasinzima. (Luk. 22:​2-4; 23:​33, 34) USathane wayefuna ukuthi uJesu angabi qotho kuNkulunkulu kodwa wehluleka. UJesu wakwenza kwacaca ukuthi uSathane ungusomangase lokuthi uJehova ulazo izinceku zakhe ezithembekileyo eziqhubeka ziqotho lanxa zisehlelwa yibunzima obukhulu.

13. Ungayithokozisa njani iNkosi yakho uJesu?

¹³ Uyafuna yini ukuthokozisa iNkosi yakho uJesu? Qhubeka udumisa ibizo likaJehova  uncedise abantu ukuthi bamazi kuhle uNkulunkulu wethu. Nxa ungenza njalo uyabe uwalandela amanyathelo kaJesu. (1 Phet. 2:21) Uyabe uthokozisa uJehova futhi utshengisa ukuthi isitha sakhe uSathane silamanga aluhlaza tshoko!

SINCEDISA ABANTU UKUTHI BATHOLE UKUPHILA NXA SIDUMISA IBIZO LIKAJEHOVA

14-15. Kuyini okuhle okwenzakalayo nxa sifundisa abantu ngoJehova?

¹⁴ Enye indlela esidumisa ngayo ibizo likaJehova yikuncedisa abantu ukuthi bathole ukuphila. Phela uSathane ‘uvale ingqondo zabantu abangakholwayo ukuthi bangaboni.’ (2 Khor. 4:4) Lokhu yikho okwenza abantu bakholwe amanga akhe anjengalawa: uNkulunkulu kakho, uNkulunkulu ukhatshana kakhulu futhi kalandaba labantu, uNkulunkulu ulomoya omubi futhi uhlukuluza abantu abenza okubi kuze kube nini lanini. Wonke amanga la angcolisa ibizo likaJehova futhi enza abantu bacabange okungayisikho bacine bengasafuni ukusondela eduze kwakhe. Kodwa umsebenzi wethu wokutshumayela wenza amanga kaSathane avele egcekeni. Sifundisa iqiniso ngoBaba wethu futhi sidumisa ibizo lakhe elingcwele. Kunceda ngani lokho?

¹⁵ Iqiniso eliseLizwini likaNkulunkulu lilamandla kakhulu. Nxa sifundisa abantu ngoJehova futhi sibatshela ukuthi yena unjani kuba lempumela emihle kakhulu. Kancane kancane abantu bayawabona amanga kaSathane besebephuma ebumnyameni, baqalise ukubona uBaba wethu esimthandayo ngendlela esimbona ngayo. Bayamangala kakhulu nxa besizwa ngamandla akhe amakhulu. (Isaya. 40:26) Bayafunda ukumthemba ngoba bayabona ukuthi wahlulela kuhle futhi ulungile. (Dute. 32:4) Bafunda okunengi ngokuhlakanipha kwakhe okukhulu. (Isaya. 55:9; Rom. 11:33) Kanti njalo kuyabaduduza ukufunda ukuthi uNkulunkulu uluthando. (1 Joh. 4:8) Nxa beqhubeka besondela kuJehova basuka bangathandabuzi ukuthi bazaphila phakade futhi babe ngabantwana bakaNkulunkulu. Silesibusiso esikhulu sibili sokuncedisa abantu ukuthi basondele kuBaba wabo osezulwini. Nxa sisenza njalo siyabe “sisebenza loNkulunkulu.”—1 Khor. 3:​5, 9.

16. Kwenzakalani nxa abantu befunda ngebizo likaNkulunkulu? Nika izibonelo.

 ¹⁶ Nxa sihlangana lomuntu singaqalisa ngokumfundisa ukuthi ibizo likaNkulunkulu nguJehova. Lokhu kungayitshintsha impilo yomuntu oyabe efuna ukumazi uNkulunkulu. Ngokwesibonelo, omunye owesifazana okuthiwa ngu-Aaliyah b wakhula engena isonto eyayingafundisi izinto ezivela eBhayibhilini. Wayengasuthiseki ngezinto ezazifundiswa esontweni yakhe futhi kwakunzima ukuthi asondele kuNkulunkulu. Kodwa wathi esefundiswa ngoFakazi bakaJehova waqalisa ukusondela kuNkulunkulu, waba ngumngane wakhe. Kwammangalisa ukwazi ukuthi ibizo likaNkulunkulu lakhitshwa emaBhayibhilini amanengi kwafakwa amabizo okuhlonipha anjengelithi Nkosi. Wathi: “Umngane wami omkhulu uNkulunkulu ulebizo.” Kwamnceda ngani ukwazi ibizo likaNkulunkulu? Kwayitshintsha impilo yakhe. Uthi: “Khathesi sengihlalisekile. Ngibusisiwe kakhulu ngokwazi ibizo likaNkulunkulu.” Kanti njalo kulenye indoda okuthiwa nguSteve eyayingumhlabeleli futhi eyayilandela amasiko amaJuda. Yayingasafuni kuzwa ngamasonto ngoba yayibone ukuthi abanengi babengakwenzi lokho abakufundisayo. Kodwa uSteve wathi efelwe ngunina wabuya wazolalela ngesikhathi oFakazi bakaJehova befunda iBhayibhili lomunye umuntu. Kwamthinta kakhulu ukufunda ngebizo likaNkulunkulu. Uthi: “Ngangingakaze ngilizwe ibizo likaNkulunkulu.” Uphinda athi: “Kwakungokokuqala empilweni yami ukuzwisisa ukuthi uNkulunkulu ukhona lokuthi unjani. Ngahle ngabakwazi ukuthi sengimtholile umngane.”

17. Kungani uzimisele ukuqhubeka udumisa ibizo likaJehova? (Khangela lomfanekiso.)

¹⁷ Uyabatshela yini abantu ibizo elingcwele elithi Jehova nxa ubatshumayeza futhi ubafundisa? Uyabancedisa yini ukuthi bakwazi ukuthi uNkulunkulu unjani sibili? Nxa usenza njalo uyabe udumisa ibizo likaNkulunkulu. Kwangathi ungaqhubeka udumisa ibizo likaJehova elingcwele ngokusiza abantu bakwazi ukuthi unjani. Nxa ungenza njalo uzanceda abantu ukuthi basinde. Kanti njalo uyabe ulandela lokho okwakusenziwa yiNkosi yakho uJesu. Okuqakatheke kakhulu yikuthi uzathokozisa uYihlo okuthandayo uJehova. Kwangathi ‘ungadumisa ibizo lakhe kuze kube nini lanini’!—Hubo. 145:2.