1-2. Ngozvapi zvinotibesera kuzwisisa manera Jehovha akajizwa pakapera kundha-ndhaniswa manyepo ngo pamusoro pake?

 AMBORANGARIRANYI izvi basi: Mundhu wamunodakarira maningi angabhuya zviro zvakashata ngo pamusoro penyu. Asi imwimwi munozviziva kuti izvo ngo zvokunyepa. Asi vandhu vamweni vangazvitenda. Zvinozonyanyisa ngo zvokuti vandhu ava vanofamba vecindha-ndhanisa manyepo aya, zvoita kuti vamweni vamatendevo. Imwimwi maizojizwa kudini? Zvingaita kuti vandhu ava vanosisira maningi kwamuri, cimwenizve imwimwi munoreremeja mufambiro wenyu, ngo kudaro, amucaizojizwepi ushoni ngo pamusoro po zviro izvi, andizvopi?—Mazwi Akangwara 22:1.

² Mugariro uwu unotibesera kuzwisisa manera Jehovha akajizwa paya pokuti zviro zvaainga akabhuya zvakazwi ngo zvokunyepa. Imwe yo ngirozi jake yakabhuya manyepo mu munda wo Edheni kuno mwanakaji Evha. Iyena wakatenda manyepo aya. Ngo ndava yo manyepo aya, vabari vedu vokutanga vakapandukira Jehovha. Muviyo wakona wakava wokuti cishaishi no rufu zvakapararira ku vandhu vese. (Genesi 3:​1-6; Varoma 5:12) Zvineso zvese zvatiri kuvonari mu nyika ino nyamasi uno, zvakadari inga kufa, hondo no matambujiko amweni, zvakavepo ngo ndava yo manyepo akabhuiwa ndi Sathana mu munda wo Edheni. Jehovha anojizwa kudini paanovona zvese zviri kuitikari ngo ndava yo manyepo aya? Kunasa kunanga izvi zvinomuhwaja maningi. Pikija zvakadaro, Jehovha aazivi kuva no hasha nee kuviga bundu. Kunasa kunanga Jehovha ari kuenderera mberi ari “Mwari wakadakara.”—1 Timoti 1:11.

3. Mukana japi jatinajo?

³ Itusu tino mukana wokukhombija kuti Sathana zvaakabhuya ngo pamusoro po zina ra Jehovha ngo zvokunyepa. Bhaibheri rinotivhunja kuti: ‘Kujanyi zina ra Jehovha.’ (Nduyo 113:1) Tinozokuja zina ra Jehovha kudari tikabhuya zvaushoni ngo pamusoro pake kuno vandhu. Imwimwi makanasiririka kuti muite izvi?  Ngatende tivone zviro zvitatu zvinozotibesera kuti tikuje zina ra Jehovha ngo mwoyo wese.

JEHOVHA ANODAKARA PATINOKUJA ZINA RAKE

4. Ngenyi Jehovha anodakara patinomukuja? Ezanisanyi. (Vonanyi foto.)

⁴ Baba vedu vokudenga vanodakara maningi patinokuja zina ravo. (Nduyo 119:108) Kureva kuti Mwari wo masimba ese wakaezana no vandhu vacizivi kukwana vanoda kuti vamweni vavasimbe ngokuti ivona vanoda vangiso? Haiwa. Vonanyi muezaniso uwu basi. Cimusikane cinokumbatira baba waco ngo njira yo rudo conanga kudari: “Imwimwi muri baba vanosisira maningi kupinda ari wese.” Babevo vanodakara maningi nokutoshamaisika ngo zviro zviri kubhuiwa ngo mwana wavo. Ngenyi? Kureva kuti tingatonanga kuti baba ava ndi baba vakangwariririka, vanotothemba no kudakarira kusimbhwa ngo mwana wavo? Haiwa. Mukusiyana, ivona vanozviziva kuti ndi baba vaushoni, asi vanodakara maningi pavanovona mwana wavo ecikhombija rudo no kubongesera. Ivona vanoziva kuti mugariro iji ngo jaushoni kuitira kuti iyena ave akadakara mu upenyu hwake. Ngo njira yakaezana, Jehovha Baba wedu vokudenga vanodakara maningi patinokuja zina ravo.

5. Patinokuja Jehovha ngozvapi zvatinobesera kuvonesa pambhene?

⁵ Patinokuja Jehovha tinokhombija kuti Sathana wakanyepa ngo pamusoro pedu. Kuitisa kudini? Iyena wakananga kuti apana na umwe anozokwanisa kwenderera mberi akagondeka ecikuja zina ra Jehovha. Iyena wakanangazve kuti apana mundhu angazoenderera mberi akagondeka kuna Jehovha paanoejwa. Sathana wakananga kuti itusu tese tingazopandukira Jehovha kudari ari wese akatipa ciro cinosisira maningi. (Jobe 1:​9-11; 2:4) Asi mugondeki Jobe wakavonesa pambhene kuti Sathana wakanyepa. Tingati kudini na itusuvo? Umwe na umwe wedu nyamasi ano mukana wokukhombija besero rokadi ku zina ra Jehovha nokumushandira naakagondeka. (Mazwi Akangwara 27:11) Patinoita kudaro tinokhombija kuti tiri kukuja zina rake.

6. Tingatevejeresa kudini muezaniso wa Mambo Dhavhidhi no Varevhi? (Neemia 9:5)

⁶ Kuda Jehovha kunoita kuti vandhu vakagondeka vade kukuja zina rake ngo mwoyo wese. Mambo Dhavhidhi wakatara kudari: “Mwiha wangu komborerai Tenji Mwari, bzese bziri mukati mangu bzikomborere zina rake rakacena.” (Nduyo 103:1) Dhavhidhi wakazwisisa kuti kukuja zina ra Jehovha i kukujavo Jehovha. Zina ra Jehovha rinobatanija zvaanoita nokuticeukija mugariro jake jaushoni no zviro zvinoshamaisa zvaanoita. Dhavhidhi waida kukuja zina ra Babake ngokuti ivona vakacena. Iyena waida kuita izvi mu ‘zvese zvainga mukati  make’ izvi zvinoreva ngo mwoyo wese. Ngo njira yakaezana, Varevhi vakatungamirira mu njira yokukuja Jehovha. Ivona nokujidodokesa kwese, vakatendera kuti magama avo narini aacaizorerusepi kukujwa ko zina ra Jehovha rakacena. (Verenganyi Neemia 9:5.) Pacina kukana-kana, kujidodokesa uku kakadajisa maningi mwoyo wa Jehovha.

7. Tingakujisa kudini zina ra Jehovha mu basa ro kucumaera no njiku no njiku?

⁷ Itusuvo nyamasi uno, tingakhombija kukuja Jehovha ngo kubhuya naye ngo njira yaushoni, yo rudo no yokubongesera. Patinonga tiri mu basa rokucumaera cinangwa cedu ngocokuti vandhu vaviye kuna Jehovha nokuvabesera kuti vavone kuti Jehovha ndi Baba vano rudo. (Jakobo 4:8) Kwatiri i cidakajiso cikuru kukhombija vandhu kuvhira mu Bhaibheri kuti Jehovha ndi Baba vano rudo, vakarungama, vano uzivi, simba nokutizve iyena anomugariro jimweni jinoshamaisa. Njira imweni yokukuja Jehovha no kumudakajisa, ngo yokumutevejera patinonga tecimushandira. (Vaefeso 5:1) Patinoita kudaro, tinonga takaparajana no nyika ino yakashata. Ngo kudaro, vandhu vanozovona kuti itusu takasiyana no vazinji nokutojivhunjisa kuti ngenyi. (Mateu 5:​14-16) Patinonga tecipona navo njiku no njiku tinozokwanisa kuvasanangurira kuti ngenyi takasiyana no vamweni. Inga muviyo, vandhu vamweni vanozobatikana pakujijira zvizinji ngo pamusoro pa Jehovha. Patinokuja Jehovha ngo njira iyi, iyena anozodakara maningi.—1 Timoti 2:​3, 4.

PATINOKUJA ZINA RA JEHOVHA TINODAKAJISA JESU

8. Jesu wakakhombijisa kudini kutangisa kukuja zina ra Jehovha?

⁸ Kuzvisikwa zvese zviri mudenga no pasi, Mwana ndiyena anonasa kuziva maningi Baba kupinda zvisikwa zvese. (Mateu 11:27) Jesu anoda Baba wake, iyena anoita zvese kuti akwanise kukuja zina ra Baba wake. (Johani 14:31) Pamukumbiro wake waakaita kuna Jehovha pa usiku acito afa, iyena wakagurisira basa raakaita pa nyika ngo kunanga kudari: “Ndakavazivisa zina renyu.” (Johani 17:26) Iyena waida kurevenyi?

9. Muezaniso wapi wakashandiswa ndi Jesu kuitira kutibesera kuzwisisa kuti Jehovha wakadini?

⁹ Jesu wakaita zvizinji kupinda basi kuvhunja vandhu kuti zina ra Mwari ndi Jehovha. Vajudha vaibhuyaya na Jesu vainga vozviziva kuti zina ra Mwari ndiani. Jesu ndiyena wakatangisa ‘kudurujira kuti Mwari ndiyani.’ (Johani 1:​17, 18) Inga muezaniso, Matahwa o Cihebheru anonanga kuti Mwari anounyasha no usizi. (Exodo 34:​5-7) Jesu wakanasa kujekesa cokwadi ici paakabhuya ngo muezaniso wo mwana mupanduki na baba wake. Patinoverenga ngo pamusoro pa baba vecivona mwana wavo wakhauya “paainga aciri ndhambo” vecigogoma kwenda kosongana naye vomukumbatira no kumuregerera ngo mwoyo wese, apa tinokwanisa kuvona muezaniso wo unyasha no usizi hwa Jehovha. (Ruka 15:​11-32) Jesu wakasanangura Baba wake manera Avakaita.

10. (a) Tinozvizivisa kudini kuti Jesu waishandisa zina ra Baba wake nokuitazve kuti vamweni vaitevo zvakafanana? (Marko 5:19) (Vonanyi foto.) (b) Jesu anoda kuti tiitenyi nyamasi uno?

¹⁰ Kureva kuti Jesu waida kuti vamweni vashandisevo zina ra Baba wake? Zvakajeka kuti hina. Vatungamiriri vamweni vo zviara vaivona kuti ikutama nderemejo kunanga zina ra Jehovha. Jesu aazivi kusiya kuti cirovejeso ici cicizivi wari kucijikira mu Matahwa cimuite kuti asiye kukuja Baba wake. Pavhaza imweni, Jesu wakarapa mwanarume umweni wainga no madhimoni waigara ku mutundhu wo Gerazeri. Vandhu vo kondhoyo vakathya maningi Jesu vomuvhunja kuti abude mu mutundhu mavo. (Marko 5:​16, 17) Pikija zvadakaro, Jesu waida kuti vandhu vokondhoyo vazive zina ra Jehovha.  Iyena wakavhunja mwanarume wiya waaingaya arapa kuti acavhunja vandhu kuti Jesu wainga amuitira zviri zvese asi Jehovha ndiyena wainga amuitira. (Verenganyi Marko 5:19.)  aJesu aciri kuda kuti zina ra Baba wake rizivike pasi pese. (Mateu 24:14; 28:​19, 20) Patinoita zvese zvatinokwanisa pa divi iri tinoita kuti Mambo wedu Jesu adakare maningi.

11. Jesu wakavhunja vajiji vake kuti vakumbire ngo pamusoro penyi, nokutizve ngenyi zvondhozvo zvinosisira maningi? (Ezekieli 36:23)

¹¹ Jesu waiziva kuti cinangwa ca Jehovha cainga cokucenesa zina rake nokuricenesa mu zvese zvaaizonyepehwa. Ndirona thangwe rakamuitisa kuti ajijise vajiji vake kuti vaite mukumbiro veciti: “Baba wedu muri kumatenga, zina renyu ngariceneswe.” (Mateu 6:9) Jesu wakazwisisa kuti ici ndicona ciro caidikana kuithwa ngo zvisikwa zvese. (Verenganyi Ezekieli 36:23.) Apana no cisikwa cimwe haco cakaita zviro kupinda zvakaithwa ndi Jesu kuti acenese zina ra Jehovha. Jesu paakasungwa, ngozvapi zvaakapumbhwa ngo vavengi vake? Iyena wakapumbhwa kuti ndi mutuki. Kunasa kunanga Jesu waizviziva kuti kushaisha kushandisa zina ra Mwari kana kuti kunyepa cainga cishaishi cikuru. Iyena wakabararika hwiru ngo kuvhunjwa no kupumbhwa kuti wainga no ndava. Zvingaita kuti rainga thangwe guru rakaita kuti ‘iyena asuruvare maningi’ paakasungwaya.—Ruka 22:​41-44.

12. Jesu wakacenesesa kudini zina ra Baba wake pese pazvaikwanisika?

¹² Kuti akwanise kucenesa zina ra Baba wake, Jesu wakatambujwa, kutukwa no kupumbhwa manyepo. Iyena waiziva kuti wainga akazwira Baba wake mu zvese nokutizve wainga acina ciri cese caizomuita kuti anyowejeke. (Vahebheru 12:2) Iyena waiziva kuti Sathana waimuhwisa pa mukuvo jiya jokunesa. (Ruka 22:​2-4; 23:​33, 34) Sathana waida kuita zvese zvaaikwanisa kuti Jesu atame kuva akagondeka, asi iyena aazivi kuzvikwanisa! Jesu wakavonesa kuti Sathana ndi munyepi mukuru nokutizve Jehovha ano vashandiri vake vakagondeka vanoenderera mberi vecimushandira pikija vecihwisana no zvineso zvinonesa maningi.

13. Mungaitisa kudini kuti musiye Mambo wenyu Jesu akadakara?

¹³ Imwimwi munoda kusiya kuti Mambo wenyu Jesu ave akadakara? Endereranyi mberi  mecikuja zina ra Jehovha, mecibesera vamweni kuziva mugariro jinoshamaisa ja Mwari wedu. Pamunoita izvi, munonga mecitevejera Mambo wenyu Jesu Kristu. (1 Pedhru 2:21) Kudari inga ndi Jesu, muri kuitavo kuti Jehovha adakare no kuvonesa kuti muvengi Wake Sathana ndi munyepi wakashatisisa.

ITUSU TINOBESERA PAKUPONESA UPENYU PATINOKUJA ZINA RA JEHOVHA

14-15. I zviro zvapi zvinoshamaisa zvingaitika paya patinojijisa vandhu ngo pamusoro pa Jehovha?

¹⁴ Patinokuja zina ra Jehovha tinobesera pakuponesa upenyu. Kuitisa kudini? Sathana “wakapofumaja murangariro jo vandhu vacikatendi.” (2 Vakorinte 4:4) Ivona vanotendera manyepo a Sathana akadari inga aya: Mwari aako, Jehovha ari ndhambo na itusu, iyena aana basa no vandhu, Mwari wakashata nokutizve anotambuja vashaishi mbhera narini. Sathana anoverengesa manyepo aya ngokuti anoda kupfujura zina ra Jehovha nokuitisa kuti vandhu vatame kukhwedera phedo naye. Paya patinocumaera tinoitisa kuti Sathana atame kuita izvi. Itusu tinojijisa vandhu cokwadi ngo pamusoro pa Baba wedu no kukuja zina ra Baba wedu rakacena. Ngowapi muviyo?

¹⁵ Cokwadi co Soko ra Mwari cino simba guru. Patinojijisa vandhu ngo pamusoro pa Jehovha nokuvavhunja kuti iyena wakadini, tinokwanisa kuvona zviro zvinoshamaisa. Patinoita kudaro manyepo avanovhunjwaya ndi Sathana anotanga kupera, vovonavo Jehovha inga manera atinomuvona. Ivona vanoshamaisika maningi ngokuvona simba rake rakakura. (Isaia 40:26) Ivona vanojijira kumuthemba ngo ndava yokurungama kwake kwakakwana. (Deuteronòmio 32:4) Ivona vanojija maningi ngo ndava yokukura ko uzivi hwake. (Isaia 55:9; Varoma 11:33) Cimwenizve, ivona vanonyarajwa pavanojija kuti Mwari ndi rudo. (1 Johani 4:8) Pavanokhwedera phedo na Jehovha vetero yavo yo kurarama no kucingaperi inova yokadi. I cidakajiso cikuru maningi cokubesera vandhu kuti vakhwedere phedo na Baba wedu. Patinoita izvi, Jehovha anotivona inga tiri ‘kushanda pamwepo naye.’—1 Vakorinte 3:​5, 9.

16. Vandhu vangajizwa kudini pavanojija ngo pamusoro po zina ra Jehovha? Ipanyi muezaniso.

¹⁶ Kangaije ciro cokutanga catingajijisa vandhu  ngo cokuvavhunja kuti zina ra Mwari ndi Jehovha. Zvondhozvo basi zvinocinja upenyu hwo mundhu wiya anojidodokesa. Inga muezaniso, musikane umweni anodanijwa kuti Ariyah b wakakurira mu ciyara cokuti acicaijijesepi zvakacijikira mu Bhaibheri. Iyena aacaidakarepi ngo ndava yo zviro zvaaijijiswa mu ciara ici nee aacaijizwepi ari phedo na Mwari. Zvondhozvo zvakazocinja paakazotanga kujija no Zvapupu zva Jehovha. Iyena wakatanga kukhwedera phedo na Mwari inga shamwari yake. Iyena wakashamaisika maningi paakajija kuti zina ra Jehovha rainga rakavhiswa mu ma Bhaibheri amweni no kufakeiwa ngo mazina akadari inga Tenji. Kujija ngo pamusoro po zina ra Jehovha kwakacinja upenyu hwake. Iyena wakananga kudari: “Shamwari yangu yaushoni ino zina rimwe.” Ngowapi wakazova muviyo? Iyena wakati: “Inini wari ndinojizwa ndino runyararo hukuru mu mwoyo mangu nokutizve ndinojizwa ndecidiwa.” Mwanarume umweni anodanijwa kuti Stevhe wainga muimbi iyena wakakurira ku ciara co Cijudha cainga cakangwaririka. Iyena wakatamazve kuita divi ro ciara ici cakangwaririka ngokuti wainga avonemo ucengejeri. Asi pasure pokufa ka mai wake iyena wakatendera kujija Bhaibheri no umwe wo Zvapupu zva Jehovha. Paakajija ngo pamusoro po zina ra Jehovha zvakamupsasa maningi. Iyena wakati: “Cingozvo ndainga ndicizivi kumbojija ngo pamusoro po zina ra Mwari.” Iyena wakaengejera eciti: “Pandakatanga kujija ndakazwisisa kuti Mwari wakagondeka. Wari ndokwanisavo kukhwedera phedo na Mwari. Inini ndaimuvona inga Mundhu. Pa nguva yo ndhoyo ndakazwisisa kuti ndainga ndawana shamwari yokadi.”

17. Ngenyi imwimwi munoda kwenderera mberi mecikuja zina ra Jehovha? (Vonanyi foto.)

¹⁷ Mu basa renyu rokucumaera imwimwi munojijisa vandhu ngo pamusoro po zina ra Jehovha rakacena? Imwimwi munovabesera kuzwisisa mugariro jinoshamaisa jina Mwari? Ngokuita kwenyu kudaro munokuja zina ra Mwari. Endereranyi mberi mecikuja zina rakacena ra Jehovha no kubesera Vandhu kuti varizive. Ngo njira iyi tinozokwanisa kuponesa upenyu. Imwimwi munozotevejera muezaniso wa Mambo wedu Jesu Kristu. Panyezuru pazvo, munozosiya Baba wedu Jehovha vakadakara. Endereranyi mberi ‘mecikuja zina ra Jehovha mbhera narini.’—Nduyo 145:2.