1-2. Oshike tashi vulu oku tu kwathela tu uve ko nkene Jehova ha kala e uvitile okushekwa kwedhina lye?

 DHILADHILA ando omuntu gumwe ngoka wu na ko nasha naye ta popi sha oshinyanyalithi kombinga yoye. Owu shi kutya shoka ta popi iifundja; ihe nando ongawo, yalwe oye shi itaale. Shono oshiwinayi noonkondo, osho kutya oya tameke okweendulula iifundja mbyoka, nayalwe oyendji oye yi itaale wo. Oto ka kala wu uvite ngiini? Ngele owu na ko nasha naantu noino hala edhina lyoye li nyatekwe, iifundja mbyoka otayi ke ku uvitha nayi. — Omayel. 22:1.

² Onkalo ndjoka otayi vulu oku tu kwathela tu uve ko nkene Jehova ha kala e uvite, uuna edhina lye tali nyatekwa. Gumwe gwomoyanamati yopambepo okwa li a popi iifundja kombinga ye, ta lombwele omukiintu gwotango, Eva. Eva okwa itaale iifundja mbyoka. Iifundja mbyoka oya ningitha aavali yetu yotango ya tukululile Jehova oshipotha. Oshizemo, uulunde neso oye ya maantu ayehe. (Gen. 3:1-6; Rom. 5:12) Omaupyakadhi agehe ngoka tu wete muuyuni kunena, ngaashi eso, iita, okumona iihuna, oge ya po molwiifundja mbyoka Satana a li a tameke okutaandelitha moshikunino shaEden. Mbela Jehova oha kala e uvitile nayi iifundja mbyoka niilanduliko yayo? Osho naanaa. Ihe nonando ongawo, iha kala a kenyanana, nenge a kwatela aantu onkone. Ihe oku li “Kalunga omunyanyukwi.” — 1 Tim. 1:11.

3. Uuthembahenda wuni tu na?

³ Otu na uuthembahenda wokuyukipalitha edhina lyaJehova, mokuvulika kelombwelo lye ndyoka tali ti: “Simanekeni edhina lye!” (Eps. 113:1) Shoka ohatu shi ningi mokupopila muuwanawa Ngoka e lilwe po kedhina ndyoka eyapuki. Mbela oto ka tanga ngaa edhina lyaJehova? Natu ka taleni komatompelo gatatu omawanawa ngoka tage ke tu kwathela tu tange edhina lyaKalunga ketu tashi zi komutima.

 OHATU NYANYUDHA JEHOVA, UUNA TATU SIMANEKE EDHINA LYE

4. Omolwashike okusimaneka kwetu Jehova haku mu nyanyudha? Shi yelitha. (Tala wo ethano.)

⁴ Ohatu nyanyudha Tate yetu gwomegulu, uuna tatu simaneke edhina lye. (Eps. 119:108) Ihe mbela shoka otashi ti kutya Kalunga omunankondo adhihe okwa fa aantu inaaya gwanenena, mboka haya kala owala ya hala okusimanekwa, omolwokwiihola mwene? Hasho nando. Natu taleni kethaneko tali landula. Natu tye andola okanona kokakadhona oka papatele he e taka ti: “Tate ongoye owala dhingi muuyuni awuhe!” He okwa imemeha a nyanyukwa. Omolwashike mbela? Mbela shono otashi ti kutya he okwa hala owala okusimanekwa kokamwana omolwiikala ye yokwiihola mwene? Hasho nando! Pehala lyaashono, ye oku li tate omwaanawa nokwa pandula sho e wete okamwanakadhona ke mu hole noke mu pandula. Oku shi kutya omaukwatya ngoka otage ka kwathele ka kale omuntu omunyanyukwi, nuuna ka koko. Sha faathana, Tate yetu omunenenene, Jehova, naye oha kala a nyanyukwa sho tatu mu simaneke.

5. Iifundja yini hatu aneke pomutenya, uuna tatu simaneke edhina lyaKalunga?

⁵ Uuna tatu tanga Tate yetu gwomegulu, ohashi tu kwathele tu ulike kutya shoka Satana a popya kombinga yetu, iifundja. Satana okwa ti kutya kapu na omuntu ta kala omudhiginini mokupopila edhina lyaKalunga. Okwa ti kutya kapu na gumwe ta ka kala omudhiginini kuKalunga, uuna ta makelwa. Okwa ti wo kutya atuheni otatu ka etha po okulongela Kalunga, ngele ihatu mono uuwanawa washa. (Job 1:9-11; 2:4) Ihe omulumentu omudhiginini, Job, okwa li a ulike kutya Satana omufundja. Ongiini kombinga yoye? Kehe gumwe gwomutse ota vulu okukala omudhiginini mokupopila edhina lyaTate yetu nosho wo oku mu nyanyudha, moku mu longela nuudhiginini. (Omayel. 27:11) Oshi li lela uuthembahenda oku shi ninga.

6. Ongiini tatu vulu okuholela omukwaniilwa David nosho wo Aalevi? (Nehemia 9:5)

⁶ Ohole yokuhola Kalunga ohayi inyengitha aantu aadhiginini ya simaneke edhina lye tashi zi komutima. Omukwaniilwa David okwa ti: “Hambelela Omuwa! Ashihe shi li mungame, nashi simaneke edhina lye eyapuki!” (Eps. 103:1) David okwa li e uvite ko kutya ngele ta simaneke edhina lyaJehova, nena oJehova mwene ta simaneke. Edhina lyaJehova olya kwatela mo ondondo ye, onkene ohali tu dhimbulukitha omaukwatya ge agehe omawanawa niilonga ye iikumithi. David okwa li a tala ko edhina lyaTate gwe li li eyapuki nokwa hala oku li simaneka. Okwa li a hala oku shi ninga ‘naashihe shoka shi li muye,’ ano tashi zi komutima. Sha faathana, Aalevi oya li ya kwatele komeho sho  taku simanekwa Jehova. Oya li ye shi zimina kutya edhina lyaJehova olya gwana okukala eyapuki. (Lesha Nehemia 9:5.) Osha yela kutya oku mu simaneka neifupipiko notashi zi komutima, ohashi nyanyudha omutima gwaJehova.

7. Ongiini tatu vulu okusimaneka Jehova miilonga yetu yokuuvitha nomonkalamwenyo yetu yakehe esiku?

⁷ Kunena, otatu vulu okunyanyudha Jehova mokupopya kombinga ye nohamu, nolupandu nonohole. Uuna tatu uvitha, ohatu dhimbulukwa elalakano lyetu lya simana kutya olyo okukwathela aantu ya hedhe kuJehova noku ya kwathela ya tale ko Tate yetu ngaashi tse. (Jak. 4:8) Otwa nyanyukwa okuulukila aantu nkene Ombiimbeli tayi popi Jehova, tayi ulike ohole ye, uuyuuki, uunongo, oonkondo nomaukwatya ge galwe omawanawa. Ohatu simaneke wo Jehova noku mu nyanyudha mokukambadhala oku mu holela. (Ef. 5:1) Uuna tatu shi ningi, otatu kala tu iwetikile mo muuyuni mbuka wa kolokosha. Aantu otashi vulika ye shi ndhindhilike mo kutya otwa yooloka ko kuyo notashi vulika ya ipule kutya omolwashike. (Mat. 5:14-16) Uuna tu li nayo, otatu vulu tu ya yelithile kutya omolwashike hatu ihumbata ngawo. Oshizemo, aantu aanamitima omiwanawa ohaya kala ye uvite kutya otaya hedha popepi naKalunga ketu. Uuna tatu simaneke Jehova momikalo ndhika, ohatu nyanyudha omutima gwe. — 1 Tim. 2:3, 4.

OHATU NYANYUDHA JESUS UUNA TATU SIMANEKE EDHINA LYAJEHOVA

8. Ongiini Jesus a li a tula po oshiholelwa shi na ko nasha nokusimaneka edhina lyaJehova?

⁸ Iishitwa ayihe iinandunge, megulu nokombanda yevi, kapu na nando oshimwe shi shi nawa Jehova shi vulithe Omwana. (Mat. 11:27) Jesus oku hole Tate gwe, nokwa tulila po yalwe oshiholelwa oshiwanawa mokusimaneka edhina lyaJehova. (Joh. 14:31) Ongulohi manga inaa sa, okwa galikana kuHe ta ngongo iilonga ye yokuuvitha kombanda yevi, ta ti: “Onde ya tseyithile edhina lyoye.” (Joh. 17:26) Mbela shoka okwa li e shi ningi ngiini?

9. Jesus okwa li a longitha eyele lini, a yelithe nawa kutya He omuntu a tya ngiini?

⁹ Jesus okwa li a ningi oshindji kaashi shi owala okulombwela aantu kutya edhina lyaKalunga oJehova. Aajuda mboka Jesus a li a longo edhina lyaKalunga oya li ye li shi nale. Ihe Jesus okwa li a tula po oshiholelwa ngele tashi ya poku “mu holola.” (Joh. 1:17, 18) Pashiholelwa, Omanyolo gOshihebeli oga popya kutya Jehova omunahenda nomunalukeno. (Eks. 34:5-7) Jesus oshili ndjoka okwe yi yelitha nawa, sho a hokolola eyele lyomumati a kanene nosho wo he. Uuna tatu lesha kombinga yahe, ngoka a mono omwana “manga a li kokule” e ta matuka e ke mu tsakaneke, te mu papatele nokwe mu dhimine po tashi zi komutima, otashi tu kwathele tu uve ko kutya Jehova omunahenda shili nomunalukeno. (Luk. 15:11-32) Jesus okwa li a kwathele yalwe ya uve ko kutya He omuntu a tya lela ngiini.

10. (a) Otu shi shi ngiini kutya Jesus okwa li a longitha edhina lyaHe nonokutya okwa li a hala yalwe ya ninge sha faathana? (Markus 5:19) (Tala wo ethano.) (b) Jesus okwa hala tu ningi shike kunena?

¹⁰ Mbela Jesus okwa li ngaa a hala yalwe ya longithe edhina lyaHe? Osho naanaa. Aawiliki yomalongelokalunga yamwe yopethimbo lye oya li ya itaala kutya edhina lyaKalunga eyapuki unene nokutumbulwa, ihe Jesus ka li a etha nando etaloko ndyoka kaa li shi lyopamanyolo li mu imbe a simaneke edhina lyaHe. Pashiholelwa, dhiladhila kethimbo sho a li a aludha omulumentu ngoka a li e niwe koondemoni, moshitopolwa shAagerasa. Aantu oya li ya tila e taya pula Jesus a ze mo moshitopolwa shawo, nokwa zi mono. (Mark. 5:16, 17) Ihe nando ongawo, Jesus okwa li a hala edhina lyaJehova li tseyike moshitopolwa moka. Onkee okwa li a  lombwele omulumentu ngoka a aludha, a lombwele aantu shoka Jehova a ningi, ihe haashoka Jesus a ningi. (Lesha Markus 5:19.) a Jesus okwa hala natse kunena tu tseyithe edhina lyaHe muuyuni awuhe. (Mat. 24:14; 28:19, 20) Uuna tatu shi ningi, otatu nyanyudha Omukwaniilwa gwetu, Jesus.

11. Jesus okwa longa aalanduli ye ya galikane kombinga yashike, nomolwashike shoka sha simana? (Hesekiel 36:23)

¹¹ Jesus oku shi kutya elalakano lyaJehova olyo okuyapulitha edhina Lye noku li kaleka lya yela. Nomolwashono Omuwa gwetu a longa aalanduli ye ya galikane taya ti: “Tate yetu, ngu wu li megulu, edhina lyoye nali yapulwe.” (Mat. 6:9) Jesus okwa li e shi kutya ndjika ompata onenenene ndjoka ya taalela eshito alihe. (Lesha Hesekiel 36:23.) Kapu na oshishitwa oshinandunge meshito alihe, sha ninga oshindji shi na ko nasha nokuyapulitha edhina lyaJehova, shi vulithe Jesus. Ihe sho Jesus a kwatwa po, mbela aatondi ye oya li taye mu lundile kutya okwa ninga shike? Oya li taya ti kutya okwa sheka edhina lyaKalunga. Jesus okwa li e shi kutya okusheka, nenge okupopila edhina lyaHe eyapuki muuwinayi, eyono lya kwata miiti. Okwa li a uvu nayi lela sho a lundilwa naasho a monika ondjo. Oshinima shoka otashi vulika osho sha li unene sha ningitha Jesus a ‘adhike kuuwehame uunene,’ sho a li pokukwatwa po. — Luk. 22:41-44.

12. Ongiini Jesus a li a yapulitha edhina lyaHe momukalo gwa tongomana?

¹² Opo Jesus a yapulithe edhina lyaHe, okwa li a idhidhimikile uuwehame uunene, a tukwa nokwa lundilwa. Okwa li e shi kutya okwa vulika kuHe miinima ayihe; onkene ina pumbwa okukala a sa ohoni. (Heb. 12:2) Okwa li wo e shi kutya Satana oye a li te mu ponokele pethimbo ndyoka edhigu. (Luk. 22:2-4; 23:33, 34) Satana okwa li a hala okuteya po uudhiginini waJesus, ihe ine shi pondola nando. Jesus okwa li a ulike kutya Satana oye omufundja omukwanyanya nonokutya Jehova oku na aapiya aadhiginini, mboka haya kakatele uudhiginini wawo, nonando oye li momamakelo omanene.

13. Ongiini to vulu okunyanyudha Omukwaniilwa gwoye ngoka ta pangele ngashingeyi?

¹³ Mbela owa hala okunyanyudha Omukwaniilwa gwoye, ngoka ta pangele ngashingeyi?  Tsikila okusimanekitha edhina lyaJehova, mokukwathela yalwe ya ilonge kombinga yuukwatya uuwanawa waKalunga ketu. Uuna to shi ningi, kungawo oto landula oshiholelwa shaJesus. (1 Pet. 2:21) Ngaashi Jesus, oto nyanyudha Jehova noto ulike kutya omutondi Gwe, Satana, oye omufundja a shiga ko.

OHATU HUPITHA OOMWENYO, UUNA TATU SIMANEKE EDHINA LYAJEHOVA

14-15. Iizemo iiwanawa yini hayi vulu okuholoka po, uuna tatu longo aantu kombinga yaJehova?

¹⁴ Uuna tatu simaneke edhina lyaJehova, otatu kwathele aantu ya ka hupithwe. Ngiini mbela? Satana okwa ‘pukitha omadhiladhilo gaamboka inaaya itaala.’ (2 Kor. 4:4) Oshizemo, aantu oya itaale iifundja yaSatana, ngaashi mbyoka kutya Kalunga ke ko, oku li kokule natse noke na ko nasha naantu, Kalunga omukwanyanya noha hepeke sigo aluhe mboka ya yona. Iifundja ayihe mbyoka oya popiwa owala nelalakano lyokushekitha, nenge lyokunyateka edhina lyaJehova, opo aantu kaaya kale ya hala okuhedha popepi naye. Ihe iilonga yetu yokuuvitha ohayi imbi Satana a gwanithe po elalakano lye. Ohatu longo aantu oshili kombinga yaTate yetu, tu simanekithe edhina lye eyapuki. Oshizemo oshini?

¹⁵ Oshili yomOohapu dhaKalunga oyi na oonkondo oonene. Ngele otwa longo aantu kombinga yaJehova nonkene a tya lela, otatu ka mona iizemo iiwanawa. Aantu itaya ka kala we ya tsikithwa kiifundja yaSatana, ihe otaya ka kala ye wete omaukwatya omawanawa gaTate yetu omunahole. Otaya ka kuminwa oonkondo dhe oonenenene. (Jes. 40:26) Otaya ka kala ye mu inekela thiluthilu, oshoka omuyuuki a shiga ko. (Deut. 32:4) Otaya ka kuminwa uunongo we uunene. (Jes. 55:9; Rom. 11:33) Otashi ke ya hekeleka wo okutseya kutya Kalunga oye ohole. (1 Joh. 4:8) Sho taya hedha popepi naJehova, etegameno lyawo lyokukala nomwenyo sigo aluhe ye li oyana, otali kolo. Katu na tuu uuthembahenda uunene wokukwathela aantu ya hedhe kuTate yetu! Ngele otwe shi ningi, Jehova ote ke tu tala ko tu li ‘aalongi pamwe naye.’ — 1 Kor. 3:5, 9.

16. Okwiilonga edhina lyaKalunga ohaku gumu yalwe ngiini? Gandja iiholelwa.

¹⁶ Petameko otashi vulika tu longe owala aantu  kutya edhina lyaKalunga oJehova. Shono otashi ka guma lela aanamitima omiwanawa. Pashiholelwa, omukiintu gumwe omugundjuka gwedhina Aaliyah b okwa li a putukila muukwanegumbo inaawu itaala mOmbiimbeli. Ihe ka li a mbilipalelwa kelongelokalunga lye, noka li e uvite e na ekwatathano naKalunga. Onkalamwenyo ye oya lunduluka sho a tameke okukonakona nOonzapo. Okwa tameke okutala ko Kalunga e li Kuume ke. Okwa li a kumwa sho a mono kutya edhina lyaKalunga olya kuthwa mo mOombiimbeli odhindji nolya pingenwa po nomadhinasimaneko, ngaashi Omuwa. Sho a ilongo edhina lyaKalunga onkalamwenyo ye oya lunduluka. Okwa ti: “Kuume kandje kopothingo oku na edhina!” Oshizemo osha li shini? Okwa ti: “Ngashingeyi ondi na lela ombili yokomutima. Onde shi tala ko lela shi li uuthembahenda.” Omulumentu gumwe gwedhina Steven okwa li omuhikingalo, Omujuda konduko. Okwa li a ikaleke kokule nomahangano gopalongelokalunga, molwaashoka okwa mono iihelele yago oyindji. Ihe nando ongawo, sho a li a nika oluhodhi, okwa zimine okukala pekonakonombiimbeli tali ningwa kOnzapo yaJehova. Okwa li she mu guma lela, sho a ilongo edhina lyaKalunga. Okwa ti: “Inandi uva nando onale edhina lyaKalunga.” Okwa gwedha ko a ti: “Osho oshikando shotango, ndi uvite ko kutya Kalunga oko e li shili. Onda li nde mu tala ko e li Omuntu gwolela. Opo nduno onda tseya kutya onda mona Kuume.”

17. Omolwashike wa tokola toko okutsikila okusimaneka edhina lyaJehova? (Tala wo ethano.)

¹⁷ Uuna to uvitha noto longo aantu, mbela oho popi ngaa nayo kombinga yedhina eyapuki, Jehova? Oho ya kwathele ngaa ya mone kutya Kalunga ketu okwa fa peni? Ngele owe shi ningi, kungawo oto simaneke edhina lyaKalunga. Tsikila okusimaneka edhina lyaJehova eyapuki, mokukwathela aantu ye mu tseye nawa. Kungawo, oto ya kwathele ya hupithwe. Oto ka landula wo ewiliko lyOmukwaniilwa gwoye, Kristus Jesus. Kakele kaashono, oto ka nyanyudha Tate gwoye omunahole, Jehova. Natu tsikileni “okutanga edhina [lye] aluhe sigo aluhe.” — Eps. 145:2.