1-2. Ye mɛ lengbi ti zangɔ e ya, e hĩnga se mɛ Yehova ndo ma na tɛrɛ lo na ngoi mɛ atɛnɛ nvɛ̃nɛ na ili lo nɛ?

 BINGA li mɔ na ndo kpale mɛ: Zo kɔi mɛ mɔ ndo ye lo gba atɛnɛ siɔni na lo tɛ mɔ. Mɔ hĩnga ya, tɛnɛ ni adu nvɛ̃nɛ, kanda azi mɛndɛ̃ aye ya, tɛnɛ ni adu biani. Wa omɛ adu siɔni nvɛ̃ni, ala banda nga tɛnɛngɔ nvɛ̃nɛ ni hɛ̃ azi mɛndɛ̃, wa azi gba aye tɛnɛ ni. Mɔ na mangɔ tɛrɛ mɔ ngasia? Se mɔ kpã lɛ mɔ na ndo tɛnɛ tɛ azi ni nga na se mɛ ndima tɛ mɔ agbɛ̃ ko, ta mɔ na dungɔ na siriri ma. Ta seni la ma?​—Mas. 22:1.

² Se lɛlo mɛ lengbi ti zangɔ e ya, e hĩnga se mɛ Yehova mandó na tɛrɛ lo na ngoi mɛndó ndima tɛ lo gbɛ̃. Kɔi tɛ ayati lo ti nyingɔ, atɛnɛndó nvɛ̃nɛ na lo tɛ lo ka tɛ Eva wali ti uzu. Eva yendó tɛnɛ niko ti nvɛ̃nɛ, ni tondó atara e ti uzu ya, ala tɔmbɔgɔ tɛrɛ Yehova, wa siɔ kpale ná kwá alindó ge lɛ gigi. (Eb. 3:1-6; Roma 5:12) Akpale zu mɛ mɔ ndo hũ ge lɛ gigi mabere, kwá, to, nga na yɛlɛ ko, alo na ndo nvɛ̃nɛ mɛndó Satana tɛnɛ ka yaka ti Edɛnɛ. Yehova ndo ma pɛnɔ na lo ti nvɛ̃nɛ niko nga na lo ti asiɔ kpale mɛ ni hɛ̃? Zangangɔ kitɛ, lo ndo ma pɛnɔ. Abɛse ngaso ko, ta ni li ya, Yehova ti wa kakulu lo bere wa ngɔnzɔ ma. Kanda, lo na ngbãngɔ lá kwɛ “Nzapa ti dengɔ bɛ.”​—1 Tim. 1:11.

3. Nzɔ̃ tangɔ li gɛrɛ mɛ e na ni nɛ?

³ E na nzɔ̃ tangɔ li gɛrɛ ti hɛ̃ngɔ ti e so batangɔ ili Yehova na lége ti tɔndɔngɔ ndia mɛ: “Ĩ gonda ili Yehova.” (Nz. 113:1) E ndo li ni na ngoi mɛ e ndo pa mbilimbili mɛ aba Yehova hɛ̃ azi mɛndɛ̃. Mɔ nga na gondangɔ ili Yehova? Zia e ba aye taa mɛ na lingɔ ya e ti na gwɛ̃ ti kpengbani ti gondangɔ ili Nzapa tɛ e na bɛ e kɔi.

 E NDO HƐ̃ YEHOVA DENGƆ BƐ NA NGOI MƐ E NDO GONDA ILI LO

4. Na lo nɛ la gondangɔ ili Yehova ndo hɛ̃ lo dengɔ bɛ nɛ? Kambisa. (Ba nga limɔ.)

⁴ E ndo hɛ̃ To e ti ndozu dengɔ bɛ na ngoi mɛ e ndo gonda ili lo. (Nz. 119:108) Afa ya, Nzapa mɛ Nvɛ̃ ngunu zu nga ma azi ti zangangɔ lengbingɔ mɛ ala ndo gi na ndo ngunu ya, agonda ala na lo mɛ ya, ala na gwɛ̃ ni bere ala ndo ye ya, asa ngunu bɛ la? Ipɔ. E ba se lɛlo mɛ. Da bɛ mɔ ya, nyingambi kɔi ti wali mɛ yakere agwe na se bɛ lo, abɔmbɔ tata tɛ lo wa lo pa hɛ̃ e lo ya, “Mɔ du nzɔ̃ to mɛ aɔ ato zu ti lɛ gigi!” To lo ma dengɔ bɛ gba nvɛ̃ni, na lo mɛ ya ta ato nyi lo tongɔ ya, lo tɛnɛ tɛnɛ niko hɛ̃ lo ma. Na lo nɛ? Elengbi ti tɛnɛngɔ ya, lo du to mɛ ta lo na valɛrɛ ma wa lo ndo gi na ndo ngunu ya, nyi lo hɛ̃ lo ndima? Ipɔ. Lo ma dengɔ bɛ ti ngaso na lo mɛ ya, lo ndo ye nyi lo wa lo hũ nga se mɛ nyi lo fa lo na songo tɛ lo. Lo hĩnga ya, dungɔ na aseliye ti ngaso na lingɔ ya, nyi lo du na dengɔ bɛ na ngoi mɛ lo ndo mai. Kwɛ kɔi, se mɛ Yehova, To mɛ aɔ ato zu ndo ma dengɔ bɛ na ngoi mɛ e ndo hɛ̃ lo gonda la.

5. Na ngoi mɛ e ndo gonda ili Nzapa, e ndo hɛ̃ ti e so fangɔ nɛ?

⁵ Na ngoi mɛ e ndo gonda To e ti ndozu ko, e ndo hɛ̃ ti e so fangɔ na Satana ya, lo du wa nvɛ̃nɛ. Satana ndo tɛnɛ ya, ta zo kɔi mɛ alengbi ti hɛ̃ngɔ ili Yehova gonda na mbilimbili da ma. Lo ndo tɛnɛ nga ya, ta e na ngbãngɔ mbilimbili ka tɛ Yehova se lo tengbi na tara ma. Lo ndo da bɛ lo ya, e zu e ndo vɔrɔ Nzapa, e ndo gonda nga lo na lo ti nzɔ̃ kpale tɛ e nvɛ̃ni. (Yobo 1:9-11; 2:4) Kanda Yobo ndó mbilimbili, lo fandó yangondo ya Satana du wa nvɛ̃nɛ. Wa mɔ mɛ? Kɔi kɔi na popo tɛ e na nzɔ̃ tangɔ li gɛrɛ ti hɛ̃ngɔ ti lo so gondangɔ ili To e, nga na hɛ̃ngɔ lo dengɔ bɛ na lége ti vɔrɔngɔ lo na mbilimbili zu. (Mas. 27:11) Lingɔ ngaso, adu nvɛ̃ni ye ti ndima na lo tɛ e.

6. Ngasia la elengbi ti landangɔ se lɛlo tɛ gbia Davidi ná tɛ azi ti Levi nɛ? (Nehemia 9:5)

⁶ Songo mɛ azi ti mbilimbili ndo du na ni na lo tɛ Nzapa ndo to ala ya, ala gonda ili lo na bɛ la zu. Gbia Davidi sundó ya: “Zia mbi sepala na Yehova; zia ya, aye zu mɛ mbi na ni agonda ili lo mɛ santo.” (Nz. 103:1) Davidi hĩngandó ya, gondangɔ ili Yehova, adu gondangɔ Yehova nvɛ̃ni. Ili Yehova ndo fa ndima tɛ lo, ni ndo fa anzɔ̃ aseliye tɛ lo nga na akwa tɛ lo ti nzɔ̃ni. Davidi yendó mungɔ ili To lo ya, adu santo nga na gondangɔ ni. Lo yendó lingɔ ni na “aye zu” mɛndó lo na ni afa ya, na bɛ lo zu. Azi ti Levi amu ngandó ekateli ti ngaso ti gondangɔ Yehova. Na zungɔ na tɛrɛ zu, ala mundó ekateli ti nɛngɔ ya, ta  tɛnɛ tɛ ala agbɛ̃ gonda mɛ ala lengbi ti hɛ̃ngɔ ili Yehova mɛ santo ma. (Di Nehemia 9:5.) Ta kitɛ da ma ya, ala hĩngandó yangondo ya, gondangɔ Yehova na zungɔ na tɛrɛ nga na mbilimbili na hɛ̃ngɔ lo dengɔ bɛ.

7. Ngasia la elengbi ti gondangɔ Yehova na ya kwa tɛ e ti fangɔ tɛnɛ, nga na ya dungɔ lɛ ngɛ̃́ tɛ e ti bi zu nɛ?

⁷ Ndɛ lo mɛ ko, elengbi ti hɛ̃ngɔ Yehova dengɔ bɛ na lége ti tɛnɛngɔ hɛ̃ azi mɛndɛ̃ tɛnɛ mɛ aba lo, na lége ti kwa tɛ e, nga na songo mɛ e ndo du na ni na lo tɛ lo. Na ngoi mɛ e ndo si kwa ti fangɔ tɛnɛ ko, dangɔ bɛ tɛ e adu ya, e za azi mɛndɛ̃ adɔ dã na Yehova, wa ala hũ nga aseliye tɛ lo ti nzɔ̃ni nga ma se mɛ e ndo hũ na ni. (Zaki 4:8) E na dengɔ bɛ ti pangɔ hɛ̃ azi mɛndɛ̃ tɛnɛ mɛ Ngbangɔ kambisa na lo tɛ Yehova, na lo ti songo tɛ lo, mbilimbili tɛ lo, ndara tɛ lo, ngunu tɛ lo, nga na aseliye tɛ lo mɛndɛ̃. E ndo gonda nga Yehova na ngoi mɛ e ndo hɛ̃ lo dengɔ bɛ nga na ngoi mɛ e ndo manda aseliye tɛ lo. (Ef. 5:1) Se e li ngaso ko, ta e na yɔrɔngɔ tɛrɛ e na ya kpale ti lɛ gigi olo ti siɔni ma. Azi ti lɛ gigi na hũngɔ ya, e ɔngbi na ala wa ala na gingɔ ndani. (Mat. 5:14-16) Na ngoi mɛ e ndo tɛnɛ tɛnɛ na ala bi kɔi kɔi ko, elengbi ti kambisangɔ hɛ̃ ala nda mɛ e na dungɔ lɛ ngɛ̃́ ti ngaso. Ni na lingɔ ya, azi mɛ bɛ ala nzɔ̃ni aga ge tɛ Nzapa tɛ e. Se e ndo gonda Yehova ngaso ko, ni na hɛ̃ngɔ lo, dengɔ bɛ.​—1 Tim. 2:3, 4.

YEZO NDO MA DENGƆ BƐ NA NGOI MƐ E NDO GONDA ILI YEHOVA

8. Yezo hɛ̃ndó ili Yehova gonda ngasia?

⁸ Ta zo kɔi ka ndozu bere ge tise mɛ ahĩnga Yehova ɔngɔ Yezo da ma. (Mat. 11:27) Yezo ndo ye To lo, wa lo zo ti uzu mɛ ndo hɛ̃ ili Yehova gonda. (Yn. 14:31) Na ya sambela kɔi mɛndó lo li uzu ti lo kpingɔ ko, lo tɛnɛndó na ndunu ni kwa zu mɛndó lo li ge lɛ sese, lo tɛnɛndó ya: “Mbi li ya ala hĩnga ili mɔ.” (Yn. 17:26) Lo yendó tɛnɛngɔ ya nɛ?

9. Yezo salelandó se lɛlo mɛ ngasia ti fangɔ seliye tɛ To lo nɛ?

⁹ Ta Yezo tɛnɛ bondó hɛ̃ azi ya, ili Nzapa la Yehova ma. Ayuda mɛndó Yezo ndo ha ala na tɛnɛ ko, ala hĩngandó ili Nzapa. Kanda Ngbangɔ tɛnɛ ya, Yezo la du zo mɛ “afa [azi] na To lo Nzapa.” (Yn. 1:17, 18) Na ndakisa, eteni ti Ngbangɔ mɛ asu na yanga ti Ebre atɛnɛ ya, Yehova na bɛ ti vundu nga na nzɔ̃ bɛ. (Kob. 34:5-7) Yezo fandó bɛta tɛnɛ niko yangondo na ndenge mɛndó lo hɛ̃ se lɛlo tɛ nyingambi ti kilikili ná to lo. Adu pandɛ tɛ to nyingambi kɔi mɛ na ngoi mɛndó lo hũ nyi lo mɛ agbinya bɛ lo “ka yɔngɔrɔ ni” ko, lo kpɛndó kpɛ so ngorongɔ lo, ngoi mɛ ala tengbi ko, lo bɔmbɔndó nyi lo, wa lo ka ngandó lɛ lo na ndo siɔ kpale tɛ nyi lo. Na ngoi mɛ e ndo di pandɛ niko ko, ni ndo za e, e hĩnga nzɔ̃ni bɛ ti vundu ti kpengbani mɛ Yehova ndo du na ni. (Luka 15:11-32) Yezo fandó yangondo se mɛ To lo ndo du na ni.

10. (a) Ngasia la e hĩnga ya, Yezo salelandó bɛta ili To lo, wa lo ye ya, azi mɛndɛ̃ ali nga ngaso nɛ? (Marko 5:19) (Ba nga limɔ.) (b) Ye mɛ Yezo na gwɛ̃ ya, e li ni ndɛ nɛ?

¹⁰ Yezo yendó ya, azi mɛndɛ̃ asalela bɛta ili To lo? Ĩĩ lo yendó. Na ngoi ti gã, agbia ti sambela ndo hũndó ya ili Nzapa du santo, ta adɛ̃ ya azi ili ni ma, kanda ta Yezo zindó lége ya, mimɛsɛnɔ niko mɛ ta amangbi na tɛnɛ mɛ kaya Ngbangɔ ma, agbanzi azi na salelangɔ ili To lo ma. Da bɛ mɔ na ngoi mɛndó Yezo sara kɔli kɔi mɛ na asiɔ nyingɔ ka kɔdɔrɔ ti Bageraza. Azi mandó mbɛtɔ, wa ala pandó hɛ̃ Yezo ya, lo si ka kɔdɔrɔ tɛ ani. (Mar. 5:16, 17) Kanda gwɛ̃ tɛ Yezo dundó ya, azi ti kɔdɔrɔ niko ahĩnga ili Yehova. Ni la, lo hɛ̃ndó kɔli niko mɛ lo sara lo kumba ti kambisangɔ hɛ̃ azi mɛndɛ̃ kpale mɛ Yehova li  kanda ta omɛ ni Yezo ni li ma. (Di Marko 5:19.) a Ndɛ lo mɛ ko, lo ye nga ya, e li zu ti nɛngɔ ya azi ti lɛ gigi zu ahĩnga ili To lo! (Mat. 24:14; 28:19, 20) Na ngoi mɛ e ndo li kumba tɛ e na seni, e ndo hɛ̃ Yezo mɛ Gbia tɛ e dengɔ bɛ.

11. Sambela mɛndó Yezo ha na ava lo ya ala ndo li nɛ, wa nda mɛ ni du ngbondoni nɛ? (Ezekiele 36:23)

¹¹ Yezo hĩngandó ya, Yehova na gwɛ̃ ti lingɔ ya, ili lo lua gonda, wa lo hã nga nvɛ̃nɛ mɛndó atɛnɛ na lo tɛ lo. Ni la, lo fandó na ava lo se ti lingɔ na sambela mɛ: “To e mɛ ka yayu, azi atɔndɔ bɛ ili mɔ mɛ santo ma ke!” (Mat. 6:9) Yezo hĩngandó ya, hɛ̃ngɔ ili Yehova gonda adu kpale ti ngbondoni mɛ aɔ akpale mɛndɛ̃ zu na lo tɛ aangelo mɛ ka ndozu nga na lo tɛ azi mɛ ge sese. (Di Ezekiele 36:23.) Mu angelo ná azi, ta kɔi ka popo tɛ ala mɛ agonda ili Nzapa ngama se mɛndó Yezo li na ni da ma. Ngoi mɛndó agbɔ̃ lo, nvɛ̃nɛ mɛ awa kula tɛ lo karandó tɛrɛ lo nɛ? Ala tɛnɛndó ya, lo du wa gurungɔ ili Nzapa! Ka tɛ Yezo, gbɛ̃ngɔ ili Nzapa nga gurungɔ ili lo mɛ santo ko, adu siɔ kpale mɛ kotani nvɛ̃ni. Kpale niko giandó lo kpengbani hũngɔ ndenge mɛ na gbɔ̃ngɔ lo nga na hɛ̃ngɔ lo tumbu ti kwa na lo ti kpale mɛ ta lo li ma. Ni lengbi ti dungɔ ye mɛndó ali ya, Yezo “ma vundu sĩ” na ngoi mɛndó aye gbɔ̃ngɔ lo.​—Luka 22:​41-44.

12. Se ti nzɔ̃ni mɛndó Yezo gonda na ili To lo nɛ?

¹² Na lo ti hɛ̃ngɔ ili To lo gonda ko, Yezo gbendó bɛ lo na ndo akpale ti pɛnɔ gba, na ndakisa agurundó lo, ahéndó lo, wa akara ngandó lo tɛrɛ lo. Yezo hĩngandó ya, lo tɔndɔ To lo na akpale zu, ta lo na ye ti mangɔ kamɛnɛ na lo ni ma. (Aeb. 12:2) Wa lo hĩnga ngandó ya, Satana la ndo tiri lo na to na ya angoi niko ti siɔni. (Luka 22:2-4; 23:33, 34) Satana dandó bɛ lo ya, ni na gbɛ̃ngɔ mbilimbili tɛ Yezo; kanda ta lo nwɔndó ma! Yezo fandó yangondo ya, Satana wa nvɛ̃nɛ, wa lo fa ngandó ya, Yehova na azi mɛ ndo vɔrɔ lo mɛ ala lengbi ti ngbãngɔ mbilimbili ka tɛ lo abɛse na ya ngoi ti kpengba pɛnɔ.

13. Mɔ lengbi ti hɛ̃ngɔ gbia tɛ mɔ dengɔ bɛ ngasia?

¹³ Mɔ na gwɛ̃ ti hɛ̃ngɔ Gbia tɛ mɔ dengɔ bɛ?  Ngbã lá kwɛ gondangɔ ili Yehova nga na zangɔ azi mɛndɛ̃ ya ala hĩnga lo nga na aseliye ti nzɔ̃ni mɛ lo na ni. Na lingɔ ngaso, mɔ ndo landa se lɛlo tɛ Yezo. (1 Pet. 2:21) Nga ma Yezo, mɔ na hɛ̃ngɔ Yehova dengɔ bɛ wa mɔ nga na fangɔ ya, wa kula tɛ Lo Satana du wa nvɛ̃nɛ!

E NDO BATA DUNGƆ LƐ NGƐ̃́ TƐ E NA NGOI MƐ E NDO GONDA ILI NZAPA

14-15. Anzɔ̃ kpale mɛ ndo li tɛrɛ lo na ngoi mɛ e ndo ha na azi kpale mɛ aba Yehova nɛ?

¹⁴ Na ngoi mɛ e ndo gonda ili Yehova ko, e ndo bata dungɔ lɛ ngɛ̃́ tɛ e. Ni ndo li tɛrɛ lo ngasia? Satana “gbɛ̃ kɔdɛ tɛ ala, lo vĩ nga lɛ la ya, ta ala hũ ndo mɛ avuru ma.” (2 Kɔr. 4:4) Na lo ni la, azi bandandó yengɔ tɛnɛ ti nvɛ̃nɛ tɛ Satana, mabere: Ta Nzapa da ma, lo yɔngɔrɔ ni na azi, ta lo ndo kpã lɛ lo na ndo pɛnɔ tɛ azi ma, lo du wa kakulu lo, wa lo ndo hɛ̃ asiɔ azi tumbu ti bwai. Satana ndo tɛnɛ nvɛ̃nɛ niko zu na lo mɛ ya, lo ye ya ili Yehova nga na ndima tɛ lo agbɛ̃ wa azi zia landangɔ Yehova. Kanda kwa tɛ e ti fangɔ tɛnɛ ndo gbanzi siɔ dangɔ bɛ tɛ Satana. E ndo ha na azi mbilimbili mɛ aba To e na lége ti gondangɔ ili Nzapa tɛ e mɛ santo. Nzɔ̃ kpale mɛ ni ndo hɛ̃ nɛ?

¹⁵ Mbilimbili ti ya Tɛnɛ tɛ Nzapa na ngunu gba. Na hangɔ azi na tɛnɛ mɛ aba Yehova, nga na zangɔ ala ya ala hĩnga lo ko, e ndo hũ ya adu ye kɔi ti nzɔ̃ni nvɛ̃ni. E ndo zi lɛ azi yɛkɛ yɛkɛ ya, ala hũ nvɛ̃nɛ tɛ Satana wa ala banda nga hũngɔ seliye ti nzɔ̃ni tɛ To e ti songo nga ma se mɛ e ndo hũ na ni. Ala ndo ti na tɔndɔngɔ ti kpengbani na lo ti ngunu tɛ Nzapa mɛ azanga maka. (Yis. 40:26) Ala ndo kpã bɛ la na ndo fangɔ ngbanga tɛ lo ti mbilimbili. (Mib. 32:4) Ala ndo nɔ nɔ na landangɔ ndia tɛ lo ti ndara. (Yis. 55:9; Roma 11:33) Wa bɛ la ndo zu hĩngangɔ ya, lo du zo mɛ asĩ na songo. (1 Yn. 4:8) Dɔngɔ dã na Yehova ndo li ya, nzɔ̃ dangɔ bɛ tɛ la ti luangɔ dungɔ lɛ ngɛ̃́ ti kaka nga ma aya Nzapa ati na seni. Ni du nvɛ̃ni nzɔ̃ tangɔ li gɛrɛ mɛ e na ni ti ilingɔ azi ya, ala dɔ dã na To e! Na ngoi mɛ e ndo li ngaso ko, Yehova ndo mu e ya, e du “awa kwa” tɛ lo.​—1 Kɔr. 3:5, 9.

16. Azi mɛndɛ̃ ndo ma tɛrɛ la ngasia na ngoi mɛ ala ndo hĩnga ili Nzapa nɛ? Hɛ̃ se lɛlo kɔi.

 ¹⁶ Na ebandeli, elengbi ti hangɔ na azi na ndenge ti yangondo ya, ili Nzapa la Yehova. Ni lengbi ti tongɔ zo ti mbilimbili ya, lo gbinyangbi dungɔ lɛ ngɛ̃́ tɛ lo. Na ndakisa, palanga kɔi ti wali mɛ ili lo la Aaliyah b amaindó zangangɔ ya, lo hĩnga tɛnɛ ti Ngbangɔ. Ta lo yendó hɛ̃ngɔ tɛrɛ lo na ya sambela bere dɔngɔ dã na Nzapa ma. Kanda na gesi, dangɔ bɛ tɛ lo gbinyangbindó na ngoi mɛ lo banda mandangɔ Ngbangɔ ndoni kɔi na Atɛmwɛ tɛ Yehova. Lo bandandó hũngɔ Nzapa nga ma kwa lo. Lo kamwãndó mawoma hĩngangɔ ya, ahã bɛta ili Nzapa kaya Ngbangɔ gba azi, wa agbinyangbi ni na atitrɛ nga ma Gbia. Mandangɔ ili Yehova, agbinyangbindó dungɔ lɛ ngɛ̃́ tɛ lo. Lo tɛnɛ ya: “Kwa mbi ti kpɔ̃ bɛ mbi na ila!” Nzɔ̃ kpale mɛ lo lua nɛ? Lo di pa ya: “Mbi na olo na siriri ti bɛ nvɛ̃ni. Mbi ndo hũ na olo ya, mbi na ndima.” Nyita kɔli Steve dundó wa yengɔ bia (musicien) wa akandó lo ka ndasewa tɛ azi ti ya sambela tɛ Ayuda. Lo ziandó gwengɔ sambela na ngoi mɛndó lo hũ seliye ti poloso mɛndó azi mɛ kai ndo fa. Kanda na pɛ kwá tɛ ta lo ko, lo yendó mandangɔ Ngbangɔ na Tɛmwɛ tɛ Yehova kɔi. Mandangɔ ili Nzapa agbɔ̃ndó bɛ lo nvɛ̃ni. Lo tɛnɛ ya: “Ta mbi hĩngandó ili Nzapa uzu ma. Mbi ga mbi hĩnga ya Nzapa da biani! Mbi hũ ya lo na dungɔ lɛ ngɛ̃́. Mbi hũndó nvɛ̃ni ya mbi lua kwa mbi ti fãnani.”

17. Nda mɛ mɔ ye ngbãngɔ lá kwɛ gondangɔ ili Yehova nɛ? (Ba nga limɔ.)

¹⁷ Na ya kwa tɛ mɔ ti fangɔ nga na hangɔ tɛnɛ, mɔ ndo fa na azi ya, ili Yehova du santo? Mɔ ndo za ala ya, ala hĩnga Nzapa na seni? Se mɔ li ngaso ko, mɔ ndo gonda ili Nzapa. Mɔ lengbi ti ngbãngɔ lá kwɛ gondangɔ ili Yehova na zangɔ azi mɛndɛ̃ ya, ala hĩnga aseliye ti nzɔ̃ni mɛ lo ndo du na ni. Se mɔ li ngaso ko, mɔ na luangɔ dungɔ lɛ ngɛ̃́. Mɔ na landangɔ se lɛlo tɛ Gbia tɛ e Yezo. Wa omɛ aɔ zu, mɔ na hɛ̃ngɔ Yehova To mɔ ti songo dengɔ bɛ. Mɔ lengbi ti “gondangɔ ili lo ti bwai na bwai”!​—Nz. 145:2.