1-2. Tiheeni enahaala onikhaviherya wiiwexexa mukhalelo Yehova oniisooneiye vaavaa nsina nawe nnootheriwaaya?

 MWAANYIHERYE ela: Muchu yoowo nyuwaano munamukhapelelaanyu ooloca echu yoonanara vooloca sa nyuwaano. Nyuwaano munnasuwela wi eyo ti yawootha; nyenya, akina anneemererya. Nlelo awo annapacerya waaceererya sawootha, nave ancipale tho akina enneemererya. Mwaahaala wiisoona hai? Waakhanle wi nyuwaano munnuukhuwa ni achu ni meecelo anyu aphaama, yawootha enanwerya oweerihaani okhala oothanana ni awuukhuwa, tahi yeeyo?—Mas. 22:1.

² Yaweereya yeela enanwerya onikhaviherya wiiwexexa ti mwawiihai Yehova iisoonneiye vaavaa mukhalelo awe waphaama waananarihiwaaya. Mmoha a anamwane awe oomunepani aahootha vooloca sa owo ntakhara muthiyana oopacerya, Eva. Eva aaheemererya yawootha. Nthowa na yawootha yeela, Atamu ni Eva yaahimmwareela Yehova. Ntoko yookhumelela, yoocheka ni okhwa yaahivolowa mu echoko ya achu. (Map. 3:1-6; Aro. 5:12) Makacamiho oothene yaawo nnoonaahu mweelaponi olelo—ntoko okhwa, ikhoco, ni soohooxa—sookhalavo nthowa na sawootha seiho Satana aapacenryeiye omwaramwaxa mu emaca ya Eteni. Apwanne Yehova onnoona wiicela wa sawootha seiha ni makacamiho oothene yaala atannyiwe? Moohikhwa minikwa. Naamwiihiiha, Yehova tahi oonyeenyeya. Mweeparipari, owo onnatitelela okhala “Muluku oohakalala.”—1 Tim. 1:11.

3. Ekari taani nryaahuno?

³ Nookhalano ekari ya waakiha nsina na Yehova niiwelelaka nlamulo nenla nookhweya: “Cicimihani nsina na Apwiya [Yehova].” (Sal. 113:1, PMM) Ninnacicimiha nsina na Yehova vaavaa nnaaleelaahu akina iparipari vooloca sa yoowo. Hanka nyuwaano? Nnahaala othokororya mikhalelo miraru soochuneya seiho sinahaala  onikhaviherya ocicimiha nsina na Muluku ahu mahiku oothene.

NINNAMUHAKALALIHA YEHOVA VAAVAA NNACICIMIHAAHU NSINA NAWE

4. Ntakhara heeni ncicimiho nahu ninnamuhakalaliha Yehova? Mphwanaphwanihe. (Moone tho eruku.)

⁴ Ninnamuhakalaliha Tiithi ahu a wirimu vaavaa nnacicimihaahu nsina nawe. (Sal. 119:108) Apwanne eyo enataphulela wi Muluku a ikuru soothene onalikana ni achu oohiphaameya yaawo anachunaxa ocicimihiwa wi ekhale oolipiheya? Hooye. Muthokororye niphwanaphwaniho nimoha. Nahano mmoha moosivela onnaakhupaarela atiithi awe muxikoni nave onnaloca ariki: “Mu elapo yoothene, nyuwaano muri tiithi oochuneyaxa!” Apapa awe annahakalala nave annatheya nthowa na mahala a mwanaya. Ntakhara heeni? Apwanne nnanwerya oloca wi tiithi ola toohikhapeleleya nave wi pahiru onaroromela nlipiho na mwanawe? Hooye. Ohiya yeeyo, ninnaroromela wi owo tiithi oolipa nave onnahakalala vaavaa onamooneiye mwanawe ooniheryaka osivela ni othamalela. Owo oosuwela wi mikhalelo ntoko seiha inanwerya omvaha ohakalala vaavaa oneereiye unnuwe. Mmikhalelo soolikana, Yehova Tiithi mutokweene, onnahakalala vaavaa nnamucicimihaahu.

5. Vaavaa nnamucicimihaahu Yehova, yawootha taani nnooniheryaahu wi ti yatheru?

⁵ Vaavaa nnamucicimihaahu Tiithi ahu a wirimu, ninnakhaviherya okhooca sawootha seiho sinamvolowela mmoha ti mmoha a hiyo. Satana onneemererya wi haavo onahaala waakiha moororomeleya nsina na Muluku. Owo olonce wi haavo ori oororomeleya wa Muluku vaavaa muchu oneehiweiye. Ooloca tho wi oothene ahu nnanwerya omaala omurumeela Yehova wakhala wi nohuupuwela wi eyo ti yaphaama wa hiyo. (Yupu 1:9-11; 2:4) Nyenya Yupu aanasuwela wi Satana aari nawoothe. Hanka nyuwaano? Mmoha ti mmoha a hiyo ookhalano ekari ya waakiha nsina na Tiithi ahu ni omuhakalaliha nimurumeelaka moororomeleya. (Mas. 27:11) Mweeparipari, ela ekari etokweene weerano yeela.

6. Ti mwawiihai nneeraahu nimutakiherye Mwene Tavite ni Alevi? (Nehemiya 9:5)

⁶ Omusivela Muluku onnaaceenyerya achu oororomeleya ocicimihaka nsina nawe ni murima woothene. Mwene Tavite oorepa: “Okumi aka we, cicimiha Apwiya! Soothesene sa mpuwa mwaka sicicimihe nsina naya naweela.” (Sal. 103:1, PMM) Tavite aahiiwexexa wi ocicimiha nsina na Yehova ori omucicimiha mwaneene Yehova. Nsina na Yehova ninnavolowela mukhalelo awe, mwa yeeyo ennanruuhela mmuupuwelo mikhalelo sawe saphaama ni soopaka sawe sootikhiniha. Tavite aanachuna okhaliha nsina na Atiithi awe mwaweela ni ocicimiha nenlo. Owo aachuna weerano “soothesene sa mpuwa” mwawe—ela tiwi, ni murima awe woothene.  Mmukhalelo mmohamoha, a Levi yaahititelela ovahererya ohoolela mu ocicimiha nsina na Yehova. Awo mwawiiyeviha yaaheemererya wi masu aya hiyi ewerye ocicimiha moomalela nsina naweela na Yehova ntoko nnaphwanelaaya. (Mwaalakhanye Nehemiya 9:5.) Moohikhwa minikwa, ncicimiho nenla ni wiiyeviha waahimuhakalaliha Yehova.

7. Ti mwawiihai nnahaalaahu omucicimiha Yehova mmuteko ahu woolaleerya ni okumi ahu wa nihiku ti nihiku?

⁷ Olelo nnanwerya omuhakalaliha Yehova nlocaka vooloca sa yoowo moolucuwa, othamalela ni osivela. Vaavaa nnakhalaahu mmuteko woolaleerya, yoolakelela ahu etokweene ori owaacameliha achu wa Yehova, ni waakhaviherya omoonaka Tiithi ahu oosivela hiiha ntoko hiyaano nnamoonaahu. (Tiy. 4:8) Ninnasiveliwa owooniherya achu yeeyo Piipiliya onathariheiye vooloca sa Yehova, osivela wawe, wookololowa, miruku, owerya ni mikhalelo mikina saphaama. Nave tho ninnamucicimiha Yehova ni omuhakalaliha vaavaa nnapakaahu owetha wahu wi nimutakiherye yoowo. (Aef. 5:1) Vaavaa nneeraahuno yeeyo, ninniivalaanya ni elapo yeela yoonanara. Mwawiihiiha, achu ananwerya woona wi na achu oohiyana nave ananwerya wiikoha ntakhara heeni. (Mat. 5:14-16) Vaavaa nnalocaahu ni yaawo nihiku ti nihiku, nnanwerya waatharihela ntakhara heeni nnakhalaahu mmukhalelo yoola. Ntoko yookhumelela, achu akina a mirima saphaama ananwerya okhalano nchuno na ohuserya vooloca sa Muluku ahu. Vaavaa nnamucicimihaahu Yehova mmukhalelo yoola owo onnahakalala vancipale.—1 Tim. 2:3, 4.

HIYAANO NINNAMUHAKALALIHA YESU VAAVAA NNACICIMIHAAHU NSINA NA YEHOVA

8. Ti mwawiihai Yesu oreiye yootakiherya yaphaama ya ocicimiha nsina na Yehova?

⁸ Wa soopatuxiwa soothene sa miruku sa wirimu ni sa veelaponi yavathi, haavo aasuwenle Atiithi ompwaha Mwaana. (Mat. 11:27) Yesu onnaasivela Atiithi awe nave onnacicimiha nsina naya. (Yoh. 14:31) Mu nivekelo aapankeiye wa Atiithi awe mu ohiyu ahaakumve okhwa, owo aahithariha muteko awe woolaleerya veelaponi yavathi mmukhalelo ola: “Kohaasuweliha yaawo nsina nanyu.” (Yoh. 17:26) Tiheeni owo aachuneiye oloca?

9. Ti mwawiihai Yesu aapharihenleiye niphwanaphwaniho wi aatharihe Atiithi awe mmukhalelo wookwakwaleya?

⁹ Yesu aahipaka sincipale ohiya pahiru waaleela achu wi nsina na Muluku ti Yehova. Ayuta yaawo Yesu aalaleeryeiye, yaahisuwela nsina na Muluku, nave Yesu taapaceryinhe ‘owuupululela Yaawo.’ (Yoh. 1:17, 18) Ntoko yootakiherya Soorempwa sa Ehepiri, sinnaloca wi Yehova ta ikharari ni aniphwanya. (Muk. 34:5-7) Yesu oohiya yeeyo mookwakwaleya mu niphwanaphwaniho na mwaana oomwaryeya. Vaavaa nnaalakhanyaahu vooloca sa tiithi yoowo onamoona mwanawe ari ocai, achimakaka wi amphwanye ni omukhupaarela, amulevelelaka moomalela, hiyaano ninnakhalano moonelo wookwakwaleya vooloca sa ikharari ni niphwanya na Yehova. (Luka 15:11-32) Yesu oonooniherya mukhalelo weeparipari wa Atiithi awe.

10. (1) Nnasuwela hai wi Yesu aahipharihela nsina na Atiithi awe nave wi annachuna wi akina yeereno emohamoha? (Marku 5:19) (Moone tho eruku.) (2) Tiheeni Yesu onachuneiye wi neerekeno olelo?

¹⁰ Apwanne Yesu tho aanachuna wi akina ephariheleke nsina na Atiithi awe? Moohikhwa minikwa. Ahooleli akina a malapelo yeemererya wi oromola nsina na Muluku waari ohikhalano ncicimiho, nyenya Yesu hantonko weemererya wi yookhovelela eyo ehirino mathipelo mu soorempwa emuhiihe ocicimiha nsina na Atiithi awe. Mu ekwaha emoha, Yesu aahimpenuxa mulopwana yoowo aarino masololo aakhala mu elapo ya Xerasene. Achu yaahitepa omoova Yesu nave emveka wi akhumemo mu elapo aya. (Mar. 5:16, 17) Naamwiihiiha, Yesu aachuna wi achu yaale esuwele nsina na Muluku. Mwawiihiiha  owo aahimuleela mulopwana yoowo aampenunxeiye wi aaleele achu ohiya yeeyo owo aampakenleiye nyenya yeeyo Yehova aapankeiye wa yene. (Mwaalakhanye Marku 5:19.) a Nlelo Yesu onachuna wi—nsina na Atiithi awe nsuweliwe mu elapo yoothene! (Mat. 24:14; 28:19, 20) Vaavaa nnapakaahu makupa ahu mmukhalelo yoola, ninnamweeriha mwene ahu Yesu Kristu okhala oohakalala.

11. Tiheeni Yesu ohusinheiye wa oomuchara awe ovekela, nave ntakhara heeni eyo ti yoochuneya? (Esekiyeli 36:23)

¹¹ Yesu aanasuwela wi yookhwela ya Yehova waari weeliha nsina Nawe ni ovaanya sawootha seiyo saalociwa vooloca sa yoowo. Ti nthowa nene Yesu aahusinheiye oomuchara awe ovekelaka: “Atiithihu muri wirimu, nsina nanyu neelihiwe.” (Mat. 6:9) Yesu aaniiwexexa wi ela yaari echu yaavolowela ichu soothene. (Mwaalakhanye Esekiyeli 36:23.) Hiyaavo yoopatuxiwa ekina wirimu epanke sincipale wi yeelihe nsina na Yehova ompwaha Yesu. Nyenya, vaavaa Yesu aaphariweiye, yoocheka taani amwiicani awe yaamothenryaaya? Onyemula! Mweeparipari, Yesu aanasuwela wi opharihela naari oloca moonanara nsina naweela na Atiithi awe yaari yoocheka etokweenexa muchu aahaaleiye opaka. Wootheriwa ni othoriheliwa yoocheka yeela yaahimuukhula vancipale. Akhweya nla naari nthowa ntokweenexa naamweerinhe Yesu okhala ‘awuukhuwaxa’ mu elukuluku ahaakumve ophariwa.—Luka 22:41-44.

12. Ti mwawiihai Yesu eelinheiye nsina na Atiithi awe mmukhalelo waphaamaxa?

¹² Wi eelihe nsina na Atiithi awe, Yesu aahihooxiwa, aahiruwaniwa nave aahootheryiwa. Owo aahisuwela wi aahiwiiwelela Atiithi awe mu ichu soothene nave haarino echu vyakala wi uuliheye muru. (Ahe. 12:2) Owo tho annasuwela wi Satana annamuhiphela mu ilukuluku seihe soovila. (Luka 22:2-4; 23:33, 34) Satana aachuna onanariha ororomeleya wa Yesu; Naamwiihiiha owo haawenrye! Yesu ohoona moomalela wi Satana nawoothe oonanara ni wi Yehova ookhalano alapeli awe oororomeleya, yaawo enakhapelela ororomeleya waya naamwi ehoolelaka saweeha soovilaxa!

13. Ti mwawiihai munahaalaanyu omuhakalaliha Mwene anyu onalamula?

¹³ Nyuwaano munnachuna omuhakalaliha  Mwene anyu onalamulela? Mutitelele ocicimiha nsina na Yehova, mwaakhaviheryaka akina ohuserya mikhalelo sootikhiniha sa Muluku ahu. Vaavaa muneeraanyuno yeeyo, munachariha inaani sa Yesu. (1 Pet. 2:21) Hiiha ntoko Yesu, nyuwaano munnamweeriha Yehova okhala oohakalala, mooniheryaka wi mwiicani Awe Satana nawoothe ohinuuliwa muru!

NINNAKHAVIHERYA MU OVULUXA IKUMI VAAVAA NNACICIMIHAAHU NSINA NA YEHOVA

14-15. Ichu taani sootikhiniha inahaala weereya vaavaa nnaahusihaahu achu vooloca sa Yehova?

¹⁴ Vaavaa nnacicimihaahu nsina na Yehova, ninnakhaviherya ovuluxa ikumi. Mwawiihai? Chiryene, Satana “ooruuhela evaasi muupuwelo wa oohiroromela.” (2 Ako. 4:4) Ntoko yookhumelela, awo anneemererya sawootha sa Satana ntoko iha: Muluku haawo, Muluku toorakamela nave hanaapwacha achu, Muluku tawuuma murima nave onnaahooxa achu aweera soonanara mahiku oothene. Sawootha soothene seiya yoolakelela ene ti ela: oriipiha naari onanariha nsina ni mukhalelo wa Yehova, wi achu ehikhaleno nchuno na omwaacamela yoowo. Nyenya vaavaa nnalaleeryaahu, ninnamweeriha Satana ohaakhwaniherya yoolakelela awe. Ninnaahusiha achu eparipari vooloca sa Tiithi ahu, ncicimihaka nsina naweela na Muluku ahu. Ni yookhumelela taani?

¹⁵ Iparipari sa Masu a Muluku sookhalano owerya otokweene. Vaavaa nnaahusihaahu achu vooloca sa Yehova ni mukhalelo owo oreiye eeparipari, ninnawerya woona echu yootikhiniha. Achu hanawokiwa tho ni sawootha sa Satana nave annapacerya woona mikhalelo saphaama sa Tiithi ahu hiiha ntoko hiyaano. Awo annasareya ni otikhiniheya ni Yehova moorweela wa ikuru sawe sihinamala. (Yes. 40:26) Awo annahuserya omuroromela yoowo nthowa na ororomeleya wawe ohinamala. (Malam. 32:4) Awo annamwaleeliwa moorweela wa miruku sawe sawiixeela. (Yes. 55:9; Aro. 11:33) Nave awo annahakararyeya vaavaa anasuwelaaya wi owo mwaneene a osivela. (1 Yoh. 4:8) Vaavaa anamwaacamelaaya Yehova, ewehereryo aya ya okhala okhala wookhala ntoko anamwane awe ennakhala yeeparipari. Ela ekari etokweene nryaahuno yawaakhaviherya achu wi emwaacamele Tiithi aya! Vaavaa nneeraahuno yeeyo, Yehova onnanoona ntoko “anamuteko akhwaawe.”—1 Ako. 3:5, 9.

16. Achu akina anavoloweliwa hai vaavaa anahuseryaaya nsina na Muluku? Mvahe yootakiherya.

 ¹⁶ Woopaceryani nnanwerya pahiru waahusiha achu wi nsina na Muluku ti Yehova. Eyo pahiru enanwerya otannya murima mwawiixeela wa muchu yoowo ori oororomeleya. Ntoko yootakiherya, namwali mmoha awiichaniwa Aliyahi b yoowo ophwiiwale mu emusi yaarino malapelo yaawo yahaahusiha orweela Mpiipiliyani. Nyenya owo haasiveliwa ni malapelo awe nave hiisoona okhala awaacameleya. Eyo yaahitorokeya vaavaa aapacenryeiye ohuserya ni anamoona a Yehova. Owo aapacerya omoona Muluku ntoko nthamwene awe. Owo aahikacamiheya vaavaa aasuwenleiye wi nsina na Muluku naahivinyihiwamo mu Apiipiliya ancipale nave nraceelihiwa ni masina a ncicimiho ntoko Apwiya. Ohuserya nsina na Yehova yaari echu yaatoronke okumi awe. Owo aahitikhiniheya: “Nthamwene aka aphaama ookhalano nsina!” Ni yookhumelela taani? Owo ooloca: “Vano kookhalano murecele wawaaca mmurimani mwaka. Nave tho kinniisoona okhala oocicimiheya.” Mulopwana mmoha awiichaniwa Esteve aari mulipa awiipa yoowo aarweela mmuyareryiwo wa Ayuta ookhapelela. Owo haachuna opaka makupa a ekerexa nthowa nawi aahoona sawootha sincipale. Mwawiihiiha, amamaawe emanle okhwa, owo aaheemererya yoohuserya ya Piipiliya yeecihiwa ni mmoha a Anamoona a Yehova. Owo aahitannyeyaxa murima vaavaa owo aahusenryeiye nsina na Muluku. Owo ooloca: “Miyaano nkantonko ohuserya nsina na Muluku.” Owo onnaaceererya: “Ela ekwaha yoopacerya wiiwexexa wi Muluku teeparipari! Miyaano kaamoona ntoko muchu. Kaahisuwela vano wi kaahimphwanya nthamwene.”

17. Ntakhara heeni nyuwaano muri oolakelela otitelela ocicimiha nsina na Yehova? (Moone tho eruku.)

¹⁷ Mmuteko anyu wa olaleerya ni ohusiha, nyuwaano munnaaleela achu nsina naweela na Yehova? Nyuwaano munnaakhaviherya achu woona mukhalelo Muluku ahu oryeiye eeparipari? Mwaawerakano yeeyo nyuwaano munnacicimiha nsina na Muluku. Mutitelele ocicimiha nsina naweela na Yehova, mwaakhaviheryaka achu osuwela muchu onakuxa nsina nenlo. Mmukhalelo yoola, nyuwaano munahaala ovuluxa ikumi. Nyuwaano munahaala ochariha yootakiherya ya Mwene anyu Yesu Kristu. Nave opwaha soothene, munahaala omuhakalaliha Tiithi anyu oosivela, Yehova. Mutitelele ‘ocicimiha nsina nawe mahiku oothene!’—Sal. 145:2, PMM.