1-2. Hadia zanolo yaʼita irege aboto ba dödöda hewisa dödö Yehowa me lataʼunöisi döinia?

 KHALAIGÖ daʼa: So samösa zi fahuwu khöu samöbögö si lö duhu sanandrösa khöu. So ösa niha si faduhu tödö ba daʼö ba lafuli latutunö ia ba niha böʼö. Lua-luania, itugu ato niha si faduhu tödö ba walimosa andrö. Tola tekiko döi si sökhi niʼokhögömö börö zi lö duhu andrö ba lawaʼö niha wa yaʼugö niha si lö sökhi. Hewisa dödömö? Tatu manö abu dödömö.—Amd. 22:1.

² Simane daʼö nirasoi Yehowa me lataʼunöisi döinia. So samösa malaʼikania sangumaʼö falimosa sanandrösa khönia. Ifaʼema daʼö khö Khawa, ira alawe siföföna. Faduhu dödö Khawa, ba gafuriata yaʼia hegöi foʼomonia mamadaö ira khö Yehowa. Lua-luania, fefu niha göna ira horö hegöi faʼamate. (1 Mo. 3:1-6; Rom. 5:12) Fefu gabula dödö salua ba gulidanö andre, simane faʼamate, fasuwöta hegöi famakao, alua daʼö börö lua-lua walimosa nifaʼema Zatana ba Kabu Edena. Hewisa dödö Yehowa? Tatu afökhö sibai dödönia ba ngawalö niböbögö khönia hegöi lua-lua moroi ba walimosa andrö. Hizaʼi, Yehowa andrö tenga Lowalangi sofönu-fönu mazui safönu fatiusa. Lö tebulö yaʼia andrö ”Lowalangi somuso tödö”.—1 Ti. 1:11.

3. Hadia döi si sökhi niʼokhögöda?

³ Taʼokhögö döi si sökhi me tola fao ita ba wangamoniʼö töi Yehowa. Lalania yaʼia na taʼoʼö goroisa andre, ”Misuno döi Yehowa.”  (Si. 113:1) Eluahania, moguna tatutunö zi sökhi sanandrösa khönia. Hadia omasiʼö öfalua daʼö? Datatutunö tölu dane-dane samarou tödöda ba wanuno töi Lowalangi soroi ba dödö.

TOLA TAʼOMUSOIʼÖ DÖDÖ YEHOWA

4. Hana wa omuso dödö Yehowa na tasuno ia? Beʼe duma-duma. (Faigi göi gambara.)

⁴ Omuso dödö Namada si so ba zorugo na tasuno ia. (Si. 119:108) Hizaʼi, hadia daʼö geluahania wa Lowalangi sebua kuaso andrö fakhili ira niha si lö moʼahonoa irege moguna khönia wanuno mazui mubeʼe khönia wamarou dödö? Tenga. Khalaigö so samösa nono side-ide si fagohi khö namania, italagui namania andrö ba imane, ”Bapagu wondrege zi sökhi ba zi sagörö ulidanö!” Tatu omuso sibai dödö namania. Hadia mbörö? Hadia börö me omasi namania andre nizuno-zuno, mazui hadia awena omuso dödönia na isuno ia ononia? Tenga. Omuso dödönia börö me iʼomasiʼö ba ifosumange ia ononia andrö. Iʼila wa tola möi fanolo nononia daʼö enaʼö tobali ia niha somuso tödö. Simane daʼö göi Yehowa, Amada fondrege zi sökhi, omuso göi dödönia na tasuno ia.

5. Na tasuno döi Lowalangi, hadia nifaduhuʼöda? Tutunö.

⁵ Na tasuno Namada si so ba zorugo, eluahania no fao ita ba wamaduhuʼö wa fasala niböbögö Zatana sanandrösa khöda. Iwaʼö Satana wa lö hadöi niha si lö faröi ba wangoʼawögö töi Lowalangi, ba hasambalö taröi Lowalangi na göna ita fanandraigö. Moloʼö Satana, hasambalö mamadaö ita khö Lowalangi na taʼila wa sohare ita daʼö. (Yob. 1:9-11; 2:4) Hizaʼi, lö faröi Yobi, ba ifaduhuʼö wa si falimo Zatana. Hewisa göi ita? Dozi ita tola taʼoʼawögö döi Namada ba taʼomusoiʼö dödönia na lö tebulö tafosumange ia. (Amd. 27:11) Sindruhu-ndruhu no töi sebua daʼö.

6. Hewisa woloʼöda Razo Dawido hegöi niha Lewi? (Nehemia 9:5)

⁶ Niha sangomasiʼö Lowalangi, tefarou dödöra ba wanuno töinia soroi ba dödö. Imane Razo Dawido, ”Daʼusuno Yehowa; yaʼisuno tödögu maʼasambua döinia niʼamoniʼö.” (Si. 103:1) Iʼila Dawido wa fanuno töi Yehowa eluahania manuno Yehowa samösa, börö me moʼamakhaita döi Yehowa andrö ba mbua-buania si sökhi hegöi amuatania sahöli-höli dödö. Ba wamaigi Dawido, teʼamoniʼö sibai döi namania, ba omasi ia isuno daʼö. Omasi ia ifalua daʼö ’soroi ba dödönia maʼasambua’. Simane Dawido, no tobali duma-duma si sökhi göi ndra niha Lewi ba wanuno töi Yehowa. Si fao fangide-ngideʼö lafaduhuʼö wa lö  hadöi fehede si tola mangoromaʼö fanuno ba döi Yehowa niʼamoniʼö. (Baso Nehemia 9:5.) Tatu omuso sibai dödö Yehowa na irongo lasuno ia soroi ba dödö ira niha sangokhögö fangide-ngideʼö.

7. Hewisa lalada ba wanuno Yehowa ba wanuriaigö hegöi ba waʼauri sero maʼökhö?

⁷ Sambua lala si tola tafalua ba wangomusoiʼö tödö Yehowa yaʼia daʼö na tafadunö-dunö sanandrösa khönia. Moroi ba wehededa oroma wa taʼomasiʼö ba taʼandrö saohagölö khönia. Ba wanuriaigö, moguna tatörö tödöda wa ohitö dödöda siföföna yaʼia daʼö tatolo niha böʼö enaʼö ahatö ira khö Namada safönu faʼomasi ba laʼokhögö waʼaboto ba dödö simane yaʼita. (Yak. 4:8) Omasi ita taforomaʼö khöra hadia niwaʼö Zura Niʼamoniʼö sanandrösa khö Yehowa hegöi bua-buania si sökhi. Duma-dumania, yaʼia andrö Lowalangi safönu faʼomasi, faʼatulö, faʼatua-tua ba safönu faʼabölö. Tola göi tafosumange Yehowa ba taʼomusoiʼö dödönia na taforege woloʼö nifaluania. (Ef. 5:1) Daʼö gamaehutada ba gulidanö si lö sökhi andre. Tola manö lanehe-nehegö ita ba omasi ira laʼila hadia mbörö wa faehu ita. (Mat. 5:14-16) Ba ginötö fahuhuo ita, tola tatutunö khöra wanema linia. Buania, tola adöni dödö niha satulö tödö ba wangokhögö faʼaboto ba dödö sanandrösa khö Lowalangida. Tobali, na tasuno Yehowa ba lala daʼa, no taʼomusoiʼö dödönia.—1 Ti. 2:3, 4.

TOLA TAʼOMUSOIʼÖ DÖDÖ YESU

8. Hana wa no duma-duma si sökhi Yesu ba wanuno töi Yehowa?

⁸ Ba zorugo hegöi ba gulidanö, lö hadöi sabölö mangila sanandrösa khö Yehowa baero Nononia. (Mat. 11:27) Iʼomasiʼö sibai Namania Yesu, ba omasi ia tobali duma-duma ba wanuno töi Yehowa. (Yoh. 14:31) Ba wangandrönia ba mbongi fatua lö mate ia, imane Yesu, ”No uʼombakhaʼö khöra döimö.” (Yoh. 17:26) Daʼö nifalua Yesu sagötö wamaluania halöwönia ba gulidanö. Hewisa lalania?

9. Hadia gamaedola nitutunö Yesu enaʼö abölö aboto ba dödö niha sanandrösa khö Namania?

⁹ Tenga asala ifatunö ba niha Yesu wa töi Lowalangi andrö Yehowa. No laʼila daʼö ira niha Yahudi nifahaʼö Yesu. Hizaʼi, ihaogö wamatunö Yesu enaʼö abölö aboto ba dödö niha böʼö sanandrösa khö Namania. (Yoh. 1:17, 18) Duma-dumania, ba Mbuku Niʼamoniʼö Heberaiʼo oroma wa Yehowa andrö sahakhö tödö ba si sökhi böwö. (2 Mo. 34:5-7) Ifuli itandrösaigö daʼö Yesu yaʼia me itutunö gamaedola sanandrösa ba nono si taya. Me ifalalini gera-erania ono daʼö ba ifuli ia khö namania, ”iʼila ia amania moroi ba zaröu” ba ilau fagohi ba wamalukhaisi ononia andrö. Italagui ia amania ba iʼefaʼö zala nononia. Moroi ba duma-duma daʼa, tola taʼila waʼahakhö dödö hegöi faʼasökhi dödö niforomaʼö Yehowa.—Luk. 15:11-32.

10. (a) Hezo taʼila wa iʼogunaʼö Yesu döi Namania, ba omasi ia na lafalua daʼö niha böʼö? (Mareko 5:19) (Faigi göi gambara.) (b) Hadia zomasi Yesu enaʼö tafalua?

¹⁰ Hadia omasi Yesu na laʼogunaʼö niha döi Namania? Tatu manö. Me luo daʼö, so ösa ndra sondröniaʼö agama sangumaʼö wa tebai latötöi döi Lowalangi börö me niʼamoniʼö daʼö. Hizaʼi, lö tefaudu daʼö ba Daromali Lowalangi. Börö daʼö, lö itehe Yesu tobali fanaisinia daʼö ba wamolakhömi töi Namania. Nehegö duma-duma tanö böʼö. Me ifadöhö Yesu zi samösa ira matua nifakao malaʼika si lö sökhi ba mbanua Gerasa, agataʼu niha ba laʼandrö khö Yesu enaʼö iröi mbanuara. (Mrk. 5:16, 17) Hizaʼi, omasi Yesu na tehöngö döi Yehowa ba daʼö. Börö daʼö fatua lö mofanö ia, iʼandrö khö ndra matua si no ifadöhö andrö  enaʼö ifatunö daʼö ba niha sato, tenga sanandrösa ba nifalua Yesu, hizaʼi ba nifalua Yehowa. (Baso Mareko 5:19.) a Iadaʼa, omasi göi Yesu na tafatunö döi Namania ba zi sagörö ulidanö. (Mat. 24:14; 28:19, 20) Na tafalua daʼö, no taʼomusoiʼö dödö Yesu, Razoda.

11. Hadia nifahaʼö Yesu sinangea laʼandrö ira nifahaʼönia, ba hana wa moguna daʼö? (Hezekieli 36:23)

¹¹ Iʼila Yesu wa omasi Yehowa na teʼamoniʼö döinia, mazui muheta ba hulunia fefu zi lö duhu niböbögö ba döinia andrö. Andrö wa ifahaʼö ndra soloʼö khönia Yesu ba wangandrö, ”He Ama khöma si so ba zorugo, yateʼamoniʼö döimö.” (Mat. 6:9) Iʼila Yesu wa daʼa gamadöniwa sabölö ebua ba gomböila dangania maʼafefu. (Baso Hezekieli 36:23.) Ba zi sagörö ulidanö, abölö oya noro dödö Yesu ba wangamoniʼö töi Yehowa. Ba wamaiginia, no horö fondrege zebua na laʼoʼaya mazui laböbögö zi lö duhu ba döi Namania. Hizaʼi, me laraʼu ia, hadia niböbögö khönia? Laböbögö khönia wa no iʼoʼaya Lowalangi! Daʼö mbörö wa ”abu sibai dödönia” lö ara fatua lö laraʼu ia. Tefakao dödönia börö me ba zi lö ara tö laböbögö khönia zi lö duhu andrö.—Luk. 22:41-44.

12. Hadia zalua sahöli-höli dödö nifalua Yesu ba wangamoniʼö töi namania?

¹² Ba wangamoniʼö töi Namania, anau gölö Yesu hewaʼae laböbögö khönia zi lö duhu, göna ia famakao, folohi hegöi fangoʼaya. Iʼila wa lö tebulö iʼoʼö niwaʼö Namania ba lö moguna aila ia. (Heb. 12:2) Iʼila göi wa iforege Satana ba wolawa yaʼia ba ginötö sabua andrö. (Luk. 22:2-4; 23:33, 34) Tatu itötöna Satana wa tola idönisi dödö Yesu irege faröi ia. Hizaʼi, lö mofozu Zatana! Ifaduhuʼö Yesu wa Satana andrö si falimo fondrege zi lö sökhi, ba so genoni Yehowa si lö faröi khönia hewaʼae göna ira fanandraigö sebua!

13. Hadia zinangea tafalua ba wangomusoiʼö tödö Razoda?

¹³ Hadia omasiʼö öʼomusoiʼö dödö Razoda? Na simanö, böi böhöli wanuno töi Yehowa. Tolo niha böʼö enaʼö laʼila hewisa ia andrö sindruhunia. Na öfalua daʼö, no öʼoʼö duma-duma Yesu. (1 Fe. 2:21) Omusoiʼö dödö Yehowa ba faduhuʼö wa udunia Satana, no si falimo si lö faʼaila!

 TOLA FAO ITA BA WANGORIFI NIHA BÖʼÖ

14-15. Hadia mbuania na tafahaʼö niha sanandrösa khö Yehowa?

¹⁴ Na tasuno döi Yehowa, eluahania no fao ita ba wangorifi niha böʼö. Hadia mbörö? Törö tödöu wa Satana ”no ibalugö gera-era [niha]”. (2 Ko. 4:4) Lua-luania, faduhu dödöra ba walimosa Zatana sangumaʼö: Lö hadöi Lowalangi; fandröndröu Lowalangi moroi khöda ba lö iʼameʼegö tödö ita; lö sökhi Lowalangi andrö ba ifakao niha si lö sökhi sagötö faʼara. Ifazaewe walimosa andrö ba wanaʼunöisi töi Yehowa ba enaʼö lö omasi niha fahuwu khö Lowalangi. Hizaʼi, fanuriaigö nifaluada, daʼö zamakiko niʼera-era Zatana. Tafahaʼö zindruhu ba niha sanandrösa khö Namada ba tasuno döinia niʼamoniʼö. Hadia mbuania?

¹⁵ Sindruhu si so ba Daromali Lowalangi ebua sibai lua-luania daʼö. Na tafahaʼö niha sanandrösa khö Yehowa hegöi bua-buania, tola taʼila mbua sahöli-höli dödö. Lö saʼae balunö ira ba walimosa Zatana, ba tola laʼila wa Yehowa andrö Ama safönu faʼomasi, fagölö simane nirasoida. Ahöli-höli dödöra börö waʼabölö Yehowa si lö ola. (Yes. 40:26) Ibörögö faduhu dödöra khönia börö waʼatulönia soʼahonoa. (5 Mo. 32:4) Oya wamahaʼö nihalöra moroi ba waʼatua-tuania sebua. (Yes. 55:9; Rom. 11:33) Ba adöni sibai dödöra me laʼila wa Lowalangi andrö no faʼomasi. (1 Yo. 4:8) Na itugu aboto ba dödöra sanandrösa khö Yehowa, itugu faduhu dödöra wa tola auri ira sagötö faʼara tobali iraononia. Sindruhu wa no töi sebua khöda ba wanolo niha böʼö enaʼö aboto ba dödöra sanandrösa khö Namara! Ba ginötö tafalua daʼö, ba wamaigi Yehowa no ”si falulu fohalöwö” ita khönia.—1 Ko. 3:5, 9.

16. Hadia mbuania na laʼila niha döi Lowalangi? Beʼe duma-duma.

¹⁶ Siföföna si tola tafahaʼö ba niha yaʼia daʼö töi Yehowa. Sindruhu-ndruhu möi famarou dödö niha satulö tödö daʼö. Duma-dumania, nehegö zalua khö zi samösa ono alawe sotöi Aaliyah b niʼebuaʼö ba agama si lö mamaduhusi  tödö Sura Niʼamoniʼö. Lö ahono dödönia ba agamania ba irasoi wa fandröndröu ia moroi khö Lowalangi. Hizaʼi, me no ifahaʼö ia ba Zura Niʼamoniʼö khö ndra Samaduhuʼö Yehowa, ibörögö irasoi wa tola fahuwu ia khö Lowalangi. Tokea ia me iʼila wa no muheta döi Lowalangi ba zi hawaʼoya Zura Niʼamoniʼö ba lafalalini daʼö faoma töi ba faka, simane Soʼaya mazui Lowalangi. Tebulö waʼaurinia me no iʼila döi Yehowa. Imane, ”Awena uʼila wa so döi zi Fahuwu khögu! No töi sebua khögu daʼa. Ba urasoi waʼahono dödö iadaʼa.” Nehegö göi zalua khö Steve, samösa niha sonekhe ba musik niʼebuaʼö ba nösi nomo agama Yahudi. Lö omasi ia fao ba organisasi agama börö me oya sibai walimosa niʼilania ba daʼö. Hizaʼi, me irasoi waʼabu dödö börö waʼamate ninania, ihalö gangetula ba wamondrondrongo famahaʼö ba Zura Niʼamoniʼö nidöniaʼö zi samösa Samaduhuʼö Yehowa. Adöni sibai dödönia me irongo wa so döi Lowalangi. Imane, ”Awena sibai urongo döi Lowalangi. Daʼa zi oföna sibai aboto ba dödögu wa sindruhu-ndruhu so ia ba tola uʼila sanandrösa khönia! Ba ginötö daʼö teboka gera-eragu wa tola tobali si Fahuwu khögu Lowalangi.”

17. Hana wa moguna öʼosambuaʼö dödömö ba wanuno töi Yehowa irugi zi lö aetu? (Faigi göi gambara.)

¹⁷ Ba ginötö tafalua wanuriaigö hegöi famahaʼö ba Zura Niʼamoniʼö, hadia öfatunö ba niha böʼö sanandrösa ba döi Yehowa niʼamoniʼö? Hadia ötolo ira enaʼö laʼila hewisa Lowalangi andrö sindruhunia? Na öfalua daʼö, no ösuno döi Lowalangi. Yalöʼöböhöli wanuno töi Yehowa niʼamoniʼö, ötolo niha böʼö ba wangokhögö faʼaboto ba dödö sanandrösa khönia. Na öfalua daʼö, no fao ndraʼugö ba wangorifi niha böʼö, no öʼoʼö duma-duma nibeʼe Razoda Yesu Keriso, ba sabölö tohude, no öʼomusoiʼö dödö Namada safönu faʼomasi, Yehowa. Yalötebulö ’ösuno döi Yehowa götö-götö waʼara’!—Si. 145:2.