1-2. Teka eky’erileberyako ekikakanganaya ngoko Yehova akayowa busana n’amabehi agho babirimubughako.

 TERILENGEKANIA oko kino: Omundu mulebe anemukubughako emyatsi ey’amabehi. Iwe unasi ngoko ni mabehi; aliwe abandu balebe banemwikiriryagho. Eky’obulighe, nabo bamatsuka erilalaghania emyatsi y’amabehi eyo, neryo n’abandi n’abo bamatsuka erikiriryayo. Wangayowa ghuti? Wamabya ighutsomene ebyo abandi bakabugha okw’iwe kandi iwanzire eriteya erina lyaghu, amabehi ayo inyakendileka iwayowa muhanda.​—Misyo 22:1.

² Eky’erileberyako ekyo, kyanganatuwatikya eriminya ngoko Yehova mwayowa omughulu babugha muhanda oko rina liwe. Omughuma w’oko bamalaika biwe mwabwira omukali w’erimbere ye Eva y’amabehi oko Mungu. Eva naye mwikiriryagho. Amabehi ayo mwaleka Adamu na Eva ibayisamambula oko Yehova. N’ekyo mukyaleka erilolo n’oluholo ibyabya oko bandu bosi. (Enz. 3:1-6; Rom. 5:12) Emyatsi mibi yosi eyo tukalangira omo kihugho munabwire ng’oluholo, amalwa n’eryaghalwa, biriho kundi Sitani mwatsuka eribugha amabehi omo ririma lye Edeni. Yehova akanayowa muhanda busana n’amabehi ayo n’eyindi myatsi mibi eyalwira mugho? Ahate eritika-tika, akayowa muhanda. Nomo bine bitya, Yehova syalisighala inyanakapikire, kutse syalibika ekinigha. Omo mwanya w’ekyo, akasighala mo “oMungu w’obutseme.”​—1 Tim. 1:11.

3. Tuwite olusunzo lwahi?

³ Twanganawatikya erikangania ngoko Sitani mwabugha emyatsi y’amabehi oko Yehova. Tukakola tutya omwisikya ekyalayiro kino: “Mupipe erina lya [Yehova].” (Esy. 113:1) Tukapipa erina lya Yehova omughulu tukabwira abandi emyatsi eyuwene okw’iye. Naghu ukendipipa erina lya Yehova? Muleke tulangire emyatsi isatu eyangatukuna eripipa erina lya Yehova n’omutima wetu wosi.

 TUKATSEMESAYA YEHOVA OMUGHULU TUKAPIPA ERINA LIWE

4. Busanaki Yehova akatsema omughulu tukamupipa? Teka eky’erileberyako. (Ulebaye n’epitsa.)

⁴ Tukatsemesaya Tata wetu w’elubula omughulu tukapipa erina liwe. (Esy. 119:108) Ekyo kinasondire eribugha kiti oMungu ali ng’abandu abatahikene abakanza bati abandi bapipebo kundi balaghire okw’isikibwa? Iyehe. Tuteke eky’erileberyako. Akasika kalere kamatimbya ebyala byako oko bikya bya baba wako n’erimubwira kati: “Baba, omo kihugho kyosi simuli baba oyuwene ngawe!” Neryo Tata oyo amaseka n’obutseme. Busanaki? Sibusana alaghire okw’isikibwa kutse eripipwa ly’akasika kiwe. Aliwe ni busana anzire akasika kiwe, kandi akatsema akalangira ngoko kakamukanganaya olwanzo n’erisima. Anasi ngoko emibere eyo ikendisyawatikya omwana wiwe oyo abikula. Yehova, Tata wetu w’elubula naye kw’akatsema atya omughulu tukamupipa.

5. Omughulu tukapipa Yehova, ni mabehi wahi wo tukabisula?

⁵ Omughulu tukapipa Tata wetu w’elubula, ekyo kikawatikaya erikangania ngoko awandi mabehi agho Sitani abugha ok’obuli mughuma w’okw’itwe si kwenene. Sitani mwabugha ati sihali omundu n’omughuma oyo wangasighala mutaleghula oko Mungu omughulu amalengwako. Sitani mwabugha ati obuli mughuma w’okw’itwe amabilangira isyendibana endundi omwikolera Yehova inyakendileka erimukolera. (Yobu 1:9-11; 2:4) Aliwe, omutaleghula Yobu mwakangania ngoko Sitani ni mubehi. Naghu ukendisighala mutaleghula oko Mungu? Obuli mughuma w’okw’itwe anganasombola eribya oko luhande lwa Tata wetu w’elubula n’erimutsemesya omwimukolera butaleghula. (Misyo 27:11) Olo ni lusunzo lunene!

6. Twangigha tuti Omwami Daudi n’Abalawi? (Nehemia 9:5)

⁶ Abandu abanzire oMungu bakanza eripipa erina liwe n’omutima wabo wosi. Omwami Daudi mwahandika ati: “Uwe mutima wage, upipe [Yehova]! Ebyosi ebiri omwisi wage bipipe erina liwe libuyirire.” (Esy. 103:1) Daudi inyasi ngoko eripipa erina ly’oMungu ni pipa oMungu iyuwene-wene. Omughulu tukowa erina lya Yehova tukalengekanaya oko mibere yiwe mibuya n’oko mikolere yiwe eyikaswekaya. Daudi abya anzire eriyira erina lya Tata wiwe mo libuyirire n’eripiparyo. Abya anzire ati “ebyosi ebiri omwisi” siwe bipipe erina lya Yehova, ni bugha ambu omutima wiwe wosi. Kutya n’Abalawi nabo ibakapipa Yehova. Aliwe, omwiyikehya  mubabugha ngoko ebinywa byabo sibyangatoka eripipa erina ribuyirire lya Yehova ngoko litolere. (Soma Nehemia 9:5.) Ahate eritika-tika, ebinywa eby’eriyikehya kandi ebikalua oko mutima eby’eripipa Yehova ebyo mubyamutsemesya.

7. Twanganapipa Yehova yo tuti omughulu tukatulira n’omughulu tuli n’abandi?

⁷ Munabwire, twanganatsemesya Yehova omwikania okw’iye omo nzira eyikakanganaya ngoko tukamusima kandi tumwanzire kutsibu. Omughulu tukatulira tukanza eriwatikya abandi eriyitunda hakuhi na Yehova n’eriyowa ngoko tukayowa busana na Tata wetu w’olwanzo. (Yak. 4:8) Tukatsema tukakangania abandu ebyo eBiblia ikabugha oko mibere ya Yehova ng’olwanzo, eritunganene, amenge, akaghala n’eyindi mibere eyuwene. Kandi, tukapipa Yehova n’erimutsemesya omughulu tukayikasa erimwigha. (Efe. 5:1) Omughulu tukakola tutya, tukasighala itunasikire omo kihugho kibi kino. Abandu banganayilangirira ngoko situbasosire, neryo ibatsuka eritubulya busanaki situbasosire. (Mat. 5:14-16) Omughulu tukabya kughuma nabo, twanganababwira ebikaleka itwabya n’emibere eyitasosire yabo. Ekyo kyanganakuna ab’emitima eyuwene eryasa ok’oMungu wetu. Omughulu tukapipa Yehova omo syonzira esyo, tukatsemesaya omutima wiwe.​—1 Tim. 2:3, 4.

TUKATSEMESAYA YESU OMUGHULU TUKAPIPA ERINA LYA YEHOVA

8. Busanaki tukabugha tuti Yesu yo mundu w’erimbere oyuwanzire eripipa erina lya Yehova?

⁸ Sihali omundu omo lubula kutse oko kihugho oyuwasi ndeke Yehova nga Yesu. (Mat. 11:27) Yesu anzire Tata wiwe, kandi iye yo mundu w’erimbere oyuwanzire eripipa erira lya Yehova. (Yoh. 14:31) Omo kiro eky’ekiro ekyatangirira oluholo lwiwe, Yesu mwasaba Tata wiwe akamukangania omwatsi w’omughaso munene ogho amabikola oko kihugho kino ati: “Nabiriminyisyabo erina lyaghu.” (Yoh. 17:26) Yesu asonda eribugha atiki?

9. Yesu mwakolesya omusyo wahi eriminyikalya ndeke-ndeke Tata wiwe oko bandu?

⁹ Yesu mwatakangania lisa abandu ngoko erina ly’oMungu ni Yehova. Abayahudi ababya akabugha nabo ibanasi erina ry’oMungu. Aliwe Yesu yo wabya w’erimbere erimuminyikalya. (Yoh. 1:17, 18) Ng’eky’erileberyako, Amasako w’Ekiebrania akakanganaya ngoko Yehova akaghanyira n’erikwira abandu b’obulighe. (Eril. 34:5-7) Yesu mwaminyikalia omwatsi oyo gho ndeke-ndeke omo musyo w’omwana oyo wahera, na tata wiwe. Omughulu tukasoma ngoko omwana oyo abere abiyisubako mwahongoka n’erisuba eyiri baba wiwe, “iniakine hali, baba wiwe mwamulangira,” amatibita eyali n’erimukumbatira n’erimughanyira n’omutima wosi; ekyo kikakanganaya ngoko Yehova akaghanyira n’erikwira abandu b’obulighe. (Luka 15:11-32) Yesu mwawatikya abandu eriminya Yehova yo ndeke-ndeke.

10. (a) Tukaminya tuti ngoko Yesu inyakakolesaya erina lya Tata wiwe kandi inyanzire abandi nabo babye bakakolesyalyo? (Mariko 5:19) (Ulebaye n’epitsa.) (b) Yesu anzire itwakolaki munabwire?

¹⁰ Yesu anabya anzire abandi bandu bakolesaye erina lya Tata wiwe? Inga. Alinga abakulu balebe b’ebisomo ibikirirye bati eryahula erina ly’oMungu si sikyalyo; aliwe Yesu mwatalighira amalengekania awatuwene ayo awataseghemere Amasako erimukakirya eripipa erina lya Tata wiwe. Tulebaye ebyahuluka omughulu Yesu alamaya omulume oyowabyako esyombinga omo kiharo ky’Abagerase. Abandu mububaha, neryo bamatsuka eribwira Yesu bati alue omo kiharo kyabo, naye  mwatasighala mukyo. (Mar. 5:16, 17) Aliwe, Yesu abya anzire abandu b’eyo ibaminya erina lya Yehova. Busana n’ekyo, mwabwira omulume oyo alamaya ati abwire abandi ngoko Yehova yuwamulamaya butsira Yesu. (Soma Mariko 5:19.) a Netu Yesu anzire itwakola tutya munabwire, ni bugha ambu eriminyisya erina lya Tata wiwe omo kihugho kyosi! (Mat. 24:14; 28:19, 20) Omughulu tukakola ekyo tukatsemesaya Omwami wetu, Yesu.

11. Yesu mwakangirirya abigha biwe eribya bakasabaki, kandi ngoko kiri omo Ezekieli 36:23, busanaki ekyo ni ky’omughaso?

¹¹ Yesu abya asi ndeke ngoko erisonda lya Yehova lyabya eriyira erina liwe mo ribuyirire n’eryeryaryo oko mabehi wosi owabiribuwa kulyo. Ekyo kyo kyaleka Omukama wetu inyakangirirya abigha biwe erisaba bati: “Tata wetu oyuli elubula, erina ryaghu riyirawe mo libuyirire.” (Mat. 6:9) Yesu abya asi ngoko oyo w’omwatsi w’omughaso munene ogho obuli mundu atolere erikola. (Soma Ezekieli 36:23.) Omo bihangyikwa byosi ebiwite obwenge, sihali omundu oyowabiriyira erina lya Yehova mo ribuyirire nga Yesu. Aliwe, esyonzighu siwe syabere syamuhamba musyamutsongera siti akatsuma erina lya Tata wiwe! Yesu abya asi ndeke-ndeke ngoko eritendisikya kutse eribugha amabehi oko rina libuyirire lya Tata wiwe ni rilolo rinene kutsibu. Yesu mwahangya-hangya akalangira ngoko oyo gho musango ogho bakendimuhirako. Alinga ekyo ni ky’oko bikulu-bikulu ebyaleka Yesu inyaghalwa kutsibu omo mutima bakasonda erimuhamba.​—Luka 22:41-44.

12. Yesu mwakola emyatsi yahi erikangania ngoko akayira erina lya Tata wiwe mo ribuyirire?

¹² Eriyira erina lya Tata wiwe mo libuyirire, Yesu mwayiyinia omo myatsi mibi ng’erihunzwa, eritsumwa n’eribuwako amabehi. Abya asi ndeke ngoko abirikola erisonda lya Tata wiwe omo myatsi yosi; neryo isihakiri omwatsi owangaleka inyahemuka. (Ebr. 12:2) Kandi abya asi ngoko Sitani yukamulengako omo mighulu eyikalire eyo. (Luka 22:2-4; 23:33, 34) Sitani yabya yikalengekania yiti Yesu akendileghula; aliwe muyamutalukako! Yesu mwakangania ndeke-ndeke ngoko Sitani ni mubehi kandi ngoko Yehova awite abaghombe biwe abakasighala bataleghula okw’iye nibya n’omughulu bamalengwako kutsibu!

13. Wangatsemesya wuti Omwami waghu oyunemutabala?

 ¹³ Unanzire eritsemesya Omwami waghu oyunemutabala munabwire? Ulole embere eripipa erina lya Yehova ukawatikya abandi eriminya emibere mibuya y’oMungu wetu. Omughulu ukakola utya ukabya ighunemukwama ndeke-ndeke olughobe lwa Yesu. (1 Pet. 2:21) Nga Yesu, naghu unemutsemesya Yehova n’erikangania ngoko enzighu Yiwe Sitani ni kibehi ekitikwisoni!

OMUGHULU TUKAPIPA ERINA LYA YEHOVA TUKAWATIKAYA ERISABULA ESYONGEBE

14-15. Ni myatsi yahi mibuya eyo tukayilangirira omughulu tukakangiriraya abandu oko Yehova?

¹⁴ Omughulu tukapipa erina lya Yehova tukawatikaya erisabula esyongebe. Tuti? Sitani “abiriliba obwenge bw’abandu abatikirirye.” (2 Kor. 4:4) Ekyo kyabirileka abandu abo ibikirirya amabehi wa Sitani ng’ano: OMungu syaliyo, oMungu ali hali okw’ite kandi nibya syatsomene abandu, oMungu ni mutsibu kandi akatimaya abakola-nabi b’omo muliro wa kera na kera. Sitani akabugha amabehi wosi ayo n’awandi kundi anzire eritsandirya Yehova y’erina, kandi syanzire abandu bayitunde hakuhi na Yehova. Aliwe, omughulu tukatulira, tukakakiraya Sitani erikola emibiiri yiwe eyo. Omughulu tukakangiriraya abandu ekwenene oko Tata wetu, tukapipa erina ribuyirire ly’oMungu wetu. Ekyo kikaluiramoki?

¹⁵ Amakangirirya w’Ekinywa ky’oMungu awite akaghala kanene. Omughulu tukakangiriraya abandu oko Yehova n’eribakangania ngoko ali kwenene-kwenene, tukayilangirira emyatsi eyikaswekaya. Obulangiti bw’amabehi wa Sitani, bukalwa oko meso wabo ko bolo-bolo, neryo ibatsuka erilangira emibere mibuya ya Tata wetu w’elubula. Bakaswekera akaghala kiwe kanene kutsibu, akatehwa. (Isa. 40:26) Bakabya babilangira eritunganene liwe erihika-hikene, ibigha eriyiketer’iye. (Ebih. 32:4) Bakigha emyatsi mingyi oko menge wiwe manene. (Isa. 55:9; Rom. 11:33) Kandi emitima yabo yikasika babiminya ngoko Yehova ni lwanzo. (1 Yoh. 4:8) Amaha wabo w’erisyabyaho kera na kera nga bana b’oMungu akawata bakalola embere eriyitunda hakuhi na Yehova. Ni lusunzo lunene kundu okw’itwe eriwatikya abandu eriyitunda  hakuhi na Tata wabo w’elubula. Omughulu tukasangira oko mubiiri oyo, “tukakola haghuma n’oMungu.”​—1 Kor. 3:5, 9.

16. Abandu balebe bakayowa bati babiminya erina ly’oMungu? Teka eby’erileberyako.

¹⁶ Omughulu tukahindana n’omundu ery’erimbere, twanganamukangirirya lisa tuti erina ly’oMungu ni Yehova. Eriminya ekyo kisa kyanganaleka ab’emitima eyuwene ibabindula engebe yabo. Eky’erileberyako kya kino, omumbesa mughuma oyukahulawa mo Aaliyah b mwakulira omo kisomo ekitekangiriraya eBiblia. Mwatatsemerakyo kandi inyakalangira nga sikirimuwatikaya eriyitunda hakuhi n’oMungu. Aliwe abere abitsuka erigha n’Abimiri ba Yehova mwatsuka erilangira oMungu mo Mwira wiwe. Kandi mwasweka kutsibu abiminya ngoko, omo Biblia nyingyi erina ly’oMungu lyabirilusibwamo, n’omo mwanya w’erina eryo mwabiriya amena w’olukengerwa ng’erina Mukama. Eriminya erina lya Yehova mukyatula oko ngebe yiwe ko kutsibu. Mwasweka ati: “Kwesi Omwira waghe anawite erina!” Ekyo mukyamutulako kiti? Akabugha ati: “Lino nili n’obuholo bunene omo mutima. Ni lusunzo lunene okw’ingye.” N’oghundi mulwana oyukahulawa mo Steve, inyasi eriimba. Mwakulira omo mibere y’Abayahudi eyikalire. Mwatanza eribya omo kisomo kyosi-kyosi kundi inyakalangira omo bisomo imuli abatebya bangyi. Aliwe, mama wiwe abare abihola mwaligha erihulikirira amakangirirya agho Abimiri ba Yehova babya bakakangirirya omwira wiwe. Mwasweka eriminya erina ly’oMungu. Akabugha ati: “Nabya isiniri natowa n’ekiro n’ekighuma erina ly’oMungu.” Akatasyatomekako ati: “Eyo yabya ngendo yaghe y’erimbere eriminya ngoko oMungu ni mundu oyuliho kwenene-kwenene! Munalunalangira ngoko namabisunga Omwira.”

17. Busanaki uyisohire kundu erilola embere eripipa erina lya Yehova? (Ulebaye n’epitsa.)

¹⁷ Omughulu ukatulira, ukanakaniraya abandu oko rina ribuyirire lya Yehova? Ukanawatikayabo eriminya oMungu wetu ng’ali ati kwenene-kwenene? Omughulu ukakola utya ukapipa erina ly’oMungu. Ulole embere eripipa erina ribuyirire lya Yehova ukawatikya abandu eriminya nga ni mundu oyuly’ati. Omo nzira eyo ukasabula esyongebe. Ukendikwama obusondoli obwa Yesu Kristo, Omwami wetu. N’ekikulu oko byosi ighukenditsemesya Tata wetu w’olwanzo, Yehova. Kwesi uyitsinge eripipa “erina [riwe] kera na kera”!​—Esy. 145:2, NTN62.