1-2. Khuyini engasisiza sizwisise ukuthi uJehova uzizwa njani ngegama lakhe elihlanjalazwako?

 CABANGA ngalokhu: Umuntu omthandako utjho into embi ngawe. Wena uyazi ukuthi akusiliqiniso kodwana abanye bayamkholwa. Ukungezelela kilokho, babuyelela amala lawo begodu abanengi bathoma ukuwakholwa. Ungazizwa njani? Nawunendaba nabantu nesithunzi sakho, kungakuzwisa ubuhlungu lokho, akusinjalo?—IzA. 22:1.

² Ubujamobu bungasisiza sizwisise indlela uJehova azizwa ngayo lokha isithunzi sakhe nasisilaphazwako. Enye yeengilozi zakaJehova yakhuluma amala ngoJehova emfazini wokuthoma, u-Eva. Wawakholwa begodu lokho kwenza ababelethi bethu bokuthoma bahlubuka kuJehova. Ngebanga lalokho, boke abantu baba nesono begodu bagcine sele bafa. (Gen. 3:​1-6; Rom. 5:12) Yoke imiraro esiyibonako ephasini—ukufa, izipi, ukutlhaga—kubangelwe mamala uSathana athoma ukuwakhuluma esimini ye-Edeni. Kghani uJehova uzwa ubuhlungu ngebanga lamala lawo nemiphumela yakhona? Iye. Nanyana kunjalo, uJehova akasimunyu namkha akanayo ihloyo. Kunalokho, uhlala ‘anguZimu othabako.’—1 Thim. 1:11.

3. Sinaliphi ilungelo?

³ Sinelungelo lokuhlanganyela ekuhlwengiseni igama lakaJehova ngokuthi silalele umyalo othi: “Dumisani igama lakaJehova.” (Rhu. 113:1) Sidumisa igama lakaJehova ngokuthi  sitjele abanye ngazo zoke izinto ezihle uJehova azenzako. Kghani uzolidumisa igama lakaJehova? Akhesicoce ngamabanga amathathu azosisiza sidumise igama lakaZimu ngokusuka ehliziyweni.

SITHABISA UJEHOVA NASIDUMISA IGAMA LAKHE

4. Kubayini uJehova athaba nasimdumisako? Fanekisa. (Qala nesithombe.)

⁴ Sithabisa uBabethu wezulwini nasidumisa igama lakhe. (Rhu. 119:108) Kghani lokhu kutjho ukuthi uZimu umninimandla woke ufana nabantu abatlhoga ukudunyiswa ngombana badinga isikhuthazo namkha abazithembi? Awa. Cabanga nganasi isibonelo. Umntazanyana ugijimela uyise, uyamanga begodu uthi kuye, “Ungubaba ophuma phambili ephasini loke!” Ubaba lo uyamomotheka bekuyamthabisa lokho. Kubayini? Kghani kufuze sicabange ukuthi utlhoga isikhuthazo namkha ukudunyiswa mntazanyanakhe? Awa. Kunalokho, kungombana uyayithanda indodakazakhe bekuyamthabisa ukuyibona imthanda beyimthokoza. Ubaba lo uyazi ukuthi ubuntu obunjalo buzokusiza indodakazakhe ihlale ithabile njengombana ikhula. Ngendlela efanako, uJehova, uBabethu omkhulu, uyathaba nasimdumisako.

5. Sibeka maphi amala epepeneneni nasidumisa uJehova?

⁵ Nasidumisa uBabethu wezulwini, sisiza ekwembuleni amanye amala uSathana awakhuluma ngathi soke. USathana uthi akunamuntu ongavikela igama lakaZimu ngokuthembeka. Ngokuya ngaye, akekho kithi othembekileko. Uthi soke sizokujikela uZimu nange ukwenza njalo kuzosizuzisa. (Job 1:​9-11; 2:4) Kodwana uJobho waveza ukuthi uSathana ungumleyimala. Kuthiwani ngawe? Ngamunye wethu unelungelo lokusekela ngokuthembekileko igama lakaBabethu nokumthabisa ngokuthi simlotjhe ngokuthembeka. (IzA. 27:11) Kulilungelo ukwenza njalo.

6. Singayilingisa njani iKosi uDavida namaLevi? (Nerhemiya 9:5)

⁶ Ukuthanda uZimu kwenza abantu abathembekileko badumise igama lakhe ngokusuka ehliziyweni. IKosi uDavida yatlola: “Dumisa uJehova mphefumulwami; koke okungaphakathi kwami akudumise igama lakhe elicwengileko.” (Rhu. 103:1) UDavida bekazwisisa ukuthi ukudumisa igama lakaJehova kufana nokudumisa uJehova ngokwakhe. Nasizwa igama elithi Jehova, sicabanga ngomuntu anguye, ngobuntu bakhe nangezenzo zakhe ezihle. UDavida bekafuna ukucwengisa  nokudumisa igama lakaYise. Bekafuna ukwenza lokho ‘ngomphefumulwakhe’ woke—okutjho ihliziyo epheleleko. NamaLevi enza okufanako, adosa phambili ekudumiseni igama lakaJehova. Ngokuthobeka, avuma ukuthi amezwawo angekhe alidumisa ngokwaneleko igama elicwengileko lakaJehova. (Funda uNerhemiya 9:5.) Siyaqiniseka bona ukuthobeka nokudumisa uJehova okunje kwayithabisa khulu ihliziyo kaJehova.

7. Singamdumisa njani uJehova nasitjhumayelako nekuphileni kwethu?

⁷ Namhlanjesi singathabisa uJehova ngokuthi sikhulume ngaye ngendlela etjengisa ukumthokoza nokumthanda. Nasisesimini, umnqophwethu kukwenza abantu batjhidele kuJehova bebathande uBabethu njengombana nathi simthanda. (Jak. 4:8) Siyakuthabela ukutjengisa abantu indlela iBhayibheli elihlathulula ngayo uJehova, litjengisa ithando lakhe, ubulungiswa, ukuhlakanipha, amandla nobunye ubuntu obuthandekako. Godu, sidumisa uJehova besimthabise ngokuthi senze koke okusemandlenethu ukumlingisa. (Efe. 5:1) Nasenza njalo, siyahluka ephasini elikhohlakelekweli. Abantu bangakubona lokho begodu bazibuze ukuthi kubayini sinjalo. (Mat. 5:​14-16) Njengombana sikhuluma nabo qobe lilanga, sikghona ukubahlathululela bona kubayini sinjalo. Ngebanga lalokho, abaneenhliziyo ezilungileko badoseleka kuZimethu. Nasilotjha uJehova ngendlela le, sithabisa ihliziywakhe.—1 Thim. 2:​3, 4.

SITHABISA UJESU NASIDUMISA IGAMA LAKAJEHOVA

8. Kubayini uJesu asibonelo esiphuma phambili sokudumisa igama lakaJehova?

⁸ Akekho ezulwini nephasini owazi uJehova ukudlula uJesu. (Mat. 11:27) UJesu uyamthanda uYise bewudosa phambili ekudumiseni igama lakaJehova. (Jwa. 14:31) Emthandazwenakhe oya kuYise ngobusuku bangaphambi kokuhlongakala kwakhe, warhunyeza umsebenzakhe wephasini nganasi indlela, wathi: “Ngibazisile igama lakho.” (Jwa. 17:26) Bekatjho ukuthini?

9. UJesu wawusebenzisa njani umfanekiso ukuhlathulula uYise ngendlela ekhanyako?

⁹ UJesu wenza okungaphezu kokutjela abantu ukuthi igama lakaZimu nguJehova. AmaJuda uJesu ebekawafundisa bewalazi igama lakaZimu. Kodwana uJesu wadosa phambili ekutheni kube “nguye omhlathululileko.” (Jwa. 1:​17, 18) Ngokwesibonelo, imiTlolo yesiHebheru iveza uJehova njengonesirhawu nomusa. (Eks. 34:​5-7) UJesu wenza iqinisweli lakhanya nakakhuluma ngomfanekiso wendodana elahlekileko noyise. Nasifunda ngokuthi ubaba uthe nakabona indodanakhe ephendukileko, ‘isesekude’ wagijimela ukuyihlangabeza, wayimanga bewayilibalela ngokusuka ehliziyweni. Lokhu kuveza isirhawu nomusa kaJehova. (Luk. 15:​11-32) UJesu waveza uYise ngendlela angayo.

10. (a) Sazi njani ukuthi uJesu wasebenzisa igama lakaYise nokuthi bekafuna abanye balisebenzise? (Markosi 5:19) (Qala nesithombe.) (b) Khuyini uJesu afuna siyenze namhlanjesi?

¹⁰ Kghani uJesu bekafuna abantu babize uYise ngegama? Kunjalo. Abanye abadosiphambili bekolo kungenzeka bebakholelwa ukuthi kukudelela ukubiza uZimu ngegama kodwana uJesu akhenge avumele amasiko lawo angakasekelwa imitlolweni bona amvimbele ukudumisa igama lakaYise. Cabanga ngalokho okwenzeka nakalapha indoda ebeyinamadimoni esifundeni seGerasene. Abantu bathoma ukwesaba bebabawa noJesu ukuthi akhambe, yeke akhenge ahlale esifundeneso. (Mar. 5:​16, 17) Nanyana kunjalo, uJesu bekasafuna abantu besifundeneso balazi  igama lakaJehova. Yeke, wayala indoda ayilaphileko leyo bona iyokutjela abantu, ingasi ngalokho okwenziwe nguJesu kodwana ngalokho uJehova ayenzele khona. (Funda uMarkosi 5:19.) a Nanamhlanjesi, usafuna bona senze igama lakaJehova laziwe ephasini loke! (Mat. 24:14; 28:​19, 20) Nasenza njalo, sithabisa iKosethu uJesu.

11. UJesu wafundisa abalandeli bakhe ukuthi bathandazele ini begodu kubayini kuqakathekile lokho? (Hezekiyeli 36:23)

¹¹ UJesu bekazi ukuthi umnqopho kaJehova kucwengisa igama lakhe kilo loke ihlazo. Kungebangelo afundisa abalandeli bakhe ukuthi bathandaze ngendlela le: “Babethu osezulwini, igama lakho alicwengiswe.” (Mat. 6:9) UJesu bekazwisisa bona le yindaba eqakatheke khulu boke abantu abaqalene nayo. (Funda uHezekiyeli 36:23.) Akukho okubunjwe nguJehova ephasini nezulwini okwakhe kwadumisa igama lakhe ukudlula uJesu. Nanyana kunjalo, lokha uJesu nakabotjhwako, amanabakhe amphara ngamuphi umlandu? Ukuhlazisa igama lakaJehova. Siyaqiniseka ukuthi ukusetjenziswa kumbi nokurhwayelwa kwegama lakaJehova bekusisono esimbi khulu kuJesu. Kwamzwisa ubuhlungu ukuthi upharwa ngomlandu onjalo. Leli kungenzeka ngilo ibanga elenza uJesu ‘watlhuwa khulu’ nasele azokubotjhwa.—Luk. 22:​41-44.

12. UJesu walicwengisa njani igama lakaYise ngendlela ephuma phambili?

¹² Bona acwengise igama lakaYise, uJesu wakghodlhelelela ukuhlunguphazwa, ukuthukwa nokuleyelwa amala. Bekazi bona uYise umlalele kikho koke begodu bekungananto ebekufuze abe neenhloni ngayo. (Heb. 12:2) Bekazi nokuthi uSathana umsahlela ngokunqophileko ngesikhatheso. (Luk. 22:​2-4; 23:​33, 34) USathana bekafuna ukwenza uJesu angathembeki kuZimu kodwana wabetha phasi kwathunya ithuli! UJesu watjengisa ukuthi uSathana ungumleyimala nokobana uJehova unabantu abathembekileko, ngitjho nangaphasi kobujamo obubudisi!

13. Ungayithabisa njani iKosakho ebusako?

¹³ Uyafuna na ukuyithabisa iKosakho ebusako? Ragela phambili udumisa igama  lakaJehova, usize abanye bazi uJehova ngendlela angayo. Nawenza njalo, uzabe ulandela emtlhaleni kaJesu. (1 Pit. 2:21) NjengoJesu, uthabisa uJehova bewutjengisa nokuthi uSathana ungumleyimala ongananhloni!

SISINDISA UKUPHILA NASIDUMISA IGAMA LAKAJEHOVA

14-15. Ngiziphi izinto ezikarisako ezingenzeka nasifundisa abantu ngoJehova?

¹⁴ Nasidumisa igama lakaJehova, sisindisa ukuphila. Njani? USathana “uphophaze imikhumbulo yabangakholwako.” (2 Kor. 4:4) Lokho kwenze abantu bakholwa amala kaSathana enjengala: UZimu akekho, ukude khulu nathi, akanandaba nathi, unehliziyo embi begodu uhlunguphaza abangakalungi ngokungapheliko. Amala la enzelwe ukuhlazisa uJehova negama lakhe ukwenzela bona abantu bangafuni ukutjhidela eduze kwakhe. Kodwana nasitjhumayelako, sivimba uSathana bona angafikeleli umnqophwakhe. Sifundisa abantu iqiniso ngoBabethu besidumisa negama elicwengileko lakaZimethu. Uzokuba yini umphumela walokho?

¹⁵ Iqiniso leliZwi lakaZimu linamandla. Nasifundisa abantu ngoJehova nokuthi unjani, sikghona ukubona into ekarisako. Ikungu yamala kaSathana iyasuka begodu abantwaba bathoma ukubona uBabethu esimthandako ngendlela esimbona ngayo. Kubakara khulu ukubona amandla kaJehova angapheliko. (Isa. 40:26) Baba nethemba nababona ubulungiswa bakhe obupheleleko. (Dut. 32:4) Bafunda okunengi ngokuhlakanipha kwakhe. (Isa. 55:9; Rom. 11:33) Kuyabaduduza nokwazi ukuthi uZimu ulithando. (1 Jwa. 4:8) Njengombana batjhidelana noJehova, bayaqiniseka ngethemba labo lokuphila ngokungapheliko njengabantwabakhe. Qala bona sinelungelo elihle kangangani lokusiza abantu batjhidelane noBababo! Nasenza njalo, uJehova usithatha ‘njengeensebenzi ezikunye naye.’—1 Kor. 3:​5, 9.

16. Abanye bathinteka njani ngemva kokwazi igama lakaJehova? Nikela iimbonelo.

¹⁶ Ekuthomeni, singafundisa abantu ukuthi igama lakaZimu nguJehova. Lokho kukodwa kungaba nomphumela omuhle khulu  emuntwini othobekileko. Ngokwesibonelo, udade obizwa ngokuthi ngu-Aaliyah b akhenge akhuliswe njengomKrestu. Kodwana bekangakaneliseki ngekolwakhe namkha bekangazizwa atjhidelene noZimu. Lokho kwatjhuguluka nakathoma ukufunda naboFakazi. Wathoma ukubona uZimu njengoMnganakhe. Kwamrara ukuthola ukuthi igama lakaZimu likhitjhiwe emaBhayibhelini amanengi bese lajanyiselelwa ngeziqu ezinjenge sithi Kosi. Ukwazi igama lakaJehova kwatjhugulula ukuphila kwakhe. Wathi: “UMnganami omkhulu unegama!” Waba yini umphumela? Uthi: “Senginokuthula ehliziywenami nje. Ngizizwa ngiqakathekile.” Indoda ekuthiwa ngu-Steve beyimvumi yakhuliswa njengomJuda. Akhenge ifune ukuzihlanganisa nekolo ngebanga lobuzenzi ebubonileko. Nanyana kunjalo, ngemva kokuhlongakala kwakammayo, yavuma ukuba khona omunye waboFakazi bakaJehova nakaraga isifundo. Kwayithinta ihliziyo ukwazi igama lakaZimu. Ithi: “Bengingazi bona uZimu unegama.” Ingezelela ithi: “Bengithoma ukuzwisisa ukuthi uZimu umuMuntu wamambala. Ngesikhatheso, bengazi ukuthi ngifumene uMngani.”

17. Kubayini uzimisele ukuragela phambili udumisa igama lakaJehova? (Qala nesithombe.)

¹⁷ Nawutjhumayelako begodu ufundisa, uyabatjela na abantu ngegama lakaJehova elicwengileko? Uyabasiza na bakghone ukubona ukuthi unjani uZimu? Nawenza njalo, udumisa igama lakaZimu. Kwanga ungaragela phambili nokudumisa igama lakaJehova ngokusiza abantu bazi bona uJehova uMumuntu onjani. Ngendlela leyo, uzokusindisa ukuphila kwabanengi. Uzobe ulandela umtlhala weKosakho, uKrestu Jesu. Ngaphezu kwalokho, uzobe uthabisa uBabakho onethando, uJehova. Kwanga ‘ungadumisa igama [lakhe] ngokungapheliko.’—Rhu. 145:2.