1-2. N’cinji cingatiyavye kuziŵa mwakumvwila Yehova cifukwa ca kuipishiwa kwa zina yake?

 GANIZILANI kuti munthu wamukonda walaŵila vinthu viipa vokhuza mweo. Muziŵa kuti zawalaŵila ni zawenye, koma ŵanthu ayakine ovikhulupilila. Kuyangizhyila apo, ŵanthu amene ao oyamba soti kuuzhyako ayakine, ndipo nao ovikhulupilila. Kansi mungamvwe tyani? Ngati musamala za ŵanthu ayakine koma soti mukonda zina yanu, kulaŵila cendi mungakhumudwe.—Miy. 22:1.

² Cocitika ici cutiyavya kuziŵa mwakumvwila Yehova cifukwa ca kuipishiwa kwa zina yake. M’mozi mwa ŵana ŵake auzimu euzhya munakazi woyamba, Eva vinthu vawenye vokhuza yove. Ndipo comvwisha cisoni n’cakuti Eva ekhulupilila wenye wamene uyu. Izi zecitisha makolo ŵasu oyambilila kuti apandukile Yehova. Zecitisha soti kuti ŵanthu onse ankhale ocimwa ndipo m’kuluta kwa nthawi eyamba kufwa. (Gen. 3:​1-6; Aro. 5:12) Mavuto yonse yatukumana nayo monga imfwa, nkhondo koma soti cisoni, yewela cifukwa ca wenye wecitala Satana m’munda wa Edeni. Kansi Yehova ekhumudwa cifukwa cawenye uyu na zofumapo zake? Eee. Olo n’tetyo, yove osunga lini cakumkosi. M’malo mwake, opitilizhya kunkhala “Mulungu wacimwemwe.”—1 Tim. 1:11.

3. Kansi tili na mwai wotyani?

³ Tonse tili na mwai woonesha kuti zecilaŵila Satana zokhuza Yehova ni zawenye. Tingacite izi mwa kumvwila lamulo yakuti: “Tamandani zina ya Yehova.” (Sal. 113:1) Tutamanda zina ya Yehova mwa kuuzhya ayakine zinthu zabwino zokhuza  yove. Kansi nimwe okonzeka kutamanda zina ya Yehova? Lomba, tiyeni tilaŵizhyane vifukwa vitatu vamene vingatiyavye kutamanda zina ya Mulungu na mtima wonse.

TUKONDWELESHA YEHOVA NGATI TUTAMANDA ZINA YAKE

4. Ndaŵa yanji Yehova osangalala ngati tumutamanda? Fotokozani cisanzo. (Onani soti cithunzithunzi.)

⁴ Tukondwelesha Ausuwasu akululu ngati tutamanda zina yao. (Sal. 119:108) Kansi izi zutanthauza kuti Mulungu wamphamvuzonse ali monga ni ŵanthu aliye ungwilo, amene ofuna kutamandiwa na ayakine cifukwa cakuti ofuna cilimbikiso? Yai. Ganizilani cocitika ici. Mwacikondi, kamsimbi koutukila kuli ausuwake noŵakumbatila ndipo kolaŵila kuti: “Nimwe atata abwino ngako pacalo conse.” Ausuwake omwetulila koma soti osangalala ngako. Ove ocita izi osati cifukwa cakuti ofuna cilimbikiso olo kufuna kutamandiwa na mwana wao. M’malo mwake, ocita izi cifukwa cakuti okonda mwana wao ndipo osangalala kuti mwana wao oonesha kuti oŵakonda noŵayamikila. Kuyangizhyila apo, oziŵa kuti mwana uyu akayokula akankhale wosangalala cifukwa coonesha nkhalidwe yacikondi koma soti yoyamikila. Molingana na izi, Yehova wamene ni Atata mkulu ngako, oyamikila ngako ngati tumutamanda.

5. Ngati tutamanda zina ya Mulungu tususha wenye wotyani?

⁵ Ngati tutamanda Ausuwasu akululu, tuonesha kuti zecilaŵila Satana ponena za aliyense wa seo ni zawenye. Yove elaŵila kuti paliye munthu angapitilizhye kunkhala wokhulupilika kwa Mulungu noteteza zina yake ngati wayesewa. Kuyangizhyila apo, elaŵila kuti tonse tingaleke kutumikila Mulungu poganiza kuti tingapindule cifukwa cocita izi. (Yobu 1:​9-11; 2:4) Koma Yobu epitilizhya kunkhala wokhulupilika kwa Mulungu, ndipo eonesha kuti Satana ni wawenye. Kansi namwe mupitilizhye kunkhala okhulupilika kwa Mulungu? Aliyense wa seo ali na mwai woteteza zina ya Ausuwasu noŵakondwelesha mwa kuŵatumikila mokhulupilika. (Miy. 27:11) Kulaŵila cendi, ni mwai ukulu ngako kucita izi.

6. Kansi tingatolele tyani cisanzo ca Mfumu Davide na Alevi? (Nehemiya 9:5)

⁶ Ŵala amene okonda Yehova ofunishisha kutamanda zina yake na mtima wonse. Mfumu Davide elaŵila kuti: “Tamanda Yehova, weo moyo wangu. Ciliconse mkati mwangu citamande zina yake ituŵa.” (Sal. 103:1) Davide enzoziŵa kuti ngati tutamanda zina ya Yehova, niye kuti tutamanda Yehova wamene. Tikamvwa za zina ya Yehova, tuganizila za umunthu wake, minkhalidwe yake iweme na zocita  zake zodabwisa. Davide enzofunishisha kuti akoona zina ya Ausuwake kuti ni ituŵa na kuti akoitamanda. Enzofuna kucita izi na ‘ciliconse mkati mwake,’ kutanthauza na mtima wonse. Molingana na izi, Alevi enzosogolela potamanda Yehova. Molicefya, ove evomelezhya kuti mau ŵao angakwanishe lini kuonesha citamando cayufunikila zina yopatulika ya Yehova. (Ŵelengani Nehemiya 9:5.) Mosakaikila, kulicefya koteti na kumutamanda kwekondwelesha Yehova.

7. Kansi tingatamande tyani Yehova ngati tili mu utumiki koma soti patucita zinthu na ŵanthu ayakine?

⁷ Masiku ŵano, tingakondweleshe Yehova mwa kulaŵila zokhuza yove m’njila yoonesha kuti tumuyamikila nomukonda. Mwacisanzo, ngati tulalikila, colinga casu cikulu ni kuyavya ayakine kuti avwendele pafupi na Yehova noŵayavya kuti akoona Ausuwasu acikondi monga ni mwatuŵaonela seo. (Yak. 4:8) Tusangalala ngako kuonesha ŵanthu mwamene Baibo yufotokozela Yehova, cikondi cake, cilungamo, nzelu, mphamvu na minkhalidwe iyakine iweme. Tutamanda soti Yehova nomukondwelesha mwa kuyesayesa kutolela cisanzo cake. (Aef. 5:1) Tikacita izi, ayakine aone kuti nise osiyana na ŵanthu a m’calo cino ndipo angafune kuziŵa cifukwa cake tusiyana. (Mat. 5:​14-16) Patucita nao zinthu, tufunika kuŵauzhya cifukwa cake tucita zinthu mosiyana na ayakine. Ndipo ŵanthu oona mtima avwendele pafupi na Mulungu wasu. Ngati tutamanda Yehova mwa njila iyi, tukondwelesha mtima wake.—1 Tim. 2:​3, 4.

TUKONDWELESHA YESU NGATI TUTAMANDA ZINA YA YEHOVA

8. Kansi Yesu waonesha tyani kuti ali pasogolo potamanda zina ya Yehova?

⁸ Paliye aliyense kululu olo pacalo wamene omuziŵa bwino ngako Yehova kupambana Yesu. (Mat. 11:27) Cifukwa cakuti Yesu oŵakonda ngako Ausuwake, niye cifukwa cake ali pasogolo kutamanda zina ya Yehova. (Yoh. 14:31) M’pemphelo yecitwala kuli Ausuwake pa usiku wakuti wasala patontho kuti apaiwe, efotokoza cinthu cofunika ngako cecikwanilisha. Yove elaŵila kuti: “Nacitisha kuti [ŵanthu] aiziŵe zina yanu.” (Yoh. 17:26) Kansi etanthauzanji?

9. Ni fanizo yotyani yeciseŵenzesha Yesu pofuna kuuzhya ŵanthu zokhuza minkhalidwe ya Ausuwake m’njila yomvwika bwino?

⁹ Yesu ecita zinyinji osati tyala kuuzhya ŵanthu za zina ya Yehova. Ayuda ŵeenzophunzisa enzoiziŵa kale zina ya Mulungu. Koma Yesu esogolela ‘pofotokoza za Mulungu.’ (Yoh. 1:​17, 18) Mwacisanzo, Malemba Aciheberi oonesha kuti Yehova ni wacifundo koma soti wacisomo. (Eks. 34:​5-7) Kupambana kale, Yesu emvwikisha bwino mfundo ya cendi pecifotokoza za fanizo ya mwana woloŵelela na ausuwake. Tuŵelenga kuti ausuwake pecimuona mwana wao wolapa “apo n’kuti ali patali,” emuutukila, kumukumbatila nomukhululukila na mtima wonse. Cocitika ici cutionesha cifundo koma soti cisomo caali naco Yehova. (Luka 15:​11-32) Apa Yesu eyavya ŵanthu kuzindikila minkhalidwe yaali nayo Yehova.

10. (a) Kansi tuziŵa tyani kuti Yesu enzoseŵenzesha zina ya Ausuwake ndipo enzofuna kuti ayakine akocita cimozimozi? (Maliko 5:19) (Onani soti cithunzithunzi.) (b) Kansi Yesu ofuna kuti tikocita cinji masiku ŵano?

¹⁰ Kansi Yesu enzofuna soti kuti ayakine akoseŵenzesha zina ya Ausuwake? Eee. Cuoneka kuti asogoleli ayakine a cipembezo enzokhulupilila kuti ni kusoŵa ulemu kutomola zina ya Mulungu. Koma Yesu aliyolole miyambo yamene yenze yosushana na Malemba kumukangisha kulemekeza zina ya Ausuwake. Ganizilani tyala zecitika, Yesu pecipolesha  munthu wamene enze na ciŵanda m’dela ya Agerasa. Ŵanthu ecita wowa ndipo esenga Yesu kuti acoke m’dela iyi, ndipo ecoka. (Mko. 5:​16, 17) Olo n’teyo, enzofunishisha kuti ŵanthu a ku dela iyi aiziŵe zina ya Yehova. Tetyo, euzhya munalume wecipolesha kuti akouzhya ŵanthu, osati zecicita Yesu koma zecicita Yehova. (Ŵelengani Maliko 5:19.) a Olo masiku ŵano, Yesu ofuna kuti tikouzhya ayakine za zina ya Ausuwake pacalo conse. (Mat. 24:14; 28:​19, 20) Tikacita izi, tikondweleshe Mfumu yasu, Yesu.

11. Kansi Yesu ephunzisa ophunzila ŵake kuti akopemphelela cinji, ndipo ndaŵa yanji kucita izi n’kofunika? (Ezekieli 36:23)

¹¹ Yesu enzoziŵa kuti colinga ca Yehova ni kutuŵisha nocosa citonzo pa zina yake. Niye cifukwa cake Asikulu ŵasu ephunzisa okonkha ŵao kupemphela kuti: “Ausuwasu akululu, zina yanu ituŵishiwe.” (Mat. 6:9) Yesu enzoziŵa kuti iyi niye nkhani ikulu yukhuza cilengedwe conse. (Ŵelengani Ezekieli 36:23.) Ndipo paliye colengewa ciliconse canzelu m’cilengedwe camene cakwanisha kucita zinyinji potuŵisha zina ya Yehova kupambana Yesu. Olo n’tetyo, pecimangiwa, adani ŵake emuimba mlandu wakuti enzolemekeza lini Ausuwake. Yesu enzoziŵa kuti kunyoza zina ituŵa ya Ausuwake yenze cimo ikulu ngako. Tetyo, cemuŵaŵa ngako poganizila kuti aimbiwe mlandu woteti. Payakine izi niye zemupangisha kuti ‘avutike ngako maganizo’ pekwesala tyala maawazi atontho kuti amangiwe.—Luka 22:​41-44.

12. Kansi Yesu epilila zinthu zotyani kuti atuŵishe zina ya Ausuwake?

¹² Kuti atuŵishe zina ya Ausuwake, Yesu epilila kuniatiwa, kunyozewa koma soti kutalizhyiliwa wenye. Yove enzoziŵa kuti emvwila Ausuwake m’zinthu zonse. Tetyo, enzeve cifukwa cocitila nsoni. (Aheb. 12:2) Kuyangizhyila apo, enzoziŵa kuti Satana enzomuukila mwacindunji pa nthawi yovuta iyi. (Luka 22:​2-4; 23:​33, 34) Satana enzofunishisha kucitisha Yesu kuti ankhale wosakhulupilika, koma ekangiwa. Yesu eonesha kuti Satana ni wawenye cifukwa elaŵila kuti atumiki a Yehova angankhale lini okhulupilika ngati akumana na mayeselo ovuta.

13. Kansi mungakondweleshe tyani Mfumu yanu yulamulila?

 ¹³ Kansi nimwe ofunishisha kukondwelesha Mfumu yanu yamene yulamulila? Ngati n’tetyo, pitilizhyani kutamanda zina ya Yehova nophunzisa ayakine kuti aziŵe minkhalidwe yake iweme. Mukacita izi, niye kuti mutolela cisanzo ca Yesu. (1 Pet. 2:21) Molingana na Yesu, niye kuti mukondweleshe mtima wa Yehova noonesha kuti Satana ni wawenye.

TUYAVYA KUPULUMUSA MIYOYO YA ŴANTHU NGATI TUTAMANDA ZINA YA YEHOVA

14-15. Kansi ni zinthu zabwino zotyani zingafumepo ngati tuphunzisa ayakine zokhuza Yehova?

¹⁴ Ngati tutamanda zina ya Yehova, tuyavya kupulumusa miyoyo ya ŵanthu. Motyani? Monga ni mwatuziŵila, Satana ‘wacitisha ŵanthu ayakine kuti asaziŵe zacendi zokhuza Mulungu.’ (2 Akor. 4:4) Cifukwa ca izi, ŵanthu ayakine okhulupilila wenye wa Satana wakuti kuliye Mulungu, Mulungu ali kutali na seo, osamala lini za ŵanthu, ni wankhanza koma soti kuti olanga ŵanthu aipa mpaka kale-kale. Satana ocitisha ŵanthu kuti akokhulupilila izi na colinga cakuti aipishe zina ya Yehova na kuti ŵanthu asankhale pa ushamwali na yove. Koma ngati tulalikila, tukangisha Satana kuti akwanilishe colinga cake. Talaŵila teti cifukwa tuphunzisa ŵanthu zokhuza Ausuwasu notamanda zina ya Mulungu. Kansi ponkhala zofumapo zotyani ngati tucita izi?

¹⁵ Cendi camene cupezeka m’Mau a Mulungu cili na mphamvu ngako. Ngati tuphunzisa ŵanthu zokhuza Yehova na minkhalidwe yake iweme, ponkhala zofumapo zabwino. Ŵanthu amene enze esoŵeshewa na wenye wa Satana, patontho-patontho oyamba kuona minkhalidwe iweme ya Ausuwasu. Odabwa ngako na mphamvu zake ziliye malile. (Yes. 40:26) Oyamba kumudalila cifukwa ca cilungamo cake. (Deut. 32:4) Ophunzila zinyinji cifukwa ca nzelu zake. (Yes. 55:9; Aro. 11:33) Ndipo otonthozewa poziŵa kuti yove ni cikondi. (1 Yoh. 4:8) Paakuvwendela pafupi na Yehova, ciyembekezo cao conkhala na moyo kosasila monga ŵana ŵake cunkhala cosimikizhyilika. Kulaŵila cendi, ni mwai ukulu ngako kuyavya ŵanthu kuvwendela pafupi na Ausuwao.  Ngati tucita izi, Yehova otiona kuti nise “anchito ayake.”—1 Akor. 3:​5, 9.

16. Kansi ayakine ekhuzika tyani peciphunzila za zina ya Mulungu? Fotokozani visanzo.

¹⁶ Poyamba, tingophunzisa ŵanthu kuti zina ya Mulungu ni Yehova. Izi zingacinje umoyo wa ŵanthu oona mtima. Mwacisanzo, msimbi muyakine wa zina yakuti Aaliyah b ekulila m’banja yamene yenze lini yacikhristu. Yove enzokhutila lini na zinthu zeenzophunzila ku cipembezo cake ndipo enzoona kuti ali lini pafupi na Mulungu. Koma zinthu zecinja peciyamba kuphunzila Baibo na Mboni za Yehova. Eyamba kuona Mulungu monga shamwali wake ndipo edabwa ngako pecizindikila kuti zina ya Mulungu yecosewamo m’Mabaibo ayakine, m’malo mwake eikamo mazina audindo monga Asikulu. Kuphunzila za zina ya Mulungu kwecinja umoyo wake. Yove elaŵila kuti: “Shamwali wangu wa pa mtima ali na zina.” Kansi penkhala zofumapo zotyani? Elaŵila kuti: “Lomba, nili na mtendele wa mu mtima ndipo nuyamikila ngako.” Munalume muyakine wa zina yakuti Steve enze woimba ndipo ekulila m’banja ya Ciyuda. Yove enzofuna lini kunkhala m’cipembezo ciliconse cifukwa ca zinthu zacinyengo zeenzoona. Koma amai ŵake pecimwalila, evomela kupezekapo pa phunzilo ya Baibo yamene yenzosogozewa na m’mozi wa a Mboni za Yehova. Yove ekhuzika ngako peciphunzila za zina ya Mulungu. Elaŵila kuti: “Nenze nikaliyophunzilapo kuti Mulungu ali na zina.” Eyangizhyilapo kuti: “Kwa nthawi yoyamba, nemvwisha kuti Mulungu aliko ndipo neyamba kumuona monga munthu wenewene. Kuyangizhyila apo, neziŵa kuti napeza shamwali.”

17. Ndaŵa yanji nimwe ofunishisha kupitilizhya kutamanda zina ya Yehova? (Onani soti cithunzithunzi.)

¹⁷ Pamukata nchito yolalikila nophunzisa, kansi muuzhyako ayakine za zina yopatulika ya Yehova? Kansi muŵayavya kuona minkhalidwe yake iweme? Ngati mucita izi, niye kuti mutamanda zina ya Mulungu. Tetyo, pitilizhyani kutamanda zina ituŵa ya Yehova mwa kuyavya ayakine kumuziŵa bwino. Mukacita izi, mupulumuse miyoyo yao. Kuyangizhyila apo, mukokonkha Mfumu yanu Khristu Yesu. Kupambana zonse, mukokondwelesha Ausuwasu akululu Yehova. Tetyo, pitilizhyani ‘kutamanda zina yake mpaka kale-kale.’—Sal. 145:2.