1–2. Kansi n’chinji chutiyavya kumvwisha mwechimvwila Yehova wenye wechimuyopejela Satana pewiyamba kufalikila?

 GANIZILANI chochitika ichi: Munthu muyakine wamene wamukonda ngako okuyopejelani chinthu chiyakine chiipa ngako. Mwewo muziŵa kuti vinthu vakunena n’vawenye; koma olo n’tetyo, ŵanthu ayakine okhulupilila vakunena yove. Ndipo kuti nkhani yamene iyo iipe ngako, nawo oyamba kufalisa nkhani yamene iyo ndipo ŵanthu ayakine anyinji oikhulupilila. Kansi mwewo mungamvwe tyani keno ŵanthu amene awo ni ofunika kuli mwewo ndipo mbili yanu muiwona kuti niiweme ngako? Nkhani yamene iyo ingakuipileni ngako, n’tetyo lini?—Miy. 22:1.

² Chochitika chamene ichi, chutiyavya kumvwisha luweme mwechimvwila Yehova panthawe yeiipishiwa mbili yake iweme. Mmozi mwa ŵana ŵake auzimu, elaŵila vinthu vawenye vokhuza yove kuli mwanakazi woyambilila wamene ni Hava, ndipo yove ekhulupilila wenye wamene uyo. Chifukwa cha wenye wamene uyo, makolo ŵasu oyambilila epandukila Yehova. Ndipo monga vokonkhapo vake, ŵanthu onse elondela uchimo na imfwa. (Gen. 3:1-6; Alo. 5:12) Mavuto onse ali muli chino chalo monga—imfwa, nkhondo, komasoti kutamana—vilipo chifukwa cha wenye wechilaŵila Satana mmunda wa Edeni. Kansi Yehova akumvwa tyani akawona mavuto onse amene eyambika chifukwa cha wenye wa Satana? Mosakaikila, Yehova akumvwa chisoni ngako. Koma olo n’tetyo, vamene ivi viliye chitishe Yehova kunkhala Mulungu mkali olo wokhumudwa. Kulaŵila chendi, Yehova wapitilija mphela kunkhala “Mulungu wachisangalalo.”—1 Tim. 1:11.

3. Kansi sewo tili na mwayi wotyani?

³ Sewo tili na mwayi wowonesha kuti vinthu vechilaŵila Satana vokhuza zina ya Yehova ni vawenye mwakumvila lamulo yosavuta yakuti: “Tamandani zina ya Yehova.” (Sal. 113:1) Sewo tuchita vamene ivi mwakulaŵila vinthu viweme vokhuza Mulungu, wamene niye munecho wa zina ituŵa yamene iyi. Lomba kansi mwewo nimwe okonzeka kutamanda zina ituŵa ya Mulungu? Tiyeni tikambilane  vifukwa vitatu viweme vamene vitiyavye kuti tikotamanda zina ya Yehova na ntima wasu wonse.

YEHOVA OSANGALALA SEWO TIKOTAMANDA ZINA YAKE

4. Ndaŵa yanji Yehova osangalala sewo tikomutamanda? Pelekani chisanzo. (Onanisoti chithunzi.)

⁴ Atata ŵasu akululu osangalala ngako keno sewo tutamanda zina yake. (Sal. 119:108) Ŵanthu ayakine okonda kuchitiliwa vinthu viipa na ayawo komasoti olikaikila, ndipo ove ofuna kuti ŵanthu akoŵatembeja komasoti kuŵalaŵilila vinthu viweme. Kansi Yehova niye mwalili? Kutali-tali. Ganizilani fanizo iyi: Kansimbi kayakine kokumbatila atata ŵakine mwachikondi ngako, ndipo koŵauja kuti, “Mwewo nimwe atata aweme ngako!” Tata osangalala ngako na vawachita mwana wake, ndipo oyamba kumumekela. Koma ndaŵa yanji yove osangalala? Kansi n’chifukwa chakuti yove olikaikila komasoti ochitiliwa viipa na yake, mwakuti odalila mwana wake kuti akomutembeja? Yayi. Yove oziŵa kuti ni tata muweme, koma osangala ngako keno mwana wake omuwonesha chikondi nomutembeja pavakumuchitila. Yove oziŵa kuti mwana wake ofunika kunkhala na minkhalidwe iweme yamene iyi kuti azankhale wosangalala akakula. Molingana na vamene ivi, Atata ŵasu Yehova osangalala keno sewo tumutamanda.

5. Keno sewo tutamanda Yehova, kansi tuyavya pochita chinji?

⁵ Keno sewo tutamanda Yehova, tushushasoti vinthu vawenye vechilaŵila Satana vokhuza sewo. Satana elaŵila kuti paliye munthu angakwanishe kupitilija kunkhala wokhulupilika kwa Mulungu keno oyesewa. Yove Satana elaŵila mosimikijila kuti sewo tonse tingaleke kutumikila Yehova na cholinga chakuti tifwane chinthu chiyakine chiweme ngako. (Yobu 1:9-11; 2:4) Koma munthu wokhulupilika Yobu ewonesha kuti vinthu vechilaŵila Satana n’vawenye. Lomba tyani ponena za mwewo? M’masiku ŵano aliyense wa sewo ali na mwayi wowonesha kuti oikila kuvuli zina ya Yehova nomutumikila mokhulupilika. (Miy. 27:11) Wamene uyu ni mwayi ukulu ngako.

6. Kansi sewo tingakonkheje tyani Mfumu Davide komasoti Alevi? (Nehemiya 9:5)

⁶ Kukonda Mulungu kuchitisha ŵanthu okhulupilika kunkhala na ntima wofuna kutamanda zina yake. Mfumu Davide elemba kuti: “Moyo wangu utamande Yehova; chilichonse chankati mwangu, chitamande zina yake ituŵa.” (Sal. 103:1) Davide enzeziŵa kuti kutamanda zina ya Yehova ni kutamanda Yehova ngaye-ngaye. Zina ya Yehova yupamikijapo soti mbili yake, vamene ivi vutikumbushasoti za minkhalidwe iweme na vinthu vodabwisa vakuchita Mulungu. Davide enzefuna kuwonesha kuti zina ya Mulungu ni ituŵa na kuitamanda. Yove enzefuna kuti  “chilichonse chankati mwake” chikotamanda zina ya Mulungu—kutanthauza kuti na ntima wake wonse. Molingana na vamene ivi, Alevi enzenkhala pasogolo potamanda zina ya Yehova. Ove molichefya evomekeja kuti mawu ŵawo enze osakwanila kuti apeleke chitamando choyenelela ku zina yopatulika ya Yehova. (Ŵelengani Nehemiya 9:5.) Mosakaikila, kulichefya kwamene uku kwekondwelesha ngako ntima wa Yehova.

7. Kansi tingamutamande tyani Yehova pokata ntchito yolalikila komasoti pamoyo wasu wa nsiku na nsiku?

⁷ Nase tingatamande Yehova polaŵila vokhuza yove mowama ntima, motembeja, komasoti mwachikondi. Tikankhala muutumiki, tikokumbukila kuti cholinga chasu chikulu ni kuyavya ŵanthu kunkhala paushamwali uweme na Yehova, noŵayavya kuziŵa kuti yove ni tata wawo wachikondi. Sewo tusangalala kuyavya ŵanthu kupitila m’Baibolo kuziŵa kuti Yehova ni Mulungu wachikondi, wachilungamo, wanzelu, wamphavu, komasoti kuti ali na minkhalidwe iyakine iweme. (Yako. 4:8) Njila iyakine yatingatamandile Yehova nochita vinthu vomukondwelesha, ni kuchita vonse vatingakwanishe kuti tikomukonkheja. (Aife. 5:1) Keno tuchita vamene ivi ayakine angafwike poziŵa kuti sewo nise osiyana na ŵanthu ayakine amuli chino chalo chiipa. (Mat. 5:14-16) Patuchita nawo vinthu viyakine va nsiku na nsiku, nthawe ziyakine tingankhale na mwayi woŵafotokozela chifukwa chake nise osiyana na ŵanthu ayakine. Monga vokonkhapo vake, ŵanthu ayakine a mitima iweme angankhale na chidwi chikulu chofuna kuphunzila vokhuza Mulungu wasu. Keno sewo tutamanda Yehova mwanjila yamene iyi, ntima wake ukondwela.—1 Tim. 2:3, 4.

YESU OSANGALALA SEWO TIKOTAMANDA ZINA YA YEHOVA

8. Kansi Yesu enkhala tyani pasogolo potamanda zina ya Yehova?

⁸ Pa volengewa vonse vanzelu kululu na pachalo, paliye oŵaziŵa luweme Atata ŵasu molingana na mwakuchitila Mwana wake. (Mat. 11:27) Yesu okonda Atata ŵake, ndipo onkhala pasogolo potamanda zina ya Mulungu. (Yoh. 14:31) Penzepemphela kuli Atata ŵake usiku akaliye mwalila, yove elaŵila mwachidule zautumiki wake wa pano pachalo ponena kuti: “Newo nachitisha kuti ŵanthu aziŵe zina yanu.” (Yoh. 17:26) Kansi yove enzefuna kutanthauza chinji?

9. Kansi Yesu efotokoza chisanzo chotyani pofuna kutiyavya kumvwisha luweme mwalili Yehova?

⁹ Yesu echita vinyinji kupambana kuuja tyala ŵanthu kuti zina ya Mulungu ni Yehova. Ayuda ŵenzelaŵila nawo Yesu enzeiziŵa kale zina ya Mulungu, koma Yesu “niye munthu eyamba . . . kufotokoza za Mulungu.” (Yoh. 1:17, 18) Mwachisanzo, malemba Achiheberi onena kuti Yehova ni wachifundo komasoti wozula na kuwama ntima kosasila. (Eks. 34:5-7) Yesu emvwikisha luweme nkhani yamene iyi mufanizo ya mwana woloŵelela. Tikoŵelenga vokhuza nkhani ya tata wamene ewona mwana wake akuza patali, noutuka kuyakumana naye, kumukumbatila, komasoti kumukhululukila mofumila pansi pa ntima, sewo tunkhala na chithunzi-thunzi chiweme chachifundo komasoti kuwama ntima kosasila kwa Yehova. (Luk. 15:11-32) Yesu etiphunzisa za umunthu ngawo-ngawo wa Atata ŵake.

10. (a) Kansi tuziŵa tyani kuti Yesu enzekatishila ntchito zina ya Atata ŵake komasoti kuti enzefuna kuti nase tikoikatishila ntchito? (Maliko 5:19) (Onanisoti chithunzi.) (b) Kansi Yesu enzefuna kuti sewo tikochita chinji masiku ŵano?

¹⁰ Kansi Yesu enzefuna kuti ŵanthu akoikatishilasoti ntchito zina ya Atata ŵake? Mosakaikila. Asogoleli ayakine avipembezo enzekhulupilila kuti n’kusoŵa ulemu kukatishila ntchito zina ya Mulungu, koma Yesu aliyelole kuti mwambo wosakatijana na malemba wamene uyo umukangishe kutamanda zina ya Atata ŵake. Nthawe iyakine Yesu epojeka munthu waviŵanda wamene enzenkhala mu dela ya Agerasa. Ŵanthu eyamba kuchita naye wowa ngako Yesu mwakuti  emupapatila kuti afumemo mu dela yamene iyo. (Mko. 5:16, 17) Koma olo n’tetyo, Yesu enzefuna kuti ŵanthu aziŵe zina ya Mulungu. Tetyo, yove euja mwanalume wamene uyo kuti akalaŵile kuli ŵanthu, osati za vinthu vechichita yove, koma vinthu vechichita Yehova kuli mwanalume wamene uyo. (Ŵelengani Maliko 5:19.) a Mpakapano, Yesu akalifuna mphela—kuti zina ya Atata ŵake eziŵike paliponse! (Mat. 24:14; 28:19, 20) Tikachita mbali yasu pa nkhani yamene iyi, Mfumu yasu Yesu Khilisitu yukondwela ngako.

11. Kansi Yesu ephunzisa ophunzila ŵake kuti akopemphelela chinji, ndipo ndaŵa yanji chinthu chamene icho nichofunika ngako? (Ezekieli 36:23)

¹¹ Yesu enzeziŵa kuti cholinga cha Yehova ni kutuŵisha zina yake noshusha wenye wokhuza Mulungu wechilaŵila Satana. N’chifukwa chake yove ephunzisa ophunzila ŵake kuti akopemphela kuti: “Atata ŵasu akululu, zina yanu ituŵishiwe.” (Mat. 6:9) Yesu enzeziŵa kuti nkhani yamene iyi yenzekhuza chilengedwe chonse. (Ŵelengani Ezekieli 36:23.) Paliye cholengewa chiyakine muchilengedwe chonse chamene chechita vinyinji potuŵisha zina ya Yehova monga ni mwechichitila Yesu. Koma pavuli pakuti Yesu wamangiwa, kansi adani ŵake emuyopejela mulandu wotyani? Kunyoza Mulungu! Kulaŵila chendi, Yesu enzeziŵa kuti kukatishila ntchito mophoniyeka zina ituŵa ya Mulungu olo kuitonja ni chimo ikulu ngako kupambana chimo iliyonse yangachite munthu. Kuyopejelewa nolondela chiweluzo pa mulandu monga ni wamene uyu, kwemuvutisha maganizo ngako Yesu. Vuwoneka kuti chamene ichi niye chifukwa chikulu chechitisha Yesu “kutamana ngako muntima mwake” panthawe yenze esala patontho kuti amangiwe.—Luk. 22:41-44.

12. Kansi Yesu etuŵisha tyani zina ya Atata ŵake mwanjila iweme ngako?

¹² Kuti atuŵishe zina ya Atata ŵake, Yesu etamanishiwa, kunyozewa, komasoti kuyopejelewa vinthu vawenye. Yove enzeziŵa kuti enzechita vinthu momvwila Atata ŵake pachilichonse; enzeve chifukwa chakuti achitile nsoni. (Ahe. 12:2) Yove enzeziŵasoti kuti Satana enzelimbana naye mwasitiliti panthawe yovuta yamene iyo. (Luk. 22:2-4; 23:33, 34) Satana enzefuna kuchita vonse vangakwanishe kuti Yesu akangiwe kunkhala wokhulupilika; koma Satana aliye kwanishe! Yesu ewonesha kuti Satana ni munthu  wawenye uipa komasoti kuti Yehova ali na atumiki okhulupilika amene opitilija mphela kutumikila Mulungu mokhulupilika olo panthawe yakukumana na mayeselo ovuta ngako!

13. Kansi mwewo mungamukondweleshe tyani Yesu wamene ni Mfumu yasu?

¹³ Kansi mwewo mufuna kukondwelesha Yesu wamene ni Mfumu yanu? Pitilijani kutamanda zina ya Yehova mwakuyavya ŵanthu ayakine kuphunzila minkhalidwe iweme ya Mulungu wasu. Mukachita vamene ivi muzankhale mukonkheja chisanzo cha Yesu. (1 Pet. 2:21) Molingana na Yesu mwewo muchita vinthu vokondwelesha Yehova. Muchita vinthu vowonesha kuti Satana wamene ni mdani wa Mulungu ni munthu wawenye uipa ngako!

KENO TUTAMANDA ZINA YA YEHOVA TUYAVYA PA NTCHITO YOPULUMUSHA MIYOYO YA ŴANTHU

14-15. Kansi ni vinthu votyani viweme vamene vingachitike keno tuphunzisa ŵanthu vokhuza Yehova?

¹⁴ Tikotamanda zina ya Yehova tuyavya pa ntchito yopulumusha miyoyo ya ŵanthu. Kansi tuchita tyani vamene ivi? Satana “wavala maganizo a ŵanthu osakhulupilila.” (2 Ako. 4:4) Ove okhulupilila vinthu vawenye vakunena Satana monga vakuti: Kuliye Mulungu, Mulungu ali kutali na sewo, komasoti kuti Mulungu otiganizila lini. Yove onenasoti kuti Mulungu ni wankhanza, ndipo otamanisha ŵanthu ochimwa kumulilo mpaka kale-kale. Wenye woteti uwononga zina ya Yehova nokangisha ŵanthu kuti ankhale naye paushamwali. Koma keno sewo tukata ntchito yolalikila, tumukangisha Satana kuti akwanishe kuchita vamene ivi. Sewo tuphunzisa ŵanthu chonadi chokhuza Atata ŵasu, notamanda zina yopatulika ya Mulungu wasu. Kansi vokonkhapo vake vunkhala votyani?

¹⁵ Chonadi cha m’Mawu a Mulungu chili na mphamvu ngako. Sewo tuwona vinthu vodabwisa tikophunzisa ŵanthu vokhuza Yehova komasoti zaumunthu wake. Vinthu vakukatishila ntchito Satana povala menso a ŵanthu, vufuma mmenso mwawo ndipo ove okwanisha kuwona minkhalidwe iweme ya Atata ŵasu. Ove odabwa akaziŵa mphamvu ziliye malile za Yehova. (Yes. 40:26) Ove aphunzila kukhulupilila Mulungu chifukwa chakuti yove ni wachilungamo ngako. (Deut. 32:4) Ove ophunzira vinthu vinyinji chifukwa cha nzelu zake zinyinji. (Yes. 55:9; Alo. 11:33) Ove otonthojewa akaziŵa kuti  Yehova ni Mulungu wachikondi. (1 Yoh. 4:8) Ŵanthu akavwendela ngako kwa Yehova, chiyembekezo chawo chonkhala na moyo kosasila niye pachutang’a ngako. Sewo tili na mwayi ukulu ngako woyavya ŵanthu kuvwendela kuli Atata ŵasu! Keno sewo tuchita vamene ivi Yehova otiwona monga “antchito ayake.”—1 Ako. 3:5, 9.

16. Kansi ŵanthu angamvwe tyani akaziŵa zina ya Mulungu? Pelekani chisanzo.

¹⁶ Poyamba, ŵanthu tingaŵauje tyala kuti zina ya Mulungu ni Yehova. Vamene ivi vingakhuze ngako munthu wamene ali na ntima uweme. Mwachisanzo, nsimbi muyakine zina yake Aaliyah b ekulila m’chipembezo chiyakine chamene n’Chachikhilisitu lini. Koma yove enzekhutila lini na venzephunzila kuchipembezo chamene icho, ndipo enzewona kuti alilini paushamwali na Mulungu. Yove echinja maganizo amene awo pechiyamba kuphunzila na Amboni za Yehova. Yove eyamba kuwona Mulungu monga nshamwali wake, ndipo enkhala wodabwa pechiziŵa kuti zina ya Mulungu ichosewa m’ma Baibolo anyinji ndipo iloŵewa mmalo na mazina ayakine audindo monga yakuti Ambuye. Kuphunzila zina ya Yehova kwechinja moyo wake. Yove enena kuti: “Nshamwali wangu wapantima ali na zina!” Kansi vokonkhapo vake venze votyani? Yove enena kuti: “Pali pano newo nili na ntendele wamuntima ndipo nulimvwa kunkhala munthu wolemekezeka.” Mwanalume muyakine zina yake Steve enze woimba ndipo elelewa mwankhanza ngako na makolo achipembezo Chachiyuda. Yove enzefunalinisoti kunkhala m’gulu iliyonse yachipembezo, chifukwa enze ewona vinthu vinyinji viliye chilungamo. Koma pavuli pa imfwa ya amayi ŵake, yove evomela kuphunzila Baibolo na Amboni za Yehova. Panthawe yechiphunzila zina ya Mulungu, yove ekhuziwa ngako muntima mwake. Yove enena kuti: “Newo nenze nikaliyemvwapo kuti Mulungu ali na zina komasoti n’kuyamba kumvwa kuti Mulungu ni ngaye-ngaye, ndipo kufumila lelo namuziŵa monga ni munthu. Panthawe yamene iyo newo neziŵa kuti nafwana nshamwali wapantima.”

17. Ndaŵa yanji mwewo mufuna kupitilija kutamanda zina ya Yehova? (Onanisoti chithunzi.)

¹⁷ Kansi pokata ntchito yolalikila muphunzisa ŵanthu vokhuza zina ituŵa ya Yehova? Kansi mwewo muyavya ŵanthu kuwona minkhalidwe iweme ya Mulungu wasu? Keno muchita vamene ivo, mwewo mutamanda zina ya Mulungu. Pitilijani kutamanda zina ituŵa ya Yehova mwakuyavya ŵanthu kuziŵa munecho wazina yamene iyi, mukachita tetyo mwewo muzapulumushe miyoyo ya ŵanthu. Muzakonkheje chisanzo cha Mfumu yasu Yesu Khilisitu, ndipo kupambana vonse Atata ŵasu Yehova azakondwele ngako. Pitilijani “kutamanda zina ya Yehova mpaka kale-kale”!—Sal. 145:2.