1-2. Ke’ng seo se ka re thušago go kwešiša gore Jehofa o ikwa bjang ge leina la gagwe le senywa?

 NAGANA ka se: A re re motho yo o mo ratago o bolela gampe ka wena. O a tseba gore dilo tšeo a di bolelago ga se nnete, eupša batho ba bangwe ba a mo tshepa. Sa go nyamiša kudu ke gore batho bao le bona ba botša ba bangwe maaka ao gomme le bona ba a a tshepa. O tlo ikwa bjang? Ge e ba o na le taba le batho ba bangwe e bile o tshwenyegile ka go itirela leina le lebotse, maaka ao ba tlago go a bolela ka wena a tlo go nyamiša kudu.—Die. 22:1.

² Boemo bjo bo ka re thuša go kwešiša kamoo Jehofa a ilego a ikwa ka gona ge leina la gagwe le lebotse le be le senywa. Yo mongwe wa barwa ba gagwe ba moya o ile a bolela maaka ka yena go mosadi wa mathomo e lego Efa. Efa o ile a tshepa maaka ao. Maaka ao ile a dira gore batswadi ba rena ba mathomo ba rabele kgahlanong le Jehofa. Ka baka la se, batho ba ile ba thoma go dira dibe le go hwa. (Gen. 3:​1-6; Baroma 5:12) Mathata ka moka ao a lego gona mo lefaseng, e lego mahu, dintwa le go tlaišega, a bile gona ka baka la maaka ao Sathane a a boletšego kua serapeng sa Edene. Na Jehofa o kwa bohloko ka baka la maaka ao le mafelelo a ona? Ga go pelaelo gore a mo kweša bohloko. Le ga go le bjalo, Jehofa ga se a galefa goba go boloka sekgopi. Go ena le moo, ke “Modimo yo a thabilego.”—1 Tim. 1:11.

3. Re na le tokelo efe?

³ Re na le tokelo ya go tagafatša leina la Jehofa ka go kwa taelo e bonolo e rego: “Tumišang leina la Jehofa.” (Ps. 113:1) Re tumiša leina la Jehofa ka go botša ba bangwe therešo ka yena. Na le wena o ka tumiša leina leo? A re kweng mabaka a mararo  ao a tlo re thušago gore re tumiše leina la Modimo wa rena ka dipelo tša rena ka moka.

RE THABIŠA JEHOFA GE RE TUMIŠA LEINA LA GAGWE

4. Ke ka baka la’ng Jehofa a thaba ge re mo tumiša? Nea mohlala. (Bona le seswantšho.)

⁴ Re thabiša Tatago rena wa legodimong ge re tumiša leina la gagwe. (Ps. 119:108) Na re ka re Jehofa o swana le batho bao ba sa phethagalago bao ba ratago go tumišwa goba go amogelwa? Aowa. Nagana ka mohlala wo. Ngwanenyana yo monyenyane o gokarela tatagwe mo molaleng ke moka o re go yena, “O tate yo mokaone go ba feta ka moka mo lefaseng!” Tate yoo o thabišwa ke se ngwana yo a se bolelago. Ka baka la’ng? Na re ka phetha ka gore monna yoo o fo ba a nyaka go retwa le go tumišwa ke ngwana wa gagwe? Aowa. Go ena le moo, re ka tshepa gore ke tate yo lerato e bile o thabišwa ke go bona gore ngwana wa gagwe le yena o a mo rata le go mo leboga. O a tseba gore seo se tla dira gore ngwana wa gagwe a dule a thabile ge a dutše a gola. Ka mabaka a swanago, Jehofa e lego Tate yo mogolo o a thaba ge re mo tumiša.

5. Re ganetša maaka afe ge re tumiša leina la Modimo?

⁵ Ge re tumiša Tatago rena wa legodimong, re bontšha gore seo Sathane a se boletšego ka rena ke maaka a matala. Sathane o bolela gore ga go na motho yo a ka emelago leina la Modimo ka go botega. O re ga go na motho yo a ka dulago a botegela Modimo ge a lekwa. O bolela gore ka moka ga rena re ka hlanogela Jehofa ge e ba re nagana gore go mo hlankela ga go re hole ka selo. (Jobo 1:​9-11; 2:4) Jobo yo a botegago o ile a bontšha gore Sathane o na le maaka. Go thweng ka wena? Yo mongwe le yo mongwe wa rena o na le tokelo ya go emela leina la Tatago rena le go mo kgahliša ka go mo hlankela ka go botega. (Die. 27:11) Yeo e tloga e le tokelo e kgolo kudu.

6. Re ka ekiša bjang Kgoši Dafida le Balefi? (Nehemia 9:5)

⁶ Go rata Modimo go tlo dira gore batho bao ba mmotegelago ba nyake go tumiša leina la gagwe ka dipelo tša bona ka moka. Kgoši Dafida o ngwadile gore: “Anke ke rete Jehofa, anke ke rete leina la gagwe le lekgethwa ka pelo ya ka ka moka.” (Ps. 103:1) Dafida o be a kwešiša gore go tumiša leina la Jehofa go bolela go tumiša Jehofa ka boyena. Leina la Jehofa le akaretša botumo bja gagwe, ka gona, se se dira gore re nagane ka dika tša gagwe tše dibotse le ditiro tša gagwe tše di makatšago. Dafida o be a nyaka go swara leina la Tatagwe e le le lekgethwa le go le tumiša. O be a nyaka go dira seo ka pelo ya  gagwe ka moka. Ka mo go swanago, Balefi ba be ba etelela pele go tumišeng Jehofa. Ka boikokobetšo ba ile ba bolela gore mantšu a bona ga se a lekanego go tumiša leina la Jehofa le lekgethwa. (Bala Nehemia 9:5.) Ga go pelaelo gore Jehofa o ile a thabišwa ke go bona bahlanka ba gagwe ba botegago ba mo tumiša go tšwa pelong.

7. Re ka tumiša Jehofa bjang ge re le tšhemong le bophelong bja rena bja letšatši le letšatši?

⁷ Lehono, re ka kgahliša Jehofa ka go bolela ka yena ka borutho, ka go mo leboga le go mo rata. Ge re le tšhemong, re gopola gore morero wa rena o mogolo ke go dira gore batho ba gwerane le Jehofa le go ba thuša go lebelela Tatago rena yo lerato kamoo rena re mo lebelelago ka gona. (Jak. 4:8) Re thabela tsela yeo Beibele e hlalosago Jehofa ka yona ge e bolela ka lerato, toka, bohlale, matla le dika tše dingwe tša gagwe tše di kgahlišago. Le gona re tumiša Jehofa ka go lwela go mo kgahliša le go ekiša dika tša gagwe. (Baef. 5:1) Ge re dira bjalo re fapana le batho bao ba phelago mo lefaseng le le lebe. Batho bao ba ka bona gore ga re swane le bona ke moka ba ipotšiša gore ke ka baka la’ng re fapana le bona. (Mat. 5:​14-16) Ge re kopana le bona letšatši le lengwe le le lengwe, re ka ba hlalosetša gore ke ka baka la’ng re phela ka tsela yeo re phelago ka yona. Seo se tlo dira gore ba dipelo tšeo di lokilego ba feleletše ba gwerane le Modimo wa rena. Ge re tumiša Jehofa ka ditsela tše, re tloga re mo thabiša kudu.—1 Tim. 2:​3, 4.

RE THABIŠA JESU GE RE TUMIŠA LEINA LA JEHOFA

8. Ke ka baka la’ng Jesu e le mohlala o mobotse wa go tumiša leina la Jehofa?

⁸ Gare ga dibopiwa ka moka legodimong le lefaseng, ga go le se tee seo se tsebago Tate go feta Morwa. (Mat. 11:27) Jesu o rata Tatagwe, le gona o ile a šoma ka thata go tumiša leina la gagwe. (Joh. 14:31) Bošegong bja pele ga ge a ka hwa, o ile a rapela Tatagwe gomme a bolela ka mošomo wo a o dirilego mo lefaseng, o itše: “Ke ba tsebišitše leina la gago.” (Joh. 17:26) O be a e ra gore’ng?

9. Jesu o ile a diriša bjang papišo go hlalosa Tatagwe ka tsela e kwagalago?

⁹ Jesu o ile a dira selo seo se fetago go no botša batho gore leina la Modimo ke Jehofa. Bajuda bao Jesu a bego a ba ruta ba be ba šetše ba tseba leina la Modimo, eupša Jesu e ile ya ba “yena yo a . . . mo hlalositšego.” (Joh. 1:​17, 18) Ka mohlala, Mangwalo a Seheberu a re botša gore Jehofa ke yo a šokelago le yo a gaugelago. (Ek. 34:​5-7) Jesu o ile a hlalosa se gabotse ge a be a nea papišo ya morwa wa lehlaswa. Ge re bala kamoo tatagwe a ilego a ‘mmona a sa le kgole’ gomme a mo kitimela gore a mo gokarele, le go mo lebalela go tšwa pelong, re kgona go bona kamoo Jehofa a re bontšhago kgaugelo le lešoko ka gona. (Luka 15:​11-32) Jesu o ile a thuša batho go kwešiša gore Jehofa ke Modimo wa mohuta mang.

10. (a) Re tseba bjang gore Jesu o be a diriša leina la Tatagwe le gore o be a nyaka gore batho ba bangwe le bona ba le diriše? (Mareka 5:19) (Bona le seswantšho.) (b) Jesu o nyaka gore re dire’ng lehono?

¹⁰ Na Jesu o be a nyaka gore batho ba bangwe le bona ba diriše leina la Tatagwe? Ee. Baetapele ba bangwe ba bodumedi ba babe ba mehleng ya Jesu, ba be ba nagana gore leina la Modimo ke le lekgethwa kudu gore le ka dirišwa ke batho, eupša Jesu ga se a ka a dumelela dikgopolo tšeo di sa thewago Beibeleng di mo šitiša go kgethagatša leina la Tatagwe. Nagana ka nako yeo a ilego a fodiša monna yo a bego a tsenwe ke moya wa batemona motseng wa Bagerasa. Batho ba moo ba ile ba tšhoga gomme ba kgopela Jesu gore a tloge, ka gona  Jesu o ile a tloga nageng yeo. (Mar. 5:​16, 17) Lega go le bjalo, Jesu o be a nyaka gore batho ba moo ba tsebe leina la Jehofa. O ile a botša monna yoo gore a botše batho ka seo Jehofa a se dirilego e sego seo Jesu a se dirilego. (Bala Mareka 5:19.) a Jesu o nyaka gore le rena re dire se se swanago lehono, e lego go dira gore leina la Tatagwe le tsebje lefaseng ka moka! (Mat. 24:14; 28:​19, 20) Ge re bapala karolo ya rena, re thabiša Kgoši ya rena e lego Jesu.

11. Jesu o rutile barutiwa ba gagwe gore ba rapelele’ng, gona ke ka baka la’ng seo se le bohlokwa? (Hesekiele 36:23)

¹¹ Jesu o be a tseba gore morero wa Jehofa ke go tagafatša leina la Gagwe le go tloša dilo ka moka tšeo ba ilego ba mo thomeletša ka tšona. Ke ka baka leo Mong wa rena a rutilego balatedi ba gagwe gore ba rapele ka tsela ye: “Tatago rena wa magodimong, leina la gago a le kgethagatšwe.” (Mat. 6:9) Jesu o be a kwešiša gore bjo ke bothata bjo bogolo bjo tlholo ya Tatago rena wa legodimong ka moka, e lebeletšanego le bjona. (Bala Hesekiele 36:23.) Ga go sebopiwa le ge e le sefe legodimong goba lefaseng seo se ilego sa tagafatša leina la Jehofa go fetiša Jesu. Le ga go le bjalo, ge Jesu a be a golegwa, o ile a latofatšwa ka gore o rogaka Modimo! Jesu o be a tseba gore go senya leina le lekgethwa la Tatagwe e be e le sebe se segolo kudu. O be a tshwenyegile kudu ka gore o be a latofatšwa ka molato wa mohuta woo. Le e ka ba e bile lebaka le legolo leo le dirilego gore Jesu a be “bohlokong” diiri pele a ka swarwa.—Luka 22:​41-44.

12. Jesu o ile a kgethagatša bjang leina la Tatagwe ka tsela e kgolo?

¹² E le gore Jesu a kgethagatše leina la Tatagwe, o ile a kgotlelela go tlaišwa, go rogakwa le maaka ao ba bego ba mo phara ka ona. O be a tseba gore o kwele Tatagwe dilong ka moka. Ka baka la seo, o be a sa jewe ke dihlong. (Baheb. 12:2) Gape o be a tseba gore Sathane o be a mo hlasela ka go lebanya ka nako yeo. (Luka 22:​2-4; 23:​33, 34) Sathane o be a nagana gore a ka dira gore Jesu a se ke a botegela Modimo, eupša o ile a palelwa! Jesu o ile a bontšha gore Sathane o bolela maaka a  matala e bile Jehofa o na le bahlanka ba gagwe bao ba dulago ba mmotegela le ge ba na le mathata!

13. O ka thabiša bjang Kgoši ya rena e bušago?

¹³ Na o nyaka go kgahliša Kgoši ya gago e bušago? Tšwela pele o tumiša leina la Jehofa ka go thuša batho go tseba gore ge e le gabotse ke Modimo wa mohuta mang. Ge o dira bjalo o tla be o latela seo Jesu a se dirilego. (1 Pet. 2:21) Go swana le Jesu, o tlo thabiša pelo ya Jehofa e bile wa bontšha gore Sathane o na le maaka a matala!

RE THUŠA GO PHOLOŠA MAPHELO A BATHO GE RE TUMIŠA LEINA LA JEHOFA

14-15. Ke dilo dife tše di kgahlišago tšeo di ka diregago ge re ruta batho ka Jehofa?

¹⁴ Ge re tumiša leina la Jehofa, re thuša go phološa maphelo a batho. Bjang? Sathane “o foufaditše menagano ya bao ba sa dumelego.” (2 Bakor. 4:4) Ka baka la se, batho ba bantšhi ba dumela maaka ao Sathane a a bolelago a go swana le gore: Modimo ga a gona, Modimo o kgole le batho e bile ga a na taba le bona, Modimo ke yo mobe e bile o tlaiša batho bao ba dirago dilo tše mpe ka mo go sa felego. Morero wa maaka ao ke go senya leina la Jehofa le botumo bja gagwe le gore batho ba se ke ba nyaka go batamela kgauswi le yena, eupša ge re bolela ditaba tše dibotse re thibela morero wa Sathane. Re ruta batho therešo ka Tatago rena e bile re tumiša leina la gagwe le lekgethwa. Mafelelo e ba afe?

¹⁵ Therešo yeo e lego ka Lentšung la Modimo e na le matla a magolo. Ge re ruta batho ka Jehofa le ka tsela yeo a lego ka yona, re bona selo se sengwe seo se kgahlišago kudu. Maaka ao Sathane a a rutilego batho a tloga ganyenyane-ganyenyane gomme batho ba thoma go lebelela Tatago rena ka tsela yeo re mo lebelelago ka yona. Ba makatšwa ke matla a gagwe a sa felego. (Jes. 40:26) Ba tshepa gore ke Modimo wa toka. (Doit. 32:4) Ba ithuta dilo tše dintšhi ka bohlale bja gagwe bjo bogolo. (Jes. 55:9; Baroma 11:33) Ba kgothatšwa ke go tseba gore ke lerato. (1 Joh. 4:8) Ge ba dutše ba batamela kgauswi le Jehofa, kholofelo yeo ba nago le yona ya go tlo phela ka mo go sa felego e le bana ba Modimo e ba ya kgonthe go bona. Re na le tokelo e  kgolo kudu ya go thuša batho gore ba batamele kgauswi le Tatago bona! Ge re dira bjalo Jehofa o re lebelela re le “bašomigotee le yena.”—1 Bakor. 3:​5, 9.

16. Batho ba bangwe ba ikwa bjang ge ba ithuta ka leina la Modimo? Nea mehlala.

¹⁶ Ge re kopana le batho la mathomo re ka no ba ruta feela gore leina la Modimo ke Jehofa. Seo se ka tloga se kgoma batho ba dipelo tše dibotse. Ka mohlala, ngwanenyana yo a bitšwago Aaliyah b o goletše lapeng leo e sego la Dihlatse. Le ge a be a tsena kereke, o be a sa kgotsofatšwe ke dilo tšeo ba bego ba mo ruta tšona e bile a sa ikwe a le kgauswi le Modimo. Ka morago ga gore a ithute le Dihlatse tša Jehofa, tsela yeo a ikwago ka yona e ile ya fetoga. O ile a thoma go bona Modimo e le mogwera wa gagwe. Le gona, o ile a makatšwa ke go tseba gore leina la Modimo le be le ntšhitšwe ka Dibeibeleng tše dintšhi gomme gwa no tsenywa direto tša go swana le Morena. Go ithuta ka leina la Jehofa e bile selo sa bohlokwa kudu bophelong bja gagwe. O ile a re: “Mogwera wa ka yo mogolo o na le leina!” Mafelelo e bile afe? O re: “Gona bjale ke na le khutšo. Ke ikwa ke na le tokelo e kgolo.” Monna yo mongwe yo a bitšwago Steve e be e le rammino e bile a etšwa bodumeding bja Sejuda. O ile a tlogela bodumedi bjoo ka gobane a bone gore bo tletše boikaketši, eupša ka morago ga gore mmagwe a hlokofale o ile a dumela go ithuta Beibele le yo mongwe wa Dihlatse tša Jehofa. O ile a kgomega kudu ge a be a ithuta ka leina la Modimo. O re: “Ke be ke sa ka ka ithuta ka leina la Modimo.” O tšwela pele ka gore: “E be e le la mathomo ke bona gore Modimo ke wa kgonthe! Go ile gwa ba bjalo ka ge e ka ke Motho wa kgonthe, gomme ka bona gore ke hweditše mogwera wa nnete.”

17. Ke ka baka la’ng o ikemišeditše go tšwela pele o tumiša leina la Jehofa? (Bona le seswantšho.)

¹⁷ Ge o le tšhemong, na o botša batho ka leina la Jehofa? Na o ba thuša go bona gore Jehofa ke Modimo wa mohuta mang? Ge o dira bjalo o tumiša leina la Modimo. Eka o ka dula o tumiša leina la Jehofa le lekgethwa ka go thuša batho go tseba gore ke Modimo wa mohuta mang. Ge o dira bjalo o tla be o phološa maphelo. O tla be o ekiša mohlala wa Kgoši ya rena e lego Jesu Kriste. Godimo ga tšohle, o tla be o thabiša Tatago rena yo lerato e lego Jehofa. Eka o ka dula o “reta leina la [Jehofa] go ya go ile.”!—Ps. 145:2.