1-2. Niki ekirikubaasa kutuhwera kwetegyereza oku Yehova arikwehurira iziina rye ryagambwaho ebitahikire?

 TEEKATEEKA ahari eki: Ka tugire ngu omuntu ou orikukunda yaakugambaho ekintu kibi munonga, kandi eki orikumanya ngu n’ekishuba, kwonka abamwe bakiikiriza. Nangwa, bakigambira abandi kandi nabo bakiikiriza. Nooyehurira ota? Waaba noofayo aha ki abandi barikuteekateeka, ekishuba ekyo nikikureetera kwehurira kubi munonga.—Enf. 22:1.

² Eky’okureeberaho eki nikituhwera kwetegyereza oku Yehova yaayehuriire obu eiziina rye ryashiishwa. Omwe aha baana be ab’omwoyo akamubeiherera ahari Haawa, omukazi w’okubanza. Kandi Haawa akaikiriza ekishuba ekyo. Ekyo kikareetera abazaire baitu b’okubanza kugomera Yehova. N’ekyarugiremu, ekibi n’okufa bikabuga omu bantu boona. (Kut. 3:​1-6; Rom. 5:12) Oburemeezi bwona obu turikureeba omu nsi, nk’okufa, entaro, enaku biriho ahabw’ebishuba ebi Sitaane yaatandikire kujanjaaza omu musiri Edeni. Mbwenu shi Yehova naayehurira kubi ahabw’ebishuba ebyo n’ebirikurugamu? Eego buzima. Kwonka, Yehova taine kiniga nari enziika. Kureka, akiri Ruhanga w’okushemererwa.—1 Tim. 1:11.

3. Twine bujunaanizibwa ki?

³ Twine omugisha gw’okwejumba omu murimo gw’okweza eiziina rya Yehova turikworobera ekiragiro eki: “Himbisa eiziina rya [Yehova].” (Zab. 113:1) Ekyo nitukikora turikugamba gye ahari Mukama w’eiziina eryo eririkwera. Mbwenu shi noija  kukora otyo? Ka twetegyereze enshonga ishatu nkuru eziraatuhwere kuhimbisa eiziina rya Ruhanga twihire aha mutima.

NITUSHEMEZA YEHOVA TWAHIMBISA EIZIINA RYE

4. Ahabw’enki okuhimbisa iziina rya Yehova kirikumushemeza? Ha eky’okureeberaho. (Reeba n’ekishushani.)

⁴ Nitushemeza Tataitwe ow’omu iguru turikuhimbisa eiziina rye. (Zab. 119:108) Mbwenu shi, Ruhanga ow’obushoboorozi bwona naayegomba kuhimbisibwa nk’abantu abatahikiriire? Ngaaha buzima. Teekateeka aha mwishiki muto orikubutambatira ishe, reero akamugira ati, “Niiwe taata orikukirayo oburungi omu nsi yoona!” Nikireetera ishe kushemererwa kandi nikimukwataho munonga. Mbwenu shi twine kuteekateeka ngu ni taata orikwenda ngu omuhara amuhimbise? Ngaaha. Kureka, twine obwesigye ngu Ishe naayehurira gye, yaareeba omuhara naayoreka ngu naamukunda kandi ngu naamusiima. Naamanya ngu emitwarize nk’egyo neija kumuhwera kushemererwa yaaba naakura. Nikyo kimwe, Yehova Tataitwe orikukirayo naayehurira gye twamuhimbisa.

5. Nitubaasa kwihaho kishuba ki twahimbisa eiziina rya Ruhanga?

⁵ Twahimbisa Tataitwe ow’omu iguru, nitworeka ngu ebi Sitaane yaatugambireho n’ebishuba. Sitaane naagira ngu tihaine orikubaasa kuguma ari omwesigwa arikujuririra eiziina rya Ruhanga. Kandi naagira ngu tihaine orikubaasa kuhamira ahari Yehova. Naayongyeraho ngu, twena nitubaasa kuruga ahari Ruhanga okukora ekyo kyaba nikitugasira. (Yob. 1:​9-11; 2:4) Kwonka, Yobu owaabaire ari omwesigwa akooreka ngu Sitaane n’omubeihi. Kandi shi iwe? Buri omwe ahariitwe aine omugisha gw’okuhimbisa eiziina rya Tataitwe, kandi akaguma naamuheereza omu bwesigwa. (Enf. 27:11) Buzima n’omugisha gw’amaani kukora ekyo.

6. Nitubaasa kutooreza tuta Omugabe Daudi n’Abaleevi? (Nehemia 9:5)

⁶ Rukundo ei abantu bainiire Ruhanga neebahiga kumuhimbisa. Omugabe Daudi akahandiika ati: “Singiza [Yehova], iwe magara gangye na byona ebiri omuriinye bisingize eiziina rye eririkwera.” (Zab. 103:1) Daudi akeetegyereza ngu yaahimbisa eiziina rya Yehova niwe arikuba naahimbisa. Eiziina rya Yehova niritureetera kuteekateeka ahari ogwo ou ririkujwekyera, emitwarize ye mirungi, n’ebikorwa bye ebirikutangaaza. Daudi akaba naatwara eiziina rya Ishe nk’eririkwera kandi arikwenda kurihimbisa. Ekyo akaba naayenda kukikora n’omutima gwe gwona. Nikyo kimwe, Abaleevi bakaba nibeebembera  abandi omu kuhimbisa Yehova. Omu bucureezi bakaikiriza ngu ebigambo byabo bikaba bitarikubaasa kuhimbisa gye eiziina rya Yehova eririkwera nk’oku kishemereire. (Shoma Nehemia 9:5.) Buzima, Yehova akashemererwa ahabw’obucureezi nk’obwo n’okumuhimbisa baihire aha mutima.

7. Nitubaasa kuhimbisa tuta Yehova omu kubuurira n’omu mbeera zaitu eza butoosha?

⁷ Obunaku obu, nitubaasa kuhimbisa Yehova turikumugambaho n’omuhimbo, turikumusiima kandi tukooreka ngu nitumukunda. Twaba nitubuurira, nituguma tutaire omutima aha kigyendererwa kyaitu ekikuru, eky’okuhwera abantu kwirira haihi Yehova, n’okumureeba nka Ishebo orikubakunda. (Yak. 4:8) Nitushemererwa munonga kworeka abantu oku Baibuli erikugamba ahari Yehova, rukundo ye, oburingaaniza bwe, amaani ge n’emitwarize ye endiijo erikushemeza. Kandi nituhimbisa Yehova turikuteeraho kumutooreza. (Efe. 5:1) Twakora tutyo, nituba ab’omutaano omu nsi egi embi. Abantu nibabaasa kwetegyereza ngu nitutwaza omu muringo gw’omutaano, reero beebuuze ahabw’enki. (Mat. 5:​14-16) Twaba nitugaaniira nabo buri izooba, nitubaasa kubashoboororera ahabw’enki nitutwaza tutyo. N’ekirikurugamu, abacureezi nibabaasa kwenda kwirira haihi Yehova. Twahimbisa Yehova omu miringo egi, nitumushemeza.—1 Tim. 2:​3, 4.

NITUSHEMEZA YESU TWAHIMBISA EIZIINA RYA YEHOVA

8. Yesu ayebembeire ata omu kuhimbisa iziina rya Yehova?

⁸ Omu bihangirwe bya Yehova byona eby’omu iguru n’omu nsi, Yesu niwe arikumanya gye Ishe. (Mat. 11:27) Yesu naakunda Ishe, kandi niwe arikukirayo kuhimbisa iziina rya Yehova. (Yoh. 14:31) Obu yaashaba Ishe aha kiro eki yaafeereireho, akagamba aha buheereza bwe omu bugufu ati: ‘Mbamanyise eiziina ryawe.’ (Yoh. 17:26) Akaba naamanyisa ki?

9. Yesu akakoresa ata enfumu kugamba ahari Ishe omu muringo ogurikwetegyerezibwa gye?

⁹ Yesu akakora ekirikukira aha kumanyisa abantu ngu eiziina rya Ruhanga ni Yehova. Abayudaaya abu Yesu yaayegyeise bakaba nibamanya eiziina rya Ruhanga. Kwonka Yesu akeebembera omu kuba niwe yaamanyisa abantu eiziina rya Ishe. (Yoh. 1:​17, 18) Nk’eky’okureeberaho, Ebyahandiikirwe eby’Oruheburaayo nibyoreka ngu Yehova aine embabazi n’esaasi. (Kur. 34:​5-7) Yesu akoongyera kworeka ngu ekyo nikwo kiri omu nfumu y’omwana owaarazire. Omu nfumu egyo ishe w’omwana owaayeteisize ku yaamureebire akiri hare akairuka kumubugana yaamubumbatira kandi yaamusaasirira kimwe, ekyo nikituhwera kwetegyereza embabazi za Yehova n’esaasi. (Luk. 15:​11-32) Yesu akooreka gye eki Ishe buzima ari.

10. (a) Nitumanya tuta ngu Yesu akakoresa eiziina rya Ishe, kandi ngu akaba naayenda n’abandi bakore nikyo kimwe? (Mako 5:19) (Reeba n’ekishushani.) (b) Yesu naayenda ngu hati tukore ki?

¹⁰ Mbwenu shi Yesu akaba naayenda ngu abandi nabo bakorese eiziina rya Ishe? Eego buzima. Abeebembezi b’ediini abamwe ab’omu bwire bwa Yesu bakaba nibagira ngu iziina rya Ruhanga n’eririkwera munonga kandi tirishemereire kwaturwa, kwonka Yesu taraikiriize emiteekateekyere etari omu byahandiikirwe kumuremesa kuhimbisa eiziina rya Ishe. Teekateeka obu Yesu yaakiza omushaija oriho daimoni omu kicweka kya Geraseene. Abantu bakatiina munonga kandi baayeshengyereza Yesu ngu abarugyemu, n’ahabw’ekyo akaruga omu kicweka ekyo. (Mak. 5:​16, 17) Kwonka, Yesu akaba naayenda eiziina rya Yehova rimanywe omu kicweka ekyo. N’ahabw’ekyo Yesu  akaha omushaija ogwo obujunaanizibwa kugambira abantu b’omu kicweka ekyo, ti eki Yesu yaakozire, beitu eki Yehova yaamukoreire. (Shoma Mako 5:19.) a Naayenda ngu naitwe, tumanyise eiziina rya Ishe omu nsi yoona! (Mat. 24:14; 28:​19, 20) Twakora tutyo, nitushemeza Omugabe waitu, Yesu.

11. Yesu akeegyesa abeegi be kushaba ki, kandi ahabw’enki ni kikuru? (Ezekieli 36:23)

¹¹ Yesu akaba naamanya ngu ekigyendererwa kya Yehova n’okweza eiziina rye, n’okuriihaho ekijumo kyona. Niyo nshonga ahabw’enki Mukama waitu yaayegyeise abakuratsi be ati: “Tataitwe ow’omu iguru, eiziina ryawe ryezibwe.” (Mat. 6:9) Yesu akaba naamanya ngu egi n’enshonga nkuru erikutwariramu ebyahangirwe byona. (Shoma Ezekieli 36:23.) Tihariho kyahangirwe omu nsi n’omu iguru ekihimbiise eiziina rya Yehova okukira Yesu. Kwonka obu Yesu yaakwatwa, abazigu be bakamutaho rubanja ki? Orw’okurogota aha eiziina rya Ruhanga. Yesu akaba naamanya ngu okujuma nari okugamba ebitahikire aha eiziina rya Ruhanga eririkwera nikyo kibi erikukirayo. Akashaasha munonga ahabw’okugira ngu bakamutaho orubanja nk’orwo. Egi niyo nshonga ahabw’enki Yesu yaabaire aine amaganya, obu yaabaire ari haihi kukwatwa.—Luk. 22:​41-44.

12. Yesu akeeza ata eiziina rya Ishe omu muringo ogurikukirayo?

¹² Yesu akagumisiriza okubonabonesibwa, okujumwa n’okubeihererwa kwona kugira ngu ayeze eiziina rya Ishe. Akaba naamanya ngu aine kworobera Ishe omuri byona, kandi tihaine ekyabaire kiine kumureetera kukwatwa enshoni. (Heb. 12:2) Akaba naamanya ngu Sitaane niwe yaabaire naamutaahirira butunu omu bwire obwo obw’obusaasi. (Luk. 22:​2-4; 23:​33, 34) Sitaane akaba naateekateeka ngu Yesu naija kuremwa kuguma ari omwesigwa! Kwonka tikwo kyabaire, Yesu akooreka ngu Sitaane n’omubeihi kandi ngu abaheereza ba Yehova abeesigwa nibabaasa kuguma bamuhamiireho n’omu kugyezibwa kw’amaani!

13. Noobaasa kushemeza ota Omugabe waawe orikutegyeka?

¹³ Nooyenda kushemeza Omugabe waawe orikutegyeka? Gumizamu kuhimbisa eiziina  rya Yehova, orikuhwera abandi kumanya ebirikukwata ahari Ruhanga. Waakora otyo, nooba nootooreza Yesu. (1 Pet. 2:21) Nka Yesu nooreetera Yehova kushemererwa kandi nooyoreka ngu Sitaane n’omubeihi!

NITUHWERA OMU KUCUNGURA AMAGARA G’ABANTU TWAHIMBISA EIZIINA RYA YEHOVA

14-15. Niharugamu birungi ki twayegyesa abantu ebirikukwata ahari Yehova?

¹⁴ Nituhwera omu kucungura amagara g’abantu twahimbisa eiziina rya Yehova. Tuta shi? Sitaane ahumize emitima yaabatarikwikiriza. (2 Kor. 4:4) N’ekirugiremu, abantu baabaasize kwikiriza ebishuba bye, otwariiremu ebishuba ebirikugira ngu Ruhanga tariho, ari hare munonga, tarikufayo aha bantu, taine saasi kandi naabonabonesa abantu ababi ebiro byona. Ebishuba nk’ebyo nibishiisha eiziina rya Yehova, kandi bireetera abantu kutagira ekihika ky’okumwirira haihi. Kwonka omurimo gwaitu niguremesa Sitaane kuhikiiriza ekigyendererwa kye. Nituhimbisa eiziina rya Ruhanga twayegyesa abantu amazima agarikukwata ahari Tataitwe. Niki ekirikurugamu?

¹⁵ Amazima ag’omu Kigambo kya Ruhanga gaine amaani maingi. Twayegyesa abantu amazima agarikukwata ahari Yehova n’eki ari, nitureeba ekintu ekirikushemeza. Mporampora abantu nibeetegyereza ngu Sitaane n’omubeihi, reero kibareetera kureeba Yehova nka Tataitwe oine rukundo nk’oku turikumureeba. Nibatangaarira amaani ge agataine bugarukiro. (Isa. 40:26) Nibongyera kugira obwesigye omu buringaaniza bwe ahabw’okugira ngu ahikiriire. (Bir. 32:4) Nikibashemeza ku barikumanya ngu aine obwengye. (Isa. 55:9; Rom. 11:33) Kandi nikibahuumuriza baayega ngu Ruhanga ni rukundo. (1 Yoh. 4:8) Amatsiko gaabo ag’okutuuraho ebiro byona nigongyera kuhama baaba nibairira haihi Yehova. Buzima ka twine omugisha gw’omuhendo ogw’okuhwera abantu kwirira haihi Ishebo! Twakora tutyo, Yehova naatureeba nk’abakozi abarikukora hamwe nawe.—1 Kor. 3:​5, 9.

16. Abamwe nibakwatwaho bata ku barikwega eiziina rya Ruhanga? Ha eky’okureeberaho.

¹⁶ Omu kubanza nitubaasa kwegyesa abantu ngu eiziina rya Ruhanga ni Yehova.  Ekyo kyonka nikibaasa kukwata munonga aha b’emitima eshemereire. Nk’eky’okureeberaho, omwishiki orikwetwa Aaliyah b akakurira omu ka etari y’Abakristaayo. Kwonka akaba ataine kakwate koona n’ediini ye nari Ruhanga. Abajurizi ba Yehova ku batandikire kumwegyesa Baibuli akahindura emitwarize ye. Akatandika kureeba Ruhanga nka munywani we. Kandi akatangaara ku yaayegire ngu eiziina rya Ruhanga rikaihwa omu Baibuli omu mwanya gwaryo haatebwamu ebitiinisa, nka Mukama. Okwega eiziina rya Yehova kikahindura embeera ye. Akatangaara arikugira ati: “Munywani wangye orikukirayo aine eiziina!” N’ekyarugiremu? Naayongyeraho: “Hati nyine obunanukye bw’omu mutima. Niinyereeba nk’ow’omuhendo munonga.” Omushaija orikwetwa Steve akaba ari omweshongozi kandi ari Omuyudaaya. Akeetaanisa aha diini ye ahabw’oburyarya obwabaire burimu. Kwonka, obu yaabaire aine amaganya akaikiriza kwegaita aha mwegi wa Baibuli owaabaire naayegyesibwa omwe aha Bajurizi ba Yehova. Akakwatwaho munonga ku yaayegire eiziina rya Ruhanga. Naagira ati: “Nkaba ntarikumanya ngu Ruhanga aine eiziina.” Naayongyeraho ati: “Ogwo nigwo gwabaire guri omurundi gwangye gw’okubanza kumanya ngu Ruhanga n’owaabuzima! Kandi nibwo naamanya ngu mboine omunywani.”

17. Ahabw’enki omaririire kugumizamu noohimbisa eiziina rya Yehova? (Reeba n’ekishushani.)

¹⁷ Waaba noobuurira kandi orikwegyesa abantu, noobahwera kwetegyereza eiziina rya Yehova eririkwera? Noobahwera kureeba Ruhanga nk’owaabuzima? Waakora otyo, nooba noohimbisa eiziina rya Ruhanga. Gumizamu noohimbisa eiziina rya Yehova eririkwera orikuhwera abantu kumanya ou eiziina eryo ririkujwekyera. Waakora otyo, noija kujuna amagara gaabo. Obwo nooba nooyorobera Omugabe waawe, Yesu Kristo. Kandi okukira munonga, noija kushemeza Yehova, Sho orikukunda. Mariirira kuhimbisa eiziina rye “ebiro n’ebiro”!—Zab. 145:2.