1-2. Kodi ni ciratizo ciponi comwe cingatithandize kudziwa momwe Yahova adabvera pomwe dzina lace lidapswipizidwa?

 TIYEZEZERE kuti munthu omwe mumbamufuna akukulewani bzinthu bzakuipa. Imwepo mukudziwa kuti bzomwe akulewabzo mpsakunama; tsono, winango akukumbuka kuti mpsacadidi. Ndipo iwo akuuzambo winango magunkhayo. Kodi imwepo mungabzibve tani? Penu imwepo mumbakhala bwino na wanthu ndipo muna mbiri yabwino, mungabve kuwawa kwene-kwene na kukunamiziraniko. — Mimwani 22:1.

² Bzimwebzi bzingatithandize kubvesesa momwe Yahova adabvera pomwe dzina lace lidapswipizidwa. M’bodzi wa wana wauzimu wa Yahova adauza gunkha Eva. Ndipo Evayo adakhulupira gunkhalo. Gunkha limweri lidacitisa kuti abereki wathu wakuyamba apandukire Yahova. Thangwe ra gunkhali, pikado na infa bzidabwera pa dziko la pantsi. (Genesesi 3:1-6; Aroma 5:12) Mabvuto yentse yomwe timbagumana nayo, ninga nkhondo na kubonera, bzimbabwera thangwe ra gunkha lomwe Sathani adalilewa mu zunde la Edeni. Kodi Yahova ambabva kuwawa thangwe ra kunamiziridwa na mabvuto yomwe yambabwera thangwe ra kunamiziridwako? Inde bzimbamuwawa kwene-kwene. Napo bziri tenepo, Yahova ambakoya lini cakumtima. Iye ni “Mulungu wakukondwa.” — 1 Timotio 1:11.

3. Kodi ni mwayi uponi omwe ifepano tinawo?

³ Ifepano tina mwayi wakuthandizira kucenesa dzina la Mulungu tikambabvera lamulo lakuti: “Tumbizani dzina la Yahova.” (Salimo 113:1) Timbatumbiza dzina la Yahova tikambauza winango cadidi pakulewa bza iye. Kodi imwepo ndimwe wakukonzeka kucita bzimwebzi? Mbaticezeraneni mathangwe matatu yomwe yan’tithandiza kutumbiza dzina la Yahova na mtima wathu wentse.

 TIMBAKONDWESA YAHOVA TIKAMBATUMBIZA DZINA LACE

4. Kodi Yahova ambabzibva tani tikatumbiza dzina lace? Fotokozani. (Onani cithunzi-thunzi.)

⁴ Timbakondwesa Pai wathu wakudzulu tikambatumbiza dzina lace. (Salimo 119:108) Kodi bzimwebzi bzikufuna kuthandauza kuti Mulungu wamphanvu zentse ali ninga wanthu wakuperewera omwe ambafuna kutumbizidwa kuti abzibve bwino? Ne, ndibzo lini. Onani ciratizo. Kamtsikana kakukolombexa pai wace mwalufoyi ndipo kakuwauza pai wacewo kuti: “Imwepo ndimwe pai wabwino kwene-kwene!” Bzimwebzi bzikucitisa kuti paiyo akomedwe kwene-kwene. Thangwe ranyi? Kodi tingalewe kuti paiyo ni munthu wakuwofoka ndipo ambandothemba kucita kutumbizidwa na mwana waceyo basi? Ne, ndibzo lini. Paiyo ngwamphanvu, tsono iye ambakomedwa akambawona mwana wace akumutumbiza. Iye ambadziwa kuti khalidwe limweri linicitisa kuti mwana waceyo akhale wakukondwa pomwe akukula. Mwakundendemerana na bzimwebzi, Yahova, Pai wathu Mkululetu, ambakomedwa tikambatumbiza dzina lace.

5. Tikambatumbiza dzina la Yahova, kodi ni gunkha liponi lomwe timbagaza?

⁵ Tikambatumbiza Pai wathu wakudzulu, timbathandizira kugaza gunkha la Sathani. Sathani adalewa kuti palibe munthu omwe angakhotcerere dzina la Mulungu. Iye adalewambo kuti palibe munthu omwe angakhale wakukhulupirika kwa Yahova. Iye adalewa pomwe kuti tikagumana na mabvuto pa moyo wathu tingasiye kutumikira Yahova. (Djobi 1:9-11; 2:4) Tsono Djobi omwe akhali wakukhulupirika adagaza gunkha la Sathaniri. Tani imwepombo? Ali-wentse wa ifepano ana mwayi wakutumbiza dzina la Mulungu na kupitiriza kumutumikira mwakukhulupirika. (Mimwani 27:11) Umweyu ni mwayi ukulu kwene-kwene kwa ifepano.

6. Kodi tingatewezere tani Mambo Davide na Alevi? (Nehemiya 9:5)

⁶ Wale omwe ambafuna Mulungu ambatumbiza dzina lace na mtima wawo wentse. Mambo Davide adanemba kuti: “Moyo wangu utumbize Yahova; cinthu ciri-centse comwe ciri mwa ine citumbize dzina lace lakucena.” (Salimo 103:1) Davide akhadziwa kuti tikatumbiza dzina la Yahova timbakhala tikutumbiza Yahova caiyeyo. Dzina la Yahova limbalewambo bza mbiri yace. Ndipopa tikabva bza dzina lace timbakumbukira bza makhalidwe yace yabwino na bzakucita bzace bzabwino. Davide adawona kuti dzina la Yahova ndakucena ndipo adafuna kulitumbiza. Iye akhafuna kucita bzimwebzo na “cinthu ciri-centse” comwe cikhali mwa iye, bzomwe bzikufuna kulewa kuti, akhafuna  kutumbiza dzina la Yahova na mtima wace wentse. Alevimbo adakhala patsogolo pa kutumbiza Yahova. Iwo adazindikira kuti mafala yomwe iwo angadalewa yangadakwanisa lini kutumbiza bwino-bwino dzina la Yahova. (Werengani Nehemiya 9:5.) Kutumbiza dzina la Yahova mu njira ya kubzicepesa kumbacitisa kuti Yahova akomedwe kwene-kwene.

7. Kodi tingatumbize tani Yahova mu upalizi na pa moyo wathu wa ntsiku na ntsiku?

⁷ Ntsiku zino, timbakondwesa mtima wa Yahova tikambalewa bza iye na mafala yakulatiza kutenda na ya lufoyi. Tikambapalizira, cakulinga cathu cikulu n’cakuti tithandize wanthu kuti akhale pa uxamwali na Yahova acibvambo ninga momwe ifepano timbabvera pakulewa bza iye. (Tiyago 4:8) Timbathandiza wanthu kuti adziwe bzomwe Bibliya limbalewa pakulewa bza Yahova na makhalidwe yace ninga lufoyi, cirungamo, nzeru, mphanvu na makhalidwe manango yakufunika kwene-kwene. Ndipo timbatumbizambo Yahova na kucita bzinthu bzomwe bzimbamudekera tikacita nyongo yakumutewezera. (Aefezo 5:1) Tikacita bzimwebzi timbabzisiyanisa na dziko lakuipali. Wanthu angakwanise kuwona kuti ndife wakusiyana ndipo angabzibvunze kuti thangwe ranyi. (Mateu 5:14-16) Tikambaceza nawo ntsiku na ntsiku, iwo an’dzakwanisa kudziwa kuti thangwe ranyi ndife wakusiyana. Bzimwebzi bzimbacitisa kuti wale omwe ana mtima wabwino ayambe kutumikira Yahova. Tikambatumbiza Yahova mu njira zimwezi, iye ambakomedwa. — 1 Timotio 2:3, 4.

TIMBAKONDWESA JEZU TIKAMBATUMBIZA DZINA LA YAHOVA

8. Kodi Jezu adatumbiza tani dzina la Yahova?

⁸ Pa bzakulengedwa bzentse bza nzeru bza kudzulu na bza pa dziko pantsi palibe comwe cimbamudziwa bwino-bwino Yahova kuposa Jezu Kristu. (Mateu 11:27) Jezu ambafuna kwene-kwene Pai wace, Yahova, ndipopa iye ali patsogolo kwene-kwene pa kutumbiza dzina lace. (Juwau 14:31) Pa usiku bomwe mangwana yace angadaphedwa, iye adacita mpembo kwa Pai wace. Mu mpembo umweyu, iye adafotokoza cinthu cakufunika kwene-kwene comwe adakwanisa kucita pa utumiki bwace pa dziko la pantsi pano. Iye adati: “Inepano ndawadziwisa dzina lanu.” (Juwau 17:26) Kodi iye akhafuna kulewa ciyani na mafala yamweya?

9. Kodi Jezu adaphatisa basa ciratizo ciponi kuti afotokoze momwe Pai wace aliri?

⁹ Jezu adacita bzizinji kuposa kondodziwisa wanthu bza dzina la Yahova. Adjuda wentse akhadziwa kale dzina la Mulungu. Tsono Jezu adacita nyongo ‘yakufotokozera wanthu . . . bza Mulunguyo.’ (Juwau 1:17, 18) Mwa ciratizo, bzinembo bza Cihebereu bzimbalewa kuti Yahova ngwa lufoyi likulu na wantsisi. (Ekisodo 34:5-7) Jezu adabvekesa bwino nfundo imweyi mwa kufotokoza ciratizo ca mwana wakutaika, omwe adadzakungula, na pai wace. Timbawerenga kuti “pomwe pai wacewo adamuwona na patali,” adamuthamangira, acimukumbatira, acimulekerera na mtima wentse. Bzimwebzi bzikutithandiza kuwona kuti Yahova ana lufoyi likulu na ntsisi. (Luka 15:11-32) Jezu adalewa mwakubveka bwino momwe Pai wace aliri.

10. (a) Kodi timbadziwa tani kuti Jezu adaphatisa basa dzina la Pai wace nakuti iye akhafunambo kuti winango acitembo bzibodzi-bodzibzo? (Onani cithunzi-thunzi.) (Marko 5:19) (b) N’ciyani comwe Jezu akufuna kuti ticite ntsiku zino?

¹⁰ Kodi Jezu akhafuna kuti wanthu winango aphatisembo basa dzina la Pai wace? Inde akhafuna. Atsogoleri wa magereja wa mu nthawe ya Jezu akhalewa kuti dzina la Mulungu limbafunika lini kugumidwa-gumidwa thangwe ndakucena. Malamulo yamweya yakhali lini yakucokera m’Bzinembo, koma yakhali ya wanthu. Tenepo, nzeru zimwezi ziribe  kucitisa Jezu kuleka kulemekeza dzina la Pai wace. Kumbukirani bza nthawe inango yomwe Jezu adapoza mwamuna munango omwe akhana madimonyo ku Jerazeno. Wanthu adabva mantha kwene-kwene ndipo adakumbira Jezu kuti acoke ku mbuto imweyire. (Marko 5:16, 17) Napo bzikhali tenepo, Jezu akhafuna kuti dzina la Pai wace lidziwike ku mphimpha imweyo. Ndipopa, iye adauza mwamuna omwe adamupoza ule kuti adziwise wanthu bzomwe Yahova wamucitira, sikuti bzomwe Jezuyo wamucitira. (Werengani Marko 5:19.) a Ninga momwe bzidacitikira mu nthawe imweyire, Jezu akufunambo kuti tidziwise dzina la Pai wace pa dziko lentse la pantsi! (Mateu 24:14; 28:19, 20) Tikacita bzimwebzi, timbakondwesa Mambo wathu, Jezu Kristu.

11. Kodi Jezu adapfunzisa ateweri wace kuti ambapembe tani, ndipo thangwe ranyi bzimwebzi mpsakufunika kwene-kwene? (Ezekiyeli 36:23)

¹¹ Jezu akhadziwa kuti cakulinga ca Yahova ni kucenesa dzina lace kwa wale omwe ambalipswipiza. Ndipopa, iye adapfunzisa ateweri wace kuti ambapembe kuti: “Baba wathu omwe muli kudzulu, dzina lanu licenesedwe.” (Mateu 6:9) Jezu adadziwa kuti imweyi ni nkhani ikulu kwene-kwene. (Werengani Ezekiyeli 36:23.) Palibe cakulengedwa ciri-centse canzeru kudzulu ayai pano pa dziko la pantsi comwe cidacenesa dzina la Mulungu kuposa momwe Jezu adacitira. Tsono pomwe Jezu adamangidwa, kodi ni mulandu uponi omwe adanamiziridwa? Iye adanamiziridwa kuti watukwana Mulungu! Bzimwebzi bzidamuwawa kwene-kwene Jezu, thangwe iye akhadziwa kuti kupswipiza dzina la Pai wace ikhali pikado ikulu kwene-kwene. Ndipopa Jezu “adaneseka kwene-kwene mu mtima” pomwe akhadasala pang’ono kumangidwa. — Luka 22:41-44.

12. Kodi Jezu adacenesa tani dzina la Pai wace?

¹² Kuti Jezu acenese dzina la Pai wace, iye adagumana na mabvuto mazinji ninga kutukwanidwa na kunamiziridwa magunkha. Iye akhadziwa kuti wabvera Pai wace pa bzinthu bzentse; ndipopa iye akhalibe nabzo basa kuti angadacitisidwa manyazi. (Ahebereu 12:2) Iye akhadziwa kuti Sathani ndiye omwe akhacitisa bzimwebzi. (Luka 22:2-4; 23:33, 34) Sathani akhakumbuka kuti angadakwanisa kucitisa Jezu kuleka kukhala wakukhulupirika kwa Yahova. Tsono Sathani adatazira kukwanirisa  cakulinga cace! Jezu adalatiza kuti Sathani ngwakunama na wakuipa ndipo Yahova ana atumiki wace omwe napo akagumana na mabvuto ambapitiriza kukhala wakukhulupirika!

13. Kodi imwepo mungakondwese tani Mambo wanu Jezu Kristu?

¹³ Kodi imwepo mukufuna kukondwesa Mambo wanu, Jezu? Pitirizani kutumbiza dzina la Yahova na kuthandizambo wanthu winango kuti amudziwe bwino Yahovayo. Mukacita bzimwebzi, imwepo mumbakhala mukutewera nzayo za Jezu. (1 Pedru 2:21) Ninga Jezu, imwepo mumbakondwesa mtima wa Yahova ndipo mumbalatiza kuti Sathani ni nyamagunkha wakusaya manyazi!

TIMBAPULUMUSA WANTHU TIKAMBATUMBIZA DZINA LA YAHOVA

14-15. Kodi ni phindu liponi lomwe wanthu ambakhala nalo tikambawapfunzisa bza dzina la Mulungu?

¹⁴ Tikambatumbiza dzina la Yahova timbakhala tikuthandizira kupulumusa wanthu. Mwa njira iponi? Sathani “wampsinkha makumbukidwe ya anyakusaya kukhulupira.” (2 Akolinto 4:4) Ndipopa iwo ambabvuma magunkha ya Sathani ninga aya: Kulibe Mulungu, Mulungu ali kutali na ifepano ndipo alibe basa na wanthu, Mulungu ngwakuuma mtima ndipo ambaboneresa wanthu mpaka kale-kale. Cakulinga ca magunkha yamweya ni kubisa ayai kupswipiza dzina la Mulungu na mbiri yace kuti wanthu aleke kufuna kumudziwa. Basa lathu limbacitisa kuti cakulinga ca Sathanici cileke kukwanisika. Tikambapfunzisa wanthu cadidi pakulewa bza Mulungu wathu, timbakhala tikutumbiza dzina lace. Kodi ni phindu liponi lomwe iwo ambakhala nalo?

¹⁵ Cadidi ca m’Fala la Mulungu n’camphanvu kwene-kwene. Tikambapfunzisa wanthu cadidi ca Yahova cakulewa bza momwe iye aliri timbakhala wakukondwa. Wanthu ambacitisidwa lini khungu na magunkha ya Sathani ndipo iwo ambayamba kuwona makhalidwe yabwino ya Pai wathu wakudzulu. Iwo ambadabwa na mphanvu zace zakusaya malire. (Zaiya 40:26) Iwo ambamuthemba thangwe ra cirungamo cace. (Deuteronomiyo 32:4) Iwo ambapfunza bzizinji na nzeru zace zakusaya malire. (Zaiya 55:9; Aroma 11:33) Iwo ambatsangalazidwa akadziwa kuti iye ni lufoyi. (1 Juwau 4:8) Iwo akakhala pa uxamwali na Yahova, ambadikhirira kudzakhala na moyo wakusaya ninga wana  wace. Ni mwayi ukulu kwene-kwene kwa ifepano kuthandiza wanthu kuti akhale axamwali wa Yahova! Tikacita bzimwebzi, Yahova ambatiwona kuti ndife “anyabasa anzace.” — 1 Akolinto 3:5, 9.

16. Kodi wanthu winango ambabva tani akambapfunza bza dzina la Mulungu? Fotokozani.

¹⁶ Cinthu cakuyamba comwe tingacite tikagumana na wanthu mu upalizi ni kuwapfunzisa kuti dzina la Mulungu ni Yahova. Bzimwebzi bzingacitise wanthu wa mitima yabwino kuti abzibve bwino. Mwa ciratizo, mtsikana munango wakucemeredwa Aaliyah b adaleredwa m’banja lomwe likhali lini lacikristau. Tsono iye akhakomedwa lini na gereja yace ndipo akhabzibva kuti akhali lini pa uxamwali na Mulungu. Bzimwebzi bzidadzacinja pomwe iye adayamba kupfunza Bibliya na Mboni za Yahova. Iye adayamba kuwona Mulungu ninga Xamwali wace. Iye adadabwa kwene-kwene pomwe adadziwa kuti dzina la Mulungu lidapfudzidwa m’Mabibliya manango aciikha Mbuya. Kudziwa dzina la Mulungu cidakhala cinthu cakufunika kwene-kwene pa moyo wace. Iye adati: “Xamwali wangu wakufunika kwene-kwene ana dzina!” Kodi ni phindu liponi lomwe iye adakhala nalo? Iye adati: “Tsapano ndina mtendere uzinji kwene-kwene mu mtima mwangu. Nimbawona kuti umweyu ni mwayi ukulu kwene-kwene kwa inepano.” Mwamuna munango wakucemeredwa Steve akhali muimbi wacidjuda. Tsono, iye adacoka mu gereja yace thangwe ra cinyengo comwe akhawona m’mwemo. Tsono pomwe mai wace adasaika, iye adabvuma kupfunza Bibliya na m’bodzi wa Mboni za Yahova. Iye adakomedwa kwene-kwene pomwe adadziwa dzina la Mulungu. Iye adati: “Ndikhanati kulidziwa dzina la Mulungu.” Iye adalewa pomwe kuti: “Ni kuyamba kudziwa kuti Mulungu ni Munthu caiye! Tsapano ndadziwa kuti ndagumana Xamwali.”

17. Thangwe ranyi imwepo muli wakutsimikiza kutumbiza dzina la Mulungu? (Onani cithunzi-thunzi.)

¹⁷ Pomwe mukucita basa lakupalizira na kupfunzisa wanthu, kodi imwepo mumbauzambo winango bza dzina la Yahova? Imwepo mumbawathandiza kudziwa momwe Mulungu aliri? Mukacita bzimwebzi, imwepo mumbatumbiza dzina la Mulungu. Pitirizani kutumbiza dzina la Yahova mwa kuthandiza wanthu kuti adziwe makhalidwe ya Munthu omwe ana dzina limweri. Mukacita bzimwebzi, imwepo mun’dzapulumusa wanthu. Mun’dzatewezera Mambo wanu, Jezu Kristu. Ndipo kuposa bzentse, imwepo mun’dzakondwesa Pai wanu wakudzulu, Yahova. Na tenepo, ‘tumbizani dzina lace mpaka muyaya’! — Salimo 145:2.