1-2. Ngimba findu fiki fibaghile ukututula ukupilikisya kanunu muno Yehova ikwipilikila isyakufwana nukunyoziwa kwa ngamu yake?

 INONG’ONELA isi: Tufwanikisye ukuti umundu uyu mukunsubila abayobile amasyu amabibi. Musimenye ukuti syabutungulu, loli sikuya syakubaba fiyo linga abangi bope bandile ukuyoba ubutungulu bububu kubinabo. Ngimba mubaghile ukwipilika bulebule? Linga mukwinong’onela fiyo isi abandu bikuyoba nukunyoziwa kwa ngamu yinu, sibaghile ukubapangisya ukuti mungipilikagha kanunu.—Mbu. 22:1.

² Ikifwanikisyo iki kibaghile ukututula ukupilikisya muno Yehova alipilikile bo ingamu yake yikunyoziwa. Yumo mwa bandumi bake ayobile ubutungulu ku nkikulu uwakwanda, Eva. Eva asubile ubutungulu ubu. Panongwa yabutungulu ubu, Adamu na Eva, balinsambukile Yehova. Isi syapangisye ukuti abandu bosa baye batulanongwa pabumalilo bikufwa. (Bwa. 3:​1-6; Rom. 5:12) Indamyo syosa isi tukuketa nkisu bo ubufwe, ubwite ni singi, sikubombiwa panongwa ya butungulu ubu Setano ayobile mungunda wa Edeni. Ngimba Yehova sikumbaba panongwa yabutungulu ubu nindamyo isi sikubombiwa? Ena. Loli Yehova akaya nkali. Mmalo mwake, umwene yo ‘Kyala walusekelo.’—1 Tim. 1:11.

3. Ngimba tuli nulusako luliku?

³ Tubaghile ukunangisya ukuti Setano ayobile isyabutungulu isyakufwana na Yehova. Tubaghile ukubomba bo ulu mwakupilikila ululaghilo ulwakuti: “Muyipaleghe ingamu ya Yehova.” (Sal. 113:1) Tukubomba isi linga tukubabula abangi ifindu fyosa  ifinunu ifyakufwana na Yehova. Ngimba mukuya pakuyipala ingamu ya Yehova? Isagha tuyobesanie ififukwa fitatu ifyakulondiwa fiyo ifi fikuya pakututula ukuti tuyipaleghe ingamu ya Kyala witu nindumbula yitu yosa.

TUKUNHOBOSYA YEHOVA LINGA TUKUYIPALA INGAMU YAKE

4. Ngimba amapalo ghitu ghikunhobosya bulebule Yehova? Yoba ikifwanikisyo. (Keta kangi ikithuzi.)

⁴ Tukunhobosya Tata witu wakumwanya linga tukuyipala ingamu yake. (Sal. 119:108) Loli ngimba isi sikusanusya ukuti Kyala uwamaka ghosa, ali bo abandu abasitabugholofu aba bikulonda ukupaliwa panongwa yakuti bikulonda ukukasiwa? Hayi. Inong’onela isi. Tufwanikisye ukuti umwana ikubopela kwa tata wake nukunhaga kangi ikumbula ukuti, “Yowe tata wakulondiwa fiyo pakisu kyosa.” Tata uyu ikumwemwetela kangi ahobwike fiyo. Nongwa yafiki? Ngimba tubaghile ukuyoba ukuti umwene atikwisubila kangi ikulonda ukuti umwanake ampaleghe? Hayi. Mmalo mwake, tukusubila ukuti umwene yo tata wamaka panongwa yakuti anganile umwanake kangi ikuhoboka nawe. Umwene asimenye ukuti utuyilo utu tukuya pakumpangisya umwanake ukuti ayeghe walusekelo bo ikukula. Mwakufwana itolo, Yehova, uyu yo Tata unkulumba ikuhoboka fiyo linga tukumpala.

5. Linga tukumpala Yehova, ngimba tukususya ubutungulu buliku?

⁵ Linga tukumpala Tata witu wakumwanya, tukutulapo ukunangisya ukuti Setano ntungulu. Setano ikuyoba ukuti akayapo umundu uyu abaghile ukukindilila ukuya nsubiliwa kwa Kyala linga ikugheliwa. Umwene ikuti twesa tubaghile ukuleka ukumbombela Yehova linga tukuketa ukuti ukubomba isi kukuya pakututula. (Jobu 1:​9-11; 2:4) Loli Yobu akindilile ukuya nsubiliwa kwa Kyala kangi anangisye ukuti Setano ntungulu. Bule pakuyoba isya uswe? Aliwesa abaghile ukusala ukuya kulubafu lwa Tata witu nukunhobosya umwene mwakumbombela mbusubiliwa. (Mbu. 27:11) Ukubomba isi lusako lunywamu fiyo.

6. Ngimba tubaghile ukunkonga bulebule Umwalafyale Davidi na Banyalevi? (Nehemiya 9:5)

⁶ Bosa aba banganile Yehova bikulonda ukuyipala ingamu yake nindumbula yabo yosa. Umwalafyale Davidi alembile ukuti: “Ntufye Yehova we moyo wangu; fyosa ifi fili munda mmyangu, fiyitufye ingamu yake inyikemo.” (Sal. 103:1) Davidi asimenye ukuti linga tukuyipala ingamu ya Yehova, sifwene itolo nukumpala umwene. Linga tukupilika isya ngamu ya Yehova, tukwinong’onela isya muno umwene ayilile, utuyilo twake utununu nifindu ifyakuswighisya ifi ikubomba. Davidi ayiketagha ingamu ya Tata wake wakumwanya ukuya  nyikemo kangi alondagha ukuyipala. Umwene alondagha ukubomba “fyosa ifi fili munda” mmyake, uku ko kumbombela nindumbula yosa. Mwakufwana itolo, Abanyalevi bope bampalagha Yehova. Abene bayobile mwakwiyisya ukuti amasyu ghabo ghakabaghila ukulingania kanunu amapalo agha ghayibaghile ingamu inyikemo iya Yehova. (Belenga Nehemiya 9:5.) Kisita kukayika, ukwiyisya kwabo ukwakufuma pasi pandumbula uku, kwanhobosyagha fiyo Yehova.

7. Ngimba tubaghile ukumpala bulebule Yehova mubufumusi na pabumi bwitu?

⁷ Amasiku agha, nanuswe tubaghile ukunhobosya Yehova mwakunndaghisya nukungana. Linga tuli mubufumusi, tukukumbuka ukuti ikyakulondiwa fiyo ko kubatula abandu ukuti basegheleleghe kwa Yehova, nukuketa ukuti Tata witu walughano. (Yak. 4:8) Tukulondiwa ukubatula abandu ukumanya muno Ibaibolo likulingania isya Yehova, muno ikunangisyila ulughano, ubugholofu, amahala, amaka nutuyilo utungi utununu. Kangi tukumpala nukunhobosya Yehova linga tukughelaghela ukunkonga. (Ef. 5:1) Linga tukubomba bo ulu, abangi bikuya pakuketa ukuti tukindene fiyo na bandu ba nkisu ikibibi iki kangi babaghile ukuswigha fiyo. (Mat. 5:​14-16) Linga tukwangala nabo, tubaghile ukubalingania ikifukwa iki tutikubombela nabo pampene. Isi sikupangisya ukuti abandu abandumbula inunu, basegheleleghe kwa Kyala witu. Linga tukumpala Yehova munjila bo isi, tukuyihobosya indumbula yake.—1 Tim. 2:​3, 4.

TUKUNHOBOSYA YESU LINGA TUKUYIPALA INGAMU YA YEHOVA

8. Ngimba Yesu ikulongosya bulebule pakuyipala ingamu ya Yehova?

⁸ Pafipeliwa fyosa ifyakumwanya nifya pakisu kyapasi, akayapo uyu ammenye kanunu fiyo Tata ukunkinda Yesu. (Mat. 11:27) Yesu anganile fiyo Tata wake, kangi yo uyu ikulongosya pakuyipala ingamu ya Yehova. (Yoh. 14:31) Bo ikwiputa kwa Tata wake ikilo ikyakuti kilabo ikuya pakufwa, afwanisye ikindu ikyakulondiwa fiyo pabufumusi bwake. Umwene atile: “Mbafumukisye ingamu yako.” (Yoh. 17:26) Ngimba umwene asanusyagha isyafiki?

9. Ngimba Yesu abombile ikifwanikisyo kiliku pakulingania kanunu isya Tata wake?

⁹ Yesu abombile nyingi ukukinda itolo ukubabula abandu isyakuti ingamu ya Kyala yo Yehova. Abayuda aba Yesu abamanyisyagha bayimenye kale ingamu ya Kyala. Loli Yesu yo “uyu . . . atulingenie isya wise.” (Yoh. 1:​17, 18) Mwakifwanikisyo, Amalemba gha Kihiburi ghikuyoba ukuti Yehova wakisa kangi wakibabilisi. (Kuso. 34:​5-7) Yesu alingenie kanunu ifundo iyi pakabalilo aka alinganiagha isya kifwanikisyo kya mwana unsobi na tata wake. Linga tukubelenga isya tata uyu ambwene umwanake uyu alapile ikwisa “bo akali ali pabutali,” ukuti akaghane nawe, akamubatile, nukunhobokela nindumbula yosa, tukuketa kanunu muno Yehova ikunangisyila ikisa nikibabilisi kyake. (Luka 15:​11-32) Yesu abatulile abandu ukupilikisya kanunu muno Yehova ayilile.

10. (a) Ngimba tukumanya bulebule ukuti Yesu abombelagha ingamu ya Tata wake kangi ikulonda ukuti abangi bayibombeleghe? (Marko 5:19) (Keta kangi ikithuzi.) (b) Ngimba Yesu ikulonda ukuti tubombeghe isyafiki amasiku agha?

¹⁰ Ngimba Yesu ikulonda ukuti abangi babombeleghe ingamu ya Tata wake? Ena. Abalongosi bamo bamatchalichi babaghile ukuti basubilagha ukuti lukaya lughindiko ukuyoba ingamu ya Kyala. Loli Yesu akalitikisye ukuti inyiho isi sitikukolelana namalemba, sintolesye ukuyighindika ingamu ya Tata wake. Inong’onela akabalilo aka alimbumbulwisye umundu uyu akoliwe nimbepo inyali nkisu kya  Geraseni. Abandu balyandile ukutila kangi balimbulile Yesu ukuti asokemo nkisu iki kangi umwene asokilemo. (Mar. 5:​16, 17) Loli Yesu alondagha ukuti abandu bayimanye ingamu ya Yehova nkisu iki. Yonongwa yake mwakisa, alimbulile umundu uyu alimbumbulwisye ukuti akababule abandu, komma isi umwene abombile loli isi Yehova abombile. (Belenga Marko 5:19.) Yesu ikulonda ukuti nanuswe amasiku agha tuyifumusyeghe ingamu ya Tata wake ukuti abandu bayimanye pakisu kyosa. (Mat. 24:14; 28:​19, 20) Linga tukubomba isi, tukunhobosya Umwalafyale witu, Yesu.

11. Ngimba Yesu abamanyisye abafundiwa bake ukuti basumeghe isyafiki ndwiputo, kangi nongwa yafiki ukubomba isi kwakulondiwa? (Ezekieli 36:23)

¹¹ Yesu asimenye ukuti, ubwighane bwa Yehova ko kuyikemesya ingamu yake, nukususya ubutungulu bosa ubu bikunjobela. Yonongwa yake Umwalafyale witu ababulile abafundiwa bake ukuti biputeghe ukuti: “Tata witu wakumwanya, ingamu yako yikemesiweghe.” (Mat. 6:9) Yesu asimenye ukuti iyi yo nkhani inywamu fiyo iyi yikukipalamasya ikipeliwa kyosa. (Belenga Ezekieli 36:23.) Kikayapo ikipeliwa ikyamahala nkipeliwa kyosa iki kibombilepo nyingi pakuyikemesya ingamu ya Yehova ukukinda muno Yesu abombile. Loli bo Yesu akoliwe, abalughu bake balimpele inongwa iyakuti atikuyighindika ingamu ya Tata wake. Yesu aketagha ukuti ukuyinyoza ingamu inyikemo iya Tata wake bwali butulanongwa ubunywamu fiyo. Apasyagha fiyo ukuti bisakumpa inongwa pankhani iyi. Iki kibaghile ukuti kyali kyo kifukwa ikinywamu iki kyalimpangisye Yesu “ukukubilwa” bo basyele panandi ukumpinya.—Luka 22:​41-44.

12. Ngimba Yesu ayikemesyagha bulebule ingamu ya Tata wake munjila inunu?

¹² Ukuti ayikemesye ingamu ya Tata wake, Yesu alifimbilisye ukunyoziwa, ukutukiwa nukuyobiwa isyabutungulu. Umwene asimenye ukuti alimpilikile Tata wake mu findu fyosa kangi kikalipo nakimo iki kyankosyagha isoni. (Hib. 12:2) Yesu asimenye kangi ukuti Setano angelagha pakabalilo akapalapala aka. (Luka 22:​2-4; 23:​33, 34) Setano alondagha ukumpangisya Yesu ukuti angayagha nsubiliwa loli atoliwe. Yesu asimikisyile naloli ukuti Setano ntungulu kangi ukuti Yehova ali nababombi bake abasubiliwa, aba bikukindilila ukunangisya ubusubiliwa nalinga ukuti bikugheliwa.

13. Ngimba mubaghile ukunhobosya bulebule Umwalafyale winu?

 ¹³ Ngimba mukulonda ukunhobosya Umwalafyale winu? Mukindilileghe ukuyipala ingamu ya Yehova nukubatula abangi ukumanya utuyilo tosa utununu utwa Kyala witu. Linga mukubomba isi, ko kuti mukunkonga Yesu. (1 Pet. 2:21) Mwakufwana itolo na Yesu, tukunhobosya Yehova kangi tukunangisya ukuti undughu wake, Setano, ntungulu.

TUKUTULA UKUPOKA UBUMI BWA BANDU LINGA TUKUYIPALA INGAMU YA YEHOVA

14-15. Ngimba findu filiku ifyakuhobosya ifi fibaghile ukubombiwa linga tukubamanyisya abandu isya Yehova?

¹⁴ Linga tukuyipala ingamu ya Yehova, tukutula ukupoka ubumi bwa bandu. Bulebule? Setano ‘asipupesye inyinong’ono sya bandu abasitakwitika.’ (2 Kor. 4:4) Isi sikubapangisya abene ukusubila ubutungulu bwa Setano bo ubwakuti: Kyala akayako, Kyala alikubutali nanuswe kangi atikubapasikisya abandu, Kyala wankhaza kangi ikubafunda abatulanongwa kwa bwila na bwila. Setano ikuyoba ubutungulu bosa ubu panongwa yakuti ikulonda ukonanga ingamu inunu iya Yehova nukubatolesya abandu ukuti bangaseghelelagha kwa Kyala. Loli linga tukufumusya, tukuntolesya Setano ukuti angafwanisyagha ubwighane bwake. Tukubamanyisya abandu ubwanaloli ubwakuyoba isya Tata witu nukuyipala ingamu inyikemo iya Kyala witu. Ngimba ifyakukongapo fyake fyo filiku?

¹⁵ Ubwanaloli bwa Mmasyu gha Kyala buli namaka fiyo. Linga tukubamanyisya abandu isya Yehova na ifi afighanile, tukuketa ikindu ikyakuhobosya fiyo. Abandu batikusyobiwa nubutungulu bwa Setano kangi babaghile ukwanda ukuketa utuyilo utununu utwa Tata witu. Abene bikuswigha fiyo namaka ghake amakulumba. (Yes. 40:26) Bikwanda ukunsubila panongwa yakuti ikubomba ifindu mbugholofu. (Kukumbu. 32:4) Bikumanyila nyingi isyakufwana namahala ghake amakulumba. (Yes. 55:9; Rom. 11:33) Kangi bikusubisiwa ukumanya ukuti Yehova walughano. (1 Yoh. 4:8) Bo bikuseghelela kwa Yehova, ulusubilo lwabo ulwakwisakwikala kwa bwila na bwila pakuya banake lukuya lwamaka. Tuli nulusako ulunywamu fiyo ulwakubatula abandu ukuseghelela kwa Tata witu. Linga tukubomba  isi, Yehova ikutuketa ukuti “tuli babombanisi” nawe.—1 Kor. 3:​5, 9.

16. Ngimba bamo bikwipilika bulebule linga bamanyile isya ngamu ya Yehova? Yoba ififwanikisyo.

¹⁶ Pakwanda tubaghile ukubamanyisya itolo abandu ukuti ingamu ya Kyala yo Yehova. Ifundo yene iyi yibaghile ukuchenja indumbula ya mundu uyu ikulonda ukumanya nyingi. Mwakifwanikisyo, Aaliyah a ndindwana uyu akulile mumbumba iyi yikali ya Baketi. Loli umwene akakolelanagha fiyo nitchalichi lyake kangi aketagha ukuti akali pabumanyani na Kyala. Loli isi syachenjile bo andile ukumanyila na Baketi. Alyandile ukunketa Kyala ukuya mmanyani wake. Kangi aswighile fiyo ukumanya ukuti ingamu ya Kyala bayisosisyemo mu Mabaibolo mingi nukubikamo ingamu sya budindo bo iyakuti Untwa. Ukumanyila isya ngamu ya Yehova syapangisye ukuti achenje pabumi bwake. Umwene aswighile fiyo kangi atile: “Ummanyani wangu uwapandumbula ali ningamu.” Ngimba ifyakukongapo fyake fyali fyo filiku? Umwene atile: “Lino ndinulutengano lwa mundumbula. Ngwipilika ukuti ngughindikiwa.” Steve ali wakwimba kangi asimenye inyiho sya Bayuda. Umwene akalondagha ukuya kulubafu lya tchalichi limo panongwa ya findu ifisitabugholofu ifi afibonagha. Loli bo mama wake afwile, alitike ukuyapo bo Abaketi ba Yehova bikumanyila numundu yumo Ibaibolo. Umwene apalamasiwe fiyo bo apilike isya ngamu ya Kyala. Steve atile: “Ngapilikamo siku ukuti Kyala ali ningamu.” Kangi atile: “Kwa kabalilo akakwanda, napilikisye ukuti Kyala aliko naloli. Nambonagha ukuya Mundu naloli. Ukufuma apo, nasyaghenie ukuti numwaghile Ummanyani.”

17. Nongwa yafiki mukulonda ukukindilila ukuyipala ingamu ya Yehova? (Keta kangi ikithuzi.)

¹⁷ Pambombo iyakufumusya nukumanyisya, ngimba mukubabulako abandu isya ngamu inyikemo iya Yehova? Ngimba mukubatula ukumanya muno Kyala witu ayilile? Linga mukubomba isi, mukuyipala ingamu ya Kyala. Amukindilileghe ukuyipala ingamu inyikemo iya Yehova mwakubatula abandu ukummanya kanunu umwene. Linga mukubomba isi, mukuya pakupoka ubumi bwa bandu. Mukuya pakunkonga Umwalafyale winu, Kristu Yesu. Kangi ukukinda fyosa, mukuya pakunhobosya Tata winu walughano, Yehova. Amukindilileghe “ukuyipala ingamu [yake] bwila na bwila.”—Sal. 145:2.