1-2. Duzu a bahola aboa yɛ yeamaa yɛade kɛzi Gyihova te nganeɛ wɔ mekɛ mɔɔ bɛbazɛkye ye duma la abo kpalɛ a?

 FA YE kɛ awie mɔɔ ɛkulo ye edwɛkɛ kpalɛ la ɛha ɛ nwo edwɛkɛ ɛtane bie. Ɛze kɛ edwɛkɛ ne ɛnle nɔhalɛ, noko bie mɔ liele lile. Mɔɔ ɛnle kpalɛ bɔbɔ la a le kɛ, bɛbɔle ɔ bo kɛ bɛsalo adalɛ edwɛkɛ zɔhane, na menli dɔɔnwo noko liele lile. Kɛzi anrɛɛ ɛbade nganeɛ ɛ? Saa ɛdwenle adwenle mɔɔ menli lɛ ye wɔ ɛ nwo nee duma kpalɛ mɔɔ ɛlɛ la anwo a, adalɛ edwɛkɛ zɔhane bamaa wɔali nyane, ɔnle zɔ ɔ?—Mrɛ. 22:1.

² Ndonwo ɛhye bahola aboa yɛ yeamaa yɛade kɛzi Gyihova dele nganeɛ wɔ mekɛ mɔɔ bɛzɛkyele ye duma la abo kpalɛ. Ye sunsum nu mralɛ ne mɔ ko hanle ɔ nwo adalɛ edwɛkɛ hilele Yive, raalɛ mɔɔ limoa la. Yive liele lile. Na adalɛ zɔhane maanle yɛ awovolɛ mɔɔ limoa la dele Gyihova anwo atua. Ɛhye ati a alesama kɔsɔɔti yɛ ɛtane na bɛwu la. (Gyn. 3:​1-6; Wlo. 5:12) Ngyegyelɛ mɔɔ yɛnwu bɛ wɔ ewiade ye anu, mɔɔ bie a le ewule, konle konle yɛɛ amaneɛnwunlɛ la, amuala vi Seetan adalɛ edwɛkɛ ne mɔɔ ɔbɔle ɔ bo kɛ ɔsalo ye ɔvi Yidɛn tola ne anu la. Asoo adalɛ edwɛkɛ ɛhye nee mɔɔ ɛvi nu ɛra la maa Gyihova di nyane? Ɛhɛe. Noko Gyihova ɛtɛfale nwolɛ ɛya ɛtɛsiele ye nu. Nɔhalɛ nu, ɔtɛde “anyelielɛ Nyamenle ne.”—1 Tim. 1:11.

3. Nwolɛ adenle boni a yɛlɛ a?

³ Yɛlɛ nwolɛ adenle kɛ yɛbaboa yɛamaa bɛade Gyihova duma ne anwo ɔlua mɛla ɛhye mɔɔ yɛbali zolɛ la azo: “Bɛye Gyihova duma ne ayɛlɛ.” (Edw. 113:1) Saa yɛka Ahenle mɔɔ lɛ duma nwuanzanwuanza zɔhane la anwo edwɛkɛ kpalɛ yɛkile awie mɔ a, ɛnee yɛlɛye ye ayɛlɛ. Ɛbayɛ ye zɔ ɔ? Maa yɛzuzu ninyɛne titili nsa mɔɔ ɔbaboa yɛ yeamaa yɛavi yɛ ahonle nu yɛaye yɛ Nyamenle ne duma ne ayɛlɛ la anwo.

 SAA YƐYE GYIHOVA DUMA NE AYƐLƐ A, ƆMAA Ɔ NYE DIE

4. Duzu ati a yɛye Gyihova ayɛlɛ a ɔmaa ɔ nye die a? Yɛ nwolɛ ndonwo. (Eza nea nvoninli ne.)

⁴ Saa yɛye yɛ anwuma Selɛ ne duma ne ayɛlɛ a, ɔmaa ɔ nye die. (Edw. 119:108) Noko asoo ɛhye kile kɛ, Nyamenle tumivolɛ bedevinli ne le kɛ alesama mɔɔ bɛnli munli mɔɔ bɛkulo kɛ awie mɔ ye bɛ ayɛlɛ amaa bɛabɔ bɛ nwo mɔdenle la ɔ? Kyɛkyɛ. Maa yɛyɛ ndonwo bie. Fa ye kɛ kakula raalɛ ekyi bie nriandile hɔbetanle ye papa na ɔhanle kɛ, “Me papa, ɛyɛ deɛ ɛtɛla awie biala ɛ papa!” Ye papa anye liele na ɔzelele. Duzu ati ɔ? Asoo yɛbahola yɛaha kɛ, papa ne kulo kɛ ɔ ra ne ye ye ayɛlɛ amaa yeabɔ ɔ nwo mɔdenle ɔ? Kyɛkyɛ. Emomu, yɛdie yɛdi kɛ ɔle selɛ mɔɔ ɔbɔ ɔ nwo mɔdenle dɛba, noko ɔ nye die nwo kɛ ɔbanwu kɛ ɔ ra raalɛ ne ɛlɛda ɛlɔlɛ nee anyezɔlɛ ali ahile ye. Ɔze kɛ saa ɔ ra ne yɛ kpanyinli a, subane ɛhye mɔ, ɛlɔlɛ nee anyezɔlɛ, bamaa ɔ nye alie. Zɔhane ala a saa yɛye Gyihova, mɔɔ le Selɛ mɔɔ tɛla biala la ayɛlɛ a, ɔmaa ɔ nye die a.

5. Saa yɛye Nyamenle duma ne ayɛlɛ a, adalɛ boni a yɛbaboa yɛamaa bɛabɔ bɛagua a?

⁵ Saa yɛye yɛ anwuma Selɛ ne ayɛlɛ a, ɛnee yɛlɛboa yɛamaa bɛabɔ adalɛ edwɛkɛ bie mɔɔ fale yɛ nwo la bɛagua. Seetan ɛha kɛ, dasanli biala ɛnrɛhola ɛnrɛgyinla Nyamenle duma ne anzi kpundii. Mɔɔ ɔlɛka la a le kɛ, awie biala ɛnle ɛkɛ mɔɔ saa ɔyia sɔnea a ɔbahɔ zo yeali nɔhalɛ yeamaa Nyamenle a. Ɔse yɛ nuhua ko biala nyia adwenle kɛ, saa ɔgyakyi Nyamenle ɛzonlenlɛ a ɔ nwo badɔ ye a, ɔbayɛ ye zɔ. (Dwobu 1:​9-11; 2:4) Noko nɔhavo Dwobu maanle ɔlale ali kɛ Seetan le adalɛ. Na ɛdawɔ noko ɛ? Yɛ nuhua ko biala lɛ nwolɛ adenle kɛ ɔbagyinla yɛ Ze duma ne anzi kpundii na yeava nɔhalɛlilɛ yeazonle ye amaa ɔ nye alie. (Mrɛ. 27:11) Nɔhalɛ nu, ɔle enililɛ kpole kɛ yɛbayɛ zɔ.

6. Kɛzi yɛbahola yɛazukoa Belemgbunli Devidi nee Livaema ne ɛ? (Nihɛmaya 9:5)

⁶ Kɛmɔ nɔhavoma kulo Nyamenle la ati, ɔmaa bɛfi bɛ ahonle nu bɛye ye duma ne ayɛlɛ. Belemgbunli Devidi hɛlɛle kɛ: “Maa menye Gyihova ayɛlɛ; maa debie biala mɔɔ wɔ me nu la ɛye ye duma nwuanzanwuanza ne ayɛlɛ.” (Edw. 103:1) Devidi dele ɔ bo kɛ, saa ɛye Gyihova duma ne ayɛlɛ a, ɛnee Gyihova mumua ne a ɛlɛye ye ayɛlɛ a. Saa yɛte Gyihova duma ne a, ɔmaa yɛdwenle sonla holɛ mɔɔ ɔde la anwo, yɛɛ ɔmaa yɛdwenle ye subane ngɛnlɛma nee ye nwanwane gyima ne mɔ kɔsɔɔti anwo. Ɛnee Devidi kpondɛ kɛ ɔbu ɔ Ze duma ne kɛ ɔle nwuanzanwuanza na ɔye ye ayɛlɛ. Ɛnee ɔkulo kɛ ɔfa ‘debie biala mɔɔ wɔ ye nu la’—kile kɛ ɔkulo kɛ ɔfi ye ahonle nu amuala ɔyɛ  zɔ. Zɔhane ala a Livaema ne yɛle Gyihova mɔɔ bɛye ye ayɛlɛ la anwo neazo a. Bɛbɛlɛle bɛ nwo aze bɛliele bɛdole nu kɛ, bɛ edwɛkɛ ɛnrɛhola ɛnrɛva ayɛlɛyelɛ mɔɔ fɛta Gyihova duma nwuanzanwuanza ne la ɛnrɛmaa ye ɛlɛ. (Kenga Nihɛmaya 9:5.) Ye biala anu, ayɛlɛyelɛ zɛhae mɔɔ bɛbɛlɛle bɛ nwo aze bɛvile bɛ ahonle nu bɛvale bɛmaanle Gyihova la maanle ye ahonle lile fɛlɛko.

7. Kɛzi yɛbahola yɛaye Gyihova ayɛlɛ wɔ yɛ daselɛlilɛ gyima ne nee yɛ ɛbɛlabɔlɛ nu kenle ko biala ɛ?

⁷ Ɛnɛ, saa yɛfa wuluwuluyɛlɛ, anyezɔlɛ nee ɛlɔlɛ mɔɔ yɛlɛ yɛmaa Gyihova la yɛka ɔ nwo edwɛkɛ yɛkile awie mɔ a, yɛbamaa ɔ nye alie. Saa yɛwɔ daselɛlilɛ nu a, yɛkakye kɛ yɛ bodane titili a le kɛ yɛboa awie mɔ yɛamaa bɛabikye Gyihova na bɛanwu yɛ Ze ne mɔɔ lɛ ɛlɔlɛ la kɛ mɔɔ yɛnwu ye la. (Gye. 4:8) Yɛ nye die nwo kɛ yɛbamaa menli anwu mɔɔ Baebolo ne ka wɔ Gyihova anwo la. Ɔka ye ɛlɔlɛ, pɛlepɛlelilɛ, nrɛlɛbɛ, tumi nee ye subane ngɛnlɛma gyɛne nwo edwɛkɛ. Eza saa yɛbɔ mɔdenle kɛ yɛbazukoa Gyihova a, ɛnee yɛlɛye ye ayɛlɛ yɛɛ ɔmaa ɔ nye die. (Ɛfɛ. 5:1) Saa yɛyɛ ye zɔ a, ɔmaa yɛyɛ ngakyile yɛfi ɛtane ewiade ɛhye anwo. Menli banwu ye na bɛabiza deɛmɔti yɛle ngakyile la. (Mat. 5:​14-16) Saa yɛ nee bɛ ɛlɛyɛ ninyɛne bie mɔ kenle ko biala a, bie a yɛbahola yɛahilehile deɛmɔti yɛle zɔ la anu yɛahile bɛ. Ɛhye bamaa bɛdabɛ mɔɔ bɛlɛ ahonle kpalɛ la abikye yɛ Nyamenle ne. Saa yɛye Gyihova ayɛlɛ wɔ ndenle zɛhae mɔ azo a, yɛbamaa ye ahonle ali fɛlɛko.—1 Tim. 2:​3, 4.

YƐYE GYIHOVA DUMA NE AYƐLƐ A, ƆMAA GYISƐSE ANYE DIE

8. Kɛzi Gyisɛse ɛyɛ Gyihova duma ne mɔɔ bɛye ye ayɛlɛ la anwo neazo kpalɛ ɛ?

⁸ Awie biala ɛnle anwuma anzɛɛ azɛlɛ ye azo mɔɔ ze Selɛ ne kpalɛ tɛla Ralɛ ne a. (Mat. 11:27) Gyisɛse kulo ɔ Ze, na yeyɛ kɛzi bɛye Gyihova duma ne ayɛlɛ la anwo neazo. (Dwɔn 14:31) Nɔe ne mɔɔ aleɛ kye a ɔbawu la, ɔyɛle asɔne bie; na wɔ asɔneyɛlɛ ne anu, ɔhanle ye ɛzonlenlɛ gyima ne mɔɔ ɔyɛle wɔ azɛlɛ ye azo la anwo edwɛkɛ sikalɛ zɛhae: “Memaa bɛnwu wɔ duma.” (Dwɔn 17:26) Duzu a ɛnee ɔlɛkile a?

9. Ndonwo boni a Gyisɛse luale zo hilehilele sonla holɛ mɔɔ ɔ Ze ne de la anu kpalɛ a?

⁹ Tɛ mɔɔ Gyisɛse yɛle la ala a le kɛ ɔbaha yeahile menli kɛ Nyamenle duma a le Gyihova. Ɛnee Dwuuma mɔɔ Gyisɛse hilehilele bɛ la ze Nyamenle duma dɛba. Noko Gyisɛse a limoale ‘hilele kɛzi Selɛ ne de la’ a. (Dwɔn 1:​17, 18) Kɛ neazo la, Hibulu Ngɛlɛlera ne da ye ali kɛ Gyihova le anwunvɔnezelɛ nee ahunluyelɛyelalɛ Nyamenle. (Ɛzɛ. 34:​5-7) Gyisɛse luale kakula ɛkobɔfo ne nee ye papa ndonwo ne azo maanle nɔhalɛ zɔhane anu lale ɛkɛ kpalɛ. Saa yɛkenga kɛ, mekɛ mɔɔ selɛ zɔhane nwunle ɔ ra ne mɔɔ yenlu ɔ nwo la kɛ ‘ɔlua moamoa ɔlɛba la,’ ɔnriandile ɔhɔyiale ye, ɔyɛle ye atuu na ɔvile ye ahonle muala anu ɔvale ye ɛtane ɔhyɛle ye a, ɔmaa yɛte Gyihova anwunvɔnezelɛ nee ahunluyelɛyelalɛ ne abo kpalɛ. (Luku 15:​11-32) Gyisɛse boale awie mɔ maanle bɛnwunle sonla holɛ mɔɔ Gyihova de la.

10. (a) Kɛzi yɛkola yɛnwu kɛ Gyisɛse vale ɔ Ze duma vɛlɛle ye na ɔkulo kɛ yɛdayɛ noko yɛyɛ zɔ ɛ? (Maake 5:19) (Eza nea nvoninli ne.) (b) Duzu a Gyisɛse kulo kɛ yɛyɛ ye ɛnɛ a?

¹⁰ Asoo ɛnee Gyisɛse noko kulo kɛ awie mɔ fa ɔ Ze duma fɛlɛ ye ɔ? Ɛhɛe. Bie a ɛnee zɔhane mekɛ ne anu ɛzonlenlɛ nu mgbanyima bie mɔ die di kɛ Nyamenle duma ne le nwuanzanwuanza somaa na ɔngile ɛbulɛ kɛ bɛbabɔ, noko Gyisɛse ammaa amaamuo zɛhae mɔ mɔɔ ɔngyi Ngɛlɛlera ne azo la anzi ye adenle kɛ ɔbali ye Papa duma ne eni. Fa mekɛ mɔɔ ɔyɛle nrenyia bie mɔɔ ɛnee sunsum ɛtane wɔ ɔ nwo la ayile wɔ Gɛlasa maanzinli ne anu la kɛ neazo. Menli ne ahonle dule na bɛzɛlɛle Gyisɛse  kɛ ɔvi maanzinli ne anu ɔhɔ, ɔti yeandɛnla ɛkɛ. (Maake 5:​16, 17) Noko ɛnee Gyisɛse kulo kɛ menli mɔɔ wɔ ɛkɛ ne la nwu Gyihova duma. Ɔti ɔhanle ɔhilele nrenyia ne mɔɔ ɔyɛle ye ayile la kɛ ɔhɔha mɔɔ Gyihova ɛyɛ la ɔhile awie mɔ, tɛ mɔɔ Gyisɛse ɛyɛ la ɔ. (Kenga Maake 5:19.) a Zɔhane ala a ɔkulo kɛ yɛyɛ ye ɛnɛ a—ɔkulo kɛ yɛmaa menli mɔɔ wɔ ewiade amuala la nwu ɔ Ze duma! (Mat. 24:14; 28:​19, 20) Saa yɛyɛ yɛ afoa nu ɛdeɛ a, yɛbamaa yɛ Belemgbunli Gyisɛse anye alie.

11. Duzu a Gyisɛse hilehilele ye ɛdoavolɛma ne kɛ bɛyɛ nwolɛ asɔne a, na kɛ mɔɔ Yizikeɛle 36:23 kile la, duzu ati a ɛhye anwo hyia a?

¹¹ Ɛnee Gyisɛse ze kɛ Gyihova bodane a le kɛ ɔbade Ye duma nwo, kɛ ɔbabɔ adalɛ edwɛkɛ biala mɔɔ bɛha ye wɔ ɔ nwo la yeagua. Ɛhye ati a yɛ Menle ne hilehilele ye ɛdoavolɛma ne kɛ bɛyɛ asɔne kɛ: “Yɛ Ze mɔɔ wɔ anwuma, wɔ duma nwo ɛde” la. (Mat. 6:9) Ɛnee Gyisɛse ze kɛ ɛhye a le edwɛkɛ titili mɔɔ abɔdeɛ kɔsɔɔti anwo wɔ nu a. (Kenga Yizikeɛle 36:23.) Anwumabɔvolɛ anzɛɛ dasanli biala ɛnle aleɛabo mɔɔ yeyɛ ninyɛne dɔɔnwo kɛ ɔfa yeade Gyihova duma ne anwo yedɛla mɔɔ Gyisɛse ɛyɛ la a. Noko mɔɔ bɛhyele Gyisɛse la, ye agbɔvolɛ bɔle ye somolɛ kɛ ɔmbu ɔ Ze fee. Ɛnee Gyisɛse ze ye bɔkɔɔ kɛ, ɛtane kpole mɔɔ tɛla biala la a le kɛ awie bava ɔ Ze duma nwuanzanwuanza ne ali gyima wɔ adenle ɛtane zo anzɛɛ ɔbaha nwolɛ edwɛkɛ ɛtane. Ɔti ɛnee ɔyɛ ye nyane kpalɛ kɛ ɛtane ɛhye a bɛbabɔ ye somolɛ wɔ nwolɛ na bɛabua ye fɔlɛ la. Ɔbayɛ kɛ yemɔ a le debie titili mɔɔ ɔti ɛnee Gyisɛse wɔ “nyanelilɛ kpole” nu wɔ mekɛ mɔɔ ɛnee ɔka ekyii bɛbakye ye la a.—Luku 22:​41-44.

12. Kɛzi Gyisɛse dele ɔ Ze duma nwo wɔ adenle mɔɔ tɛla biala la azo ɛ?

¹² Bɛhilele Gyisɛse nyane, bɛbɔle ye aholoba na bɛdole ye ɛzonle fane dɔɔnwo, na ɛnee ɔwɔ kɛ ɔgyinla ɔ muala anloa amaa yeade ɔ Ze duma nwo. Ɔze kɛ ɔdiele ɔ Ze wɔ debie biala anu, ɔti debie biala ammaa yeande nganeɛ kɛ yebɔ anyiemgba. (Hib. 12:2) Eza ɛnee ɔze kɛ Seetan mumua ne ɛlɛteta ye wɔ tɛnlabelɛ ɛsesebɛ zɔhane anu. (Luku 22:​2-4; 23:​33, 34) Mɔɔ ɛnee Seetan anye la la a le kɛ ɔbahola yeamaa Gyisɛse agyakyi kɛ ɔbali nɔhalɛ yeamaa  Gyihova; noko Seetan asa zile aze bɔkɔɔ! Gyisɛse maanle ɔlale ali wienyi kɛ Seetan le adalɛ kpole, na Gyihova lɛ azonvolɛ nɔhavoma mɔɔ bɛkɔ zo bɛdi nɔhalɛ ɔnva nwo kɛ bɛlɛyia sɔnea ngakyile mɔɔ anu yɛ se bɔbɔ la!

13. Kɛ ɔkɛyɛ na wɔamaa wɔ Belemgbunli ne mɔɔ ɛlɛdi tumi la anye alie ɛ?

¹³ Ɛkulo kɛ ɛmaa wɔ Belemgbunli ne mɔɔ ɛlɛdi tumi la anye die ɔ? Kɔ zo ye Gyihova duma ne ayɛlɛ, na boa awie mɔ maa bɛnwu sonla holɛ mɔɔ yɛ Nyamenle ne amgba de la. Saa ɛyɛ ye zɔ a, ɛnee ɛlɛdi Gyisɛse agyakɛ anzi. (1 Pita 2:21) Kɛ mɔɔ Gyisɛse yɛle la, ɛlɛmaa Gyihova ali fɛlɛko na wɔamaa Ye kpɔvolɛ Seetan anwu ye kɛ ɔle alane kpole!

SAA YƐYE GYIHOVA DUMA NE AYƐLƐ A, ƆDIE AWIE MƆ NGOANE

14-15. Saa yɛkilehile menli Gyihova anwo debie a, ninyɛne mɔɔ yɛ nwanwane la boni mɔ a sisi a?

¹⁴ Saa yɛye Gyihova duma ne ayɛlɛ a, ɛnee yɛlɛboa yɛamaa bɛalie awie mɔ ngoane. Wɔ adenle boni azo? Seetan “ɛzi bɛdabɛ mɔɔ bɛnlie bɛnli la adwenle ne anye.” (2 Kɔl. 4:4) Ɛhye ati bɛlie adalɛ edwɛkɛ ɛhye mɔ mɔɔ vi Seetan ɛkɛ la bɛli, ɔse: Nyamenle ɛnle ɛkɛ, Nyamenle nee yɛ avinli twe na ɔndwenle alesama anwo, Nyamenle ati yɛ se na ɔkile ɛtanevolɛma nyane dahuu. Adalɛ edwɛkɛ zɛhae mɔ ɛmmaa menli ɛnnwu Gyihova duma ne anzɛɛ ɔsɛkye duma kpalɛ mɔɔ Gyihova lɛ la, amaa menli annyia ɛhulolɛ kɛ bɛbabikye ye. Noko yɛ edwɛkɛhanlɛ gyima ne ɛmmaa Seetan ɛndwu ye bodane ne anwo. Yɛkilehile menli yɛ Ze ne anwo nɔhalɛ ne, na yɛye yɛ Nyamenle ne duma nwuanzanwuanza ne ayɛlɛ. Duzu a ɛvi nu ɛra a?

¹⁵ Tumi kpole wɔ nɔhalɛ ne mɔɔ wɔ Nyamenle Edwɛkɛ ne anu la anu. Saa yɛkilehile menli Gyihova nee sonla holɛ mɔɔ ɔde la anwo debie a, yɛnwu ninyɛne mɔɔ yɛ nwanwane la. Seetan adalɛ edwɛkɛ ne mɔ mɔɔ ɛzi bɛ adwenle ne anye la fi ɛkɛ ne ngyikyingyikyi, na menli ɛhye mɔ bɔ ɔ bo nwu yɛ Ze ne mɔɔ lɛ ɛlɔlɛ la kɛ mɔɔ yɛnwu ye la. Ye tumi bedevinli ne yɛ bɛ azibɛnwo. (Aye. 40:26) Ye pɛlepɛlelilɛ ne mɔɔ tɛla biala la maa bɛfa bɛ nwo bɛto ɔ nwo zo. (Dit. 32:4) Ye nrɛlɛbɛ kpole ne maa bɛsukoa ninyɛne dɔɔnwo. (Aye. 55:9; Wlo. 11:33) Na saa bɛnwu kɛ ɔle ɛlɔlɛ a, ɔmaa bɛ rɛle kyekye. (1 Dwɔn 4:8) Mekɛ mɔɔ bɛlɛbikye Gyihova  kpalɛ la, ɔmaa bɛnwu kɛ anyelazo mɔɔ bɛlɛ kɛ bɛbadɛnla aze dahuu la bara nu amgba. Nea nwolɛ adenle kɛnlɛma ko mɔɔ yɛnyia kɛ yɛbaboa menli yɛamaa bɛabikye bɛ Ze ne a! Saa yɛyɛ ye zɔ a, Gyihova bu yɛ kɛ ɔle “yɛ gɔnwo gyimayɛvo.”—1 Kɔl. 3:​5, 9.

16. Saa menli bie mɔ nwu Nyamenle duma a, kɛzi ɔka bɛ ɛ? Maa neazo.

¹⁶ Mɔlebɛbo ne, bie a mɔɔ yɛbahilehile menli la ala a le kɛ Nyamenle duma a le Gyihova. Yemɔ angomekye bɔbɔ bahola ahakyi awie mɔɔ lɛ ahonle kpalɛ la ɛbɛlabɔlɛ. Kɛ neazo la, bɛtetele bɛlɛra bie mɔɔ bɛfɛlɛ ye Aaliyah b la wɔ abusua mɔɔ bɛnle Kilisienema la anu. Noko ɛnee ye ahonle ɛnle ye ɛzonlenlɛ ne anu yɛɛ yeangola yeambikye Nyamenle. Mɔɔ ɔbɔle ɔ bo kɛ ɔ nee Gyihova Alasevolɛ sukoa debie la, kɛzi ɔte nganeɛ la hakyile. Ɔbɔle ɔ bo ɔnwunle Nyamenle kɛ ɔle ɔ Gɔnwo. Na mɔɔ ɔnwunle kɛ bɛye Nyamenle duma bɛvi Baebolo ngilebɛbo dɔɔnwo anu na bɛva amodinli le kɛ Awulae bɛzie ɔ gyakɛ anu la, ɔzinle ɔ nwo. Gyihova duma ne mɔɔ ɔnwunle ye la hakyile ye ɛbɛlabɔlɛ. Ɔhanle kɛ: “Me Gɔnwo kpalɛ ne lɛ ye duma!” Duzu a ɛvi nu ɛra a? Ɔse: “Melɛ anzodwolɛ kpole wɔ me ahonle nu kɛkala. Mete nganeɛ kɛ bɛli me eni kpole kpalɛ.” Ɛnee nrenyia bie mɔɔ bɛfɛlɛ ye Steve la le edwɛndolɛnli mɔɔ bɛtetele ye wɔ Dwuuma mɔɔ ɔyɛ se kɛ bɛbahakyi bɛ amaamuo la anu a. Ɛnee ɔngulo kɛ ɔbaboka ɛzonlenlɛ biala anwo ɔluakɛ yenwu kɛ bɛ nuhua dɔɔnwo le nabalabama. Noko mɔɔ ye mame wule la anzi, ɛnee Gyihova Alasevolɛ ne mɔ ko nee awie ɛlɛyɛ Baebolo ɛzukoalɛ, na ɔliele ɔdole nu kɛ ɔbaradie bie. Mɔɔ ɔnwunle kɛ Nyamenle lɛ duma la, ɔhanle ye ahonle kpalɛ. Ɔhanle kɛ: “Menze ye ɛlɛ kɛ Nyamenle lɛ duma.” Ɔvale ɔzɔle zo kɛ: “Ɔle mekɛ mɔɔ limoa mɔɔ mendele ɔ bo kɛ Nyamenle wɔ ɛkɛ ne amgba a! Menwunle ye kɛ ɔle Awie mɔɔ ɔde ngoane nu. Akee menwunle ye kɛ menyia me Gɔnwo.”

17. Duzu ati a wɔbɔ kpɔkɛ kɛ ɛbahɔ zo wɔaye Gyihova duma ne ayɛlɛ a? (Eza nea nvoninli ne.)

¹⁷ Saa ɛlɛyɛ wɔ edwɛkɛhanlɛ nee ngilehilelɛ gyima ne a, ɛka duma nwuanzanwuanza ne, Gyihova, anwo edwɛkɛ ɛkile awie mɔ ɔ? Ɛboa bɛ ɛmaa bɛnwu sonla holɛ mɔɔ yɛ Nyamenle ne amgba de la ɔ? Saa ɛyɛ ye zɔ a, ɛnee ɛlɛye Nyamenle duma ne ayɛlɛ. Boa awie mɔ maa bɛnwu sonla holɛ mɔɔ Gyihova de la fa ye ye duma nwuanzanwuanza ne ayɛlɛ dahuu. Wɔ adenle zɛhae azo, ɛbalie menli ngoane. Ɔbamaa wɔali wɔ Belemgbunli Kelaese Gyisɛse adehilelɛ zo. Na mɔɔ tɛla biala la, ɛbamaa ɛ Ze Gyihova mɔɔ lɛ ɛlɔlɛ la anye alie. Ɔrɛla ye kɛ, ɛbaye ye “duma ne ayɛlɛ dahuu”!—Edw. 145:2.