୧-୨. ଯେବେ ଯିହୋବାଙ୍କ ନାମକୁ ବଦନାମ କରାଯାଇଥିବ ତେବେ ତାଙ୍କୁ କିପରି ଲାଗିଥିବ ? ବୁଝାନ୍ତୁ ।

 ଭାବନ୍ତୁ, ଆପଣ ଯାହାକୁ ବହୁତ ପ୍ରେମ କରନ୍ତି, ସେ ଆପଣଙ୍କ ଉପରେ ଏକ ବଡ଼ ଦୋଷ ଲଗାଏ ଓ କିଛି ଲୋକ ତାʼ କଥାକୁ ସତ ଭାବିନିଅନ୍ତି । କେବଳ ଏତିକି ନୁହେଁ, ସେମାନେ ଅନ୍ୟମାନଙ୍କୁ ମଧ୍ୟ ସେବିଷୟରେ କହନ୍ତି । ଆଉ ସେହି ଲୋକମାନେ ମଧ୍ୟ ସେକଥାକୁ ସତ ଭାବିନିଅନ୍ତି । ଏହା ଦେଖି ଆପଣଙ୍କୁ କିପରି ଲାଗିବ ? ଯଦି ଆପଣ ସେମାନଙ୍କୁ ପ୍ରେମ କରନ୍ତି, ତେବେ ଏହା ଭାବି ଆପଣଙ୍କୁ ବହୁତ ଖରାପ ଲାଗିବ ଯେ ସେମାନେ ଆପଣଙ୍କ ବିଷୟରେ କ’ଣ ଭାବିବେ ।—ହିତୋ. ୨୨:୧.

^୨ ଏହି ଉଦାହରଣରୁ ଆମେ ବୁଝିପାରୁ ଯେ ଯେବେ ଯିହୋବାଙ୍କ ନାମକୁ ବଦନାମ୍‌ କରାଯାଇଥିବ, ତେବେ ତାଙ୍କୁ କିପରି ଲାଗିଥିବ । ସ୍ୱର୍ଗରେ ରହୁଥିବା ତାଙ୍କର ଜଣେ ପୁତ୍ର, ତାଙ୍କ ବିଷୟରେ ପ୍ରଥମ ସ୍ତ୍ରୀ ହବାକୁ ମିଛ କହିଲା ଓ ହବା ତାʼ କଥା ଉପରେ ଭରସା କରିନେଲା । ଆଉ ତାʼଯୋଗୁଁ ଆମ ପ୍ରଥମ ବାପାମାଆ ଆଦମ ଓ ହବା ଯିହୋବାଙ୍କ ବିରୁଦ୍ଧରେ ବିଦ୍ରୋହ କଲେ । ଏପରି ଭାବରେ ସାରା ଜଗତରେ ପାପ ଓ ମୃତ୍ୟୁ ଆସିଗଲା । (ଆଦି. ୩:୧-୬; ରୋମୀ. ୫:୧୨) ଶୟତାନ ଏଦନ ଉଦ୍ୟାନରେ ଯେଉଁ ମିଛ କହିଥିଲା, ତାʼଯୋଗୁଁ ହିଁ ଆଜି ସମସ୍ତଙ୍କୁ ଏତେ ଦୁଃଖ ସହିବାକୁ ପଡ଼ୁଛି । ଯେପରି, ଆଜି ମଣିଷମାନଙ୍କୁ ଅନେକ କଷ୍ଟ ସହିବାକୁ ପଡ଼େ, ଯୁଦ୍ଧ ହୁଏ ଆଉ ଲୋକମାନଙ୍କ ମୃତ୍ୟୁ ହୋଇଯାଏ । ଏସବୁ ଦେଖି ଯିହୋବାଙ୍କୁ ବହୁତ ଦୁଃଖ ଲାଗେ । କʼଣ ଏସବୁ ଦେଖି ଯିହୋବାଙ୍କ ଖୁସି ଚାଲିଗଲା ? ନୁହଁ । ବାଇବଲରେ ତାଙ୍କୁ “ଆନନ୍ଦିତ ଈଶ୍ୱର” କୁହାଯାଇଛି ।—୧ ତୀମ. ୧:୧୧, NWT.

୩. ଆମ ପାଖରେ କʼଣ ବିଶେଷ ସୁଯୋଗ ରହିଛି ?

^୩ ଆମ ପାଖରେ ଯିହୋବାଙ୍କ ନାମକୁ ପବିତ୍ର କରିବା ପାଇଁ ଏକ ବିଶେଷ ସୁଯୋଗ ରହିଛି । ତାହା କିପରି ? ଆମେ ଏହି ଆଜ୍ଞା ମାନିପାରିବା: ‘ଯିହୋବାଙ୍କ ନାମର ପ୍ରଶଂସା କର ।’ (ଗୀତ. ୧୧୩:୧) ଯେତେବେଳେ ଆମେ ଲୋକମାନଙ୍କୁ କହୁ ଯେ ଯିହୋବା କିଏ ଓ ସେ କିପରି ଈଶ୍ୱର ଅଟନ୍ତି, ତେବେ ଆମେ ତାଙ୍କ ପବିତ୍ର ନାମକୁ ପ୍ରଶଂସା କରିଥାଉ । କʼଣ ଆପଣ ଏପରି କରିବେ ? ଆସନ୍ତୁ ଆମେ ଏପରି ତିନୋଟି କାରଣ ଉପରେ ଧ୍ୟାନ ଦେବା, ଯାହାକୁ ମାନି ଆମେ ହୃଦୟର ସହ ଈଶ୍ୱରଙ୍କ ନାମକୁ ପ୍ରଶଂସା କରିପାରିବା ।

ଯିହୋବାଙ୍କ ନାମକୁ ପ୍ରଶଂସା କଲେ ସେ ଖୁସି ହୁଅନ୍ତି

୪. ଉଦାହରଣ ଦେଇ ବୁଝାନ୍ତୁ ଯେ ଯେବେ ଆମେ ଯିହୋବାଙ୍କ ପ୍ରଶଂସା କରୁ ତେବେ ସେ କାହିଁକି ଖୁସି ହୁଅନ୍ତି ? (ଚିତ୍ର ମଧ୍ୟ ଦେଖନ୍ତୁ ।)

 ^୪ ଯେବେ ଆମେ ସ୍ୱର୍ଗରେ ରହୁଥିବା ନିଜ ପିତା ଯିହୋବାଙ୍କ ନାମର ପ୍ରଶଂସା କରୁ, ତେବେ ସେ ବହୁତ ଖୁସି ହୁଅନ୍ତି । (ଗୀତ. ୧୧୯:୧୦୮) ଦେଖିବାକୁ ଗଲେ ମଣିଷମାନଙ୍କୁ ପ୍ରଶଂସା ଓ ଉତ୍ସାହ ଦରକାର ପଡ଼ିଥାଏ, କିନ୍ତୁ କʼଣ ଈଶ୍ୱରଙ୍କୁ ବି ଆମ ଭଳି ପ୍ରୋତ୍ସାହନ ପାଇବା ପାଇଁ ପ୍ରଶଂସା ଦରକାର ? ନୁହଁ, ଯେବେ ଆମେ ତାଙ୍କ ପ୍ରଶଂସା କରୁ, ତେବେ ତାଙ୍କୁ ଭଲ ଲାଗେ । ଏହାକୁ ବୁଝିବା ପାଇଁ ଗୋଟିଏ ଉଦାହରଣ ଉପରେ ଧ୍ୟାନ ଦିଅନ୍ତୁ । ଜଣେ ଛୋଟ ଝିଅ ଦୌଡ଼ି ଦୌଡ଼ି ନିଜ ବାପାଙ୍କ ପାଖକୁ ଯାଏ ଆଉ ତାଙ୍କୁ ଆଲିଙ୍ଗନ କରି କହେ, “ଆପଣ ଦୁନିଆର ସବୁଠୁ ଭଲ ବାପା !” ଏହା ଶୁଣି ବାପା ବହୁତ ଖୁସି ହୋଇଯାଆନ୍ତି । ତାଙ୍କ ଝିଅର କଥା ତାଙ୍କ ହୃଦୟକୁ ଛୁଇଁଯାଏ । କିନ୍ତୁ ଏପରି ନ ଥିଲା ଯେ ସେ ଝିଅର ବାପାଙ୍କୁ ତାଙ୍କ ଝିଅର ପ୍ରଶଂସା ଦରକାର ଥିଲା । ତାʼ ପରିବର୍ତ୍ତେ ସେ ଏଥିପାଇଁ ଖୁସି ହେଲେ କାରଣ ସେ ନିଜ ଝିଅକୁ ବହୁତ ପ୍ରେମ କରନ୍ତି ଓ ତାଙ୍କୁ ଏହା ଦେଖି ବହୁତ ଭଲ ଲାଗିଲା ଯେ ତାଙ୍କ ଝିଅ ମଧ୍ୟ ତାଙ୍କୁ ବହୁତ ପ୍ରେମ କରେ ଓ ତାଙ୍କ ଆଦର କରେ । ତାʼସହ ସେ ଏକଥାକୁ ବି ଜାଣନ୍ତି ଯେ ତାଙ୍କ ଝିଅର ଯେଉଁ ଭଲ ଗୁଣଗୁଡ଼ିକ ଅଛି, ତା ଯୋଗୁଁ ସେ ଆଗକୁ ଯାଇ ଖୁସିରେ ରହିପାରିବ । ଏପରି ଭାବେ ଆମେ ବୁଝିପାରୁ ଯେ ଯେବେ ଆମେ ମହାନ ପିତା ଯିହୋବାଙ୍କ ପ୍ରଶଂସା କରୁ, ତେବେ ତାଙ୍କୁ କାହିଁକି ଖୁସି ଲାଗେ ।

୫. ଈଶ୍ୱରଙ୍କ ନାମର ପ୍ରଶଂସା କରି ଆମେ ଶୟତାନର କେଉଁ ଆରୋପକୁ ମିଛ ସାବ୍ୟସ୍ତ କରିପାରିବା ?

^୫ ଯେବେ ଆମେ ସ୍ୱର୍ଗରେ ରହୁଥିବା ନିଜ ପିତା ଯିହୋବାଙ୍କ ପ୍ରଶଂସା କରୁ, ତେବେ ଆମେ ଶୟତାନର ଆଉ ଗୋଟିଏ ଆରୋପକୁ ମିଛ ସାବ୍ୟସ୍ତ କରୁଥାଉ । ସେ ଦାବି କରିଛି ଯେ କେହି ବି ମଣିଷ ସବୁଦିନ ପାଇଁ ଈଶ୍ୱରଙ୍କ ନାମକୁ ପବିତ୍ର କରିପାରିବ ନାହିଁ । ସେ କହେ, ଯଦି ଜଣେ ମଣିଷ ଉପରେ କୌଣସି ବିପଦ ଆସେ କିମ୍ବା ତାକୁ ଲାଗେ ଯେ ଈଶ୍ୱରଙ୍କ କଥା ଶୁଣିଲେ ତାକୁ କୌଣସି ଲାଭ ହେବନାହିଁ, ତାହେଲେ ସେ ତାଙ୍କ ସେବା କରିବା ଛାଡ଼ିଦେବ । (ଆୟୁ. ୧:୯-୧୧; ୨:୪) କିନ୍ତୁ ଈଶ୍ୱରଙ୍କ ଜଣେ ବିଶ୍ୱସ୍ତ ସେବକ ଆୟୁବ ଏହି କଥାକୁ ମିଛ ସାବ୍ୟସ୍ତ କରିଦେଲେ । କʼଣ ଆପଣ ମଧ୍ୟ ଏପରି କରିବେ ? ଆମ ସମସ୍ତଙ୍କ ପାଖରେ ସୁଯୋଗ ଅଛି ଯେ ଆମେ ନିଜ ପିତା ଯିହୋବାଙ୍କ ନାମକୁ ବଦନାମ ହେବାରୁ ରୋକି ପାରିବା ଓ ସବୁଦିନ ବିଶ୍ୱସ୍ତତାର ସହ ତାଙ୍କ ସେବା କରି ତାଙ୍କ ହୃଦୟକୁ ଖୁସି କରିପାରିବା । (ହିତୋ. ୨୭:୧୧) ସତରେ ଏହା କେତେ ବଡ଼ ସମ୍ମାନ ଅଟେ !

୬. ଆମେ କିପରି ରାଜା ଦାଉଦ ଓ ଲେବୀୟମାନଙ୍କ ଭଳି ହୋଇପାରିବା ? (ନିହିମୀୟା ୯:୫)

^୬ ଯିହୋବାଙ୍କ ବିଶ୍ୱସ୍ତ ସେବକମାନେ ତାଙ୍କୁ ପ୍ରେମ କରନ୍ତି, ତେଣୁ ସେମାନେ ସମ୍ପୂର୍ଣ୍ଣ ହୃଦୟର ସହ ତାଙ୍କ ନାମକୁ ପ୍ରଶଂସା କରନ୍ତି । ରାଜା ଦାଉଦ ଲେଖିଲେ, “ହେ ମୋହର ଅନ୍ତରସ୍ଥସମସ୍ତ, ତାହାଙ୍କ ପବିତ୍ର ନାମର ଧନ୍ୟବାଦ କର ।” (ଗୀତ. ୧୦୩:୧) ଦାଉଦ ଜାଣିଥିଲେ ଯେ ଯିହୋବାଙ୍କ ନାମର ପ୍ରଶଂସା କରିବାର ଅର୍ଥ ହେଉଛି, ଯିହୋବାଙ୍କର ହିଁ ପ୍ରଶଂସା କରିବା । କାରଣ ଯିହୋବାଙ୍କ ନାମ ଶୁଣିଲେ ହିଁ ଆମେ ଜଣେ ଏପରି ମହାନ ବ୍ୟକ୍ତି ବିଷୟରେ ଭାବିବାକୁ ଲାଗୁ ଯାହା ଭିତରେ ଅନେକ ଭଲ ଗୁଣ ରହିଛି ଓ ଯିଏ ବହୁତ ଭଲ ଭଲ କାମ କରିଛି । ତେଣୁ ଦାଉଦ ନିଜ ପିତାଙ୍କ ନାମକୁ ପବିତ୍ର କରିବାକୁ ଚାହୁଁଥିଲେ ଓ ହୃଦୟରୁ ତାଙ୍କ ପ୍ରଶଂସା କରିବାକୁ ଚାହୁଁଥିଲେ । ସେ ଚାହୁଁଥିଲେ ଯେ ତାଙ୍କ “ଅନ୍ତରସ୍ଥସମସ୍ତ” ଯିହୋବାଙ୍କର ପ୍ରଶଂସା କରୁ । ଦାଉଦଙ୍କ ଭଳି ଲେବୀୟମାନେ ମଧ୍ୟ ଜୋରସୋର୍‌ରେ ଯିହୋବାଙ୍କ ପ୍ରଶଂସା କଲେ । ସେମାନେ ନମ୍ର ଥିଲେ, ତେଣୁ ସେମାନେ କହିଲେ ଯେ ଯିହୋବାଙ୍କ ପବିତ୍ର ନାମର ଯେତେ ବି ପ୍ରଶଂସା କଲେ, ତାହା କମ୍‌ । (ନିହିମୀୟା ୯:୫ ପଢ଼ନ୍ତୁ ।) ଏଥିରେ କୌଣସି ସନ୍ଦେହ ନାହିଁ ଯେ ଲେବୀୟମାନେ ହୃଦୟରୁ ଯିହୋବାଙ୍କ ପ୍ରଶଂସା କଲେ ଓ ତାହା ଶୁଣି ଯିହୋବା ବହୁତ ଖୁସି ହୋଇଥିବେ ।

୭. ଆମେ ପ୍ରଚାର କରିବା ସମୟରେ ଓ ପ୍ରତିଦିନର କାମ କରିବା ସମୟରେ କିପରି ଯିହୋବାଙ୍କ ପ୍ରଶଂସା କରିପାରିବା ?

 ^୭ ଆଜି ଆମେ କିପରି ଯିହୋବାଙ୍କ ହୃଦୟକୁ ଖୁସି କରିପାରିବା ? ଲୋକମାନଙ୍କ ସହ କଥା ହେବା ସମୟରେ ଆମେ ଯିହୋବାଙ୍କ ବିଷୟରେ ଯେପରି ଭାବେ କଥା ହେଉ, ସେଥିରୁ ଆମେ ଦେଖାଉ ଯେ ଆମେ ଯିହୋବାଙ୍କୁ କେତେ ଭଲ ପାଉ ଆଉ ହୃଦୟରୁ କେତେ କୃତଜ୍ଞ ଅଟୁ । ପ୍ରଚାର କରିବା ସମୟରେ ଆମେ ଚେଷ୍ଟା କରୁ ଯେ ଲୋକମାନେ ଯିହୋବାଙ୍କ ବିଷୟରେ ଜାଣନ୍ତୁ, ତାଙ୍କୁ ପ୍ରେମ କରନ୍ତୁ ଓ ତାଙ୍କ ଆଡ଼କୁ ଆକର୍ଷିତ ହୁଅନ୍ତୁ । (ଯାକୁ. ୪:୮) ଆମକୁ ଯିହୋବାଙ୍କ ଗୁଣ ବିଷୟରେ କହିବାକୁ ମଧ୍ୟ ଭଲ ଲାଗେ । ଯେପରି ଯିହୋବାଙ୍କ ବିଶେଷ ଗୁଣ ପ୍ରେମ, ନ୍ୟାୟ, ବୁଦ୍ଧି, ଶକ୍ତି ଓ ଏପରି ହିଁ ଅନ୍ୟ ଗୁଣ । ଏପରି ଭାବେ ଆମେ ଯିହୋବାଙ୍କ ନାମର ପ୍ରଶଂସା କରୁ । ତାʼଛଡ଼ା ଯେବେ ଆମେ ଯିହୋବାଙ୍କ ଭଳି ହେବା ପାଇଁ ଚେଷ୍ଟା କରୁ, ତେବେ ମଧ୍ୟ ଆମେ ତାଙ୍କ ନାମର ପ୍ରଶଂସା କରୁ ଓ ତାଙ୍କ ହୃଦୟକୁ ଖୁସି କରୁ । (ଏଫି. ୫:୧) ଆଉ ଯେବେ ଆମେ ଏପରି କରୁ, ତେବେ ହୁଏତ କିଛି ଲୋକ ଏକଥା ଉପରେ ଧ୍ୟାନ ଦେବେ ଯେ ଆମେ ଦୁନିଆର ଲୋକଙ୍କଠାରୁ କେତେ ଅଲଗା । (ମାଥି. ୫:୧୪-୧୬) ଯେବେ ଆମେ ପ୍ରତିଦିନର କାମ କଲାବେଳେ ଏପରି ଲୋକଙ୍କ ସହ ଭେଟୁ ଯେଉଁମାନେ ଭଲ ମନ ରଖନ୍ତି, ତେବେ ହୁଏତ ଆମକୁ ସେମାନଙ୍କୁ ଏହା କହିବାର ସୁଯୋଗ ମିଳିପାରେ ଯେ ଆମେ କାହିଁକି ଦୁନିଆର ଲୋକମାନଙ୍କ ଭଳି ନାହୁଁ । ତେଣୁ ଭଲ ମନ ରଖୁଥିବା ଲୋକମାନେ ତାଙ୍କ ଆଡ଼କୁ ଆକର୍ଷିତ ହୋଇଯାʼନ୍ତି । ଏସବୁ ଉପାୟରେ ଯେବେ ଆମେ ଯିହୋବାଙ୍କ ନାମର ପ୍ରଶଂସା କରୁ, ତେବେ ଆମେ ତାଙ୍କ ହୃଦୟକୁ ଖୁସି କରୁ ।—୧ ତୀମ. ୨:୩, ୪.

ଯିହୋବାଙ୍କ ନାମକୁ ପ୍ରଶଂସା କଲେ ଯୀଶୁ ଖୁସି ହୁଅନ୍ତି

୮. ଆମେ କାହିଁକି କହିପାରିବା ଯେ ଯୀଶୁ ସମସ୍ତଙ୍କଠାରୁ ଅଧିକ ଜୋରସୋର୍‌ରେ ଯିହୋବାଙ୍କ ନାମର ପ୍ରଶଂସା କଲେ ?

^୮ ସ୍ୱର୍ଗରେ ଥିବା ସ୍ୱର୍ଗଦୂତ ହେଉ କିମ୍ବା ପୃଥିବୀରେ ଥିବା ମଣିଷ, କେହି ବି ଯିହୋବାଙ୍କ ବିଷୟରେ ସେତେ ଜାଣିପାରିବେ ନାହିଁ, ଯେତେ ଯୀଶୁ ଜାଣନ୍ତି । (ମାଥି. ୧୧:୨୭) ସେ ନିଜ ପିତାଙ୍କୁ ବହୁତ ପ୍ରେମ କରୁଥିଲେ । ଆଉ ସେ ସବୁବେଳେ ଜୋରସୋର୍‌ରେ ଯିହୋବାଙ୍କ ନାମର ପ୍ରଶଂସା କଲେ । (ଯୋହ. ୧୪:୩୧) ନିଜ ମୃତ୍ୟୁ ପୂର୍ବରୁ ଯୀଶୁ ପ୍ରାର୍ଥନାରେ ନିଜ ପିତାଙ୍କୁ କହିଲେ ‘ମୁଁ ଲୋକମାନଙ୍କୁ ତୁମ୍ଭ ନାମ ଜଣାଇଅଛି ।’ (ଯୋହ. ୧୭:୨୬) ପୃଥିବୀରେ ସାଢ଼େ ତିନି ବର୍ଷ ସେବା କରିବା ସମୟରେ ମଧ୍ୟ ଯୀଶୁ ଏହି କାମକୁ ସବୁଠୁ ଅଧିକ ମହତ୍ତ୍ୱ ଦେଲେ । ଆସନ୍ତୁ ଧ୍ୟାନ ଦେବା ଯେ ସେ ଏହା କିପରି କଲେ ।

୯. ଯୀଶୁ କିପରି ଗୋଟିଏ ଉଦାହରଣ ଦେଇ ନିଜ ପିତାଙ୍କ ବିଷୟରେ ଆହୁରି ଭଲଭାବେ ବୁଝାଇଲେ ?

^୯ ଯୀଶୁ ଲୋକମାନଙ୍କୁ କେବଳ ଏହା କହିଲେ ନାହିଁ ଯେ ଈଶ୍ୱରଙ୍କ ନାମ ଯିହୋବା । ସେ ଯେଉଁ ଯିହୁଦୀମାନଙ୍କୁ ଶିଖାଉଥିଲେ ସେମାନେ ଆଗରୁ ହିଁ ଈଶ୍ୱରଙ୍କ ନାମ ଜାଣିଥିଲେ । ତଥାପି ସେ ସେମାନଙ୍କୁ ‘ପିତାଙ୍କ ବିଷୟରେ ପ୍ରକାଶ କଲେ’ ବା ଜଣାଇଲେ । (ଯୋହ. ୧:୧୭, ୧୮) ଯେପରି, ଏବ୍ରୀ ଶାସ୍ତ୍ରରେ କୁହାଯାଇଛି ଯେ ଯିହୋବା ଦୟା ଓ କରୁଣା କରୁଥିବା ଈଶ୍ୱର ଅଟନ୍ତି । (ଯାତ୍ରା. ୩୪:୫-୭) କିନ୍ତୁ ଏହି କଥାକୁ ଆହୁରି ଭଲଭାବେ ବୁଝିବା ପାଇଁ ଯୀଶୁ, ହଜିଯାଇଥିବା ପୁଅ ଓ ତାʼ ବାପାର ଉଦାହରଣ ଦିଅନ୍ତି । ବାଇବଲରେ ଆମେ ପଢ଼ୁ ଯେ ପୁଅଟି ପଶ୍ଚାତାପ କରେ ଓ ନିଜ ବାପାଙ୍କ ଘରକୁ ଫେରି ଆସେ । କିନ୍ତୁ ସେ “ଦୂରରେ ଥାଉ ଥାଉ” ହିଁ ତାʼ ବାପା ତାହାକୁ ଦେଖି ଦୌଡ଼ି ଯାଇ ଆଲିଙ୍ଗନ କରନ୍ତି । ତାକୁ ହୃଦୟରୁ କ୍ଷମା କରନ୍ତି । ଏପରି ଭାବେ ଆମେ ସ୍ପଷ୍ଟ ବୁଝିପାରୁ ଯେ ଯିହୋବା କେତେ ଦୟାଳୁ ଈଶ୍ୱର ଓ ତାଙ୍କ ଭିତରେ କେତେ କରୁଣା ଭରି ରହିଛି । (ଲୂକ ୧୫:୧୧-୩୨) ଏପରି କରି ଯୀଶୁ ଆମକୁ ଯିହୋବାଙ୍କୁ ଆହୁରି ଭଲଭାବେ ବୁଝିବା ପାଇଁ ସାହାଯ୍ୟ କଲେ ।

୧୦. (କ) ଆମେ କିପରି ଜାଣିପାରୁ ଯେ ଯୀଶୁ ନିଜ ପିତାଙ୍କ ନାମ ନେଲେ ଓ ସେ ଚାହୁଁଥିଲେ ଯେ ଅନ୍ୟମାନେ ବି ଏପରି ହିଁ କରନ୍ତୁ ? (ମାର୍କ ୫:୧୯) (ଚିତ୍ର ମଧ୍ୟ ଦେଖନ୍ତୁ ।) (ଖ) ଆଜି ଯୀଶୁ ଆମଠାରୁ କʼଣ ଚାହାନ୍ତି ?

^୧୦ ଯୀଶୁ ଚାହୁଁଥିଲେ ଯେ ଅନ୍ୟ ଲୋକମାନେ ବି ଯିହୋବାଙ୍କ ନାମ ଜାଣନ୍ତୁ ଓ ତାଙ୍କ ନାମ ନିଅନ୍ତୁ । ତାଙ୍କ ସମୟର କିଛି ଧର୍ମଗୁରୁମାନେ ବିଶ୍ୱାସ କରୁଥିଲେ ଯେ ଯିହୋବାଙ୍କ ନାମ ବହୁତ ପବିତ୍ର ଅଟେ, ତେଣୁ ତାଙ୍କ ନାମ ନେବା ଉଚିତ୍‌ ନୁହେଁ । କିନ୍ତୁ ଯୀଶୁ ଏପରି ପରମ୍ପରାଗୁଡ଼ିକର ନିଜ ଉପରେ ପ୍ରଭାବ ପଡ଼ିବାକୁ ଦେଲେନାହିଁ । ସେ ଯିହୋବାଙ୍କ ନାମ ପବିତ୍ର କରିବାରେ ଲାଗି ରହିଲେ । ଗୋଟିଏ ଉଦାହରଣ ଉପରେ ଧ୍ୟାନ ଦିଅନ୍ତୁ । ଥରେ ସେ ଗରାଶୀୟମାନଙ୍କ ଅଞ୍ଚଳରେ ଏପରି ଜଣେ ଲୋକକୁ ଠିକ୍‌ କଲେ, ଯିଏ ଦୁଷ୍ଟ ସ୍ୱର୍ଗଦୂତମାନଙ୍କ କବଳରେ ଥିଲା । ଏହା ଦେଖି ଲୋକମାନେ ବହୁତ ଡରିଗଲେ ଓ ଯୀଶୁଙ୍କୁ ବିନତି କରିବାକୁ ଲାଗିଲେ ଯେ ସେ ତାଙ୍କ ଅଞ୍ଚଳ ଛାଡ଼ି ଚାଲିଯାʼନ୍ତୁ । (ମାର୍କ ୫:୧୬, ୧୭) କିନ୍ତୁ ଯୀଶୁ ଚାହୁଁଥିଲେ ଯେ ସେଠାକାର ଲୋକମାନେ ମଧ୍ୟ ଯିହୋବାଙ୍କ ନାମ ଜାଣନ୍ତୁ । ତେଣୁ ସେଠାରୁ ଯିବା ପୂର୍ବରୁ ସେ ଯେଉଁ ବ୍ୟକ୍ତିକୁ ଠିକ୍‌ କରିଥିଲେ, ତାକୁ କହିଲେ ଯେ ସେ ଯାଇ ଲୋକମାନଙ୍କୁ କହୁ ଯେ ତାଙ୍କୁ ଯୀଶୁ ନୁହଁ ବରଂ ଯିହୋବା ଠିକ୍‌ କରିଛନ୍ତି । (ମାର୍କ ୫:୧୯ ପଢ଼ନ୍ତୁ ।) a ଯୀଶୁ ଆଜି ବି ଏହା ହିଁ ଚାହାନ୍ତି । ସେ ଚାହାନ୍ତି ଯେ ପୂରା ଦୁନିଆରେ ଯିହୋବାଙ୍କ ନାମ ଲୋକମାନେ ଜାଣନ୍ତୁ । (ମାଥି. ୨୪:୧୪;  ୨୮:୧୯, ୨୦) ଯେବେ ଆମେ ଏହି କାମରେ ଭାଗ ନେଉ, ତେବେ ଆମ ରାଜା ଯୀଶୁ ବହୁତ ଖୁସି ହୁଅନ୍ତି ।

୧୧. ଯୀଶୁ ନିଜ ଶିଷ୍ୟମାନଙ୍କୁ କʼଣ ପ୍ରାର୍ଥନା କରିବା ଶିଖାଇଲେ ? ଓ ଏହି ପ୍ରାର୍ଥନା କରିବା କାହିଁକି ଏତେ ଜରୁରୀ ଅଟେ ? (ଯିହିଜିକଲ ୩୬:୨୩)

^୧୧ ଯୀଶୁ ଜାଣିଥିଲେ ଯେ ଯିହୋବାଙ୍କ ଉଦ୍ଦେଶ୍ୟ କʼଣ । ତାହା ହେଉଛି, ଯିହୋବାଙ୍କ ନାମ ପବିତ୍ର କରାଯାଉ ଓ ତାଙ୍କ ନାମରେ ଲାଗିଥିବା କଳଙ୍କ ହଟିଯାଉ । ଆଉ ଏହି କାରଣ ଯୋଗୁଁ ଆମ ଗୁରୁ ଆମକୁ ଏପରି ପ୍ରାର୍ଥନା କରିବା ଶିଖାଇଲେ, “ହେ ଆମ୍ଭମାନଙ୍କ ସ୍ୱର୍ଗସ୍ଥ ପିତା, ତୁମ୍ଭ ନାମ ପବିତ୍ର ବୋଲି ମାନ୍ୟ ହେଉ ।” (ମାଥି. ୬:୯) ଯୀଶୁ ଜାଣିଥିଲେ ଯେ ଯିହୋବାଙ୍କ ନାମକୁ ପବିତ୍ର କରାଯିବା ବିଶ୍ୱରେ ସବୁଠୁ ଜରୁରୀ ବିଷୟ ଅଟେ । (ଯିହିଜିକଲ ୩୬:୨୩ ପଢ଼ନ୍ତୁ ।) ଆଉ ସେ ଏହି ନାମକୁ ପବିତ୍ର କରିବା ପାଇଁ ଯାହାକିଛି କଲେ, ସେତିକି ପୂରା ଦୁନିଆରେ କେହି କରି ନାହାନ୍ତି । ତଥାପି ଯେବେ ଯୀଶୁଙ୍କୁ ଗିରଫ କରାଗଲା, ତେବେ ଶତ୍ରୁମାନେ ତାଙ୍କ ଉପରେ ଈଶ୍ୱରଙ୍କ ନିନ୍ଦା କରିବାର ଆରୋପ ଲଗାଇଲେ । ଯୀଶୁ ଜାଣିଥିଲେ ଯେ ନିଜ ପିତାଙ୍କ ନାମକୁ ବଦନାମ୍‌ କରିବା ସବୁଠାରୁ ବଡ଼ ପାପ ଅଟେ । ଆଉ ସେ ଜାଣିଥିଲେ ଯେ ତାଙ୍କ ଉପରେ ହିଁ ଏହି ଆରୋପ ଲଗାଯିବ । ହୁଏତ ଏହି କାରଣ ଯୋଗୁଁ ଗିରଫ ହେବାର କିଛି ସମୟ ପୂର୍ବରୁ ଯୀଶୁଙ୍କ ହୃଦୟ “ମର୍ମାନ୍ତିକ ଦୁଃଖରେ ମଗ୍ନ” ହୋଇଯାଇଥିଲା ।—ଲୂକ ୨୨:୪୧-୪୪.

୧୨. ଯୀଶୁ କିପରି କଠିନ ପରିସ୍ଥିତିରେ ମଧ୍ୟ ନିଜ ପିତାଙ୍କ ନାମକୁ ପବିତ୍ର କଲେ ?

^୧୨ ନିଜ ପିତାଙ୍କ ନାମକୁ ପବିତ୍ର କରିବା ପାଇଁ ଯୀଶୁ ସବୁ ଅତ୍ୟାଚାର, ଅପମାନ ଓ ମିଛ ଆରୋପକୁ ସହିଗଲେ । କିନ୍ତୁ ତାʼଯୋଗୁଁ ସେ କେବେ ବି ନିଜକୁ ଅପମାନିତ ମନେ କଲେ ନାହିଁ । କାରଣ ସେ ଜାଣିଥିଲେ ଯେ ସେ ସବୁବେଳେ ନିଜ ପିତାଙ୍କ ଆଜ୍ଞା ମାନନ୍ତି । (ଏବ୍ରୀ ୧୨:୨) ଆଉ ତାଙ୍କୁ ଏହା ବି ଜଣାଥିଲା ଯେ ସେହି କଠିନ ପରିସ୍ଥିତିରେ ଶୟତାନ ତାଙ୍କ ଉପରେ ସିଧାସଳଖ ଆକ୍ରମଣ କରୁଛି । (ଲୂକ ୨୨:୨-୪; ୨୩:୩୩, ୩୪) ଶୟତାନକୁ ପୂରା ଭରସା ଥିଲା ଯେ ଯୀଶୁ, ଯିହୋବାଙ୍କର ବିଶ୍ୱସ୍ତ ରହିବେ ନାହିଁ । କିନ୍ତୁ ଶୟତାନକୁ ହାର ମାନିବାକୁ ପଡ଼ିଲା । ଯୀଶୁ ଏହା ପ୍ରମାଣିତ କରିଦେଲେ ଯେ ଶୟତାନ କେତେ ନିଷ୍ଠୁର ଅଟେ ଓ କେତେ ମିଛ କହେ । ସେ ଏହା ମଧ୍ୟ ପ୍ରମାଣିତ କରିଦେଲେ ଯେ ଜଣେ ଯିହୋବାଙ୍କ ସେବକ ଯେକୌଣସି ପରିସ୍ଥିତିରେ ବି ଯିହୋବାଙ୍କର ବିଶ୍ୱସ୍ତ ରହେ ।

୧୩. ଆପଣ ନିଜ ରାଜା ଯୀଶୁଙ୍କୁ ଖୁସି କରିବା ପାଇଁ କʼଣ କରିପାରିବେ ?

^୧୩ କʼଣ ଆପଣ ନିଜ ରାଜା ଯୀଶୁଙ୍କୁ ଖୁସି କରିବା ପାଇଁ ଚାହାନ୍ତି ? ଯଦି ହଁ, ତାହେଲେ ଯିହୋବାଙ୍କ ନାମକୁ ପ୍ରଶଂସା କରିବା ଜାରି ରଖନ୍ତୁ, ଅନ୍ୟମାନଙ୍କୁ କହନ୍ତୁ ଯେ ସେ ପ୍ରକୃତରେ କିପରି ଅଟନ୍ତି । ଯେବେ ଆପଣ ଏପରି କରିବେ, ତେବେ ଆପଣ ଯୀଶୁଙ୍କ ଉଦାହରଣରେ ଚାଲୁଥିବେ । (୧ ପିତ. ୨:୨୧) ଯୀଶୁଙ୍କ ପରି ଆପଣ ଯିହୋବାଙ୍କର ହୃଦୟ ଖୁସି କରୁଥିବେ । ଆଉ ଏହା ପ୍ରମାଣିତ କରୁଥିବେ ଯେ ତାଙ୍କ ଶତ୍ରୁ ଶୟତାନ ଯେଉଁ ଆରୋପ ଲଗାଇଛି, ତାହା ପୂରାପୂରି ମିଛ ।

ଯିହୋବାଙ୍କ ନାମର ପ୍ରଶଂସା କଲେ ଲୋକମାନଙ୍କର ଜୀବନ ରକ୍ଷା ହୋଇପାରେ

୧୪-୧୫. ଯେବେ ଆମେ ଲୋକମାନଙ୍କୁ ଯିହୋବାଙ୍କ ବିଷୟରେ ସତ୍ୟ କହୁ, ତେବେ ଏଥିରୁ କʼଣ ଲାଭ ହୁଏ ?

^୧୪ ଯିହୋବାଙ୍କ ନାମର ପ୍ରଶଂସା କଲେ, ଲୋକମାନଙ୍କର ଜୀବନ ରକ୍ଷା ହୋଇପାରେ । ତାହା କିପରି ? ଶୟତାନ “ଅବିଶ୍ୱାସୀମାନଙ୍କର ଜ୍ଞାନଚକ୍ଷୁ ଅନ୍ଧ” କରିଅଛି । (୨ କରି. ୪:୪) ତେଣୁ ଲୋକମାନେ ଶୟତାନର  ମିଥ୍ୟା ଶିକ୍ଷାଗୁଡ଼ିକ ଉପରେ ବିଶ୍ୱାସ କରିନିଅନ୍ତି । ଯେପରି, ସେମାନେ ବିଶ୍ୱାସ କରନ୍ତି ଯେ କେହି ଈଶ୍ୱର ନାହାନ୍ତି କିମ୍ବା ଯଦି କେହି ଈଶ୍ୱର ଅଛନ୍ତି, ତାହେଲେ ବି ତାଙ୍କୁ କାହାରି ଚିନ୍ତା ନାହିଁ, ଈଶ୍ୱର ବହୁତ ନିର୍ଦ୍ଦୟୀ ଅଟନ୍ତି ଓ ପାପୀ ଲୋକମାନଙ୍କୁ ସବୁବେଳେ ଦଣ୍ଡ ଦିଅନ୍ତି । ଶୟତାନ ଏହି ମିଛ କଥାଗୁଡ଼ିକ କହି ଯିହୋବାଙ୍କ ପବିତ୍ର ନାମକୁ ବଦନାମ୍‌ କରିବାକୁ ଚାହେଁ, ଯାହାଫଳରେ ଲୋକମାନେ ଯିହୋବାଙ୍କଠାରୁ ଦୂରେଇ ଯାଆନ୍ତୁ । କିନ୍ତୁ ଯେବେ ଆମେ ପ୍ରଚାର କରୁ, ତେବେ ଆମେ ଶୟତାନର ଉଦ୍ଦେଶ୍ୟକୁ ବିଫଳ କରିଦେଉ । ଆମେ ଲୋକମାନଙ୍କୁ ନିଜ ପିତାଙ୍କ ବିଷୟରେ ସତ୍ୟ କହୁ ଓ ଏପରି କରି ତାଙ୍କ ପବିତ୍ର ନାମର ପ୍ରଶଂସା କରୁ । ଏଥିରୁ ଆଉ କʼଣ ଲାଭ ହୁଏ ?

^୧୫ ଈଶ୍ୱରଙ୍କ ବାକ୍ୟରେ ବହୁତ ଶକ୍ତି ଅଛି । ଯେବେ ଆମେ ଲୋକମାନଙ୍କୁ ଯିହୋବାଙ୍କ ବିଷୟରେ ଶିଖାଉ ଓ ସେମାନଙ୍କୁ କହୁ ଯେ ପରମେଶ୍ୱର ପ୍ରକୃତରେ କିପରି, ତେବେ ଏଥିରୁ ବହୁତ ଲାଭ ହୁଏ । ଯେଉଁମାନେ ଶୟତାନର ମିଛ ଯୋଗୁଁ ଅନ୍ଧ ଥିଲେ, ସେମାନଙ୍କର ଆଖି ଖୋଲିଯାଏ ଓ ସେମାନେ ଯିହୋବାଙ୍କୁ ପ୍ରେମ କରିବାକୁ ଲାଗନ୍ତି । ଯେବେ ସେମାନଙ୍କୁ ଯିହୋବାଙ୍କ ଶକ୍ତି ବିଷୟରେ ଜଣାପଡ଼େ, ତେବେ ସେମାନେ ଆଶ୍ଚର୍ଯ୍ୟ ହୋଇଯାʼନ୍ତି । (ଯିଶା. ୪୦:୨୬) ଯିହୋବାଙ୍କ ନ୍ୟାୟ ବିଷୟରେ ଜାଣି ସେମାନଙ୍କୁ ବହୁତ ସାନ୍ତ୍ୱନା ମିଳେ । (ଦ୍ୱିବି. ୩୨:୪) ଆଉ ଯେବେ ସେମାନଙ୍କୁ ଯିହୋବାଙ୍କ ବୁଦ୍ଧି ବିଷୟରେ ଜଣାପଡ଼େ, ତେବେ ସେମାନଙ୍କର ଆଖି ଖୋଲିଯାଏ ଓ ଯେବେ ସେମାନେ ବାଇବଲରୁ ଶିଖନ୍ତି ଯେ ଯିହୋବା ଅନ୍ୟମାନଙ୍କୁ କେତେ ପ୍ରେମ କରନ୍ତି, ତେବେ ଏଥିରୁ ସେମାନଙ୍କୁ ବହୁତ ସାନ୍ତ୍ୱନା ମିଳେ । (୧ ଯୋହ. ୪:୮) ସେମାନେ ଯିହୋବାଙ୍କ ଆଡ଼କୁ ଆକର୍ଷିତ ହୁଅନ୍ତି, ତାଙ୍କ ସହ ସେମାନଙ୍କର ଏକ ମଜବୁତ୍‌ ସମ୍ପର୍କ ହୋଇଯାଏ ଓ ସେମାନଙ୍କୁ ଏହି ଆଶା ଉପରେ ପୂରା ଭରସା ହୋଇଯାଏ ଯେ ସେମାନେ ତାଙ୍କ ପିଲା ଭାବେ ସବୁଦିନ ଯାଏ ବଞ୍ଚିବେ । ସତରେ, ନିଜ ପିତା ଯିହୋବାଙ୍କ ନିକଟକୁ ଆସିବା ପାଇଁ ଅନ୍ୟମାନଙ୍କୁ ସାହାଯ୍ୟ କରିବା କେତେ ବଡ଼ ସମ୍ମାନର କଥା ଅଟେ । ଯେବେ ଆମେ ଏହି ଦାୟିତ୍ୱ ତୁଲାଉ, ତେବେ ଯିହୋବା ଆମକୁ ନିଜ “ସହକର୍ମୀ” ମନେ କରନ୍ତି ।—୧ କରି. ୩:୫, ୯.

୧୬. ଈଶ୍ୱରଙ୍କ ନାମ ବିଷୟରେ ଜାଣି କିଛି ଲୋକମାନଙ୍କୁ କିପରି ଲାଗିଲା ?

^୧୬ ହୁଏତ ଆରମ୍ଭରେ ଆମେ ଲୋକମାନଙ୍କୁ କେବଳ ଏତିକି କହିବା ଯେ ଈଶ୍ୱରଙ୍କ ନାମ ଯିହୋବା । କେବଳ ଏତିକି କଥା ହିଁ ଭଲ ମନ ରଖୁଥିବା ଲୋକଙ୍କ ହୃଦୟକୁ ଛୁଇଁଯାଏ । ଆଲିଆ b ନାମକ ଜଣେ ଯୁବା ଝିଅର ଉଦାହରଣ ଉପରେ ଧ୍ୟାନ ଦିଅନ୍ତୁ । ସେ ଏପରି ପରିବାରରେ ବଢ଼ିଥିଲା, ଯେଉଁଠି କେହି ବାଇବଲ ଉପରେ ବିଶ୍ୱାସ କରୁ ନ ଥିଲେ । ସେ ନିଜ ଧର୍ମରୁ ମଧ୍ୟ ଖୁସି ନ ଥିଲା ଓ ତାକୁ ଲାଗୁଥିଲା ଯେ ଈଶ୍ୱର ତାʼଠାରୁ ବହୁତ ଦୂରରେ ଅଛନ୍ତି । କିନ୍ତୁ ଯେବେ ସେ ଯିହୋବାଙ୍କ ସାକ୍ଷୀମାନଙ୍କ ସହ ବାଇବଲ ଅଧ୍ୟୟନ କଲା, ତେବେ ତାʼ ଚିନ୍ତାଧାରା ବଦଳିଗଲା । ସେ ବୁଝିପାରିଲା ଯେ ଈଶ୍ୱର ତାʼ ସାଙ୍ଗ ହୋଇପାରିବେ । ସେ ଏକଥା ଜାଣି ବି ଆଶ୍ଚର୍ଯ୍ୟ ହୋଇଗଲା ଯେ ବାଇବଲର ଅନେକ ଅନୁବାଦରେ ଈଶ୍ୱରଙ୍କ ନାମକୁ ବାହାର କରି ଦିଆଯାଇଛି ଓ ତାʼ ଜାଗାରେ ପ୍ରଭୁ ଭଳି ଉପାଧି ଦିଆଯାଇଛି । ଯିହୋବାଙ୍କ ନାମ ଜାଣି ତାʼ ପୂରା ଜୀବନ ବଦଳିଗଲା । ସେ ଖୁସିର ସହ କହେ, “ମୋର ସବୁଠୁ ଭଲ ସାଙ୍ଗର ବି ଗୋଟିଏ ନାମ ଅଛି ।” ଏହି ସତ୍ୟ ଜାଣି ତାକୁ କʼଣ ଲାଭ ହେଲା ? ସେ  କହେ, “ଏବେ ମୁଁ ବହୁତ ଶାନ୍ତି ଅନୁଭବ କରେ । ମୁଁ ବହୁତ ଖୁସି ଯେ ମୋତେ ଯିହୋବାଙ୍କୁ ଜାଣିବା ପାଇଁ ସୁଯୋଗ ମିଳିଲା ।” ଷ୍ଟିଭ୍‌ ନାମକ ଜଣେ ବ୍ୟକ୍ତିର ଉଦାହରଣ ଉପରେ ଧ୍ୟାନ ଦିଅନ୍ତୁ, ଯିଏ ଜଣେ ସଙ୍ଗୀତକାର ଥିଲେ । ସେ ଏପରି ପରିବାରରେ ବଢ଼ିଥିଲେ ଯେଉଁଠି ଯିହୁଦୀ ଧର୍ମକୁ ବହୁତ ମହତ୍ତ୍ୱ ଦିଆଯାଉଥିଲା । କିନ୍ତୁ ଧୀରେ ଧୀରେ ସେ ନିଜ ଧର୍ମକୁ ଛାଡ଼ିଦେଲେ, କାରଣ ସେ ଦେଖିଲେ ଯେ ଧର୍ମରେ ଯାହା ଶିଖାଯାଉଛି, ଲୋକମାନେ ତାହା ମାନୁନାହାନ୍ତି । କିଛି ସମୟ ପରେ ତାଙ୍କ ମାଆଙ୍କର ମୃତ୍ୟୁ ହୋଇଗଲା । ସେହି ଦୁଃଖରେ ହିଁ ଥିବା ବେଳେ ସେ ଗୋଟିଏ ବାଇବଲ ଅଧ୍ୟୟନରେ ଯାଇଥିଲେ, ଯାହା ଜଣେ ଯିହୋବାଙ୍କ ସାକ୍ଷୀ ଚଳାଉଥିଲେ । ଯେବେ ସେ ଈଶ୍ୱରଙ୍କ ନାମ ବିଷୟରେ ଜାଣିଲେ, ତେବେ ତାଙ୍କୁ ଏହା ଜାଣି ବହୁତ ଭଲ ଲାଗିଲା । ସେ କହିଲେ, “ମୁଁ ଆଗରୁ କେବେ ଈଶ୍ୱରଙ୍କ ନାମ ଶୁଣି ନ ଥିଲି ।” ସେ ଏହା ବି କହିଲେ, “ମୁଁ ପ୍ରଥମ ଥର ଜାଣିଲି ଯେ ଈଶ୍ୱର ସତରେ ଅଛନ୍ତି ଓ ତାଙ୍କ ଭିତରେ ଆମ ଭଳି ଭାବନା ଅଛି । ମୁଁ ବୁଝିଗଲି ମୋତେ ଗୋଟିଏ ଭଲ ସାଙ୍ଗ ମିଳିଯାଇଛି ।”

୧୭. ଆପଣ କାହିଁକି ଦୃଢ଼ ନିଷ୍ପତ୍ତି ନେଇଛନ୍ତି ଯେ ଆପଣ ସବୁବେଳେ ଯିହୋବାଙ୍କ ନାମର ପ୍ରଶଂସା କରିବେ ? (ଚିତ୍ର ମଧ୍ୟ ଦେଖନ୍ତୁ ।)

^୧୭ କʼଣ ଆପଣ ପ୍ରଚାର କରିବା ଓ ଶିଖାଇବା ସମୟରେ ଲୋକମାନଙ୍କୁ କହନ୍ତି ଯେ ଈଶ୍ୱରଙ୍କ ନାମ ଯିହୋବା ? କʼଣ ଆପଣ ସେମାନଙ୍କୁ ଏହା ବୁଝିବା ପାଇଁ ସାହାଯ୍ୟ କରନ୍ତି ଯେ ଆମ ଈଶ୍ୱର ପ୍ରକୃତରେ କିପରି ? ଏପରି କରିବା ଦ୍ୱାରା ଆପଣ ଈଶ୍ୱରଙ୍କ ନାମର ପ୍ରଶଂସା କରୁଥାʼନ୍ତି ଓ ଲୋକମାନଙ୍କୁ ତାଙ୍କ ବିଷୟରେ ଲଗାତାର ଜାଣିବା ପାଇଁ ସାହାଯ୍ୟ କରୁଥାʼନ୍ତି । ଏପରି ଭାବେ ଆପଣ ଆମ ରାଜା ଯୀଶୁଙ୍କ ଉଦାହରଣରେ ଚାଲୁଥିବେ, ଆପଣ ଲୋକମାନଙ୍କ ଜୀବନ ରକ୍ଷା କରିପାରିବେ । ଆଉ ସବୁଠୁ ବଡ଼ କଥା ଏଥିରୁ ଆପଣ ଯିହୋବାଙ୍କ ହୃଦୟ ଖୁସି କରିପାରିବେ ଯିଏ ଆମକୁ ବହୁତ ପ୍ରେମ କରନ୍ତି । ତେଣୁ ଆସନ୍ତୁ, ଆମେ ‘ସଦାସର୍ବଦା ତାଙ୍କ ନାମର ପ୍ରଶଂସା କରିବା ।’—ଗୀତ. ୧୪୫:୨.